గత కొంతకాలంగా సినిమా పరిశ్రమలో రీ రిలీజ్ ట్రెండ్ కొనసాగుతోంది. బడా హీరోల బర్త్ డే సందర్భంగా 4K పేరుతో సినిమాలను రీ రిలీజ్ చేస్తున్నారు. ఇప్పటికే తెలుగులో మహేష్ బాబు, పవన్ కల్యాణ్ లాంటి హీరోల సినిమాలను వారి పుట్టిన రోజుల సందర్భంగా విడుదల చేశారు. అభిమానుల నుంచి ఈ సినిమాల ప్రదర్శనకు మంచి రెస్పాన్స్ వచ్చింది. తాజాగా సూపర్ స్టార్ రజనీకాంత్ సినిమా కూడా రీ రిలీజ్ కు రెడీ అవుతోంది. డిసెంబర్ 12న రజనీ కాంత్ పుట్టినరోజు సందర్భంగా ఆయన నటించిన ‘బాబా’ సినిమాను ప్రపంచ వ్యాప్తంగా ప్రదర్శించేందుకు ఏర్పాట్లు చేస్తున్నారు. తాజాగా ఈ సినిమాకు సంబంధించిన ట్రైలర్ ను విడుదల చేశారు. ఈ లింక్ ను రజనీకాంత్ తన ట్విట్టర్ ఖాతా ద్వారా షేర్ చేశారు. తన మనసుకు నచ్చిన సినిమా త్వరలో రీ రిలీజ్ కాబోతుందని వెల్లడించారు.
మార్పులు, చేర్పులతో ‘బాబా’ రీ రిలీజ్!
గతంలో సినిమాలను రీ రిలీజ్ అంటే కేవలం ఉన్నది ఉన్నట్లుగానే ప్రదర్శించారు. అయితే, రజనీకాంత్ ‘బాబా’ సినిమా విషయంలో కొన్ని మార్పులు చేర్పులు చేసి విడుదల చేయాలని మేకర్స్ భావిస్తున్నట్లు తెలుస్తోంది. ఇందులో భాగంగానే కొన్ని అదనపు సీన్లు యాడ్ చేస్తున్నారట. వీటికి కోసం ఇప్పటికే రజనీకాంత్ డబ్బింగ్ కూడా చెప్పారు. తాజాగా ఆయన డబ్బింగ్ చెప్తున్న ఫోటోలు, వీడియోలు కూడా సోషల్ మీడియాలో వైరల్ అయ్యాయి. అటు కొన్ని సీన్లు తీసేసినట్లు సమాచారం. మరోవైపు బ్యాగ్రౌండ్ స్కోర్ లో కొన్ని మార్పులు చేయాలని భావిస్తున్నారట. ఇందుకోసం మ్యూజిక్ డైరెక్టర్ ఏ.ఆర్. రెహమాన్ ను కూడా సంప్రదించిందట మూవీ టీమ్. ఇప్పటికే ఆ పనులన్నీ పూర్తయినట్లు తెలుస్తోంది.
భారీ బడ్జెట్ తో తెరకెక్కినా.. డిజాస్టర్ గా మిగిలిన ‘బాబా’
రజనీకాంత్ నటించిన ‘బాబా’ మూవీ 2002లో విడుదల అయింది. ‘నరసింహ’ లాంటి బ్లాక్ బస్టర్ హిట్ తర్వాత రజనీ మూడేళ్ళు గ్యాప్ ఇచ్చి ఈ చిత్రాన్ని చేశారు. సురేష్ కృష్ణ దర్శకత్వంలో తెరకెక్కిన ఈ సినిమా భారీ అంచనాల మధ్య విడుదల అయింది. అప్పట్లోనే భారీ బడ్జెట్ తో ఈ సినిమాను రూపొందించారు. మనీషా కొయిరాల హీరోయిన్ గా చేసిన ఈ సినిమా ఆగస్టు 15 ప్రేక్షకుల ముందుకు వచ్చింది. రజనీ కాంత్ ఈ సినిమాలో హీరోగానే కాకుండా కథ, స్క్రీన్ ప్లే, నిర్మాతగా వ్యవహరించారు. సినిమా విడుదల తర్వాత పూర్తి నెగిటివ్ టాక్ రావడంతో డిజాస్టర్ గా మిగిలింది. ‘బాబా’ సినిమా వచ్చి దాదాపు 20 ఏళ్ళు పూర్తయింది. మళ్లీ ఇప్పుడు ఆ సినిమాను రజనీకాంత్ బర్త్ డే సందర్భంగా సరికొత్త మెరుగులద్ది ప్రేక్షకుల ముందుకు తీసుకువస్తున్నారు. సినిమా అప్పట్లో ఫ్లాప్ గా నిలిచినప్పటికీ ఇందులో రజనీ డైలాగ్స్, పాటలను అభిమానులు ఎప్పటికీ మరిచిపోలేరు.