Sajid Nadiadwala Meets Rajinikanth: సూపర్ స్టార్ రజినీకాంత్‌కు సౌత్‌లో మాత్రమే కాదు.. బాలీవుడ్‌లో కూడా ఫ్యాన్స్ ఉన్నారు. కొన్నాళ్ల క్రితం సినిమాల విషయంలో కాస్త స్లో అయినా మళ్లీ బ్యాక్ టు బ్యాక్ ప్రాజెక్ట్స్‌తో ఫ్యాన్స్‌ను అలరించడానికి సిద్ధమవుతున్నారు ఈ సీనియర్ హీరో. ఇప్పటికే రజినీకాంత్ చేతుల్లో రెండు భారీ బడ్జెట్ ప్రాజెక్ట్స్ ఉన్నాయి. ఇంతలోనే ఆయన అప్‌కమింగ్ మూవీ గురించి మరో వార్త వైరల్‌గా మారింది. ఈ రెండు సినిమాలు అయిపోయిన తర్వాత మరో భారీ బడ్జెట్ ప్రాజెక్ట్ కోసం బాలీవుడ్ స్టార్ నిర్మాతతో చేతులు కలపనున్నారట రజినీ. తాజాగా ఆ నిర్మాతతో కలిసి రజినీ దిగిన ఫోటో సోషల్ మీడియాలో వైరల్ అవుతోంది.
అప్‌కమింగ్ సినిమాలపై ఫోకస్..
ఎన్నో ఫ్లాప్స్ తర్వాత నెల్సన్ దిలీప్‌కుమార్ దర్శకత్వం వహించిన ‘జైలర్’తో మళ్లీ ఫార్మ్‌లోకి వచ్చారు రజినీకాంత్. ఈ మూవీ ప్రేక్షకుల దగ్గర నుండి పాజిటివ్ టాక్‌ను అందుకోవడం మాత్రమే కాకుండా ఒక రేంజ్‌లో కలెక్షన్స్‌ను కొల్లగొట్టింది. దీంతో ‘జైలర్’ ఇచ్చిన ఉత్సాహంతో బ్యాక్ టు బ్యాక్ ప్రాజెక్ట్స్‌ను ఓకే చేశారు రజినీ. అందులో తన కూతురు ఐశ్వర్య రజినీకాంత్ తెరకెక్కించిన ‘లాల్ సలామ్’ కూడా ఒకటి. మతపరమైన గొడవల ఆధారంగా తెరకెక్కించిన ఈ చిత్రం భారీ ఫ్లాప్‌ను మూటగట్టుకుంది. ఆఖరికి తమిళనాడులో సైతం ఈ చిత్రానికి మినిమమ్ కలెక్షన్స్ కూడా రాలేదు. అయినా ఈ విషయం పక్కన పెట్టి తన తరువాతి సినిమాలపై ఫోకస్ పెట్టారు రజినీకాంత్. ఇప్పుడు ఏకంగా ఒక బాలీవుడ్ నిర్మాతతోనే ప్రాజెక్ట్ ఓకే చేశారు.
ఫోటో వైరల్..
బాలీవుడ్ దర్శక నిర్మాత అయిన సాజిద్ నడియాడ్‌వాలాతో రజినీకాంత్ సినిమా ఓకే అయ్యిందని వార్తలు వినిపిస్తున్నాయి. వీరిద్దరూ కలిసి దిగిన ఫోటోనే దీనికి కారణం. ప్రస్తుతం ఈ ఫోటో సోషల్ మీడియాలో వైరల్‌గా మారుతోంది. బాలీవుడ్‌లో నిర్మాతగా మాత్రమే కాకుండా దర్శకుడిగా కూడా సాజిద్‌కు మంచి గుర్తింపు ఉంది. దర్శకుడిగా తాను చేసింది ఒక్క సినిమానే అయినా దాంతోనే ప్రేక్షకులను ఆకట్టుకున్నారు సాజిద్. ప్రస్తుతం హిందీలో హౌజ్‌ఫుల్ ఫ్రాంచైజ్‌లోని అప్‌కమింగ్ మూవీ అయిన ‘హౌజ్‌ఫుల్ 5’ను నిర్మిస్తూ బిజీగా ఉన్నారు. ఇదే సమయంలో ఆయన రజినీతో సినిమా చేయడం అనేది సూపర్ స్టార్ బాలీవుడ్ ఫ్యాన్స్‌ను హ్యాపీ చేస్తోంది.
బాలీవుడ్‌లో రీఎంట్రీ?
సాజిద్ నడియాడ్‌వాలా.. తన కెరీర్ మొత్తంలో ఎక్కువగా హిందీ చిత్రాలనే నిర్మించారు. మరి రజినీకాంత్‌తో నిర్మిస్తున్న చిత్రం.. నేరుగా హిందీలోనే తెరకెక్కుతుందా అని ప్రేక్షకుల్లో అనుమానాలు మొదలయ్యాయి. రజినీకాంత్ హీరోగా తనను తాను నిరూపించుకోవాలి అనుకుంటున్న సమయంలో ఒకట్రెండు హిందీ చిత్రాల్లో నటించారు. కానీ తర్వాత తనకు తమిళంలో విపరీతమైన క్రేజ్ రావడంతో అక్కడే సెటిల్ అయిపోయారు. ఇక సాజిద్ నడియాడ్‌వాలాతో చేతులు కలుపుతున్నందుకు ఇంతకాలం తర్వాత రజినీ బాలీవుడ్‌లోకి రీఎంట్రీ ఇవ్వనున్నారా అని అనుమానాలు మొదలయ్యాయి.
Also Read: రాడిసన్‌ హోటల్‌ డ్రగ్స్‌ కేసులో దర్శకుడు క్రిష్ - ఎఫ్ఐఆర్‌లో ఆయన పేరు