karimnagar

Karimnagar Development: రాజకీయాలను పక్కనబెట్టి కరీంనగర్ అభివృద్ధికి కట్టుబడి.. రూ.4 కోట్ల పనులకు బండి సంజయ్, పొన్నం ప్రభాకర్ శంకుస్థాపన

Satyaprasad Bandaru — Mon, 9 Nov 2026 17:55:00 +0530

Karimnagar Development: రాజకీయాలు ఏవైనా సరే, ఎన్నికలు ముగిశాక ప్రజలకు ఇచ్చిన హామీలను నెరవేర్చడమే నాయకుల ప్రధాన బాధ్యత అనే సూత్రాన్ని నిరూపిస్తూ కరీంనగర్ పట్టణాభివృద్ధికి కేంద్ర, రాష్ట్ర ప్రభుత్వాలు చేతులు కలిపాయి. కరీంనగర్ రూ.4 కోట్ల వ్యయంతో చేపడుతున్న పలు అర్బన్ డెవలప్‌మెంట్ పనులకు కేంద్ర హోంశాఖ సహాయ మంత్రి బండి సంజయ్ కుమార్, రాష్ట్ర బీసీ సంక్షేమ శాఖ మంత్రి పొన్నం ప్రభాకర్, నగర మేయర్ సునీల్ రావు కలిసి ఘనంగా శంకుస్థాపన చేశారు.

ఎన్నికల వరకే రాజకీయం- మంత్రి పొన్నం ప్రభాకర్

ఈ సందర్భంగా మాట్లాడిన మంత్రి పొన్నం ప్రభాకర్, రాజకీయ విభేదాలను పక్కనబెట్టి ఉమ్మడి కరీంనగర్ జిల్లాను ఉత్తర తెలంగాణలోనే అగ్రస్థానంలో నిలబెట్టడమే తమ ప్రథమ లక్ష్యమని స్పష్టం చేశారు. "రాజకీయాలు కేవలం ఎన్నికల వరకే పరిమితం, ఆ తర్వాత ప్రజల శ్రేయస్సు, ప్రాంత అభివృద్ధే ముఖ్యం," అని ఆయన అన్నారు. ఇప్పటికే రాష్ట్ర ప్రభుత్వం కరీంనగర్ అర్బన్ డెవలప్‌మెంట్ కోసం రూ.1,000 కోట్లు మంజూరు చేసిందని, విద్య, వైద్యం, సాగునీటి ప్రాజెక్టుల నిర్మాణంలో పోటీపడి పనిచేస్తున్నామని తెలిపారు.
మానేరు రివర్ ఫ్రంట్ పనులపై విచారణ కొనసాగుతూనే నగర అభివృద్ధిని వేగవంతం చేస్తామని పేరొన్నారు.

డంపింగ్ యార్డ్‌పై చిల్లర రాజకీయాలు వద్దు- కేంద్ర మంత్రి బండి సంజయ్

కేంద్ర మంత్రి బండి సంజయ్ మాట్లాడుతూ, గత పాలకుల నిర్లక్ష్యం వల్ల కరీంనగర్ నగర అభివృద్ధి వెనుకబడిపోయిందని మండిపడ్డారు. కేంద్ర, రాష్ట్ర ప్రభుత్వాల సమన్వయంతో యూసీఎఫ్ నుంచి రూ.840 కోట్లు మంజూరు చేయించామని చెప్పారు. చాలా కాలంగా నగరవాసులను వేధిస్తున్న డంపింగ్ యార్డ్ సమస్య పరిష్కారానికి రూ.70 కోట్లు తీసుకొచ్చామని తెలిపారు. కొందరు స్వార్థ నాయకులు కమీషన్ల కోసం కాంట్రాక్టర్లను బెదిరించి పారిపోయేలా చేశారని ఆగ్రహం వ్యక్తం చేస్తూ, అభివృద్ధి పనుల్లో చిల్లర రాజకీయాలు చేస్తే ప్రజలే తరిమికొడతారని హెచ్చరించారు.

Also Read: కాళేశ్వరం ప్రాజెక్టుపై అసెంబ్లీ సమరం.. కేసీఆర్‌కు సీఎం రేవంత్ రెడ్డి ఓపెన్ ఛాలెంజ్!

ఏడాదిలో రోడ్లు పూర్తి

మానేరు తీరంలో ఉన్న డంపింగ్ యార్డ్‌ను తక్షణమే జనావాసాలకు దూరంగా తరలించడమే తమ ప్రధాన లక్ష్యమని ఇద్దరు నేతలూ స్పష్టం చేశారు. నాయకులందరి సమన్వయంతో రాబోయే ఏడాది కాలంలో కరీంనగర్ నగరంలోని అన్ని అంతర్గత రోడ్ల నిర్మాణాన్ని పూర్తి చేసి, నగర రూపురేఖలను సమూలంగా మారుస్తామని ప్రజలకు హామీ ఇచ్చారు.

Also Read: ఆదిలాబాద్ ఏజెన్సీలో 10 రోజులపాటు ఆదివాసీల దండారీ వేడుకలు.. గుస్సాడి నృత్యాలు

Ponnam Prabhakar: హుస్నాబాద్‌లో ఇందిరమ్మ ఇంట్లో ఘనంగా దీపావళి వేడుకలు.. పాల్గొన్న మంత్రి పొన్నం ప్రభాకర్

Shankar Dukanam — Sat, 7 Nov 2026 14:04:16 +0530

హుస్నాబాద్: తెలంగాణ ప్రభుత్వం ఇందిరమ్మ ఇంట్లో దీపావళి కార్యక్రమానికి శ్రీకారం చుట్టింది. ఈ క్రమంలో హుస్నాబాద్ పట్టణంలోని 12వ వార్డులో "మన ఇందిరమ్మ ఇంట్లో దీపావళి" వేడుకలను ఘనంగా నిర్వహించారు. ఈ కార్యక్రమంలో రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ ముఖ్య అతిథిగా పాల్గొన్నారు. దశాబ్ద కాలంగా సొంతింటి కోసం ఎదురుచూస్తున్న పొన్నం కోమల - సమ్మయ్య ముదిరాజ్ దంపతులకు కాంగ్రెస్ ప్రభుత్వంలో ఇందిరమ్మ ఇల్లు మంజూరైంది. ఈ సందర్భంగా లబ్ధిదారు కోమల - సమ్మయ్య దంపతులకు మంత్రి కొత్త బట్టలు పెట్టి, స్వీట్లు తినిపించి దీపావళి పండుగ శుభాకాంక్షలు తెలిపారు. అనంతరం వారి కొత్త ఇంట్లో బాణసంచా పేల్చి ప్రజాప్రతినిధులు, అధికారులతో కలిసి మంత్రి దీపావళి వేడుకలను అత్యంత వేడుకగా జరుపుకున్నారు.

ఈ సందర్భంగా మంత్రి పొన్నం ప్రభాకర్ మాట్లాడుతూ.. సీఎం రేవంత్ రెడ్డి నాయకత్వంలో పేదల దశాబ్దాల సొంతింటి కలను నెరవేరుస్తూ వారి జీవితాల్లో కొత్త వెలుగులు నింపుతున్నామని తెలిపారు. హుస్నాబాద్ నియోజకవర్గానికి మొదటి దశలో 3,500 ఇందిరమ్మ ఇళ్లు మంజూరు కాగా, ఇప్పటికే 2,500కు పైగా ఇళ్ల నిర్మాణాలు పూర్తయ్యాయని పేర్కొన్నారు. వీటిలో లబ్ధిదారులు ఈ దీపావళి పండుగను ఆనందంగా జరుపుకుంటున్నారని పేర్కొన్నారు. వీటితో పాటు 500 గుడిసెల స్థానంలో నూతన ఇళ్లు, మధ్యలో నిలిచిపోయిన మరో 500 ఇళ్లతో పాటు రెండో దశ కింద 1,000 ఇళ్లు మంజూరయ్యాయని తెలిపారు.

ఆర్థిక పరిమితులు, ఇబ్బందులు ఉన్నప్పటికీ అర్హులైన ప్రతి ఒక్కరికీ విడతలవారీగా ఇళ్లు మంజూరు చేస్తామన్నారు. రెండో దశ లబ్ధిదారులకు వారం, పది రోజుల్లో ప్రొసీడింగ్స్ అందిస్తామని మంత్రి పొన్నం ప్రభాకర్ స్పష్టం చేశారు. హుస్నాబాద్‌తో పాటు రాష్ట్రవ్యాప్తంగా ఉన్న లబ్ధిదారులందరూ తమ సొంతింట్లో ఈ పండుగను ఘనంగా జరుపుకోవాలని మంత్రి పిలుపునిచ్చారు.

తమ సొంతింటి కల నెరవేరడం పట్ల లబ్ధిదారులు కోమల - సమ్మయ్య తీవ్ర సంతోషం వ్యక్తం చేశారు. కాంగ్రెస్ ప్రభుత్వం రాగానే మంత్రి పొన్నం ప్రభాకర్ చొరవతో తమకు ఇందిరమ్మ ఇల్లు దక్కిందని, దాదాపు 10 ఏళ్ల నిరీక్షణ తర్వాత ఈ దీపావళిని సొంత ఇంట్లో జరుపుకోవడం మర్చిపోలేని అనుభూతిని ఇచ్చిందని చెప్పారు. తమకు సొంతిల్లు అందించిన ముఖ్యమంత్రి రేవంత్ రెడ్డికి, మంత్రి పొన్నం ప్రభాకర్‌కు వారు ప్రత్యేక ధన్యవాదాలు తెలిపారు. ఈ కార్యక్రమంలో మున్సిపల్ చైర్మన్ దండి లక్ష్మి, వైస్ చైర్మన్ చిత్తారి పద్మ, కౌన్సిలర్లు, ఆర్డీవో రామ్మూర్తి, మున్సిపల్ కమిషనర్ మల్లికార్జున్, సింగిల్ విండో చైర్మన్ శివయ్య మరియు పలువురు అధికారులు, ప్రజాప్రతినిధులు పాల్గొన్నారు.

Telangana Graduates MLC Election: ఎమ్మెల్సీ ఓటరు నమోదుకు చివరి తేదీ నవంబర్ 6.. పట్టభద్రుల ఓట్లపై కాంగ్రెస్ ఫోకస్!

Hema Nidadhana — Thu, 5 Nov 2026 06:30:55 +0530

హైదరాబాద్: తెలంగాణలో పట్టభద్రుల ఎమ్మెల్సీ ఎన్నికలకు రాజకీయ పార్టీలు ఇప్పటి నుంచే కసరత్తు ప్రారంభించాయి. వచ్చే ఏడాది మార్చిలో జరగనున్న రెండు పట్టభద్రుల ఎమ్మెల్సీ స్థానాల ఎన్నికలను దృష్టిలో పెట్టుకొని ఓటరు నమోదు ప్రక్రియపై ప్రత్యేక దృష్టి సారించాయి. ఈ క్రమంలో పట్టభద్రుల ఓటరు నమోదుకు నవంబర్ 6 చివరి తేదీగా ఎన్నికల అధికారులు ప్రకటించారు.

వరంగల్– ఖమ్మం– నల్గొండ, మహబూబ్‌నగర్– రంగారెడ్డి– హైదరాబాద్ పట్టభద్రుల నియోజకవర్గాలకు సంబంధించి కొత్త ఓటర్ల జాబితా రూపొందిస్తున్నారు. అర్హులైన పట్టభద్రులు ఫారం-18 ద్వారా దరఖాస్తు చేసుకోవాలని తెలంగాణ రాష్ట్ర ప్రధాన ఎన్నికల అధికారి సి. సుధర్శన్ రెడ్డి సూచించారు.

ఓటర్ల జాబితాపై CEO కీలక ప్రకటన

ఓటరు నమోదుకు నవంబర్ 6 చివరి తేదీ అయినప్పటికీ.. ఆ తర్వాత కూడా దరఖాస్తులు స్వీకరించే అవకాశం ఉందని CEO స్పష్టం చేశారు. నవంబర్ 25న ముసాయిదా ఓటర్ల జాబితా ప్రకటించనున్నారు. నవంబర్ 25 నుంచి డిసెంబర్ 10 వరకు అభ్యంతరాలు, అభ్యర్థనలు స్వీకరిస్తారు. డిసెంబర్ 30న తుది ఓటర్ల జాబితా ప్రచురించనున్నారు.

అంతేకాదు.. డిసెంబర్ 30న తుది జాబితా ప్రచురించిన తర్వాత కూడా నామినేషన్ల దాఖలుకు చివరి తేదీ వరకు అర్హులైన పట్టభద్రులు ఫారం-18 ద్వారా దరఖాస్తు చేసుకోవచ్చని ఎన్నికల అధికారులు స్పష్టం చేశారు.

ఇప్పటికే గతంలో పట్టభద్రుల ఓటర్లుగా నమోదైన వారు కూడా కొత్తగా దరఖాస్తు చేసుకోవాల్సి ఉంటుంది. ఆన్‌లైన్‌లో తెలంగాణ CEO వెబ్‌సైట్ ద్వారా లేదా సంబంధిత ఎన్నికల అధికారులకు నేరుగా ఫారం-18 సమర్పించవచ్చు.

పట్టభద్రుల ఓట్లపై కాంగ్రెస్ ప్రత్యేక వ్యూహం

మరోవైపు అధికార కాంగ్రెస్ పార్టీ పట్టభద్రుల ఓటరు నమోదును రాజకీయంగా కీలకంగా భావిస్తోంది. రెండు ఎమ్మెల్సీ స్థానాల్లో పార్టీ అభ్యర్థుల విజయమే లక్ష్యంగా ఓటర్ల నమోదుపై దృష్టి సారిస్తోంది. అర్హులైన పట్టభద్రులను గుర్తించడం, వారితో దరఖాస్తులు చేయించడం, ఓటరు నమోదుపై అవగాహన కల్పించడం వంటి అంశాలపై పార్టీ శ్రేణులు దృష్టి పెట్టాల్సిన అవసరం ఉంది.

ముఖ్యంగా యువత, ఉద్యోగులు, నిరుద్యోగ పట్టభద్రులు, విద్యావంతులను ఓటర్లుగా నమోదు చేయించడం ద్వారా ఎన్నికల సమయానికి బలమైన ఓటు బ్యాంకును సిద్ధం చేసుకోవాలన్నది కాంగ్రెస్ రాజకీయ లక్ష్యంగా కనిపిస్తోంది.

Also Read: MLC Elections: ఎమ్మెల్సీ ఎన్నికల్లో లెఫ్ట్ పార్టీల మద్దతుపై కాంగ్రెస్ ఫోకస్.. రేవంత్ వ్యూహం ఏంటి?

రెండు స్థానాలు.. కాంగ్రెస్‌కు ప్రతిష్టాత్మకం!

మహబూబ్‌నగర్– రంగారెడ్డి– హైదరాబాద్ నియోజకవర్గం నుంచి సామ రామ్మోహన్ రెడ్డి, వరంగల్–ఖమ్మం–నల్గొండ నియోజకవర్గం నుంచి రాంరెడ్డి సర్వోత్తమ్ రెడ్డిని కాంగ్రెస్ పార్టీ అభ్యర్థులుగా ప్రకటించింది.

ఈ నేపథ్యంలో ఓటరు నమోదు ప్రక్రియలో కాంగ్రెస్ ఎంత చురుగ్గా వ్యవహరిస్తుంది? పార్టీ శ్రేణులు ఎంతమంది పట్టభద్రులను ఓటర్లుగా నమోదు చేయిస్తాయి? నమోదు అయిన ఓట్లు ఎన్నికల్లో కాంగ్రెస్ అభ్యర్థులకు ఎంతవరకు కలిసివస్తాయి? అనేది ఆసక్తికరంగా మారింది. ఎమ్మెల్సీ ఎన్నికలకు ముందే ఓటర్ల నమోదుపై సాగుతున్న ఈ రాజకీయ పోరు రాబోయే రోజుల్లో మరింత వేడెక్కే అవకాశం ఉంది.

Conductor Dies: చిల్లర వివాదం.. ప్రయాణికురాలు నెట్టేయడంతో గాయపడిన RTC కండక్టర్ మృతి, మంత్రి పొన్నం సంతాపం

Shankar Dukanam — Wed, 4 Nov 2026 08:36:31 +0530

హైదరాబాద్: మణుగూరు డిపోకు చెందిన మహిళా కండక్టర్ గుండ్ల ప్రవళిక హైదరాబాద్‌లో చికిత్స పొందుతూ మృతి చెందడంపై తెలంగాణ రవాణా, బీసీ సంక్షేమ శాఖ మంత్రి పొన్నం ప్రభాకర్ తీవ్ర దిగ్భ్రాంతి వ్యక్తం చేశారు. ప్రవళిక మరణ వార్త తనను తీవ్రంగా కలచివేసిందన్నారు.

ఇటీవల బస్సులో ప్రయాణికులతో జరిగిన వివాదంలో ఆర్టీసీ కండక్టర్ ప్రవళిక ప్రమాదవశాత్తు బస్సు టైర్ల కింద పడి తీవ్రంగా గాయపడ్డారు. ఆమెకు మెరుగైన వైద్యం అందించేందుకు హైదరాబాద్‌లోని సాయి సంజీవని ఆసుపత్రిలో చేర్పించి చికిత్స అందించామని మంత్రి పొన్నం తెలిపారు. ఆమె ఆరోగ్యం మెరుగుపడి పూర్తిస్థాయిలో కోలుకుని తిరిగి వస్తుందని ఆశించామని, కానీ ఇలా మృతి చెందడం ఎంతో బాధాకరమని ఆవేదన వ్యక్తం చేశారు.

ఈ ఘటనకు బాధ్యులైన వారిపై చట్టప్రకారం కఠిన చర్యలు తీసుకుంటున్నామని మంత్రి పొన్నం ప్రభాకర్ స్పష్టం చేశారు. ప్రవళిక మృతి పట్ల తన ప్రగాఢ సంతాపాన్ని తెలియజేస్తూ, ఆమె కుటుంబ సభ్యులకు సానుభూతి తెలిపారు. ఈ కష్టకాలంలో మహిళా కండక్టర్ ప్రవళిక కుటుంబానికి రాష్ట్ర ప్రభుత్వం, అలాగే ఆర్టీసీ పూర్తి స్థాయిలో అండగా ఉంటాయని భరోసా ఇచ్చారు.

అసలేం జరిగిందంటే..

అక్టోబర్ 25న మణుగూరు నుంచి భద్రాచలం వెళ్తున్న ఆర్టీసీ పల్లె వెలుగు బస్సులో బాలుడి టికెట్, చిల్లర విషయం వివాదానికి దారి తీసింది. మిట్టగూడెంకు చెందిన ప్రయాణికురాలికి, మహిళా కండక్టర్‌కు మధ్య తీవ్ర వాగ్వాదం జరిగింది. మిట్టగూడెం వద్ద ప్రయాణికురాలు దిగేందుకు ప్రయత్నించగా, కండక్టర్ ఆమెను అశ్వాపురం పోలీస్ స్టేషన్‌కు తీసుకెళ్లేందుకు బస్సును ముందుకు నడపాలని డ్రైవర్‌కు సూచించారు.

ఈ క్రమంలో ఆ ప్రయాణికురాలు భయంతో తోసివేయడంతో మహిళా కండక్టర్ కదులుతున్న బస్సు వెనుక చక్రాల కింద పడి తీవ్రంగా గాయపడ్డారు. ప్రమాదం జరిగిన వెంటనే ఆమెను 108 వాహనంలో భద్రాచలం ప్రభుత్వ ఆసుపత్రికి, ఆ తర్వాత మెరుగైన వైద్యం కోసం హైదరాబాద్‌కు తరలించారు. ఈ ఘటనకు సంబంధించి కేసు నమోదు చేసి సదరు ప్రయాణికురాలిని అదుపులోకి తీసుకున్నట్లు సీఐ ఎల్లయ్య వెల్లడించారు.

Viral News: అమ్మా.. నన్ను తీసుకెళ్లు భయమేస్తుంది.. జగిత్యాలలో శిశు సంరక్షణ కేంద్రంలో పసివాడి నరకం

Shankar Dukanam — Mon, 2 Nov 2026 16:46:20 +0530

"నన్ను తీసుకెళ్లు అమ్మా.. ఇక్కడ భయమేస్తుంది.." అంటూ ఒక మూడేళ్ల పసివాడు కన్నీటితో వేడుకుంటున్న దృశ్యం గుండెల్ని పిండేస్తోంది. జగిత్యాల జిల్లాలో జరిగిన ఘటన వివరాలు ఇలా ఉన్నాయి. పెళ్లయిన తర్వాత పిల్లలు కలగకపోవడంతో ఓ జంట హిందూ సంప్రదాయ పద్ధతి ప్రకారం ఒక చిన్నారిని దత్తత తీసుకున్నారు. గత మూడేళ్లుగా ఆ చిన్నారినే తమ లోకంగా భావిస్తూ, ప్రాణానికి ప్రాణంగా కంటికి రెప్పలా పెంచుకుంటున్నారు.

నిబంధనల పేరిట అధికారుల చర్యలు

అయితే చట్టపరమైన దత్తత నిబంధనలు పాటించలేదనే ఫిర్యాదు ఆధారంగా మహిళా శిశు సంక్షేమ శాఖ అధికారులు ఈ వ్యవహారంలో జోక్యం చేసుకున్నారు. మూడేళ్ల పాటు తల్లి ఒడిలో ప్రేమగా పెరిగిన పసికందును వారి నుంచి వేరు చేసి స్థానిక శిశు సంక్షేమ కేంద్రానికి తరలించారు. పెంచిన వారు అయినప్పటికీ.. అప్పటివరకు అమ్మానాన్నల ఆప్యాయతలో పెరిగిన ఆ బాలుడు, ఒక్కసారిగా కొత్త చోటుకు తీవ్ర భయాందోళనలకు గురయ్యాడు. తన వద్ద అమ్మ లేదని దిగులు చెందుతున్నాడు. అధికారుల నిర్లక్ష్యం, నిబంధనల పేరిట జరుగుతున్న జాప్యం వల్ల ఆ పసివాడు నరకయాతన అనుభవిస్తుండటం స్థానికంగా ఆందోళన కలిగిస్తోంది.

తమ బిడ్డ లేక క్షణమొక యుగంలా గడిపిన ఆ తల్లిదండ్రులు శిశు సంక్షేమ కేంద్రానికి వెళ్లి బాలుడిని చూసింది. ఆ తల్లిని చూడగానే ఆ పసివాడికి ప్రాణం లేచొచ్చింది. అమ్మా అంటూ గట్టిగా హత్తుకుని... గుండెలవిసేలా రోదించాడు. "నన్ను ఇంటికి తీసుకెళ్లు అమ్మా.. నేను ఇక్కడ ఉండలేను.. భయమేస్తుందంటూ" ఏడ్చిన తీరు అక్కడున్న వారిని సైతం కదిలించింది. తాము ఏ పాపమూ చేయలేదని... హిందూ సంప్రదాయాల ప్రకారమే బిడ్డను దత్తత తీసుకున్నామంటూ స్పష్టం చేస్తూ ఆ దంపతులు న్యాయవాది ద్వారా హైకోర్టును ఆశ్రయించారు. ఇరుపక్షాల వాదనలు విన్న కోర్టు.. చిన్నారి భవిష్యత్తు, మానసిక స్థితిని దృష్టిలో ఉంచుకుని అక్టోబర్ 16వ తేదీనే ఆ బాలుడ్ని తిరిగి పెంచిన తల్లిదండ్రులకే అప్పగించాలని స్పష్టమైన ఉత్తర్వులు జారీ చేసింది.

అయితే కోర్టు ఆదేశాలు ఇచ్చి రోజులు గడుస్తున్నా క్షేత్రస్థాయి అధికారులు మాత్రం రకరకాల కొర్రీలు పెడుతున్నారు. తమ బిడ్డను తమకు అప్పగించడంలో తీవ్ర జాప్యం చేస్తున్నారని ఆ తల్లిదండ్రులు ఆరోపిస్తున్నారు. శిశు సంక్షేమ కేంద్రంలో సరైన ఆలనపాలనా లేక తమ కొడుకు ఆరోగ్యం రోజురోజుకూ క్షీణిస్తోందని, బిడ్డకు ఏదైనా జరిగితే ఎవరిది బాధ్యత అని ఆ తల్లిదండ్రులు ఆవేదన వ్యక్తం చేస్తున్నారు. పిల్లలు లేరని చట్టప్రకారం దత్తత తీసుకుని ప్రేమతో చేరదీసి పెంచుకోవడమే తాము చేసిన తప్పా అని ఆ తల్లి ప్రశ్నిస్తోంది. కోర్టు ఆదేశాలను సైతం బేఖాతరు చేస్తూ శిశు సంక్షేమశాఖ అధికారులు వ్యవహరిస్తున్న తీరుపై తీవ్ర విమర్శలు వ్యక్తమవుతున్నాయి.

Mallanna Sagar Reservoir: మల్లన్నసాగర్ వద్ద బ్లాస్టింగ్స్, నీటి లీకేజీ అవాస్తవం.. హరీశ్ రావు ఆరోపణలపై HMWS డైరెక్టర్ మహేష్ క్లారిటీ

Satyaprasad Bandaru — Sat, 31 Oct 2026 18:25:27 +0530

Mallanna Sagar Reservoir: సిద్దిపేట జిల్లా మల్లన్నసాగర్ రిజర్వాయర్ తిప్పారం వద్ద జరుగుతున్న పనులపై సోషల్ మీడియాలో వస్తున్న పుకార్లపై జలమండలి, ఇరిగేషన్ శాఖ అధికారులు జాయింట్ మీడియా సమావేశం నిర్వహించారు. ఈ సందర్భంగా HMWS డైరెక్టర్ మహేష్ మాట్లాడుతూ.. మల్లన్నసాగర్ వద్ద బ్లాస్టింగ్స్ జరుగుతున్నాయని, కట్ట నుండి నీరు లీక్ అవుతోందని వస్తున్న వార్తల్లో ఎలాంటి నిజం లేదని క్లారిటీ ఇచ్చారు.

HMWS డైరెక్టర్ మహేష్ కీలక వ్యాఖ్యలు

"ప్రాజెక్ట్ వద్ద ఎలాంటి పేలుళ్లు జరపడం లేదు. రిజర్వాయర్ నుంచి 519 మీటర్ల దూరంలో సురక్షితంగా స్మిస్ పైప్‌లైన్ పనులు జరుగుతున్నాయి. పంప్ హౌస్ నిర్మాణం కోసం 190 మీటర్ల పొడవు, 50 మీటర్ల వెడల్పు మరియు లోతుతో పనులు చేపడుతున్నాం. బండరాళ్లను పగలగొట్టడానికి కెమికల్స్, రాక్ డ్రిల్లింగ్ మిషన్లు, 'ఈసీ క్రిస్టల్ సైలెంట్ డ్రిల్లర్ పౌడర్'ల వంటి అత్యంత సురక్షితమైన సాంకేతికతను మాత్రమే ఉపయోగిస్తున్నాం. రూ.7,360 కోట్ల అంచనా వ్యయంతో ఈ పైప్‌లైన్ పనులను ప్రభుత్వం చేపట్టింది. హైదరాబాద్ జంట నగరాల ప్రజలకు నిరంతర తాగునీటిని అందించడమే ఈ ప్రాజెక్ట్ ప్రధాన లక్ష్యం. మల్లన్నసాగర్ కట్ట నుంచి జలాశయ నీళ్లు లీక్ కావడం లేదు. సహజ సిద్ధంగా రాళ్ల మధ్య నుంచి వస్తున్న నీటిని చూసి లీకేజీ అనడం అవాస్తవం. ప్రాజెక్ట్ పూర్తయితే జంట నగరాలలోని 1.30 కోట్ల నుండి 1.50 కోట్ల జనాభా తాగునీటి అవసరాల కోసం ఏడాదికి 20 టీఎంసీల నీటిని తరలించనున్నాం. మల్లన్నసాగర్ కట్టకు 293 మీటర్ల దూరంలో పంప్ హౌస్ పనులు జరుగుతున్నాయి" - HMWS డైరెక్టర్ మహేష్

Also Read: గవర్నర్ కోటా ఎమ్మెల్సీలపై కాంగ్రెస్ కసరత్తు.. రేసులో ఉన్నది వీరే!

మాజీ మంత్రి హరీశ్ రావు విమర్శలు

మల్లన్నసాగర్ రిజర్వాయర్ వద్ద జరుగుతున్న పనులపై మాజీ మంత్రి, సిద్దిపేట ఎమ్మెల్యే తనీరు హరీశ్ రావు తీవ్ర ఆందోళన వ్యక్తం చేశారు. మల్లన్నసాగర్ వంటి భారీ రిజర్వాయర్ కట్టకు అతి సమీపంలో భారీ యంత్రాలతో తవ్వకాలు జరపడం, కెమికల్ డ్రిల్లింగ్స్ చేపట్టడం వల్ల కట్ట స్థిరత్వానికి ప్రమాదం ఏర్పడే అవకాశం ఉందన్నారు. 50 టీఎంసీల సామర్థ్యం ఉన్న జలాశయం కింద వేలాది గ్రామాలు, ప్రజలు నివసిస్తున్నారని, ప్రభుత్వం తాగునీటి ప్రాజెక్ట్ పేరుతో తొందరపాటు నిర్ణయాలు తీసుకుంటూ ప్రజల ప్రాణాలతో చెలగాటమాడుతోందని విమర్శించారు. రిజర్వాయర్ సురక్షితంగా ఉండేలా నిపుణుల కమిటీతో పూర్తిస్థాయి విచారణ జరిపే వరకు ఈ తవ్వకాలను తక్షణమే నిలిపివేయాలని హరీశ్ రావు డిమాండ్ చేశారు.

Also Read: ఒమేగా హాస్పిటల్స్‌పై ఐటీ దాడులు.. 5 రాష్ట్రాల్లోని 24 ప్రాంతాల్లో విస్తృత సోదాలు

Cancel Free Bus Scheme: 'నా భార్య నన్ను వదిలేసి ఫ్రీ బస్సులో వెళ్లిపోయింది'.. ఆ పథకాన్ని రద్దు చేయండి - బాధితుడి ఆవేదన

Satyaprasad Bandaru — Wed, 28 Oct 2026 16:20:48 +0530

Cancel Free Bus Scheme: ప్రభుత్వం మహిళల కోసం అమలు చేస్తోన్న ఉచిత బస్సు ప్రయాణం పథకంపై ఓ వ్యక్తి వింత ఆవేదన సోషల్ మీడియాలో వైరల్ అవుతుంది. రాజన్న సిరిసిల్ల జిల్లా బెజ్జంకి మండలం రేగులపల్లిలో నిర్వహించిన ప్రజా సమస్యల కార్యక్రమం సందర్భంగా మానకొండూర్ ఎమ్మెల్యే కవ్వంపల్లి సత్యనారాయణ ఎదుట బండి కనకయ్య అనే వ్యక్తి తన గోడును వెళ్లగక్కుకున్నాడు.

ఐదు రోజులు వెతికా.. రూ. 2 వేలు ఖర్చు

ఫ్రీ బస్సు సౌకర్యం ఉండటంతో తన భార్య తనను వదిలేసి ఎటో వెళ్లిపోయిందని కనకయ్య ఆవేదన వ్యక్తం చేశాడు. ఆమె కోసం గత ఐదు రోజులుగా గాలించానని, దీనికోసం తనకు రూ. 2 వేలు ఖర్చు అయిందని వాపోయాడు. ఎంతో కష్టపడి వెతికినా భార్య ఆచూకీ దొరకలేదని తెలిపాడు.

ప్రభుత్వం ఫ్రీ బస్సును రద్దు చేయాలి

ఇలా ఇళ్ల నుంచి మహిళలు ఇష్టానుసారంగా వెళ్లిపోవడానికి ఈ ఫ్రీ బస్సు ప్రయాణమే కారణమని, దయచేసి ప్రభుత్వం ఆ ఫ్రీ బస్సును తీసేయాలని ఎమ్మెల్యేను కోరాడు కనకయ్య. బాధితుడి మాటలు విన్న స్థానికులు, అధికారులు ఒక్కసారిగా ఆశ్చర్యానికి గురయ్యారు.

Also Read: తన కుమార్తె వివాహానికి తెలంగాణ డిప్యూటీ సీఎం భట్టి, మంత్రి సీతక్కకు షర్మిల ఆహ్వానాలు

ఎమ్మెల్యే స్పందన

కనకయ్య సమస్యను విన్న ఎమ్మెల్యే కవ్వంపల్లి సత్యనారాయణ, అక్కడి అధికారులు అతనికి సర్దిచెప్పే ప్రయత్నం చేశారు. భార్య కనిపించకపోతే అలా బాధపడటం కాదని, వెంటనే స్థానిక పోలీస్ స్టేషన్‌లో ఫిర్యాదు చేయాలని సూచించారు. పోలీస్‌లను ఆశ్రయిస్తే వారు తగిన సహాయం చేసి ఆచూకీ కనిపెడతారని ధైర్యం చెప్పారు. పోలీసుల సైతం బాధితుడికి ధైర్యం చెప్పారు.

Also Read: ఐదారు రోజులు చూసి పర్మిషన్ నిరాకరించడం కుట్రే! ఢిల్లీకి బస్సుల్లో తరలివస్తాం: మహేష్ గౌడ్

BRS Leaders Kannepalli Visit: కన్నెపల్లి మోటార్లు వెంటనే ఆన్ చేయాలి.. లేకపోతే సీఎం ఇంటిని ముట్టడిస్తాం- బీఆర్ఎస్ ఎమ్మెల్యేలు

Satyaprasad Bandaru — Sat, 24 Oct 2026 17:47:14 +0530

BRS Leaders Kannepalli Visit: కన్నెపల్లి పంప్ హౌస్‌ను గురువారం బీఆర్ఎస్ నేతల బృందం పరిశీలించింది. హైదరాబాద్ తాగునీటి సమస్యతో పాటు, రైతుల సాగునీటి కష్టాలను తీర్చేందుకు వెంటనే కన్నెపల్లి మోటార్లను ఆన్ చేసి నీటిని తోడాలని బీఆర్ఎస్ నాయకులు ప్రభుత్వాన్ని డిమాండ్ చేశారు. ఈ కార్యక్రమంలో కుత్బుల్లాపూర్ ఎమ్మెల్యే కేపీ వివేకానంద మాట్లాడుతూ కాంగ్రెస్ ప్రభుత్వం, సీఎం రేవంత్ రెడ్డి వైఖరిపై తీవ్ర స్థాయిలో మండిపడ్డారు. ప్రభుత్వం వచ్చి మూడు సంవత్సరాలు దాటుతున్నా ఇంకా కేసీఆర్, కేటీఆర్, హరీశ్ రావులపై దుమ్మెత్తి పోయడమే తప్ప, సమస్యల పరిష్కారానికి చర్యలు తీసుకోవడం లేదని విమర్శించారు.

పంప్ హౌస్ వద్ద చిన్నపాటి రిపేర్లు చేసేందుకు కూడా ప్రభుత్వం ముందుకు రావడం లేదని కేవీ వివేకానంద మండిపడ్డారు. స్థానికులు చెబుతున్న ప్రకారం నీళ్లన్నీ కళ్లముందే వృధాగా పోతున్నాయని ఆవేదన వ్యక్తం చేశారు. హైదరాబాద్‌లో మళ్లీ నీళ్ల ట్యాంకర్ల మాఫియా మొదలైందని, ప్రభుత్వం వెంటనే స్పందించి నీటి సమస్యను పరిష్కరించకపోతే నగర ప్రజలతో కలిసి ఖాళీ కుండలు, బిందెలతో సీఎం రేవంత్ రెడ్డి ఇంటి ముందు నిరసన తెలుపుతామని హెచ్చరించారు.

Also Read: బీఆర్ఎస్ ఎల్‌నీనో వ్యాఖ్యలపై కాంగ్రెస్ కౌంటర్.. KCR ఫాంహౌస్‌లో అద్భుత దీపం ఉందా? అంటూ విమర్శలు

హైదరాబాద్ కు తాగునీటి సమస్య

ఎల్బీ నగర్ ఎమ్మెల్యే సుధీర్ రెడ్డి మాట్లాడుతూ.. జూన్ నెల నుంచే హైదరాబాద్‌కు నీటి సరఫరా తగ్గిందని, దీనిపై వాటర్ వర్క్స్ ఎండీకి ఫిర్యాదు చేసినా ఫలితం లేకపోయిందన్నారు. కన్నెపల్లి వద్ద 17 మోటార్లు ఆన్ చేసి 2,600 క్యూసెక్కుల నీటిని పంప్ చేసే అవకాశం ఉన్నప్పటికీ ప్రభుత్వం ఆ పని చేయడం లేదని విమర్శించారు. కన్నెపల్లి నుంచి నీటిని లిఫ్ట్ చేసి ఉంటే హైదరాబాద్ తాగునీటి సమస్యతో పాటు శ్రీరాంసాగర్, నిజాంసాగర్ ఆయకట్టు కింద ఉన్న 20 లక్షల ఎకరాలకు సాగునీటి ఎద్దడి వచ్చేది కాదన్నారు.

అంతేకాకుండా, మేడిగడ్డ వద్ద గతంలో బాంబ్ బ్లాస్ట్ శబ్దం వచ్చిందని అధికారి ఫిర్యాదు చేసినా దానిపై ఇప్పటివరకు విచారణ జరపలేదని, కుట్రపూరితంగా బాంబులు పెట్టి మేడిగడ్డ పిల్లర్లను పగలగొట్టారనే అనుమానాలు వ్యక్తమవుతున్నాయని సుధీర్ రెడ్డి పేర్కొన్నారు.

Also Read: తెలంగాణలో కమలదళం బిగ్ ప్లాన్ - మోదీ, అమిత్ షా పర్యటనలతో అసంబ్లీ పోరుకు బీజేపీ సిద్ధం!

CM Revanth Reddy: దసరా వేడుకలకు సొంతూరుకు సీఎం రేవంత్‌రెడ్డి.. కొండారెడ్డిపల్లిలో ఘన స్వాగతం, ఆలయాల్లో పూజలు

Satyaprasad Bandaru — Tue, 20 Oct 2026 19:14:08 +0530

CM Revanth Reddy: దసరా పండుగ సందర్భంగా సీఎం రేవంత్‌రెడ్డి తన స్వగ్రామమైన నాగర్‌కర్నూల్‌ జిల్లా వంగూరు మండలంలోని కొండారెడ్డిపల్లికి వెళ్లారు. కుటుంబ సమేతంగా సొంతవూరుకు చేరుకున్న సీఎంకి స్థానిక ప్రజాప్రతినిధులు, ఉన్నతాధికారులు, గ్రామస్థులు ఘన స్వాగతం పలికారు.

ఆంజనేయస్వామి ఆలయంలో ప్రత్యేక పూజలు

కొండారెడ్డిపల్లికి చేరుకున్న అనంతరం సీఎం రేవంత్‌రెడ్డి గ్రామస్థులతో కలిసి ర్యాలీగా స్థానిక శ్రీ ఆంజనేయస్వామి ఆలయానికి చేరుకున్నారు. అక్కడ తన కుటుంబ సభ్యులతో కలిసి స్వామివారికి ప్రత్యేక పూజలు చేశారు. పూజా కార్యక్రమాల అనంతరం వేద పండితులు, ఆలయ అర్చకులు సీఎం దంపతులకు వేద ఆశీర్వచనం అందించారు.

గ్రామస్థులు, ప్రజాప్రతినిధులతో భేటీ

అనంతరం సీఎం రేవంత్‌రెడ్డి తమ గ్రామానికి చెందిన ప్రజలను, స్థానిక ప్రజాప్రతినిధులను, అధికారులను కలిసి దసరా శుభాకాంక్షలు తెలిపారు. ఈ కార్యక్రమంలో నాగర్‌కర్నూల్ ఎంపీ డాక్టర్ మల్లు రవి, ఉమ్మడి మహబూబ్‌నగర్ జిల్లాకు చెందిన ఎమ్మెల్యేలు, ఎమ్మెల్సీలు, ఇతర ముఖ్య నాయకులు పెద్ద సంఖ్యలో పాల్గొన్నారు.

Also Read: తొలిసారి ఎన్నికల బరిలోకి కవిత పార్టీ.. తొలి ఎమ్మెల్సీ అభ్యర్థి పేరు ప్రకటన

సాయంత్రం పూజా కార్యక్రమాలు

దసరా పండుగ సంప్రదాయంలో భాగంగా సాయంత్రం వేళ స్థానిక మైసమ్మ ఆలయాన్ని సందర్శించి ప్రత్యేక పూజలు చేయనున్నారు సీఎం రేవంత్ రెడ్డి. అనంతరం విజయదశమికి అత్యంత ప్రాధాన్యత ఉన్న జమ్మిచెట్టు పూజ కార్యక్రమంలో పాల్గొని, పండుగ వేడుకలను ముగించనున్నారు. తెలంగాణ సంస్కృతిలో విజయదశమి రోజు జమ్మిచెట్టుకు (శమీ పూజ) పూజలు చేసి, జమ్మి ఆకులను 'బంగారం'గా భావించి ఇంటికి తీసుకెళ్లడం ఆచారం. సీఎం రేవంత్ రెడ్డి ప్రతి ఏటా తన గ్రామంలోని పెద్దలతో కలిసి ఈ వేడుకల్లో పాల్గొంటారు.

తెలంగాణ ముఖ్యమంత్రిగా బాధ్యతలు చేపట్టిన తర్వాత పండుగల సమయాల్లో సొంతూరు రావడం రేవంత్‌రెడ్డి ఆనవాయితీగా పెట్టుకున్నారు. తన బాల్యం, రాజకీయ జీవితం ఈ ప్రాంతంతో ముడిపడి ఉందని సీఎం రేవంత్ రెడ్డి చెబుతుంటారు.

Also Read: పాలపిట్టలను బంధిస్తే కఠిన చర్యలు.. ఈ నెంబర్లకు కాల్ చేయండి: హైదరాబాద్ సీపీ సజ్జనార్

Singareni Bonus: సింగరేణి కార్మికులకు గుడ్ న్యూస్ .. ఒక్కొక్కరికి రూ.1. 51 లక్షల దసరా బోనస్: భట్టి విక్రమార్క

Shankar Dukanam — Tue, 13 Oct 2026 13:28:29 +0530

Singareni Bonus For Dasara : హైదరాబాద్: సింగరేణి ఉద్యోగులకు తెలంగాణ ఉప ముఖ్యమంత్రి భట్టి విక్రమార్క గుడ్‌న్యూస్ అందించారు. సంస్థ సాధించిన లాభాల్లో 34 శాతాన్ని సింగరేణి పర్మినెంట్ ఉద్యోగులకు చెల్లిస్తున్నట్లు ఆయన మంగళవారం ప్రకటించారు. ఒక్కో రెగ్యూలర్ కార్మికుడికి రూ.1.51 లక్షల దసరా బోనస్ లభిస్తుంది. సింగరేణిలో పనిచేస్తున్న కాంట్రాక్టు ఉద్యోగులకు కూడా రూ. 5,500 చొప్పున బోనస్ అందించనున్నట్లు తెలిపారు. ఈ బోనస్ నిర్ణయంతో వేలాది మంది కార్మిక కుటుంబాలకు పెద్ద ఎత్తున లబ్ధి చేకూరనుంది.

గత బీఆర్‌ఎస్ ప్రభుత్వంపై భట్టి విక్రమార్క విమర్శలు
సింగరేణి లాభాలు తగ్గడానికి గత బీఆర్‌ఎస్ (BRS) ప్రభుత్వ అనాలోచిత నిర్ణయాలే ప్రధాన కారణమని డిప్యూటీ సీఎం భట్టి విక్రమార్క ఆరోపించారు. బీఆర్‌ఎస్ చేసినంత నష్టం సింగరేణికి మరే ప్రభుత్వం చేయలేదని విమర్శించారు. గత ప్రభుత్వ హయాంలో కేంద్ర ప్రభుత్వం 141 బొగ్గు బ్లాకులను వేలం వేసినప్పటికీ, కనీసం ఒక్క వేలంలో కూడా సింగరేణి పాల్గొనకుండా నిర్లక్ష్యం చేశారని మండిపడ్డారు. ప్రస్తుతం ప్రైవేట్ మార్కెట్‌లో సింగరేణి కంటే తక్కువ ధరకే బొగ్గు అందుబాటులో ఉండటం వల్ల, సంస్థ మనుగడను కాపాడుకోవడానికి తప్పనిసరి పరిస్థితుల్లో బొగ్గు ధరలను తగ్గించాల్సి వచ్చిందని ఆయన వివరించారు.

‘నెహ్రూ కాలనీల’ పేరుతో కార్మికుల సొంతింటి కలను సాకారం చేసేందుకు క్వార్టర్ల నిర్మాణం, ఏరియా ఆసుపత్రులను కార్పొరేట్ స్థాయికి మించి మోడ్రన్‌గా అత్యుత్తమ వైద్య సదుపాయాల కల్పనకు కార్యాచరణ సిద్ధం చేస్తామన్నారు.

ప్రజాభవన్‌లో మంత్రి శ్రీధర్ బాబు కీలక ప్రకటనలు
హైదరాబాద్‌లోని ప్రజాభవన్‌లో నిర్వహించిన సమావేశంలో మంత్రి శ్రీధర్ బాబు మాట్లాడుతూ... సింగరేణి కార్మికుల సంక్షేమంపై పలు విషయాలను వెల్లడించారు. సింగరేణి కార్మికుల సొంత ఇంటి కల త్వరలోనే నెరవేరబోతోందని హామీ ఇచ్చారు. అలాగే మారుపేర్ల ద్వారా ఉద్యోగాలు చేస్తున్న కార్మికుల సమస్యల పట్ల తెలంగాణ ప్రభుత్వం ఎంతో సానుకూలంగా ఉందన్నారు. తమ ప్రభుత్వం అధికారంలోకి వచ్చిన వెంటనే ప్రమాద బీమా కింద దేశంలో ఎక్కడాలేని విధంగా సింగరేణి కార్మికులకు కోటి రూపాయల ఉచిత ప్రమాద బీమా సౌకర్యాన్ని అందుబాటులోకి తీసుకొచ్చామన్నారు.