ఐకాన్ స్టార్ అల్లు అర్జున్ నటించిన 'పుష్ప' మూవీ థియేటర్స్ లోకి వచ్చి రెండేళ్లు అవుతున్నా ఇంకా దాని ప్రభావం ఏమాత్రం తగ్గలేదు. ఎక్కడో చోట, ఎవరో ఒకరు పుష్ప గురించి మాట్లాడుతూనే ఉన్నారు. ముఖ్యంగా నార్త్ ఇండియన్స్ లో పుష్ప మేనియా ఇప్పటికీ కంటిన్యూ అవుతుంది అనడంలో ఎటువంటి సందేహం లేదు. ఇదే విషయాన్ని మరోసారి రుజువు చేశారు బాలీవుడ్ బిగ్ బి అమితాబచ్చన్. తాజాగా కౌన్ బనేగా కరోడ్ పతి ఎపిసోడ్ లో అమితాబచ్చన్ 'పుష్ప' ప్రస్తావన తీసుకురావడం సోషల్ మీడియాలో హాట్ టాపిక్ గా మారింది. డీటెయిల్స్ లోకి వెళ్తే.. క్రియేటివ్ డైరెక్టర్ సుకుమార్ దర్శకత్వంలో అల్లు అర్జున్ నటించిన 'పుష్ప: ది రైజ్' మూవీ పాన్ ఇండియా స్థాయిలో సంచలన విజయం అందుకున్న విషయం తెలిసిందే.


ముఖ్యంగా బాలీవుడ్ లో పుష్ప రూ.100 కోట్ల కలెక్షన్స్ అందుకొని అక్కడి ఆడియన్స్ నే కాకుండా సెలబ్రిటీలను సైతం ఫిదా చేసింది. పుష్ప లో బన్నీ నటనకు చాలామంది బాలీవుడ్ స్టార్స్ ప్రశంసలు కురిపించారు. ఇక సినిమాలోని పాటలు, డైలాగ్స్, హుక్ స్టెప్స్ ఇంటర్నేషనల్ రేంజ్ లో వైరల్ అయ్యాయి. 2021 చివరలో వచ్చిన ఈ సినిమాని ఇప్పటికీ ఎవరు మర్చిపోలేకపోతున్నారు. తాజాగా బిగ్ బి అమితాబ్ బచ్చన్ హోస్ట్ చేస్తున్న కౌన్ బనేగా కరోడ్ పతి షోలో 'పుష్ప' మూవీ ప్రస్తావన వచ్చింది. దాంతో అమితాబచ్చన్ పుష్ప గురించి, అల్లు అర్జున్ గురించి పొగడ్తల వర్షం కురిపించారు.






కౌన్ బనేగా కరోడ్ పతి ఎపిసోడ్లో పార్టిసిపెంట్ గా వచ్చిన ఓ గృహిణికి 20వేల రూపాయల ప్రశ్న అడిగారు అమితాబ్. 2023 సంవత్సరం జాతీయ ఉత్తమ నటుడిగా అవార్డు తీసుకున్న హీరో ఎవరు? అని ఆప్షన్లు ఇస్తే ఆమె టక్కున బన్నీ పేరు చెప్పి ఇరవై వేలు గెలుచుకుంది. ఈ సందర్భంగా అమితాబచ్చన్ 'పుష్ప' గురించి పలు ఆసక్తికర వ్యాఖ్యలు చేశారు. "పుష్ప సినిమా చాలా గొప్ప సినిమా అని, కాలికి వేసుకున్న చెప్పు జారిపోతే దాన్ని కుంటు కుంటూ హీరో వేసుకోవడం ఒక స్టెప్ గా మారడం నేను జీవితంలో మొదటిసారి చూసాను" అని తన ఆశ్చర్యాన్ని వ్యక్తపరిచారు అమితాబ్. పుష్ప మూవీలోని శ్రీవల్లి సాంగ్ లో బన్నీ వేసే హుక్స్ స్టెప్ గురించి తెలిసిందే కదా.


ఆ స్టెప్ ని గుర్తుంచుకొని మరీ ప్రత్యేకంగా ఆ బిట్ బి మాత్రమే అమితాబచ్చన్ తన షోలో పంచుకోవడం చూస్తే ఆయన పుష్ప సినిమాని ఎంత లీనం చేసుకున్నారో అర్థమవుతుంది. ఇక షోలో భాగంగా పుష్ప లో బన్నీ అద్భుతంగా నటించాడని కితాబిచ్చాడు అమితాబచ్చన్. దానికి సంబంధించిన వీడియో ఇప్పుడు సోషల్ మీడియాలో ఓ రేంజ్ లో వైరల్ అవుతుంది. అమితాబ్ మాటలని బట్టి చూస్తే ఇప్పటికీ పుష్ప మేనియా నార్త్ లో ఇంకా కంటిన్యూ అవుతుందని స్పష్టమవుతుంది.


ఇక 'పుష్ప' తో పాన్ ఇండియా స్థాయిలో సెన్సేషన్ క్రియేట్ చేసిన బన్నీ వచ్చే ఏడాది 'పుష్ప 2' తో పాన్ వరల్డ్ స్థాయిలో రచ్చ చేసేందుకు రెడీ అవుతున్నాడు. 'పుష్ప' కి సీక్వెల్ గా వస్తున్న 'పుష్ప 2' ప్రస్తుతం చిత్రీకరణ దశలో ఉంది. మైత్రి మూవీ మేకర్స్ భారీ బడ్జెట్ తో నిర్మిస్తున్న ఈ చిత్రాన్ని ఈసారి పాన్ వరల్డ్ స్థాయిలో రిలీజ్ చేసేందుకు సన్నాహాలు చేస్తున్నారు. వచ్చే ఏడాది ఆగస్టు 15 స్వాతంత్ర దినోత్సవం సందర్భంగా ఈ మూవీ ప్రేక్షకుల ముందుకు రానుంది.


Also Read : ఆ షోకు రమ్మన్నా వెళ్లలేదు, ‘కాఫీ విత్‌ కరణ్‌’ పై నాని షాకింగ్ కామెంట్స్


ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial