పాత తెలుగు పాటలు వింటుంటే ఒక మంచి ఫీల్ వస్తుంది. ఈ తరం పాటల్లో అలాంటి ఫీల్ ఉండదని చాలామంది భావన కూడా అందుకే. మూవీ మేకర్స్ ఛాన్స్ దొరికినప్పుడు అలనాటి హిట్ సాంగ్స్‌ను మరోసారి తెరపైకి తెస్తున్నారు. తాజాగా బాలకృష్ణ చేసిన క్లాసిక్ పాటను.. మళ్లీ ఆయన సినిమా కోసమే రీమేక్ చేయాలని మేకర్స్ నిర్ణయించుకున్నారు.
అందాల ఆడబొమ్మ.. ఎంత బాగుంది ముద్దుగుమ్మ..
ఇన్నాళ్ల సినీ కెరీర్‌లో బాలకృష్ణ.. ఎన్నో మరపురాని పాటలను ప్రేక్షకులకు అందించారు. ఆయన ప్రతీ సినిమాలో యూత్‌ను ఆకట్టుకునే ఒక మాస్ పాటతో పాటు ఒక లవ్ సాంగ్ కూడా పక్కా ఉంటుంది. అలాంటి వాటిలో ఆయన నటించిన ‘సమరసింహారెడ్డి’ చిత్రంలోని ‘అందాల ఆడబొమ్మ’ పాట కూడా ఒకటి. ఈ ఫీల్ గుడ్ లవ్ సాంగ్‌కు బాలకృష్ణ, అంజలా జవేరి కలిసి స్టెప్పులేస్తుంటే చూస్తూ ఉండిపోవాలని అనిపిస్తుంటుంది అంటారు ఫ్యాన్స్. ఈ పాట ప్రేక్షకుల ముందుకు వచ్చి దాదాపుగా 24 ఏళ్లు అయ్యింది. అయినా ఇప్పటికీ ఈ సాంగ్ చాలామందికి గుర్తుంది అంటే సిరివెన్నెల సీతారామశాస్త్రి అందించిన లిరిక్స్‌తో పాటు మణిశర్మ సంగీతం కూడా ముఖ్య కారణమే. అలాంటి ఒక క్లాసిక్ పాటను రీమేక్ చేయాలని తాజాగా ‘భగవత్ కేసరి’ మేకర్స్ నిర్ణయించుకున్నట్టు సమాచారం.
కామెడీ డైరెక్టర్‌తో యాక్షన్ సినిమా..
నందమూరి బాలకృష్ణ సినిమాలు అంటేనే ఫుల్ ఆన్ యాక్షన్ ఉంటుంది. ఫైట్లు, మాస్ పాటలు, ప్రేక్షకులను పిచ్చెక్కించే డైలాగులు.. ఇవన్నీ ఒక సగటు ప్రేక్షకుడు.. బాలయ్య సినిమా నుండి ఆశిస్తాడు. అందుకే ఫ్యాన్స్ టేస్ట్‌ను అర్థం చేసుకున్న బాలయ్య కూడా ఎక్కువగా అలాంటి కథలనే ఎంచుకుంటారు. కానీ ఎప్పుడూ కామెడీ సినిమాలు తెరకెక్కిస్తూ.. ప్రేక్షకులను నవ్వుల్లో ముంచేసే అనిల్ రావిపూడితో బాలయ్య సినిమా అనగానే అసలు ఎలా సెట్ అవుతుంది అని ప్రేక్షకులంతా ఆశ్చర్యపోయారు. అనిల్.. కామెడీ అయితే పండించగలడు. కానీ యాక్షన్ విషయంలో పరిస్థితి ఏంటి అని అనుకున్నారంతా. కానీ ఇప్పటికే విడుదలయిన ‘భగవంత్ కేసరి’ పోస్టర్స్, గ్లింప్స్ చూస్తుంటే.. అనిల్.. బాలయ్య ఫ్యాన్స్ పల్స్‌ను పట్టుకున్నాడు అని అర్థమవుతోంది. అంతే కాకుండా ఇప్పుడు బాలయ్య క్లాసిక్ పాటను ఇందులో రీమేక్ చేసి ఫ్యాన్స్‌ను మరింత ఎక్కువగా ఇంప్రెస్ చేయాలనుకుంటున్నాడట ఈ కామెడీ దర్శకుడు.
థియేట్రికల్ రైట్స్‌పై చర్చ..
‘భగవంత్ కేసరి’ చిత్రంలో బాలయ్యకు జోడీగా కాజల్ నటిస్తోంది. ఇక మరో ముఖ్య పాత్రలో హీరోయిన్‌గా శ్రీలీల కనిపించనుంది. ఇప్పటికే ఈ మూవీపై భారీ అంచనాలు ఉండడంతో తాజాగా దీని థియేట్రికల్ రైట్స్ దాదాపు రూ.70 కోట్లకు అమ్ముడుపోయినట్టు సమాచారం. ఈ వార్త ఫ్యాన్స్‌లో ఉత్సాహం పెంచుతున్న క్రమంలోనే ‘అందాల ఆడబొమ్మ’ పాట రీమేక్ వార్త కూడా వారికి సినిమాపై మరింత ఆసక్తి రేకెత్తించేలా చేస్తోంది. ఆనాడు ఈ పాటకు బాలయ్య, అంజనా జవేరి కలిసి స్టెప్పులేస్తే.. ఇప్పుడు బాలయ్య, కాజల్ కలిసి ఈ రీమేక్ పాటకు స్టెప్పులేయనున్నారట. ఇదే నిజమయితే.. ఈ పాట వచ్చినప్పుడు థియేటర్లలో ఫ్యాన్స్‌కు పూనకాలు రావడం ఖాయం.
Also Read: ‘జైలర్’లో తమన్నా బాయ్‌ఫ్రెండ్ మన తెలుగు వారే - ఏ స్టార్ డైరెక్టర్ కొడుకో తెలుసా?
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial