Hyderabad Crime : హైదరాబాద్ లో దారుణం జరిగింది. సెల్ ఫోన్లో ఎక్కువగా మాట్లాడుతుందని కూతుర్ని హత్య చేశాడు సవతి తండ్రి. ముషీరాబాద్ పోలీస్ స్టేషన్ పరిధిలో సవతి తండ్రి కూతురుని గొంతు నులిమి హత్య చేశాడు. ఫోన్ మాట్లాడవద్దంటూ ఎన్నిసార్లు చెప్పినా వినకపోవడంతో ఆ దారుణానికి పాల్పడ్డాడు. యాస్మిన్ ఉన్నిసా (17)ను సవతి తండ్రి సాదిక్ గొంతు నులిమి హత్య చేసిన ఘటన ముషీరాబాద్ పీఎస్ పరిధిలోని బాకారంలో వెలుగుచూసింది. యాస్మిన్ తల్లిని రెండో వివాహం చేసుకున్నాడు సాదిక్. కూతురిని చంపిన అనంతరం నిందితుడు మహమ్మద్ తౌ ఫి అలియాస్ సాదిక్ ముషీరాబాద్ పోలీస్ స్టేషన్ లో లొంగిపోయాడు. యాస్మిన్ ఉన్నిసా మృతదేహాన్ని పోస్టుమార్టం కోసం గాంధీ మార్చురీకి తరలించారు పోలీసులు.
ఝార్ఖండ్ లో దారుణం
ఝార్ఖండ్‌లో శ్రద్ధ తరహా హత్య కేసు వెలుగులోకి వచ్చింది. సాహిబ్‌గంజ్‌ జిల్లాలో గిరిజన తెగకు చెందిన ఓ వ్యక్తి తన రెండో భార్యను అత్యంత కిరాతకంగా నరికి చంపాడు. శవాన్ని 18 ముక్కలు చేశాడు. ఈ కేసుకి సంబంధించి పోలీసులు మరి కొన్ని వివరాలు వెల్లడించారు. "22 ఏళ్ల మహిళ మృత దేహానికి సంబంధించిన 12 శరీర భాగాలను గుర్తించాం. తలతో సహా మిగతా శరీర భాగాలు ఇంకా దొరకలేదు. గాలింపు చర్యలు కొనసాగుతున్నాయి. నిందితుడు దిల్దార్ అన్సారీని అదుపులోకి తీసుకున్నాం" అని చెప్పారు. సంతాలి మోమిన్ తోల ప్రాంతంలో కొన్ని శరీర భాగాలు గుర్తించామని స్పష్టం చేశారు. బాధితురాలు రూబికా పహదిన్‌...నిందితుడికి రెండో భార్య అని తెలిపారు. రెండేళ్లుగా వీళ్లిద్దరి మధ్య పరిచయం ఉందని,మృతురాలి కుటుంబ సభ్యులు మిస్సింగ్ కేసు నమోదు చేయడంతో అసలు విషయం వెలుగులోకి వచ్చిందని పోలీసులు పేర్కొన్నారు. విచారణలో భాగంగా...రూబికా హత్యకు గురైందని తేలింది. శవాన్ని కట్ చేసేందుకు ఎలక్ట్రిక్ కట్టర్ లాంటి పదునైన ఆయుధాన్ని వినియోగించి ఉండొచ్చని అనుమానిస్తున్నారు.
ప్రతిపక్షాల ఆరోపణలు
అటు రాజకీయంగానూ ఈ ఘటనపై పెద్ద ఎత్తున వాగ్వాదం జరుగుతోంది. రాష్ట్ర ప్రభుత్వం శాంతి భద్రతలను కాపాడటంలో విఫలమైందని బీజేపీ ఆరోపిస్తోంది. "హేమంత్ సోరెన్ ప్రభుత్వంలో బాలికలు, యువతులపై ఇలాంటి దారుణాలెన్నో జరుగుతున్నాయి. మైనార్టీ వర్గానికి చెందినకొందరు వ్యక్తులు కావాలనే మహిళలపై ఇలాంటి దారుణాలకు పాల్పడుతున్నారు. ప్రభుత్వం మాత్రం ఎలాంటి చర్యలూ తీసుకోవడం లేదు. ప్రభుత్వం ఈ విషయంలో ఎలాంటి కదలిక లేకుండా ఉంటే...మేమే రంగంలోకి దిగి చర్యలు తీసుకుంటాం" అని బీజేపీ రాష్ట్ర ప్రతినిధి ప్రతుల్ సహదేవ్ అన్నారు.
రాజస్థాన్ లో మరో ఘటన
రాజస్థాన్ లోని జైపూర్ లో ఈ దిగ్భ్రాంతి కలిగించే ఘటన జరిగింది. విద్యాధర్ నగర్ ప్రాంతంలోని లాల్ పురియా అపార్ట్ మెంట్ సెక్టార్ - 2 లో ఈ నెల 11వ తేదీన అనుజ్ అనే వ్యక్తి 64 ఏళ్ల సరోజ్ శర్మ అనే తన మేనత్తను హత్య చేశాడు. తలపై సుత్తితో కొట్టి దారుణహత్యకు పాల్పడ్డాడు. ఆ తర్వాత తన బాత్ రూమ్ లో మార్బుల్ కట్టర్ మిషన్ ను ఉపయోగించి మృతదేహాన్ని పది ముక్కలుగా చేశాడు. ఆపై వాటిని అడవిలో పలు ప్రాంతాల్లో పాడేశాడు. ఆ తర్వాత తనకు ఏం తెలియదన్నట్లుగా స్థానిక పోలీస్ స్టేషన్ కు వెళ్లి తన అత్త అదృశ్యం అయినట్లు పోలీసులకు ఫిర్యాదు చేశాడు. కేసు నమోదు చేసుకున్న పోలీసులు దర్యాప్తు ప్రారంభించారు. ఇంటికి తిరిగి వెళ్లిన అనుజ్.. వంట గదిలో ఉన్న రక్తపు మరకలను చూశాడు. వెంటనే వాటిని కడిగేసే ప్రయత్నం చేశాడు. ఈ క్రమంలోనే మృతురాలు కూతురు పూజ అక్కడకు వచ్చింది. అతడు రక్తపు మరకలు కడిగేయడాన్ని గుర్తించింది. వెంటనే వెళ్లి ఇదే విషయాన్ని పోలీసులకు తెలిపింది. హుటాహుటినా రంగంలోకి దిగిన పోలీసులు అనుజ్ ను అరెస్ట్ చేశారు.