Telangana Municipal Elections Results 2026: నల్గొండ జిల్లాలో కాంగ్రెస్ హవా.. 3 మున్సిపాలిటీలు కైవసం చేసుకున్న అధికార పార్టీ
Congress Dominates BRS in Nalgonda | తెలంగాణ మున్సిపల్ ఎన్నికల్లో నల్గొండ జిల్లాలో ప్రస్తుతానికి మూడు మున్సిపాలిటీల్లో కాంగ్రెస్ పార్టీ విజయం సాధించింది. బీఆర్ఎస్ పై ఏకపక్ష విజయాలు అందుకుంది.
Telangana Municipal Elections Results 2026 | తెలంగాణ మున్సిపల్ ఎన్నికల ఫలితాల్లో నల్లగొండ జిల్లాలో అధికార కాంగ్రెస్ పార్టీ తన పట్టును నిరూపించుకుంది. శుక్రవారం వెలువడుతున్న ఫలితాల్లో నల్గొండ జిల్లాల్లో హస్తం పార్టీ దూసుకెళ్తోంది. జిల్లాలోని మూడు కీలకమైన మున్సిపాలిటీలు నందికొండ, హాలియా, చండూరులను కాంగ్రెస్ పార్టీ సొంతం చేసుకుంది. జిల్లావ్యాప్తంగా ఓట్ల లెక్కింపు కొనసాగుతుండగా, స్పష్టమైన మెజారిటీ సాధించిన ఈ మూడు పురపాలికల్లో కాంగ్రెస్ శ్రేణులు సంబరాలు జరుపుకుంటున్నాయి. నేటి ఓట్ల లెక్కింపులో సంగారెడ్డి జిల్లా గడ్డపోతారం ఫలితం మొదట వెలువడింది. ఈ మున్సిపాలిటీలో బీఆర్ఎస్ విజయం సాధించింది.
నల్గొండ జిల్లాలోని నందికొండ మున్సిపాలిటీలో విజయంతో కాంగ్రెస్ పార్టీ బోణీ కొట్టింది. అనంతరం హాలియా, చండూరు మున్సిపాలిటీల్లోనూ హస్తం పార్టీ మెజార్టీ వార్డుల్లో నెగ్గి విజయం సాధించింది. నందికొండ మున్సిపాలిటీలో 12 వార్డులకుగానూ 11 వార్డుల్లో కాంగ్రెస్, ఒక వార్డులో బీఆర్ఎస్ విజయం సాధించింది. ఇక్కడ కాంగ్రెస్ ఏకపక్ష విజయాన్ని అందుకోవడంతో హస్తం శ్రేణులు సంబరాలు చేసుకుంటున్నాయి.
చండూరు, హాలియా మున్సిపాలిటీలు కైవసం చేసుకున్న కాంగ్రెస్
హాలియా, చండూరు మున్సిపాలిటీ ఎన్నికల్లోనూ కాంగ్రెస్ గెలుపొందింది. హాలియాలో 10 వార్డుల్లో కాంగ్రెస్, 2 వార్డుల్లో బీఆర్ఎస్ అభ్యర్థులు నెగ్గారు. చండూరు మున్సిపాలిటీలో కాంగ్రెస్ 7 వార్డులు నెగ్గగా, 3 వార్డుల్లో బీఆర్ఎస్ గెలుపొందింది.
తెలంగాణ వ్యాప్తంగా జరిగి 116 మున్సిపాలిటీలు, 7 నగర పాలక సంస్థల ఎన్నికల ఓట్ల లెక్కింపు కొనసాగుతోంది. పలు జిల్లాల్లో అధికార పార్టీ కాంగ్రెస్, బీఆర్ఎస్ మధ్య హోరాహోరీ పోరు నడుస్తోంది. ఉమ్మడి నల్గొండ, ఖమ్మం జిల్లాల్లో కాంగ్రెస్ పార్టీ దూసుకెళ్తోంది. ఈ జిల్లాల్లో పలు మున్సిపాలిటీల్లో ప్రతిపక్షపార్టీ బీఆర్ఎస్ కనీసం పోటీ కూడా ఇవ్వలేకపోతోంది.
టాప్ హెడ్ లైన్స్
ట్రెండింగ్ వార్తలు
