New Groom Died With Heart Attack In Chittor: నవ వధువు కాళ్ల పారాణి ఇంకా ఆరనే లేదు. పెళ్లికి వేసిన పందిరి ఇంకా తీయనే లేదు. అప్పగింతలు ఇంకా పూర్తికానే లేదు. ఇరుకుటుంబాల్లోనూ పెళ్లి సందడి ఇంకా తగ్గలేదు. ఇంతలోనే విధి ఆ ఇద్దరి జీవితాల్లోనూ విషాదం నింపింది. పెళ్లైన 5 రోజులకే ఓ నవ వరుడు గుండెపోటుతో ప్రాణాలు కోల్పోయిన తీవ్ర విషాద ఘటన చిత్తూరు జిల్లాలో (Chittor District) జరిగింది. స్థానికులు, బాధిత కుటుంబీకులు తెలిపిన వివరాల ప్రకారం.. కర్ణాటకలోని వెంగసంద్రాకు చెందిన 28 ఏళ్ల కార్తీక్ అనే యువకునికి.. రామకుప్పం (Ramakuppam) మండలం కొల్లుపల్లికి చెందిన భవాని అనే యువతితో 5 రోజుల కిందటే వివాహం జరిగింది. పెళ్లితంతు పూర్తై బంధువులు ఎవరి ఇళ్లకు వారు వెళ్లిపోయారు.
వెంటాడిన దురదృష్టం
అంతా సవ్యంగా జరిగింది. ఇక దాంపత్యం సంతోషంగా సాగుతుందనుకున్న సమయంలో ఆ దంపతులను దురదృష్టం వెంటాడింది. శుక్రవారం కార్తీక్ అత్తవారింటికి వచ్చాడు. అనంతరం అనారోగ్యంగా ఉందంటూ భార్యను తీసుకుని ఓ ప్రైవేట్ క్లినిక్‌కు వెళ్లాడు. అక్కడ చికిత్స పొందుతూ ప్రాణాలు కోల్పోయాడు. నవ వరుడు గుండెపోటుతో చనిపోయాడని కొంతమంది చెబుతున్నారు. అయితే, విషయం తెలుసుకున్న బంధువులు, కుటుంబ సభ్యులు ఆస్పత్రి వద్ద ఆందోళనకు దిగారు. కార్తీక్ మృతికి వైద్యుల నిర్లక్ష్యమే కారణమంటూ అతనికి గ్యాస్ట్రిక్‌తో ఇబ్బంది పడ్డారని.. వైద్యులు సరైన వైద్యం అందించలేదంటూ ఆరోపించారు. సమాచారం అందుకున్న పోలీసులు అక్కడికి చేరుకుని వారికి సద్దిచెప్పారు. దీనిపై కేసు నమోదు చేసి దర్యాప్తు చేస్తున్నారు.