Sanju Samson Salute Celebration | కోచ్ కోసం సంజూ శాంసన్ సెల్యూట్

చెన్నై సూపర్ కింగ్స్ ఎట్టకేలకు ఘనవిజయం సాధించింది. ఢిల్లీ క్యాపిటల్స్‌పై జరిగిన ఈ మ్యాచ్‌లో అందరి దృష్టిని ఆకర్షించింది సంజూ శాంసన్. సెంచరీ తర్వాత సంజూ చేసిన ఆ సెల్యూట్ సెలబ్రేషన్ ఇప్పుడు సోషల్ మీడియాలో వైరల్ అవుతుంది. కేవలం 56 బంతుల్లోనే 115 పరుగులు చేసి అజేయంగా నిలిచాడు సంజూ. 15 ఫోర్లు, 4 సిక్సర్లతో చెలరేగి జట్టుకు భారీ స్కోరును అందించాడు. 

ఈ అద్భుతమైన ఇన్నింగ్స్‌ను సంజూ తన హెడ్ కోచ్ స్టీఫెన్ ఫ్లెమింగ్‌కు అంకితం ఇచ్చాడు. "వరుసగా మూడు మ్యాచ్‌ల్లో విఫలమైనా మేనేజ్‌మెంట్ నాపై నమ్మకం ఉంచింది. అందుకే ఈ సెంచరీ తర్వాత కోచ్‌కి సెల్యూట్ చేస్తూ సెలబ్రేట్ చేసుకున్నాను" అని సంజూ తెలిపాడు. ముఖ్యంగా జట్టు వరుసగా ఓడిపోతున్నా, టీమ్ మీటింగ్ కేవలం 50 సెకన్లే జరిగిందని, అంతగా కోచ్ తమను నమ్ముతున్నారని చెప్పుకొచ్చాడు.

సపోర్ట్ స్టాఫ్‌తో కలిసి చేసిన స్పెషల్ ప్రాక్టీస్ సెషన్స్ వల్లే ఫామ్‌లోకి రాగలిగానని సంజూ అన్నాడు. పిచ్ క్యూరేటర్‌కు థాంక్స్ చెబుతూనే, రవిశాస్త్రి తనకు లక్కీ ఛార్మ్ అని, తన ప్రతి మ్యాచ్‌కి రావాలంటూ ఫన్నీ కామెంట్స్ చేసాడు.