US Crime News:
24 ఏళ్ల యువకుడిపై దాడి..
అమెరికాలోని ఇండియానాలో దారుణ ఘటన వెలుగు చూసింది. భారత్‌కి చెందిన ఓ 24 ఏళ్ల విద్యార్థి జిమ్ చేస్తుండగా గుర్తు తెలియని వ్యక్తి దాడి చేశాడు. కత్తితో పొడిచాడు. ప్రస్తుతం బాధితుడి పరిస్థితి విషమంగా ఉంది. బతికే అవకాశాలు చాలా తక్కువేనని వైద్యులు చెబుతున్నారు. బాధితుడి పేరు వరుణ్‌గా వెల్లడించారు పోలీసులు. ఇండియానాలో ఓ పబ్లిక్ జిమ్‌లో వర్కౌట్స్ చేస్తుండగా ఈ దాడి జరిగినట్టు వివరించారు. అయితే...ఈ దాడికి కారణమేంటన్నది మాత్రం ఇంకా తెలియలేదు. నిందితుడిపై హత్యాయత్నం కేసు నమోదు చేశారు.
"వరుణ్‌ ఇండియానాలోని ఓ పబ్లిక్ జిమ్‌లో వర్కౌట్ చేస్తుండగా ఓ వ్యక్తి ఉన్నట్టుండి దాడి చేశాడు. కత్తితో దారుణంగా పొడిచాడు. స్థానికులు గుర్తించి వెంటనే దగ్గర్లోని ఆసుపత్రికి తరలించారు. అప్పటికే లోతైన గాయాలయ్యాయి. బతికే అవకాశాలు 5% మే అని వైద్యులు చెబుతున్నారు. ప్రస్తుతానికి బాధితుడి పరిస్థితి విషమంగానే ఉంది"
- పోలీసులు
నిందితుడు చెప్పిందిదే..
నిందితుడు జోర్డాన్ అండ్రాడ్ ఘటన ఎలా జరిగింది పోలీసులకు వివరించాడు. మసాజ్‌ కోసం అక్కడికి వెళ్లానని, వరుణ్‌ తనపై దాడి చేసేందుకు ప్రయత్నించాడని చెప్పాడు. తనను తాను రక్షించుకోవడం కోసమే కత్తితో దాడి చేశానని అన్నాడు. ఉదయం 9 గంటల ప్రాంతంలో ఈ దాడి జరిగినట్టు పోలీసులు చెప్పారు. ఘటనా స్థలానికి చేరుకునే సమయానికి మసాజ్‌ చైర్‌పై బాధితుడు రక్తపు మడుగులో పడి ఉన్నాడు. తలకు తీవ్ర గాయమైంది. అదే రూమ్‌లో నుంచి ఓ కత్తిని స్వాధీనం చేసుకున్నారు. ఈ కత్తి నిందితుడిదేనని ప్రాథమికంగా నిర్ధరణకు వచ్చారు. పూర్తి స్థాయిలో విచారణ కొనసాగిస్తున్నట్టు పోలీసులు వెల్లడించారు.