Naveen reddy Video : ఆదిభట్లలో వైశాలి అనే యువతి ఇంటిపై దాడి చేసి తల్లిదండ్రుల్ని కొట్టి కిడ్నాప్ చేశారు. ఈ వీడియోలు వైరల్ అయ్యాయి. పోలీసులు కేసులు పెట్టారు. సాయంత్రానికి వైశాలి ఇంటికి చేరింది. తర్వాత పోలీసులు నిందితుల్ని అరెస్ట్ చేశారు. నిందితుడు నవీన్ రెడ్డి పై వైశాలి చాలా ఆరోపణలు చేశారు. నవీన్ రెడ్డి తల్లి కూడా మీడియాతో మాట్లాడారు. తన కుమారుడు దాడి చేయడం తప్పేనన్నారు కానీ అంతకు ముందు ఏం జరిగిందో చూడాలన్నారు. అయితే అసలు నవీన్ రెడ్డి వెర్షన్ ఏమిటో బయటకు రాలేదు. ఆయనను అరెస్ట్ చేసిన తర్వాత ఓ సెల్ఫీ వీడియో మాత్రం వెలుగులోకి వచ్చింది. అదిప్పుడు నవీన్ రెడ్డి వెర్షన్‌గా చెప్పుకోవచ్చు.
సెల్ఫీ వీడియోలో నవీన్ రెడ్డి ఓపెన్ అయ్యాడు. తాను చేసింది తప్పేనని ... కానీ దాని వెనుక చాలా పెయిన్ దాగుందన్నాడు. తనకున్న కొన్ని ఆరోగ్య సమస్యల కారణంగానే తాను పోలీసులకు సరెండర్ కాలేదని పేర్కొన్నాడు.ఈ కిడ్నాప్ విషయంలో తనను మాత్రమే నెగెటివ్‌గా చూస్తున్న వాళ్లంతా.. ఒకవేళ తనకు జరిగినట్టే ఒక అమ్మాయికి జరిగి ఉంటే.. ఇలానే స్పందించే వాళ్లా అని ప్రశ్నించాడు. ఈ విషయాన్ని ఒక అమ్మాయికి జరిగిందనో.. ఒక అబ్బాయికి జరిగిందనో చూడకుండా.. ఒక ఫ్యామిలీకి, ఒక మనసుకు సంబంధించిన విషయంగా చూడాలని రిక్వెస్ట్ చేశాడు.
అసలు వైశాలితో ఎలా పరిచయం అయిందో అన్న దగ్గర్నుంచి నవీన్ రెడ్డి సెల్ఫీ వీడియోలో వివరించారు. బ్యాడ్మింటన్‌లో తాను ఆడే కోర్టుకే వైశాలి, ఆమె ఇరుగుపొరుగు వచ్చి ఆడేవారని నవీన్ రెడ్డి చెప్పాడు. తర్వాత వైశాలి ఒక్కరే బ్యాడ్మింటన్ ఆడటానికి వచ్చేదని, అక్కడ ఆమె పరిచయం అయ్యిందని తెలిపాడు. ఆట ముగించిన తర్వాత మిస్టర్ టీ వ్యవహారాల్లో తాను బిజీగా ఉండేవాడినని చెప్పుకొచ్చాడు. బ్యాడ్మింటన్ కోర్ట్‌కు సమీపంలోనే తన టీ స్టాల్ వుండటంతో వైశాలితో కబుర్లు చెబుతూ వుండేవాడినని, కొన్నిరోజులకు ఇద్దరి అభిరుచులు కలిశాయని తెలిపాడు. ఈ క్రమంలోనే పెళ్లి విషయాన్ని కొన్ని ప్రస్తావించాని వివరించాడు. ఆ తర్వాత తనకు చాలా అన్యాయం జరిగిందన్నాడు.కానీ అదేమిటో చెప్పలేదు. సెల్ఫీ వీడియో పూరి స్థాయిలో బయటకు రాలేదని తెలుస్తోంది.
ఇక తన మీద మీడియాలో చాలా ప్రచారాలు జరుగుతున్నాయని నవీన్ రెడ్డి వాపోయాడు. దాని వల్ల తన కుటుంబం కూడా బాధపడుతోందని ఆవేదన వ్యక్తం చేశాడు. తనకు జరిగిన మోసం ఏంటన్న వీడియో మాత్రం ఈ సెల్ఫీ వీడియోలో లేదు. ఈ వీడియో.. తాను పోలీసులకు దొరకముందే రికార్డు చేసినట్టు తెలుస్తోంది. కానీ.. నవీన్ పోలీసులకు దొరికిన తర్వాతే ఈ వీడియోలు బయటికి వచ్చాయి. రెండు పార్టులు వీడియోలు బయటకు వచ్చాయి. మధ్యలో ఇంకొంత భాగాన్ని లీక్ చేయలేదని తెలుస్తోంది. 5 రోజులుగా తప్పుంచుకు తిరుగుతున్న అతన్ని గోవాలో అరెస్ట్ చేశారు. కాండోలిమ్‌ బీచ్‌‌లో పట్టుబడిన అతన్ని హైదరాబాద్‌‌కు తరలించారు.