Hyderabad: నల్ల కవరులో మహిళ తల! మొండెం వెతికినా జాడ లేదు - మలక్‌పేట్‌లో మిస్టరీగా కేసు

ఒక నల్లటి కవరులో గుర్తు తెలియని మహిళ తల లభ్యం అయింది. ఇది గుర్తించిన స్థానికులు భయాందోళనలకు గురైయ్యారు.

హైదరాబాద్ మలక్ పేట పోలీసు స్టేషన్ పరిధిలో ఓ మహిళ తల లభ్యం కావడం సంచలనంగా మారింది. స్థానికంగా ఉన్న తీగల గూడ మూసి పరివాహక ప్రాంతంలో ఒక నల్లటి కవరులో గుర్తు తెలియని మహిళ తల లభ్యం అయింది. ఇది గుర్తించిన స్థానికులు భయాందోళనలకు గురైయ్యారు. స్థానిక ప్రజలు మలక్ పేట పోలీసులకు సమాచారం అందించారు. హుటాహుటిన ఘటనా స్థలానికి చేరుకున్న పోలీసులు, క్లూస్ టీమ్, డాగ్ స్క్వాడ్ లతో దర్యాప్తు చేపట్టారు. ఘటన స్థలానికి అడిషనల్ డీసీపీ ఆనంద్, మలక్ పేట ఇన్స్‌పెక్టర్ శ్రీనివాస్, మలక్ పేట, చాదర్ ఘాట్ క్రైం సిబ్బంది చేరుకున్నారు. మహిళను ఎక్కడో హత్య చేసి, ఇక్కడ తల తెచ్చి పడేసి వెళ్లిపోయినట్లుగా పోలీసులు అనుమానిస్తున్నారు.

స్థానికుల ఫిర్యాదుతో కేసు నమోదు చేసుకుని అన్నీ కోణాల్లో దర్యాప్తు చేపడుతున్నామని పోలీసులు తెలిపారు. దర్యాప్తు అనంతరం పూర్తి స్థాయిలో వివరాలు తెలియజేస్తామని పోలీసులు తెలిపారు. వారు తలను స్వాధీనం చేసుకుని, ఉస్మానియా ఆసుపత్రికి తరలించారు.

ఈ మహిళ ఎవరు.. ఏ ప్రాంతానికి చెందిన వారు.. హత్య చేయటానికి కారణాలు ఏంటీ.. చేసింది ఎవరు.. ఎప్పుడు, ఎక్కడ హత్య జరిగింది.. తలను వేరు చేయటానికి కారణాలు ఏంటీ అనే విషయాలపై విచారణ చేస్తున్నారు. తల ఆధారంగా మహిళ ఎవరు అనేది గుర్తించటానికి ప్రత్యేక టీమ్స్ ఏర్పాటు చేశారు పోలీసులు.