Upcoming SUVs in 2024: 2024లో కారు కొనాలనుకుంటున్నారా? - ఈ నాలుగు ఎస్‌యూవీలు ఎంట్రీ ఇస్తున్నాయి - ఒక్కసారి చూడండి!

Upcoming SUVs 2024: 2024లో హ్యుందాయ్ క్రెటా ఫేస్‌లిఫ్ట్, ఎక్స్‌యూవీ300 ఫేస్‌లిఫ్ట్, టాటా కర్వ్ మార్కెట్లోకి ఎంట్రీ ఇవ్వనున్నాయి.

New SUVs in 2024: ప్రస్తుతం మనదేశంలో ఎస్‌యూవీలకు డిమాండ్ బాగా పెరుగుతోంది. హై గ్రౌండ్ క్లియరెన్స్, బెటర్ రోడ్ ప్రెజెన్స్, ఎక్కువ సామర్థ్యం ఉన్న కార్లకు మనదేశంలో డిమాండ్ ఎక్కువ. 2024 ప్రారంభంలో ఈ విభాగంలో నాలుగు కొత్త ఎస్‌యూవీ భారతీయ రోడ్లపైకి రానున్నాయి. ఈ ఎస్‌యూవీల గురించి కొన్ని ముఖ్యమైన వివరాలు తెలుసుకుందాం.

కియా సోనెట్ ఫేస్ లిఫ్ట్ (Kia Sonet Facelift)
కియా సోనెట్ ఫేస్‌లిఫ్ట్ డిసెంబర్ 14వ తేదీన లాంచ్ కానుంది. అమ్మకాలు వచ్చే సంవత్సరం నుంచి ప్రారంభం కానున్నాయి. ఇది కొత్త ఫ్రంట్, రియర్ బంపర్స్, ఎల్ఈడీ డీఆర్ఎల్స్, అప్‌డేట్ చేసిన ఫాక్స్ స్కిడ్ ప్లేట్, కొత్త అల్లాయ్ వీల్స్, కొత్త ఫ్రంట్ వంటి కొన్ని చిన్న బ్యూటీ అప్‌డేట్‌లను పొందుతుంది. విలక్షణమైన టెయిల్‌ల్యాంప్‌లతో కూడిన గ్రిల్, హెడ్‌ల్యాంప్‌లు కూడా చూడచవ్చు. క్యాబిన్ లోపల కూడా ప్రధాన అప్‌గ్రేడ్‌లు కనిపిస్తాయి. ఇందులో కొత్త ఇన్‌స్ట్రుమెంట్ క్లస్టర్, అప్‌హోల్స్టరీ, అప్‌డేట్ చేసిన డ్యాష్‌బోర్డ్ లేఅవుట్ ఉంటాయి. అంతేకాకుండా అడ్వాన్స్‌డ్ డ్రైవర్ అసిస్టెన్స్ సిస్టమ్స్ (ADAS) కూడా ఇందులో ఉండనుంది.

హ్యుందాయ్ క్రెటా ఫేస్‌లిఫ్ట్ (Hyundai Creta Facelift)
హ్యుందాయ్ మోటార్ ఇండియా 2024 ప్రారంభంలో కొత్త క్రెటా ఫేస్‌లిఫ్ట్‌ను విడుదల చేయనుంది. ఏడీఏఎస్ టెక్నాలజీని చేర్చడంతో పాటు ఇంటీరియర్, ఎక్స్‌టీరియర్ రెండింటిలోనూ ప్రధాన అప్‌డేట్‌లు ఉంటాయని ఆశిస్తున్నారు. ఫుల్లీ డిజిటల్ 10.25 అంగుళాల డ్రైవర్ డిస్‌ప్లేను ఇందులో చూడవచ్చు. క్రెటాకు పవర్‌ను అందించడానికి ప్రస్తుతం ఉన్న 1.5 లీటర్ నేచురల్లీ యాస్పిరేటెడ్ పెట్రోల్, 1.5 లీటర్ డీజిల్ ఇంజిన్‌తో పాటు 160 బీహెచ్‌పీ పవర్‌తో కొత్త 1.5 లీటర్ టర్బో పెట్రోల్ ఇంజన్ ఆప్షన్ కూడా ఉండనుంది.

మహీంద్రా ఎక్స్‌యూవీ300 ఫేస్‌లిఫ్ట్ (Mahindra XUV300 Facelift)
మహీంద్రా ఎక్స్‌యూవీ300 సబ్ కాంపాక్ట్ ఎస్‌యూవీని 2024 ప్రారంభంలో అప్‌డేట్ చేయనున్నారు. ప్రస్తుతం ఉన్న 6 స్పీడ్ ఏఎంటీ యూనిట్ స్థానంలో కొత్త 6 స్పీడ్ టార్క్ కన్వర్టర్ ఆటోమేటిక్ గేర్‌బాక్స్, ఏడీఏఎస్ టెక్నాలజీ, పనోరమిక్ సన్‌రూఫ్‌ను పొందుతుంది. ఎక్స్‌యూవీ700 తరహాలో డిజైన్ మార్పులు చేయనున్నారు. ఇందులో కొత్త ఫ్రంట్ గ్రిల్, సీ-ఆకారపు ఎల్ఈడీ హెడ్‌ల్యాంప్స్, కొత్త అల్లాయ్ వీల్స్, అప్‌డేట్ చేసిన వెనుక బంపర్, టెయిల్‌గేట్ ఉన్నాయి. ఇంటీరియర్‌లో కొత్త డ్యాష్‌బోర్డ్ ఫినిషింగ్, ఆటోమేటిక్ ట్రాన్స్‌మిషన్ కోసం చిన్న గేర్ సెలెక్టర్, ప్రత్యేక సెంట్రల్ ఏసీ వెంట్లు ఉంటాయి.

టాటా కర్వ్ (Tata Curvv)
టాటా మోటార్స్ 2024 ప్రారంభంలో కర్వ్ ఎస్‌యూవీని లాంచ్‌ చేయనున్నట్లు అధికారికంగా ధృవీకరించింది. ఇది ఎలక్ట్రిక్ పవర్‌ట్రెయిన్‌తో మార్కెట్లోకి వచ్చే మొదటి టాటా కారు. కంపెనీ జనరేషన్ 2 ఈవీ ఆర్కిటెక్చర్ ఆధారంగా రూపొందించిన ఎలక్ట్రిక్ మోడల్ ఒక్కసారి ఛార్జ్ చేస్తే 500 కిలోమీటర్ల కంటే ఎక్కువ దూరం ప్రయాణించగలదు. ఇందులో ఏడీఏఎస్ టెక్నాలజీ, 360 డిగ్రీ కెమెరా, వైర్‌లెస్ స్మార్ట్‌ఫోన్ కనెక్టివిటీతో 12.3 అంగుళాల ఇన్ఫోటైన్‌మెంట్ సిస్టమ్, 10.25 అంగుళాల డ్రైవర్ డిస్‌ప్లే, వెంటిలేటెడ్ సీట్లు, స్టీరింగ్ వీల్‌పై కొత్త ఇల్యూమినేటెడ్ టాటా లోగో, ముందు, వెనుక పార్కింగ్ సెన్సార్లు... ఇలా అనేక ఫీచర్లు ఉండనున్నాయి.