Madhya Pradesh Killer Wife: అది మధ్యప్రదేశ్లోని ధార్ జిల్లాలోని ఒక ప్రశాంతమైన ఇల్లు. అర్ధరాత్రి వేళ ఒక్కసారిగా హాహాకారాలు వినిపించాయి. స్థానికులు వెళ్లి చూసేసరికి ఇంటి యజమాని రక్తపు మడుగులో పడి ఉన్నాడు. ఆయన భార్య తనను దొంగలు కట్టేశారని, తన కళ్లెదుటే భర్తను కిరాతకంగా చంపేశారని, ఇంట్లోని నగలు, నగదు ఎత్తుకెళ్లారని ఏడుస్తూ చెప్పింది. తన భర్తను చంపిన హంతకులపై ప్రతీకారం తీర్చుకోవాలంటూ ఆమె చేసిన రోదన చూసి చుట్టుపక్కల వారు, పోలీసులు కూడా మొదట చలించిపోయారు.
పోలీసుల తనిఖీ.. బయటపడ్డ అసలు రంగు!
కేసు నమోదు చేసుకున్న పోలీసులు ప్రాథమిక విచారణలో భాగంగా ఇంట్లో ఎంత సొమ్ము పోయిందో లెక్కేసేందుకు గదిని తనిఖీ చేశారు. అయితే, ఆ మహిళ ఏవైతే నగలు పోయాయని ఫిర్యాదులో పేర్కొందో, అవే నగలు ఆమె గదిలోని ఒక రహస్య మూలలో భద్రంగా కనిపించాయి. దొంగలు పడితే నగలు అక్కడే ఎందుకు వదిలేస్తారు అన్న అనుమానం పోలీసులకు కలిగింది. దీంతో కేసు మలుపు తిరిగింది. బాధితురాలిగా నటిస్తున్న ఆమెపైనే నిఘా పెట్టిన పోలీసులు ఆమె కాల్ డేటాను విశ్లేషించారు.
పక్కా ప్లాన్.. రూ. లక్ష సుపారీ!
పోలీసుల విచారణలో దిగ్భ్రాంతికర విషయాలు వెలుగులోకి వచ్చాయి. భార్యకు మరొక వ్యక్తితో వివాహేతర సంబంధం ఉందని, వారిద్దరి ఏకాంతానికి భర్త అడ్డు వస్తున్నాడని భావించి ఈ ఘాతుకానికి ఒడిగట్టినట్లు తేలింది. ఇందుకోసం తన ప్రియుడి సాయంతో ఒక కిరాయి హంతకుడిని సంప్రదించింది. భర్తను హతమార్చేందుకు రూ. 1 లక్ష సుపారీగా ఇచ్చేందుకు ఒప్పందం కుదుర్చుకుంది. ఈ ప్లాన్ ప్రకారం, దొంగతనం జరిగినట్లు నమ్మించేందుకు ఇంట్లోని నగలను తానే దాచిపెట్టి, భర్తను చంపిన తర్వాత దొంగలు వచ్చారని కట్టుకథ అల్లింది.
కటకటాల వెనక్కి!
హంతకుడు ఇంట్లోకి ప్రవేశించినప్పుడు ఆమె సహకరించడమే కాకుండా, తనను తాను తాడుతో కట్టేసుకుని బాధితురాలిగా నటించింది. అయితే, ఆమె ఓవర్ యాక్షన్ చివరకు పోలీసులకు దొరికిపోయేలా చేసింది. దర్యాప్తులో పోలీసులు గట్టిగా నిలదీయడంతో ఆమె అసలు విషయాన్ని ఒప్పుకుంది. తన ప్రియుడితో కలిసి జీవించేందుకే ఈ దారుణానికి పాల్పడ్డానని అంగీకరించింది. దీంతో పోలీసులు ఆమెను, ఆమె ప్రియుడిని, కిరాయి హంతకుడిని అరెస్ట్ చేశారు.
సినిమా లెవల్ యాక్షన్
భర్త చనిపోయిన బాధ ఏమాత్రం లేకుండా, తన నేరాన్ని కప్పిపుచ్చుకునేందుకు ఆమె ప్రదర్శించిన నటన చూసి పోలీసు అధికారులు సైతం విస్మయానికి గురయ్యారు. చట్టం కళ్లుగప్పి తప్పించుకోవాలనుకున్న ఈ మాయలాడి ప్లాన్ చివరకు సెల్ ఫోన్ రికార్డులు , ఆమె గదిలో దొరికిన నగలతో బెడిసికొట్టింది. ప్రస్తుతం నిందితులందరూ కటకటాల వెనక ఊచలు లెక్కపెడుతున్నారు.