nizamabad

Adilabad IT Tower: ఆదిలాబాద్‌లో ఐటీ టవర్ ప్రారంభం.. 3000 ఎకరాల్లో ఇండస్ట్రియల్ కారిడార్: మంత్రి శ్రీధర్ బాబు

Shankar Dukanam — Wed, 11 Nov 2026 17:51:12 +0530

ఆదిలాబాద్ జిల్లాను ఐటీ, పారిశ్రామిక రంగాల్లో అగ్రగామిగా తీర్చిదిద్ది, స్థానిక యువతకు ఉపాధి అవకాశాలు కల్పించడమే ప్రభుత్వ ప్రధాన లక్ష్యమని తెలంగాణ ఐటీ, పరిశ్రమల శాఖల మంత్రి దుద్దిళ్ల శ్రీధర్ బాబు తెలిపారు. ఆదిలాబాద్ జిల్లా కేంద్రంలో రూ.58.85 కోట్ల వ్యయంతో పూర్తి చేసిన నూతన ఐటీ టవర్‌ను బుధవారం నాడు ఆయన ప్రారంభించారు. నిధుల కొరతతో గతంలో నిలిచిపోయిన ఈ నిర్మాణాత్మక ప్రాజెక్టును సీఎం రేవంత్ రెడ్డి సహకారంతో వేగవంతం చేసి అందుబాటులోకి తెచ్చినట్లు పేర్కొన్నారు. స్థానిక యువత ఉద్యోగాల కోసం హైదరాబాద్ వంటి మహానగరాలకు వలస వెళ్లకుండా, స్వగ్రామాల్లోనే అవకాశాలు కల్పించడమే తమ ఉద్దేశమని స్పష్టం చేశారు.

మౌలిక వసతులు, ఉపాధి అవకాశాలు

నూతన ఐటీ టవర్‌లో తెలంగాణ అకాడమీ ఫర్ స్కిల్ అండ్ నాలెడ్జ్ (TASK) శిక్షణ కేంద్రంతో పాటు ఇంక్యుబేషన్ హబ్‌ను ఏర్పాటు చేసినట్లు మంత్రి శ్రీధర్ బాబు తెలిపారు. ఇప్పటికే ఎన్టీటీ డేటా (300 మంది), ఎన్ ల్యాబ్స్ (250 మంది), వైడర్ సాఫ్ట్‌వేర్ (20 సీట్లు), పోస్ట్రిట్ ఏఐ (50 మంది) వంటి సంస్థలు కార్యకలాపాలు ప్రారంభించాయని వెల్లడించారు. వీటితో పాటు ఆదిలాబాద్‌లో 3 వేల ఎకరాల్లో ఇండస్ట్రియల్ కారిడార్ ఏర్పాటు చేయనున్నట్లు ఆయన ప్రకటించారు (తొలి విడతలో 2,000 ఎకరాలు, రెండో విడతలో 1,000 ఎకరాల భూసేకరణ). హైదరాబాద్‌కే పరిమితమైన ఐటీ సేవలను టైర్ 2, టైర్ 3 నగరాలకు విస్తరించడం ప్రభుత్వ సంకల్పమని మంత్రి పేర్కొన్నారు.

విమానాశ్రయ శంకుస్థాపన, సీసీఐ పునరుద్ధరణ

ఆదిలాబాద్‌లో విమానాశ్రయం ఏర్పాటుకు సీఎం రేవంత్ రెడ్డి ప్రత్యేక చొరవ చూపుతున్నారని, భూసేకరణ, అనుమతుల ప్రక్రియను వేగవంతం చేసి త్వరలోనే శంకుస్థాపన చేస్తామని శ్రీధర్ బాబు చెప్పారు. విమానాశ్రయం అందుబాటులోకి వస్తే ప్రాంతీయ పారిశ్రామికాభివృద్ధి మరింత వేగవంతమవుతుందని తెలిపారు. అలాగే, గతంలో మూతపడిన సిమెంట్ కార్పొరేషన్ ఆఫ్ ఇండియా (CCI) పరిశ్రమను సాంకేతిక, విధానపరమైన చిక్కులు తొలగించి పునరుద్ధరించేందుకు చర్యలు తీసుకుంటున్నామని ఆయన వెల్లడించారు.

ఈ కార్యక్రమంలో ఎంపీ గోడం నగేష్ మాట్లాడుతూ.. కేంద్ర, రాష్ట్ర ప్రభుత్వాల సమన్వయంతో విమానాశ్రయం, రైల్వే, సీసీఐ పునరుద్ధరణ ప్రాజెక్టులు పూర్తి కావాలని ఆకాంక్షించారు. ఐటీ టవర్ మంజూరు చేసినందుకు ఎమ్మెల్యే పాయల్ శంకర్ కృతజ్ఞతలు తెలిపారు. మరో ఐటీ టవర్, స్థానిక పరిశ్రమలకు ప్రత్యేక రాయితీలు ఇవ్వాలని కోరారు.

వెనుకబడిన ప్రాంతాల అభివృద్ధికి ప్రాధాన్యం ఇస్తున్నందుకు ఖానాపూర్ ఎమ్మెల్యే వెడ్మ బొజ్జు పటేల్ అభినందిస్తూ, ఆదివాసీ యువతకు ఉద్యోగ ప్రాధాన్యం, వర్సిటీ ఏర్పాటు చేయాలని విజ్ఞప్తి చేశారు. ఈ కార్యక్రమంలో ఐటీ కార్యదర్శులు అనుదీప్, శశాంక్, అడిషనల్ కలెక్టర్లు, ఎస్పీ అఖిల్ మహాజన్, ఇతర ప్రజాప్రతినిధులు, అధికారులు పాల్గొన్నారు.

Adilabad Dandari Festival: ఆదిలాబాద్ ఏజెన్సీలో 10 రోజులపాటు ఆదివాసీల దండారీ వేడుకలు.. గుస్సాడి నృత్యాలు

Shailender — Mon, 9 Nov 2026 12:25:36 +0530

ఉమ్మడి ఆదిలాబాద్ జిల్లాలోని ఏజెన్సీ గ్రామాల్లో ఆదివాసీలు దండారి ఉత్సవాలను ఘనంగా జరుపుకుంటున్నారు. ఏజెన్సీ గ్రామాలన్నీ దండారీ ఉత్సవాలతో అందమైన అలంకరణతో ముస్తాబయ్యాయి.. డప్పు వాయిద్యాల మధ్య ఆదివాసీలు గుస్సాడి నృత్యాలతో ఆకర్షిస్తున్నారు. పూర్వ కాలం నుండి వస్తున్న సాంప్రదాయం ప్రకారం ఏటా దీపావళి సందర్భంగా సాంప్రదాయ పూజలు నిర్వహిస్తు పదిరోజులపాటు ఆదివాసీలు దండారీ వేడుకలను ఘనంగా జరుపుకుంటున్నారు. ఉమ్మడి ఆదిలాబాద్ జిల్లాలో ఆదివాసీల దండారీ వేడుకలపై ప్రత్యేక కథనం.

ఉమ్మడి ఆదిలాబాద్ జిల్లాలో ఆదివాసీలు దీపావళి పండుగను పురస్కరించుకుని దండారీ వేడుకలను ఘనంగా జరుపుకుంటారు. దీపావళికి ముందుగా వారం రోజుల ముందు అన్ని గోండు, కొలాంగూడాల్లో దండారీ వేడుకల సందర్భంగా తమ తమ గ్రామ పటెల్ ఇంటి ఆవరణలో దండారీ వేదిలకను రంగు రంగుల విద్యుత్ కాంతుల మద్య అందంగా అలంకరణలు చేసి ముస్తాబు చేసారు. అకాడి అంటే జూన్ మాసంలో వన దేవతల పూజలు చేసినప్పటి నుండి అకాడి దేవతను కొలుస్తు దీపావళి వరకు ఈ పూజలు చేయడం ఆనవాయితీగా వస్తోంది.

దీపావళికి ముందుగా అందరు మంచిర్యాల జిల్లాలోని గుడిరేవు వద్దనున్న తమ ఆది దైవమైన పద్మల్ పురి కాకోబాబాయి దేవతను దర్శించుకొని గోదావరి స్నానాలు ఆచరించి అక్కడ నుండి సాంప్రదాయ దండారీ వేడుకలను ప్రారంభిస్తారు. అక్కడ నుండి తమ గ్రామాలకు చేరుకొని గ్రామాల్లో తమ ఎత్మసూర్ దేవతగా భావించే గుస్సాడి వేషధారణలు వేస్తారు. మొక్కు ఉన్న వాళ్ళు తమ తాతలకాలంగా గుస్సాడి టోపి ఉన్న ప్రతి ఇంటి నుండి ఒకరు ఈ గుస్సాడి వేషధారణ వేస్తారు. నెత్తిపై నెమలిపించాల టోపి, కాళ్ళకు నడుముకు గజ్జలు, మెడలో రుద్రాక్ష మాలలు, ఒళ్ళంతా విభుది, లెదా మసి రాసుకొని భుజానికి ఓ జంతు చర్మం, చేతిలో ఓ రోకలు, కర్ర, అచ్చం శివుడి వలే అవతరాం ఉంటుంది.

వారం రోజులపాటు ఈ గుస్సాడి వేషధారణ అంటే ఒక కఠోరమైన దీక్ష లాంటిది. గుస్సాడి వేషధారణ వేసిన వారు వారం రోజులపాటు స్నానం చేయరు. అలాగే ఉంటారు. ఇక తమ గ్రామాల్లో నిర్వహించే దండారీ వేడుకల్లో ఉత్సాహంగా నృత్యాలు చేస్తారు. వారికి తోడుగా చిన్నారులు పరపొరిలుగా చచోయ్ కొలాటాలతో నృత్యాలు చేస్తారు. వీరిని డియ్యూర్ అని పిలుస్తారు. అటు మహిళలు సైతం సాంప్రదాయ రెలా పాటల పాడుతూ నృత్యాలు చేస్తారు. ఈ ఉత్సవాలను ప్రారంభించే ముందు మహిళలు రెలా రెలా పాటలతో స్వాగతం పలుకుతారు. అటు పటెల్ ఇంటి వద్ద యజమాని తమ దైవం వద్ద నుండి దీపం వెలిగించి బయటకు తీసుకొని వచ్చి వారికి దండారీకి స్వాగతమని ఆహ్వానించి తమ సాంప్రదాయ ఆకాడి, ఎత్మాసూర్ దేవతల సామాగ్రి గుస్సాడి వేషధారణకు సంబంధించిన వస్తువులను అందిస్తారు. అప్పుడు చిన్నారులు ఈ కొలాటాలతో పాటలు పాడుతు స్వీకరిస్తారు.

అనంతరం పర్ర వెట్టే గుమ్మెల అనే సాంప్రదాయ వాయిద్యాలను పెద్దలు సమకూర్చి వాయిస్తారు. ఒక పాట అయ్యాక అందులోనుండి గుస్సాడి వేషధారణ వేసే వారు తమ ఆ గుస్సాడి సామాగ్రి తీసుకొని ఎప్పుడు యధావిధిగా ఉండే దుస్తులను తీసి గుస్సాడి వేషధారణ వేస్తారు. చిన్నారుల్లోను పరపోరిలుగా అంటే ఆడమగ లాగా వేషాదరణ వేస్తారు. ఈ వేషధారణ ఎందుకంటే తమ పూర్వికుల నుండి వస్తున్న సాంప్రదాయం ప్రకారం సృష్టి తయారైందని, పద్మల్ పురి కాకోబాయి దేవత అనుగ్రహం వల్ల, ఎత్మసూర్ దేవతను మొదలుకొని లోకం పుట్టినట్లు భావిస్తు వేషధారణ వేస్తారు.

దీపావళి పండుగ అంటె దేశవ్యాప్తంగా అందరు ఎవరిళ్ళలో వారు లక్ష్మి పూజలు చేసుకొని సంబరాలు జరుపుకుంటుంటే ఆదివాసీలు మాత్రం తమ గ్రామమంతా కలిసి ఒకేచోటా ఉత్సాహంగా దండారీ వేడుకలను జరుపుకుంటారు ఇది వారి ప్రత్యేకతా..

దండారీ వేడుకల్లో మొదటగా భోగి అనే కార్యక్రమం నిర్వహిస్తారు. అప్పటి నుండి మిగతా అన్ని కార్యక్రమాలు ప్రారంభిస్తారు. దండారీ ప్రాంగణంలో అడుగుపెట్టి పర్ర వెట్టే గుమ్మెల అనే వాయిద్యాలను పూజించి, దండారి వేడుకల్లో వాటిని వాయిస్తునే నృత్యాలు చేస్తారు. ఆదివాసీల్లో సోలడెమ్సా అట్రవాజ అనే రకాల వాయిద్యాలు ఉన్నాయి. ఇందులో ఏ సమయంలో ఏ వాయిద్యం వాయిస్తే ఆ రకంగా ఆదివాసీలు నృత్యాలు చేస్తారు. దండారీ వాయిద్యం అందరికన్న భిన్నంగా ఉంటుంది. ఒకేసారి అన్ని డప్పులతో ఓక తుడుం మాత్రమే వాయిస్తు 15 నిమిషాల పాటు వాయిస్తారు. ఇది దండారీ ప్రారంభంలొ మరియు ముగింపు సమయంలో ప్రతిరోజు వాయిస్తారు. అనంతరం మిగతా వాయిద్య క్రమాలు వేరు వేరు రకాలుగా డప్పు వాయిద్యాలు వాయిస్తు దండారీ ప్రాంగణంలో అందరు నృత్యాలు చేస్తు సంబరంగా ఈ వేడుకలను ఘనంగా జరుపుకుంటారు.

పర్ర వెట్టే గుమ్మెల వాయిద్యాలతో చచ్చోయ్ అనే కొలాటమాడుతు సందడి చేస్తారు. ఇందులో పులి వేషధారణ, కోడల్, టప్పల్ వేషధారణలు ఉంటాయి. ఈ నృత్యాలు అందరిని ఆకట్టుకుంటాయి. గుస్సాడిలు నెమలి పించాలటోపిలు ధరించి చేసే నృత్యాలు అందరికన్న వినూత్నంగా ఉంటాయి. గుస్సాడిలను తాదో, లేదా గురు అని కూడా పిలుస్తారు. ఎత్మాసూర్ దేవతను ఆదివాసీలు తమ పవిత్ర దైవంగా కొలుస్తారు. కోరిన కోరికలు, మొక్కులు చెల్లిస్తే ఖచ్చితంగా నెరవేరుతాయన్న గట్టి నమ్మకం ఆదివాసీల్లో ఉంది. ఎవరికైనా సంతానం కలగకుంటే ఎత్మాసూర్ దేవతకు మొక్కితే ఖచ్చితంగా సంతాన భాగ్యం లభిస్తుందని, తమ పాడి పంటలు బాగుండాలి, కుటుంబం అందరు సుఖ సంతోషాలతో ఉండాలని, ఏటా దండారి ఉత్సవాలను పురస్కరించుకుని ఎత్మసూర్ దేవతకు మొక్కులు చెల్లిస్తారు.

దండారీ అనేది ఆదివాసీలకు చాలా పెద్ద పండుగా ఇది వారి పూర్వకాలం నుండి వస్తున్న ఆచారమని, నేటికి ఆదివాసీలు దీపావళి సందర్భంగా ఈ వేడుకలను ఘనంగా నిర్వహిస్తున్నారు. తమ గ్రామాల్లో దండారీ సందర్భంగా భోగి పూజలు అయిన వెంటనే ఒక గ్రామం వారు మరో గ్రామానికి అతిథిగా వెళతారు. ఇలా అతిథిగా వెళ్ళడం ఆనవాయితీగా వస్తోంది. అతిథులకు సాదర ఆహ్వనంతో పాటు ఒక రోజు ఇరువురు కలిసి ఆడిపాడి నృత్యాలు చేసి సందడి చేస్తారు. అనంతరం ఒకరికొకరు కలుసుకొని బందుత్వం పెంచుకుంటారు. ఇందులో పెళ్ళిళ్ళ కోసం బందుత్వాలు కూడా జతకడతాయి. నచ్చితే పెళ్ళి మాత్రం వేసవి సమయంలో జరుపుతారు. ఇలా ఒక ఊరు నుండి మరోక ఊరికి వచ్చిన అతిథులు వచ్చే యెడాది వారి వద్దకు అతిథులుగా వస్తుంటారు. ఇలా బందుత్వాలను బలపరిచే ఒక రకమైన వినూత్న ఆచారం ఆదివాసీల్లో ఉంది.

ఆదివాసీలు పది రోజుల పాటు ఘనంగా జరుపుకునే దండారీ వేడుకలు చాలా పవిత్రమైనవి. ఈ దండారీ వేడుకల్లో ఆదివాసీల సాంప్రదాయం గుస్సాడి వేషధారణ ఇతర అన్ని కార్యక్రమాలు చాలా ఆకట్టుకుంటాయి. ప్రకృతిని పూజించే అడవి బిడ్డలు వీరు.. పూర్వం నుండి వస్తున్న సంస్కృతి సాంప్రదాయలను కాపాడే ఒక నిజమైన వారసత్వం కేవలం ఆదివాసీల్లోనే ఉంది. ఈ దండారీ వేడుకల్లో ఆదివాసీలు వాయించె వాయిద్యాలు, వారి నృత్యాలు చాకా ఆకట్టుకుంటాయి.

ఈ నెలలో వాతావరణం చాలా బాగుంటుంది. అందరు గ్రామస్తులు ఒకేచోటా వేడుకలు నిర్వహించడం చాలా బాగుంటుంది. ఇది ఐక్యతగల తమ ఆదివాసీల సాంప్రదాయమని, దీపావళి పండుగను పురస్కరించుకొని భోగి పూజలు మొదలుకొని దండారి ఉత్సవాలు ప్రారంభించి దీపావళికి లక్ష్మిపూజ అనంతరం మూడు రోజుల తర్వాత కొలబోడి పూజలు నిర్వహించి ఆదివాసీలు ఈ దండారి వేడుకలను ముగిస్తారు. ఇలా దీపావళి పండుగను పురస్కరించుకుని పది రోజులపాటు దండారి సంబరాలను ఎంతో ఘనంగా జరుపుకుంటున్నారు ఈ ప్రకృతి ప్రేమికులు.

Governor Quota MLC: డాక్టర్ పిడమర్తి రవికి ఎమ్మెల్సీ ఇవ్వాలని సీఎం రేవంత్‌కి మాదిగ జేఏసీ విజ్ఞప్తి

Shankar Dukanam — Sun, 8 Nov 2026 18:22:46 +0530

Telangana Madiga JAC Demands Governor Quota MLC Post for Dr Pidamarthi Ravi

ఆదిలాబాద్: డాక్టర్ పిడమర్తి రవికి గవర్నర్ కోటాలో ఎమ్మెల్సీ పదవి ఇవ్వాలని తెలంగాణ మాదిగ జేఏసీ ఆదిలాబాద్ జిల్లా కమిటీ ముఖ్యమంత్రి రేవంత్ రెడ్డికి విజ్ఞప్తి చేసింది. ఆదిలాబాద్ జిల్లా కేంద్రంలోని అంబేద్కర్ భవన్‌లో తెలంగాణ ముఖ్యమంత్రి రేవంత్ రెడ్డి జన్మదిన వేడుకలను తెలంగాణ మాదిగ జేఏసీ జిల్లా కమిటీ ఆధ్వర్యంలో ఘనంగా నిర్వహించారు. ఈ సందర్భంగా తెలంగాణ మాదిగ జేఏసీ జిల్లా అధ్యక్షులు మల్యాల మనోజ్ మాదిగ, రాష్ట్ర ఉపాధ్యక్షులు నక్క రాందాస్ మాదిగ సీఎం రేవంత్ రెడ్డికి పుట్టినరోజు శుభాకాంక్షలు తెలిపారు. రేవంత్ రెడ్డి ఆయురారోగ్యాలతో, సుఖసంతోషాలతో నిండు నూరేళ్లు జీవించాలని భగవంతుడిని ప్రార్థించడమే కాకుండా, భవిష్యత్తులో కూడా ఆయన మరోసారి ముఖ్యమంత్రిగా బాధ్యతలు చేపట్టాలని తమ ఆకాంక్షను వ్యక్తం చేశారు.

ఈ వేడుకల సందర్భంగా మాదిగ జేఏసీ నాయకులు మాట్లాడుతూ.. ఎస్సీ వర్గీకరణతో పాటు వివిధ సంక్షేమ పథకాల అమలులో మాదిగ ఉపకులాలకు తగిన ప్రాధాన్యత కల్పిస్తున్నందుకు ముఖ్యమంత్రి రేవంత్ రెడ్డికి ప్రత్యేక ధన్యవాదాలు తెలియజేశారు. తెలంగాణ రాష్ట్ర సాధన ఉద్యమంలో ఎన్నో కష్టనష్టాలకు ఓర్చి, రాష్ట్రం సిద్ధించే వరకు అవిశ్రాంతంగా పోరాడిన ఉద్యమకారుడు, మాదిగ జాతి అభ్యున్నతికి నిరంతరం శ్రమిస్తున్న ఉన్నత విద్యావంతుడు డాక్టర్ పిడమర్తి రవి సేవలను ప్రభుత్వం గుర్తించాలని కోరారు. ఆయనకు సముచిత స్థానం కల్పిస్తూ గవర్నర్ కోటాలో ఎమ్మెల్సీ పదవిని కేటాయించాలని తెలంగాణ మాదిగ జేఏసీ జిల్లా కమిటీ తరఫున ముఖ్యమంత్రి రేవంత్ రెడ్డికి విజ్ఞప్తి చేశారు.

ఈ కార్యక్రమంలో కాంగ్రెస్ పార్టీ ఎస్సీ డిపార్ట్మెంట్ కార్యదర్శి బిక్కీ గంగన్న మాదిగ, తెలంగాణ మాదిగ జేఏసీ జిల్లా కోశాధికారి లింగంపల్లి ప్రసన్నకుమార్, జిల్లా ఉపాధ్యక్షులు కత్తి గంగాధర్ మాదిగ, జిల్లా కార్యదర్శి తార రవికుమార్ మాదిగ, మండల అధ్యక్షులు జెల్ల మహేందర్ మాదిగ, పట్టణ అధ్యక్షులు బట్టు మహేందర్ మాదిగ, పట్టణ కార్యదర్శి మంద సురేష్ మాదిగ, డివిజన్ కార్యదర్శి కాంపెల్లి మల్లయ్య మాదిగ తదితరులు పాల్గొన్నారు.

Medical College Ragging: కామారెడ్డి మెడికల్‌ కాలేజీలో ర్యాగింగ్‌.. 14 మంది సీనియర్ విద్యార్థులపై సస్పెన్షన్‌!

Shankar Dukanam — Wed, 4 Nov 2026 13:26:24 +0530

కామారెడ్డి: పిల్లలు బాగా చదువుకుని ప్రయోజకులు కావాలని, తాము గర్వపడేలా చేయాలని తల్లిదండ్రులు కోటి ఆశలతో ఉన్నత చదువులు చదివిస్తుంటారు. కానీ కొందరు విద్యార్థులు ర్యాగింగ్ పేరుతో హద్దు మీరి ప్రవర్తించడంతో సస్పెన్షన్‌కు గురై చిక్కుల్లో ఇరుక్కుంటారు. తాజాగా కామారెడ్డి గవర్నమెంట్ మెడికల్ కాలేజీలో చోటుచేసుకున్న ర్యాగింగ్‌ వ్యవహారం వైద్య తీవ్ర కలకలం రేపింది.

కామారెడ్డి మెడికల్ కాలేజీలో జూనియర్‌ విద్యార్థులను మానసికంగా, శారీరకంగా వేధించినట్లు ఆరోపణలు ఎదుర్కొంటున్న 14 మంది సీనియర్‌ విద్యార్థులపై కాలేజీ యాజమాన్యం క్రమశిక్షణా చర్యలు తీసుకుంది. ఆరోపణలు, అందుకు ప్రాథమిక సాక్ష్యాలు జత కావడంతో నలుగురు విద్యార్థులను 6 నెలల పాటు, మరో 10 మందిని 4 నెలల పాటు క్లాస్ రూములకు హాజరు కాకుండా సస్పెండ్‌ చేసింది. ఒక ర్యాగింగ్ సంఘటనలో ఒకేసారి 14 మంది వైద్య విద్యార్థులపై సస్పెన్షన్‌ వేటు పడటం మెడికల్ కాలేజీలలో హాట్ టాపిక్‌గా మారింది. అటు బాధిత విద్యార్థుల తల్లిదండ్రులతో పాటు ఇటు సీనియర్ విద్యార్థుల తల్లిదండ్రులు సైతం పిల్లల భవిష్యత్ గురించి ఆందోళన చెందుతున్నారు.

వారం రోజుల కిందట కొందరు సీనియర్లు తమను తీవ్రంగా వేధిస్తున్నారంటూ జూనియర్‌ విద్యార్థులు నేషనల్‌ మెడికల్‌ కమిషన్‌ (NMC) యాంటీ ర్యాగింగ్‌ సెల్‌కు ఆన్‌లైన్‌లో ఫిర్యాదు చేశారు. దాంతో ర్యాగింగ్ విషయం వెలుగులోకి వచ్చింది. దీనిపై తక్షణమే స్పందించిన ఎన్‌ఎంసీ ఉన్నతాధికారులు స్థానిక పోలీసులతో పాటు మెడికల్ కాలేజీ ప్రిన్సిపాల్‌కు సమాచారం ఇచ్చి విచారణకు ఆదేశించారు. కాలేజీ యాజమాన్యం చేపట్టిన అంతర్గత విచారణలో ర్యాగింగ్‌ జరిగిందని స్పష్టమైన ఆధారాలు దొరకడమే కాకుండా, విచారణలో వీడియో ఆధారాలు కూడా లభించాయి.

ఈ వ్యవహారంపై ప్రిన్సిపాల్‌ ఆధ్వర్యంలో హెచ్‌ఓడీల ప్రత్యేక సమావేశం నిర్వహించి బాధ్యులైన 14 మంది సీనియర్ విద్యార్థులను సస్పెండ్‌ చేస్తూ నిర్ణయం తీసుకున్నారు. సస్పెండ్‌ అయిన వారిలో తెలంగాణతో పాటు ఇతర రాష్ట్రాలకు చెందిన విద్యార్థులు ఉన్నారు. ఎన్‌ఎంసీ నిబంధనల ప్రకారమే కఠిన చర్యలు తీసుకున్నామని, కళాశాలలోగానీ, హాస్టల్‌లోగానీ ర్యాగింగ్‌కు పాల్పడితే సహించేది లేదని ప్రిన్సిపాల్‌ హెచ్చరించారు.

Bandi Sanjay Kumar: ఇందిరా గాంధీ, పీవీ నరసింహా రావు ఓట్లు తొలగిస్తే ఓట్లు చోరీ అంటారా ?: బండి సంజయ్ ఫైర్

Shankar Dukanam — Tue, 3 Nov 2026 18:05:23 +0530

నిర్మల్‌కు వచ్చి ‘సర్’ (SIR) వద్దంటే అటువంటి వారి వీపంతా సాఫ్ చేయాలని కేంద్ర హోంశాఖ సహాయ మంత్రి బండి సంజయ్ కుమార్ వ్యాఖ్యానించారు. దశాబ్దాల కిందట చనిపోయిన మాజీ ప్రధాని ఇందిరా గాంధీకి, 2004లో మాజీ ప్రధాని పీవీ నరసింహారావు, ఆ తర్వాత సైతం ప్రముఖ నేతలు చనిపోయి ఏళ్లు గడుస్తున్నా, నేటికీ వారికి ఓట్లు ఉన్నాయని.. అలా చనిపోయిన వారి ఓట్లను, డూప్లికేట్ ఓట్లను తొలగించాలా? వద్దా? అని ప్రశ్నించారు.

నిర్మల్‌లో నిర్వహించిన మహా పాదయాత్ర సభకు కేంద్ర మంత్రి బండి సంజయ్ కుమార్ ముఖ్య అతిథిగా హాజరయ్యారు. ఈ సందర్భంగా ఆయన ప్రసంగిస్తుండగా, సభలోని కార్యకర్తలు ఒక్కసారిగా 'సీఎం.. సీఎం' అంటూ పెద్దఎత్తున నినాదాలు చేశారు. దీనిపై వెంటనే స్పందించిన బండి సంజయ్, మరోసారి 'సీఎం సీఎం' అని నినాదాలు చేస్తే మైక్ బంద్ చేసి వెళ్లిపోతానని కార్యకర్తలను తీవ్రంగా మందలించారు. నిర్మల్ గడ్డ పూర్తిగా కాషాయ అడ్డా అని స్పష్టం చేశారు.

కాంగ్రెస్, ఇండీ కూటమిపై ధ్వజం

ఇటలీ సంతతికి చెందిన వ్యక్తులు ఈ దేశానికి ప్రధాని కావాలని కలలు కంటున్నారని బండి సంజయ్ ఎద్దేవా చేశారు. కాంగ్రెస్‌ను 'రాక్షస సేన'గా అభివర్ణించిన ఆయన, ఆ పార్టీ నాయకులు వేసే నిందలన్నింటినీ ప్రధాని నరేంద్ర మోదీ గరళ కంఠుడిలా భరిస్తున్నారని అన్నారు. “మీ ముత్తాత, నానమ్మ, తండ్రి హయాంలో సర్ చేపట్టినప్పుడు కాంగ్రెస్ పార్టీ ఎందుకు వ్యతిరేకించలేదు?” అని రాహుల్ గాంధీని నిలదీశారు. రాహుల్ గాంధీకి 'సర్' అంశంపై కనీస అవగాహన కూడా లేదని విమర్శించారు. ఈ దేశ పౌరులే ప్రధానిని, ఎంపీలను, ఎమ్మెల్యేలను ఎన్నుకుంటారని.. బంగ్లాదేశ్, పాకిస్తాన్ లాంటి 'కోన్ కిస్కా' గాళ్లు ఇక్కడి ప్రధానిని, సీఎంను నిర్ణయిస్తామంటే ఊరుకునేది లేదని తీవ్రంగా హెచ్చరించారు. అట్లాంటి వారిని ఉరికించి ఉరికించి కొడతామని హెచ్చరించారు. సీఏఏ (CAA), ఎన్ఆర్సీ (NRC)లను వ్యతిరేకిస్తున్న కాంగ్రెస్ పార్టీని ప్రజలు తరిమి కొట్టాలని పిలుపునిచ్చారు.

బీఆర్ఎస్, కాంగ్రెస్ తీరుపై మండిపాటు

SIR అమల్లోకి తేవాలని కోరుతూ కేంద్ర హోంశాఖ మంత్రి అమిత్ షా పాదయాత్ర చేపడితే లక్షలాది మంది ప్రజలు తరలివచ్చి మద్దతు తెలిపారని బండి సంజయ్ గుర్తుచేశారు. ఆ యాత్రలో అమిత్ షాకు వందనం చేసినందుకు తనను, రామచంద్రరావును బీఆర్ఎస్, కాంగ్రెస్ నాయకులు కించపరుస్తూ సోషల్ మీడియాలో ట్రోల్ చేస్తున్నారని మండిపడ్డారు. మాకు మీలాగా మందుపోసే కల్చర్ గానీ, డబ్బు సంచులు ఢిల్లీ పెద్దలకు పంపే సంస్కృతి గానీ లేదని విమర్శించారు. కాంగ్రెస్, బీఆర్ఎస్ నేతలను ప్రజలు ఉరికించి కొట్టే రోజులు త్వరలోనే రాబోతున్నాయని అన్నారు.

తెలంగాణలో ఎగిరేది కాషాయ జెండానే

తెలంగాణ గడ్డపై ఇకపై రంగు రంగుల జెండాలకు తావులేదని, ఎగరబోయేది ఒక్క కాషాయ జెండానే అని బండి సంజయ్ ధీమా వ్యక్తం చేశారు. తెలంగాణ ప్రజలంతా కాషాయ జెండా వైపే మొగ్గు చూపుతున్నారని, రామచంద్రరావు నాయకత్వంలో రాష్ట్రంలో బీజేపీని ఖచ్చితంగా అధికారంలోకి తీసుకొస్తామని స్పష్టం చేశారు. ప్రస్తుతం రాష్ట్రంలో విద్యుత్ లేక, సరిపడా నీళ్లు లేక ప్రజలు తీవ్రంగా అల్లాడిపోతున్నారని ఆవేదన వ్యక్తం చేశారు. పెన్షన్లు రాక వృద్ధులు, ఉద్యోగాలు లేక నిరుద్యోగులు, మహిళలతో సహా అన్ని వర్గాల ప్రజలు కాంగ్రెస్ పాలనలో బాధితులుగా మారారని విమర్శించారు. ప్రజా సమస్యలను పూర్తిగా గాలికొదిలేసి కాంగ్రెస్ నేతలు ఢిల్లీకి పోయి 'సర్' పేరుతో డ్రామాలు ఆడుతున్నారని ఆగ్రహం వ్యక్తం చేశారు. కాంగ్రెస్ నేతలు ఇలాగే ప్రవర్తిస్తే త్వరలోనే ఎన్ఆర్సీ (NRC)ని తీసుకొచ్చి తీరుతామని బండి సంజయ్ స్పష్టం చేశారు.

KTR: కరువు పరిస్థితులకు రేవంత్ రెడ్డిదే బాధ్యత.. రైతులకు రూ.60 వేలు చెల్లించాలి: కేటీఆర్

Shailender — Mon, 2 Nov 2026 08:30:08 +0530

ఆదిలాబాద్: రాష్ట్రంలో నెలకొన్న కరువు పరిస్థితులకు బాధ్యత వహిస్తూ, ఎన్నికల సమయంలో రైతులకు ఇచ్చిన హామీ మేరకు ఎగ్గొట్టిన రైతుబంధు బకాయిలను కాంగ్రెస్ ప్రభుత్వం వెంటనే చెల్లించాలని బీఆర్ఎస్ వర్కింగ్ ప్రెసిడెంట్ కేటీఆర్ డిమాండ్ చేశారు. ఎగ్గొట్టిన 3 విడతల రైతుబంధుతో పాటు ప్రస్తుత యాసంగి పంట పెట్టుబడి సాయాన్ని కలిపి ఎకరానికి రూ.60 వేల చొప్పున ప్రతి రైతు ఖాతాలో వెంటనే జమ చేయాలన్నారు. రైతులతో పాటు రైతు కూలీలకు కూడా ఇచ్చిన హామీ మేరకు ఆర్థిక సహాయం అందించాలన్నారు.

ఇది కాలం తెచ్చిన కరువు కాదు.. కాంగ్రెస్ ప్రభుత్వం తెచ్చిన కరువని కేటీఆర్ అన్నారు. తెలంగాణ కంటే రెండింతల వర్షపాతం లోటు ఉన్న ఆంధ్రప్రదేశ్, కర్ణాటక రాష్ట్రాల్లో ఇలాంటి కరువు పరిస్థితులు లేవని, అన్ని వనరులు, సాగునీటి అవకాశాలు అందుబాటులో ఉన్న తెలంగాణలో మాత్రం ప్రభుత్వ వైఫల్యం కారణంగా రైతులు కరువు కోరల్లో చిక్కుకున్నారని విమర్శించారు. ఎల్‌నినో పేరు చెప్పి బాధ్యత నుంచి తప్పించుకునే పరిస్థితి లేదని, రాష్ట్రంలో నెలకొన్న కరువుకు కాంగ్రెస్ ప్రభుత్వమే బాధ్యత వహించాలని ఆదిలాబాద్ రైతు గర్జన సభలో కేటీఆర్ డిమాండ్ చేశారు.

రైతుబంధు రూ.15 వేలకు పెంచుతానని మోసం

కేసీఆర్ ప్రభుత్వం రైతులకు ఎకరానికి ఏడాదికి రూ.10 వేలు రైతుబంధు అందిస్తే, తాను అధికారంలోకి వస్తే రూ.15 వేలు ఇస్తానని రేవంత్ రెడ్డి హామీ ఇచ్చారని కేటీఆర్ గుర్తుచేశారు. రూ.15 వేల రైతుబంధు ఇస్తానని చెప్పి రైతులను మోసం చేసిన దుర్మార్గుడు ఎవరో ప్రజలు ఆలోచించాలని అన్నారు. రైతు డిక్లరేషన్ పేరుతో కాంగ్రెస్ అనేక హామీలు ఇచ్చిందని, 2022 మే 6న వరంగల్ సభలో రాహుల్ గాంధీ రైతులకు ఇచ్చిన హామీలను గుర్తుచేశారు. మేం హామీ ఇస్తే చేసి చూపిస్తామని రాహుల్ గాంధీ చెప్పారని, కానీ అధికారంలోకి వచ్చిన తర్వాత ఆ హామీలను అమలు చేయడంలో రాష్ట్ర ప్రభుత్వం విఫలమైందని విమర్శించారు.

ఇది కాలం తెచ్చిన కరువు కాదు.. కాంగ్రెస్ ప్రభుత్వం తెచ్చిన కృత్రిమ కరువు ఆదిలాబాద్‌ వేదికగా జరిగిన 'రైతు గర్జన' సభలో కాంగ్రెస్ ప్రభుత్వ వైఫల్యాలపై నిప్పులు చెరిగిన బీఆర్ఎస్ వర్కింగ్ ప్రెసిడెంట్ @KTRBRS. సభలో కేటీఆర్ ప్రసంగంలోని కీలక ముఖ్యాంశాలు: 🔹కాంగ్రెస్ ప్రభుత్వం ఎగ్గొట్టిన మూడు విడతల రైతుబంధు బకాయిలతో పాటు, ప్రస్తుత యాసంగి పంట పెట్టుబడి సాయాన్ని కలిపి ఎకరానికి వెంటనే రూ.60,000 చొప్పున ప్రతి రైతు ఖాతాలో జమ చేయాలి. రైతు కూలీలకు ఇచ్చిన ఆర్థిక సాయం హామీని సైతం అమలు చేయాలి. 🔹తెలంగాణ కంటే రెండింతల వర్షపాతం లోటు ఉన్న ఆంధ్రప్రదేశ్, కర్ణాటక రాష్ట్రాల్లో కరువు పరిస్థితులు లేవు. పుష్కలంగా నీటి వనరులున్నా.. కేవలం కాంగ్రెస్ అసమర్థత వల్లే తెలంగాణ రైతులు కరువు కోరల్లో చిక్కుకున్నారు. 🔹గోదావరి నుంచి 750 టీఎంసీల నీళ్లు సముద్రం పాలవుతున్నా, కన్నెపల్లి పంప్‌హౌస్ నుంచి ఒక్క చుక్క నీటిని కూడా ఎత్తిపోయడం లేదు. కరెంట్ లేదు, సాగునీరు లేదు, పరిశ్రమలకు ప్రోత్సాహం లేదు. కాంగ్రెస్ పాలనలో రాష్ట్రంలోని అన్ని రంగాలు సంక్షోభంలో పడ్డాయి.
— BRS Party (@BRSparty) November 1, 2026

రూ.2 లక్షల రుణమాఫీ ఏమైంది? రైతుబంధు ఏమైంది? తులం బంగారం ఏమైంది? ఫీజు రీయింబర్స్‌మెంట్ ఏమైంది? అని ప్రశ్నించారు. కాంగ్రెస్ అధికారంలోకి వచ్చి 1000 రోజులు దాటినా ఒక్క హామీని కూడా పూర్తిస్థాయిలో అమలు చేయలేకపోయిందన్నారు. రైతులకు 3 విడతల రైతుబంధు ఎగ్గొట్టారని, నాలుగు పంటలకు సంబంధించిన పెట్టుబడి సాయం అందించాల్సి ఉందని తెలిపారు. 21 లక్షల మంది రైతులకు రైతుబంధు అమలు చేయాలని, కౌలు రైతులకు ఆర్థిక సహాయం చేస్తామన్న హామీని నిలబెట్టుకోవాలని కేటీఆర్ డిమాండ్ చేశారు. 36 వేల మందికి ఇందిరమ్మ ఆత్మీయ భరోసా అందిస్తామన్న హామీ ఏమైందని ప్రశ్నించారు.

రైతుబంధు దేవుడెరుగు.. నేడు రైతులు వ్యవసాయం చేసుకునే పరిస్థితి కూడా లేకుండా పోయిందని ఆవేదన వ్యక్తం చేశారు. పంటలు వేయడానికి రైతుల నుంచి సెల్ఫ్ డిక్లరేషన్ తీసుకుంటున్నారని, దుక్కి దున్నొద్దు.. భూములను పడావు పెట్టుకోవాలని చెప్పే పరిస్థితి వచ్చిందని విమర్శించారు.

రైతుబంధు బంద్ అయింది కానీ రాహుల్ బంధు మాత్రం బంద్ కాలేదని ఎద్దేవా చేశారు. రైతులకు డబ్బులు ఇవ్వడానికి నిధులు లేవని చెబుతున్న ప్రభుత్వం ఢిల్లీకి మాత్రం డబ్బులు క్రమం తప్పకుండా పంపుతోందని విమర్శించారు. రైతుల ఆశలు అడియాశలయ్యాయని, రైతులను ఆదుకోవాల్సిన కాంగ్రెస్ ప్రభుత్వం వారిని మరింత సంక్షోభంలోకి నెట్టిందన్నారు.

రాష్ట్రంలోని అన్ని రంగాలకు హాలిడే

తెలంగాణలో నీళ్లు బంద్, పరిశ్రమలు బంద్, కరెంట్ బంద్, చివరకు వ్యవసాయం కూడా బంద్ అయ్యే పరిస్థితిని కాంగ్రెస్ ప్రభుత్వం తీసుకొచ్చిందని విమర్శించారు. రాష్ట్రంలో అన్ని రంగాలకు హాలిడే ప్రకటించినట్లుగా పాలన సాగుతోందని అన్నారు. మంచిగా ఉన్న విద్యుత్ వ్యవస్థను కాంగ్రెస్ ప్రభుత్వం ఆగం చేసిందని, పరిశ్రమలు మూతపడే పరిస్థితి తీసుకొచ్చిందని విమర్శించారు. రైతులకు సాగునీరు లేదు, పరిశ్రమలకు అవసరమైన విద్యుత్, ప్రోత్సాహం లేదు.. రాష్ట్రం అన్ని రంగాల్లో సంక్షోభాన్ని ఎదుర్కొంటోందన్నారు.

రాష్ట్రాన్ని నడుపుతున్నది నల్లమల పిల్లి అని వ్యాఖ్యానించారు. రైతులకు, ప్రజలకు ఇచ్చిన హామీలను అమలు చేయకుండా పాలన సాగిస్తున్నారని విమర్శించారు. రాష్ట్రంలో నెలకొన్న ఈ పరిస్థితుల్లో కాంగ్రెస్ ప్రభుత్వానికే హాలిడే ప్రకటిస్తే ప్రజల గోస తీరుతుందనే విధంగా పరిస్థితి తయారైందన్నారు.

వర్షపాతం లోటు కంటే ప్రభుత్వ వైఫల్యమే కారణం

తెలంగాణలో కరువు పరిస్థితులు ఏర్పడటానికి ప్రకృతి వైపరీత్యాల కంటే ప్రభుత్వ నిర్లక్ష్యమే ప్రధాన కారణమని కేటీఆర్ అన్నారు. తెలంగాణ కంటే రెండింతల వర్షపాతం లోటు ఉన్న ఆంధ్రప్రదేశ్, కర్ణాటక రాష్ట్రాల్లో కరువు పరిస్థితులు లేవని, తెలంగాణలో మాత్రం సాగునీటి వనరులు అందుబాటులో ఉన్నా రైతులు ఇబ్బందులు పడుతున్నారని అన్నారు.

ఇది ఎల్‌నినో తెచ్చిన కరువు కాదని, కాంగ్రెస్ ప్రభుత్వం తెచ్చిన కరువని స్పష్టం చేశారు. కరువు రాక్షసిని రేవంత్ రెడ్డి మళ్లీ తెలంగాణకు తీసుకొచ్చారని విమర్శించారు. కాంగ్రెస్ అంటేనే కరువు, కన్నీళ్లు, వలసలు అనే పరిస్థితి ఏర్పడిందన్నారు.

కేసీఆర్ పాలనలో రైతుల పరిస్థితి బ్రహ్మాండంగా ఉండేదని, రైతులు పుట్లకొద్దీ వడ్లు పండించారని గుర్తుచేశారు. ఇప్పుడు మాత్రం రైతులు పంటలు వేయాలంటే భయపడే పరిస్థితి ఏర్పడిందన్నారు. ఉమ్మడి ఆదిలాబాద్ జిల్లాలో 108 మంది రైతులు ఆత్మహత్య చేసుకోవడం బాధాకరమని పేర్కొన్నారు.

కన్నెపల్లి పంప్‌హౌస్ నుంచి ఎత్తిపోయడం లేదు

గోదావరి జలాలను వినియోగించుకోవడంలో రేవంత్ రెడ్డి ప్రభుత్వం పూర్తిగా విఫలమైందని కేటీఆర్ విమర్శించారు. కన్నెపల్లి పంప్‌హౌస్ నుంచి లక్ష క్యూసెక్కుల నీళ్లు కిందికి పోతున్నా వాటిని ఎత్తిపోయడానికి ప్రభుత్వం చర్యలు తీసుకోవడం లేదన్నారు. గోదావరి నుంచి 750 టీఎంసీల నీళ్లు వచ్చినా ఒక్క చుక్క కూడా ఎత్తిపోయని దుర్మార్గపు పరిస్థితి నెలకొందని విమర్శించారు. నీళ్లు ఎత్తిపోయడానికి ప్రభుత్వం ఎందుకు చర్యలు తీసుకోవడం లేదని ప్రశ్నించారు.

కన్నెపల్లి దగ్గర నీళ్లు ఎత్తిపోయవచ్చని రిటైర్డ్ ఇంజినీర్లు సూచించారని, కానీ రేవంత్ రెడ్డి వారిపై అడ్డగోలుగా మాట్లాడారని అన్నారు. నీళ్లు ఎత్తిపోయవచ్చని ఇంజినీర్లు చెబితే వారికి బెల్ట్ ట్రీట్‌మెంట్ ఇవ్వాలన్నట్లుగా మాట్లాడడం ఏమిటని ప్రశ్నించారు. నీళ్లు ఇస్తే యూరియా ఇవ్వాలి.. పంటలు పండితే కొనుగోలు చేయాలి.. రైతులకు బాధ్యతగా అండగా నిలవాలి. ఈ బాధ్యతల నుంచి తప్పించుకోవడానికే కాంగ్రెస్ ప్రభుత్వం సాగునీరు అందించడంలో నిర్లక్ష్యం చేస్తోందని కేటీఆర్ ఆరోపించారు.

చంద్రబాబు కుప్పం వరకు నీళ్లు తీసుకెళ్తుంటే తెలంగాణలో మాత్రం సాగునీటి ప్రాజెక్టులను నిర్లక్ష్యం చేస్తున్నారని అన్నారు. గోదావరి జలాలను కిందికి వదిలి తెలంగాణను ఎడారిగా మార్చే పరిస్థితి తీసుకొచ్చారని విమర్శించారు. కాళేశ్వరం, పాలమూరు ప్రాజెక్టులను సక్రమంగా వినియోగిస్తే ఒక్క ఎకరం కూడా ఎండిపోయేది కాదు. కాళేశ్వరం, పాలమూరు–రంగారెడ్డి ప్రాజెక్టులను సక్రమంగా వినియోగించుకుని ఉంటే తెలంగాణలో ఒక్క ఎకరం కూడా ఎండిపోయే పరిస్థితి ఉండేది కాదని కేటీఆర్ అన్నారు. కాళేశ్వరం ప్రాజెక్టు కరువుకు కల్పతరువు లాంటిదని పేర్కొన్నారు.

కాళేశ్వరం ప్రాజెక్టుపై రాజకీయ కక్షతో వ్యవహరించకుండా రైతుల ప్రయోజనాల కోసం ఉపయోగించుకోవాలని సూచించారు. మాపై ఉన్న అక్కసును కాళేశ్వరం ప్రాజెక్టుపై తీర్చుకోవద్దని అన్నారు. బీఆర్ఎస్ హయాంలో చనాకా–కొరాటా ప్రాజెక్టు ట్రయల్ రన్ పూర్తయిందని, అయినప్పటికీ కాంగ్రెస్ ప్రభుత్వం కాలువల నిర్మాణం చేపట్టడం లేదని విమర్శించారు. సాగునీటి ప్రాజెక్టులను పూర్తి చేసి రైతులకు నీళ్లు అందించడంలో ప్రభుత్వానికి చిత్తశుద్ధి లేదన్నారు.

కేసీఆర్ అంటే కాలువలు, చెరువులు, రిజర్వాయర్లు.. కాంగ్రెస్ అంటే కరువు అని వ్యాఖ్యానించారు. ఆదిలాబాద్ పరిశ్రమలను నిర్వీర్యం చేస్తున్నారు.. గుజరాత్‌కు తరలిస్తున్నా ప్రశ్నించరా?. ఆదిలాబాద్ జిల్లాలో ఉన్న పరిశ్రమలను కాపాడడంలో కాంగ్రెస్, బీజేపీ నాయకులు విఫలమయ్యారని కేటీఆర్ విమర్శించారు. ఆదిలాబాద్ సీసీఐ ఫ్యాక్టరీని నిర్వీర్యం చేసి, తుక్కు కింద మార్చి విక్రయించే పరిస్థితి తీసుకొచ్చారని అన్నారు.

తెలంగాణకు చెందిన పరిశ్రమలను గుజరాత్‌కు తరలిస్తున్నా ఆదిలాబాద్‌కు చెందిన కాంగ్రెస్, బీజేపీ నాయకులు ఎందుకు ప్రశ్నించడం లేదని నిలదీశారు. స్థానిక పరిశ్రమలను కాపాడాల్సిన బాధ్యత ప్రజాప్రతినిధులపై లేదా అని ప్రశ్నించారు. ఆదిలాబాద్ వంటి వెనుకబడిన ప్రాంతానికి మెడికల్ కాలేజీ, నర్సింగ్ కాలేజీ, జాతీయ విద్యాసంస్థలు తీసుకురావడంలో కేంద్ర ప్రభుత్వం విఫలమైందని విమర్శించారు. తెలంగాణకు ఒక్క జాతీయ ప్రాజెక్టు కూడా మోదీ ప్రభుత్వం ఇవ్వలేదన్నారు.

ప్రతి పేదవాడి ఖాతాలో రూ.15 లక్షలు వేస్తామని ప్రధాని మోదీ హామీ ఇచ్చారని, ఆ హామీ ఏమైందని ప్రశ్నించారు. బీజేపీకి ఓటు వేసి 13 ఏళ్లు గడిచినా తెలంగాణకు, ఆదిలాబాద్‌కు ఏం మేలు జరిగిందో చెప్పాలని డిమాండ్ చేశారు. బొగ్గు కుంభకోణాలతో సింగరేణిని దివాలా తీయిస్తున్నారు. సింగరేణి సంస్థను కాంగ్రెస్ ప్రభుత్వం ఆర్థికంగా దెబ్బతీస్తోందని కేటీఆర్ విమర్శించారు. బొగ్గు కుంభకోణాలతో సింగరేణిని దివాలా తీసే పరిస్థితికి తీసుకొచ్చారని ఆరోపించారు.

తెలంగాణకు కీలకమైన సింగరేణి సంస్థను కాపాడాల్సిన ప్రభుత్వం దాని ప్రయోజనాలను దెబ్బతీస్తోందని అన్నారు. బీఆర్ఎస్ హయాంలో మెరుగ్గా ఉన్న విద్యుత్ వ్యవస్థను కాంగ్రెస్ ప్రభుత్వం అస్తవ్యస్తం చేసిందని విమర్శించారు. రాష్ట్రంలో పరిశ్రమలు, విద్యుత్, సాగునీరు వంటి కీలక రంగాలు సంక్షోభంలో పడుతున్నాయని, తెలంగాణ అభివృద్ధికి అవసరమైన పారిశ్రామిక వాతావరణాన్ని కాంగ్రెస్ ప్రభుత్వం దెబ్బతీస్తోందన్నారు.

బడేభాయ్, చోటేభాయ్ కలిసి తెలంగాణకు అన్యాయం

బీజేపీ, కాంగ్రెస్ పార్టీలు తోడుదొంగలని కేటీఆర్ విమర్శించారు. తెలంగాణలో రెండు పార్టీలు పరస్పరం పోరాడుతున్నట్లు నటిస్తాయని, ఢిల్లీలో మాత్రం కలిసి పనిచేస్తాయని ఆరోపించారు. బడేభాయ్, చోటేభాయ్ కలిసి తెలంగాణకు అన్యాయం చేస్తున్నారని వ్యాఖ్యానించారు. ఇది డబుల్ ఇంజిన్ ప్రభుత్వం కాదని.. జుమ్లా, హమ్లా అని ఎద్దేవా చేశారు. రాష్ట్రంలో రైతులు ఎదుర్కొంటున్న కరువు పరిస్థితులపై బీజేపీ నాయకులు రేవంత్ రెడ్డిని గట్టిగా నిలదీశారా అని ప్రశ్నించారు. రైతులకు రావాల్సిన నిధులు, సాగునీటి సమస్యలు, పరిశ్రమల పరిస్థితిపై కేంద్ర, రాష్ట్ర ప్రభుత్వాలు బాధ్యత వహించాలని డిమాండ్ చేశారు.

రేవంత్ రెడ్డికి బూతులు తప్ప మరేమీ తెలియదు

రైతుల సమస్యలకు పరిష్కారం చూపాల్సిన ముఖ్యమంత్రి రేవంత్ రెడ్డి, బూతులు మాట్లాడటం తప్ప మరేమీ చేయడం లేదని కేటీఆర్ విమర్శించారు. రిటైర్డ్ ఇంజినీర్లపై అనుచిత వ్యాఖ్యలు చేయడం, సాగునీటి సమస్యలపై విమర్శలు చేసిన వారిని బెదిరించే ధోరణి సరికాదన్నారు. రైతుబంధు బకాయిలు చెల్లించకుండా, సాగునీరు అందించకుండా రైతులను ఇబ్బందులకు గురిచేస్తున్నారని అన్నారు. ఢిల్లీకి మాత్రం డబ్బులు క్రమం తప్పకుండా పంపుతున్నారని, రైతులకు మాత్రం నిధులు ఇవ్వడం లేదని విమర్శించారు.

రిమ్స్ ఆసుపత్రిలో చిన్నారుల మృతి.. బాధిత కుటుంబాలకు కేటీఆర్ ఆర్థిక సహాయం

గత నెలలో ఆదిలాబాద్ జిల్లా రిమ్స్ ప్రభుత్వ ఆసుపత్రిలో జరిగిన అగ్నిప్రమాదంలో ఐదుగురు చిన్నారులు మృతి చెందడం పట్ల కేటీఆర్ తీవ్ర విచారం వ్యక్తం చేశారు. మృతి చెందిన చిన్నారుల కుటుంబాలను ఆదుకునేందుకు బీఆర్ఎస్ పార్టీ తరఫున ఒక్కో కుటుంబానికి రూ.లక్ష చొప్పున ఆర్థిక సహాయం అందించారు. ప్రభుత్వ ఆసుపత్రిలో కనీస భద్రత, నిర్వహణ సరిగా లేకపోవడంపై ఆందోళన వ్యక్తం చేశారు. రిమ్స్ ఆసుపత్రిలో ఎలుకలు కొరికి చిన్నారులు చనిపోతున్నారనే వార్తలు రావడం ప్రభుత్వ ఆసుపత్రుల నిర్వహణ పరిస్థితికి అద్దం పడుతోందని విమర్శించారు. ప్రభుత్వ ఆసుపత్రుల్లో రోగులకు, చిన్నారులకు మెరుగైన వైద్య సేవలు, భద్రత కల్పించాల్సిన బాధ్యత ప్రభుత్వంపై ఉందన్నారు.

ఒక్క సంవత్సరం ధైర్యంగా ఉండండి..
తెలంగాణ రైతులు అధైర్యపడవద్దని, ఒక్క సంవత్సరం ధైర్యంగా ఉండాలని కేటీఆర్ పిలుపునిచ్చారు. మళ్లీ కేసీఆర్ ముఖ్యమంత్రి కాబోతున్నారని, రైతులను తిరిగి ఆదుకుంటామని భరోసా ఇచ్చారు. కేసీఆర్ పాలనలో రైతులకు సాగునీరు, ఉచిత విద్యుత్, రైతుబంధు వంటి పథకాలతో భరోసా లభించిందని గుర్తుచేశారు. ప్రస్తుతం రైతులు ఎదుర్కొంటున్న కరువు, ఆర్థిక సంక్షోభానికి కాంగ్రెస్ ప్రభుత్వమే బాధ్యత వహించాలని స్పష్టం చేశారు.

రైతులకు ఇచ్చిన హామీలను అమలు చేయాలని, ఎగ్గొట్టిన మూడు విడతల రైతుబంధు బకాయిలతో పాటు యాసంగి పెట్టుబడి సాయాన్ని కలిపి ఎకరానికి రూ.60 వేల చొప్పున చెల్లించాలని డిమాండ్ చేశారు. రైతు కూలీలకు ఇచ్చిన హామీలను కూడా వెంటనే అమలు చేయాలని కోరారు. రైతులకు న్యాయం జరిగే వరకు బీఆర్ఎస్ వారి పక్షాన పోరాటం కొనసాగిస్తుందని కేటీఆర్ స్పష్టం చేశారు.

ఆదిలాబాద్ జిల్లాపై కేటీఆర్ వ్యాఖ్యలు

కొమురం భీమ్ పుట్టిన గడ్డ ఆదిలాబాద్ అని, తెలంగాణ కాశ్మీర్‌గా పేరొందిన ఈ జిల్లా ప్రకృతి అందాలకు తలమానికమని కేటీఆర్ అన్నారు. అడవుల జిల్లా, ఆదివాసీల ఖిల్లా, తెల్ల బంగారం పండించే నేల అయిన ఆదిలాబాద్‌కు రావడం సంతోషంగా ఉందన్నారు. కేసీఆర్ పాలనలో ఆదిలాబాద్ జిల్లాలో అనేక అభివృద్ధి కార్యక్రమాలు జరిగాయని గుర్తుచేశారు. ఆదిలాబాద్ పట్టణంలోని డైట్ కళాశాల ఆవరణలో ఏర్పాటు చేసిన రైతు గర్జన సభకు చేరుకున్న కేటీఆర్‌కు పార్టీ నాయకులు, కార్యకర్తలు స్వాగతం పలికారు.

Kavitha Kalvakuntla: చరిత్రలో తొలిసారి రైతులను పంటలు వేయొద్దన్న అసమర్థ సీఎం.. ఇంద్రవెల్లి సభలో కవిత ఘాటు విమర్శలు

Satyaprasad Bandaru — Fri, 30 Oct 2026 19:22:18 +0530

Kavitha Kalvakuntla : ఆదివాసీల వీరభూమి, పోరాటాలకు పురిటిగడ్డ అయిన ఇంద్రవెల్లి సాక్షిగా తెలంగాణ రక్షణ సేన అధినేత్రి కల్వకుంట్ల కవిత కాంగ్రెస్, బీఆర్ఎస్, బీజేపీలపై సంచలన విమర్శలు చేశారు. ఇంద్రవెల్లి వేదికగా తెలంగాణ రక్షణ సేన పాంచజన్య సంకల్ప సభ నిర్వహిస్తోంది. ఈ సభలో స్వాతంత్ర్యం కోసం, హక్కుల కోసం ప్రాణాలర్పించిన రామ్ జీ గొండు, వన్నెల ఎల్లన్న, వెడమ రాము, జల్-జమీన్-జంగల్ వీరుడు కొమురం భీమ్, శిడెం శింబు, కొమురం సూరుల స్ఫూర్తికి పాదాభివందనం చేస్తూ కవిత తన ప్రసంగాన్ని ప్రారంభించారు. ఆనాడు తమ పంటలను కాపాడుకునేందుకు సమావేశమైన ఆదివాసీలపై కాల్పులు జరిపిన చరిత్ర కాంగ్రెస్‌దని మండిపడ్డారు.

రేవంత్ రెడ్డి తీరుపై విమర్శలు

రైతులను, ఆదివాసీలను కాంగ్రెస్ ప్రభుత్వం దారుణంగా మోసం చేసిందని కవిత ఆరోపించారు. అధికారంలోకి రాగానే ఇంద్రవెల్లి అమరుల కుటుంబాలకు రూ. 25 లక్షలు ఇస్తామన్న సీఎం రేవంత్ రెడ్డి, కేవలం రూ. 5 లక్షలు ఇచ్చి చేతులు దులుపుకున్నారని విమర్శించారు. "చరిత్రలో రైతులను పంట వేయవద్దని చెప్పిన మొదటి ముఖ్యమంత్రి రేవంత్ రెడ్డి మాత్రమే. వ్యవసాయం తప్ప వేరే పని తెలియని రైతులకు ఏ విధంగా ఆదుకుంటారో చెప్పకుండా పంట వద్దంటే ఆయన పదవిలో ఎందుకు ఉండాలి?" అని ప్రశ్నించారు. రెండు నెలలకు ఒకసారి ఆదిలాబాద్‌కు వస్తానని చెప్పిన సీఎం, మూడేళ్లలో కేవలం రెండుసార్లు మాత్రమే వచ్చారని, ఇచ్చిన హామీల్లో ఒక్కటీ నెరవేర్చలేదని దుయ్యబట్టారు. 152 మీటర్ల ఎత్తుతో ప్రాజెక్టు కట్టి 148 మీటర్లలో నీళ్లు నిల్వ చేయకుండా, కరువు వచ్చిన తర్వాత బాయి తవ్వినట్లు ఇప్పుడు మహారాష్ట్రతో మాట్లాడటం విడ్డూరంగా ఉందని ఎద్దేవా చేశారు.

"రైతులను పంటలు వేయవద్దని చెప్పిన ముఖ్యమంత్రి అసలు ఆ పదవిలో ఎందుకు కొనసాగాలి?. చరిత్రలో మొట్టమొదటి సారి పంటలు వేయొద్దు అని చెప్పిన అసమర్థ సీఎం రేవంత్ రెడ్డి. పంటలు వేయకుండా రైతులు ఎట్లా బతకాలి?" అని ఆమె ప్రశ్నించారు.

సిరిసిల్ల, సిద్దిపేట బాబుల తర్జన భర్జన

బీఆర్ఎస్ సభపై కవిత తీవ్రస్థాయిలో ధ్వజమెత్తారు. ఆదిలాబాద్‌లో బీఆర్ఎస్ చేస్తోంది రైతు గర్జన కాదని, సిరిసిల్ల బాబు (కేటీఆర్), సిద్దిపేట బాబు (హరీష్ రావు) మధ్య ఆధిపత్య పోరులో కార్యకర్తలు పడుతున్న తర్జన భర్జన అని వ్యాఖ్యానించారు. కేసీఆర్ స్వయంగా మాటిచ్చి కూడా కొమరం భీమ్ యూనివర్సిటీని, ఇంజినీరింగ్ కాలేజీని పదేళ్లలో ఎందుకు ఇవ్వలేదో కేటీఆర్ చెప్పాలని డిమాండ్ చేశారు. సిర్పూర్ మిల్లుకు వెయ్యి కోట్లు ఇచ్చినా కార్మికులకు మేలు జరగలేదని, సిమెంట్ కార్పొరేషన్ ఆఫ్ ఇండియా, బోధన్ షుగర్ ఫ్యాక్టరీలను ఎందుకు తెరిపించలేదని నిలదీశారు.

చనఖా కొరటా ప్రాజెక్ట్ ఖర్చును రూ. 368 కోట్లనుంచి ఏకంగా రూ. 2100 కోట్లకు పెంచారని, ఈ అవినీతి సొమ్ము మాజీ మంత్రులు ఇంద్రకరణ్ రెడ్డి, జోగు రామన్న ఇళ్లకు పోయిందా అని ప్రశ్నించారు. ఆదిలాబాద్‌లో 80 లక్షల క్వింటాళ్ల పత్తి పండుతున్నా కనీసం ఒక టెక్స్‌టైల్ పార్క్ ఎందుకు నిర్మించలేదని నిలదీశారు.

Also Read: మియాపూర్ భూములు కాజేసే కుట్ర.. పోరాడినందుకు నన్ను జైలుకు పంపారు: రేవంత్ రెడ్డి

బీజేపీ మత రాజకీయం

ఆదిలాబాద్ లోని బీజేపీ ఎమ్మెల్యేలు పాయల్ శంకర్, పాల్వాయి హరీష్ లు రేవంత్ రెడ్డిపై ఈగ వాలనివ్వకుండా కాపాడుతున్నారని కవిత ఆరోపించారు. రాష్ట్రంలో హిందూ, ముస్లింలు శాంతియుతంగా ఉండాలని భావిస్తే, బీజేపీ మాత్రం మతాల మధ్య గొడవలు పెట్టి గెలవాలని చూస్తోందని హెచ్చరించారు.

'పాంచజన్యం' సభతో టీఆర్ఎస్ హామీలు

అన్ని పార్టీలు ప్రజలను మోసం చేసిన వేళ, ఒక కొత్త రాజకీయ శక్తిగా తమ ప్రాధాన్యతలను "పాంచజన్యం" రూపంలో కవిత ప్రకటించారు.
మెరుగైన ఉచిత విద్య, వైద్యం: ప్రైవేట్ రంగంలో సైతం పేదలకు ఉచితంగా నాణ్యమైన విద్య, వైద్యం అందిస్తామని హామీ ఇచ్చారు.
యువతకు రూ. 2 లక్షల నుంచి రూ. 20 కోట్లతో వ్యాపార రుణాలు: యువత ఆలోచనలకు అనుగుణంగా సొంత వ్యాపారాలు పెట్టుకునేందుకు రుణ సదుపాయం కల్పిస్తామని తెలిపారు.
రైతులకు పూర్తి మద్దతు: రైతులకు ఉచిత నీరు, కరెంట్, యూరియా అందిస్తూ వారి గౌరవాన్ని కాపాడటం.
ఆదివాసీల హక్కులు: ITDA లో జీవో 57 తో సహా 27 జీవోలను పునరుద్ధరించడం, 1972 లో ఆస్తులు కొనుగోలు చేసిన ఆదివాసీలకు న్యాయం చేయడం.
ఆరోగ్య పరిరక్షణ: రక్తహీనతతో బాధపడుతున్న ఆదివాసీ మహిళలకు పోషకాహార పథకాలు సమర్థవంతంగా అమలు చేయడం.

సీసీఐ మూతపడటానికి కారణం

ఆదిలాబాద్‌లోని ప్రతిష్టాత్మక 'సిమెంట్ కార్పొరేషన్ ఆఫ్ ఇండియా' మూతపడటానికి బీఆర్ఎస్, కాంగ్రెస్, బీజేపీ పార్టీలే కారణమని కవిత ఆరోపించారు. ఈ మూడు పార్టీలు ఉత్తర తెలంగాణ ప్రయోజనాలను విస్మరించాయని దుయ్యబట్టారు.

Also Read: ఫార్ములా ఈ రేసు కేసు.. విచారణకు హాజరు కాని కేటీఆర్- డిసెంబర్ 4కు వాయిదా

MLA Kova Lakshmi: నాడు అడవిలోకి వెళ్లాలంటే వణుకు.. నేడు ఇంత దారుణమా? కుమ్రం భీం వర్ధంతి సభలో ఎమ్మెల్యే కోవా లక్ష్మీ

Shankar Dukanam — Tue, 27 Oct 2026 16:41:33 +0530

Asifabad MLA Kova Lakshmi | ఆసిఫాబాద్: గోండు వీరుడు, ఆదివాసీలకు ఆరాధ్యుడు కుమ్రం భీం వర్ధంతి సభ వేదికగా ఎమ్మెల్యే కోవలక్ష్మి (BRS MLA) సంచలన వ్యాఖ్యలు చేశారు. గతంలో ఏజెన్సీ ప్రాంతాల్లో నక్సలిజం ఉన్నప్పుడు అడవిలోకి అడుగుపెట్టాలంటే వణికిపోయిన అటవీ శాఖ అధికారులు, ప్రస్తుతం నక్సలైట్లు, మావోయిస్టులు అంతం కావడంతో అమాయక ఆదివాసీలపై తీవ్ర ఆగడాలకు తెగబడుతున్నారని ఆసిఫాబాద్ ఎమ్మెల్యే ఆరోపించారు. ఎన్నో తరాల నుంచి అడవులను కంటికి రెప్పలా కాపాడుకుంటున్న గిరిజనులను వేధింపులకు గురి చేయడం బాధాకరం అన్నారు. ప్రభుత్వం తీరు ఎలా ఉందంటే ఏజెన్సీ ప్రాంతంలో మనుషుల ప్రాణాల కంటే జంతువులకే ఎక్కువ ప్రాధాన్యత ఇస్తున్నట్లుగా ఉందంటూ ధ్వజమెత్తారు.

అటవీ ప్రాంతాల్లో కనీస మౌలిక సదుపాయాలు కల్పించకుండా అటవీశాఖ అధికారులు అడ్డుపడుతున్నారని కోవా లక్ష్మీ ఆరోపించారు. ప్రసిద్ధ ఆదివాసీ క్షేత్రమైన జంగూబాయి దేవస్థానానికి మహారాష్ట్ర ప్రభుత్వం తమ పరిధిలో బీటీ రోడ్డు, వంతెన నిర్మించిందని తెలిపారు. కానీ తెలంగాణ వైపు ఆసిఫాబాద్ నుంచి రోడ్డు మంజూరైనా అటవీ శాఖ అధికారులు పనులను నిలిపివేశారని కోవా లక్ష్మీ ఆరోపించారు. మహారాష్ట్ర ప్రభుత్వానికి, తెలంగాణ ప్రభుత్వానికి వేర్వేరు చట్టాలు ఉంటాయా అని ఆమె నిలదీశారు. సరైన రహదారులు లేక వర్షాకాలంలో గర్భిణులను మంచాలపై మోసుకెళ్లాల్సిన దుస్థితి నెలకొందని.. మంగి, గుండాల వంటి ప్రాంతాలకు దారి లేకపోతే కనుక అక్కడ నివసించే ప్రజలను రోడ్డు మార్గం, సౌకర్యాలు ఉండే వేరే ప్రాంతాలకు తరలించాలని ప్రభుత్వాన్ని ఆమె డిమాండ్ చేశారు.

ఆసిఫాబాద్ జిల్లాపై నిధుల కేటాయింపులో తీవ్ర వివక్ష జరుగుతోందని బీఆర్ఎస్ ఎమ్మెల్యే కోవా లక్ష్మీ నిలదీశారు. అత్యధికంగా గిరిజన జనాభా ఉండే ఆసిఫాబాద్‌ ప్రాంతానికి గిరిజన సంక్షేమ నిధుల కింద రూ. 9 కోట్లు మాత్రమే కేటాయించి, తక్కువ జనాభా ఉన్న మంచిర్యాల జిల్లాకు రూ. 25 కోట్లు ఇవ్వడానికి కారణం ఏంటని ఈ సందర్భంగా ఆమె ప్రశ్నించారు. అడవి పంది చనిపోతే గిరిజనులపై రూ. 3 లక్షల జరిమానా విధించే అటవీశాఖ అధికారులు, ఒకవేళ ఎలుగుబంటి దాడిలో తీవ్రంగా గాయపడి ఆసుపత్రి పాలైన నిరుపేద గిరిజనుడికి మాత్రం ఇప్పటివరకు పరిహారం అందించకపోవడం సరికాదని హితవు పలికారు.

సమస్యలను పరిష్కరించి ప్రజలకు సేవ చేయలేనప్పుడు మంత్రి పదవులు ఉండి దండగ అని కాంగ్రెస్ నేతలను ఉద్దేశించి ఘాటుగా విమర్శించారు. అయితే మంత్రులు సీతక్క, అడ్లూరి లక్ష్మణ్‌లపై తనకు వ్యక్తిగతంగా ఎలాంటి వ్యతిరేకత లేదని చెబుతూనే ఆదివాసీలు, వెనుకబడిన తరగతుల వారికి న్యాయం చేయడం లేదన్నారు. గతంలో కరోనా వ్యాప్తి సమయంలో నాటి సీఎం, బీఆర్ఎస్ అధినేత కేసీఆర్ ప్రజలను ఆదుకున్నారని గుర్తుచేశారు. ప్రస్తుతం ఏజెన్సీలో నెలకొన్న కరువు, తాగునీటి ఎద్దడి నుంచి రక్షించేందుకు పంచాయతీరాజ్ శాఖ మంత్రిగా ఉన్న సీతక్క ప్రత్యేకంగా నిధులు మంజూరు చేయాలని విజ్ఞప్తి చేశారు. తన వ్యాఖ్యలు ప్రభుత్వంపై తాను చేస్తున్న విమర్శలు కాదని, తమ ప్రాంతానికి తగిన న్యాయం జరిగి నిధులు రావాలనేదే తన ఉద్దేశమని ఎమ్మెల్యే కోవలక్ష్మి స్పష్టం చేశారు.

Dasara Holidays: బాసర ట్రిపుల్ ఐటీకి దసరా సెలవులు పొడిగింపు, విద్యార్థులు ఇంటిదారి.. కారణం ఏంటంటే

Shankar Dukanam — Sun, 25 Oct 2026 17:24:26 +0530

బాసర: నిర్మల్ జిల్లా బాసరలోని రాజీవ్ గాంధీ వైజ్ఞానిక సాంకేతిక విశ్వవిద్యాలయం (RGUKT - ట్రిపుల్ ఐటీ) క్యాంపస్‌లో ఎన్‌నినో కారణంగా నీటి కొరత ఏర్పడింది. జీవనదిగా పేరున్న గోదావరి నది ప్రవాహం తగ్గుతోంది. మరోవైపు భూగర్భ జలాలు కూడా అడుగంటిపోతున్నాయి. ప్రతిరోజూ గోదావరి నుంచి ప్రత్యేక పైప్‌లైన్ ద్వారా సమీప చెరువుల్లోకి నీటిని మళ్లించి, క్యాంపస్‌లో ఉన్న వేలాది మంది విద్యార్థుల నిత్యకృత్యాలు, తాగునీటి అవసరాలకు వినియోగించేవారు. అయితే గత నెల రోజులుగా క్యాంపస్‌కు నీటి సరఫరాలో సమస్యలు మొదలయ్యాయి. దసరా తరువాత క్లాసులు తిరిగి ప్రారంభం కావాల్సి ఉండగా ఆదివారం వరకు సెలవులు పొడిగించారు. ఆన్‌లైన్ క్లాసులు ప్రారంభమవుతాయని, తదుపరి నోటీసు వచ్చే వరకు విద్యార్థులు ఇంటి నుంచే క్లాసులకు హాజరు కావాలని వర్సిటీ సూచించింది.

కారణం ఎల్‌నినో కాదు.. అసలేం జరిగిందంటే..

ఎల్‌నినో కారణం కాదని, మిషన్ భగీరథ అధికారుల నిర్లక్ష్యం వల్ల కృతిమ నీటి కొరత అని తెలుస్తోంది. బాసర ట్రిపుల్ ఐటీకి గోదావరి నుండి నీటి సరపరా చేసే ఇన్ టెక్ వెల్ మోటర్లు 3 నెలల క్రితం పాడవగా.. వాటిని మరమ్మత్తు చేయించడంలో అధికారులు నిర్లక్ష్యం వహించారు. ఆ కారణంగానే బాసర ట్రిపుల్ ఐటీకి నీటి సరపరా నిలిచిపోయిందని తెలుస్తోంది. ఇన్ టెక్ వెల్ వద్ద 3 మోటర్లకు బదులుగా ఒకే ఒక్క మోటర్ తో నీటి సరఫరా చేయడంతో నీటి కొరతతో ట్రిపుల్ ఐటీ హాస్టల్, క్యాంపస్ తాత్కాలికంగా మూసివేయాల్సిన పరిస్థితి ఏర్పడింది.

దసరా సెలవుల పొడిగింపుతో ఇళ్లకు తిరుగుపయనం

దసరా సెలవుల అనంతరం శుక్రవారం నాడే ట్రిపుల్ ఐటీ పునఃప్రారంభం కావాల్సి ఉంది. అయితే విద్యార్థుల హాజరు పెరిగితే తీవ్ర నీటి కొరత ఏర్పడుతుందని భావించిన యూనివర్సిటీ వైస్ ఛాన్సలర్ దసరా సెలవులను తాత్కాలికంగా పొడిగిస్తున్నట్లు ప్రకటించారు. క్యాంపస్‌లో 9 వేల మంది విద్యార్థులతో పాటు 2 వేల మంది బోధన, బోధనేతర సిబ్బంది నివాసముంటున్నారు. వీరి అవసరాలకు రోజుకు సుమారు 25 లక్షల లీటర్ల నీరు అవసరం కాగా, ప్రస్తుతం 14 లక్షల లీటర్లు మాత్రమే అందుబాటులో ఉంది. రోజుకు 10 నుండి 12 లక్షల లీటర్ల నీటి లోటు ఉండటంతో తరగతులను నిర్వహించడం అసాధ్యమని భావించి సెలవులను పొడిగించారు. దీంతో విద్యార్థులంతా తిరిగి ఇళ్ల బాట పట్టారు.

ప్రత్యామ్నాయ చర్యల్లో అధికారులు

బాసర ట్రిపుల్ ఐటీ క్యాంపస్‌లో ఏర్పడిన తాగునీటి ఎద్దడిని అధిగమించడానికి అధికారులు ప్రత్యామ్నాయ మార్గాలపై దృష్టి సారించారు. గోదావరి నది నుంచి క్యాంపస్‌కు నేరుగా నీటిని తోడే అవకాశాలను పరిశీలిస్తున్నారు. రోజువారీ నీటి అవసరాలకు సరిపడా 25 లక్షల లీటర్లకు పైగా నీటి సరఫరా పునరుద్ధరించిన తర్వాతే విశ్వవిద్యాలయాన్ని పునఃప్రారంభించాలని నిర్ణయించారు. దీనిపై త్వరలోనే వైస్ ఛాన్సలర్ తుది ప్రకటన చేయనున్నారు. మరోవైపు బాసర శ్రీ జ్ఞాన సరస్వతి అమ్మవారి క్షేత్రంలోనూ భక్తులకు తాగునీటి ఇబ్బందులు ఎదురవుతుండటంతో, వచ్చే జూన్‌లో రానున్న గోదావరి పుష్కరాల నిర్వహణ అధికారులకు పెద్ద సవాలుగా మారే సూచనలు కనిపిస్తున్నాయి.

Adilabad Politics: కాంగ్రెస్‌ని వీడి బీఆర్ఎస్ పార్టీలో చేరిన భార్గవ్ దేశ్ పాండే.. సీఎం రేవంత్‌కు సూటిప్రశ్న!

Shailender — Sun, 25 Oct 2026 13:56:35 +0530

Adilabad Politics | ఆదిలాబాద్ మాజీ డీసీసీ అధ్యక్షుడు, జిల్లా యువ నాయకుడు భార్గవ్ దేశ్ పాండే కేటీఆర్ సమక్షంలో బీఆర్ఎస్ పార్టీలో చేరారు. ఈ సందర్భంగా బిఆర్ఎస్ పార్టీ వర్కింగ్ ప్రెసిడెంట్ కేటీఆర్.. భార్గవ్ దేశ్ పాండేకు కండువా కప్పి పార్టీలోకి ఆహ్వానించారు. భార్గవ్ దేశ్ పాండే 17ఏళ్ల వయసులోనే రాష్ట్ర స్థాయిలో యుత్ కాంగ్రెస్ నేతగా క్రియాశీలకంగా ఎదిగి.. యూత్ కాంగ్రెస్ రాష్ట్ర అధ్యక్షుడిగా పనిచేశారు. ఆపై 2014 అసెంబ్లీ ఎన్నికల్లో కాంగ్రెస్ పార్టీ తరఫున ఆదిలాబాద్ నియోజకవర్గంలో పోటీ చేసి ఓడిపోయారు. అప్పటి నుండి ఆదిలాబాద్ జిల్లా కాంగ్రెస్ అధ్యక్షునిగా పనిచేశారు.

మాజీ NSUI స్టేట్ ప్రెసిడెంట్ భార్గవ్ దేశ్‌పాండే మాట్లాడుతూ.. ‘టీడీపీ, ఆర్ఎస్ఎస్, బీజేపీ భావజాలాలు ఉన్న నేతల చెప్పుచేతల్లో తెలంగాణ కాంగ్రెస్ ఉంది. 2006 నుండి కాంగ్రెస్ పార్టీలో ఉన్నాను.. ఇప్పుడున్న కాంగ్రెస్, ఆరోజు ఉన్న పార్టీ కాదు. మంత్రులు ఉత్తమ్ కుమార్ రెడ్డి, భట్టి విక్రమార్క, శ్రీధర్ బాబు పూర్తిగా రేవంత్ రెడ్డికి సరెండర్ అయిపోయారు. రాహుల్ గాంధీ ఢిల్లీలో చెప్పే మాటలకు తెలంగాణలో పూర్తి విరుద్ధంగా పాలన నడుస్తుంది. రేవంత్ రెడ్డి వల్లే కాంగ్రెస్ పార్టీ అధికారంలోకి వస్తే, ఎందుకు టీడీపీని అధికారంలోకి తీసుకురాలేకపోయారు ?. ఈ ప్రభుత్వంలో రేవంత్ రెడ్డి చుట్టున్న నాలుగైదుగురు తప్ప ఎవరూ బాగుపడలేదు. ఇది ఒరిజినల్ కాంగ్రెస్ కాదు. టీడీపీ, RSS కాంగ్రెస్. అందుకే చెబుతున్నాను. లీవ్ కాంగ్రెస్. సేవ్ తెలంగాణ’ అన్నారు.

భార్గవ్ దేశ్ పాండే గత 2023లో జరిగిన అసెంబ్లీ ఎన్నికల్లో కాంగ్రెస్ పార్టీ టికెట్ ను.. పార్టీకోసం పనిచేసే వారికే ఇవ్వాలని ధిక్కార స్వరం వినిపించారు. దీంతో ఆయనపై కాంగ్రెస్ పార్టీ వేటు వేసింది. అప్పటి నుంచి ఆయన కొంతదూరం ఉన్నారు. ఆయనకు పార్టీ అధినాయకత్వం ఎలాంటి ఆదరణ కల్పించలేకపోయిందని నిరాశకు గురయ్యారు. కాంగ్రెస్ ప్రభుత్వం అధికారంలోకి వచ్చాక కూడా ప్రస్తుత ప్రజా పాలన సైతం బాగులేదంటూ విరుచుకుపడ్డారు..ఇక తన అనుచరులు, మద్దతుదారులు బీఆర్ఎస్ పార్టీలో చేరాలని ఓత్తిడి తెవడంతో గత రెండు రోజుల క్రితం abp దేశంతో ఆయన ఎక్స్ క్లూజీవ్ ఇంటర్వ్యూలో మాట్లాడారు. ఆయన ఇటివల ఆదిలాబాద్ కు చెందిన మాజీ మంత్రి జోగు రామన్న, మాజీ మంత్రి సబితా ఇంద్రారెడ్డితో కలిసి కేటీఆర్ ను కలిశారు. కేటీఆర్ గ్రీన్ సిగ్నల్ ఇవ్వడంతో ఆయన ఆదివారం కేటీఆర్ సమక్షంలో బీఆర్ఎస్ పార్టీలో చేరారు.

Congress leader and former NSUI State President Bhargav Deshpande joined the BRS Party in the presence of BRS Working President @KTRBRS https://t.co/azqZDZs8G3
— BRS Party (@BRSparty) October 25, 2026

భార్గవ్ దేశ్ పాండే కు కాంగ్రెస్ అగ్రనేత రాహుల్ గాంధీతో సానిహిత్యం ఉంది. సీఎం రేవంత్ రెడ్డి కాంగ్రెస్ అగ్రనేతలు దిగ్విజయ్ సింగ్, మీనాక్షి నటరాజన్, సి.హెచ్ కుంతియా, పీసీసీ అధ్యక్షులు మహేశ్ కుమార్ గౌడ్, మంత్రులు ఉత్తంకుమార్ రెడ్డి, మల్లు భట్టి విక్రమార్క, హనుమంత్ రావు, ఎంపీ వంశీచందర్ రెడ్డి తదితర నేతలతో సైతం మంచి పరిచయాలు ఉండగా పార్టీ నుండి పిలుపు కోసం ఇంతకాలం ఎదురుచూసినా ఫలితం లేకపోయింది. ఈ క్రమంలోనే ఆయన పార్టీని వీడి కారు పార్టీలో చేరారు.

భార్గవ్ దేశ్ పాండే బీఆర్ఎస్ పార్టీలో చేరిక ఆ పార్టీ జిల్లాలో మరింత బలంగా మారే అవకాశం ఉంటుందని రాజకీయ పరిశీలకులు భావిస్తున్నారు. ఈ చేరిక కార్యక్రమంలో ఎమ్మెల్యేలు కోవ లక్ష్మి, అనిల్ జాదవ్, వేముల ప్రశాంత్ రెడ్డి, మాజీ మంత్రి జోగు రామన్న, మంచిర్యాల జిల్లా బీఆర్ఎస్ అధ్యక్షుడు బాల్క సుమన్, ఖానాపూర్ బీఆర్ఎస్ ఇన్చార్జీ భూక్యా జాన్సన్ నాయక్, యువజన నాయకులు జోగు మహేందర్, కేమ శ్రీకాంత్ తదితరులు పాల్గొన్నారు.