Ram Charan Virat Kohli : ఛాన్స్ వస్తే విరాట్ కోహ్లీ బయోపిక్ చేస్తా | ABP Desam
అమెరికా నుంచి నేరుగా ఢిల్లీ చేరుకున్న రామ్ చరణ్, శుక్రవారం సాయంత్రం ఇండియా టుడే కాన్క్లేవ్లో పాల్గొన్నారు. కాన్క్లేవ్లో ర్యాపిడ్ ఫైర్ లో భాగంగా మీరు ఏదైనా రోల్ చేయాలని ఉందా? అని అడిగితే... చాలా రోజుల నుంచి స్పోర్ట్స్ బేస్డ్ ఫిల్మ్ చేయాలని అనుకుంటున్నా అని చెప్పారు. విరాట్ కోహ్లీ బయోపిక్ చేస్తే బావుంటుందని సలహా ఇవ్వగా... ''ఫెంటాస్టిక్. ఛాన్స్ వస్తే చేస్తా. విరాట్ కోహ్లీ ఇన్స్పిరింగ్ రోల్. మా ఇద్దరి గడ్డం కూడా సేమ్ ఉంటుంది'' అని రామ్ చరణ్ చెప్పారు.
గతంలో రామ్ చరణ్ ఒక స్పోర్ట్స్ ఫిల్మ్ చేయాలని ట్రై చేశారు. పవర్ స్టార్ పవన్ కళ్యాణ్ 'బంగారం' సినిమాకు దర్శకత్వం వహించిన తమిళ డైరెక్టర్ ధరణితో 'మెరుపు' అని ఓ సినిమా కూడా అనౌన్స్ చేశారు. అయితే, కొన్ని కారణాల వల్ల ఆ సినిమాను పక్కన పెట్టేశారు. అప్పటి నుంచి రామ్ చరణ్ మరో స్పోర్ట్స్ సినిమా చేయలేదు. విరాట్ కోహ్లీ బయోపిక్ చేస్తే బావుంటుందని ఫ్యాన్స్ కోరుకుంటున్నారు. వాళ్ళిద్దరికీ చాలా పోలికలు ఉన్నాయని ఆల్రెడీ నెటిజన్లు ట్వీట్స్ చేయడం స్టార్ట్ చేశారు.