Kodali Nani Comments on Chandrababu Naidu: రాష్ట్ర అభివృద్ధిపై సీఎం జగన్ బహిరంగ చర్చకు రావాలంటూ చంద్రబాబు చేసిన ఛాలెంజ్ పై మాజీ మంత్రి కొడాలి నాని కౌంటర్ ఇచ్చారు. అసెంబ్లీలో చర్చకు అవకాశం ఉన్నా కూడా చంద్రబాబు రాకుండా పారిపోయారని విమర్శించారు. చంద్రబాబుకు చేతకాక ఎక్స్ లో ఛాలెంజ్ లా అంటూ ధ్వజమెత్తారు. సీఎం జగన్ చాలా స్పష్టంగా ఎన్నికలకు వెళుతున్నారని.. ప్రజలకు తమ కుటుంబాల్లో మంచి జరిగితే తనకు ఓటు వేసి మరో అవకాశం ఇవ్వాలని విజ్ఞప్తి చేస్తున్నారని కొడాలి నాని గుర్తు చేశారు. 14 ఏళ్ళు సీఎంగా చంద్రబాబు అమలు చేసిన ఓ పథకం, లేదా రాష్ట్రంలో అభివృద్ధి చేసిన కార్యక్రమాలను చెప్పాలని జగన్ ప్రశ్నిస్తున్నారని అన్నారు.
‘‘తాము అడిగిన ప్రశ్నకు సమాధానం చెప్పలేని చంద్రబాబు.. బహిరంగ చర్చకు సిద్ధమా అంటూ X లో చాలెంజ్ లు చేస్తున్నాడు. భారతదేశంలో ఇద్దరి పెద్ద నాయకులు మధ్య బహిరంగ చర్చ ఎక్కడైనా జరిగిందా? డొంక తిరుగుడు మాటలు మాని దమ్ముంటే మాలాగా ప్రజలకు చేసిన మంచిని చంద్రబాబు చెప్పుకోవాలి. ఎవరు సీఎంగా ఉండాలో జగన్, చంద్రబాబు కాదుగా నిర్ణయించేది. ప్రజలే న్యాయ నిర్ణేతలు.
తనలా మాజీలుగా ఉన్నవారికి చంద్రబాబు X లో ఛాలెంజ్ లు చేసుకోవాలి.. అంతేకానీ ప్రజలు ఎన్నుకున్న జగన్ తో కాదు. నేను సిద్ధం అంటే నాతో చర్చకు చంద్రబాబు వస్తాడా? మూడు పార్టీలతో కలిసి వస్తున్నా కూడా సీఎం జగన్ ను ఎదుర్కోలేని స్థాయి చంద్రబాబుది. చంద్రబాబు పార్టీ సైజు ఎంతో తెలుసుకోవాలి. ఆ పార్టీకి పార్లమెంట్, రాజ్యసభ, అసెంబ్లీ, శాసన మండలిలో ఎంతమంది ఉన్నారో గుర్తించి ఛాలెంజ్ లు చెయ్యాలి’’ అని కొడాలి నాని ఆగ్రహం వ్యక్తం చేశారు.