Top CNG Cars Under Rs 10 Lakh 2026: ప్రస్తుతం, మన మార్కెట్‌లో విభిన్న రకాల కార్లు CNG ఆప్షన్‌తో అందుబాటులో ఉన్నాయి. హ్యాచ్‌బ్యాక్‌ల నుంచి కాంపాక్ట్ సెడాన్లు, SUVలు, 7 సీటర్ వెహికల్స్‌ వరకు ఆప్షన్లు పెరిగాయి. కొన్ని కార్లలో ఆటోమేటిక్ గేర్‌బాక్స్ కూడా అందుబాటులోకి వచ్చింది. అంతేకాదు.. ఆధునిక CNG కార్లలో ఫీచర్లకు కూడా కొదవ లేదు. కొన్ని మోడళ్లలో డ్యూయల్ ట్యాంక్‌లను ఉపయోగిస్తున్నారు. ఇవి కారు కింద అమర్చడం వల్ల బూట్ స్పేస్‌ సేవ్‌ అవుతోంది. ప్రస్తుతం, రూ.10 లక్షల బడ్జెట్‌లో అందుబాటులో ఉన్న ఐదు ముఖ్యమైన CNG కార్లు ఇవే:

Continues below advertisement

1. Maruti Suzuki Dzire CNG

ధర: రూ.8.11 లక్షల నుంచి రూ.9.11 లక్షలు

Continues below advertisement

మారుతి సుజుకి డిజైర్ CNGలో 1.2 లీటర్, 3 సిలిండర్ ఇంజిన్ ఉంటుంది. ఇది CNGతో 70hp శక్తి, 102Nm టార్క్‌ను ఉత్పత్తి చేస్తుంది. రోజువారీ ప్రయాణాలకు పనితీరు సరిపోతుంది. అయితే రైడ్ క్వాలిటీ & హ్యాండ్లింగ్ విషయంలో డిజైర్ ఆకట్టుకుంటుంది. క్యాబిన్‌లో మంచి స్పేస్‌ ఉంది. VXi, ZXi వేరియంట్లలో CNG ఆప్షన్‌ ఎంచుకోవచ్చు. దీంతోపాటు చాలా అవసరమైన ఫీచర్లు కూడా అందుబాటులోకి వస్తాయి. బూట్‌లో ఒక పెద్ద CNG ట్యాంక్ ఉన్నప్పటికీ, ఉపయోగపడే స్థలం కొంత మిగులుతుంది.

2. Maruti Suzuki Baleno CNG

ధర: రూ.7.77 లక్షల నుంచి రూ.8.67 లక్షలు

బలెనో CNGలో 1.2 లీటర్, 4 సిలిండర్ ఇంజిన్ ఉంటుంది. ఇది 78hp శక్తి, 98Nm టార్క్‌ను అందిస్తుంది. ఇంజిన్ స్మూత్‌గా, రిఫైన్డ్‌గా ఉండటంతో పాటు మంచి ఇంధన సామర్థ్యం కనిపిస్తుంది. డెల్టా & జీటా ట్రిమ్‌లలో CNG వేరియంట్లు లభిస్తాయి. క్యాబిన్ విశాలంగా ఉంటుంది. అయితే పెద్ద CNG ట్యాంక్ కారణంగా బూట్ స్పేస్ కొంత తగ్గుతుంది. ఇదే కారుకు టయోటా గ్లాంజా ‍‌(Toyota Glanza) రూపంలో మరో ప్రత్యామ్నాయం కూడా ఉంది. బలెనో డెల్టా & జీటా ట్రిమ్‌లకు సమానంగా ఉండే గ్లాంజాలోని S & G ట్రిమ్‌లలో CNG ఆప్షన్‌ ఉంటుంది.

ఇది కూడా చదవండి: రూ.10 లక్షల్లోపు పాపులర్‌ సెడాన్లు - మారుతి డిజైర్, హోండా అమేజ్ టాప్ వేరియంట్ల కంపారిజన్‌

3. Hyundai Exter CNG

ధర: రూ.6.99 లక్షల నుంచి రూ.9.42 లక్షలు

హ్యుందాయ్ ఎక్స్‌టర్‌ CNGలో 1.2 లీటర్, 4 సిలిండర్ ఇంజిన్ ఉంటుంది. ఇది 69hp శక్తి, 95Nm గరిష్ట టార్క్‌ను ఉత్పత్తి చేస్తుంది. ఈ కారులో CNG వేరియంట్ల సంఖ్య ఎక్కువగా ఉంది. ముఖ్యంగా టాప్ వేరియంట్లలో మంచి ఫీచర్లు అందుబాటులో ఉన్నాయి. ఎక్స్‌టర్‌‌లో రెండు CNG ట్యాంకులు ఉండటంతో బూట్ స్పేస్‌పై ప్రభావం తక్కువగా ఉంటుంది. స్మూత్ ఇంజిన్ & చిన్న సైజ్‌ కారణంగా నగర ప్రయాణాలకు ఇది అనుకూలంగా ఉంటుంది. అయితే ఇతర కార్లతో పోలిస్తే లోపలి స్థలం కొంత తక్కువగా ఉంటుంది.

4. Tata Punch CNG

ధర: రూ.6.80 లక్షల నుంచి రూ.10.67 లక్షలు

టాటా పంచ్ CNGలో 1.2 లీటర్, 3 సిలిండర్ ఇంజిన్ ఉంటుంది. CNG మోడ్‌లో ఇది 73hp శక్తి, 103Nm టార్క్‌ను అందిస్తుంది. ఈ జాబితాలో AMT గేర్‌బాక్స్‌తో లభించే ఏకైక CNG కారు పంచ్. వేరియంట్ల ఎంపిక కూడా విస్తృతంగా ఉంది. ఫీచర్ల పరంగా ఈ జాబితాలో పంచ్ ముందంజలో ఉంటుంది. అయితే టాప్ వేరియంట్ల ధర రూ.10 లక్షలు దాటుతుంది. పనితీరు సాధారణంగానే ఉన్నప్పటికీ రైడ్ క్వాలిటీ & హ్యాండ్లింగ్ బాగుంటాయి. రెండు CNG ట్యాంకులు ఉండటంతో బూట్‌లో ఉపయోగపడే స్థలం కూడా మిగులుతుంది.

ఇది కూడా చదవండి: రూ.50,000 డౌన్ పేమెంట్ చేసి Maruti Swift కారును తీసుకెళ్లండి, EMI పూర్తి వివరాలు

5. Nissan Gravite CNG

ధర: రూ.6.59 లక్షల నుంచి రూ.8.94 లక్షలు

నిస్సాన్ గ్రావైట్‌లో 1.0 లీటర్, 3 సిలిండర్ ఇంజిన్ ఉంటుంది. అయితే ఇందులో CNG కిట్‌ను డీలర్ స్థాయిలో అమరుస్తారు. దీనికి అధికారిక హోమోలోగేషన్ లేకపోవడంతో CNG మోడ్‌లో ఖచ్చితమైన శక్తి & టార్క్ వివరాలు అందుబాటులో లేవు. ఈ కారు ప్రధాన ఆకర్షణ దాని అద్భుతమైన ప్యాకేజింగ్. 7 సీట్ల సౌకర్యవంతమైన అమరిక కూడా ప్రత్యేకత. డీలర్ స్థాయిలో CNG కిట్‌ను అమర్చడం వల్ల అన్ని ట్రిమ్‌లలో ఈ ఎంపిక లభిస్తుంది. అయితే ఫీచర్ల విషయంలో గ్రావైట్ కొన్ని ఇతర మోడళ్ల కంటే వెనుకబడుతుంది. పెర్ఫార్మెన్స్‌ కూడా అంతగా ఆకట్టుకోదు. బూట్‌లో అమర్చిన రెండు CNG ట్యాంకుల కారణంగా ఉపయోగపడే బూట్ స్పేస్ దాదాపు ఉండదు.

రూ.10 లక్షల లోపు CNG కారు కొనాలనుకునేవాళ్లకు చాలా ఎంపికలు కనిపిస్తున్నాయి. సెడాన్ కావాలంటే డిజైర్, ప్రీమియం హ్యాచ్‌బ్యాక్ కావాలంటే బలెనో, చిన్న SUV తరహా కారు కావాలంటే ఎక్స్‌టర్‌ లేదా పంచ్, 7 సీట్ల అవసరం ఉంటే గ్రావైట్‌ను పరిశీలించవచ్చు.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.