Honda Elevate facelift vs Hyundai Creta: ఎస్‌యూవీల విభాగంలో హ్యుందాయ్ క్రెటాది ప్రత్యేక స్థానం. హోండా ఎలివేట్ కూడా తనదైన స్టైల్‌లో కస్టమర్లను ఆకట్టుకుంటోంది. ఇప్పుడు, 2026 ఎలివేట్ ఫేస్‌లిఫ్ట్ కూడా కొన్ని మార్పులతో వచ్చింది. కొత్త ఫీచర్లు, మెరుగైన సౌకర్యాలతో క్రెటాకు పోటీ ఇవ్వాలని చూస్తోంది. అయితే టాప్ వేరియంట్లను పోల్చి చూస్తే ఏ కారు మెరుగైన విలువను అందిస్తుంది? ధరకు తగిన ఫీచర్లు ఏ కారులో ఎక్కువగా ఉన్నాయి? తెలుసుకుందాం.
ధరలో ఎలివేట్‌కు ఆధిక్యం
ఈ పోలికలో Honda Elevate ZX+ వేరియంట్‌ను, Hyundai Creta King వేరియంట్‌ను తీసుకున్నాం. ఒకే తరహా పెట్రోల్ ఇంజిన్‌తో ఉన్న ఈ రెండు వేరియంట్లలో.. ఎలివేట్ ధర తక్కువగా ఉంది. ఎలివేట్ మాన్యువల్ వేరియంట్ ధర రూ.16.89 లక్షలు. క్రెటా ధర రూ.17.27 లక్షలు. అంటే ఎలివేట్ రూ.38,000 తక్కువకే లభిస్తుంది. ఆటోమేటిక్ వేరియంట్లలో ఎలివేట్ ధర రూ.18.30 లక్షలు, క్రెటా ధర రూ.18.68 లక్షలు. ఇక్కడ కూడా ఎలివేట్‌దే పైచేయి. ఇవన్నీ ఎక్స్‌షోరూమ్ ధరలు.
కొలతల్లో ఎలివేట్ ప్రత్యేకత
పొడవు విషయంలో క్రెటా స్వల్పంగా ముందుంది. దీని పొడవు 4,330 మి.మీ. కాగా, ఎలివేట్ పొడవు 4,312 మి.మీ. వెడల్పు విషయంలో రెండూ సమానంగా ఉన్నాయి. అయితే.. ఎత్తు, వీల్‌బేస్, గ్రౌండ్ క్లియరెన్స్‌లో ఎలివేట్ మెరుగ్గా ఉంది. దీని గ్రౌండ్ క్లియరెన్స్ 220 మి.మీ. క్రెటాలో ఇది 190 మి.మీ. మాత్రమే. ఎలివేట్ వీల్‌బేస్ 2,650 మి.మీ. కాగా, క్రెటాలో 2,610 మి.మీ. లగేజ్ పెట్టుకునే స్థలంలోనూ ఎలివేట్ ముందుంది. ఇందులో 458 లీటర్ల బూట్ స్పేస్ ఉంది. క్రెటాలో 433 లీటర్లు మాత్రమే లభిస్తుంది.
ఇంజిన్ ఎంపికల్లో క్రెటాదే పైచేయి
హోండా ఎలివేట్‌లో 1.5 లీటర్ల సహజ పెట్రోల్ ఇంజిన్ ఉంది. ఇది 120 హెచ్‌పీ శక్తి, 145 ఎన్ఎం టార్క్‌ను అందిస్తుంది. దీనికి 6 స్పీడ్ మాన్యువల్ లేదా సీవీటీ గేర్‌బాక్స్ ఎంపికలు ఉన్నాయి.
హ్యుందాయ్ క్రెటాలో పెట్రోల్‌తో పాటు డీజిల్, టర్బో పెట్రోల్ ఇంజిన్ ఎంపికలు కూడా ఉన్నాయి. పెట్రోల్ ఇంజిన్ 115 హెచ్‌పీ శక్తిని అందిస్తుంది. డీజిల్ ఇంజిన్ 116 హెచ్‌పీ శక్తిని ఇస్తుంది. టర్బో పెట్రోల్ ఇంజిన్ 160 హెచ్‌పీ శక్తితో మరింత సామర్థ్యాన్ని అందిస్తుంది. డీజిల్, టర్బో పెట్రోల్ ఎంపికలు కోరుకునే వారికి క్రెటా అనుకూలంగా ఉంటుంది.
ఇది కూడా చదవండి: 2026 Skoda Slaviaలో ఏ వేరియంట్ కొనాలి? మీ డబ్బుకు తగిన విలువ ఇచ్చేది ఇదే!
మైలేజ్
మైలేజ్ విషయంలోనూ క్రెటాతోనే ప్రయోజనం. కంపెనీ ప్రకటించిన గణాంకాల ప్రకారం, ఎలివేట్ మాన్యువల్ లీటరుకు 15.31 కి.మీ. ఇస్తుంది. సీవీటీ వేరియంట్ 16.61 కి.మీ. ఇస్తుంది. క్రెటా పెట్రోల్ మాన్యువల్ 17.40 కి.మీ. మైలేజ్‌ను అందిస్తుందని ఆ కంపెనీ వెల్లడించింది.
ఫీచర్లలో క్రెటా ముందంజ
బయటి భాగంలో రెండు కార్లలోనూ ఎల్ఈడీ హెడ్‌ల్యాంపులు, కనెక్టెడ్ టెయిల్ ల్యాంపులు ఉన్నాయి. ఎలివేట్‌లో ఎల్ఈడీ ఫాగ్ ల్యాంపులు ప్రత్యేక ఆకర్షణ. క్రెటాలో 18 అంగుళాల చక్రాలు, పుడిల్ ల్యాంపులు ఉన్నాయి. ఎలివేట్‌లో 17 అంగుళాల చక్రాలు లభిస్తాయి.
లోపలి సౌకర్యాలలో క్రెటా మరిన్ని ఫీచర్లను అందిస్తోంది. ఇందులో 10.25 అంగుళాల డిజిటల్ డ్రైవర్ డిస్‌ప్లే, పనోరమిక్ సన్‌రూఫ్, డ్యూయల్ జోన్ ఏసీ ఉన్నాయి. డ్రైవర్ సీటుకు మెమరీ ఫంక్షన్ కూడా ఉంది. వెనుక సీట్లను వాల్చుకునే సౌకర్యం, వెనుక ప్రయాణికుల కోసం వైర్‌లెస్ ఫోన్ ఛార్జర్, చల్లదనాన్ని అందించే గ్లవ్‌బాక్స్ వంటి అదనపు ఫీచర్లు ఉన్నాయి.
ఎలివేట్‌లో 10.1 అంగుళాల ఇన్ఫోటైన్‌మెంట్ స్క్రీన్, ముందు & వెనుక వెంటిలేటెడ్‌ సీట్లు, ఎయిర్ ప్యూరిఫైయర్ ఉన్నాయి. డ్యాష్‌బోర్డ్‌పై లెదరెట్ అలంకరణ కూడా ఆకట్టుకుంటుంది. వెనుక సీట్లకు వెంటిలేషన్ అందించడం ఎలివేట్‌లో ప్రత్యేకత.
ఇది కూడా చదవండి: దసరా ఆఫర్లతో హ్యుందాయ్ కార్లు చవక! క్రెటా నుంచి ఐ10 వరకు అదిరిపోయే డీల్స్!
సేఫ్టీలో రెండూ సమానమే
భద్రత విషయంలో రెండు ఎస్‌యూవీలు మంచి ఫీచర్లను అందిస్తున్నాయి. ఆరు ఎయిర్‌బ్యాగులు, 360 డిగ్రీల కెమెరా, ముందు వెనుక పార్కింగ్ సెన్సార్లు, లెవల్ 2 ఏడీఏఎస్, టైర్ ప్రెషర్ మానిటరింగ్ వ్యవస్థ రెండింటిలోనూ ఉన్నాయి.
అయితే క్రెటాలో డ్యాష్‌క్యామ్ ఉంది. ఎలివేట్‌లో ఈ ఫీచర్ లేదు. క్రెటాలో ఎలక్ట్రానిక్ పార్కింగ్ బ్రేక్, ఆటో హోల్డ్ సౌకర్యాలు కూడా మెరుగ్గా అందుబాటులో ఉన్నాయి. రెండు కార్ల క్రాష్ భద్రతా పనితీరును బీఎన్‌సీఏపీ పరీక్షించలేదని అందుబాటులో ఉన్న సమాచారం చెబుతోంది.
ఏది కొనాలి?
తక్కువ ధర, మెరుగైన గ్రౌండ్ క్లియరెన్స్, పెద్ద బూట్ స్పేస్, శక్తిమంతమైన సహజ పెట్రోల్ ఇంజిన్ కావాలనుకునే వారికి హోండా ఎలివేట్ ఫేస్‌లిఫ్ట్ మంచి ఎంపిక. అధునాతన సౌకర్యాలు, ఎక్కువ ఇంజిన్ ఎంపికలు, మెరుగైన మైలేజ్, అదనపు సాంకేతిక ఫీచర్లు కోరుకునే వారికి హ్యుందాయ్ క్రెటా మెరుగైన ఎంపికగా నిలుస్తుంది. ధర విషయంలో ఎలివేట్ ఆదా చేస్తున్నా.. అదనపు సౌకర్యాలు, ఇంజిన్ ఎంపికలను పరిగణనలోకి తీసుకుంటే క్రెటా తన అధిక ధరకు తగిన విలువను అందిస్తుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.