nizamabad

Mancherial Politics: మంచిర్యాలలో మంత్రి వివేక్, ఎమ్మెల్యే ప్రేమ్‌సాగర్ రావు వర్గపోరు- పోలీసులు అలర్ట్

Shankar Dukanam — Wed, 21 Oct 2026 15:52:00 +0530

Mancherial Congress Politics | తెలంగాణలోని మంచిర్యాల నియోజకవర్గంలో కాంగ్రెస్ పార్టీలోని అంతర్గత వర్గపోరు ముదిరి, తీవ్ర ఉద్రిక్తతలకు దారితీసింది. పండుగ రోజుల్లో చోటుచేసుకున్న వరుస దాడులతో నియోజకవర్గంలో రాజకీయ వాతావరణం ఒక్కసారిగా వేడెక్కింది. సద్దుల బతుకమ్మ రోజున మంచిర్యాల జిల్లా దండేపల్లి మండలం తాళ్లపేటలో జరిగిన వివాదం సదుమణగక ముందే, దసరా రోజున మరోసారి 2 వర్గాల మధ్య గొడవలు జరిగాయి. ఈ ఘర్షణలకు సంబంధించి రాష్ట్ర మంత్రి వివేక్ వెంకటస్వామి వర్గానికి చెందిన పలువురు కాంగ్రెస్ కార్యకర్తలపై పోలీసులు కేసులు నమోదు చేశారు.

మరోవైపు కాంగ్రెస్ నేత జగన్ మోహన్ రావు నివాసంపై మంచిర్యాల ఎమ్మెల్యే ప్రేమ్‌సాగర్ రావు వర్గీయులు దాడికి పాల్పడే అవకాశం ఉందన్న సమాచారంతో పోలీసులు అప్రమత్తమయ్యారు. ముందస్తు జాగ్రత్త చర్యగా జగన్ మోహన్ రావు ఇంటి వద్ద భారీగా పోలీసు బలగాలను మోహరించారు. నేతల మధ్య ఉన్న పాత కక్షలు దాడుల వరకు వెళ్లడంతో స్థానికంగా తీవ్ర రాజకీయ ఉత్కంఠ నెలకొంది. మంచిర్యాల నియోజకవర్గంలో శాంతిభద్రతల సమస్య తలెత్తకుండా జిల్లా పోలీస్ యంత్రాంగం నిరంతరం పరిస్థితిని సమీక్షిస్తోంది.

భద్రత కట్టుదిట్టం చేసిన పోలీసులు

పరిస్థితి చేయిదాటిపోకుండా పోలీసులు భద్రతను కట్టుదిట్టం చేశారు. దండేపల్లి మండలం తాళ్లపేట గ్రామంలో పోలీసుల పహారా కొనసాగుతోంది. ముందస్తు చర్యల్లో భాగంగా మంత్రి వివేక్ వర్గానికి చెందిన మాజీ వైస్ ఎంపీపీ ఆకుల రాజేందర్ నివాసంలో ఉన్న కుటుంబ సభ్యులతో పాటు, గిరిజన మహిళా సర్పంచ్ కుర్సింగ కళావతి, ఉప సర్పంచ్ పుట్టపాక తిరుపతి, మాలమహానాడు నాయకుడు మాడ దయాకర్‌లను పోలీసులు హౌస్ అరెస్ట్ చేశారు.

అధికారంలో ఉన్న కాంగ్రెస్ పార్టీ నేతలే ఇలా బలాబలాలు ప్రదర్శిస్తూ దాడులు చేసుకోవడంతో మంచిర్యాల ప్రజలు, వ్యాపారులు భయాందోళన వ్యక్తం చేస్తున్నారు. మరి ఈ వర్గపోరుకు కాంగ్రెస్ అధిష్టానం ఎలా ముగింపు పలుకుతుందోనని ఉత్కంఠ నెలకొంది.

Also Read: Graduate MLC Elections: గ్రాడ్యుయేట్ ఎమ్మెల్సీ ఎన్నికలు.. మిత్రపక్షాల అసంతృప్తిని చల్లార్చే పనిలో పీసీసీ చీఫ్

Tragedy in Asifabad: బతుకమ్మ ఆడుతూ మహిళా సాఫ్ట్‌వేర్ ఇంజినీర్ మృతి.. ఆసిఫాబాద్‌లో విషాదం

Shankar Dukanam — Mon, 19 Oct 2026 13:21:06 +0530

Saddula Bathukamma Celebrations | ఆసిఫాబాద్: సద్దుల బతుకమ్మ ఆడుతూ శ్రీవాణి (25) అనే సాఫ్ట్‌వేర్ యువతి ఆకస్మాత్తుగా స్పృహతప్పి పడిపోవడంతో తీవ్ర విషాదం చోటుచేసుకుంది. పరీక్షించిన డాక్టర్లు ఆమె చనిపోయినట్లు నిర్ధారించారు.

కుమ్రం భీం ఆసిఫాబాద్ జిల్లా ఆసిఫాబాద్ మండలంలోని బూరుగుడ గ్రామంలో సద్దుల బతుకమ్మ సంబరాల్లో తీవ్ర విషాదం చోటుచేసుకుంది. వేడుకల వేళ అందరూ ఉత్సాహంగా బతుకమ్మ ఆడుతున్న సమయంలో చింతలమానేపల్లి మండలం బాబాసాగర్‌ గ్రామానికి చెందిన శ్రీవాణి (25) అనే యువతి ఆకస్మాత్తుగా స్పృహతప్పి కిందపడిపోయింది.

చెన్నైలో సాఫ్ట్‌వేర్ ఉద్యోగిగా పనిచేస్తున్న శ్రీవాణి దసరా, బతుకమ్మ పండుగ జరుపుకోవడానికి బూరుగూడలోని తన మేనత్త ఇంటికి వచ్చింది. సద్దుల బతుకమ్మ రోజున వేడుకల్లో పాల్గొని బతుకమ్మ ఆడుతుండగా ఒక్కసారిగా కుప్పకూలింది. గమనించిన స్థానికులు, కుటుంబ సభ్యులు వెంటనే ఆమెను ఆసిఫాబాద్ ప్రభుత్వ ఆసుపత్రికి తరలించారు. అయితే ఆమెను పరీక్షించిన డాక్టర్లు అప్పటికే ఆమె మృతి చెందినట్లు నిర్ధారించినట్లు స్థానికులు తెలిపారు. పండుగ పూట సాఫ్ట్‌వేర్ ఇంజనీర్ ఆకస్మికంగా మృతిచెందడంతో ఆ గ్రామంలో విషాద ఛాయలు అలముకున్నాయి.

Singareni Bonus: సింగరేణి కార్మికులకు గుడ్ న్యూస్ .. ఒక్కొక్కరికి రూ.1. 51 లక్షల దసరా బోనస్: భట్టి విక్రమార్క

Shankar Dukanam — Tue, 13 Oct 2026 13:28:29 +0530

Singareni Bonus For Dasara : హైదరాబాద్: సింగరేణి ఉద్యోగులకు తెలంగాణ ఉప ముఖ్యమంత్రి భట్టి విక్రమార్క గుడ్‌న్యూస్ అందించారు. సంస్థ సాధించిన లాభాల్లో 34 శాతాన్ని సింగరేణి పర్మినెంట్ ఉద్యోగులకు చెల్లిస్తున్నట్లు ఆయన మంగళవారం ప్రకటించారు. ఒక్కో రెగ్యూలర్ కార్మికుడికి రూ.1.51 లక్షల దసరా బోనస్ లభిస్తుంది. సింగరేణిలో పనిచేస్తున్న కాంట్రాక్టు ఉద్యోగులకు కూడా రూ. 5,500 చొప్పున బోనస్ అందించనున్నట్లు తెలిపారు. ఈ బోనస్ నిర్ణయంతో వేలాది మంది కార్మిక కుటుంబాలకు పెద్ద ఎత్తున లబ్ధి చేకూరనుంది.

గత బీఆర్‌ఎస్ ప్రభుత్వంపై భట్టి విక్రమార్క విమర్శలు
సింగరేణి లాభాలు తగ్గడానికి గత బీఆర్‌ఎస్ (BRS) ప్రభుత్వ అనాలోచిత నిర్ణయాలే ప్రధాన కారణమని డిప్యూటీ సీఎం భట్టి విక్రమార్క ఆరోపించారు. బీఆర్‌ఎస్ చేసినంత నష్టం సింగరేణికి మరే ప్రభుత్వం చేయలేదని విమర్శించారు. గత ప్రభుత్వ హయాంలో కేంద్ర ప్రభుత్వం 141 బొగ్గు బ్లాకులను వేలం వేసినప్పటికీ, కనీసం ఒక్క వేలంలో కూడా సింగరేణి పాల్గొనకుండా నిర్లక్ష్యం చేశారని మండిపడ్డారు. ప్రస్తుతం ప్రైవేట్ మార్కెట్‌లో సింగరేణి కంటే తక్కువ ధరకే బొగ్గు అందుబాటులో ఉండటం వల్ల, సంస్థ మనుగడను కాపాడుకోవడానికి తప్పనిసరి పరిస్థితుల్లో బొగ్గు ధరలను తగ్గించాల్సి వచ్చిందని ఆయన వివరించారు.

‘నెహ్రూ కాలనీల’ పేరుతో కార్మికుల సొంతింటి కలను సాకారం చేసేందుకు క్వార్టర్ల నిర్మాణం, ఏరియా ఆసుపత్రులను కార్పొరేట్ స్థాయికి మించి మోడ్రన్‌గా అత్యుత్తమ వైద్య సదుపాయాల కల్పనకు కార్యాచరణ సిద్ధం చేస్తామన్నారు.

ప్రజాభవన్‌లో మంత్రి శ్రీధర్ బాబు కీలక ప్రకటనలు
హైదరాబాద్‌లోని ప్రజాభవన్‌లో నిర్వహించిన సమావేశంలో మంత్రి శ్రీధర్ బాబు మాట్లాడుతూ... సింగరేణి కార్మికుల సంక్షేమంపై పలు విషయాలను వెల్లడించారు. సింగరేణి కార్మికుల సొంత ఇంటి కల త్వరలోనే నెరవేరబోతోందని హామీ ఇచ్చారు. అలాగే మారుపేర్ల ద్వారా ఉద్యోగాలు చేస్తున్న కార్మికుల సమస్యల పట్ల తెలంగాణ ప్రభుత్వం ఎంతో సానుకూలంగా ఉందన్నారు. తమ ప్రభుత్వం అధికారంలోకి వచ్చిన వెంటనే ప్రమాద బీమా కింద దేశంలో ఎక్కడాలేని విధంగా సింగరేణి కార్మికులకు కోటి రూపాయల ఉచిత ప్రమాద బీమా సౌకర్యాన్ని అందుబాటులోకి తీసుకొచ్చామన్నారు.

బతుకమ్మ 2026: తీరొక్క పూల జాతర.. ఏ రోజు ఏ బతుకమ్మ, నైవేద్యం?

RAMA — Sat, 10 Oct 2026 10:40:50 +0530

Bathukamma 2026: తెలంగాణ రాష్ట్ర సంస్కృతికి ప్రతీక, మహిళలకు ప్రీతిపాత్రమైన బతుకమ్మ పండుగ సందడి అక్టోబర్ 10 శనివారం సాయంత్రం నుంచి ప్రారంభమవుతుంది. హైదరాబాద్ తో పాటూ తెలంగాణ వ్యాప్తంగా ఊరూ వాడా పూలపండుగ సంబురంగా జరగబోతోంది. భాద్రపదమాసం అమావాస్య తో మొదలయ్యే బతుకమ్మ పండుగ ఆశ్వయుజమాసం అష్టమితో ముగుస్తుంది. తొమ్మిది రోజుల పాటూ వైభవంగా సాగే పూల పండుగలో ఏ రోజు ఏ బతుకమ్మను పూజిస్తారు, ఏ నైవేద్యం సమర్పిస్తారు తెలుసుకోండి

ఏ రోజు ఏ బతుకమ్మ

అక్టోబర్ 10 శనివారం భాద్రపద అమావాస్య / మహాలయ అమావాస్య - ఎంగిలిపూల బతుకమ్మ

మొదటి రోజు ఎంగిలిపూల బతుకమ్మకు నువ్వులను పొడి చేసి పంచదార వేసి కలిపి నైవేద్యంగా సమర్పిస్తారు.

అక్టోబర్ 11 ఆదివారం ఆశ్వయుజ శుక్ల పాడ్యమి - అటుకుల బతుకమ్మ

రెండో రోజు అటుకుల బతుకమ్మ - పేరుకితగ్గట్టుగానే అటుకులతో నైవేద్యం తయారు చేస్తారు. అటుకులను నానబెట్టి కొద్దిసేపటి తర్వాత నీరు ఓడ్చి ఓ గంట ఎండనివ్వాలి. ఆ తర్వాత ఆ పాన్ లో నెయ్యి వేసి డ్రై ఫ్రూట్స్ వేయించుకుని దాన్ని పక్కకు తీసి బెల్లం తురుము వేయాలి. అది పాకంగా మారిన తర్వాత స్టౌ ఆఫ్ చేసి అందులో అటుకులు వేసి కలపాలి. అటుకులు నైవేద్యం సిద్ధం అయినట్టే

అక్టోబర్ 12 సోమవారం ఆశ్వయుజ శుక్ల విదియ - ముద్దపప్పు బతుకమ్మ

మూడో రోజు ముద్దపప్పు బతుకమ్మ - ముద్దపప్పుని నైవేద్యంగా పెడతారుయ. కందిపప్పు ప్రెజర్ కుక్కర్లో వేసి... నీళ్లు పోసి, దంచిన జీలకర్ర, కరివేపాకు, నూనె, పసుపు, వేసి ఉడికిస్తారు. సరిపడా ఉప్పు వేసి నైవేద్యం పెడతారు

అక్టోబర్ 13 మంగళవారం ఆశ్వయుజ శుక్ల తదియ - నానే బియ్యం బతుకమ్మ

నాలుగో రోజు నానేబియ్యం బతుకమ్మ - ఈ రోజు బెల్లం పరమాన్నం నివేదిస్తారు.

అక్టోబర్ 14 బుధవారం ఆశ్వయుజ శుక్ల చవితి - అట్ల బతుకమ్మ

ఐదో రోజు అట్ల బతుకమ్మ - పేరుకి తగ్గట్టుగానే అట్లు నైవేద్యంగా సమర్పిస్తారు.

అక్టోబర్ 15 గురువారం ఆశ్వయుజ శుక్ల పంచమి - అలిగిన బతుకమ్మ

ఆరో రోజు అలిగిన బతుకమ్మ - ఈ రోజు అమ్మవారికి నైవేద్యం సమర్పించరు

అక్టోబరు 16 శుక్రవారం ఆశ్వయుజ శుక్ల షష్టి - వేపకాయల బతుకమ్మ

ఏడో రోజు వేపకాయల బతుకమ్మ - సకినాల పిండితో వేపకాయలు చేసి వాటిని నివేదిస్తారు

అక్టోబరు 17 శనివారం ఆశ్వయుజ శుక్ల సప్తమి - వెన్నముద్దల బతుకమ్మ

ఎనిమిదో రోజు వెన్నముద్దల బతుకమ్మ - బియ్యంపిండితో వెన్నముద్దలు తయారు చేసి బతుకమ్మకు నైవేద్యంగా సమర్పిస్తారు. బియ్యంపిండిని ఉడికించి ..వాటిని ఉండలుగా చేసి.. వాటిని బ్రౌన్ కలర్ వచ్చేవరకూ వేయించి..బెల్లం పాకంలో వేస్తారు.

అక్టోబరు 18 ఆదివారం ఆశ్వయుజ శుక్ల అష్టమి ( దుర్గాష్టమి) -సద్దుల బతుకమ్మ

బతుకమ్మ పండుగలో ఆఖరి రోజైన తొమ్మిదో రోజు సద్దుల బతుకమ్మ - ఈ రోజు మరింత పెద్ద పరిమాణంలో బతుకమ్మను తయారు చేస్తారు. పండుగలో ఆఖరి రోజు కావడంతో సంబరాలు మరింత వైభవంగా జరుపుకుంటారు. పూజ పూర్తైన తర్వాత బతుకమ్మను తీసుకెళ్లి నిమజ్జనం చేస్తారు. ఈ రోజు దుర్గాష్టమి. ఈ రోజు పులిహోర నివేదిస్తారు. పెరుగన్నం, లడ్డూ సహా తొమ్మిది రకాల నైవేద్యాలు తయారు చేస్తారు.

Nirmal News: నిర్మల్ జిల్లాలో క్లాస్ రూం నుంచి ఏడుపు శబ్ధాలు.. వెళ్లి చూసిన స్థానికులు షాక్

Shankar Dukanam — Fri, 9 Oct 2026 14:34:28 +0530

Nirmal School Negligence | తానూరు: పాఠశాల సిబ్బంది నిర్లక్ష్యానికి పరాకాష్టగా నిలిచే ఓ ఘటన నిర్మల్ జిల్లాలో జరిగింది. ఒక విద్యార్థి తరగతి గదిలోనే నిద్రపోతున్నాడనే విషయాన్ని గమనించకుండా, పాఠశాల సిబ్బంది ఏకంగా క్లాస్‌రూమ్‌కు తాళం వేసి అంతా ఇంటికి వెళ్లిపోయారు.

అసలేం జరిగిందంటే..

తానూర్ మండలం బెంబేర గ్రామంలోని ప్రైమరీ స్కూలులో రెండో తరగతి చదువుతున్న భీమ్‌రావు అనే విద్యార్థి స్కూల్ టైం ముగిసే వేళ తరగతి గదిలోనే నిద్రపోయాడు. స్కూల్ టైం పూర్తయిన తర్వాత లోపల బాలుడు ఉన్నాడనే విషయాన్ని సిబ్బంది సరిగా పరిశీలించకుండానే గదికి తాళాలు వేసి వెళ్లిపోయారు. సాయంత్రమైనా బాలుడు ఇంటికి రాకపోవడంతో ఆందోళన చెందిన తల్లిదండ్రులు చుట్టుపక్కల మొత్తం వెతకడం ప్రారంభించారు. ఆ సమయంలో స్కూలు వైపు వెళ్లిన ఒక బాలుడికి క్లాస్‌రూమ్ లోపలి నుంచి ఏడుపు వినిపించడంతో అసలు విషయం వెలుగులోకి వచ్చింది. వెంటనే బాలుడు అందరికీ చెప్పగా.. స్థానికులు తాళం పగులగొట్టి బాలుడిని బయటకు తీసుకువచ్చారు.

ఈ ఘటనపై స్థానికులు తీవ్ర ఆగ్రహం వ్యక్తం చేశారు. పిల్లలు క్లాస్ రూములో ఉంటే చెక్ చేయకుండా తాళం వేశారంటూ ఉన్నతాధికారులకు ఫిర్యాదు చేశారు. విద్యార్థుల భద్రత పట్ల నిర్లక్ష్యం వహించినందుకు గాను నిర్మల్ జిల్లా కలెక్టర్ ఆదేశాల మేరకు పాఠశాల ప్రిన్సిపల్ స్వప్నతో పాటు స్కావెంజర్‌ను అధికారులు వెంటనే సస్పెండ్ చేశారు. స్కూళ్లలో విద్యార్థుల భద్రత విషయంలో టీచర్లు, సిబ్బంది ఏమాత్రం నిర్లక్ష్యంగా వ్యవహరించవద్దని, భవిష్యత్తులో ఇలాంటి ఘటనలు రిపీట్ కాకుండా అందరూ బాధ్యతాయుతంగా పనిచేయాలని అధికారులను ఆదేశించారు.

Rishi Panchami Celebrations: మథురాల కోలాటం.. లెంగీ నృత్యాలు.. ఆదిలాబాద్ జిల్లాలో మథుర లభానల ఋషి పంచమి వేడుకలు

Shailender — Sat, 3 Oct 2026 14:42:42 +0530

Adilabad News | ఆదిలాబాద్ జిల్లా ఇంద్రవెల్లి మండలంలోని అందునాయక్ తండాలోని జ్వాలాముఖి దేవస్థానంలో మథురా లభానాల ఋషి పంచమి వేడుకలు అంగరంగ వైభవంగా కొనసాగుతున్నాయి. జ్వాలాముఖి దేవి శిష్యులైన కాళుబాబా పాచూ బాబా,ల పేరిట ఈ పితృ మాసంలో ఋషి పంచమి కార్యక్రమం నిర్వహిస్తుంటారు. ఈ కార్యక్రమానికి తెలంగాణలోని కామారెడ్డి, ఆదిలాబాద్ జిల్లాలతో పాటు పక్కన ఉన్న మహారాష్ట్ర, మధ్యప్రదేశ్, రాజస్థాన్, గుజరాత్, పంజాబ్ రాష్ట్రాల నుండి మథుర లభానా కులస్తులు పెద్ద ఎత్తున హాజరై తమ కులదైవాలను దర్శించుకుంటారు. అనంతరం తమ ఆచార సాంప్రదాయాల ప్రకారం పేటి అనే వస్త్రాధారణ చేసి తలకు తలపాగా ధరించి, కాళ్లకు గజ్జలు కట్టుకొని కోలాటమాడుతూ నృత్య ప్రదర్శన చేస్తారు. ఇంతకీ మథుర లభానాలు నిర్వహించే ఈ ఋషి పంచమి వేడుకలు ఎన్ని రోజులపాటు నిర్వహిస్తారు.? రుషి పంచమి యొక్క ప్రత్యేకత ఏమిటి..? abp దేశం స్పెషల్ స్టోరీలో చూద్దాం.

ఆదిలాబాద్ జిల్లా ఇంద్రవెల్లి మండలంలో అందునాయక్ తాండ గ్రామమిది. "ఇక్కడ అందరు" కైతి లభాన " (మధుర) తెగకు చెందిన వారు నివస్తిస్తున్నారు. ఈ" కైతి లాభాన"ల కులదైవం "జ్వాలముఖి దేవి " ఈ అందునాయక్ తండాలో 2000 సంవత్సరం ఈ జ్వాలముఖిదేవి నిర్మించారు. ఈ ఆలయంలో జ్వాలముఖిదేవితో పాటు కుడి ప్రక్కన "కాళుబాబా" మరియు ఎడమ ప్రక్కన "పాచు బాబా" విగ్రహాలున్నాయి. గత పూర్వం తమ కులదైవమైన జ్వాలముఖి దేవికి అత్యధికంగ పూజలు చేయడం వల్ల జ్వాలముఖదేవి "కాళు బాబా" కు పృత్యక్షమయి తమ కష్టాలను తీర్చిందని పూర్వీకులు చెబుతుంటారు. అప్పటి నుండి అనుకుంటు వీరంత జ్వాలముఖి దేవికి పూజలు చేస్తువస్తున్నారు.

కైతి లభానాలు, లేక మథుర లభానా అని వీరిని పిలుస్తుంటారు. వీరి ముఖ్య వృత్తి గోవులను పెంచడం వ్యవసాయం చేయడం.. ఇలా పురాతన కాలం నుండి వస్తున్న ఆచారాలను వీరి కుల పెద్దలయిన "కాళు బాబా" ఆయనతో పాటు "పాచుబాబా" లు పాటిస్తు వస్తున్న క్రమంలో వీరిని తమ దేవి శిష్యులుగా మహా ఋషులుగా భావిస్తూ ఈ పితృమాసంలో వీరి పేరిట ఋషి పంచమి కార్యక్రమం చెస్తుంటారు. లభాన కులస్తుల మహిళలు జడలపై కోప్పులను ధరిస్తారు. దిన్ని కైతీ అని అంటారు. ఇలా వారంత కైతి లభాన అని పిలువబడుతున్నారు. వీరంత దేశంలో మొత్తం ఎక్కడ ఉన్న ఈ దసరా పౌర్ణమి పంచమి రోజున ఈ ఆలయం వద్ద" జ్వాలముఖి దేవిని దర్శించుకుంటారు.

అనంతరం తమ దేవి శిష్యులు అయిన "అయిన "కాళుబాబా" పాచుబాబా" లను ధర్మించుకుంటారు. ఆపై తమ పూరతన కాలంగా వస్తున్న ఆచార వ్యవహారాలను కొనసాగిస్తూ లభానా డ్యాన్స్ చేస్తారు. దిన్ని వీరు లేంగి నృత్యం అంటారు. కొలటామాడుతూ,, పాటలు పాడుతూ ఇక్కడ సంబరాన్నింటిన సంబురాలు జరుపుకుంటారు. వీరు వాయిస్తున్న ఈ డప్పులను "నంగారా" అని అంటారు. ఇది వాయిస్తు వివిధ గ్రామాలనుండి వచ్చిన వారు నృత్యాలు చెస్తు తమకంటే బాగుండేలా ఒకరినొకరు పోటి పడుతు కళను ప్రదర్శిస్తారు. ఇలాగే మహిళలు సైతం పాటలు పాడుతూ నృత్యాలు చేస్తారు. దిన్ని వీరు"జాయో జాయో" అని అంటారు. ఇలా వీరత 3 రోజుల పాటు భక్తి భావంతో "జ్వాలముఖి" సన్నిధిలో ఒక జాతరగా జరుపుకుంటారు.

ఈ ఋషి పంచమి వేడుకలకు మన రాష్ట్రంలోని కామారెడ్డి, ఆదిలాబాద్ జిల్లాలతో పాటు పక్కన ఉన్న మహారాష్ట్ర మధ్యప్రదేశ్, రాజస్థాన్, గుజరాత్, పంజాబ్ రాష్ట్రాల నుండి మథుర లభానలు తరలి వచ్చి తమ కులదైవమైన జ్వాలాముఖి దేవిని, దేవి శిష్యులైన కాళు బాబా,, పాచు బాబా లను ధర్మించుకుని... వేడుకల్లో పాల్గొంటారు. ప్రతి యోటా ఈ దేవస్థానంలో రాంసింగ్ మహరాజ్ ఆధ్వర్యంలో అందరు కలిసి మంచి మంచి బాటలో నడిచే అంశాలపై చర్చిస్తారు. అనంతరం వారంత పాండవులు కౌరవులు ఆడే "పాచికల ఆట ఆడతారు. ఇలా అందరు ఎంతో భక్తి భావంతో ఉంటూ వేడుకలను ఘనంగా జరుపుకుంటారు. అనంతరం తమ తమ గ్రామాలకు పయనమవుతారు. ఇలా ప్రతియేటా మథుర లభానా కులస్తులు తమ సాంప్రదాయ రీతిలో ఆచారాలకు అనుగుణంగా ఋషి పంచమి వేడుకలు జరుపుకుంటున్నారు.

Tiger Tension in Nirmal: గడప దాటితే గండమే! సుర్జాపూర్ అడవుల్లో పెద్దపులి కలకలం- నిర్మల్ జిల్లాలో అధికారుల వార్నింగ్

Shankar Dukanam — Tue, 29 Sep 2026 12:11:27 +0530

నిర్మల్ జిల్లాలోని సుర్జాపూర్ అడవుల్లో పులి కలకలం రేపుతోంది. ఖానాపూర్, మామడ మండలాల సరిహద్దులోని అటవీ ప్రాంతంలో పులి సంచరిస్తుండటంతో స్థానికులు భయాందోళనకు గురవుతున్నారు. నిన్న రాత్రి అటవీ ప్రాంతంలో పులి అడుగులను గుర్తించినట్లు అటవీశాఖ అధికారులు వెల్లడించారు. ఖానాపూర్ మండలంలోని సుర్జాపూర్ గ్రామంలో రాత్రి 7 గంటలకు గ్రామస్తులతో అటవీశాఖ బీట్ ఆఫీసర్ నరేందర్ సమావేశపై పరిస్థితిపై చర్చించారు.

పులి సంచరిస్తున్న ప్రాంతం వైపు రాత్రిపూట గాని పగలు గానీ ఈ అటవీ ప్రాంతం వైపు ఎవరూ వెళ్లకూడదని గ్రామస్తులకు ఫారెస్ట్ బీట్ ఆఫీసర్ సూచించారు. ముఖ్యంగా మామడ మండలంలోని నల్దుర్తి గ్రామ సమీపంలోని భీమన్న ఆలయ కొండవైపు అటవీ ప్రాంతంలో పులి సంచరిస్తున్నట్లు ఆయన వెల్లడించారు. తదుపరి ప్రకటన వచ్చేంతవరకు పశువులను అడవిలోకి మేతకు తీసుకెళ్లవద్దని, ఒంటరిగా అడవిలోకి వెళ్లవద్దని రైతులకు, కాపరులకు అధికారులు హెచ్చరికలు జారీ చేశారు.

పులి సంచారం సమచారంతో అటవీశాఖ సిబ్బంది అప్రమత్తమయ్యారు. సుర్జాపూర్, నల్దుర్తి పరిసర అడవుల్లో పులి జాడ గుర్తించేందుకు ట్రాకింగ్ ముమ్మరం చేశారు. పులి పాద ముద్రలు సేకరించిన అటవి శాఖ అధికారులు పులి కదలికలపై సమీప ప్రాంతాల్లో ట్రాప్ కెమెరాలతో నిఘా ఉంచారు. ప్రజలు అప్రమత్తంగా ఉండాలని, పులి జాడ కనిపించినా, ఏదైనా సమాచారం తెలిస్తే వెంటనే అటవీశాఖకు సమాచారం ఇవ్వాలని అధికారులు సూచించారు.

Adilabad Nimajjanam: ఒక్కసారిగా నిలిచిన గణేష్ శోభాయాత్ర, భక్తుల ఆందోళన.. కలెక్టర్ హామీతో తిరిగి ప్రారంభం

Shankar Dukanam — Sat, 26 Sep 2026 16:08:40 +0530

Ganesh Immersion | ఆదిలాబాద్ జిల్లా కేంద్రంలో గణేష్ విగ్రహాల నిమజ్జన శోభాయాత్ర సమయంలో తీవ్ర ఉద్రిక్తత చోటుచేసుకుంది. పట్టణంలోని ప్రముఖ అంబేద్కర్ చౌరస్తా వద్ద గణేష్ మండళ్ల నిర్వాహకులు, భక్తులు ఒక్కసారిగా ఆందోళనకు దిగడంతో శోభాయాత్ర తాత్కాలికంగా నిలిచిపోయింది. వినాయక నిమజ్జనం ఊరేగింపులో వాహనాలను త్వరగా ముందుకు తీసుకెళ్లాలని పోలీసులు ఒత్తిడి తెచ్చారని, ఈ బ్యాండ్‌ బృందంపై పోలీసులు దాడి చేశారని ఆరోపిస్తూ నిర్వాహకులు రోడ్డుపై బైఠాయించారు. స్థానిక ఎమ్మెల్యే తనయుడు పాయల్ శరత్‌తో పాటు బిజెపి నాయకులు, హిందూ సంఘాల ప్రతినిధులు, పెద్ద సంఖ్యలో భక్తులు రోడ్డుపైనే కూర్చొని కొంత సమయం భజనలు చేస్తూ నిరసన వ్యక్తం చేశారు. డీజేలు, బ్యాండ్లను యథావిధిగా కొనసాగనివ్వాలని గణేష్ మండపాల నిర్వాహకులు డిమాండ్ చేశారు.

రంగంలోకి దిగిన కలెక్టర్.. భక్తుల ఫిర్యాదులు

సమాచారం అందుకున్న వెంటనే అక్కడికి చేరుకున్న అదనపు కలెక్టర్ రాజేశ్వర్ ఆందోళనకారులతో మాట్లాడి శాంతింపజేసే ప్రయత్నం చేసినా ప్రయోజనం లేకపోయింది. జిల్లా ఎస్పీ స్వయంగా వచ్చి కొబ్బరికాయ కొట్టి శోభాయాత్రను పునఃప్రారంభించే వరకు కదిలేది లేదని నిర్వాహకులు పట్టుబట్టారు. విషయం తెలుసుకున్న ఆదిలాబాద్ జిల్లా కలెక్టర్ రాజర్షి షా, స్థానిక ఎమ్మెల్యే పాయల్ శంకర్ వెంటనే అంబేద్కర్ చౌరస్తాకు చేరుకుని ఆందోళనకారులతో చర్చలు జరిపారు. గత 50- 60 ఏళ్లుగా ఆదిలాబాద్‌లో ప్రశాంత వాతావరణంలో గణేష్ ఉత్సవాలు జరుగుతున్నాయని, ఈ రోజు ఉద్దేశపూర్వకంగా చేసిన అసౌకర్యంపై సమగ్ర విచారణ జరిపించి బాధ్యులపై కఠిన చర్యలు తీసుకుంటామని కలెక్టర్ హామీ ఇచ్చారు.

విచారణ చేపట్టి బాధ్యులపై చర్యలు తీసుకుంటామని కలెక్టర్ హామీ ఇచ్చారు. కలెక్టర్ రాజర్షి షా, ఎమ్మెల్యేల హామీతో సంతృప్తి చెందిన గణేష్ మండళ్ల నిర్వాహకులు తమ ఆందోళనను విరమించారు. దీంతో నిలిచిపోయిన గణేష్ నిమజ్జన శోభాయాత్ర తిరిగి ప్రారంభమై మరింత ప్రశాంత వాతావరణంలో కొనసాగింది. నగరంలోని విగ్రహాలను సమీపంలో ఉన్న పెన్ గంగా నది వద్ద శాస్త్రోక్తంగా నిమజ్జనం చేసేందుకు అన్ని ఏర్పాట్లు పూర్తి చేశారు. గణేష్ నిమజ్జన శోభాయాత్ర అక్కడి వరకు చేరుకున్నాక బొజ్జ గణపయ్య విగ్రహాలను సిబ్బంది నిమజ్జనం చేస్తున్నారు.

Also Read: khairatabad: ఖైరతాబాద్‌తో పాటు హుజూరాబాద్‌కూ ఉపఎన్నిక? - పాడి కౌశిక్ రెడ్డి లక్ష్యంగా కాంగ్రెస్ బిగ్ ప్లాన్!

Adilabad RIMS: ఆదిలాబాద్ రిమ్స్ కు మహర్దశ.. మౌళిక వసతుల కల్పనకు 11.10 కోట్లు: కలెక్టర్‌ రాజర్షి షా

Shailender — Sat, 26 Sep 2026 12:51:33 +0530

ఆదిలాబాద్ రిమ్స్‌ ఆసుపత్రిలోని ప్రత్యేక నవజాత శిశు సంరక్షణ విభాగం (ఎస్‌ఎన్‌సీయూ)లో చోటుచేసుకున్న ఘటనలో బాధితులైన చిన్నారులందరికీ మెరుగైన వైద్య చికిత్స అందిస్తున్నామని, వారి ఆరోగ్య పరిస్థితిని జిల్లా యంత్రాంగం నిరంతరం పర్యవేక్షిస్తోందని జిల్లా కలెక్టర్‌ రాజర్షి షా తెలిపారు. బాధిత కుటుంబాలకు ప్రభుత్వం, జిల్లా యంత్రాంగం పూర్తి స్థాయిలో అండగా ఉంటాయని, అవసరమైన వైద్య సేవలు, సహాయక చర్యలు అందేలా చర్యలు చేపడుతున్నామన్నారు. రిమ్స్‌ ఎస్‌ఎన్‌సీయూలో జరిగిన ఘటనలో దురదృష్టవశాత్తు ఐదుగురు చిన్నారులు మృతి చెందినట్లు కలెక్టర్‌ తెలిపారు. మృతి చెందిన చిన్నారుల కుటుంబాలకు ప్రభుత్వం రూ.5 లక్షల చొప్పున ఎక్స్‌గ్రేషియా ప్రకటించిందని పేర్కొన్నారు. బాధిత కుటుంబాలకు అవసరమైన సహాయ సహకారాలు అందించేందుకు జిల్లా యంత్రాంగం చర్యలు చేపడుతోందన్నారు.

చికిత్స అనంతరం ఆరోగ్యం మెరుగుపడిన 12 మంది చిన్నారులను ఆసుపత్రి నుంచి డిశ్చార్జ్‌ చేసినట్లు కలెక్టర్‌ వెల్లడించారు. డిశ్చార్జ్‌ అయిన చిన్నారుల ఆరోగ్య పరిస్థితిని వైద్యాధికారులు, ఆశా కార్యకర్తలు, ఏఎన్‌ఎంల సమన్వయంతో నిరంతరం పర్యవేక్షిస్తున్నామని తెలిపారు. అవసరమైన ఫాలో-అప్‌ వైద్య సేవలు అందేలా చర్యలు తీసుకుంటున్నామన్నారు. డిశ్చార్జ్‌ అయిన చిన్నారుల్లో ఏడుగురు మహారాష్ట్రకు చెందినవారని కలెక్టర్‌ పేర్కొన్నారు. వారి వివరాలను నాందేడ్‌ జిల్లా వైద్య, ఆరోగ్య శాఖాధికారులకు అందించి, అక్కడి అధికారులతో సమన్వయం చేసుకుంటూ నిరంతర ఆరోగ్య పర్యవేక్షణ చేపడుతున్నామని తెలిపారు. మిగిలిన ఐదుగురు చిన్నారులు ఆదిలాబాద్‌ జిల్లాకు చెందినవారని, వారికి స్థానిక వైద్యాధికారులు, వైద్య సిబ్బంది ద్వారా క్రమం తప్పకుండా ఆరోగ్య పరీక్షలు నిర్వహిస్తూ, అవసరమైన వైద్య సలహాలు, సేవలు అందిస్తున్నామని వివరించారు.

ప్రస్తుతం ఎనిమిది మంది చిన్నారులు హైదరాబాద్‌లోని వివిధ ఆసుపత్రుల్లో చికిత్స పొందుతున్నారని కలెక్టర్‌ తెలిపారు. వారి ఆరోగ్య పరిస్థితి నిలకడగా ఉందని, వైద్యుల పర్యవేక్షణలో అవసరమైన చికిత్స అందుతున్నట్లు పేర్కొన్నారు. మరో ఇద్దరు చిన్నారులు ఆదిలాబాద్‌ రిమ్స్‌ ఆసుపత్రిలోనే చికిత్స పొందుతున్నారని వెల్లడించారు. చికిత్స పొందుతున్న చిన్నారుల ఆరోగ్య పరిస్థితిని సంబంధిత వైద్య బృందాలు ఎప్పటికప్పుడు పర్యవేక్షిస్తున్నాయని తెలిపారు. రిమ్స్‌ ఆసుపత్రిలో నవజాత శిశువులకు అందించే వైద్య సేవలను మరింత బలోపేతం చేసే దిశగా 34 పడకల సామర్థ్యంతో ఎంఎన్‌ఐసీయూ విభాగాన్ని ఏర్పాటు చేసినట్లు కలెక్టర్‌ తెలిపారు.

నవజాత శిశువులకు అవసరమైన ప్రత్యేక వైద్య సంరక్షణను అందించేందుకు ఈ విభాగాన్ని అభివృద్ధి చేసినట్లు పేర్కొన్నారు. ఎంఎన్‌ఐసీయూ విభాగంలో ఆక్సిజన్‌ సదుపాయంతో 11 పడకలు, ఆక్సిజన్‌ సదుపాయం లేని ఏడు పడకలు అందుబాటులో ఉన్నాయని తెలిపారు. అదేవిధంగా స్టెప్‌-డౌన్‌ యూనిట్‌లో ఆక్సిజన్‌ సదుపాయంతో 12 పడకలను ఏర్పాటు చేసినట్లు వివరించారు. ప్రస్తుతం రిమ్స్‌లో మొత్తం 30 పడకలతో నవజాత శిశు సంరక్షణ సేవలు అందుతున్నాయని, త్వరలో అదనంగా మరో నాలుగు పడకలను అందుబాటులోకి తీసుకువచ్చి మొత్తం సామర్థ్యాన్ని 34 పడకలకు పెంచుతామని కలెక్టర్‌ రాజర్షి షా తెలిపారు.

బాధిత చిన్నారుల కుటుంబాలకు ప్రభుత్వం, జిల్లా యంత్రాంగం పూర్తి స్థాయిలో అండగా ఉంటాయని కలెక్టర్‌ స్పష్టం చేశారు. నవజాత శిశువులకు మెరుగైన ఉచిత వైద్య సహాయం అందించేందుకు అవసరమైన చర్యలు తీసుకుంటున్నామని తెలిపారు. చిన్నారుల ఆరోగ్య పరిస్థితిని నిరంతరం పర్యవేక్షిస్తూ, వైద్య సేవల్లో ఎలాంటి ఇబ్బందులు తలెత్తకుండా సంబంధిత శాఖల అధికారులు సమన్వయంతో పనిచేయాలని సూచించారు. బాధిత కుటుంబాలకు అవసరమైన సహాయ సహకారాలు అందించడంతో పాటు, నవజాత శిశువుల సంరక్షణ సేవలను మరింత పటిష్ఠం చేసేందుకు చర్యలు కొనసాగుతున్నాయని కలెక్టర్‌ పేర్కొన్నారు.

రిమ్స్ కు మహర్దశ.. మౌళిక వసతుల కల్పనకు 11.10 కోట్లు విడుదల

ఆదిలాబాద్ రిమ్స్ కు మహర్దశ పట్టనుంది. ఆసుపత్రిలో మౌలిక వసతులు కల్పించటానికి నిధులు మంజూరు చేయాలని గతంలో ఆసుపత్రి యాజమాన్యం పలుమార్లు అంచనాలు రూపొందించి నివేదించినా ప్రభుత్వం నుంచి సానుకూల స్పందన లభించలేదు. అయితే ఇటీవల ఎస్ ఎన్సీయూలోని ఏసీ విద్యుదాఘాతంతో పేలిపోయి నవ జాత శిశువులు పలువురు గాయాలపాలవ్వటంతో పాటు, వారిలో అయిదుగురు మృత్యువాత పడ్డారు. ఈ నేపథ్యంలో ప్రభుత్వం స్పందించింది. ఈ ఘటన అనంతరం రాష్ట్ర వైద్యారోగ్య శాఖ మంత్రి దామోదర రాజనర్సింహ రిమ్స్ ఆసుపత్రిని సందర్శించి పరిస్థితిని సమీక్షించారు. ఇక్కడి పరిస్థితులను అంచనా వేసిన ఆయన మరమ్మతులు, మౌలిక వసతులు కల్పించటానికి రూ. 11.10 కోట్లను మంజూరు చేయించారు. మంత్రి ఆదేశాల మేరకు జిల్లా కలెక్టర్ రాజర్షి షా అదనపు కలెక్టర్ రాజేశ్వర్ తో అడ్వయిజరీ కమిటీని ఏర్పాటు చేశారు. టీఎస్ఎంఐడీసీ, ఆర్అండ్ బీ, పురపాలక సంఘం అభియంతలతో అదనపు కలెక్టర్ ఆసుపత్రిలోని అన్ని విభాగాలను పరిశీలించి అవసరమైన మౌలిక వసతుల కోసం అంచనాలు తయారు చేసి ప్రభుత్వానికి నివేదించారు. కొంత మేర నిధులు విడుదల కావటంతో రిమ్స్ మెరుగైన వైద్య సేవలు అందటానికి వీలు కలిగినట్లయింది. ఆరోగ్యశ్రీ హెల్త్ కేర్ ట్రస్టు (ఆర్ఎహెచ్ టీ) నుంచి రివాల్వింగ్ ఫండ్ గా ప్రభుత్వం రూ.11.10 కోట్లు విడుదల చేసింది. నవజాత శిశువుల ఎంఎన్సీయూ అభివృద్ధి, పునరుద్ధరణకు రూ 1కోటి, రిమ్స్ ఆసుపత్రి భవనానికి రంగులు వేయటానికి రూ. 1కోటి, ఆసుపత్రి ఆవరణలో సిమెంటు రహదారుల నిర్మాణానికి, వెనుక వైపున దెబ్బతిన్న ప్రహరీ మరమ్మతులకు రూ. 1.60 కోట్లు, మరుగుదొడ్ల నిర్వహణ, మరమ్మతులకు రూ. 5 కోట్లు, ఆక్సిజన్ పైపులైన్ వ్యవస్థ అత్యవసరంగా మరమ్మతులు చేయటానికి రూ.1.5 కోట్లు, విద్యుత్తు మరమ్మతులకు రూ.1కోటిని కేటాయించి మంజూరు చేశారు.

అయితే రిమ్స్ కు అనుబంధంగా పుష్కరకాలం కిందట ప్రస్తుత సూపర్ స్పెషాలిటీ ఆసుపత్రి భవనం వెనక సిమాంగ్ భవనాన్ని రూ.ఒక కోటితో నిర్మించారు. అది ఉపయోగంలోకి రాకుండానే నిరుపయోగంగా మారింది. రిమ్స్ దుర్ఘటన నేపథ్యంలో జిల్లాకు వచ్చిన ఆరోగ్య శాఖ మంత్రి ప్రస్తుతం కాన్పుల విభాగంలో నెలకొన్న ఇబ్బందులను గమనించారు. దీంతో త్వరలో ఎంసీ హెచ్ (మదర్ అండ్ చైల్డ్ హెల్త్) కేంద్రాన్ని మంజూరు చేయటానికి హామీ ఇచ్చారు. ఆ భవనం నిర్మాణమైతే జిల్లాలోని గర్భిణులకు మరింత సౌకర్యంగా ఉంటుందనీ స్థానికులు అభిప్రాయం వ్యక్తం చేస్తున్నారు.

Adilabad News: పల్లెటూరి బిడ్డకు జాతీయ కిరీటం.. మిస్ ఎర్త్ వాటర్ ఇండియా 2026గా ఆదిలాబాద్ యువతి

Shailender — Fri, 25 Sep 2026 12:43:37 +0530

ఆదిలాబాద్ జిల్లా ఇంద్రవెల్లి మండలం హీరాపూర్ గ్రామానికి చెందిన ప్రీతి ముండే ప్రతిష్టాత్మక 'మిస్ డివైన్ బ్యూటీ' సంస్థ రాజస్థాన్‌లోని జైపూర్‌ ఇంటర్నేషనల్ హోటల్‌లో నిర్వహించిన 'మిస్ ఇండియా ఎర్త్ 2026' పోటీల్లో తెలంగాణ రాష్ట్రానికి ప్రాతినిధ్యం వహించి 'మిస్ ఎర్త్ వాటర్ ఇండియా 2026' కిరీటాన్ని కైవసం చేసుకున్నారు. గ్రామీణ నేపథ్యం నుంచి వచ్చి జాతీయ స్థాయి వేదికపై సత్తా చాటిన ఆమె, త్వరలో ఫిలిప్పీన్స్‌లో జరగనున్న అంతర్జాతీయ 'మిస్ ఎర్త్' వేదికపై భారతదేశం తరఫున ప్రాతినిధ్యం వహించేందుకు సిద్ధమవుతున్నారు. ఈ పోటీల్లో ప్రీతి ప్రదర్శించిన ప్రతిభ, స్నేహపూర్వక తీరుకు గాను ఆమెకు 'మిస్ కంజీనియాలిటీ 2026' సబ్‌టైటిల్ పురస్కారం కూడా దక్కింది.

ఇంద్రవెల్లి మండల కేంద్రంలో 'కామాక్షి టెక్స్‌టైల్స్ & డ్రెస్సెస్' పేరిట చిన్నపాటి వస్త్ర వ్యాపారం చేసుకునే ప్రహ్లాద్- ఉమా ముండే దంపతుల కుమార్తె అయిన ప్రీతి, నిరుపేద, సాధారణ కుటుంబ నేపథ్యం నుంచి వచ్చి అంచెలంచెలుగా ఎదిగారు. కేవలం మోడలింగ్‌కే పరిమితం కాకుండా అరోరా విశ్వవిద్యాలయంలో మాస్టర్స్ ఇన్ యోగా అభ్యసిస్తూ, జాతీయ స్థాయి యోగా ఛాంపియన్‌షిప్‌కు ఎంపికై తన క్రీడా ప్రతిభను నిరూపించుకున్నారు. గతంలో ఎన్‌సీసీ క్యాడెట్‌గా శిక్షణ పొందిన ఆమె, కేంద్ర ప్రభుత్వ 'ఆయుష్మాన్ ఆరోగ్య మందిర్' విభాగంలో యోగా శిక్షకురాలిగా సేవలందించారు. ప్రస్తుతం ఓ ప్రైవేట్ స్కూల్స్‌లో యోగా టీచర్‌గా, ప్రొఫెషనల్ జ్యోతిష్యురాలిగా, యువ పారిశ్రామికవేత్తగా బహుముఖ ప్రజ్ఞ కనబరుస్తున్నారు.

మరోవైపు ఆర్ట్ ఆఫ్ లివింగ్ స్వచ్ఛంద సేవకురాలిగా సేవా కార్యక్రమాల్లో చురుగ్గా పాల్గొంటున్న ప్రీతి, పర్యావరణ పరిరక్షణ లక్ష్యంగా 'కైండ్ హార్ట్స్' పేరిట సొంతంగా ఓ ప్రత్యేక కార్యక్రమాన్ని ప్రారంభించారు. దీని ద్వారా పాఠశాల విద్యార్థుల్లో చైతన్యం నింపడం, చెత్త విభజన, పరిసరాల పరిశుభ్రత, చెరువుల పునరుద్ధరణ, సామూహిక మొక్కలు నాటే కార్యక్రమాలను నిర్వహిస్తూ నిజమైన పర్యావరణ వేత్తగా గుర్తింపు పొందారు.

పల్లెటూరి వీధుల నుంచి జాతీయ, అంతర్జాతీయ స్థాయికి ఎదిగిన ప్రీతి ముండే విజయంపై గ్రామస్తులు, స్థానిక ప్రజాప్రతినిధులు, పలువురు ప్రముఖులు హర్షం వ్యక్తం చేస్తూ అభినందనలు తెలియజేస్తున్నారు. తమ కూతురు జాతీయ స్థాయిలో 'మిస్ ఎర్త్ వాటర్ ఇండియా 2026' కిరీటాన్ని కైవసం చేసుకోవడం పట్ల కుటుంబ సభ్యులు సైతం హర్షం చేస్తున్నారు. ప్రీతి తన లక్ష్యం కోసం తపన పడుతున్న విధానాన్ని తాము గమనిస్తూ ఎల్లవేళలా తనకు అండగా ఉంటూ కృషి చేస్తున్నామన్నారు.