Parvathipuram Manyam Jiyyammavalasa Pandulavanivalsa PVTG Gadaba Tribe Neglect | పేరుకే గ్రామం.. మౌలిక సదుపాయాలకు ఆమడ దూరం

పెద్ది సినిమాలో రామ్ చరణ్ ఊరుకు అసలు గుర్తింపు ఉండదు. ఏ మౌలిక సదుపాయాలు ఉండవు. అలాంటి ఊళ్లు మన్యంలో చాలా ఉంటాయి. అలాంటి గ్రామం  పార్వతీపురం మన్యం జిల్లా జియ్యమ్మవలస మండలంలో ఉన్న పందులవానివలస గ్రామం దశాబ్దాలుగా తీవ్ర నిర్లక్ష్యానికి గురవుతోంది. అత్యంత వెనుకబడిన గిరిజన తెగలైన PVTG అంటే విశేషంగా వెనుకబడిన గిరిజన సమూహాలు. వారి అభివృద్ధి కోసం కేంద్ర, రాష్ట్ర ప్రభుత్వాలు కోట్లాది రూపాయల నిధులు, ప్రత్యేక పథకాలు కేటాయిస్తున్నామని ప్రకటిస్తున్నా.. క్షేత్రస్థాయిలో మాత్రం పందులవానివలస ఇందుకు భిన్నంగా కనిపిస్తోంది. సుమారు 40 గదబ గిరిజన కుటుంబాలు నివసిస్తున్న ఈ గ్రామంలో దశాబ్దాలు గడుస్తున్నా కనీస మౌలిక వసతులు కరువై గిరిజనులు నిత్యం తీవ్ర అవస్థలు పడుతున్నారు.
 
గ్రామానికి సరైన రహదారి సౌకర్యం లేకపోవడమే కాకుండా తాగునీరు, విద్యుత్, వైద్యం, విద్య, డ్రైనేజీ వంటి కనీస అవసరాలు కూడా పూర్తిస్థాయిలో అందుబాటులో లేవు. ఎవరైనా మృతి చెందితే స్మశానవాటికకు మృతదేహాన్ని తీసుకెళ్లేందుకు కూడా దారి లేకపోవడం ఇక్కడి దుస్థితికి అద్దం పడుతోంది. ముఖ్యంగా వర్షాకాలంలో బురదబాటల్లో శవాలను మోసుకెళ్లాల్సి వస్తోంది.  అత్యవసర సమయంలో ఆసుపత్రికి వెళ్లాలన్నా, విద్యార్థులు పాఠశాలలకు వెళ్లాలన్నా రవాణా సదుపాయం లేక నరకం చూస్తున్నామని వాపోతున్నారు.

 
ప్రభుత్వాలు ప్రకటిస్తున్న సంక్షేమ పథకాలు, బిలియన్ల నిధులు నిజంగానే ప్రతి PVTG కుటుంబానికి చేరుతున్నాయా లేదా అని ఉన్నతాధికారులు క్షేత్రస్థాయిలో తనిఖీలు చేయాల్సిన అవసరం  ఉంది. ఇప్పటికైనా జిల్లా యంత్రాంగం, ప్రజాప్రతినిధులు స్పందించి పందులవానివలస గ్రామాన్ని ప్రత్యేకంగా పరిశీలించాలని స్థానికులు కోరుతున్నారు. తక్షణమే పక్కా రహదారి, మంచినీరు, విద్యుత్, వైద్య సదుపాయాలు కల్పించి, గిరిజనులకు పథకాల ప్రయోజనాలు పూర్తిస్థాయిలో అందేలా చర్యలు తీసుకోవాలని  కుటుంబాలు విజ్ఞప్తి చేస్తున్నాయి.