Zimbabwe vs Sri Lanka T20 World Cup | శ్రీలంకకు జింబాబ్వే షాక్!

టీ20 ప్రపంచకప్ 2026లో ( T20 World Cup 2026 ) జింబాబ్వే జైత్రయాత్ర కొనసాగుతోంది. ఇప్పటికే ఆస్ట్రేలియాను ఓడించి ఇంటికి పంపిన జింబాబ్వే, తాజాగా శ్రీలంకను ( Zimbabwe vs Sri Lanka ) కూడా ముప్పతిప్పలు పెట్టింది. కొలంబో వేదికగా జరిగిన లీగ్ మ్యాచ్‌లో 6 వికెట్ల తేడాతో విజయం సాధించి, గ్రూప్-బీ టాపర్‌గా గర్వంగా సూపర్-8లో అడుగుపెట్టింది. 

ముందుగా బ్యాటింగ్ చేసిన శ్రీలంక, 20 ఓవర్లలో 7 వికెట్లకు 178 పరుగులు చేసింది. ఓపెనర్ పాతుమ్ నిస్సంక ( Pathum Nissanka ) హాఫ్ సెంచరీతో రాణించగా, పవన్ రత్నాయకే ( Pawan Ratnayake ) మెరుపులు మెరిపించాడు. జింబాబ్వే బౌలర్లలో ముజర్బాని, ఇవాన్స్, క్రీమర్ తలో రెండు వికెట్లతో లంకను కట్టడి చేశారు.

అనంతరం 179 పరుగుల లక్ష్యంతో బరిలోకి దిగిన జింబాబ్వేకు ఓపెనర్లు బ్రియాన్ బెన్నెట్, మరుమణి 69 పరుగుల భాగస్వామ్యంతో అదిరిపోయే ఆరంభాన్ని ఇచ్చారు. బెన్నెట్ హాఫ్ సెంచరీతో చెలరేగగా కెప్టెన్ సికిందర్ రాజా సిక్సర్లతో విరుచుకుపడ్డాడు. ఆఖరి ఓవర్లో తీక్షణ బౌలింగ్‌లో బెన్నెట్ ఫోర్ బాదడంతో మరో రెండు బంతులు మిగిలి ఉండగానే జింబాబ్వే చారిత్రక విజయాన్ని అందుకుంది.

ఈ విజయంతో జింబాబ్వే సూపర్-8లో గ్రూప్-1లోకి చేరింది. ఇక్కడ భారత్, వెస్టిండీస్, సౌతాఫ్రికా వంటి దిగ్గజ జట్లతో తలపడనుంది. 2022లో పాకిస్థాన్‌ను ఓడించి సంచలనం సృష్టించిన జింబాబ్వే, ఇప్పుడు లీగ్ దశ దాటడం ఇది రెండోసారి మాత్రమే.