ఆంధ్రప్రదేశ్ ఎన్నికల కోసం సినిమా షూటింగులకు, ఇండస్ట్రీ పనులకు గాడ్ ఆఫ్ మాసెస్, నట సింహం నందమూరి బాలకృష్ణ (Nandamuri Balakrishna) కాస్త గ్యాప్ ఇచ్చారు. ఏపీలో తెలుగు దేశం పార్టీ విజయం కోసం ఆయన కృషి చేశారు. తాను పోటీ చేసిన హిందూపూర్ నియోజకవర్గంతో పాటు పలు ప్రాంతాల్లో పర్యటించి కూటమి అభ్యర్థుల తరఫున ప్రచారం చేశారు. ఏపీలో ఎన్నికల హడావిడి ముగియడంతో పాటు కూటమి ప్రభుత్వం కొలువు తీరింది. ఇప్పుడు సినిమాలపై దృష్టి పెట్టారు బాలకృష్ణ.
దుర్మార్గుల భరతం పడుతున్న అసురుడు!
నందమూరి బాలకృష్ణ కథానాయకుడిగా శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ సంస్థలు ఓ సినిమా ప్రొడ్యూస్ చేస్తున్నాయి. బాబీ కొల్లి (కెఎస్ రవీంద్ర) దర్శకత్వం వహిస్తున్నారు. నాగవంశీ సూర్యదేవర, త్రివిక్రమ్ శ్రీనివాస్ సతీమణి సాయి సౌజన్య నిర్మాతలు. బాలయ్య 109వ సినిమా కనుక NBK 109 అంటున్నారు. లేటెస్ట్ అప్డేట్ ఏమిటంటే... ఈ సినిమా షూటింగ్ మళ్ళీ మొదలైంది.
హైదరాబాద్ సిటీలో ఎన్.బి.కె 109 కొత్త షెడ్యూల్ సోమవారం (జూన్ 24న) స్టార్ట్ చేశారు. ఇందులో హీరోతో పాటు ఇతర ప్రధాన తారాగణం మీద బాబీ కీలక సన్నివేశాలు తెరకెక్కిస్తున్నారు. కొన్ని రోజుల పాటు ఈ షెడ్యూల్ సాగుతుందని తెలిసింది. బాలకృష్ణ బర్త్ డే గిఫ్టుగా విడుదల చేసిన గ్లింప్స్ అందర్నీ ఆకట్టుకుంటుంది.
''దేవుడు చాలా మంచోడు అయ్యా. దుర్మార్గులకు కూడా వరాలు ఇస్తాడు. వీళ్ళ అంతు చూడాలంటే కావాల్సింది జాలి, దయ, కరుణ - ఇలాంటి పదాలకు అర్థం తెలియని అసురుడు'' అంటూ మకరంద్ దేశ్ పాండే డైలాగ్ చెప్పగా... బాలకృష్ణ విజువల్స్ రావడం అభిమానులకు ఆనందాన్ని ఇచ్చింది. ఈ సినిమాను 2024లో ప్రేక్షకుల ముందుకు తీసుకు రావడానికి సన్నాహాలు చేస్తున్నారు.
Also Read: ఏపీలో 'కల్కి 2898 ఏడీ' టికెట్ రేట్స్ పెరిగాయ్ - తెలంగాణలో కంటే ఎక్కువ రోజులు, ఎక్కువ రేట్లు
NBK109 Movie Cast And Crew: బాలకృష్ణ సరసన ఈ సినిమాలో కథానాయికగా ఎవరు నటిస్తున్నారు? అనేది ఇంకా చెప్పలేదు. కానీ, ఊర్వశి రౌటేలా ఓ రోల్ చేస్తున్నారని సమాచారం. ఇందులో బాలీవుడ్ స్టార్ హీరో, 'యానిమల్'లో తన నటనతో, విలనిజంతో ఎంతో మంది ప్రేక్షకుల హృదయాలు కొల్లగొట్టిన బాబీ డియోల్ కీలక పాత్రలో కనిపించనున్నారు. ఇందులోనూ ఆయనది విలన్ రోల్ అట. ఇక, ఈ సినిమాకు యువ సంగీత సంచలనం ఎస్ థమన్ సంగీతం అందిస్తున్నారు.