nalgonda

Graduate MLC Election: తొలిసారి ఎన్నికల బరిలోకి కవిత పార్టీ.. తొలి ఎమ్మెల్సీ అభ్యర్థి పేరు ప్రకటన

Shankar Dukanam — Tue, 20 Oct 2026 14:49:22 +0530

Telangana Rakshana Sena MLC Candidate | హైదరాబాద్: తెలంగాణ రక్షణ సేన పార్టీ రాజకీయాల్లో కీలక పరిణామం చోటుచేసుకుంది. కొత్తగా ఏర్పాటైన టీఆర్ఎస్ (Telangana Rakshana Sena) పార్టీ తొలిసారి ప్రత్యక్ష ఎన్నికల బరిలోకి దిగుతుంది. ఈ క్రమంలో వరంగల్- ఖమ్మం- నల్గొండ పట్టభద్రుల (గ్రాడ్యుయేట్) ఎమ్మెల్సీ స్థానానికి తమ అభ్యర్థిని తెలంగాణ రక్షణ సేన ప్రకటించింది. తెలంగాణ ఉద్యమంలో చురుగ్గా పాల్గొన్న డాక్టర్ నలమాస శ్రీకాంత్‌గౌడ్‌ను ఈ ఎన్నికల బరిలో తమ అభ్యర్థిగా ఎంపిక చేసినట్లు పార్టీ అధ్యక్షురాలు కల్వకుంట్ల కవిత వెల్లడించారు.

దసరా పండుగ శుభసందర్భంగా శ్రీకాంగ్ గౌడ్‌ను తమ పార్టీ గ్రాడ్యుయేట్ ఎమ్మెల్సీ అభ్యర్థిగా కవిత ప్రకటించారు. ఈ ఎమ్మెల్సీ స్థానంలో ఎన్నికల సమన్వయం, పర్యవేక్షణ కోసం స్టేట్ పార్టీ అబ్జర్వర్‌గా సయ్యద్ ఇస్మాయిల్‌ను నియమించినట్లు కవిత తెలిపారు. ఈ ప్రకటనతో గ్రాడ్యుయేట్ ఎమ్మెల్సీ ఎన్నికల్లో కవిత పార్టీ పోటీకి సిద్ధమైనట్లు స్పష్టం చేసింది. అభ్యర్థి ప్రకటనతో పట్టభద్రుల ఎన్నికల ప్రచారాన్ని మరింత వేగవంతం చేయాలని పార్టీ నిర్ణయించింది.

మహబూబాబాద్ జిల్లా నర్సింహుల పేట మండలంలోని కౌసల్యాదేవిపల్లికి చెందిన శ్రీకాంత్ గౌడ్ ను టీఆర్ఎస్ అభ్యర్థిగా ప్రకటించింది. కాకతీయ యూనిర్సిటీ నుంచి పీహెచ్‌డీ చేసిన ఆయన తెలంగాణ సాధన ఉద్యమంలో క్రియాశీలకంగా వ్యవహరించారు. తెలంగాణ జాగృతిలో కవిత వెంట నడిచారు. తెలంగాణ రక్షణ సేన పార్టీ ప్రతినిధిగా ప్రజా సంఘాల సమావేశాల్లో, టీవీ డిబేట్లలో పాల్గొని టీఆర్ఎస్ గొంతుకగా నిలిచారు. బహుజనుల కోసం పోరాటం చేస్తానని ప్రకటించిన కవిత తన పార్టీ నుంచి తొలి అభ్యర్థిగా బీసీ బిడ్డ శ్రీకాంత్ గౌడ్‌ వైపు మొగ్గు చూపారు. గ్రాడ్యుయేట్ ఎమ్మెల్సీ ఎన్నికల్లో ఆయనను గెలిపించాలని కవిత పట్టభద్రులను కోరారు.

తెలంగాణ రక్షణ సేన కరీంనగర్ జిల్లా కమిటీని ప్రకటించిన పార్టీ అధ్యక్షురాలు శ్రీమతి కల్వకుంట్ల కవిత గారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను నియమించారు. https://t.co/iXqovrM955
— Telangana Rakshana Sena (@TRSparty_HQ) October 20, 2026

తెలంగాణ రక్షణ సేన కరీంనగర్ జిల్లా కమిటీని పార్టీ అధ్యక్షురాలు కల్వకుంట్ల కవిత తాజాగా ప్రకటించారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను ఆమె నియమించారు.

LB Nagar Hayathnagar Double Decker Corridor: ఎల్బీనగర్ - హయత్ నగర్ డబల్ డెక్కర్ ఎలివేటెడ్ కారిడార్, 5 రోప్ వే లకు కేంద్రం ఆమోదం

Shankar Dukanam — Tue, 13 Oct 2026 13:15:50 +0530

న్యూఢిల్లీ/ హైదరాబాద్: ఎల్బీనగర్ - హయత్ నగర్ డబుల్ డెక్కర్ ఎలివేటెడ్ కారిడార్ నిర్మాణం సహా తెలంగాణ రాష్ట్రంలోని పలు కీలక రహదారులు, ప్రాజెక్టులకు కేంద్ర రోడ్డు రవాణా, రహదారుల శాఖ నితిన్ గడ్కరీ ఆమోదం తెలిపారు. తెలంగాణ రాష్ట్ర రహదారులు, భవనాల శాఖ మంత్రి కోమటిరెడ్డి వెంకట్ రెడ్డి ఢిల్లీలో కేంద్ర మంత్రి నితిన్ గడ్కరీతో మంగళవారం ప్రత్యేకంగా భేటీ అయి పలు ప్రాజెక్టులపై చర్చించారు. కృష్ణా నదిపై అత్యంత ప్రతిష్టాత్మకంగా నిర్మించతలపెట్టిన ఐకానిక్ కేబుల్ బ్రిడ్జి నిర్మాణ శంకుస్థాపన ప్రతిపాదనకు కూడా కేంద్రం గ్రీన్ సిగ్నల్ ఇచ్చింది. హైదరాబాద్ - శ్రీశైలం (NH 765) రహదారిపై ఎలివేటెడ్ కారిడార్ ఏర్పాటు విజ్ఞప్తిపై స్పందించిన నితిన్ గడ్కరీ.. కొత్తగా డీపీఆర్ సిద్ధం చేయాలని అధికారులను ఆదేశించారు.

జాతీయ రహదారులు, 5 రోప్‌వేలకు ఆమోదం

ఈ భేటీలో తెలంగాణ రహదారుల రంగానికి సంబంధించి మరిన్ని కీలక నిర్ణయాలు తీసుకున్నారు. పర్వతమాల పథకం ద్వారా తెలంగాణలో 5 రోప్‌వేల ఏర్పాటుకు, సేతు బంధన్ పథకం ద్వారా 3 ఆర్‌వోబీ (ROB)ల నిర్మాణానికి కేంద్రమంత్రి గడ్కరీ ఆమోదం తెలిపారు. హైదరాబాద్ - అమరావతి గ్రీన్ ఫీల్డ్ హైవే నిర్మాణంపై సానుకూలంగా స్పందించారని కోమటిరెడ్డి వెంకట్ రెడ్డి తెలిపారు.

తెలంగాణలోని 34 పనులకు సీఆర్‌ఐఎఫ్ (CRIF) నిధులు మంజూరు చేయాలని కోరగా అందుకు తగిన చర్యలు తీసుకోవాలని అధికారులను కేంద్ర మంత్రి గడ్కరీ ఆదేశించారు. వీటితో పాటు పుల్లూరు - అలంపూర్ - జట్రపోలు - పెంట్లవెల్లి - కొల్లాపూర్ - లింగాల - అచ్చంపేట - డిండి - దేవరకొండ - మల్లేపల్లి - నల్గొండ రాష్ట్ర రహదారులను జాతీయ రహదారులుగా గుర్తించాలని చేసిన విజ్ఞప్తిపై సానుకూలంగా స్పందించారని తెలుస్తోంది. హైదరాబాద్‌లో నవంబర్ 19 నుండి 22 వరకు జరగనున్న ఇండియన్ రోడ్ కాంగ్రెస్ (IRC) సమావేశాలకు కేంద్రమంత్రిని ఆహ్వానించగా, అందుకు నితిన్ గడ్కరీ సానుకూలంగా స్పందించి తప్పకుండా హాజరవుతానని తెలిపారు.

నితిన్ గడ్కరీ, కోమటి రెడ్డి ప్రత్యేక భేటీలో అంశాలివే..

- ఎల్బీనగర్ - హయత్ నగర్ డబల్ డెక్కర్ ఎలివేటెడ్ కారిడార్‌కు కేంద్రం ఆమోదం

- కృష్ణా నదిపై ఐకానిక్ కేబుల్ బ్రిడ్జి నిర్మాణానికి సంబంధించిన శంకుస్థాపన ప్రతిపాదనకు ఆమోదం తెలిపిన నితిన్ గడ్కరీ

- హైదరాబాద్ - శ్రీశైలం NH 765పై ఎలివేటెడ్ కారిడార్ కి విజ్ఞప్తిపై కొత్త డీపీఆర్ సిద్ధం చేయాలని అధికారులకు ఆదేశాలు

- పర్వతమాల పథకం ద్వారా తెలంగాణకు 5 రోప్ వే లకు కేంద్రమంత్రి గడ్కరీ ఆమోదం

- హైద్రాబాద్ - అమరావతి గ్రీన్ ఫీల్డ్ హైవే పై సానుకూలంగ స్పందించిన కేంద్ర మంత్రి

- సేతు బంధన్ పథకం ద్వారా 3 ఆర్ఓబి లకు ఆమోదం

- తెలంగాణ లో 34 పనులకు సీఆర్ఐఎఫ్ (CRIF) నిధులను మంజూరు చేయాలని మంత్రి కోరగా కేంద్ర అధికారులను ఆదేశాలు

- పుల్లూరు - అలంపూర్ - జట్రపోలు - పెంట్లవెల్లి - కొల్లాపూర్ - లింగాల - అచ్చంపేట - డిండి - దేవరకొండ - మల్లేపల్లి - నల్గొండ రాష్ట్ర హైవే లను జాతీయ హై వే లుగా మార్చాలని కోరడంతో సానుకూలంగా స్పందించిన కేంద్రమంత్రి

- హైదరాబాద్ లో నవంబర్ 19-22 వరకు జరగనున్న ఇండియన్ రోడ్ కాంగ్రెస్(IRC)కు మంత్రి ఆహ్వానించగా.. వస్తానని చెప్పిన కేంద్ర మంత్రి గడ్కరీ

Durga Idol Immersion: దుర్గామాత విగ్రహ ప్రతిష్ఠాపనపై వివాదం... పూజలకు ముందే అమ్మవారి విగ్రహం నిమజ్జనం

Shankar Dukanam — Sun, 11 Oct 2026 12:33:00 +0530

Devi Navaratri Row in Nalgonda | డిండి: తెలుగు రాష్ట్రాల్లో దేవీ శరన్నవరాత్రి ఉత్సవాలు ఘనంగా ప్రారంభమయ్యాయి. గ్రామాల్లో పోటీ పడి మీర దుర్గామాత విగ్రహాలను ప్రతిష్టించి పూజలు నిర్వహిస్తుంటారు. కానీ నల్లగొండ జిల్లా డిండి మండలం శాంతిగూడెం గ్రామంలో దేవీ శరన్నవరాత్రి ఉత్సవాల వేళ వివాదం చోటుచేసుకుంది. గ్రామంలో దుర్గామాత విగ్రహాన్ని ప్రతిష్ఠించే స్థలానికి సంబంధించి రెండు వర్గాల మధ్య ఏర్పడిన విభేదాలు ముదిరి వివాదానికి దారితీశాయి. విగ్రహ ప్రతిష్ఠాపన స్థలం విషయంలో ఇరువర్గాలు పట్టుబట్టడంతో మాటమాట పెరిగి చివరికి ఆధిపత్య పోరుకు వెళ్లింది. ఈ క్రమంలో రెండు వర్గాల మధ్య ఘర్షణ పూరిత వాతావరణం నెలకొంది.

ఈ వివాదం తీవ్రరూపం దాల్చడం, ఏ వర్గం వారు తగ్గకపోవడంతో అపశ్రుతి చోటుచేసుకుంది. దేవీ నవరాత్రి ఉత్సవాలకు ముందే దుర్గామాత విగ్రహాన్ని కనీసం పూజలు కూడా నిర్వహించకుండానే నిమజ్జనం చేశారు. అప్పటికీ కొందరు వద్దురా.. ఇది దేవుడు, దేవతలకు సంబంధించిన కార్యక్రమం. విగ్రహాన్ని పూజలకు ముందే నిమజ్జనం చేయడం అరిష్టమని చెబుతున్నా వినిపించుకోకుండా చెరువలో నిమజ్జనం చేయడం హాట్ టాపిక్ అవుతోంది. విగ్రమం నిమజ్జనం ఫలితంగా తొమ్మిది రోజుల పాటు ఎంతో వైభవంగా జరగాల్సిన నవరాత్రి ఉత్సవాలు నిలిచిపోయాయి. భక్తిశ్రద్ధలతో ఉత్సవాలు జరుపుకోవాలని భావించిన గ్రామస్థులు, భక్తులు ఈ పరిణామంతో తీవ్ర ఆందోళనకు గురయ్యారు.

పవిత్రమైన పండుగ వేళ రాజకీయ విభేదాలతో నవరాత్రి ఉత్సవాలను భగ్నం చేయడంపై స్థానికులు తీవ్ర ఆగ్రహం వ్యక్తం చేస్తున్నారు. అమ్మవారిని కనీసం పూజలకు కూడా నోచుకోనివ్వకుండానే సాగనంపడం పట్ల అరిష్టం జరుగుతుందేమో అంటూ గ్రామంలో చర్చ మొదలైంది. గ్రామ ప్రశాంతతను దెబ్బతీస్తూ ఉత్సవాల నిర్వహణలో గొడవలకు కారణమైన వారిపై చర్యలు తీసుకోవాలని భక్తులు కోరుతున్నారు.

బతుకమ్మ 2026: తీరొక్క పూల జాతర.. ఏ రోజు ఏ బతుకమ్మ, నైవేద్యం?

RAMA — Sat, 10 Oct 2026 10:40:50 +0530

Bathukamma 2026: తెలంగాణ రాష్ట్ర సంస్కృతికి ప్రతీక, మహిళలకు ప్రీతిపాత్రమైన బతుకమ్మ పండుగ సందడి అక్టోబర్ 10 శనివారం సాయంత్రం నుంచి ప్రారంభమవుతుంది. హైదరాబాద్ తో పాటూ తెలంగాణ వ్యాప్తంగా ఊరూ వాడా పూలపండుగ సంబురంగా జరగబోతోంది. భాద్రపదమాసం అమావాస్య తో మొదలయ్యే బతుకమ్మ పండుగ ఆశ్వయుజమాసం అష్టమితో ముగుస్తుంది. తొమ్మిది రోజుల పాటూ వైభవంగా సాగే పూల పండుగలో ఏ రోజు ఏ బతుకమ్మను పూజిస్తారు, ఏ నైవేద్యం సమర్పిస్తారు తెలుసుకోండి

ఏ రోజు ఏ బతుకమ్మ

అక్టోబర్ 10 శనివారం భాద్రపద అమావాస్య / మహాలయ అమావాస్య - ఎంగిలిపూల బతుకమ్మ

మొదటి రోజు ఎంగిలిపూల బతుకమ్మకు నువ్వులను పొడి చేసి పంచదార వేసి కలిపి నైవేద్యంగా సమర్పిస్తారు.

అక్టోబర్ 11 ఆదివారం ఆశ్వయుజ శుక్ల పాడ్యమి - అటుకుల బతుకమ్మ

రెండో రోజు అటుకుల బతుకమ్మ - పేరుకితగ్గట్టుగానే అటుకులతో నైవేద్యం తయారు చేస్తారు. అటుకులను నానబెట్టి కొద్దిసేపటి తర్వాత నీరు ఓడ్చి ఓ గంట ఎండనివ్వాలి. ఆ తర్వాత ఆ పాన్ లో నెయ్యి వేసి డ్రై ఫ్రూట్స్ వేయించుకుని దాన్ని పక్కకు తీసి బెల్లం తురుము వేయాలి. అది పాకంగా మారిన తర్వాత స్టౌ ఆఫ్ చేసి అందులో అటుకులు వేసి కలపాలి. అటుకులు నైవేద్యం సిద్ధం అయినట్టే

అక్టోబర్ 12 సోమవారం ఆశ్వయుజ శుక్ల విదియ - ముద్దపప్పు బతుకమ్మ

మూడో రోజు ముద్దపప్పు బతుకమ్మ - ముద్దపప్పుని నైవేద్యంగా పెడతారుయ. కందిపప్పు ప్రెజర్ కుక్కర్లో వేసి... నీళ్లు పోసి, దంచిన జీలకర్ర, కరివేపాకు, నూనె, పసుపు, వేసి ఉడికిస్తారు. సరిపడా ఉప్పు వేసి నైవేద్యం పెడతారు

అక్టోబర్ 13 మంగళవారం ఆశ్వయుజ శుక్ల తదియ - నానే బియ్యం బతుకమ్మ

నాలుగో రోజు నానేబియ్యం బతుకమ్మ - ఈ రోజు బెల్లం పరమాన్నం నివేదిస్తారు.

అక్టోబర్ 14 బుధవారం ఆశ్వయుజ శుక్ల చవితి - అట్ల బతుకమ్మ

ఐదో రోజు అట్ల బతుకమ్మ - పేరుకి తగ్గట్టుగానే అట్లు నైవేద్యంగా సమర్పిస్తారు.

అక్టోబర్ 15 గురువారం ఆశ్వయుజ శుక్ల పంచమి - అలిగిన బతుకమ్మ

ఆరో రోజు అలిగిన బతుకమ్మ - ఈ రోజు అమ్మవారికి నైవేద్యం సమర్పించరు

అక్టోబరు 16 శుక్రవారం ఆశ్వయుజ శుక్ల షష్టి - వేపకాయల బతుకమ్మ

ఏడో రోజు వేపకాయల బతుకమ్మ - సకినాల పిండితో వేపకాయలు చేసి వాటిని నివేదిస్తారు

అక్టోబరు 17 శనివారం ఆశ్వయుజ శుక్ల సప్తమి - వెన్నముద్దల బతుకమ్మ

ఎనిమిదో రోజు వెన్నముద్దల బతుకమ్మ - బియ్యంపిండితో వెన్నముద్దలు తయారు చేసి బతుకమ్మకు నైవేద్యంగా సమర్పిస్తారు. బియ్యంపిండిని ఉడికించి ..వాటిని ఉండలుగా చేసి.. వాటిని బ్రౌన్ కలర్ వచ్చేవరకూ వేయించి..బెల్లం పాకంలో వేస్తారు.

అక్టోబరు 18 ఆదివారం ఆశ్వయుజ శుక్ల అష్టమి ( దుర్గాష్టమి) -సద్దుల బతుకమ్మ

బతుకమ్మ పండుగలో ఆఖరి రోజైన తొమ్మిదో రోజు సద్దుల బతుకమ్మ - ఈ రోజు మరింత పెద్ద పరిమాణంలో బతుకమ్మను తయారు చేస్తారు. పండుగలో ఆఖరి రోజు కావడంతో సంబరాలు మరింత వైభవంగా జరుపుకుంటారు. పూజ పూర్తైన తర్వాత బతుకమ్మను తీసుకెళ్లి నిమజ్జనం చేస్తారు. ఈ రోజు దుర్గాష్టమి. ఈ రోజు పులిహోర నివేదిస్తారు. పెరుగన్నం, లడ్డూ సహా తొమ్మిది రకాల నైవేద్యాలు తయారు చేస్తారు.

SLBC Tunnel పనుల్లో కీలక పరిణామం.. ప్రమాదకరమైన షియర్‌జోన్‌‌ దాటుకుని తవ్వకాలు: మంత్రి ఉత్తమ్

Shankar Dukanam — Mon, 5 Oct 2026 10:59:01 +0530

SLBC Tunnel Project | శ్రీశైలం: శ్రీశైలం లెఫ్ట్ బ్యాంక్ కెనాల్ (SLBC) టన్నెల్‌ తవ్వకం పనుల్లో కీలక ముందడుగు పడిందని ప్రభుత్వం తెలిపింది. ఎడమ గట్టు కాలువ సొరంగం పనుల్లో అత్యంత ప్రమాదకరమైన షియర్‌జోన్‌‌ను విజయవంతంగా దాటుకుని తవ్వకాలు ముందుకు సాగుతున్నాయని నీటిపారుదల శాఖ మంత్రి ఉత్తమ్‌కుమార్‌ రెడ్డి తెలిపారు. టన్నెల్ పనులపై అధికారులతో నిర్వహించిన సమీక్షా సమావేశంలో మాట్లాడిన మంత్రి ఉత్తమ్.. గత ఆరు నెలల కాలంలోనే సుమారు 700 మీటర్ల మేర తవ్వకం పనులు పూర్తయ్యాయని తెలిపారు.

ఎస్‌ఎల్‌బీసీలో మొత్తం 43.968 కిలోమీటర్ల పొడవైన ప్రధాన టన్నెల్‌లో ఇప్పటివరకు 79 శాతం మేర పనులు పూర్తి చేసినట్లు మంత్రి వెల్లడించారు. ఎస్ఎల్‌బీసీలో ఇంకా 9.1 కిలోమీటర్ల మేర తవ్వకాలు పూర్తికావాల్సి ఉందని పేర్కొన్నారు. ప్రస్తుతం రోజుకు దాదాపు 7 నుంచి 7.5 మీటర్ల మేర తవ్వకం పనులు వేగంగా జరుగుతున్నాయని ఆయన తెలిపారు. పనులను మరింత వేగవంతం చేసేందుకు అదనపు డ్రిల్లింగ్‌ బూమర్‌‌, ఎలక్ట్రిక్‌ లోడర్లు, ఆధునిక ఎక్స్‌కవేటర్లను అందుబాటులోకి తీసుకురానున్నట్లు పేర్కొన్నారు.

జర్మనీ నుంచి అక్టోబర్‌ చివరినాటికి ప్రత్యేక లోకోమోటివ్‌ రానుందని, ఇది అందుబాటులోకి వస్తే టన్నెల్‌లో తవ్విన మట్టిని అత్యంత వేగంగా బయటకు తరలించే వీలుంటుందని మంత్రి ఉత్తమ్ కుమార్ రెడ్డి చెప్పారు. గతంలో ఒక నిర్మాణ సైకిల్‌ పూర్తవడానికి 48 గంటల సమయం పట్టేదని, ప్రస్తుతం ఆ సమయాన్ని 20– 24 గంటల మేర తగ్గించామని పేర్కొన్నారు. త్వరలోనే ఈ సమయాన్ని 10 గంటలకు మేరకు కుదించేలా పనుల వేగాన్ని మరింత పెంచడమే లక్ష్యంగా పెట్టుకుని తమ ప్రభుత్వం పని చేస్తుందన్నారు. కార్మికుల భద్రతకు అత్యంత ప్రాధాన్యత ఇస్తూనే, శ్రీశైలం లెఫ్ట్ బ్యాంక్ కెనాల్ టన్నెల్ తవ్వకాలను కొనసాగించాలని అధికారులను సూచించినట్లు తెలిపారు.

Congress Candidates For MLC Elections: గ్రాడ్యుయేట్ ఎమ్మెల్సీ ఎన్నికలకు కాంగ్రెస్ అభ్యర్థులు వీరే.. వారి బ్యాగ్రౌండ్ చూశారా

Shankar Dukanam — Wed, 30 Sep 2026 08:40:19 +0530

హైదరాబాద్: తెలంగాణలో మరోసారి ఎన్నికలు వస్తున్నాయి. అయితే ఈసారి జరిగేది రెగ్యూలర్ పోలింగ్ కాదు, గ్రాడ్యుయేట్ ఎమ్మెల్సీ ఎన్నికలు. ఇవి చదువుకున్న వారు, మేధావులు ప్రభుత్వ పాలనకు ఇచ్చే తీర్పులాంటివని ఈ ఎన్నికల గురించి చెబుతారు. తెలంగాణ శాసనమండలికి త్వరలో జరగనున్న గ్రాడ్యుయేట్ ఎమ్మెల్సీ ఎన్నికలకు కాంగ్రెస్‌ పార్టీ తమ అభ్యర్థులను ఖరారు చేసింది. ఉమ్మడి మహబూబ్‌నగర్‌– రంగారెడ్డి– హైదరాబాద్‌‌ పట్టభద్రుల నియోజకవర్గానికి సామ రామ్మోహన్‌ రెడ్డిని, ఉమ్మడి వరంగల్‌– ఖమ్మం– నల్లగొండ గ్రాడ్యుయేట్ ఎమ్మెల్సీ స్థానానికి రాంరెడ్డి సర్వోత్తమ్‌ రెడ్డిలను కాంగ్రెస్ అధిష్టానం ఎంపిక చేసింది. రేవంత్ రెడ్డి ఢిల్లీ పర్యటనకు వెళ్లిన సమయంలోనే ఈ జాబితా విడుదలైంది. ఈ ఎంపికకు ఏఐసీసీ అధ్యక్షుడు మల్లికార్జున ఖర్గే ఆమోదం తెలిపిన అనంతరం, ఏఐసీసీ ప్రధాన కార్యదర్శి కేసీ వేణుగోపాల్‌‌ ఢిల్లీలోని కేంద్ర కార్యాలయం నుంచి అధికారిక ప్రకటన విడుదల చేశారు.

ఉమ్మడి మహబూబ్‌నగర్‌– రంగారెడ్డి– హైదరాబాద్‌ స్థానానికి ఎంపికైన సామ రాం మోహన్‌ రెడ్డి రంగారెడ్డి జిల్లా చెందిన వారు. ఆయన ప్రస్తుతం టీపీసీసీ మీడియా, కమ్యూనికేషన్‌ ఛైర్మన్‌గా పనిచేస్తున్నారు. పార్టీ ముఖ్య అధికార ప్రతినిధిగా సైతం బాధ్యతలు నిర్వర్తిస్తున్నారని తెలిసిందే. గతంలో రంగారెడ్డి జిల్లా ప్రధాన కార్యదర్శిగా, యూత్‌ కాంగ్రెస్‌ ఉపాధ్యక్షుడిగా, జాతీయ అధికార ప్రతినిధిగా చేశారు. అలాగే 2017లో కాంగ్రెస్ లీగల్‌ సెల్‌ ఉపాధ్యక్షుడిగా, 2019లో పార్టీ అధికార ప్రతినిధిగా కీలక బాధ్యతలు నిర్వహించారు.

ఉమ్మడి వరంగల్‌– ఖమ్మం– నల్లగొండ పట్టభద్రుల స్థానానికి అభ్యర్థిగా కాంగ్రెస్ పార్టీ ప్రకటించిన రాంరెడ్డి సర్వోత్తమ్‌ రెడ్డి సూర్యాపేట జిల్లాకు చెందినవారు. ఈయన మాజీ మంత్రి రాంరెడ్డి దామోదర్‌ రెడ్డి కుమారుడు అని తెలిసిందే. యూత్‌ కాంగ్రెస్‌ రాజకీయాల్లో ఎంతో చురుగ్గా వ్యవహరించేవారు సర్వోత్తమ్‌ రెడ్డి. అదే విధంగా నల్లగొండ జిల్లాలో పార్టీ కోసం కృషి చేస్తున్నారని గుర్తించిన కాంగ్రెస్ అధిష్టానం ఆయనకు గ్రాడ్యుయేట్ ఎమ్మెల్సీ అభ్యర్థిగా ఛాన్స్ ఇచ్చింది. ఏఐసీసీ సభ్యుడిగా ఉన్న ఆయన యూత్‌ కాంగ్రెస్‌లో పలు విభిన్న హోదాల్లో పార్టీకి సేవలు అందించారు.

Suryapet Road Accident: హైదరాబాద్ - ఖమ్మం హైవేపై కారు దగ్ధం, డాక్టర్ సజీవ దహనం కావడంతో విషాదం

Shankar Dukanam — Sun, 20 Sep 2026 11:20:56 +0530

Hyderabad Khammam Highway | సూర్యాపేట: సూర్యాపేట జిల్లా పరిధిలోని హైదరాబాద్ - ఖమ్మం జాతీయ రహదారిపై ఘోర రోడ్డు ప్రమాదం చోటుచేసుకుంది. సూర్యాపేట సమీపంలో గల పిల్లలమర్రి వద్ద ఖమ్మం వైపు వేగంగా వెళ్తున్న ఒక కారు అదుపుతప్పి డివైడర్‌ను బలంగా ఢీకొట్టింది. ఢీకొట్టిన తీవ్రతకు కారులో ఒక్కసారిగా మంటలు చెలరేగి ఓ వ్యక్తి సజీవదహనం అయ్యారు.

ప్రమాదం జరిగిన కొద్ది నిమిషాల్లోనే కారు మొత్తం మంటలు వ్యాపించాయి. మరోవైపు కారులో ఉన్న వ్యక్తి బయటకు రాలేక, లోపలే చిక్కుకుని సజీవ దహనమయ్యాడు. సమాచారం అందుకున్న వెంటనే పోలీసులు సంఘటనా స్థలానికి చేరుకుని కారును పరిశీలించారు. మృతుడు ఎవరనే వివరాలు వెల్లడించారు. మృతుడిని డాక్టర్ కాసకుర్తి జగదీశ్‌గా పోలీసులు గుర్తించారు. ఖమ్మం మమత ఆస్పత్రిలో న్యూరో సర్జన్‌గా జగదీశ్ సేవలు అందిస్తున్నారని గుర్తించారు. ఈ రోడ్డు ప్రమాదంపై పోలీసులు కేసు నమోదు చేసుకుని దర్యాప్తు చేపట్టారు.

Ramchander Rao House Arrest: రాష్ట్ర బీజేపీ అధ్యక్షుడు రామచందర్ రావు హౌస్ అరెస్ట్.. రహదారిపై మంత్రి దిష్టిబొమ్మ దహనం

Shankar Dukanam — Tue, 1 Sep 2026 11:01:57 +0530

Telangana Top News Today | హైదరాబాద్: నల్గొండలో రాజకీయాలు మరోసాయి వేడెక్కాయి. కాంగ్రెస్, బీజేపీ నేతల మధ్య మొదలైన మాటల యుద్ధం, దాడుల వరకు వెళ్లడంతో ఉద్రిక్తతలకు దారితీశాయి. బీజేపీ నేత డాక్టర్ నాగం వర్షిత్ రెడ్డిని పరామర్శించేందుకు వెళ్తున్నట్లు తెలంగాణ బీజేపీ అధ్యక్షుడు రామచందర్ రావు ప్రకటించడంతో పోలీసులు అప్రమత్తమయ్యారు. హైదరాబాద్‌లోని తార్నాకలో ఉన్న రామచందర్ రావు నివాసంలో పోలీసులు ఆయనను హౌస్ అరెస్ట్ చేశారు. నల్గొండ జిల్లా బీజేపీ అధ్యక్షుడి ఇంటికి వెళ్లేందుకు సిద్ధమవుతుండగా, శాంతిభద్రతల పరిరక్షణ దృష్ట్యా పోలీసులు ముందస్తు చర్యగా ఆయనను హౌస్ అరెస్టు చేశారు. పోలీసులతో బీజేపీ నేతలు వాగ్వివాదానికి దిగారు.

నల్గొండ జిల్లాలో ఇటీవల బీజేపీ, కాంగ్రెస్ శ్రేణుల మధ్య తీవ్ర స్థాయిలో ఘర్షణలు చోటుచేసుకున్నాయి. స్థానిక మంత్రి కోమటిరెడ్డి వెంకటరెడ్డి ఆఫీసుపై బీజేపీ కార్యకర్తలు కోడిగుడ్లతో దాడి చేశాయి. అందుకు ప్రతిచర్యగా నల్గొండ జిల్లా బీజేపీ అధ్యక్షుడు వర్షిత్ రెడ్డి నివాసంపై కాంగ్రెస్ కార్యకర్తలు దాడికి పాల్పడటంతో అక్కడ ఉద్రిక్త వాతావరణం నెలకొంది.

నార్కట్‌పల్లి వద్ద జాతీయ రహదారిపై భారీ నిరసన
నల్గొండలో కాంగ్రెస్, బిజెపి శ్రేణుల మధ్య చెలరేగిన రాజకీయ దాడులు తీవ్ర ఉద్రిక్తతకు దారితీశాయి. తమ పార్టీ నాయకులు, కార్యకర్తలపై కాంగ్రెస్ నేతలు జరిపిన దాడులను తీవ్రంగా ఖండిస్తూ, బీజేపీ కార్యకర్తలు మంగళవారం నార్కట్‌పల్లి వద్ద జాతీయ రహదారిపై భారీ నిరసన ప్రదర్శన నిర్వహించారు.

Also Read: Komatireddy Rajgopal Reddy : మునుగోడు నుంచి తాడేపల్లి మీదుగా హైదరాబాద్‌ - తెలంగాణలో వైఎస్సార్‌సీపీకి రాజగోపాల్ రెడ్డి ఊపిరి పోస్తారా?

రాష్ట్ర రోడ్లు, భవనాల శాఖ మంత్రి కోమటిరెడ్డి వెంకటరెడ్డికి వ్యతిరేకంగా బిజెపి శ్రేణులు పెద్దఎత్తున నినాదాలు చేశాయి. ఈ ఆందోళన సందర్భంగా మంత్రి కోమటిరెడ్డి దిష్టిబొమ్మను దహనం చేశాయి. ప్రతిపక్ష నేతలపై భౌతిక దాడులకు దిగడం ప్రజాస్వామ్య సూత్రాలకు విరుద్ధమని పార్టీ నేతలు మండిపడ్డారు. అధికారం చేతిలో ఉందని ప్రతిపక్షాల గొంతు నొక్కేందుకు ప్రయత్నిస్తే చూస్తూ ఊరుకోమని, కాంగ్రెస్ వైఖరిని సహించేది లేదని బీజేపీ నేతలు హెచ్చరించారు.

Konda Surekha Meet CM Revanth Reddy: సీఎం రేవంత్ అపాయింట్‌మెంట్ తీసుకున్న మంత్రి కొండా సురేఖ- వివాదం తర్వాత తొలిసారి భేటీ!

Khagesh — Fri, 28 Aug 2026 08:25:42 +0530

Konda Surekha Meet CM Revanth Reddy: తెలంగాణలో అధికార పార్టీ కాంగ్రెస్‌లో ఆసక్తికరమైన రాజకీయం నడుస్తోంది. ముఖ్యమంత్రి రేవంత్‌ రెడ్డి, ఆయన కుటుంబ సభ్యులపై కాంగ్రెస్ నేతలే దాడి చేయడం సంచలనంగా మారింది. మంత్రి కొండా సురేఖ కుమార్తె సుస్మిత చేసిన కామెంట్స్‌తో విషయం సీరియస్ అయ్యింది. కొండా సురేఖ ఆదేశాలు, ఆలోచనలు లేకుండా సుస్మిత ఇలాంటి కామెంట్స్ చేయబోరని భావిస్తున్న కాంగ్రెస్ నేతలు కొందు మంత్రిపై చర్యలు తీసుకోవాలని డిమాండ్ చేశారు. ఈ చర్చ సాగుతుండగానే రాఖీ పౌర్ణమి రోజున రాఖీ కట్టేందుకు సీఎం అపాయింట్మెంట్ తీసుకున్నారు కొండా సురేఖ. వారం పదిరోజుల నుంచి కొనసాగుతున్న వివాదం తర్వాత ఆమె తొలిసారి ముఖ్యమంత్రితో భేటీ కానున్నారు.

Singareni Gold Copper Exploration : బంగారం, రాగి ఖనిజాల తవ్వకాల్లోకి సింగరేణి! పనులు ప్రారంభించిన భట్టి! విద్యుత్‌ సప్లైలో జాయింట్ వెంచర్!

Khagesh — Fri, 28 Aug 2026 07:46:28 +0530

Singareni Gold Copper Exploration : రెండు పొరుగు రాష్ట్రాల ఇంధన ప్రగతికి, దేశ ఆర్థిక వ్యవస్థ బలోపేతానికి బాటలు వేసేలా ఒక కీలక అడుగు పడింది. తెలంగాణకు చెందిన ప్రభుత్వం రంగ సంస్థ అయిన సింగరేణి, కర్ణాటక విద్యుత్ సంస్థ సంయుక్త భాగస్వామ్యంతో కలిసి పని చేయాలని తెలంగాణ ఉప ముఖ్యమంత్రి మల్లు భట్టి విక్రమార్క ప్రతిపాదించారు. గురువారం బెంగళూరులో కర్ణాటక ఇంధన మంత్రి కేజే జార్జ్‌తో జరిగిన ఉన్నత స్థాయి సమావేశంలో డిప్యూటీ సీఎం ఈ ప్రతిపాదనను అధికారికంగా ముందుకు తెచ్చారు. ఈ చారిత్రాత్మక భేటీలో ఇరు రాష్ట్రాల మధ్య ఇంధన రంగ పురోగతి, నిరంతర బొగ్గు సరఫరా, బొగ్గు కొనుగోళ్ల చెల్లింపులు, సాంకేతికత మార్పిడి వంటి పలు కీలక అంశాలపై విస్తృతంగా చర్చించారు.

మరోవైపు కేంద్ర ప్రభుత్వం నిర్వహించిన టెండర్లలో సింగరేణి సంస్థ దక్కించుకున్న కర్ణాటకలోనే రాయచూరు జిల్లా దేవదుర్గ తాలూకా లింగదహళ్లి గ్రామ పరిదిలోని బంగారం, రాగి ఖనిజాల సర్వే పనులను డిప్యూటీ సీఎం భట్టి విక్రమార్క గురువారం ప్రారంభించారు. ఈ ప్రాజెక్టు విజయవంతమైతే స్థానిక నిరుద్యోగ యువతకు పెద్ద ఎత్తున ఉపాధి లభించడమే కాకుండా, ఈ వెనుకబడిన ప్రాంత అభివృద్ధికి ఊతమిస్తుందని ఆయన ఆశాభావం వ్యక్తం చేశారు.

సింగరేణి-కేపీసీఎల్ జాయింట్ వెంచర్‌

బెంగళూరులో జరిగిన ఈ ఉన్నత స్థాయి సమావేశంలో డిప్యూటీ సీఎం భట్టి విక్రమార్క సింగరేణి సంస్థకు ఉన్న సుదీర్ఘ అనుభవాన్ని ప్రస్తావించారు. బొగ్గు మైనింగ్ రంగంలో సింగరేణికి ఉన్న 137 ఏళ్ల అపారమైన అనుభవం, నైపుణ్యం దేశంలోనే అగ్రగామిగా నిలిపాయని ఆయన గుర్తు చేశారు. ఛత్తీస్‌గఢ్‌, ఒడిశా రాష్ట్రాల్లో కర్ణాటక పవర్ కార్పొరేటషన్ లిమిటెడ్ దక్కించుకున్న క్యాప్టివ్ కోల్ బ్లాకుల్లో మైనింగ్ ప్రక్రియను విజయవంతంగా చేపట్టేందుకు ఈ అనుభవం ఎంతగానో దోహదపడుతుందని వివరించారు. అందువల్ల ఈ కోల్ బ్లాక్‌లలో మైనింగ్ జరిపేందుకు సింగరేణి, కేపీసీఎల్‌ సంస్థలు జాయింట్ వెంచర్‌గా కలిసి పని చేస్తే అత్యుత్తమ ఫలితాలు సాధించవచ్చని భట్టి ప్రతిపాదించారు.

దీనికి ప్రతిగా, పవర్ ప్లాంట్‌ల నిర్వహణలో కర్ణాటక రాష్ట్రానికి ఉన్న విద్యుత్ అనువాన్ని, సాంకేతిక నైపుణ్యాన్ని సింగరేణి పవర్ ప్లాంట్‌ల నిర్వహణలో వినియోగించుకోవచ్చని ఆయన సూచించారు. ఈ ఉమ్మడి సహకారంపై ఇరు రాష్ట్రాల ప్రతినిధులతో సంయుక్తంగా అధ్యయనం చేయాలని ప్రతిపాదించారు.

సానుకూలంగా స్పందించిన కర్ణాటక మంత్రి

తెలంగాణ డిప్యూటీ సీఎం చేసిన ప్రతిపాదనలై కర్ణాటక ఇంధన శాఖ మంత్రి కేజే జార్జ్ సానుకూలంగా స్పందించారు. కర్ణాటకలో పారిశ్రామిక ప్రగతి వేగంగా జరుగుతోందని దీనికి విద్యుత్ అవసరం అవుతుందని అన్నారు. ఈ డిమాండ్‌ను తట్టుకోవడానికి కర్ణాటకలోని ప్లాంట్లకు తెలంగాణ నిరంతరం బొగ్గు సరఫరా చేయాలని కోరారు.

దీనికి భట్టి విక్రమార్క సానుకూలంగా స్పందించారు. కేంద్ర ప్రభుత్వం జారీ చేసిన మార్గదర్శకాలకు అనుగుణంగా కర్ణాటకకు బొగ్గు సరఫరా నిరంతరాయం కొనసాగిస్తామని అన్నారు. ప్రస్తుతం సింగరేణి సంస్థ నుంచి కర్ణాటకలోని ఎర్రమారస్, రాయచూర్, బళ్లారి థర్మల్ ప్లాంట్లకు ఏడాదికి ఏకంగా 10.54 మిలియన్ టన్నుల బొగ్గును సరఫరా చేస్తున్నట్టు ఆయన వెల్లడించారు.

దేవదుర్గ గనుల్లో బంగారం, రాగి నిక్షేపాల అన్వేషణ ప్రారంభం

బెంగళూరు పర్యటన అనంతరం భట్టి విక్రమార్క నేరుగా రాయచూరుజిల్లా దేవ దుర్గ తాలూకా లింగదహళ్లి గ్రామానికి చేరుకున్నారు. సింగరేణి సంస్థ ఆధ్వర్యంలో ఇక్కడ చేపట్టనున్న రాగి, బంగారు ఖనిజాల అన్వేషణ కార్యక్రమాన్ని ప్రారంభించారు. కేంద్ర ప్రభుత్వం నిర్వహించిన పోటీ టెండర్లలో దేవదుర్గ బ్లాక్ ఎక్స్‌ప్లోరేషన్ హక్కులను సింగరేణి సంస్థ విజయవంతంగా దక్కించుకుందని ఆయన గుర్తు చేశారు.

పనులను ప్రారంభించిన తర్వాత భట్టి విక్రమార్క క్షేత్రస్థాయికి వెళ్లి దేవదుర్గ బంగారు ఖనిజ బ్లాక్ వ్యూపాయింట్‌ నుంచి అన్వేషణ చేపట్టనున్న ప్రాంతాలను పరిశీలించారు. రాబోయే రోజుల్లో సింగరేణి సంస్థ ఇక్కడ అన్వేషణ పనులను మరింత వేగంగా చేస్తుందని స్పష్టం చేశారు. ఈ ప్రాజెక్ట్‌ను విజయవంతంగా పూర్తి చేసి దేశ సంపదను పెంపొందించడానికి తెలంగాణ,కర్ణాటక రాష్ట్రాలు కలిసి కట్టుగా కృషి చేయాలని ఆయన పిలుపునిచ్చారు.