AP Capital Amaravati Funds | అమరావతి: ఏపీ రాజధాని అమరావతి నిర్మాణానికి సంబంధించి కీలక పరిణామం చోటుచేసుకుంది. హడ్కో – సీఆర్‌డీఏ (CRDA) మధ్య ఒప్పందం జరిగింది. ఏపీ సీఎం చంద్రబాబు సమక్షంలో ఆయన ఉండవల్లి నివాసంలో రాజధాని నిర్మాణాలకు సంబంధించిన ఒప్పందం చేసుకున్నారు. సీఆర్‌డీఏతో ఈ ఒప్పందం మేరకు రాజధాని అమరావతి నిర్మాణాలకు హడ్కో రూ.11, 000 కోట్లు రుణం ఇవ్వనుంది. జనవరి 22 న ముంబైలో జరిగిన హడ్కో బోర్డు సమావేశంలో అమరావతి నిర్మాణానికి నిధులు మంజూరుకు అంగీకారం  తెలిపారు. ఈ మేరకు ఆదివారం నాడు సిఆర్డిఎతో, హడ్కో ఒప్పందం చేసుకుంది. చంద్రబాబు నివాసంలో జరిగిన ఈ కార్యక్రమంలో మంత్రి నారాయణతో పాటు, హడ్కో సీఎండీ సంజయ్ కుల్ శ్రేష్ఠ, ఏపీ మునిసిపల్ శాఖ అధికారులు పాల్గొన్నారు.