nalgonda

Fake Death Certificate: ఫేక్ డెత్ సర్టిఫికెట్‌తో కారుణ్య నియామకం.. నల్గొండలో 14 మంది అరెస్ట్

Shankar Dukanam — Sun, 8 Nov 2026 19:21:24 +0530

Job Scam In Nalgonda District | నకిలీ మరణ ధ్రువీకరణ పత్రాన్ని (Fake Death Certificate) సృష్టించి కారుణ్య నియామకం పొందిన ఘటన సంచలనం రేపింది. నల్గొండ జిల్లా వైద్యారోగ్య శాఖకు సంబంధించిన కేసును పోలీసులు ఛేదించారు. ఈ కేసులో అక్రమంగా ఉద్యోగం సాధించిన వ్యక్తితో పాటు అతనికి ప్రత్యక్షంగా, పరోక్షంగా సహకరించిన బంధువులు, మున్సిపల్ వైద్య ఆరోగ్య శాఖ అధికారులు, సిబ్బందితో కలిపి మొత్తం 14 మందిని పోలీసులు అరెస్టు చేసి రిమాండ్‌కు తరలించారు. ఈ కుట్రలో ప్రమేయం ఉండి ప్రస్తుతం పరారీలో ఉన్న మరో ఇద్దరి కోసం పోలీసులు గాలింపు చర్యలు చేపట్టారు.

పోలీసులు తెలిపిన వివరాల ప్రకారం.. శాలిగౌరారం ప్రాథమిక ఆరోగ్య కేంద్రం (PHC)లో హెల్త్ అసిస్టెంట్‌గా పనిచేసిన చామకూరి వెంకటేశ్వర్లు గతేడాది మే 31న రిటైర్డ్ అయ్యారు. ఆ తర్వాత ఆయన కిడ్నీ సంబంధిత సమస్యలతో చికిత్స పొందుతూ నవంబర్ 17న మరణించారు. అయితే, వెంకటేశ్వర్లు సర్వీస్‌లో ఉండగానే ఆయన చనిపోయినట్లు నకిలీ డెత్ సర్టిఫికెట్ సృష్టించి, ఆయన కుమారుడు చామకూరి రాజు దామరచర్ల పీహెచ్‌సీలో కారుణ్య నియామకం కింద జాబ్ సంపాదించాడు. ఈ నకిలీ సర్టిఫికెట్స్ వ్యవహారం బయటపడటంతో మున్సిపల్ కమిషనర్ పోలీసులకు ఫిర్యాదు చేశారు. కేసు నమోదు చేసి, రంగంలోకి దిగిన పోలీసులు దర్యాప్తు చేపట్టి ఈ ముఠా గుట్టును రట్టు చేశారు.

Also Read: Hyderabad Crime News: హైదరాబాద్‌లో వైన్స్ షాప్ వద్ద ‘చిల్లర’ వివాదం.. సిబ్బంది దాడిలో ఒకరి మృతి

Sathupally NDRF Rescue: సత్తుపల్లి వరదలో గల్లంతైన 11 మంది SDRF సిబ్బంది సేఫ్.. రక్షించిన ఎన్డీఆర్ఎఫ్!

Satyaprasad Bandaru — Thu, 5 Nov 2026 10:27:28 +0530

Sathupally NDRF Rescue: ఖమ్మం జిల్లా సత్తుపల్లి పరిధిలో ఆందోళన కలిగించిన రెస్క్యూ ఆపరేషన్ సుఖాంతమైంది. జలదిగ్బంధంలో చిక్కుకున్న మత్స్యకారులను కాపాడేందుకు వెళ్లిన ఎస్‌డీఆర్‌ఎఫ్ సిబ్బంది ప్రమాదవశాత్తు వరద ఉద్ధృతిలో కొట్టుకుపోయారు. దీంతో ఎన్డీఆర్‌ఎఫ్ బృందాలు, సత్తుపల్లి పోలీసులు సకాలంలో స్పందించడంతో ఎస్డీఆర్ఎఫ్ సిబ్బంది ప్రాణాలతో బయటపడ్డారు.

అసలేం జరిగింది?

గత కొద్ది రోజులుగా కురుస్తున్న భారీ వర్షాలతో సత్తుపల్లి పరిధిలో వాగులు, చెరువులు పొంగిపొర్లుతున్నాయి. వరద నీటిలో చిక్కుకున్న కొంతమంది మత్స్యకారులను సురక్షిత ప్రాంతాలకు తరలించేందుకు ఎస్‌డీఆర్‌ఎఫ్ సిబ్బంది రంగంలోకి దిగారు. అయితే, వరద ప్రవాహం ఒక్కసారిగా పెరగడంతో సహాయక చర్యల్లో ఉన్న ఎస్‌డీఆర్‌ఎఫ్ సిబ్బంది ప్రవాహంలో కొట్టుకుపోయి గల్లంతయ్యారు.

ఎన్డీఆర్‌ఎఫ్ రెస్క్యూ ఆపరేషన్

గల్లంతైన సిబ్బంది కోసం ఎన్డీఆర్‌ఎఫ్ బృందాలు వెంటనే గాలింపు చర్యలు చేపట్టాయి. తెల్లవారుజామున ప్రవాహంలో చిక్కుకున్న 6 గురు ఎస్‌డీఆర్‌ఎఫ్ సిబ్బందిని సహాయక బృందాలు సురక్షితంగా కాపాడాయి. ఆ తర్వాత మరికొద్ది సేపటికి మరొక 4 గురిని రెస్క్యూ చేసి ప్రాణాలతో కాపాడారు. ఇక మరో సిబ్బంది వరద ఉద్ధృతి నుంచి ప్రాణాలు దక్కించుకోవడానికి ఒక చెట్టుపైకి ఎక్కి ఆశ్రయం పొందినట్లు గుర్తించిన బృందాలు, సాహసోపేతంగా రెస్క్యూ ఆపరేషన్ నిర్వహించి అతడిని కూడా క్షేమంగా కిందకు దింపాయి.

ఆసుపత్రికి తరలింపు

రెస్క్యూ చేసిన ఎస్‌డీఆర్‌ఎఫ్ సిబ్బందికి ప్రాథమిక చికిత్స అనంతరం, సత్తుపల్లి పోలీసులు మెరుగైన వైద్యం కోసం సత్తుపల్లి ప్రభుత్వ ఆసుపత్రికి తరలించారు. ప్రస్తుతం వారందరి ఆరోగ్యం స్థిరంగా ఉందని వైద్యులు తెలిపారు. వరదల్లో చిక్కుకున్న వారిని కాపాడేందుకు వెళ్లి తమ ప్రాణాలను పణంగా పెట్టిన సిబ్బంది అందరూ క్షేమంగా బయటపడటంతో అధికారులు, స్థానికులు ఊపిరి పీల్చుకున్నారు.

Also Read: కాంగ్రెస్ సీఎంలను హైకమాండ్ కించ పరుస్తుందా? కనీస గౌరవం కూడా ఇవ్వదా?

అందరూ క్షేమంగానే

ఐదుగురు మత్స్యకారులను కాపాడటానికి 10 ఎస్డీఆర్ఎఫ్ సిబ్బంది, స్థానికుడు ఒకరు రాత్రి 7.30 గంటలకు రెండు బోట్లలో బయలుదేరారు. సిబ్బందిలో ఆరుగురు కొత్తగూడెం బెటాలియన్‌కు చెందిన పోలీసులు, మిగిలిన నలుగురు అగ్నిమాపక సిబ్బంది ఉన్నారు. సిబ్బంది పడవలు వరద ఉద్ధృతికి బోల్తా పడడంతో అలుగునీటిలో గల్లంతయ్యారు. గల్లంతైన వారిలో కొందరు ఒకేచోట ఉన్నారని, తమతో ఫోన్‌లో మాట్లాడారని జిల్లా అగ్నిమాపకశాఖ అధికారి అజయ్‌కుమార్‌ పేర్కొన్నారు. రాత్రి 2.15 గంటలకు ఒకరిని, రాత్రి 3.00 గంటలకు నలుగురిని రక్షించారు. మిగిలిన వారిని సైతం గుర్తించి రక్షించారు. కలెక్టర్‌ రాత్రి 3 గం.ల వరకు ఘటనాస్థలంలో ఉండి పరిస్థితిని పర్యవేక్షించారు.

అంతకుముందు వరదలో చిక్కుకున్న ఐదుగురు మత్స్యకారులు ఓ మట్టి దిబ్బపైకి వెళ్లారు. నీళ్లు కాళ్ల వరకు వచ్చేయడంతో ఒకరికొకరు చేతులు పట్టుకొని సహాయం కోసం వేడుకున్నారు. రాత్రి 10.30 గంటలకు విజయవాడకు చెందిన ఎన్డీఆర్‌ఎఫ్‌ బృందం వీరి వద్దకు చేరుకుని, రాత్రి 11.20 గంటలకు క్షేమంగా బయటకు తీసుకొచ్చింది. ఈ ఘటనపై సీఎం రేవంత్ రెడ్డి, డిప్యూటీ సీఎం భట్టి విక్రమార్క ఆరా తీశారు.

Also Read: ఎమ్మెల్సీ ఓటరు నమోదుకు చివరి తేదీ నవంబర్ 6.. పట్టభద్రుల ఓట్లపై కాంగ్రెస్ ఫోకస్!

Telangana Graduates MLC Election: ఎమ్మెల్సీ ఓటరు నమోదుకు చివరి తేదీ నవంబర్ 6.. పట్టభద్రుల ఓట్లపై కాంగ్రెస్ ఫోకస్!

Hema Nidadhana — Thu, 5 Nov 2026 06:30:55 +0530

హైదరాబాద్: తెలంగాణలో పట్టభద్రుల ఎమ్మెల్సీ ఎన్నికలకు రాజకీయ పార్టీలు ఇప్పటి నుంచే కసరత్తు ప్రారంభించాయి. వచ్చే ఏడాది మార్చిలో జరగనున్న రెండు పట్టభద్రుల ఎమ్మెల్సీ స్థానాల ఎన్నికలను దృష్టిలో పెట్టుకొని ఓటరు నమోదు ప్రక్రియపై ప్రత్యేక దృష్టి సారించాయి. ఈ క్రమంలో పట్టభద్రుల ఓటరు నమోదుకు నవంబర్ 6 చివరి తేదీగా ఎన్నికల అధికారులు ప్రకటించారు.

వరంగల్– ఖమ్మం– నల్గొండ, మహబూబ్‌నగర్– రంగారెడ్డి– హైదరాబాద్ పట్టభద్రుల నియోజకవర్గాలకు సంబంధించి కొత్త ఓటర్ల జాబితా రూపొందిస్తున్నారు. అర్హులైన పట్టభద్రులు ఫారం-18 ద్వారా దరఖాస్తు చేసుకోవాలని తెలంగాణ రాష్ట్ర ప్రధాన ఎన్నికల అధికారి సి. సుధర్శన్ రెడ్డి సూచించారు.

ఓటర్ల జాబితాపై CEO కీలక ప్రకటన

ఓటరు నమోదుకు నవంబర్ 6 చివరి తేదీ అయినప్పటికీ.. ఆ తర్వాత కూడా దరఖాస్తులు స్వీకరించే అవకాశం ఉందని CEO స్పష్టం చేశారు. నవంబర్ 25న ముసాయిదా ఓటర్ల జాబితా ప్రకటించనున్నారు. నవంబర్ 25 నుంచి డిసెంబర్ 10 వరకు అభ్యంతరాలు, అభ్యర్థనలు స్వీకరిస్తారు. డిసెంబర్ 30న తుది ఓటర్ల జాబితా ప్రచురించనున్నారు.

అంతేకాదు.. డిసెంబర్ 30న తుది జాబితా ప్రచురించిన తర్వాత కూడా నామినేషన్ల దాఖలుకు చివరి తేదీ వరకు అర్హులైన పట్టభద్రులు ఫారం-18 ద్వారా దరఖాస్తు చేసుకోవచ్చని ఎన్నికల అధికారులు స్పష్టం చేశారు.

ఇప్పటికే గతంలో పట్టభద్రుల ఓటర్లుగా నమోదైన వారు కూడా కొత్తగా దరఖాస్తు చేసుకోవాల్సి ఉంటుంది. ఆన్‌లైన్‌లో తెలంగాణ CEO వెబ్‌సైట్ ద్వారా లేదా సంబంధిత ఎన్నికల అధికారులకు నేరుగా ఫారం-18 సమర్పించవచ్చు.

పట్టభద్రుల ఓట్లపై కాంగ్రెస్ ప్రత్యేక వ్యూహం

మరోవైపు అధికార కాంగ్రెస్ పార్టీ పట్టభద్రుల ఓటరు నమోదును రాజకీయంగా కీలకంగా భావిస్తోంది. రెండు ఎమ్మెల్సీ స్థానాల్లో పార్టీ అభ్యర్థుల విజయమే లక్ష్యంగా ఓటర్ల నమోదుపై దృష్టి సారిస్తోంది. అర్హులైన పట్టభద్రులను గుర్తించడం, వారితో దరఖాస్తులు చేయించడం, ఓటరు నమోదుపై అవగాహన కల్పించడం వంటి అంశాలపై పార్టీ శ్రేణులు దృష్టి పెట్టాల్సిన అవసరం ఉంది.

ముఖ్యంగా యువత, ఉద్యోగులు, నిరుద్యోగ పట్టభద్రులు, విద్యావంతులను ఓటర్లుగా నమోదు చేయించడం ద్వారా ఎన్నికల సమయానికి బలమైన ఓటు బ్యాంకును సిద్ధం చేసుకోవాలన్నది కాంగ్రెస్ రాజకీయ లక్ష్యంగా కనిపిస్తోంది.

Also Read: MLC Elections: ఎమ్మెల్సీ ఎన్నికల్లో లెఫ్ట్ పార్టీల మద్దతుపై కాంగ్రెస్ ఫోకస్.. రేవంత్ వ్యూహం ఏంటి?

రెండు స్థానాలు.. కాంగ్రెస్‌కు ప్రతిష్టాత్మకం!

మహబూబ్‌నగర్– రంగారెడ్డి– హైదరాబాద్ నియోజకవర్గం నుంచి సామ రామ్మోహన్ రెడ్డి, వరంగల్–ఖమ్మం–నల్గొండ నియోజకవర్గం నుంచి రాంరెడ్డి సర్వోత్తమ్ రెడ్డిని కాంగ్రెస్ పార్టీ అభ్యర్థులుగా ప్రకటించింది.

ఈ నేపథ్యంలో ఓటరు నమోదు ప్రక్రియలో కాంగ్రెస్ ఎంత చురుగ్గా వ్యవహరిస్తుంది? పార్టీ శ్రేణులు ఎంతమంది పట్టభద్రులను ఓటర్లుగా నమోదు చేయిస్తాయి? నమోదు అయిన ఓట్లు ఎన్నికల్లో కాంగ్రెస్ అభ్యర్థులకు ఎంతవరకు కలిసివస్తాయి? అనేది ఆసక్తికరంగా మారింది. ఎమ్మెల్సీ ఎన్నికలకు ముందే ఓటర్ల నమోదుపై సాగుతున్న ఈ రాజకీయ పోరు రాబోయే రోజుల్లో మరింత వేడెక్కే అవకాశం ఉంది.

Mallanna Sagar Reservoir: మల్లన్నసాగర్ వద్ద బ్లాస్టింగ్స్, నీటి లీకేజీ అవాస్తవం.. హరీశ్ రావు ఆరోపణలపై HMWS డైరెక్టర్ మహేష్ క్లారిటీ

Satyaprasad Bandaru — Sat, 31 Oct 2026 18:25:27 +0530

Mallanna Sagar Reservoir: సిద్దిపేట జిల్లా మల్లన్నసాగర్ రిజర్వాయర్ తిప్పారం వద్ద జరుగుతున్న పనులపై సోషల్ మీడియాలో వస్తున్న పుకార్లపై జలమండలి, ఇరిగేషన్ శాఖ అధికారులు జాయింట్ మీడియా సమావేశం నిర్వహించారు. ఈ సందర్భంగా HMWS డైరెక్టర్ మహేష్ మాట్లాడుతూ.. మల్లన్నసాగర్ వద్ద బ్లాస్టింగ్స్ జరుగుతున్నాయని, కట్ట నుండి నీరు లీక్ అవుతోందని వస్తున్న వార్తల్లో ఎలాంటి నిజం లేదని క్లారిటీ ఇచ్చారు.

HMWS డైరెక్టర్ మహేష్ కీలక వ్యాఖ్యలు

"ప్రాజెక్ట్ వద్ద ఎలాంటి పేలుళ్లు జరపడం లేదు. రిజర్వాయర్ నుంచి 519 మీటర్ల దూరంలో సురక్షితంగా స్మిస్ పైప్‌లైన్ పనులు జరుగుతున్నాయి. పంప్ హౌస్ నిర్మాణం కోసం 190 మీటర్ల పొడవు, 50 మీటర్ల వెడల్పు మరియు లోతుతో పనులు చేపడుతున్నాం. బండరాళ్లను పగలగొట్టడానికి కెమికల్స్, రాక్ డ్రిల్లింగ్ మిషన్లు, 'ఈసీ క్రిస్టల్ సైలెంట్ డ్రిల్లర్ పౌడర్'ల వంటి అత్యంత సురక్షితమైన సాంకేతికతను మాత్రమే ఉపయోగిస్తున్నాం. రూ.7,360 కోట్ల అంచనా వ్యయంతో ఈ పైప్‌లైన్ పనులను ప్రభుత్వం చేపట్టింది. హైదరాబాద్ జంట నగరాల ప్రజలకు నిరంతర తాగునీటిని అందించడమే ఈ ప్రాజెక్ట్ ప్రధాన లక్ష్యం. మల్లన్నసాగర్ కట్ట నుంచి జలాశయ నీళ్లు లీక్ కావడం లేదు. సహజ సిద్ధంగా రాళ్ల మధ్య నుంచి వస్తున్న నీటిని చూసి లీకేజీ అనడం అవాస్తవం. ప్రాజెక్ట్ పూర్తయితే జంట నగరాలలోని 1.30 కోట్ల నుండి 1.50 కోట్ల జనాభా తాగునీటి అవసరాల కోసం ఏడాదికి 20 టీఎంసీల నీటిని తరలించనున్నాం. మల్లన్నసాగర్ కట్టకు 293 మీటర్ల దూరంలో పంప్ హౌస్ పనులు జరుగుతున్నాయి" - HMWS డైరెక్టర్ మహేష్

Also Read: గవర్నర్ కోటా ఎమ్మెల్సీలపై కాంగ్రెస్ కసరత్తు.. రేసులో ఉన్నది వీరే!

మాజీ మంత్రి హరీశ్ రావు విమర్శలు

మల్లన్నసాగర్ రిజర్వాయర్ వద్ద జరుగుతున్న పనులపై మాజీ మంత్రి, సిద్దిపేట ఎమ్మెల్యే తనీరు హరీశ్ రావు తీవ్ర ఆందోళన వ్యక్తం చేశారు. మల్లన్నసాగర్ వంటి భారీ రిజర్వాయర్ కట్టకు అతి సమీపంలో భారీ యంత్రాలతో తవ్వకాలు జరపడం, కెమికల్ డ్రిల్లింగ్స్ చేపట్టడం వల్ల కట్ట స్థిరత్వానికి ప్రమాదం ఏర్పడే అవకాశం ఉందన్నారు. 50 టీఎంసీల సామర్థ్యం ఉన్న జలాశయం కింద వేలాది గ్రామాలు, ప్రజలు నివసిస్తున్నారని, ప్రభుత్వం తాగునీటి ప్రాజెక్ట్ పేరుతో తొందరపాటు నిర్ణయాలు తీసుకుంటూ ప్రజల ప్రాణాలతో చెలగాటమాడుతోందని విమర్శించారు. రిజర్వాయర్ సురక్షితంగా ఉండేలా నిపుణుల కమిటీతో పూర్తిస్థాయి విచారణ జరిపే వరకు ఈ తవ్వకాలను తక్షణమే నిలిపివేయాలని హరీశ్ రావు డిమాండ్ చేశారు.

Also Read: ఒమేగా హాస్పిటల్స్‌పై ఐటీ దాడులు.. 5 రాష్ట్రాల్లోని 24 ప్రాంతాల్లో విస్తృత సోదాలు

Harish Rao On Mallanna Sagar: మల్లన్న సాగర్ కట్ట దగ్గరలో అక్రమ బ్లాస్టింగ్‌లు.. కూల్చి వేసేందుకు కుట్ర జరుగుతోందా? - హరీష్ రావు

Satyaprasad Bandaru — Fri, 30 Oct 2026 11:21:00 +0530

Harish Rao On Mallanna Sagar: సిద్దిపేట జిల్లాలోని మల్లన్న సాగర్ ప్రాజెక్టు భద్రతపై మాజీ మంత్రి, సిద్దిపేట ఎమ్మెల్యే హరీష్ రావు ఆందోళన వ్యక్తం చేశారు. ప్రాజెక్టు కట్టకు సమీపంలో ఎలాంటి అనుమతులు లేకుండా అర్ధరాత్రి వేళల్లో దొంగతనంగా బ్లాస్టింగ్‌లు నిర్వహిస్తున్నారని ఆయన ఆరోపించారు. కాళేశ్వరం ప్రాజెక్టును దెబ్బతీసేందుకు, మేడిగడ్డ తరహాలోనే మల్లన్న సాగర్‌ను కూడా కూల్చివేసేందుకు కుట్ర జరుగుతోందా అని ఆయన ప్రభుత్వాన్ని ప్రశ్నించారు.

నిబంధనలకు విరుద్ధంగా పేలుళ్లు

సాధారణంగా జలాశయాల కట్టలకు కనీసం 400 మీటర్ల దూరంలో, అదీ అన్ని రకాల చట్టబద్ధమైన అనుమతులతో మాత్రమే బ్లాస్టింగ్ నిర్వహించాలనే నిబంధనలు ఉన్నాయి. కానీ, మల్లన్న సాగర్ వద్ద కట్టకు కేవలం 100 మీటర్ల లోపలే జిలెటిన్ స్టిక్స్ ఉపయోగిస్తూ పేలుళ్లు జరుపుతున్నారని హరీష్ రావు ఆరోపించారు. ఈ అక్రమ కార్యకలాపాలకు ఇరిగేషన్ శాఖ, పోలీస్ శాఖ లేదా స్థానిక గ్రామ పంచాయతీ నుంచి ఎలాంటి అనుమతులు లేవని స్థానిక సర్పంచ్ స్వయంగా చెప్పినట్లు పేర్కొన్నారు. గత రెండు, మూడు నెలలుగా అర్ధరాత్రి వేళల్లో ఈ దొంగ బ్లాస్టింగ్‌లు కొనసాగుతున్నాయని ఆరోపించారు.

కట్ట లీకేజీలు, ఇండ్ల పగుళ్లు

ఈ అక్రమ బ్లాస్టింగ్‌ల ధాటికి కిలోమీటరు దూరంలో ఉన్న గ్రామాల ఇండ్లు తీవ్రంగా ప్రకంపనలకు గురై పగుళ్లు బారిన పడుతున్నాయని స్థానికులు భయాందోళన వ్యక్తం చేస్తున్నారు. అంతేకాకుండా, పేలుళ్ల ప్రభావంతో మల్లన్న సాగర్ కట్ట బీటలు వారి, అక్కడక్కడ లీకేజీలు ప్రారంభమైనట్లు స్థానికులు చెబుతున్నారని హరీష్ రావు తెలిపారు. స్థానిక ప్రజలు అధికారులకు, పోలీసులకు సమాచారం ఇచ్చినా "మాకు తెలీదు, సమాచారం లేదు" అంటూ నిర్లక్ష్యంగా సమాధానం ఇస్తున్నారని మండిపడ్డారు.

రాజకీయ కోణం

కాళేశ్వరం ఎత్తిపోతల పథకంలో 50 టీఎంసీల నీటి నిల్వ సామర్థ్యంతో నిర్మించిన కీలకమైన ప్రాజెక్టు మల్లన్న సాగర్. తెలంగాణ ఉమ్మడి మెదక్, నల్గొండ, నిజామాబాద్ జిల్లాల సాగునీటి, తాగునీటి అవసరాలకు ఇదే ఆధారం. గతంలో కాళేశ్వరం ప్రాజెక్టులోని మేడిగడ్డ బ్యారేజీ పిల్లర్లు కుంగిన ఘటన రాజకీయంగా తీవ్ర దుమారం రేపిన సంగతి తెలిసిందే. ఆ క్రమంలోనే కాళేశ్వరం ప్రాజెక్టు రూపురేఖలను, బీఆర్ఎస్ నిర్మించిన భారీ నిర్మాణాలను దెబ్బతీసే లక్ష్యంతోనే కాంగ్రెస్ ప్రభుత్వం ఈ అక్రమ బ్లాస్టింగ్‌లను ప్రోత్సహిస్తోందని హరీష్ రావు ఆరోపిస్తున్నారు.

Also Read: ఎల్‌నినో పొలిటికల్ గేమ్ - ఆంధ్రాలో కరువు లేదంటున్న కేటీఆర్ - రేవంత్‌ను ఇరికించడానికేనా?

ఈ బ్లాస్టింగులపై సమగ్ర విచారణ జరిపించి, బాధ్యులైన వారిపై తక్షణమే చర్యలు తీసుకోవాలని, ప్రాజెక్టు భద్రతకు సంబంధించి ఇరిగేషన్ నిపుణులతో తనిఖీలు నిర్వహించాలని ప్రజలు, ప్రతిపక్షాలు డిమాండ్ చేస్తున్నాయి.

Also Read: హైదరాబాద్‌లో 9 నియోజకవర్గాలకు తాగునీటి ముప్పు.. అప్రమత్తమైన రాష్ట్ర ప్రభుత్వం

Hyderabad Air Pollution: హైదరాబాద్ సహా పలు నగరాల్లో తీవ్ర వాయుకాలుష్యం.. జాతీయ పరిమితి కంటే అధికం

Shankar Dukanam — Fri, 23 Oct 2026 10:25:29 +0530

Air Pollution in Hyderabad | హైదరాబాద్: రోజురోజుకూ పెరిగిపోతున్న కాలుష్యం స్లో పాయిజన్‌లా మారి మనుషుల ప్రాణాలు తీసేస్తుంది. ముఖ్యంగా హైదరాబాద్, నల్గొండ, సంగారెడ్డి నగరాల్లో గాలి నాణ్యత క్షీణిస్తుండటం తీవ్ర ఆందోళన కలిగిస్తోంది. జాతీయ స్వచ్ఛ వాయు (NCAP) కార్యక్రమం పరిధిలోకి వచ్చే ఈ ప్రాంతాల్లో వాహనాల పొగ, పరిశ్రమల వ్యర్థాలు, రోడ్లపై లేచే దుమ్ము, ధూళి, నిరంతర నిర్మాణ కార్యకలాపాల వల్ల ఆరోగ్యకరమైన గాలి వీచడం కష్టంగా మారింది.

2025-26 వార్షిక సగటు గణాంకాల ప్రకారం, సూక్ష్మ ధూళి కణాలైన పీఎం-10 (PM-10) స్థాయిలు జాతీయ ప్రమాణాలను మించి నమోదవడంతో పరిస్థితి అదుపు తప్పుతోంది. హైదరాబాద్‌లో జాతీయ పరిమితి కంటే 33.3 శాతం అధికంగా కాలుష్యం నమోదు కాగా, సంగారెడ్డిలో 30 శాతం, నల్గొండలో 18.3 శాతం మేర అధికంగా నమోదవుతోంది.

కేంద్ర కాలుష్య నియంత్రణ మండలి (CPCB) నిబంధనల ప్రకారం, గాలిలో పీఎం-10 వార్షిక సగటు క్యూబిక్ మీటరుకు 60 మైక్రోగ్రాములకు మించరాదని నిపుణులు చెబుతున్నారు. అయితే 2025-26 లెక్కల ప్రకారం హైదరాబాద్‌లో ఈ స్థాయి 80 మైక్రోగ్రాములు ఉండగా, సంగారెడ్డిలో 78 మైక్రోగ్రాములు, నల్గొండలో 71 మైక్రోగ్రాములుగా నమోదైంది. ప్రపంచ ఆరోగ్య సంస్థ (WHO) నిర్దేశించిన ప్రమాణాల ప్రకారం పీఎం-10 వార్షిక సగటు కేవలం 15 మైక్రోగ్రాములు మాత్రమే ఉండాలి. కానీ హైదరాబాద్‌లో డబ్ల్యూహెచ్‌ఓ పరిమితి కంటే 5.3 రెట్లు ఎక్కువగా ఉండగా, సంగారెడ్డిలో 5.2 రెట్లు, నల్గొండలో 4.7 రెట్లు అధికంగా ప్రమాదకర స్థాయిల్లో కాలుష్యం ఉంది.

ఈ సూక్ష్మ ధూళి కణాలు శ్వాస వ్యవస్థ ద్వారా శరీరంలోకి ప్రవేశించి మీ ఊపిరితిత్తులతో పాటు రక్తప్రసరణ వ్యవస్థపై తీవ్ర ప్రభావం చూపుతాయని వైద్య నిపుణులు హెచ్చరిస్తున్నారు. 2019లో ప్రారంభించిన ‘జాతీయ స్వచ్ఛ వాయు’ కార్యక్రమం వల్ల హైదరాబాద్‌లో కాలుష్య తీవ్రత పోలిస్తే కొంత తగ్గినప్పటికీ, ఇప్పటికీ సాధారణ స్థాయిల కంటే 33.3 శాతం ఎక్కువగా ఉండటం తీవ్ర ఆందోళన కలిగిస్తోంది. దీర్ఘకాలం ఈ కాలుష్య గాలిని పీల్చడం వల్ల తీవ్రమైన శ్వాసకోశ, గుండె సంబంధిత వ్యాధులు సంభవించే ప్రమాదం ఉందని WHO హెచ్చరిస్తోంది. ముఖ్యంగా పిల్లలు, వృద్ధులు, ఆస్తమా, ఊపిరితిత్తులు, గుండె సంబంధిత సమస్యలతో బాధపడేవారిపై వాయు కాలుష్యం ప్రభావం మరీ ఎక్కువగా ఉంటుంది.

Graduate MLC Election: తొలిసారి ఎన్నికల బరిలోకి కవిత పార్టీ.. తొలి ఎమ్మెల్సీ అభ్యర్థి పేరు ప్రకటన

Shankar Dukanam — Tue, 20 Oct 2026 14:49:22 +0530

Telangana Rakshana Sena MLC Candidate | హైదరాబాద్: తెలంగాణ రక్షణ సేన పార్టీ రాజకీయాల్లో కీలక పరిణామం చోటుచేసుకుంది. కొత్తగా ఏర్పాటైన టీఆర్ఎస్ (Telangana Rakshana Sena) పార్టీ తొలిసారి ప్రత్యక్ష ఎన్నికల బరిలోకి దిగుతుంది. ఈ క్రమంలో వరంగల్- ఖమ్మం- నల్గొండ పట్టభద్రుల (గ్రాడ్యుయేట్) ఎమ్మెల్సీ స్థానానికి తమ అభ్యర్థిని తెలంగాణ రక్షణ సేన ప్రకటించింది. తెలంగాణ ఉద్యమంలో చురుగ్గా పాల్గొన్న డాక్టర్ నలమాస శ్రీకాంత్‌గౌడ్‌ను ఈ ఎన్నికల బరిలో తమ అభ్యర్థిగా ఎంపిక చేసినట్లు పార్టీ అధ్యక్షురాలు కల్వకుంట్ల కవిత వెల్లడించారు.

దసరా పండుగ శుభసందర్భంగా శ్రీకాంగ్ గౌడ్‌ను తమ పార్టీ గ్రాడ్యుయేట్ ఎమ్మెల్సీ అభ్యర్థిగా కవిత ప్రకటించారు. ఈ ఎమ్మెల్సీ స్థానంలో ఎన్నికల సమన్వయం, పర్యవేక్షణ కోసం స్టేట్ పార్టీ అబ్జర్వర్‌గా సయ్యద్ ఇస్మాయిల్‌ను నియమించినట్లు కవిత తెలిపారు. ఈ ప్రకటనతో గ్రాడ్యుయేట్ ఎమ్మెల్సీ ఎన్నికల్లో కవిత పార్టీ పోటీకి సిద్ధమైనట్లు స్పష్టం చేసింది. అభ్యర్థి ప్రకటనతో పట్టభద్రుల ఎన్నికల ప్రచారాన్ని మరింత వేగవంతం చేయాలని పార్టీ నిర్ణయించింది.

మహబూబాబాద్ జిల్లా నర్సింహుల పేట మండలంలోని కౌసల్యాదేవిపల్లికి చెందిన శ్రీకాంత్ గౌడ్ ను టీఆర్ఎస్ అభ్యర్థిగా ప్రకటించింది. కాకతీయ యూనిర్సిటీ నుంచి పీహెచ్‌డీ చేసిన ఆయన తెలంగాణ సాధన ఉద్యమంలో క్రియాశీలకంగా వ్యవహరించారు. తెలంగాణ జాగృతిలో కవిత వెంట నడిచారు. తెలంగాణ రక్షణ సేన పార్టీ ప్రతినిధిగా ప్రజా సంఘాల సమావేశాల్లో, టీవీ డిబేట్లలో పాల్గొని టీఆర్ఎస్ గొంతుకగా నిలిచారు. బహుజనుల కోసం పోరాటం చేస్తానని ప్రకటించిన కవిత తన పార్టీ నుంచి తొలి అభ్యర్థిగా బీసీ బిడ్డ శ్రీకాంత్ గౌడ్‌ వైపు మొగ్గు చూపారు. గ్రాడ్యుయేట్ ఎమ్మెల్సీ ఎన్నికల్లో ఆయనను గెలిపించాలని కవిత పట్టభద్రులను కోరారు.

తెలంగాణ రక్షణ సేన కరీంనగర్ జిల్లా కమిటీని ప్రకటించిన పార్టీ అధ్యక్షురాలు శ్రీమతి కల్వకుంట్ల కవిత గారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను నియమించారు. https://t.co/iXqovrM955
— Telangana Rakshana Sena (@TRSparty_HQ) October 20, 2026

తెలంగాణ రక్షణ సేన కరీంనగర్ జిల్లా కమిటీని పార్టీ అధ్యక్షురాలు కల్వకుంట్ల కవిత తాజాగా ప్రకటించారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను ఆమె నియమించారు.

LB Nagar Hayathnagar Double Decker Corridor: ఎల్బీనగర్ - హయత్ నగర్ డబల్ డెక్కర్ ఎలివేటెడ్ కారిడార్, 5 రోప్ వే లకు కేంద్రం ఆమోదం

Shankar Dukanam — Tue, 13 Oct 2026 13:15:50 +0530

న్యూఢిల్లీ/ హైదరాబాద్: ఎల్బీనగర్ - హయత్ నగర్ డబుల్ డెక్కర్ ఎలివేటెడ్ కారిడార్ నిర్మాణం సహా తెలంగాణ రాష్ట్రంలోని పలు కీలక రహదారులు, ప్రాజెక్టులకు కేంద్ర రోడ్డు రవాణా, రహదారుల శాఖ నితిన్ గడ్కరీ ఆమోదం తెలిపారు. తెలంగాణ రాష్ట్ర రహదారులు, భవనాల శాఖ మంత్రి కోమటిరెడ్డి వెంకట్ రెడ్డి ఢిల్లీలో కేంద్ర మంత్రి నితిన్ గడ్కరీతో మంగళవారం ప్రత్యేకంగా భేటీ అయి పలు ప్రాజెక్టులపై చర్చించారు. కృష్ణా నదిపై అత్యంత ప్రతిష్టాత్మకంగా నిర్మించతలపెట్టిన ఐకానిక్ కేబుల్ బ్రిడ్జి నిర్మాణ శంకుస్థాపన ప్రతిపాదనకు కూడా కేంద్రం గ్రీన్ సిగ్నల్ ఇచ్చింది. హైదరాబాద్ - శ్రీశైలం (NH 765) రహదారిపై ఎలివేటెడ్ కారిడార్ ఏర్పాటు విజ్ఞప్తిపై స్పందించిన నితిన్ గడ్కరీ.. కొత్తగా డీపీఆర్ సిద్ధం చేయాలని అధికారులను ఆదేశించారు.

జాతీయ రహదారులు, 5 రోప్‌వేలకు ఆమోదం

ఈ భేటీలో తెలంగాణ రహదారుల రంగానికి సంబంధించి మరిన్ని కీలక నిర్ణయాలు తీసుకున్నారు. పర్వతమాల పథకం ద్వారా తెలంగాణలో 5 రోప్‌వేల ఏర్పాటుకు, సేతు బంధన్ పథకం ద్వారా 3 ఆర్‌వోబీ (ROB)ల నిర్మాణానికి కేంద్రమంత్రి గడ్కరీ ఆమోదం తెలిపారు. హైదరాబాద్ - అమరావతి గ్రీన్ ఫీల్డ్ హైవే నిర్మాణంపై సానుకూలంగా స్పందించారని కోమటిరెడ్డి వెంకట్ రెడ్డి తెలిపారు.

తెలంగాణలోని 34 పనులకు సీఆర్‌ఐఎఫ్ (CRIF) నిధులు మంజూరు చేయాలని కోరగా అందుకు తగిన చర్యలు తీసుకోవాలని అధికారులను కేంద్ర మంత్రి గడ్కరీ ఆదేశించారు. వీటితో పాటు పుల్లూరు - అలంపూర్ - జట్రపోలు - పెంట్లవెల్లి - కొల్లాపూర్ - లింగాల - అచ్చంపేట - డిండి - దేవరకొండ - మల్లేపల్లి - నల్గొండ రాష్ట్ర రహదారులను జాతీయ రహదారులుగా గుర్తించాలని చేసిన విజ్ఞప్తిపై సానుకూలంగా స్పందించారని తెలుస్తోంది. హైదరాబాద్‌లో నవంబర్ 19 నుండి 22 వరకు జరగనున్న ఇండియన్ రోడ్ కాంగ్రెస్ (IRC) సమావేశాలకు కేంద్రమంత్రిని ఆహ్వానించగా, అందుకు నితిన్ గడ్కరీ సానుకూలంగా స్పందించి తప్పకుండా హాజరవుతానని తెలిపారు.

నితిన్ గడ్కరీ, కోమటి రెడ్డి ప్రత్యేక భేటీలో అంశాలివే..

- ఎల్బీనగర్ - హయత్ నగర్ డబల్ డెక్కర్ ఎలివేటెడ్ కారిడార్‌కు కేంద్రం ఆమోదం

- కృష్ణా నదిపై ఐకానిక్ కేబుల్ బ్రిడ్జి నిర్మాణానికి సంబంధించిన శంకుస్థాపన ప్రతిపాదనకు ఆమోదం తెలిపిన నితిన్ గడ్కరీ

- హైదరాబాద్ - శ్రీశైలం NH 765పై ఎలివేటెడ్ కారిడార్ కి విజ్ఞప్తిపై కొత్త డీపీఆర్ సిద్ధం చేయాలని అధికారులకు ఆదేశాలు

- పర్వతమాల పథకం ద్వారా తెలంగాణకు 5 రోప్ వే లకు కేంద్రమంత్రి గడ్కరీ ఆమోదం

- హైద్రాబాద్ - అమరావతి గ్రీన్ ఫీల్డ్ హైవే పై సానుకూలంగ స్పందించిన కేంద్ర మంత్రి

- సేతు బంధన్ పథకం ద్వారా 3 ఆర్ఓబి లకు ఆమోదం

- తెలంగాణ లో 34 పనులకు సీఆర్ఐఎఫ్ (CRIF) నిధులను మంజూరు చేయాలని మంత్రి కోరగా కేంద్ర అధికారులను ఆదేశాలు

- పుల్లూరు - అలంపూర్ - జట్రపోలు - పెంట్లవెల్లి - కొల్లాపూర్ - లింగాల - అచ్చంపేట - డిండి - దేవరకొండ - మల్లేపల్లి - నల్గొండ రాష్ట్ర హైవే లను జాతీయ హై వే లుగా మార్చాలని కోరడంతో సానుకూలంగా స్పందించిన కేంద్రమంత్రి

- హైదరాబాద్ లో నవంబర్ 19-22 వరకు జరగనున్న ఇండియన్ రోడ్ కాంగ్రెస్(IRC)కు మంత్రి ఆహ్వానించగా.. వస్తానని చెప్పిన కేంద్ర మంత్రి గడ్కరీ

Durga Idol Immersion: దుర్గామాత విగ్రహ ప్రతిష్ఠాపనపై వివాదం... పూజలకు ముందే అమ్మవారి విగ్రహం నిమజ్జనం

Shankar Dukanam — Sun, 11 Oct 2026 12:33:00 +0530

Devi Navaratri Row in Nalgonda | డిండి: తెలుగు రాష్ట్రాల్లో దేవీ శరన్నవరాత్రి ఉత్సవాలు ఘనంగా ప్రారంభమయ్యాయి. గ్రామాల్లో పోటీ పడి మీర దుర్గామాత విగ్రహాలను ప్రతిష్టించి పూజలు నిర్వహిస్తుంటారు. కానీ నల్లగొండ జిల్లా డిండి మండలం శాంతిగూడెం గ్రామంలో దేవీ శరన్నవరాత్రి ఉత్సవాల వేళ వివాదం చోటుచేసుకుంది. గ్రామంలో దుర్గామాత విగ్రహాన్ని ప్రతిష్ఠించే స్థలానికి సంబంధించి రెండు వర్గాల మధ్య ఏర్పడిన విభేదాలు ముదిరి వివాదానికి దారితీశాయి. విగ్రహ ప్రతిష్ఠాపన స్థలం విషయంలో ఇరువర్గాలు పట్టుబట్టడంతో మాటమాట పెరిగి చివరికి ఆధిపత్య పోరుకు వెళ్లింది. ఈ క్రమంలో రెండు వర్గాల మధ్య ఘర్షణ పూరిత వాతావరణం నెలకొంది.

ఈ వివాదం తీవ్రరూపం దాల్చడం, ఏ వర్గం వారు తగ్గకపోవడంతో అపశ్రుతి చోటుచేసుకుంది. దేవీ నవరాత్రి ఉత్సవాలకు ముందే దుర్గామాత విగ్రహాన్ని కనీసం పూజలు కూడా నిర్వహించకుండానే నిమజ్జనం చేశారు. అప్పటికీ కొందరు వద్దురా.. ఇది దేవుడు, దేవతలకు సంబంధించిన కార్యక్రమం. విగ్రహాన్ని పూజలకు ముందే నిమజ్జనం చేయడం అరిష్టమని చెబుతున్నా వినిపించుకోకుండా చెరువలో నిమజ్జనం చేయడం హాట్ టాపిక్ అవుతోంది. విగ్రమం నిమజ్జనం ఫలితంగా తొమ్మిది రోజుల పాటు ఎంతో వైభవంగా జరగాల్సిన నవరాత్రి ఉత్సవాలు నిలిచిపోయాయి. భక్తిశ్రద్ధలతో ఉత్సవాలు జరుపుకోవాలని భావించిన గ్రామస్థులు, భక్తులు ఈ పరిణామంతో తీవ్ర ఆందోళనకు గురయ్యారు.

పవిత్రమైన పండుగ వేళ రాజకీయ విభేదాలతో నవరాత్రి ఉత్సవాలను భగ్నం చేయడంపై స్థానికులు తీవ్ర ఆగ్రహం వ్యక్తం చేస్తున్నారు. అమ్మవారిని కనీసం పూజలకు కూడా నోచుకోనివ్వకుండానే సాగనంపడం పట్ల అరిష్టం జరుగుతుందేమో అంటూ గ్రామంలో చర్చ మొదలైంది. గ్రామ ప్రశాంతతను దెబ్బతీస్తూ ఉత్సవాల నిర్వహణలో గొడవలకు కారణమైన వారిపై చర్యలు తీసుకోవాలని భక్తులు కోరుతున్నారు.

బతుకమ్మ 2026: తీరొక్క పూల జాతర.. ఏ రోజు ఏ బతుకమ్మ, నైవేద్యం?

RAMA — Sat, 10 Oct 2026 10:40:50 +0530

Bathukamma 2026: తెలంగాణ రాష్ట్ర సంస్కృతికి ప్రతీక, మహిళలకు ప్రీతిపాత్రమైన బతుకమ్మ పండుగ సందడి అక్టోబర్ 10 శనివారం సాయంత్రం నుంచి ప్రారంభమవుతుంది. హైదరాబాద్ తో పాటూ తెలంగాణ వ్యాప్తంగా ఊరూ వాడా పూలపండుగ సంబురంగా జరగబోతోంది. భాద్రపదమాసం అమావాస్య తో మొదలయ్యే బతుకమ్మ పండుగ ఆశ్వయుజమాసం అష్టమితో ముగుస్తుంది. తొమ్మిది రోజుల పాటూ వైభవంగా సాగే పూల పండుగలో ఏ రోజు ఏ బతుకమ్మను పూజిస్తారు, ఏ నైవేద్యం సమర్పిస్తారు తెలుసుకోండి

ఏ రోజు ఏ బతుకమ్మ

అక్టోబర్ 10 శనివారం భాద్రపద అమావాస్య / మహాలయ అమావాస్య - ఎంగిలిపూల బతుకమ్మ

మొదటి రోజు ఎంగిలిపూల బతుకమ్మకు నువ్వులను పొడి చేసి పంచదార వేసి కలిపి నైవేద్యంగా సమర్పిస్తారు.

అక్టోబర్ 11 ఆదివారం ఆశ్వయుజ శుక్ల పాడ్యమి - అటుకుల బతుకమ్మ

రెండో రోజు అటుకుల బతుకమ్మ - పేరుకితగ్గట్టుగానే అటుకులతో నైవేద్యం తయారు చేస్తారు. అటుకులను నానబెట్టి కొద్దిసేపటి తర్వాత నీరు ఓడ్చి ఓ గంట ఎండనివ్వాలి. ఆ తర్వాత ఆ పాన్ లో నెయ్యి వేసి డ్రై ఫ్రూట్స్ వేయించుకుని దాన్ని పక్కకు తీసి బెల్లం తురుము వేయాలి. అది పాకంగా మారిన తర్వాత స్టౌ ఆఫ్ చేసి అందులో అటుకులు వేసి కలపాలి. అటుకులు నైవేద్యం సిద్ధం అయినట్టే

అక్టోబర్ 12 సోమవారం ఆశ్వయుజ శుక్ల విదియ - ముద్దపప్పు బతుకమ్మ

మూడో రోజు ముద్దపప్పు బతుకమ్మ - ముద్దపప్పుని నైవేద్యంగా పెడతారుయ. కందిపప్పు ప్రెజర్ కుక్కర్లో వేసి... నీళ్లు పోసి, దంచిన జీలకర్ర, కరివేపాకు, నూనె, పసుపు, వేసి ఉడికిస్తారు. సరిపడా ఉప్పు వేసి నైవేద్యం పెడతారు

అక్టోబర్ 13 మంగళవారం ఆశ్వయుజ శుక్ల తదియ - నానే బియ్యం బతుకమ్మ

నాలుగో రోజు నానేబియ్యం బతుకమ్మ - ఈ రోజు బెల్లం పరమాన్నం నివేదిస్తారు.

అక్టోబర్ 14 బుధవారం ఆశ్వయుజ శుక్ల చవితి - అట్ల బతుకమ్మ

ఐదో రోజు అట్ల బతుకమ్మ - పేరుకి తగ్గట్టుగానే అట్లు నైవేద్యంగా సమర్పిస్తారు.

అక్టోబర్ 15 గురువారం ఆశ్వయుజ శుక్ల పంచమి - అలిగిన బతుకమ్మ

ఆరో రోజు అలిగిన బతుకమ్మ - ఈ రోజు అమ్మవారికి నైవేద్యం సమర్పించరు

అక్టోబరు 16 శుక్రవారం ఆశ్వయుజ శుక్ల షష్టి - వేపకాయల బతుకమ్మ

ఏడో రోజు వేపకాయల బతుకమ్మ - సకినాల పిండితో వేపకాయలు చేసి వాటిని నివేదిస్తారు

అక్టోబరు 17 శనివారం ఆశ్వయుజ శుక్ల సప్తమి - వెన్నముద్దల బతుకమ్మ

ఎనిమిదో రోజు వెన్నముద్దల బతుకమ్మ - బియ్యంపిండితో వెన్నముద్దలు తయారు చేసి బతుకమ్మకు నైవేద్యంగా సమర్పిస్తారు. బియ్యంపిండిని ఉడికించి ..వాటిని ఉండలుగా చేసి.. వాటిని బ్రౌన్ కలర్ వచ్చేవరకూ వేయించి..బెల్లం పాకంలో వేస్తారు.

అక్టోబరు 18 ఆదివారం ఆశ్వయుజ శుక్ల అష్టమి ( దుర్గాష్టమి) -సద్దుల బతుకమ్మ

బతుకమ్మ పండుగలో ఆఖరి రోజైన తొమ్మిదో రోజు సద్దుల బతుకమ్మ - ఈ రోజు మరింత పెద్ద పరిమాణంలో బతుకమ్మను తయారు చేస్తారు. పండుగలో ఆఖరి రోజు కావడంతో సంబరాలు మరింత వైభవంగా జరుపుకుంటారు. పూజ పూర్తైన తర్వాత బతుకమ్మను తీసుకెళ్లి నిమజ్జనం చేస్తారు. ఈ రోజు దుర్గాష్టమి. ఈ రోజు పులిహోర నివేదిస్తారు. పెరుగన్నం, లడ్డూ సహా తొమ్మిది రకాల నైవేద్యాలు తయారు చేస్తారు.