Kamal Haasan: ‘కల్కి 2898 AD’లో నా క్యారెక్టర్ అదే, ఇండియన్ 2 మాత్రమే 3 కూడా పూర్తయ్యింది - కమల్ హాసన్

Kamal Haasan: కోలీవుడ్ సీనియర్ హీరో కమల్ హాసన్.. తాజాగా ఒక ఇంటర్వ్యూలో పాల్గొనగా.. అందులో తన అప్‌కమింగ్ సినిమాల గురించి ఆసక్తికర అప్డేట్ అందించి ఫ్యాన్స్‌ను హ్యాపీ చేశారు.

Kamal Haasan about Kalki 2898 AD and Indian 2: ప్రస్తుతం ఏ ఇండస్ట్రీలో చూసినా సీనియర్ హీరోలదే హవా సాగుతోంది. యంగ్ హీరోలకంటే సీనియర్ హీరోల స్క్రిప్ట్ సెలక్షన్ చాలా డిఫరెంట్‌గా ఉంటుంది. అంతే కాకుండా వారు బ్యాక్ టు బ్యాక్ చిత్రాలతో కూడా ప్రేక్షకులను అలరించడానికి సిద్ధమవుతున్నారు. అందులో కోలీవుడ్ సీనియర్ హీరో కమల్ హాసన్ కూడా ఒకరు. తాజాగా ఒక ఇంటర్వ్యూలో పాల్గొన్న కమల్.. తన అప్‌కమింగ్ సినిమాల గురించి బయటపెట్టారు. ఇప్పటికే ఆయన.. ప్రభాస్ హీరోగా నటిస్తున్న ‘కల్కి 2898 AD’లో ఒక కీలక పాత్ర పోషిస్తున్న విషయం తెలిసిందే. అయితే అందులో తన పాత్ర ఎలా ఉంటుందో ఈ ఇంటర్వ్యూలో హింట్ ఇచ్చారు.

రెండూ పోస్ట్ ప్రొడక్షన్ దశలోనే..

కమల్ హాసన్ చివరిగా లోకేశ్ కనకరాజ్ దర్శకత్వంలో తెరకెక్కిన ‘విక్రమ్’లో హీరోగా కనిపించారు. ఆ తర్వాత ఆయన వెండితెరపై కనుమరుగయిపోయారు. అందుకే 2024లో తను చేస్తున్న ప్రాజెక్ట్స్‌పై క్లారిటీ ఇచ్చారు కమల్. ‘‘సినిమాల ప్రొడక్షన్‌ను ఎప్పుడూ తొందరపడి చేయకూడదు ఎందుకంటే క్వాంటిటీ కంటే క్వాలిటీ ముఖ్యం కాబట్టి. నేను ఇండియన్ 2, ఇండియన్ 3ను పూర్తిచేశాను. ప్రస్తుతం ఇండియన్ 2 పోస్ట్ ప్రొడక్షన్ జరుగుతోంది. ఇది పూర్తయిన తర్వాత ఇండియన్ 3 పోస్ట్ ప్రొడక్షన్ ప్రారంభించే అవకాశాలు ఉన్నాయి. ‘థగ్ లైఫ్’ సినిమా షూటింగ్ త్వరలోనే ప్రారంభం కానుంది. కల్కి 2898 ADలో నేను ఒక గెస్ట్ రోల్ చేశాను’’ అంటూ బ్యాక్ టు బ్యాక్ ఆయన చేస్తున్న చిత్రాల గురించి వివరించారు కమల్ హాసన్.

ఎన్నో ఇబ్బందులు..

శంకర్, కమల్ హాసన్ కాంబినేషన్‌లో చాలా ఏళ్ల క్రితం ‘భారతీయుడు’ సినిమా వచ్చింది. దానికి సీక్వెల్‌గా ఇప్పుడు ‘ఇండియన్ 2’ తెరకెక్కుతోంది. కానీ ‘ఇండియన్ 2’ షూటింగ్ ప్రారంభం అయినప్పటి నుండి ఏదో ఒక ఇబ్బంది ఎదురవుతూనే వచ్చింది. చాలాకాలం పాటు షూటింగ్ ముందుకు కొనసాగలేదు కూడా. కానీ మళ్లీ షూటింగ్‌ను ప్రారంభించి సైలెంట్‌గా దానిని పూర్తి చేసినట్టు కమల్ హాసన్ క్లారిటీ ఇచ్చారు. గతేడాది నవంబర్‌లో ఇంట్రో పేరుతో ఒక వీడియోను విడుదల చేశారు. ‘ఇండియన్ 2’కు సంబంధించిన ఈ గ్లింప్స్‌.. కమల్ ఫ్యాన్స్‌ను ఖుషీ చేసింది. ప్రస్తుతం పోస్ట్ ప్రొడక్షన్ దశలో ఉంది కాబట్టి త్వరలో మూవీ ప్రేక్షకుల ముందుకు రానుందని తెలుస్తోంది.

విడుదల తేదీ అదే..

ప్రస్తుతం వినిపిస్తున్న కథనాల ప్రకారం.. ‘ఇండియన్ 2’ ఏప్రిల్ 11న థియేటర్లలో విడుదలకు సిద్ధమవుతోంది. ఈ సినిమాలో కమల్ హాసన్ వృద్ధుడిగా కనిపించాల్సి ఉంటుంది. దానికోసం ఆయన నాలుగు గంటలు మేకప్‌కే కేటాయించాల్సి వచ్చిందని చాలాకాలం క్రితమే దర్శకుడు శంకర్ తెలిపారు. రెండు గంటలు మేకప్ వేయడానికి, రెండు గంటలు మేకప్ తీయడానికి సరిపోయేదని బయటపెట్టారు. ‘ఇండియన్ 2’ కమల్ హాసన్ వృద్ధుడిలాగా మాత్రమే కాకుండా మధ్య వయసు ఉన్న పాత్రలో కూడా కనిపిస్తున్నట్టు తెలుస్తోంది. ఇక ఇందులో కమల్‌కు జోడీగా కాజల్ అగర్వాల్ నటించగా.. మరో కీలక పాత్రలో హీరోయిన్స్ రకుల్, ప్రియా భవానీ శంకర్ నటించారు.