Driving With Slippers In India: మన దేశంలో ట్రాఫిక్ నిబంధనల గురించి చాలా మందికి పూర్తిగా అవగాహన ఉండదు. ముఖ్యంగా కొన్ని రూల్స్ విషయంలో అనుమానాలు ఎక్కువగా ఉంటాయి. అలాంటి ఒక అనుమానం - స్లిప్పర్లు లేదా ఫ్లిప్ ఫ్లాప్స్ వేసుకుని కార్ డ్రైవ్ చేస్తే పోలీస్లు చలాన్ రాస్తారా?
చాలా ఏళ్లుగా ఈ అంశంపై భిన్నాభిప్రాయాలు వినిపిస్తున్నాయి. కొంతమంది ట్రాఫిక్ సిబ్బంది కూడా ఇది నిబంధనలకు విరుద్ధమని చెబుతుంటారు. దీంతో సాధారణ ప్రజల్లో గందరగోళం నెలకొంది.
చట్టం ఏమంటోంది?
భారతదేశంలో అమల్లో ఉన్న Motor Vehicles Act ప్రకారం, స్లిప్పర్లు లేదా ఫ్లిప్ ఫ్లాప్స్ వేసుకుని డ్రైవ్ చేయడాన్ని నేరంగా పేర్కొన్న ఎలాంటి నిబంధన లేదు. డ్రైవర్ షూస్ వేసుకున్నా, స్లిప్పర్లు వేసుకున్నా లేదా ఉత్త కాళ్లతో బండి నడిపినా చలాన్ విధించాలన్న నిబంధన చట్టంలో ఎక్కడా ప్రస్తావించలేదు. దీని అర్ధం - స్లిప్పర్లు వేసుకుని డ్రైవ్ చేశారనే కారణంతో మాత్రమే జరిమానా విధించడం చట్టబద్ధం కాదు.
కేంద్ర మంత్రి స్పష్టీకరణ
చాలా ఏళ్ల క్రితమే, కేంద్ర రహదారి రవాణా శాఖ మంత్రి నితిన్ గడ్కరీ (Nitin Gadkari) అధికారికంగా సోషల్ మీడియా ద్వారా ఈ విషయంపై స్పష్టత ఇచ్చారు. స్లిప్పర్లు వేసుకుని కార్ లేదా ఏదైనా వెహికల్ డ్రైవ్ చేయడం నేరం కాదని ఆయన తెలిపారు.
జాగ్రత్తలు అవసరమే
స్లప్పర్లు వేసుకుని కారు నడపడం చట్టపరంగా నేరం కాకపోయినా, భద్రత దృష్ట్యా మాత్రం మంచిది కాదని నిపుణులు సూచిస్తున్నారు. దీనికి కారణం... షూస్తో పోలిస్తే స్లిప్పర్లు లేదా సాండల్స్ పెడల్స్పై సరైన గ్రిప్ ఇవ్వవు. అకస్మాత్తుగా బ్రేక్ వేయాల్సి వచ్చినప్పుడు కాలు జారిపోవడం లేదా కింద ఇరుక్కుపోవడం వంటి రిస్క్లు చోటు చేసుకోవచ్చు.
డ్రైవింగ్ చేసే వ్యక్తి షూస్ ధరిస్తే:
పెడల్స్పై మంచి నియంత్రణ ఉంటుంది
బ్రేక్, యాక్సిలరేటర్పై సమాన ఒత్తిడి పెట్టగలుగుతారు
ఆకస్మిక పరిస్థితుల్లో వేగంగా స్పందించగలుగుతారు
స్లిప్పర్లు అయితే:
సులభంగా జారిపోతాయి
కాలు నుంచి విడిపోవచ్చు
పెడల్ కింద అవి ఇరుక్కునే ప్రమాదం ఉంది
ఇలాంటి చిన్న తప్పిదాలు కూడా పెద్ద ప్రమాదాలకు దారితీయవచ్చు.
ఫైనల్గా చెప్పాలంటే... స్లిప్పర్లు వేసుకుని కార్ డ్రైవ్ చేయడం చట్టపరంగా నేరం కాదు. కేవలం ఈ కారణంతో పోలీసులు చలాన్ విధించలేరు. అయితే భద్రత పరంగా చూస్తే సరైన షూస్ వేసుకుని డ్రైవ్ చేయడం మంచిది.
ట్రాఫిక్ నిబంధనలపై సరైన అవగాహన ఉండటం ప్రతి డ్రైవర్ బాధ్యత. అపోహలు కాకుండా, నిజమైన చట్టాన్ని తెలుసుకుని సురక్షితంగా డ్రైవింగ్ చేయడం అవసరం. కాబట్టి, చట్టం అనుమతిస్తుందనే కారణంతో నిర్లక్ష్యం చేయకుండా, మీ భద్రతను ముందు ప్రాధాన్యంగా తీసుకోండి.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.