Andhra Pradesh Heavy Rains | అమరావతి: విదర్భ, మధ్యప్రదేశ్ ప్రాంతాల్లో అల్పపీడనం కేంద్రీకృతమై ఉందని, రాబోయే 24 గంటల్లో పశ్చిమ వాయువ్య దిశగా పయనించనుందని ఆంధ్రప్రదేశ్ రాష్ట్ర విపత్తుల నిర్వహణ సంస్థ (APDMA) మేనేజింగ్ డైరెక్టర్ ప్రఖర్ జైన్ తెలిపారు. అల్పపీడనం ప్రభావంతో రాష్ట్రవ్యాప్తంగా పలు జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉందన్నారు. అలాగే, దక్షిణ ఛత్తీస్‌గఢ్ ప్రాంతంలో కొనసాగుతున్న మరొక అల్పపీడనం వల్ల కూడా రాష్ట్రంలో వర్షాలు విస్తరించే సూచనలు ఉన్నాయి. ముఖ్యంగా ఉత్తరాంధ్ర తీరంలో గంటకు 40 నుండి 60 కిమీ వేగంతో బలమైన ఈదురుగాలులు వీచే అవకాశం ఉందని వెల్లడించారు.
నేడు ఏపీలో ఈ జిల్లాల్లో భారీ వర్షాలు
ఆదివారం (13-09-2026) ఏపీలోని వివిధ ప్రాంతాల్లో వర్ష సూచనను వాతావరణశాఖ అధికారులు విడుదల చేశారు. పార్వతీపురం మన్యం, అల్లూరి సీతారామరాజు, పోలవరం, ఏలూరు జిల్లాల్లో అక్కడక్కడ మోస్తరు నుండి భారీ వర్షాలు కురిసే అవకాశం ఉంది. అలాగే అనకాపల్లి, తూర్పు గోదావరి, పశ్చిమ గోదావరి, ఎన్టీఆర్, కృష్ణా, గుంటూరు, పల్నాడు, బాపట్ల జిల్లాల్లోని కొన్ని ప్రాంతాల్లో మోస్తరు వర్షాలు పడతాయని తెలిపారు. రాయలసీమ ప్రాంతంలో అక్కడక్కడ తేలికపాటి వర్షాలు కురిసే అవకాశం ఉందని అంచనా వేశారు.
ప్రజలకు విపత్తుల నిర్వహణ సంస్థ హెచ్చరిక
విశాఖపట్నం, కాకినాడ, ఏలూరు, ఎన్టీఆర్, కృష్ణా, నంద్యాల, కర్నూలు జిల్లాల్లో పిడుగులతో కూడిన వర్షాలు పడే ప్రమాదం ఉన్నందున విపత్తుల నిర్వహణ సంస్థ ప్రజలకు పలు జాగ్రత్తలు సూచించింది. ప్రజలు వర్షాల సమయంలో చెట్లు, యాడ్ హోర్డింగ్ల కింద నిలబడవద్దని.. పొంగిపొర్లే వాగులు, కాలువలు దాటే ప్రయత్నం చేయవద్దని హెచ్చరించింది. సమద్ర తీరం వెంబడి 50 నుండి 60 కిమీ వేగంతో ఈదురుగాలులు వీచే అవకాశం ఉన్నందున మత్స్యకారులు నేడు సముద్రంలోకి వేటకు వెళ్లరాదని స్పష్టం చేశారు.
ప్రభుత్వ హెచ్చరికలను నిర్లక్ష్యం చేయవద్దు: మంత్రి వంగలపూడి అనిత
రాష్ట్రంలో అల్పపీడన ప్రభావంతో నేడు పలుచోట్ల పిడుగులతో కూడిన మోస్తరు నుండి భారీ వర్షాలు కురిసే అవకాశం ఉందని ఆంధ్రప్రదేశ్ హోం మంత్రి వంగలపూడి అనిత తెలిపారు. వాతావరణ హెచ్చరికలతో ప్రజలు తీవ్ర అప్రమత్తంగా ఉండాలని సూచించారు. విపత్తుల నిర్వహణ సంస్థ, ఆర్టీజీఎస్ (RTGS) అవేర్ జారీ చేసే అధికారిక సూచనలను ప్రజలందరూ తప్పనిసరిగా పాటించాలని కోరారు. రాష్ట్ర ప్రభుత్వం జారీ చేసే హెచ్చరికలను నిర్లక్ష్యం చేయవద్దని, అలాగే సామాజిక మాధ్యమాల్లో వచ్చే వదంతులను నమ్మవద్దని స్పష్టం చేశారు.
కాలువలు, వాగులు దాటే ప్రయత్నం చేయవద్దు
వర్షాల సమయంలో ప్రజల ప్రాణరక్షణే ధ్యేయంగా అధికారులు వేగంగా చర్యలు చేపట్టాలని హోంమంత్రి అనిత ఆదేశించారు. ఉధృతంగా పొంగిపొర్లే వాగులు, వంకలు, కాలువలను దాటే ప్రయత్నాలు ఎవరూ చేయవద్దని హెచ్చరించారు. ప్రమాదకర ప్రాంతాల్లో వాహనాల రాకపోకలను తక్షణమే నిలిపివేయాలన్నారు. పోలీస్, రెవెన్యూ శాఖల అధికారులు నిరంతరం సమన్వయంతో వ్యవహరిస్తూ, ప్రమాదకర తీర ప్రాంతాలు, ముంపు ప్రాంతాల్లో అందుబాటులో ఉండాలని స్పష్టం చేశారు. వర్షాల వల్ల రాష్ట్రంలో ఎలాంటి ప్రాణనష్టం జరగకుండా సంబంధిత శాఖల అధికారులు ముందస్తు చర్యలు తీసుకోవాలని ఆమె ఆదేశించారు.