Driving Tips For Winter Snowfall: హిమాచల్ ప్రదేశ్లో ఈ సీజన్లో మొదటిసారిగా భారీగా మంచు కురవడంతో మనాలీ పరిసర ప్రాంతాలు పూర్తిగా మంచుతో కప్పుకుపోయాయి. ఈ క్రమంలో సోషల్ మీడియాలో వైరల్ అవుతున్న వీడియోలు ఒక్కసారిగా అందరినీ భయపెడుతున్నాయి. కొండదారుల్లో వాహనాలు అదుపు తప్పి జారిపోవడం, మంచుపై స్కిడ్ అవుతూ ప్రమాదకరంగా కిందకు వెళ్లిపోవడం వంటి దృశ్యాలు ప్రస్తుతం విస్తృతంగా కనిపిస్తున్నాయి. ఇవన్నీ ఒక విషయాన్ని స్పష్టంగా చెబుతున్నాయి - మంచు ప్రాంతాల్లో 4x2 కార్లతో ప్రయాణం తీవ్ర ప్రమాదకరం.
685 రహదారులు మూసివేత
భారత వాతావరణ శాఖ తాజా హెచ్చరికల ప్రకారం, హిమాచల్ ప్రదేశ్ అంతటా విస్తృతంగా మంచు, వర్షాలు కురిసే అవకాశముంది. మంచు ప్రభావంతో, ఇప్పటికే ఆ రాష్ట్రవ్యాప్తంగా 685 రహదారులు మూసివేశారు. వీటిలో లాహౌల్ స్పితి జిల్లాలో అత్యధికంగా 292 రోడ్లు బ్లాక్ అయ్యాయి. చంబా, మండీ, కులు జిల్లాల్లో కూడా భారీగా రవాణా అంతరాయం ఏర్పడింది.
మనాలీ, పరిసర ప్రాంతాల్లో పరిస్థితి మరింత క్లిష్టంగా మారింది. దట్టమైన మంచు, తక్కువ విజిబిలిటీ కారణంగా స్థానిక యంత్రాంగం కఠిన ఆంక్షలు విధించింది. ఎమర్జెన్సీ అయితే మాత్రమే ప్రయాణం చేయాలని సూచించింది. ముఖ్యంగా 4x4 వాహనాలకే అనుమతి ఇస్తున్నారు. కులు నుంచి మనాలీకి వెళ్లే వాహనాలను పాట్లికుహల్ వద్దే నిలిపివేస్తున్నారు. ముందున్న రహదారి డ్రైవింగ్కు సురక్షితం కాదని అధికారులు హెచ్చరిస్తున్నారు.
వైరల్ వీడియోల్లో కనిపిస్తున్న ప్రమాదాలకు ప్రధాన కారణం - 4x2 కార్లకు మంచులో సరైన గ్రిప్ లేకపోవడమే. సాధారణ రోడ్లపై సాఫీగా నడిచే ఈ కార్లు, మంచు కప్పిన కొండ దారుల్లో మాత్రం పూర్తిగా విఫలమవుతున్నాయి. ఇదే సమయంలో 4x4 వాహనాలు అన్ని చక్రాలకు పవర్ పంపడం వల్ల మంచుపై కూడా మెరుగైన నియంత్రణ ఇస్తాయి.
పాటించాల్సిన జాగ్రత్తలు
మంచు సీజన్లో మనాలీ ట్రిప్ ప్లాన్ చేస్తున్నవారు కొన్ని కీలక జాగ్రత్తలు తప్పనిసరిగా పాటించాలి. మొదటిగా స్నో చైన్స్ వినియోగం చాలా అవసరం. ఇవి టైర్లకు అదనపు గ్రిప్ ఇచ్చి స్కిడింగ్ను తగ్గిస్తాయి.
టైర్ ప్రెషర్ను సాధారణం కంటే కొద్దిగా తగ్గించడం వల్ల రోడ్డు మీద టైర్ పట్టు పెరుగుతుంది.
డ్రైవింగ్ సమయంలో నెమ్మదిగా, స్థిరంగా వాహనం నడపడం అత్యంత కీలకం. అకస్మాత్తుగా బ్రేక్ వేయడం లేదా వేగం పెంచడం ప్రమాదానికి దారితీస్తుంది.
హెడ్ల్యాంప్స్, ఫాగ్ ల్యాంప్స్ ఆన్లో ఉంచడం ద్వారా తక్కువ విజిబిలిటీలో కూడా ముందున్న దారిని స్పష్టంగా చూడవచ్చు. అలాగే ఇతర వాహనాలకు మన ఉనికిని తెలియజేయవచ్చు.
మంచు రోడ్లపై బ్రేకింగ్ దూరం సాధారణం కంటే ఎక్కువగా ఉంటుంది. అందుకే ముందు వాహనానికి సరిపడా దూరంగా ఉండేలా చూసుకోవడం చాలా అవసరం. ఇలా చేస్తే అకస్మాత్తుగా వాహనం జారినా, ఆగినా ప్రమాదాన్ని నివారించవచ్చు.
మనాలీ అందమైన మంచు దృశ్యాలు ఎంత ఆకర్షణీయంగా ఉన్నా, సురక్షిత ప్రయాణమే ప్రథమ ప్రాధాన్యం కావాలి. సరైన వాహనం, సరైన జాగ్రత్తలు లేకుండా మంచు ప్రాంతాల్లోకి వెళ్లడం ప్రాణాలకే ముప్పుగా మారొచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.