karimnagar

CM Revanth Reddy: దసరా వేడుకలకు సొంతూరుకు సీఎం రేవంత్‌రెడ్డి.. కొండారెడ్డిపల్లిలో ఘన స్వాగతం, ఆలయాల్లో పూజలు

Satyaprasad Bandaru — Tue, 20 Oct 2026 19:14:08 +0530

CM Revanth Reddy: దసరా పండుగ సందర్భంగా సీఎం రేవంత్‌రెడ్డి తన స్వగ్రామమైన నాగర్‌కర్నూల్‌ జిల్లా వంగూరు మండలంలోని కొండారెడ్డిపల్లికి వెళ్లారు. కుటుంబ సమేతంగా సొంతవూరుకు చేరుకున్న సీఎంకి స్థానిక ప్రజాప్రతినిధులు, ఉన్నతాధికారులు, గ్రామస్థులు ఘన స్వాగతం పలికారు.

ఆంజనేయస్వామి ఆలయంలో ప్రత్యేక పూజలు

కొండారెడ్డిపల్లికి చేరుకున్న అనంతరం సీఎం రేవంత్‌రెడ్డి గ్రామస్థులతో కలిసి ర్యాలీగా స్థానిక శ్రీ ఆంజనేయస్వామి ఆలయానికి చేరుకున్నారు. అక్కడ తన కుటుంబ సభ్యులతో కలిసి స్వామివారికి ప్రత్యేక పూజలు చేశారు. పూజా కార్యక్రమాల అనంతరం వేద పండితులు, ఆలయ అర్చకులు సీఎం దంపతులకు వేద ఆశీర్వచనం అందించారు.

గ్రామస్థులు, ప్రజాప్రతినిధులతో భేటీ

అనంతరం సీఎం రేవంత్‌రెడ్డి తమ గ్రామానికి చెందిన ప్రజలను, స్థానిక ప్రజాప్రతినిధులను, అధికారులను కలిసి దసరా శుభాకాంక్షలు తెలిపారు. ఈ కార్యక్రమంలో నాగర్‌కర్నూల్ ఎంపీ డాక్టర్ మల్లు రవి, ఉమ్మడి మహబూబ్‌నగర్ జిల్లాకు చెందిన ఎమ్మెల్యేలు, ఎమ్మెల్సీలు, ఇతర ముఖ్య నాయకులు పెద్ద సంఖ్యలో పాల్గొన్నారు.

Also Read: తొలిసారి ఎన్నికల బరిలోకి కవిత పార్టీ.. తొలి ఎమ్మెల్సీ అభ్యర్థి పేరు ప్రకటన

సాయంత్రం పూజా కార్యక్రమాలు

దసరా పండుగ సంప్రదాయంలో భాగంగా సాయంత్రం వేళ స్థానిక మైసమ్మ ఆలయాన్ని సందర్శించి ప్రత్యేక పూజలు చేయనున్నారు సీఎం రేవంత్ రెడ్డి. అనంతరం విజయదశమికి అత్యంత ప్రాధాన్యత ఉన్న జమ్మిచెట్టు పూజ కార్యక్రమంలో పాల్గొని, పండుగ వేడుకలను ముగించనున్నారు. తెలంగాణ సంస్కృతిలో విజయదశమి రోజు జమ్మిచెట్టుకు (శమీ పూజ) పూజలు చేసి, జమ్మి ఆకులను 'బంగారం'గా భావించి ఇంటికి తీసుకెళ్లడం ఆచారం. సీఎం రేవంత్ రెడ్డి ప్రతి ఏటా తన గ్రామంలోని పెద్దలతో కలిసి ఈ వేడుకల్లో పాల్గొంటారు.

తెలంగాణ ముఖ్యమంత్రిగా బాధ్యతలు చేపట్టిన తర్వాత పండుగల సమయాల్లో సొంతూరు రావడం రేవంత్‌రెడ్డి ఆనవాయితీగా పెట్టుకున్నారు. తన బాల్యం, రాజకీయ జీవితం ఈ ప్రాంతంతో ముడిపడి ఉందని సీఎం రేవంత్ రెడ్డి చెబుతుంటారు.

Also Read: పాలపిట్టలను బంధిస్తే కఠిన చర్యలు.. ఈ నెంబర్లకు కాల్ చేయండి: హైదరాబాద్ సీపీ సజ్జనార్

Singareni Bonus: సింగరేణి కార్మికులకు గుడ్ న్యూస్ .. ఒక్కొక్కరికి రూ.1. 51 లక్షల దసరా బోనస్: భట్టి విక్రమార్క

Shankar Dukanam — Tue, 13 Oct 2026 13:28:29 +0530

Singareni Bonus For Dasara : హైదరాబాద్: సింగరేణి ఉద్యోగులకు తెలంగాణ ఉప ముఖ్యమంత్రి భట్టి విక్రమార్క గుడ్‌న్యూస్ అందించారు. సంస్థ సాధించిన లాభాల్లో 34 శాతాన్ని సింగరేణి పర్మినెంట్ ఉద్యోగులకు చెల్లిస్తున్నట్లు ఆయన మంగళవారం ప్రకటించారు. ఒక్కో రెగ్యూలర్ కార్మికుడికి రూ.1.51 లక్షల దసరా బోనస్ లభిస్తుంది. సింగరేణిలో పనిచేస్తున్న కాంట్రాక్టు ఉద్యోగులకు కూడా రూ. 5,500 చొప్పున బోనస్ అందించనున్నట్లు తెలిపారు. ఈ బోనస్ నిర్ణయంతో వేలాది మంది కార్మిక కుటుంబాలకు పెద్ద ఎత్తున లబ్ధి చేకూరనుంది.

గత బీఆర్‌ఎస్ ప్రభుత్వంపై భట్టి విక్రమార్క విమర్శలు
సింగరేణి లాభాలు తగ్గడానికి గత బీఆర్‌ఎస్ (BRS) ప్రభుత్వ అనాలోచిత నిర్ణయాలే ప్రధాన కారణమని డిప్యూటీ సీఎం భట్టి విక్రమార్క ఆరోపించారు. బీఆర్‌ఎస్ చేసినంత నష్టం సింగరేణికి మరే ప్రభుత్వం చేయలేదని విమర్శించారు. గత ప్రభుత్వ హయాంలో కేంద్ర ప్రభుత్వం 141 బొగ్గు బ్లాకులను వేలం వేసినప్పటికీ, కనీసం ఒక్క వేలంలో కూడా సింగరేణి పాల్గొనకుండా నిర్లక్ష్యం చేశారని మండిపడ్డారు. ప్రస్తుతం ప్రైవేట్ మార్కెట్‌లో సింగరేణి కంటే తక్కువ ధరకే బొగ్గు అందుబాటులో ఉండటం వల్ల, సంస్థ మనుగడను కాపాడుకోవడానికి తప్పనిసరి పరిస్థితుల్లో బొగ్గు ధరలను తగ్గించాల్సి వచ్చిందని ఆయన వివరించారు.

‘నెహ్రూ కాలనీల’ పేరుతో కార్మికుల సొంతింటి కలను సాకారం చేసేందుకు క్వార్టర్ల నిర్మాణం, ఏరియా ఆసుపత్రులను కార్పొరేట్ స్థాయికి మించి మోడ్రన్‌గా అత్యుత్తమ వైద్య సదుపాయాల కల్పనకు కార్యాచరణ సిద్ధం చేస్తామన్నారు.

ప్రజాభవన్‌లో మంత్రి శ్రీధర్ బాబు కీలక ప్రకటనలు
హైదరాబాద్‌లోని ప్రజాభవన్‌లో నిర్వహించిన సమావేశంలో మంత్రి శ్రీధర్ బాబు మాట్లాడుతూ... సింగరేణి కార్మికుల సంక్షేమంపై పలు విషయాలను వెల్లడించారు. సింగరేణి కార్మికుల సొంత ఇంటి కల త్వరలోనే నెరవేరబోతోందని హామీ ఇచ్చారు. అలాగే మారుపేర్ల ద్వారా ఉద్యోగాలు చేస్తున్న కార్మికుల సమస్యల పట్ల తెలంగాణ ప్రభుత్వం ఎంతో సానుకూలంగా ఉందన్నారు. తమ ప్రభుత్వం అధికారంలోకి వచ్చిన వెంటనే ప్రమాద బీమా కింద దేశంలో ఎక్కడాలేని విధంగా సింగరేణి కార్మికులకు కోటి రూపాయల ఉచిత ప్రమాద బీమా సౌకర్యాన్ని అందుబాటులోకి తీసుకొచ్చామన్నారు.

బతుకమ్మ 2026: తీరొక్క పూల జాతర.. ఏ రోజు ఏ బతుకమ్మ, నైవేద్యం?

RAMA — Sat, 10 Oct 2026 10:40:50 +0530

Bathukamma 2026: తెలంగాణ రాష్ట్ర సంస్కృతికి ప్రతీక, మహిళలకు ప్రీతిపాత్రమైన బతుకమ్మ పండుగ సందడి అక్టోబర్ 10 శనివారం సాయంత్రం నుంచి ప్రారంభమవుతుంది. హైదరాబాద్ తో పాటూ తెలంగాణ వ్యాప్తంగా ఊరూ వాడా పూలపండుగ సంబురంగా జరగబోతోంది. భాద్రపదమాసం అమావాస్య తో మొదలయ్యే బతుకమ్మ పండుగ ఆశ్వయుజమాసం అష్టమితో ముగుస్తుంది. తొమ్మిది రోజుల పాటూ వైభవంగా సాగే పూల పండుగలో ఏ రోజు ఏ బతుకమ్మను పూజిస్తారు, ఏ నైవేద్యం సమర్పిస్తారు తెలుసుకోండి

ఏ రోజు ఏ బతుకమ్మ

అక్టోబర్ 10 శనివారం భాద్రపద అమావాస్య / మహాలయ అమావాస్య - ఎంగిలిపూల బతుకమ్మ

మొదటి రోజు ఎంగిలిపూల బతుకమ్మకు నువ్వులను పొడి చేసి పంచదార వేసి కలిపి నైవేద్యంగా సమర్పిస్తారు.

అక్టోబర్ 11 ఆదివారం ఆశ్వయుజ శుక్ల పాడ్యమి - అటుకుల బతుకమ్మ

రెండో రోజు అటుకుల బతుకమ్మ - పేరుకితగ్గట్టుగానే అటుకులతో నైవేద్యం తయారు చేస్తారు. అటుకులను నానబెట్టి కొద్దిసేపటి తర్వాత నీరు ఓడ్చి ఓ గంట ఎండనివ్వాలి. ఆ తర్వాత ఆ పాన్ లో నెయ్యి వేసి డ్రై ఫ్రూట్స్ వేయించుకుని దాన్ని పక్కకు తీసి బెల్లం తురుము వేయాలి. అది పాకంగా మారిన తర్వాత స్టౌ ఆఫ్ చేసి అందులో అటుకులు వేసి కలపాలి. అటుకులు నైవేద్యం సిద్ధం అయినట్టే

అక్టోబర్ 12 సోమవారం ఆశ్వయుజ శుక్ల విదియ - ముద్దపప్పు బతుకమ్మ

మూడో రోజు ముద్దపప్పు బతుకమ్మ - ముద్దపప్పుని నైవేద్యంగా పెడతారుయ. కందిపప్పు ప్రెజర్ కుక్కర్లో వేసి... నీళ్లు పోసి, దంచిన జీలకర్ర, కరివేపాకు, నూనె, పసుపు, వేసి ఉడికిస్తారు. సరిపడా ఉప్పు వేసి నైవేద్యం పెడతారు

అక్టోబర్ 13 మంగళవారం ఆశ్వయుజ శుక్ల తదియ - నానే బియ్యం బతుకమ్మ

నాలుగో రోజు నానేబియ్యం బతుకమ్మ - ఈ రోజు బెల్లం పరమాన్నం నివేదిస్తారు.

అక్టోబర్ 14 బుధవారం ఆశ్వయుజ శుక్ల చవితి - అట్ల బతుకమ్మ

ఐదో రోజు అట్ల బతుకమ్మ - పేరుకి తగ్గట్టుగానే అట్లు నైవేద్యంగా సమర్పిస్తారు.

అక్టోబర్ 15 గురువారం ఆశ్వయుజ శుక్ల పంచమి - అలిగిన బతుకమ్మ

ఆరో రోజు అలిగిన బతుకమ్మ - ఈ రోజు అమ్మవారికి నైవేద్యం సమర్పించరు

అక్టోబరు 16 శుక్రవారం ఆశ్వయుజ శుక్ల షష్టి - వేపకాయల బతుకమ్మ

ఏడో రోజు వేపకాయల బతుకమ్మ - సకినాల పిండితో వేపకాయలు చేసి వాటిని నివేదిస్తారు

అక్టోబరు 17 శనివారం ఆశ్వయుజ శుక్ల సప్తమి - వెన్నముద్దల బతుకమ్మ

ఎనిమిదో రోజు వెన్నముద్దల బతుకమ్మ - బియ్యంపిండితో వెన్నముద్దలు తయారు చేసి బతుకమ్మకు నైవేద్యంగా సమర్పిస్తారు. బియ్యంపిండిని ఉడికించి ..వాటిని ఉండలుగా చేసి.. వాటిని బ్రౌన్ కలర్ వచ్చేవరకూ వేయించి..బెల్లం పాకంలో వేస్తారు.

అక్టోబరు 18 ఆదివారం ఆశ్వయుజ శుక్ల అష్టమి ( దుర్గాష్టమి) -సద్దుల బతుకమ్మ

బతుకమ్మ పండుగలో ఆఖరి రోజైన తొమ్మిదో రోజు సద్దుల బతుకమ్మ - ఈ రోజు మరింత పెద్ద పరిమాణంలో బతుకమ్మను తయారు చేస్తారు. పండుగలో ఆఖరి రోజు కావడంతో సంబరాలు మరింత వైభవంగా జరుపుకుంటారు. పూజ పూర్తైన తర్వాత బతుకమ్మను తీసుకెళ్లి నిమజ్జనం చేస్తారు. ఈ రోజు దుర్గాష్టమి. ఈ రోజు పులిహోర నివేదిస్తారు. పెరుగన్నం, లడ్డూ సహా తొమ్మిది రకాల నైవేద్యాలు తయారు చేస్తారు.

Singareni Workers Bonus: సింగరేణి కార్మికులకు దసరా, దీపావళి కానుక.. ప్రతి కార్మికుడికి రూ.1,10,250 బోనస్‌!

Satyaprasad Bandaru — Tue, 6 Oct 2026 12:05:18 +0530

Singareni Workers Bonus: దసరా, దీపావళి పండుగల వేళ సింగరేణి కాలరీస్ కంపెనీ లిమిటెడ్ (SCCL) కార్మికులకు కేంద్ర ప్రభుత్వం గుడ్‌న్యూస్ చెప్పింది. పెర్ఫార్మెన్స్ లింక్డ్ రివార్డ్ కింద అర్హులైన ప్రతి కార్మికుడికి రూ. 1,10,250 చొప్పున బోనస్ ప్రకటించినట్లు కేంద్ర బొగ్గు, గనుల శాఖ మంత్రి జి. కిషన్ రెడ్డి ప్రకటించారు. గతేడాది చెల్లించిన రూ. 1,03,000 బోనస్‌తో పోలిస్తే ఈసారి మరింత పెరగడం విశేషం.

కార్మికుల శ్రమ వెలకట్టలేనిది: కిషన్ రెడ్డి

దేశానికి వెలుగులు పంచేందుకు పగలు, రాత్రి భూగర్భంలో కష్టపడుతున్న సింగరేణి కార్మికుల కృషి వెలకట్టలేనిదని కేంద్ర మంత్రి కిషన్ రెడ్డి అన్నారు. సింగరేణి కేవలం ఒక బొగ్గు ఉత్పత్తి సంస్థ మాత్రమే కాదని, తెలంగాణ రాష్ట్రానికి కొంగు బంగారమని, లక్షలాది కుటుంబాలకు జీవనాధారమని ఆయన ఎక్స్‌ వేదికగా పేర్కొన్నారు. దేశాభివృద్ధిలో, రాష్ట్ర ప్రగతిలో సింగరేణి కార్మికుల పాత్ర ఎంతో కీలకమని తెలిపారు.

Also Read: వచ్చే నెల నుంచి భారీగా పెరగనున్న కరెంట్ బిల్లులు.. ట్రూ అప్ ఛార్జీల వసూళ్లకు ఈఆర్సీ గ్రీన్ సిగ్నల్

రాష్ట్ర ప్రభుత్వ బకాయిల విడుదల చేయాలి

సింగరేణి సంస్థ అభివృద్ధి, కార్మికుల సంక్షేమాన్ని దృష్టిలో ఉంచుకుని తెలంగాణ ప్రభుత్వం నుంచి సింగరేణికి రావాల్సిన రూ. 60,000 కోట్ల బకాయిలను వెంటనే విడుదల చేయాలని కేంద్ర మంత్రి ఈ సందర్భంగా తెలంగాణ ప్రభుత్వాన్ని డిమాండ్ చేశారు. ప్రస్తుత అవసరాలకు తగినట్లుగా బొగ్గు ఉత్పత్తిని మరింత పెంచేందుకు యాజమాన్యం, కార్మికులు కలిసి ప్రణాళికలు అమలు చేయాలని పిలుపునిచ్చారు. సింగరేణి కార్మికులకు, ఉద్యోగులు వారి కుటుంబసభ్యులకు దసరా, దీపావళి పండుగల సందర్భంగా హృదయపూర్వక శుభాకాంక్షలు తెలియజేస్తున్నట్లు చెప్పారు.

కేంద్రం నుంచి వెలువడిన బోనస్ ప్రకటనతో సింగరేణి బొగ్గు గనుల పరిధిలో కార్మికుల్లో పండుగ వాతావరణం నెలకొంది.

Also Read: తెలంగాణ గవర్నర్ కోటా ఎమ్మెల్సీలు - బీసీ, ఎస్సీలకే చాన్స్ - కొండా లక్ష్మణ్ బాపూజీ కుటుంబానికి ఓ సీటు?

CM Revanth Reddy: తెలంగాణ ప్రయోజనాల కోసం ఢిల్లీకి ఎన్నిసార్లైనా వెళ్తా: కరీంనగర్‌లో సీఎం రేవంత్

Shankar Dukanam — Wed, 30 Sep 2026 18:04:14 +0530

కరీంనగర్: తెలంగాణ రాష్ట్ర ప్రయోజనాల కోసం తాను ఎన్నిసార్లైనా ఢిల్లీ వెళ్లేందుకు సిద్ధంగా ఉన్నామని సీఎం రేవంత్ రెడ్డి పేర్కొన్నారు. రాష్ట్రానికి నిధులు, అభివృద్ధి కోసం కేంద్ర మంత్రులను కలవాల్సి ఉంటున్నారు. రాష్ట్రంలోని దాదాపు పదిన్నర లక్షల మంది ప్రభుత్వ ఉద్యోగులు, 4 కోట్ల ప్రజలకు సేవలు అందిస్తూ ప్రభుత్వానికి, ప్రజలకు మధ్య బలమైన వారధులుగా ప్రభుత్వ ఉద్యోగులు నిలుస్తున్నారని కొనియాడారు. జిల్లా పర్యటనలో భాగంగా బుధవారం నాడు ఆయన నూతనంగా నిర్మించిన కరీంనగర్ కలెక్టరేట్ భవనాన్ని ప్రారంభించారు. అనంతరం నిర్వహించిన అధికారుల సమీక్షా సమావేశంలో మాట్లాడిన సీఎం రేవంత్ రెడ్డి, ప్రభుత్వ సంక్షేమ ఫలాలు నిజమైన పేదలకు చేరాలంటే ఉద్యోగుల కష్టపడే తత్వమే కీలకమని స్పష్టం చేశారు.

ప్రజా సమస్యల పరిష్కారం

జిల్లా కలెక్టరేట్‌కు సమస్యలతో వచ్చే ప్రజలను సొంత కుటుంబ సభ్యుల్లా భావించి వారికి సాయం అందించడం ప్రతి ఒక్కరి బాధ్యత అని అధికారులకు సీఎం రేవంత్ రెడ్డి సూచించారు. రాజకీయాలు కేవలం ఎన్నికల సమయానికే పరిమితమని, మిగిలిన సమయాల్లో కేంద్ర, రాష్ట్ర ప్రభుత్వాలు కలిసి పనిచేయాలన్నారు. కరీంనగర్‌లో నిర్వహించిన ఈ సమీక్షా సమావేశంలో కేంద్ర మంత్రి బండి సంజయ్ కుమార్, రాష్ట్ర మంత్రులు పొన్నం ప్రభాకర్, పొంగులేటి శ్రీనివాస్‌రెడ్డి, తుమ్మల నాగేశ్వరరావులతో పాటు పలువురు ప్రజాప్రతినిధులు, ఉన్నతాధికారులు పాల్గొన్నారు.

LIVE: Hon'ble Chief Minister Sri A. Revanth Reddy Participates in Unveiling of the Telangana Thalli Statue & Inauguration of IDOC Building at Karimnagar, Karimnagar District https://t.co/pATP9SXZrN
— Telangana CMO (@TelanganaCMO) September 30, 2026

ప్రజాసేవలో ఉద్యోగుల పాత్రే అత్యంత కీలకం

ప్రభుత్వ ఉద్యోగుల సహకారంతో ప్రజల సమస్యలను పరిష్కరిస్తూ ప్రభుత్వం ముందుకు సాగుతోందని.. మంచి పేరు వచ్చినా, చెడ్డపేరు వచ్చినా ఉద్యోగుల వల్లేనని రేవంత్ రెడ్డి పేర్కొన్నారు. రాష్ట్రంలో కేవలం 3 శాతం మంది ఉద్యోగులు 97 శాతం ఉన్న ప్రజలకు సేవ చేయడం ఎంతో శ్రమతో కూడుకున్న పని అన్నారు. ప్రజల్లో ప్రభుత్వానికి మంచి పేరు రావాలంటే ఉద్యోగుల పనితీరుపైనే ఆధారపడి ఉంటుందని స్పష్టం చేశారు.

పేదల సమస్యల పరిష్కార వేదికలు కలెక్టరేట్స్

ప్రజా సమస్యల పరిష్కారంలో ఉద్యోగులు నిర్లక్ష్యం వహిస్తే ప్రభుత్వం సరిగా పనిచేయడం లేదనే భావన ప్రజల్లోకి వెళ్తుందని సీఎం రేవంత్ పేర్కొన్నారు. రాష్ట్ర ప్రభుత్వం ప్రజల కోసం ఎన్ని చట్టాలు చేసినా, ఎన్నెన్ని నిధులు కేటాయించినా వాటిని క్షేత్రస్థాయిలోకి చేరవేయాల్సింది ఉద్యోగులేనని గుర్తుచేశారు. నూతనంగా ప్రారంభించిన కలెక్టరేట్ కార్యాలయం పేద ప్రజల సమస్యలను సమర్థవంతంగా పరిష్కరించడానికి ఉపయోగపడాలని సూచించారు.

సిరిసిల్ల జిల్లా పర్యటనకు సీఎం రేవంత్ రెడ్డి

అనంతరం సీఎం రేవంత్ రెడ్డి రాజన్న సిరిసిల్ల జిల్లా పర్యటనకు వెళ్లారు. సీఎం పర్యటన నేపథ్యంలో జిల్లాలో పోలీసులు భారీ బందోబస్తు ఏర్పాటు చేశారు. సీఎం రేవంత్ రెడ్డి పర్యటనకు సంబంధించి పోలీస్ ఉన్నతాధికారులు భద్రతా ఏర్పాట్లు చేశారు. సిరిసిల్లలో పలు అభివృద్ధి కార్యక్రమాలకు సీఎం రేవంత్ రెడ్డి శ్రీకారం చుట్టనున్నారు. బహిరంగ సభ జరిగే ప్రాంగణం, హెలిప్యాడ్, సీఎం రేవంత్ ప్రయాణించే మార్గాల్లో రూట్ క్లియర్ చేశారు. ఎలాంటి అవాంఛనీయ సంఘటనలు చోటుచేసుకోకుండా అధికారులు, పోలీసులు భద్రతా చర్యలు చేపట్టారు.

Konda Surekha Meet CM Revanth Reddy: సీఎం రేవంత్ అపాయింట్‌మెంట్ తీసుకున్న మంత్రి కొండా సురేఖ- వివాదం తర్వాత తొలిసారి భేటీ!

Khagesh — Fri, 28 Aug 2026 08:25:42 +0530

Konda Surekha Meet CM Revanth Reddy: తెలంగాణలో అధికార పార్టీ కాంగ్రెస్‌లో ఆసక్తికరమైన రాజకీయం నడుస్తోంది. ముఖ్యమంత్రి రేవంత్‌ రెడ్డి, ఆయన కుటుంబ సభ్యులపై కాంగ్రెస్ నేతలే దాడి చేయడం సంచలనంగా మారింది. మంత్రి కొండా సురేఖ కుమార్తె సుస్మిత చేసిన కామెంట్స్‌తో విషయం సీరియస్ అయ్యింది. కొండా సురేఖ ఆదేశాలు, ఆలోచనలు లేకుండా సుస్మిత ఇలాంటి కామెంట్స్ చేయబోరని భావిస్తున్న కాంగ్రెస్ నేతలు కొందు మంత్రిపై చర్యలు తీసుకోవాలని డిమాండ్ చేశారు. ఈ చర్చ సాగుతుండగానే రాఖీ పౌర్ణమి రోజున రాఖీ కట్టేందుకు సీఎం అపాయింట్మెంట్ తీసుకున్నారు కొండా సురేఖ. వారం పదిరోజుల నుంచి కొనసాగుతున్న వివాదం తర్వాత ఆమె తొలిసారి ముఖ్యమంత్రితో భేటీ కానున్నారు.

Singareni Gold Copper Exploration : బంగారం, రాగి ఖనిజాల తవ్వకాల్లోకి సింగరేణి! పనులు ప్రారంభించిన భట్టి! విద్యుత్‌ సప్లైలో జాయింట్ వెంచర్!

Khagesh — Fri, 28 Aug 2026 07:46:28 +0530

Singareni Gold Copper Exploration : రెండు పొరుగు రాష్ట్రాల ఇంధన ప్రగతికి, దేశ ఆర్థిక వ్యవస్థ బలోపేతానికి బాటలు వేసేలా ఒక కీలక అడుగు పడింది. తెలంగాణకు చెందిన ప్రభుత్వం రంగ సంస్థ అయిన సింగరేణి, కర్ణాటక విద్యుత్ సంస్థ సంయుక్త భాగస్వామ్యంతో కలిసి పని చేయాలని తెలంగాణ ఉప ముఖ్యమంత్రి మల్లు భట్టి విక్రమార్క ప్రతిపాదించారు. గురువారం బెంగళూరులో కర్ణాటక ఇంధన మంత్రి కేజే జార్జ్‌తో జరిగిన ఉన్నత స్థాయి సమావేశంలో డిప్యూటీ సీఎం ఈ ప్రతిపాదనను అధికారికంగా ముందుకు తెచ్చారు. ఈ చారిత్రాత్మక భేటీలో ఇరు రాష్ట్రాల మధ్య ఇంధన రంగ పురోగతి, నిరంతర బొగ్గు సరఫరా, బొగ్గు కొనుగోళ్ల చెల్లింపులు, సాంకేతికత మార్పిడి వంటి పలు కీలక అంశాలపై విస్తృతంగా చర్చించారు.

మరోవైపు కేంద్ర ప్రభుత్వం నిర్వహించిన టెండర్లలో సింగరేణి సంస్థ దక్కించుకున్న కర్ణాటకలోనే రాయచూరు జిల్లా దేవదుర్గ తాలూకా లింగదహళ్లి గ్రామ పరిదిలోని బంగారం, రాగి ఖనిజాల సర్వే పనులను డిప్యూటీ సీఎం భట్టి విక్రమార్క గురువారం ప్రారంభించారు. ఈ ప్రాజెక్టు విజయవంతమైతే స్థానిక నిరుద్యోగ యువతకు పెద్ద ఎత్తున ఉపాధి లభించడమే కాకుండా, ఈ వెనుకబడిన ప్రాంత అభివృద్ధికి ఊతమిస్తుందని ఆయన ఆశాభావం వ్యక్తం చేశారు.

సింగరేణి-కేపీసీఎల్ జాయింట్ వెంచర్‌

బెంగళూరులో జరిగిన ఈ ఉన్నత స్థాయి సమావేశంలో డిప్యూటీ సీఎం భట్టి విక్రమార్క సింగరేణి సంస్థకు ఉన్న సుదీర్ఘ అనుభవాన్ని ప్రస్తావించారు. బొగ్గు మైనింగ్ రంగంలో సింగరేణికి ఉన్న 137 ఏళ్ల అపారమైన అనుభవం, నైపుణ్యం దేశంలోనే అగ్రగామిగా నిలిపాయని ఆయన గుర్తు చేశారు. ఛత్తీస్‌గఢ్‌, ఒడిశా రాష్ట్రాల్లో కర్ణాటక పవర్ కార్పొరేటషన్ లిమిటెడ్ దక్కించుకున్న క్యాప్టివ్ కోల్ బ్లాకుల్లో మైనింగ్ ప్రక్రియను విజయవంతంగా చేపట్టేందుకు ఈ అనుభవం ఎంతగానో దోహదపడుతుందని వివరించారు. అందువల్ల ఈ కోల్ బ్లాక్‌లలో మైనింగ్ జరిపేందుకు సింగరేణి, కేపీసీఎల్‌ సంస్థలు జాయింట్ వెంచర్‌గా కలిసి పని చేస్తే అత్యుత్తమ ఫలితాలు సాధించవచ్చని భట్టి ప్రతిపాదించారు.

దీనికి ప్రతిగా, పవర్ ప్లాంట్‌ల నిర్వహణలో కర్ణాటక రాష్ట్రానికి ఉన్న విద్యుత్ అనువాన్ని, సాంకేతిక నైపుణ్యాన్ని సింగరేణి పవర్ ప్లాంట్‌ల నిర్వహణలో వినియోగించుకోవచ్చని ఆయన సూచించారు. ఈ ఉమ్మడి సహకారంపై ఇరు రాష్ట్రాల ప్రతినిధులతో సంయుక్తంగా అధ్యయనం చేయాలని ప్రతిపాదించారు.

సానుకూలంగా స్పందించిన కర్ణాటక మంత్రి

తెలంగాణ డిప్యూటీ సీఎం చేసిన ప్రతిపాదనలై కర్ణాటక ఇంధన శాఖ మంత్రి కేజే జార్జ్ సానుకూలంగా స్పందించారు. కర్ణాటకలో పారిశ్రామిక ప్రగతి వేగంగా జరుగుతోందని దీనికి విద్యుత్ అవసరం అవుతుందని అన్నారు. ఈ డిమాండ్‌ను తట్టుకోవడానికి కర్ణాటకలోని ప్లాంట్లకు తెలంగాణ నిరంతరం బొగ్గు సరఫరా చేయాలని కోరారు.

దీనికి భట్టి విక్రమార్క సానుకూలంగా స్పందించారు. కేంద్ర ప్రభుత్వం జారీ చేసిన మార్గదర్శకాలకు అనుగుణంగా కర్ణాటకకు బొగ్గు సరఫరా నిరంతరాయం కొనసాగిస్తామని అన్నారు. ప్రస్తుతం సింగరేణి సంస్థ నుంచి కర్ణాటకలోని ఎర్రమారస్, రాయచూర్, బళ్లారి థర్మల్ ప్లాంట్లకు ఏడాదికి ఏకంగా 10.54 మిలియన్ టన్నుల బొగ్గును సరఫరా చేస్తున్నట్టు ఆయన వెల్లడించారు.

దేవదుర్గ గనుల్లో బంగారం, రాగి నిక్షేపాల అన్వేషణ ప్రారంభం

బెంగళూరు పర్యటన అనంతరం భట్టి విక్రమార్క నేరుగా రాయచూరుజిల్లా దేవ దుర్గ తాలూకా లింగదహళ్లి గ్రామానికి చేరుకున్నారు. సింగరేణి సంస్థ ఆధ్వర్యంలో ఇక్కడ చేపట్టనున్న రాగి, బంగారు ఖనిజాల అన్వేషణ కార్యక్రమాన్ని ప్రారంభించారు. కేంద్ర ప్రభుత్వం నిర్వహించిన పోటీ టెండర్లలో దేవదుర్గ బ్లాక్ ఎక్స్‌ప్లోరేషన్ హక్కులను సింగరేణి సంస్థ విజయవంతంగా దక్కించుకుందని ఆయన గుర్తు చేశారు.

పనులను ప్రారంభించిన తర్వాత భట్టి విక్రమార్క క్షేత్రస్థాయికి వెళ్లి దేవదుర్గ బంగారు ఖనిజ బ్లాక్ వ్యూపాయింట్‌ నుంచి అన్వేషణ చేపట్టనున్న ప్రాంతాలను పరిశీలించారు. రాబోయే రోజుల్లో సింగరేణి సంస్థ ఇక్కడ అన్వేషణ పనులను మరింత వేగంగా చేస్తుందని స్పష్టం చేశారు. ఈ ప్రాజెక్ట్‌ను విజయవంతంగా పూర్తి చేసి దేశ సంపదను పెంపొందించడానికి తెలంగాణ,కర్ణాటక రాష్ట్రాలు కలిసి కట్టుగా కృషి చేయాలని ఆయన పిలుపునిచ్చారు.

Kavitha Comments On Harish: ఆర్‌ఎస్‌ఎస్‌ నేత సూచనతో హరీష్‌ సీక్రెట్ ఆపరేషన్! మెదక్‌లో ఎమ్మెల్యేలతో భేటీ! కవిత సంచలన ఆరోపణలు!

Khagesh — Thu, 27 Aug 2026 18:35:00 +0530

Kavitha Comments On Harish: తెలంగాణలో అవినీతిని కాంగ్రెస్, బీఆర్‌ఎస్, బీజేపీ కలిసి వ్యవస్థీకృతం చేశారని టీఆర్‌ఎస్ చీఫ్ కవిత ఆరోపించారు. అందరూ కలిసి ఆంధ్రప్రాంత కంపెనీలు, నేతల కోసం పని చేస్తున్నారని మండిపడ్డారు. అధికారంలో ఎవరు ఉన్నాసరే ఆంధ్ర కంపెనీలు, నేతల మాటే చెల్లుబాటు అవుతుందని విమర్శించారు. అవినీతి చేస్తూనే బీఆర్‌ఎస్‌ను బీజేపీలో విలీనం చేసే ప్రక్రియ కూడా కొనసాగుతోందని అన్నారు. దీనికి హరీష్‌రావు లీడ్ చేస్తున్నారని మండిపడ్డారు. ఈ మధ్య మెదక్‌లో ఎమ్మెల్యేతో హరీష్‌రావు సీక్రెట్‌గా మీట్ అయ్యారని, అక్కడ ఏమి మాట్లాడారో తనకు తెలుసునని అన్నారు.

పసుపుపాలు వస్తే రాజ్‌పుష్పా విల్లాకి హరీష్‌

పాలలో మిరియాలు, పసుపు కలుపుకొని తాగే ఆర్‌ఎస్‌ఎస్‌ నేత కనుసన్నల్లోనే హరీష్‌రావు పని చేస్తున్నారని కవిత సంచలన వ్యాఖ్యలు చేశారు. ఆయన వచ్చే ముందు హరీష్‌రావు ఇంటికి పసుపు, మిరియాలు కలిపిన పాలు వెళ్తాయని చెప్పారు. అంటే ఢిల్లీకి చెందిన ఆ వ్యక్తి ఇక్కడకి వస్తున్నట్టు ఆ పాలు సిగ్నల్ అని తెలిపారు. అలా వచ్చిన తర్వాత హరీష్‌ రావు అన్ని కార్యక్రమాలు రద్దు చేసుకొని రాజ్‌పుష్ప ఓపెన్ స్కైవిల్లాకు వెళ్లారని బాంబు పేల్చారు. ఆ వ్యక్తి సూచనలతోనే హరీష్ పని చేసతున్నారని మండిపడ్డారు.

మెదక్‌లో సీక్రెట్ మీటింగ్ సంగతేంటి?

ఈ మధ్య మెదక్‌లో ఎమ్మెల్యేలతో సమావేమైన హరీష్‌రావు, భవిష్యత్ మనదేనంటూ చెప్పారని కవిత తెలిపారు. ఈ విషయాన్ని ఆ మీటింగ్‌లో ఉన్న ఒక ఎమ్మెల్యే తనకు సమాచారం అందించారని పేర్కొన్నారు. ఎన్టీఆర్ మాదిరగానే కేసీఆర్ కూడా పెద్ద లీడర్ అని అయితే ఆయన తర్వాత తానే లీడ్ చేస్తానని, తర్వాత జరగాల్సింది బీజేపీ చూసుకుంటుందని చెప్పినట్టు తనకు తెలుసునన్నారు కవిత. ఇదంతా బీఆర్‌ఎస్‌ను బీజేపీలో విలీనం చేసేందుకు జరుగుతున్న ప్రక్రియలో భాగమని పేర్కొన్నారు.

అందరూ కలిసి ఆంధ్రాకు ఊడిగం చేస్తున్నారు: కవిత

బీఆర్ఎస్ ఏమవుతుందో తనకు సంబంధం లేదని అయితే అంతా కలిసి అవినీతిని వ్యవస్థీకృతం చేస్తున్నారని, ఆంధ్రవ్యాపారులను పెంచి పోషిస్తున్నారని మండిపడ్డారు. కేసులు అంటూ హడావిడి చేసిన ప్రభుత్వం ఇప్పుడు ఎందుకు సైలెంట్ అయ్యిందని ప్రశ్నించారు. హరీష్‌రావు నిందితుడుగా ఉన్న ఏ కేసూ ముందుకు కదలడం లేదని ఆరోపించారు. వారి నిజం స్వరూపం చెప్పడానికే ఇదంతా చెప్పాల్సి వచ్చిందన్నారు. తెలంగాణ వాదం వినిపించాలి అంటే కచ్చితంగా నిజమైన తెలంగాణ నేతలు, ప్రజల కోసం నిలబడే వారిని గెలిపించుకోవాలని ప్రజలకు కవిత విజ్ఞప్తి చేశారు. నిజామాబాద్‌లో 31వ తేదీన ఏర్పాటు చేసే సభకు తరలి రావాలని ప్రజలకు విజ్ఞప్తి చేశారు.

కేటిఆర్‌! నేను హర్ట్ అయ్యాను: కవిత

మరోవైపు రాఖీ పౌర్ణమి రోజున బీఆర్‌ఎస్ వర్కింగ్ ప్రెసిడెంట్‌ కేటీఆర్ అందుబాటులో లేకపోవడంపై కూడా కవిత మండిపడ్డారు. గతేడాది పండగ సందర్భంగా సిటీలో లేకుండా రాఖీ కట్టించుకోలేదని, ఇప్పుడు ఏకంగా దేశంలోనే లేకుండా వెళ్లిపోయారని అసహనం వ్యక్తం చేశారు. పవిత్రమైన రాఖీ పండగ రోజు ఇలా లేకపోవడం తనను బాగా హర్ట్ చేసిందని కవిత పేర్కొన్నారు. ఆత్మగౌరవం దెబ్బతిందని తెలిపారు. రాజకీయలతో ముడిపెట్టడం సరికాదని సూచించారు.

నేపాల్‌-టిబెట్ సరిహద్దుల్లో వరదల్లో చిక్కుకున్న తెలుగు వారి కోసం ప్రత్యేక చర్యలు! నేరుగా పర్యవేక్షిస్తున్న ప్రభుత్వాలు!

Khagesh — Thu, 27 Aug 2026 14:09:42 +0530

నేపాల్ -టిబెట్ సరిహద్దుల్లో ఊహించని విధంగా ఆకస్మిక వరదలు పెను విషాదాన్ని నింపాయి. ఎడతెరపి లేకుండా కురిసిన భారీ వర్షాలు, హిమానీనదాలు విరుచుకుపడటంతో ఆకస్మిక జలప్రళయం ముంచేసింది. ఈ ఘోర విపత్తులో కైలాస మానస సరోవర యాత్రకు వెళ్లిన తెలుగు రాష్ట్రాలకు చెందిన యాత్రికులు ప్రస్తుతం వివిధ ప్రాంతాల్లో చిక్కుకుపోయారు. హైదరాబాద్‌కు చెందిన ఒక ప్రైవేటు ట్రావెల్ ఏజెన్సీ ద్వారా వెళ్లిన సుమారు 140 మంది పర్యాటకుల ఆచూకీ లభించకపోవడం వారి కుటుంబ సభ్యుల్లో తీవ్ర ఆందోళనకు దారి తీసింది. కమ్యూనికేషన్ వ్యవస్థలు పూర్తిగా స్తంభించిపోవడంతో బయటకు వెళ్లిన యాత్రికులతో బంధువులు సంప్రదించలేకపోతున్నారు.

ఈ జల ప్రళయంతో ఆంధ్రప్రదేశ్, తెలంగాణ రాష్ట్ర ప్రభుత్వాలు తక్షణమే అప్రమత్తమయ్యాయి. ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు, తెలంగాణ ముఖ్యమంత్రి ఏ. రేవంత్ రెడ్డి స్వయంగా రంగంలోకి దిగి పరిస్థితి సమీక్షిస్తున్నారు. బాధితులకు యుద్ధప్రాతిపదికన గురించి, సురక్షిత ప్రాంతాలకు తరలించేలా చర్యలు తీసుకోవాలని అధికారులను ఆదేశించారు. కేంద్ర విదేశాంగ మంత్రిత్వశాఖ, విపత్తు నిర్వహణ బృందాలు, భారత రాయభార కార్యాలయాలతో నిరంతరం సమన్వయం చేసుకుంటూ సహాయక చర్యలు ముమ్మరం చేశారు. న్యూఢిల్లీలోని ఏపీ భవన్‌, తెలంగాణ భవన్‌లో ప్రత్యేక కంట్రోల్ రూమ్‌లను ఏర్పాటు చేసి హెల్ప్‌లైన్‌ నంబర్లను అందుబాటులోకి తెచ్చారు.

అసలేం జరిగింది?

నేపాల్‌-టిబెట్‌ సరిహద్దు పరివాహక ప్రాంతంలో సంభవించిన ఈ ఆకస్మిక వరదలకు ప్రధానంగా వాతావరణ మార్పులే కారణమని తెలుస్తోంది. అక్కడ కురుస్తున్న ఎడతెరిపి లేని భారీ వర్షాలకు తోడు, హిమనీనదాలు పొంగడంతో నదులు ఉగ్రరూపం దాల్చాయి. కఠ్మాండూకు ఉత్తాన ఉన్న రసువా జిల్లాలో బుధవారం ఉదయం ఆకస్మికంగా విరుచుకుపడిన పరదల కారణంగా పలు గ్రామాలు పూర్తిగా కొట్టుకుపోయాయి. భారీ నష్టాన్ని కలిగిస్తూ ఒక జలవిద్యుత్‌ కేంద్రం కూడా వరద నీటిలో కుట్టుకుపోయింది.

ఈ విపత్తును గల కారణాలను విశ్లేషిస్తూ టిబెట్ నుంచి నేపాల్ వైపు ప్రవహించే బోటేకోషి నది పరివాహక ప్రాంతంలో మంచు వేగంగా కరగం వల్లే ఈ ఆకస్మిక వరదలు వచ్చాయని స్థానిక అధికారులు పేర్కొంటున్నారు. అయితే నేపాల్ విదేశాంగ మంత్రి దీనిపై స్పందిస్తూ, ఆ ప్రాంతంలో సంభవించిన భూకంపం కారణంగా సంభవించిన హిమపాతమే ఈ భీకర వరదలకు అసలు కారణమని స్పష్టం చేశారు. ఈ ఆకస్మిక వరదల దాటికి ఇప్పటి వరకు కనీసం రెండు వందల మంది ప్రాణాలు కోల్పోయినట్టు నేపాల్ పోలీసులు నిర్దారించి, మృతదేహాలను వెలికితీశారు. గల్లంతైన వారి కోసం గాలిస్తున్నారు.

నేపాల్ పర్యాటకశాఖ వెల్లడించిన గణాంకాల ప్రకారం, విపత్తు జరిగిన కొన్ని గంటల వ్యవధిలోనే మొత్తం 403 మంది పర్యాటకుల ఆచూకీ తెలియకుండా పోయింది. వీరిలో సుమారు 341 మంది విదేశీయులు ఉన్నారు. గల్లంతైన ఈ విదేశీ పర్యాటకులలో అత్యధికంగా 142 మంది భారతీయ పర్యాటకులు కాగా, మిగిలిన వారు ఇతర దేశాలకు చెందిన వారు.

తెలుగు పర్యాటకుల కోసం వెతుకులాట

కైలాస మానస సరోవర యాత్ర ముగించుకొని తిరిగి వస్తున్న వేళ తెలుగు పర్యాటకులు విపత్తులో చిక్కుకున్నారు. హైదరాబాద్‌లోని ఒక ప్రైవేట్‌ ట్రావెల్ ఏజెన్సీ ద్వారా నూటా యాబై మందికి పైగా విహారయాత్రకు వెళ్లారు. యాత్ర ముగిసి లోపు 16 మంది పర్యాటకులు అస్వస్థతకు గురవ్వడంతో వారు హోటల్‌లోనే ఉండిపోయారు.

అయితే, బుధవారం ఉదయం భారీ వరదలు విరుచుకుపడ్డాయి. దీంతో రోడ్డు, వంతెనలు పూర్తిగా కొట్టుకుపోయాయి.దీంతో కమ్యూనికేషన్ నెట్‌వర్క్‌లు, ఫోన్ సిగ్నల్స్‌ , విద్యుత్ సరఫరా వంటి సమాచార వ్యవస్థలన్నీ పూర్తిగా స్తంభించిపోయాయి. దీంతో తెలుగు వారి గురించి సమాచారం లేకుండా పోయింది. వారి కోసం ఇండియన్ ఎంబసీ, నేపాల్ రక్షణ దళాలు హెలికాప్టర్ల ద్వారా గాలింపు చర్యలు చేపడుతున్నాయి. బాధిత కుటుంబ సభ్యుల సమాచారం కోసం నేపాల్‌ ఎంబసీ హెల్‌లైన్ నంబర్లను సంప్రదించాలని అధికారులు కోరారు.

కర్నలు జిల్లా ఆదోని పట్టణానికి చెందిన ప్రముఖ అర్చకులు భాస్కరశాస్త్రి కుటుంబం ప్రస్తుతం చైనా పరిధిలోని డార్చింగ్ ప్రాంతంలో చిక్కుకుంది. భాస్కరశాస్త్రి, ఆయన సతీమణి శారద, కుమారు రఘునాథ్‌శాస్త్రి, కోడలు హన్సిక ఈ నెల 10న కైలాస యాత్రకు వెళ్లారు. కానీ అనారోగ్య కారణాలతో పరిక్రమ యాత్రకు వెళ్లలేకపోయారు. అయితే వీళ్లు ఎలా రావాలో తెలియక డైలమాలో పడ్డారు. వారికి అధికారులు హెల్ప్ చేస్తున్నారు. అధికారులతోపాటు ఆదోనీ ఎమ్మెల్యే వారితో మాట్లాడారు.

కుప్పం వాసి కోసం గాలింపు

చిత్తూరు జిల్లా కుప్పం ప్రాంతానికి చెందిన వీఎస్‌ బాలసుబ్రమణ్యం తన భార్యాపిల్లలతో కలిసి హైదరాబాద్‌లో నివసిస్తున్నారు. ఈనెల 13న ఈషా కైలాస్ గ్రూప్‌ ద్వారా కైలాస్ మానససరోవర్‌, మౌంట్‌ కైలాస్‌ యాత్రకు బయల్దేరారు. అయితే బుధవారం వచ్చే టైంలో వరదలు ముంచెత్తడంతో చిక్కుకుపోయారు. ఆయన కోసం కుటుంబ సభ్యులు తీవ్ర ఆందోళన వ్యక్తం చేస్తున్నారు.

ఆంధ్రప్రదేశ్ ప్రభుత్వం సత్వర చర్యలు

నేపాల్ వరదల్లో చిక్కుకున్న ఏపీ వాసుల కోసం ప్రభుత్వం చర్యలు చేపట్టింది. వరద ప్రభావిత ప్రాంతాల్లో ఉన్న ఏపీ వాసులను యుద్ధప్రాతిపదికన గుర్తించి, వారిని వెంటనే సురక్షిత ప్రాంతాలకు తరలించేలా చర్యలు తీసుకోవాలని అధికారులను ఆదేశించారు. విదేశాంగ మంత్రిత్వశాఖతోనూ, జాతీయ విపత్తు నిర్వహణ బృందాలతో నిరంతరం సమన్వయం చేసుకోవాలని స్పష్టం చేశారు. ఏపీ యాత్రికుల రక్షణ కోసం ఢిల్లీలోని ఏపీ భవన్‌లో ప్రత్యేక కంట్రోల్ రూమ్‌ ఏర్పాటు చేయించారు. అలాగ రియల్‌ టైమ్‌ గవర్నెన్స్‌ సొసైటీ ద్వారా పరిస్థితిని నిరంతరం పర్యవేక్షించాలని ఆదేశించారు.

మంత్రి నారా లోకేష్‌ కూడా సహాయక చర్యలను నేరుగా పర్యవేక్షిస్తున్నారు. నేపాల్ వరదల్లో చిక్కుకున్న వారి క్షేమ సమాచారాన్ని ఆయన ఏపీ భవన్ అధికారులను అడిగి తెలుసుకుంటున్నారు. చిక్కుకున్న వారిలో ఏడుగురు సురక్షితంగా ఉన్నట్టు అధికారులు తెలిపారు. మరికొందరి ఆచూకీ కోసం ప్రయత్నిస్తున్నట్టు వెల్లడించారు. ఏపీ ఏర్పాటు చేసిన హెల్ప్‌లైన్ నెంబర్లు- 011-23384016, 011-23387089 9059824101

తెలంగాణ ప్రభుత్వం అప్రమత్తం

తెలంగాణ ప్రభుత్వం కూడా రక్షణ చ్యలు చేపట్టింది. ముఖ్యమంత్రి రేవంత్ రెడ్డి ఆదేశాల మేరకు ఢిల్లీలోని తెలంగాణ భవన్‌లో ప్రత్యేకంగా కంట్రోల్ రూమ్ ఏర్పాటు చేశారు. తెలంగాణ ఏర్పాటు చేసిన హెల్ప్‌లైన్ నెంబర్‌లు- 871999044, 9949351270, 9618597969

Fake Korrameenu Fish Identification: మార్కెట్‌లో కొరమీను పేరిట ప్రాణాంతక థాయ్‌ మాంగూర్ దందా! రెండింటి మధ్య తేడా ఇలా తెలుసుకోండి?

Khagesh — Wed, 26 Aug 2026 14:09:03 +0530

Murrel Fish vs African Catfish: మహారాష్ట్రంలో భారీగా థాయ్‌మాంగూర్‌ ఫిష్‌ అంటే క్యాట్‌ఫిష్‌ను అధికారులు పట్టుకున్నారు. లారీ కొద్ది చేపలని పూడ్చి పెట్టారు. ఇవి తింటే క్యాన్సర్ వస్తుందని అందుకే ప్రజలు అప్రమత్తంగా ఉండాలని అధికారులు హెచ్చరిస్తున్నారు. అయితే చూడటానికి ఒకేలా ఉండే కొరమీను, క్యాట్‌ఫిష్ మధ్య తేడాని ఎలా గుర్తించాలో చూద్దాం.

ఆదివారం వచ్చిందంటే చాలు మాంసాహార ప్రియుల ఇళ్లల్లో ముక్క ఉడకాల్సిందే. చికెన్, మటన్ కంటే చాలా మంది చేపల వంటకానికే తొలి ప్రాధాన్యత ఇస్తారు. అందులోనూ తెలుగువారికి కొరమీను చేపలంటే ప్రామం. అద్భుతమైన రుచితోపాటు, ఆరోగ్యానికి మంచి చేసే ఈ చేపలను వైద్యులు కూడా సిఫార్సు చేస్తుంటారు. అయితే ప్రస్తుతం మార్కెట్‌కు వెళ్లే వినియోగదారులకు ఒక నమ్మలేని షాకింగ్ నిజం ఎదురవుతోంది. మీరు మార్కెట్‌లో కిలోకి 600 నుంచి 900 వరకు భారీ ధర చెల్లించి కొనుగోలు చేస్తున్న చేప నిజంగానే అసలైన కొరమీనేనా లేకా ప్రాణాంతకమైన క్యాట్ ఫిష్షా అనే అనుమానం కలగక మానదు. ప్రజల్లో ఉన్న డిమాండ్‌ను దృష్టిలో పెట్టుకొని చాలా మది క్యాట్‌పిష్‌ను కొరమీను అంటూ అమ్మకాలు చేస్తున్నారు.

భారత్‌ ప్రభుత్వం పూర్తిగా నిషేధించిన అత్యంత విషపూరితమైన థాయ్‌ మాంగూర్‌ చేపలు కొరమీను ముక్కలుగా వినియోగదారుల నెత్తిన రుద్దుతున్నారు. చూసేందుకు దాదాపు ఒకే రూపురేఖలతో ఉండే ఈ నకిలీ కొరమీనును ఆహారంగా తీసుకోవడంవల్ల క్యాన్సర్‌, కాలేయ సంబంధిత ప్రాణాంతక వ్యాధులు వస్తాయని వైద్యులు హెచ్చరిస్తున్నారు.

నేషనల్ గ్రీన్ ట్రిబ్యునల్‌, కేంద్ర మత్స్యశాఖలు దేశంలో ఈ చేపల పెంపకాన్ని, విక్రయాన్ని పూర్తిగా నిషేధించింది. అయినా చాలా మంది వ్యాపారులు దొంగచాటున విక్రయిస్తున్నారు. దీని వెనుక పెద్ద మాఫియా ఉంది. గుట్టుచప్పుడు కాకుండా మురికి కాలువల్లో, డ్రైనేజీల్లో, నీటి గుంటల్లో వీటిని పెంచుతున్నారు.

థాయ్‌ మాంగూర్‌ చేపలు కేవలం 2 నుంచి 3 నెలల వ్యవధిలోనే కేజీల కొద్ది బరువు పెరుగుతాయి. వీటికి ప్రత్యేకంగా ఎలాంటి ఆహారం వేయాల్సిన పని లేదు. కుళ్లిన మాంసం, కోళ్ల వ్యర్థాలు, డ్రైనేజీ మురుగు నీటిలో ఉండే ఫుడ్ తింటూ పెరుగుతాయి. కొన్నిప్రాంతాల్లో లైవ్ ఫిష్‌ను అమ్ముతుంటే, మరికొన్నిప్రాంతాల్లో తలలు తీసేసి మిగతా భాగాన్ని కొరమీనుగా చెప్పి విక్రయిస్తుంటారు.

ఆరోగ్యంపై దాడి చేసే థాయ్‌ మాంగూర్‌ ఫిష్‌

ఇవి మురుగు నీటిలో, ఆక్సిజన్ లేని ప్రాంతాల్లో పెరగడం వల్ల అత్యంత ప్రమాదకరమైన లోపాలు వీటి శరీరంలో నిల్వ అవుతాయి. ఆర్సెనిక్, సీసం, పాదరసం, కాడ్మియం, ఐరన్ వంటి ప్రమాదకరమైన లోపాలు ఉంటాయి. ఇవి మనిషి బాడీలోకి వెళ్లి రోగనిరోధక శక్తిని నాశనం చేస్తాయి.

ఈ చేపల కణజాలాల్లో పేరుకుపోయే టాక్సిన్లు, కార్సినోజెన్లు గ్యాస్ట్రిక్, చర్మ క్యాన్సర్‌ కణాలను ఉత్పత్తి చేస్తాయి. క్రమం తప్పకుండా తీసుకుంటే కడుపునొప్పి, లీవర్ డ్యామేజ్‌, కిడ్నీ ఫెయిల్యూర్‌, చర్మ రోగాలు వస్తాయి. గర్భిణీలు, చిన్న పిల్లలు తీసుకుంటే నరాలబలహీనత, మెదడు ఎదుగుదల లోపం, శారీరక వైకల్యం వచ్చే ప్రమాదం ఉంది.

చేపని టచ్ చేసి కనిపెట్టే నిజమైన కొరమీను గుర్తించవచ్చు

చేపలను కొనుగోలు చేసేటప్‌ుడు కేవలం పైపైన చూసి మోసపోతుంటాం. టచ్ చేస్తే చాలా వరకు మంచి చేపలను గుర్తించవచ్చు. కొరమీను చర్మంపై గట్టి, నిండైన పొలుసులు ఉంటాయి. పద్ధతిగా అమర్చి ఉంటాయి. పట్టుకున్నప్పుడు చేతికి పొలుసుల గరుకుదనం, గట్టిదనం తెలుస్తుంది. అయితే క్యాట్‌ఫిష్‌ పట్టుకొని చూస్తే వాటికి పొలుసులు ఉండవు. చర్మం ఎక్కువ జిగురుగా, బంకగా, ఉంటుంది. మార్కెట్‌లో పొలుసులు లేకుండా నల్లటి నిగనిగలాడే చేపలు కనిపిస్తే మాత్రం అవి కొరమీను కావని గుర్తు పెట్టుకోండి.

తల భాగం గమనిస్తే తెలుస్తుంది!

చేప తల భాగాన్ని గమనిస్తే ఆ చేప జాతి ఏంటో క్షణాల్లో తెలిసిపోతుంది. కొరమీనును అంతర్జాతీయంగా స్నేక్ హెడ్ ఫిష్ అంటారు. అంటే పాము తల ఆకారంలో చదునుగా ఉంటుంది. దీని మూతి వద్ద ఎలాంటి మీసాలు ఉండవు. తలపై కూడా పొలుసులు ఉంటాయి. క్యాట్‌ఫిష‌ తలభాగం చాటలాగా చాలా వెడల్పుగా ఉంటుంది. చదునుగా ఉంటుంది. గట్టి ఎముక నిర్మాణం కలిగి ఉంటుంది. దీని మూతి వద్ద 4 జతల పొడవైన మీసాలు ఉంటాయి.

శరీర నిర్మాణం పరిశీలన

కొరమీను వీపుపై ఉండే రెక్క పొడవుగా ఉన్నప్పటికీ తోకకు వరకు ఉండదు. దీని తోక భాగం విడిగా స్పష్టమైన గుండ్రటి ఫ్యాన్ ఆకారంలో ఉంటుంది. కొరమీను శరీరంపై నలుపు, ముదురు పచ్చ లేదా గోధుమ రంగు చారలు ఉండి, పొట్ట భాగం తెల్లగా లేత పసుపు రంగులో ఉంటుంది. థాయ్‌ మాంగూర్ ఫిష్‌ వీపుపై పెద్ద రెక్క ఉంటుంది. ఇది తల నుంచి తోక వరకు ఉంటుంది. దీని బాడీ పూర్తిగా నల్లగా, బూడిద రంగులో ఉంటుంది.

వండేటప్పుడు కూడా తేడా తెలుసుకోవచ్చు

కొరమీను ముక్కలుగా కోసినప్పుడు దాని మాంసం తెల్లగా, గట్టిగా ఉంటుంది. ఒకే ముల్లు ఉంటుంది. చిన్న ముల్లులు ఉండవు. వండుతుండగా ముక్కలు విరిగిపోవు. థాయ్ మాంగూర్ ముక్కలు తెల్లగా ఉండదు. ఇది ఎర్రగా, లేదా ముదురు రంగులో ఉంటుంది. వండేటప్పుడు ముక్కలు త్వరగా మెత్తబడి విరిగిపోతాయి. నీచు వాసన వస్తుంది.