Nodia: నోయిడాలో ఓ మహిళను గుర్తు తెలియని వ్యక్తి లైంగికంగా వేధించాడు. రోడ్డుపైన నిలబడి ఉండగా అసభ్యంగా ప్రవర్తించాడు. ఆ మహిళ స్నేహితులు ఒక్కసారిగా అరిచే సరికి అక్కడి నుంచి పరారయ్యాడు. వర్షం పడుతున్న సమయంలో మొబైల్‌లో వీడియో తీసేందుకు ఆమె బయటకు వెళ్లింది. సరిగ్గా అప్పుడే ఆ దారిలో ఓ వ్యక్తి వచ్చాడు. అసభ్యంగా ప్రవర్తించాడు. ఆమె దుస్తులు చించాడు. మరో ఇద్దరు మహిళలు పరిగెత్తుకుంటూ వచ్చారు. ఇది గమనించిన ఆ నిందితుడు అక్కడి నుంచి పారిపోయాడు. పోలీసులకు ఫిర్యాదు చేసేందుకు స్టేషన్‌ వెళ్లిన బాధితురాలికి ఊహించని అనుభవం ఎదురైంది. FIR నమోదు చేయకుండా ఎదురు ప్రశ్నించారని బాధితురాలు ఆరోపించింది. అంత వర్షంలో బయటకు ఎందుకు వెళ్లావని ప్రశ్నించినట్టు చెప్పింది. అంతే కాదు. అంత రాత్రి వరకూ బయట ఎందుకు తిరుగుతున్నారని క్వశ్చన్ చేశారని ఆరోపించింది.
తీవ్ర అసహనంతో అక్కడి నుంచి వచ్చేసిన బాధితురాలు ఘటన జరిగిన స్థలంలో సీసీ కెమెరా ఫుటేజ్ కోసం ప్రయత్నించింది. కానీ అక్కడ సీసీ కెమెరాలు పని చేయడం లేదు. ఇలా లాభం లేదని బాధితురాలు ఓ సెల్ఫీ వీడియో తీసుకుంది. తనపై ఎలా దాడి జరిగిందో వివరించింది. పోలీసుల తీరునీ ఈ వీడియో ద్వారా వెల్లడించింది. సోషల్ మీడియాలో ఈ వీడియో వైరల్ అయింది. పోలీసులపై తీవ్ర విమర్శలు వెల్లువెత్తాయి. వెంటనే స్పందించిన పోలీసులు ఓ ప్రకటన చేశారు.
"ఈ ఘటనపై వెంటనే కేసు నమోదు చేశాం. నిందితుడు ఎవరో గుర్తించి కచ్చితంగా కఠిన చర్యలు తీసుకుంటాం. అక్కడి సీసీటీవీ ఫుటేజ్‌ని పరిశీలిస్తున్నాం"
- పోలీసులు
Also Read: Israel Hamas War: మరి కొద్ది గంటల్లో మూడో ప్రపంచ యుద్ధం, ఏ క్షణాన్నైనా మొదలు కావచ్చు!