Actress Varalakshmi Sarathkumar React on Fake News: ఇటీవల ప్రియుడుతో నిశ్చితార్థం చేసుకున్న నటి వరలక్ష్మి శరత్‌ కుమార్‌ త్వరలో పెళ్లి పీటలు ఎక్కబోతున్న సంగతి తెలిసిందే. ప్రస్తుతం పెళ్లీ ఏర్పాట్లతో బిజీగా ఉన్న ఆమె అరెస్ట్ కాబోతోందంటూ ఓ వార్త బయటకు వచ్చింది. డ్రగ్స్‌ కేసులో ఆమెకు ఎన్‌ఐఏ నోటిసులు ఇచ్చిందని, ఏ క్షణమైనా ఆమె అరెస్ట్ కావోచ్చంటూ తమిళ మీడియాలో వార్తలు వచ్చాయి. రెండు రోజులుగా దీనిపై సోషల్‌ మీడియాలో జోరుగా ప్రచారం జరుగుతుంది. దాంతో ఈ వార్తలపై స్వయంగా వరలక్ష్మి శరత్‌ కుమార్‌ స్పందించింది. ఇదంత ఉత్త ప్రచారమని, ఈ వార్తల్లో నిజం లేదని తేల్చేసింది. అదేవిధంగా తనపై ఈ తప్పుడు కథనాలను సృష్టించిన మీడియా ఛానళ్లపై ఆమె ఆగ్రహం వ్యక్తం చేసింది.
బయట వెయ్యికి పైగా సమస్యలు..
"ఈ మీడియా మిత్రులకు కొత్త వార్తలు లేకపోవడంతో పాత వార్తలనే కొత్తగా సృష్టించి ప్రచారం చేస్తున్నారు. ఇది నిజంగా బాధాకరం. ముఖ్యంగా మా ప్రియమైన జర్నలిస్టులు, ప్రత్యేకించి స్వయం ప్రకటిత వెబ్‌సైట్లకు నా విన్నం ఏంటంటే.. మీరు నిజమైన జర్నలిజం ఎందుకు ప్రారంభించకూడదు? ఇకనైనా సెలబ్రిటీలలో లోపాలను వెతకడం మానండి. మేము ప్రజలను అలరించడానికి నటిస్తున్నాం, వారికి వినోదం అందించేందుకు ప్రయత్నిస్తున్నాం. మా పని మేము చేసుకుంటున్నాం కదా.. మరి మీరూ మీ పనిని ఎందుకు చేయకూడదు?! మీరు శ్రద్ధ పెట్టడానికి బయట 1000కి పైగా ఎన్నో తీవ్రమైన సమస్యలు ఉన్నాయి. వాటిపై దృష్టి పెట్టండి. మా మౌనాన్ని బలహీనంగా చూడకండి. ఈ మధ్య పరువు నష్టం దావా, కేసులు కూడా ట్రెండ్‌ అవుతున్నాయి. కాబట్టి ఇలాంటి అసత్యా ప్రచారాలు మానేసి, నిజమైన జర్నలిజాన్ని తిరిగి తీసుకురాండి!" అంటూ వరలక్ష్మి ఘాటుగా స్పందించింది.
ప్రస్తుతం ఆమె ట్వీట్‌ వైరల్‌గా మారింది. కాగా, గతేడాది వరలక్ష్మి శరత్‌ కుమార్‌ దగ్గర పనిచేసే ఫ్రీలాన్స్‌ మేనేజర్‌ ఆదిలింగం డ్రగ్స్‌ కేసులో అరెస్ట్ అయిన సంగతి తెలిసిందే. దీంతో ఈ డ్రగ్స్‌ కేసులో వరలక్ష్మి కూడా ఏమైనా సంబంధాలు ఉన్నాయా? అనే కోణంలో ఎన్‌ఐఏ అధికారులు విచారించారు. అప్పుడే దీనిపై స్పందించిన ఆమె తనకు, డ్రగ్స్‌ కేసుకు ఎలాంటి సంబంధించి లేదని స్పష్టం చేసింది. తన ప్రీలాన్స్‌ మేనేజర్‌ అరెస్ట్‌తో డ్రగ్‌ కేసులో ఆమె పేరు బాగా వినిపించింది. ఆమె స్పందించడం ఈ వ్యవహరం సద్దుమనిగింది. అయితే తాజాగా సడెన్‌ డ్రగ్‌ కేసులో వరలక్ష్మి శరత్‌ కుమార్‌ పేరు చేర్చుతూ మళ్లీ వార్తలు ప్రచారంలోకి వచ్చాయి.
రీసెంట్‌గా ఆమె ఎన్‌ఐఏ డ్రగ్‌ కేసులో నోటీసులు ఇచ్చారని, ఆమెను విచారణకు హాజరు కావాలని అధికారులు ఆదేశించినట్టు తమిళ మీడియాల్లో కథనాలు పట్టుకొచ్చాయి. అంతేకాదు ఆమెను ఎన్‌ఐఏ అరెస్ట్ చేసే అవకాశం కూడా ఉందంటూ మరింత ప్రచారం చేయడం మొదలుపెట్టారు. దీంతో ఇది చూసి అంతా నిజం అనుకున్నారు. ఆమె ఫ్యాన్స్‌ అయితే ఆందోళన వ్యక్తం చేశారు. చివరికి వరలక్ష్మి స్వయంగా స్పందించింది ఈ వార్తలను ఖండించడంతో ఇందులో నిజం లేదని తేలిసింది. దీంతో ఆమె ఫ్యాన్స్‌ రిలాక్స్‌ అవుతున్నారు. కాగా ఇటీవల హనుమాన్‌ చిత్రంలో అలరించిన వరలక్ష్మి.. తన ప్రియుడు, గ్యాలరిస్ట్‌ నికోలాయి సచ్‌దేవ్‌ను సైలెంట్‌గా నిశ్చితార్థం చేసుకున్న సంగతి తెలిసిందే.