Nitesh Tiwari Ramayan Latest Update: రామాయణం లాంటి ఇతిహాసాన్ని ఎంతమంది దర్శకులు ఎన్నిసార్లు తెరకెక్కించినా... దానిని చూడడానికి ప్రేక్షకులు ముందుకొస్తారు. అందుకే బాలీవుడ్ డైరెక్టర్ నితేష్ తివారీ కూడా ఈసారి తన స్టైల్‌లో రామాయణాన్ని చెప్పడానికి సిద్ధమయ్యాడు. అసలు నితేష్ తివారీ రామాయణాన్ని తెరకెక్కిస్తున్న వార్తలు నిజమా కాదా అని ప్రేక్షకులు కన్‌ఫ్యూజన్‌లో ఉండగా తాజాగా ఈ మూవీ సెట్స్ నుండి ఫోటోలు లీక్ అవ్వడంతో ప్రేక్షకులకు ఓ క్లారిటీ వచ్చింది. తాజాగా ఈ సినిమా గురించి మరొక ఆసక్తికర రూమర్ బాలీవుడ్‌లో వైరల్ అవుతోంది. ఈ రామాయణం కేవలం ఒక భాగంగా మాత్రమే విడుదల కావడం లేదట.
సెట్స్ నుంచి లీకైన ఫోటోలు...
నితేష్ తివారీ... తను తెరకెక్కించే రామాయణం కోసం ఎంచుకున్న క్యాస్టింగ్‌తోనే ప్రేక్షకుల్లో ఓ రేంజ్‌లో హైప్ క్రియేట్ చేశారు. రణబీర్ కపూర్‌ను రాముడిగా సాయి పల్లవిను సీతగా, కన్నడ స్టార్ యశ్‌ను రావణాసురుడిగా ఎంపిక చేయడంతో ఫ్యాన్స్ అంతా ఈ సినిమాను ఎప్పుడెప్పుడు చూస్తామా అని ఎదురుచూడడం మొదలుపెట్టారు. ఇతర క్యాస్టింగ్ వివరాలు పూర్తిగా బయటికి రాకపోయినా.. ‘రామాయణ్’ సెట్స్ నుండి రణబీర్ కపూర్, సాయి పల్లవి ఫోటోలు వైరల్ అవ్వడంతో కొన్నిరోజుల పాటు సోషల్ మీడియాలో ఈ సినిమా గురించే టాక్ నడిచింది. తాజాగా ఈ సినిమాకు సంబంధించి మరో లేటెస్ట్ రూమర్ బయటికొచ్చింది.
రెండు భాగాలుగా ప్రేక్షకుల ముందుకు...
బాలీవుడ్‌లో వినిపిస్తున్న కథనాల ప్రకారం.. ‘రామాయణ్’ను రెండు భాగాలుగా విడుదల చేయాలని దర్శకుడు నితేష్ తివారీ నిర్ణయించుకున్నారట. గత కొన్నాళ్లుగా ఒక సినిమాను రెండు భాగాలుగా విడుదల చేయడం ఒక హిట్ ఫార్ములాగా మారిపోయింది. అలాగే ఈ సినిమా స్కేల్‌ను దృష్టిలో పెట్టుకొని తను ఈ ఆలోచనకు వచ్చినట్టు సమాచారం. అంతే కాకుండా ఇలా చేయడం వల్ల కథను రెండు దృష్టి కోణాల్లో చూపించవచ్చని దర్శకుడు భావిస్తున్నారట. మామూలుగా రెండు భాగాలుగా వచ్చే సినిమాలు... ముందుగా మొదటి భాగం షూటింగ్‌ను పూర్తి చేసుకొని, అది ప్రేక్షకుల ముందుకు వచ్చిన తర్వాత రెండో భాగం షూటింగ్ మొదలవుతుంది. కానీ ‘రామాయణ్’ అలా కాకుండా రెండు భాగాలుగా ఒకేసారి షూటింగ్ జరగనుందని తెలుస్తోంది.
ఒకే భారీ షెడ్యూల్..
‘రామాయణ్’ పార్ట్ 1 ప్రేక్షకుల ముందుకు రాకముందే పార్ట్ 2 షూటింగ్ కూడా ప్రారంభించనున్నారట మేకర్స్. ఈ రెండు భాగాల షూటింగ్‌ను పూర్తి చేయడం కోసం 350 రోజుల షెడ్యూల్‌ను ప్రిపేర్ చేసిందట టీమ్. ఈ షెడ్యూల్స్‌లో రణబీర్ కపూర్, సాయి పల్లవి, యశ్‌తో పాటు ఇతర మూవీ క్యాస్టింగ్ కూడా పాల్గొనేలా ప్లాన్ చేస్తున్నారు. ఒక ఏడాది వ్యవధిలోనే ‘రామాయణ్’కు సంబంధించిన రెండు భాగాలు విడుదలయ్యేలా కూడా సన్నాహాలు చేస్తోందట మూవీ టీమ్. మొత్తానికి రోజుకు ఒక లేటెస్ట్ రూమర్‌పై నితేష్ తివారీ తెరకెక్కిస్తున్న ‘రామాయణ్’పై ప్రేక్షకుల్లో హైప్ క్రియేట్ అవుతోంది. ఇక ఈ మూవీ రెండు భాగాలుగా వస్తుందనే వార్త కూడా సోషల్ మీడియాలో వైరల్ అవుతోంది.