Kavitha new party TRS Association: కవిత పెట్టిన కొత్త పార్టీ పేరు టీఆర్ఎస్ అని ప్రకటించారు. అంటే తెలంగాణ రాష్ట్ర సేన అని. అయితే జెండాలో మాత్రం తెలంగాణ రాష్ట్ర సేన అసోసియేషన్ అని ఉంది. దాన్ని కూడా కలుపుకుంటే.. కవిత పార్టీ పేరు TRSA అవుతుంది. అంటే టీఆర్ఎస్ కాదు. అసలు ఆ అసోసియేషన్ అని ఎందుకు పెట్టాల్సి వచ్చింది?
ఆ పేరు వెనుక వ్యూహం ఇదే!
కవిత తన కొత్త పార్టీకి తెలంగాణ రాష్ట్ర సేన అనే పేరును ఖరారు చేశారు. ఈ పేరు కింద అసోసియేషన్ అనే పదం చిన్నగా కనిపించకుండా ఉంచారు. దానికి కారణం ఏమిటన్నది ఆ పార్టీ అధికారికంగా ప్రకటించలేదు. ఎన్నికల సంఘం నిబంధనల కారణంగానే ఇలా పెట్టారన్న అభిప్రాయం వినిపిస్తోంది. కేవలం తెలంగాణ రాష్ట్ర సేన అనే పేరుతో ఇప్పటికే ఏదైనా రిజిస్టర్డ్ సంస్థ, సంఘం ఉంటే, సాంకేతికంగా ఇబ్బందులు రాకుండా ఉండటానికి అసోసియేషన్ లేదా సమితి వంటి పదాలను చేర్చడం రాజకీయ పార్టీలకు అలవాటు. అయితే, ఆమె లక్ష్యం మాత్రం ప్రజల్లోకి TRS అనే సెంటిమెంట్ను బలంగా తీసుకెళ్లడమే. బీఆర్ఎస్ పార్టీ తెలంగాణ ఆత్మను కోల్పోయిందని, అందుకే తాను మళ్లీ తెలంగాణ అస్తిత్వంతో ఈ పార్టీని పెడుతున్నట్లు ఆమె స్పష్టం చేశారు. అందుకే టీఆర్ఎస్ అనే పేరును ఎలాంటి సందర్భంలోనూ కోల్పోకుండా ఉండటానికి అసోసియేషన్ అనే పదం చేర్చారు.
ఎన్నికల సంఘానికి దరఖాస్తు.. ఎక్కడ ఆగింది?
తెలంగాణ రాష్ట్ర సేన పేరు లీక్ కాకూడదనో..మరో కారణంతోనే కానీ.. ఇప్పటి వరకూ దరఖాస్తు చేసుకోలేదు.కానీ తెలంగాణ ప్రజా జాగృతి అనే పేరుతో ఇప్పటికే పార్టీ నమోదు ప్రక్రియను కవిత బృందం ప్రారంభించింది. చివరి నిమిషంలో తెలంగాణ రాష్ట్ర సేన అనే పేరుపై మొగ్గు చూపడంతో సాంకేతిక మార్పులు చేయాల్సి వస్తోంది. ఈసీ వద్ద ఒక పేరును రిజిస్టర్ చేసే ముందు పబ్లిక్ నోటీసు ఇవ్వడం, అభ్యంతరాలను స్వీకరించడం వంటి ప్రక్రియలకు సమయం పడుతుంది. అందుకే బహిరంగ సభలో పార్టీని ప్రకటించినప్పటికీ, అధికారికంగా ఈసీ గుర్తింపు పొందే ప్రక్రియ ప్రస్తుతం ప్రారంభించే అవకాశం ఉంది.
తండ్రి బాటలో.. కానీ భిన్నమైన జెండాతో!
తండ్రి కేసీఆర్ గారి పాత పార్టీ పేరును స్ఫురింపజేసినప్పటికీ, జెండా విషయంలో కవిత వినూత్నంగా వ్యవహరించారు. గులాబీ రంగుకు బదులుగా పసుపు, ఆకుపచ్చ, నీలం రంగులతో కూడిన జెండాను ఆమె రూపొందించారు. జెండా మధ్యలో తెలంగాణ మ్యాప్ను ఉంచి, దానిపై TRS అని ముద్రించారు. బీఆర్ఎస్ పార్టీ తనను అవమానించిందని, హరీష్ రావు వంటి నేతల వల్ల పార్టీలో ప్రజాస్వామ్యం నశించిందని ఆరోపిస్తూ.. ఆత్మగౌరవం కోసం ఈ పార్టీని స్థాపించినట్లు ఆమె ప్రకటించారు. కవిత కొత్త పార్టీ పెట్టడం వల్ల బీఆర్ఎస్కు భారీ నష్టం వాటిల్లుతుందని విశ్లేషకులు భావిస్తున్నారు. ముఖ్యంగా కేసీఆర్ గారి పట్ల గౌరవం ఉండి, బీఆర్ఎస్ పేరు మార్పును ఇష్టపడని పాత టీఆర్ఎస్ శ్రేణులు కవిత వైపు చూసే అవకాశం ఉంది.