వేలంలో రూ.32 కోట్ల ధర పలికిన ఐన్స్టీన్ లెటర్, అందులో ఏముందో తెలుసా?
1939లో ఐన్స్టీన్ రాసిన లెటర్ని వేలం వేస్తే 32 కోట్ల రూపాయల ధర పలికింది. క్రిస్టీస్ సంస్థ ఈ వేలం వేయగా ఇంత భారీ ధరకు అమ్ముడుపోయింది. మరి...అంత గొప్ప ఆ లేఖలో ఏముంది..? ఎందుకంత కాస్ట్ పెట్టి మరీ కొన్నారు..? ఆ లెటర్లో ఉన్న కంటెంట్ అలాంటిది మరి. అప్పట్లో అమెరికా అధ్యక్షుడు ఫ్రాంక్లిన్ డీ రూజ్వెల్ట్కి ఈ లేఖ రాశారు ఐన్స్టీన్. అణ్వాయుధాలు ఎంత విధ్వంసం సృష్టిస్తాయో వివరిస్తూ ఈ లెటర్ పంపారు. వెంటనే అమెరికా జోక్యం చేసుకోవాలని సూచించారు. న్యూయార్క్లోని రూజ్వెల్ట్ లైబ్రరీలో ఈ లేఖ దొరికింది. న్యూక్లియర్ ఫిజిక్స్లో ఎలాంటి మార్పులు వస్తాయో ముందే ఊహించి రాసిన ఐన్స్టీన్..యురేనియం గురించి ప్రత్యేకంగా ప్రస్తావించారు. యురేనియం పవర్ఫుల్ బాంబులను తయారు చేయొచ్చని, ఇది చాలా ప్రమాదకరమని చెప్పారు. అంతే కాదు. జర్మనీ ఈ అణ్వాయుధాలను తయారు చేసే పనిలో ఉందని, అమెరికా అప్రమత్తంగా ఉండాలని సూచించారు. ఈ లెటర్ అందిన వెంటనే అమెరికా అలెర్ట్ అయింది. న్యూక్లియర్ ఫిజన్పై రీసెర్చ్ కూడా చేసింది. అదే Manhattan Project కి దారి తీసింది. ప్రపంచంలోనే అత్యంత ప్రభావం చూపించిన లేఖల్లో ఇదీ ఒకటి అని ఇప్పటికీ చెప్పుకుంటారు.