నో మోర్ డౌట్స్... 'సంక్రాంతికి వస్తున్నాం' టైటిల్ లో పండుగ ఉంది. ఆ పండక్కి ప్రేక్షకుల ముందుకు సినిమాను తీసుకు రావడానికి ముందు నుంచి సన్నాహాలు చేశారు. ఇప్పుడు పండక్కి వస్తున్నట్లు అధికారికంగా విడుదల తేదీని వెల్లడించారు.
జనవరి 14న 'సంక్రాంతికి వస్తున్నాం'
విక్టరీ వెంకటేష్ హీరోగా బ్లాక్ బస్టర్ హిట్ మెషిన్ అనిల్ రావిపూడి దర్శకత్వంలో రూపొందుతున్న తాజా సినిమా 'సంక్రాంతికి వస్తున్నాం'. ఇంతకు ముందు వీళ్ళిద్దరి కలయికలో 'ఎఫ్ 2', 'ఎఫ్ 3' సినిమాలు వచ్చాయి. ఆ రెండిటినీ నిర్మించిన శ్రీ వెంకటేశ్వర క్రియేషన్స్ సంస్థ ఈ తాజా సినిమాను నిర్మించింది. 'దిల్' రాజు సమర్పణలో ఆయన సోదరుడు శిరీష్ ప్రొడ్యూస్ చేస్తున్న చిత్రమిది. దీనిని సంక్రాంతి సందర్భంగా జనవరి 14న విడుదల చేయనున్నట్లు ఈరోజు అధికారికంగా వెల్లడించారు.
'సంక్రాంతికి వస్తున్నాం' రిలీజ్ డేట్ అనౌన్స్ చేసిన సందర్భంగా విడుదల చేసిన వెంకటేష్ స్టిల్ అభిమానులతో పాటు ప్రేక్షకులను సైతం ఆకట్టుకునేలా ఉంది. లుంగీ కట్టిన వెంకీ... చేతిలో ఓ గన్ పట్టుకుని, కళ్ళజోడు పెట్టుకుని సీరియస్ లుక్ లో కనిపించారు. 'దిల్' రాజు, అనిల్ రావిపూడి కలయికలో రూపొందిన 'ఎఫ్ 2', 'సరిలేరు నీకెవ్వరు' సినిమాలు సంక్రాంతికి వచ్చి విజయాలు సాధించాయి. ఈ సినిమా కూడా తప్పకుండా విజయం సాధిస్తుందని అనిల్ రావిపూడి చెప్పారు.
థియేటర్లలో ముందు రామ్ చరణ్...
మూడు రోజుల తర్వాత నుంచి వెంకీ!
'సంక్రాంతికి వస్తున్నాం' చిత్ర సమర్పకులు దిల్ రాజు నిర్మాత శిరీష్ నుంచి సంక్రాంతి పండక్కి మరో సినిమా వస్తుంది. గ్లోబల్ స్టార్ రామ్ చరణ్ హీరోగా శంకర్ దర్శకత్వంలో నిర్మించిన 'గేమ్ చేంజర్' జనవరి 10న విడుదల కానున్న సంగతి తెలిసిందే. ఆ సినిమాను భారీ ఎత్తున విడుదల చేయనున్నారు. మూడు రోజుల తర్వాత 14వ తేదీ నుంచి అందులో కొన్ని థియేటర్లను వెంకటేష్ సినిమాకు కేటాయించనున్నారు.
వెంకటేష్ భార్య పాత్రలో ఐశ్వర్య...
మాజీ ప్రేయసిగా మీనాక్షి చౌదరి!
'సంక్రాంతికి వస్తున్నాం' సినిమాలో కథానాయికగా తెలుగు అమ్మాయి ఐశ్వర్య రాజేష్ నటిస్తున్నారు. వెంకీతో ఆమెకు తొలి చిత్రమిది. ఈ సినిమాలో ఆవిడ హీరో భార్య పాత్రలో నటిస్తున్నారు. వెంకటేష్ మాజీ ప్రేయసిగా యంగ్ అండ్ హ్యాపెనింగ్ హీరోయిన్ మీనాక్షి చౌదరి నటిస్తున్నారు. వెంకీతో ఆమెకు ఇదే తొలి చిత్రం.
'సంక్రాంతికి వస్తున్నాం' చిత్రానికి వరుస విజయాలలో ఉన్న బీమ్స్ సిసిరోలియో సంగీతం అందిస్తున్నారు. ఇటీవల రమణ గోగులతో సినిమా కోసం ఒక పాట కూడా పాటించారు. ఆల్మోస్ట్ 18 సంవత్సరాల తర్వాత వెంకటేష్ రమణ గోగుల కలయికలో ఒక పాట రానుంది. దానితోపాటు సినిమాలో పాటల కోసం ఆడియన్స్ ఎంతో ఆసక్తిగా ఎదురు చూస్తున్నారు.
Also Read: క్రిస్మస్ బరిలో ఫ్లాప్స్ నుంచి బయట పడేది ఎవరు? హిట్టు కొట్టేది ఎవరు? - అన్నీ క్రేజీ సినిమాలే