Punjab Polls 2022: చన్నీకే ఛాన్స్.. పంజాబ్ సీఎం అభ్యర్థిని ప్రకటించిన రాహుల్ గాంధీ

పంజాబ్ సీఎం చరణ్‌జిత్ సింగ్ చన్నీనే రానున్న అసెంబ్లీ ఎన్నికల్లో కాంగ్రెస్ ముఖ్యమంత్రిగా ప్రకటించారు రాహుల్ గాంధీ.

పంజాబ్ కాంగ్రెస్ సీఎం అభ్యర్థిగా చరణ్‌జిత్ సింగ్ చన్నీని కాంగ్రెస్ ప్రకటించింది. నవజోత్ సింగ్ సిద్ధూతో తీవ్ర పోటీ ఉన్నప్పటికీ చన్నీవైపే కాంగ్రెస్ అధిష్ఠానం మొగ్గు చూపింది. పంజాబ్ లుథియానాలో జరిగిన బహిరంగ సభలో సీఎం అభ్యర్థిని రాహుల్ గాంధీ ప్రకటించారు. 

ఓ పేద కుటుంబం నుంచే పంజాబ్ సీఎం వస్తారు. రానున్న పంజాబ్ అసెంబ్లీ ఎన్నికల్లో చరణ్‌జిత్ సింగ్ చన్నీయే కాంగ్రెస్ సీఎం అభ్యర్థి.                                                 -  రాహుల్ గాంధీ, కాంగ్రెస్ అగ్రనేత

కృతజ్ఞతలు..

అందరికీ నా కృతజ్ఞతలు. ఇది పెద్ద యుద్ధం.. నేను ఒక్కడినే పోరాడలేను. ఒక్కడినే పోరాడేందుకు నా దగ్గర డబ్బులు లేవు. ధైర్యం కూడా లేదు. పంజాబ్ ప్రజలే ఈ యుద్ధం చేస్తారు.                                                 - చరణ్‌జిత్ సింగ్ చన్నీ, పంజాబ్ సీఎం

ఏదైనా ఓకే..

అంతకుముందు మాట్లాడిన సిద్ధూ.. కాంగ్రెస్ అధిష్ఠానం ఎలాంటి నిర్ణయం తీసుకున్నా స్వాగతిస్తానని అన్నారు. కాంగ్రెస్ గెలుపు కోసం పనిచేస్తానని హామీ ఇచ్చారు.

రాహుల్ గాంధీ నిర్ణయాన్ని నేను అంగీకరించాను. నాకు కనుక నిర్ణయం తీసుకునే శక్తి ఇస్తే.. మాఫియాను అంతం చేస్తాను. ప్రజల జీవితాలను మెరుగుపరుస్తాను. ఒక వేళ అధికారం ఇవ్వకపోయినా.. మీరు సీఎంగా ఎవరినీ నిర్ణయిస్తే వారితో నవ్వుతో నడుస్తాను.                                  - నవజోత్ సింగ్ సిద్ధూ, పంజాబ్ పీసీసీ చీఫ్ 

కీలక సమయంలో..

కెప్టెన్ అమరీందర్ సింగ్.. సీఎం పదవికి రాజీనామా చేసిన తర్వాత చన్నీ ఆ బాధ్యతలు చేపట్టారు. నాలుగు నెలలుగా ఆయన సీఎం పదవిలో ఉన్నారు. ఎన్నికలకు కొద్ది రోజుల ముందే సీఎం చన్నీ మేనల్లుడు భూపేందర్ సింగ్ హనీని.. మనీలాండరింగ్ కేసులో ఈడీ అరెస్ట్ చేసింది. అయినప్పటికీ చన్నీపైనే కాంగ్రెస్ అధిష్ఠానం నమ్మకముంచింది. రాబోయే ఎన్నికల్లో కాంగ్రెస్ సీఎం అభ్యర్థిగా చన్నీనే ప్రకటించింది.