తిరుమల ఆలయంలో పవన్ చేతిలో రెడ్‌బుక్‌, అందులో ఏముంది..?
డిప్యుటీ సీఎం పవన్ కల్యాణ్ తిరుమల శ్రీవారిని దర్శించుకున్న సమయంలో ఓ రెడ్‌ బుక్‌ని చేతిలో పట్టుకుని కనిపించారు. పవన్ చేతిలో ఉన్న ఆ బుక్ ఏంటన్న ఇంట్రెస్టింగ్‌ డిబేట్ మొదలైంది. అయితే...దీనిపై ఓ క్లారిటీ వచ్చింది. ఈ బుక్‌పై వారాహి డిక్లరేషన్‌ అని రాసుంది. తిరుమల లడ్డు వివాదం తరవాత పవన్ కల్యాణ్ సనాతన ధర్మ పరిరక్షణపై చాలా ఆవేశంగా మాట్లాడారు. ధర్మాన్ని రక్షించేందుకు ప్రత్యేకంగా సనాతన ధర్మ పరిరక్షణ బోర్డు నియమించాలని ప్రతిపాదించారు. దీనిపైనే జనసేన తరపున ఓ డిక్లరేషన్‌ రెడీ చేశారు పవన్ కల్యాణ్. తిరుపతిలో ఏర్పాటు చేయనున్న వారాహి సభలో ఈ డిక్లరేషన్‌ని వెల్లడించనున్నారు. ప్రస్తుతానికి ఈ డిక్లరేషన్‌ ఫైల్‌ ఫొటోలు సోషల్ మీడియాలో వైరల్ అవుతున్నాయి. ఈ డిక్లరేషన్‌లో ఏముంటుందో అన్న ఉత్కంఠ మొదలైంది. తిరుమల లడ్డు వ్యవహారం మొదలయ్యాక పవన్ దూకుడు పెంచారు. సనాతన ధర్మానికి తాను అండగా నిలబడతానని, అందరూ కలిసి కట్టుగా పోరాడాలని తేల్చి చెప్పారు. గత ప్రభుత్వంపైనా తీవ్రంగా మండి పడ్డారు.