Renault Duster Adventure Edition Price And Features: అడ్వెంచర్ డ్రైవింగ్‌ను ఇష్టపడే కస్టమర్ల కోసం రెనాల్ట్ కొత్త డస్టర్ అడ్వెంచర్ ఎడిషన్‌ను భారత మార్కెట్లో విడుదల చేసింది. ప్రత్యేక డిజైన్ అంశాలు, అదనపు ఫీచర్లు & ఆకర్షణీయమైన ధరతో వచ్చిన ఈ స్పెషల్ ఎడిషన్ ప్రారంభ ధర రూ.12.99 లక్షలు (ఎక్స్ షోరూమ్). డస్టర్‌లో ఇప్పటికే వచ్చిన ఐకానిక్ ఎడిషన్ తర్వాత విడుదలైన రెండో స్పెషల్ ఎడిషన్ ఇదే.

కొత్త డస్టర్ అడ్వెంచర్ ఎడిషన్ మూడు వేరియంట్లలో అందుబాటులోకి వచ్చింది. 

Adventure Turbo Tce 100 MT వేరియంట్ ధర రూ.12.99 లక్షలు (ఎక్స్ షోరూమ్)

Adventure Turbo Tce 160 MT ధర రూ.13.99 లక్షలు (ఎక్స్ షోరూమ్)

Adventure Turbo Tce 160 DCT వేరియంట్ ధర రూ.15.39 లక్షలు (ఎక్స్ షోరూమ్)

ఇది కూడా చదవండి: ఆటోమేటిక్ కంటే మాన్యువల్ డ్రైవింగే బెస్ట్! ఏకాగ్రతకు, మెదడు షార్ప్‌గా పని చేయడానికి ఇదే మంచిదట!

ఈ స్పెషల్ ఎడిషన్‌లో ప్రధాన ఆకర్షణ ప్రత్యేక అడ్వెంచర్ గ్రాఫిక్స్. వెనుక భాగంలో టోపోగ్రాఫికల్ కాంటూర్ లైన్స్‌తో పాటు లేహ్ ప్రాంతానికి చెందిన భౌగోళిక కోఆర్డినేట్లు 34.27 N & 77.60 E డెకల్ రూపంలో అందించారు. క్లిష్టమైన పర్వత ప్రాంతాల్లో డస్టర్‌ను పరీక్షించిన గుర్తుగా ఈ ప్రత్యేక డిజైన్‌ను రూపొందించింది కంపెనీ. ఇదే డిజైన్ థీమ్ ముందు డోర్లపై ఉన్న ప్లాక్‌లపై కూడా కనిపిస్తుంది. అంతేకాకుండా అడ్వెంచర్ ఎడిషన్‌కు ప్రత్యేకమైన ఫ్లోర్ మ్యాట్స్ కూడా అందించారు.

ఈ ఎడిషన్‌ను Evolution ట్రిమ్ ఆధారంగా రూపొందించినప్పటికీ, అంతకంటే పై వేరియంట్‌లో కనిపించే కొన్ని ప్రీమియం ఫీచర్లను కూడా ఇందులో చేర్చారు. 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 7 అంగుళాల TFT డ్రైవర్ డిస్‌ప్లే, వైర్‌లెస్ Android Auto & Apple CarPlay, 17 అంగుళాల అల్లాయ్ వీల్స్, పూర్తి LED లైటింగ్, 6 ఎయిర్‌బ్యాగ్స్ వంటి ఫీచర్లు ఇందులో ఉన్నాయి.

అంతేకాకుండా.. టాప్ Techno ట్రిమ్‌లో లభించే పానోరమిక్ సన్‌రూఫ్, పవర్డ్ టెయిల్‌గేట్ & డ్యూయల్ జోన్ ఏసీ వంటి ప్రీమియం ఫీచర్లను కూడా ఈ స్పెషల్ ఎడిషన్‌లో అందించడం విశేషం. దీంతో, ధరకు మరింత విలువను అందించే వేరియంట్‌గా Adventure నిలుస్తోంది.

ఇది కూడా చదవండి: హేమ గ్యారేజ్‌లో బెంజ్ జీఎల్ఎస్ 450D... కారు ఫీచర్స్ తెలుసా? రేటు కోటిన్నర కంటే ఎక్కువ

ఇంజిన్ ఎంపికల విషయానికి వస్తే, సాధారణ డస్టర్‌లో ఉన్న మూడు పవర్‌ట్రెయిన్ ఆప్షన్లనే అడ్వెంచర్ ఎడిషన్‌లో కూడా కొనసాగించారు. 1.0 లీటర్ మూడు సిలిండర్ల టర్బో పెట్రోల్ ఇంజిన్ 100 hp పవర్ & 160 Nm టార్క్ ఉత్పత్తి చేస్తుంది. ఈ ఇంజిన్‌కు 6 స్పీడ్ మాన్యువల్ గేర్‌బాక్స్ మాత్రమే అందుబాటులో ఉంటుంది.

1.3 లీటర్ నాలుగు సిలిండర్ల టర్బో పెట్రోల్ ఇంజిన్ 163 hp పవర్ & 280 Nm టార్క్‌ను ఉత్పత్తి చేస్తుంది. ఈ ఇంజిన్‌తో 6 స్పీడ్ మాన్యువల్ లేదా 6 స్పీడ్ డ్యూయల్ క్లచ్ ఆటోమేటిక్ గేర్‌బాక్స్ ఆప్షన్లను కస్టమర్లు ఎంచుకోవచ్చు.

తక్కువ ధరలో ప్రత్యేక డిజైన్, ప్రీమియం ఫీచర్లు & శక్తివంతమైన టర్బో పెట్రోల్ ఇంజిన్ ఎంపికలను కోరుకునే వారికి రెనాల్ట్ డస్టర్ అడ్వెంచర్ ఎడిషన్ మంచి ఎంపికగా నిలిచే అవకాశం ఉంది. ప్రత్యేకంగా లాంగ్ డ్రైవ్‌లు, అడ్వెంచర్ ట్రిప్‌లను ఇష్టపడే ఎస్‌యూవీ ప్రియులను ఈ కొత్త స్పెషల్ ఎడిషన్ ఆకట్టుకునే అవకాశాలు కనిపిస్తున్నాయి.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.