Tekkali YSRCP incharge Perada Tilak Car Accident | శ్రీకాకుళం జిల్లా మండల కేంద్రం నందిగాం సమీపంలో టెక్కలి వైసీపీ ఇంఛార్జ్ పేరాడ తిలక్ కారు రోడ్డు ప్రమాదానికి గురైంది. వైసీపీ నేత పేరాడ తిలక్ కు చెందిన కారు అదుపుతప్పి ఎదురుగా వెళ్తున్న మరో కారును ఢీకొట్టింది. అనంతరం గోడను ఢీకొని, ఎదురుగా వస్తున్న ఆటోను సైతం ఢీకొంది. ఈ రోడ్డు ప్రమాదంలో కారులో ఉన్న ఓ వ్యక్తితో పాటు ఆటోలో ఉన్న ఇద్దరు వ్యక్తులు గాయపడ్డారు. సమాచారం అందుకున్న నేషనల్ హైవే సిబ్బంది పోలీసులు ఘటనా స్థలానికి చేరుకుని పరిశీలించారు. ప్రమాదంలో గాయపడిన వ్యక్తులను చికిత్స అందించేందుకు సమీపంలోని ఆస్పత్రికి తరలించారు. ఈ రోడ్డు ప్రమాదం ఘటనపై నందిగాం పోలీసులు కేసు నమోదు చేసి దర్యాప్తు చేస్తున్నారు. ప్రమాదం జరిగిన సమయంలో పేరాడ తిలక్ కారులో ఉన్నారా లేదా అని స్పష్టత లేదు. మరిన్ని వివరాలు తెలియాల్సి ఉంది.
పేరాడ తిలక్ కారు ప్రమాదంపై మంత్రి అచ్చెన్నాయుడు ఆరా..
టెక్కలి నియోజకవర్గ వైసీపీ ఇన్చార్జ్ పేరాడ తిలక్ కారు ప్రమాదానికి గురవడం పట్ల రాష్ట్ర వ్యవసాయ శాఖామంత్రి కింజరాపు అచ్చెన్నాయుడు ఆరా తీశారు. వైసీపీ నేత తిలక్ కి ఫోన్ చేసి పరిస్థితిని అడిగి తెలుసుకున్నారు. గాయపడిన వారికి వమెరుగైన వైద్య సేవలు అందించాలని డాక్టర్లకు సూచించారు.