హాట్ బ్యూటీ పాయల్ రాజ్ పుత్, దర్శకుడు అజయ్ భూపతి కాంబోలో వస్తున్న తాజా మూవీ ‘మంగళవారం’. ‘RX100’ లాంటి బ్లాక్ బస్టర్ హిట్ చిత్రం తర్వాత వస్తున్న సినిమా కావడంతో ప్రేక్షకులలో భారీగా అంచనాలు నెలకొన్నాయి. త్వరలో ఈ సినిమా విడుదల కానున్న నేపథ్యంలో చిత్రబృందం జోరుగా ప్రచార కార్యక్రమాలు కొనసాగిస్తోంది. తాజాగా ఈ మూవీ నుంచి ఓ ఊరమాస్ లిరికల్ వీడియో సాంగ్ ను విడుదల చేసింది.
‘మంగళవారం’ నుంచి మరోసాంగ్ విడుదల
ఇప్పటికే ‘మంగళవారం’ నుంచి ‘ఏమైందో ఏమిటో’, ‘గంగన మోగాలిరా’ పాటలు విడుదలయ్యాయి. రెండు పాటలు చక్కటి ప్రజాదరణ దక్కించుకున్నాయి. సోషల్ మీడియాలో ఈ పాటలు ట్రెండింగ్ లో నిలిచాయి. తాజాగా ఈ మూవీ నుంచి ‘అప్పడప్పడ తాండ్ర’ అనే పాటను చిత్రబృందం రిలీజ్ చేసింది. ఈ సాటలో ప్రముఖ దర్శకుడు, నటుడు తరుణ్ భాస్కర్ అదరగొట్టారు. నటుడు లక్ష్మణ్తో మాస్ స్టెప్పులు వేస్తూ ఆకట్టుకున్నారు. పల్లెటూరులోని వివాహేతర సంబంధాల గురించి ఈ పాటలో చెప్పే ప్రయత్నం చేశారు. అచ్చ పల్లెటూరు బ్యాగ్రౌండ్ లో రూపొందిన ఈ పాట ఇప్పుడు నెట్టింట్లో తెగ వైరల్ అవుతోంది. తరుణ్ భాస్కర్, లక్ష్మణ్ మాస్ లుక్, అదిరిపోయే ఎక్స్ ప్రెషన్స్ అందరినీ అలరిస్తున్నాయి. రాహుల్ సిప్లిగంజ్ పాడిన ఈ పాట సింప్లీ సూపర్బ్ అని చెప్పవచ్చు. ఇక అజనీష్ లోకనాథ్ అందించిన సంగీతం కూడా చాలా బాగుంది. గణేష్ లిరిక్స్ బాగున్నాయి. ఈ సినిమా నవంబర్ 17న విడుదల కానుంది. తెలుగుతో పాటు తమిళం, మలయాళం, కన్నడ, హిందీ భాషల్లో ప్రేక్షకుల ముందుకు రానుంది.
వేధింపులకు గురైన బాధితురాలిగా పాయల్
ఇక ఈ సినిమాలో పాయల్ రాజ్ పుత్ లైంగిక వేధింపులకు గురైన బాధితురాలిగా కనిపించనుంది. వాస్తవానికి ఈమె క్యారెక్టర్ గురించి మేకర్స్ ఇప్పటి వరకు ఎలాంటి క్లారిటీ ఇవ్వలేదు. ట్రైలర్ లో మాత్రమే ఆమెను చూపించారు. ఇప్పటికే విడుదలైన ట్రైలర్ సినిమాపై భారీగా అంచనాలు పెంచింది. మంగళవారం వస్తే చాలు ఆ ఊరిలో ఎవరో ఒకరు చనిపోతుంటారు. ఇంతకీ వారి మరణానికి కారణం ఎవరు? అసలు ఆ ఊరిలో ఏం జరుగుతుంది? అనేది ఆస్తకిరంగా ట్రైలర్ లో చెప్పే ప్రయత్నం చేశారు మేకర్స్. అజయ్ ఘోష్, నందిత శ్వేత, చైతన్య కృష్ణ, శ్రీతేజ్ ఇతర కీలక పాత్రల్లో కనిపించనున్నారు. దశరథి సివేంద్ర ఈ మూవీకి సినిమాటోగ్రఫీ అందిస్తున్నారు. తజుద్దీన్ సయ్యద్, రాఘవ్ డైలాగ్స్ అందించారు.
హిట్ కోసం ఎదురు చూస్తున్న పాయల్, అజయ్
‘మంగళవారం’ సినిమాను ముద్ర మీడియా వర్క్స్, A క్రియేటీవ్ వర్క్స్ సంయుక్తంగా నిర్మిస్తున్నాయి. ‘RX100’తో సంచలనం విజయాన్ని అందుకున్న అజయ్ భూపతి.. ‘మహా సముద్రం’ చిత్రంతో డిజాస్టర్ ఎదుర్కొన్నాడు. ‘మంగళవారం’ చిత్రంతో మరోసారి తన సత్తా చాటుకోవాలని భావిస్తున్నారు.
Read Also: అందుకే రాహుల్ సిప్లిగంజ్‌తో పెళ్లి చేయలేదు - రతిక చెల్లి షాకింగ్ కామెంట్స్
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial