నేషనల్ క్రష్ రష్మిక మందన్న తాజాగా తన జీవితంలో నవంబర్ 25 చాలా ప్రత్యేకమైన రోజు అంటూ ఎమోషనల్ కామెంట్స్ చేసింది. ఆ డేట్ ఎందుకు స్పెషల్? అనే విషయాన్ని వివరంగా వెల్లడిస్తూ సోషల్ మీడియాలో ఓ సుధీర్ఘ పోస్ట్ చేసింది.
ఐకాన్ స్టార్ అల్లు అర్జున్, రష్మిక మందన్న జంటగా నటిస్తున్న పాన్ ఇండియా యాక్షన్ ఎంటర్టైనర్ "పుష్ప ది రూల్". క్రియేటివ్ డైరెక్టర్ సుకుమార్ దర్శకత్వంలో అత్యంత భారీ బడ్జెట్ తో రూపొందుతున్న ఈ సినిమా సోమవారంతో షూటింగ్ పూర్తి చేసుకున్న సంగతి అందరికీ తెలిసిందే. ఈ నేపథ్యంలోనే ఎన్నో ఏళ్ల నుంచి ఈ సినిమా కోసం తాను వర్క్ చేస్తున్నానని వెల్లడించిన రష్మిక, ఇక సెట్ లో అడుగు పెట్టడం కుదరదని తెలిసి ఎంతో భావోద్వేగానికి గురయ్యానంటూ పోస్ట్ చేసింది. ఆ పోస్టులో రష్మిక "డియర్ డైరీ... నవంబర్ 25 నా జీవితంలో ఎన్నో భావోద్వేగాలతో కూడుకున్న ప్రత్యేకమైన రోజు. ఏం మాట్లాడాలో కూడా అర్థం కావడం లేదు. నవంబర్ 24వ తేదీన సాయంత్రం మేము అందరం షూటింగ్ పూర్తి చేసి, చెన్నైలో ఈవెంట్ కు వెళ్ళాము. అదే రోజు హైదరాబాద్ కు తిరిగి వచ్చాము. ఇంటికి వెళ్లి దాదాపు నాలుగు గంటల పాటు నిద్రపోయాను. ఇక ఉదయాన్నే నిద్ర లేచి, పుష్ప షూటింగ్ కోసం పరుగులు పెట్టాను. అయితే ఈ సినిమాకు ఇదే నా ఆఖరి రోజు షూటింగ్. ఆరోజు స్పెషల్ సాంగ్ షూట్ చేశాము. రాత్రి వరకు సెట్ లోనే ఉన్నాము. కానీ అది ఆఖరి రోజులా నాకు అస్సలు అనిపించలేదు. గత ఐదేళ్లుగా ఈ సినిమా సెట్ లోనే గడిపాను. అందుకే పుష్ప సెట్ నాకొక ఇల్లులా మారిపోయింది. ఇప్పటి వరకు పడిన ఈ సినిమా కోసం పడిన కష్టం, నీరసం... చివరి రోజు కావడంతో అన్ని నా కళ్ళ ముందు కదిలాయి. ఓవైపు ఆనందం, మరోవైపు టీంతో పాటు సెట్ ను కూడా విడిచి పెడుతున్నానని బాధ... ఇలా రకరకాల భావోద్వేగలతో మనసు నిండిపోయింది. ఈ సినిమా కోసం వర్క్ చేసిన ప్రతి ఒక్కరిని ఇకపై మిస్ అవుతాను. ఎంతో కాలం తర్వాత బాధతో బాగా ఏడ్చాను. నేను ఆ విధంగా ఎందుకు రియాక్ట్ అయ్యానో కూడా అర్థం కాలేదు" అంటూ సోషల్ మీడియాలో పంచుకుంది.
Also Read: దేవి శ్రీ ప్రసాద్ మాటల్లో తప్పేముంది? - పుష్ప 2 మ్యూజిక్ ఇష్యూ మీద నిర్మాత రవిశంకర్ రియాక్షన్
ఇక సుకుమార్ అల్లు అర్జున్ లతో తనకు మంచి అనుబంధం ఉందన్న విషయాన్ని రష్మిక గుర్తుచేసుకుంది. ఇదిలా ఉండగా డిసెంబర్ 5న "పుష్ప ది రైజ్" మూవీకి సీక్వెల్ గా "పుష్ప ది రూల్" మూవీ భారీ ఎత్తున రిలీజ్ కాబోతోంది. సినిమా రిలీజ్ కు ఇంకా కొన్ని రోజులు మాత్రమే మిగిలి ఉంది. ప్రస్తుతం ఈ మూవీకి సంబంధించిన నిర్మాణానంతర పనులు శరవేగంగా జరుగుతున్నాయి. మరోవైపు చిత్రబృందం ప్రమోషన్లలో బిజీగా ఉన్నారు. అలాగే సినిమాపై అంచనాలు ఓ రేంజ్ లో ఉన్నాయి.