Hyderabad Rains: హైదరాబాద్‌ సహా పలు జిల్లాల్లో వర్షాలు.. వచ్చే వారం నుంచి ఎండలతో దబిడి దిబిడే!

హైదరాబాద్‌ సహా పలు జిల్లాల్లో అకాల వర్షాలు కురుస్తున్నాయి. గత రెండు రోజుల నుంచి ఉమ్మడి ఆదిలాబాద్ జిల్లాలో పలు చోట్ల వర్షాలు కురిశాయి. ఫిబ్రవరి 28 నుంచి ఎండల తీవ్రత పెరుగుతుందని మెచ్చరించారు.

హైదరాబాద్‌లో పలుచోట్ల వర్షం

Source : twitter

హైదరాబాద్: నగరంలోని పలు ప్రాంతాల్లో వర్షం కురుస్తోంది. తెలంగాణలో బుధవారం మధ్యాహ్నం వాతావరణం అకస్మాత్తుగా మారింది. గాలిలో ఉన్న మిగిలిన తేమ కారణంగా కూకట్‌పల్లి, శేరిలింగంపల్లి, గచ్చిబౌలి పరిసర ప్రాంతాల్లో వర్షాలు కురుస్తున్నాయి. తేలికపాటి వర్షమేనని,  గరిష్టంగా 5-10 మి.మీ వర్షపాతం నమోదయ్యే అవకాశం ఉందని తెలంగాణ వెదర్ మ్యాన్ అంచనా వేశారు. 

రాబోయే రెండు గంటల్లో వికారాబాద్, మహబూబ్ నగర్ జిల్లాల్లో కూడా అక్కడక్కడ వర్షాలు కురిసే అవకాశం ఉంది. అయితే, ఈ ప్రాంతాలు మినహా తెలంగాణలోని మిగిలిన అన్ని జిల్లాల్లో వాతావరణం పొడిగా ఉంటుందని సమాచారం. ఇప్పటికే రాష్ట్రంలోకి పొడి గాలులు ప్రవేశించడంతో, ఈ వర్షాల తర్వాత వచ్చే వారం నుంచి ఎండల తీవ్రత పెరిగే అవకాశం ఉంది.

తెలంగాణలో గత రెండు రోజులుగా ఉమ్మడి ఆదిలాబాద్, కరీంనగర్, నిజామాబాద్ జిల్లాల్లో పలుచోట్ల అకాల వర్షాలు కురిశాయి. రాష్ట్రంలోకి పొడి గాలులు ప్రవేశించడంతో వాతావరణం ఒక్కసారిగా మారుతోంది. ఫిబ్రవరి 26 నుండి ఉష్ణోగ్రతలు క్రమంగా పెరుగుతాయని, ముఖ్యంగా ఫిబ్రవరి 28 తర్వాత ఎండలు మరింత తీవ్రరూపం దాల్చుతాయని వాతావరణ నిపుణులు అంచనా వేశారు. 

Reminant moisture is causing some ISOLATED RAINS in North West HYD towards Kukatpally, Serlingampally, Gachibowli side, this will be short spell for 10-15min only, max 5-10mm spells

ISOLATED RAINS ahead in Vikarabad, Mahabubnagar next 2hrs

Other parts of Telangana - Dry

— Telangana Weatherman (@balaji25_t) February 25, 2026

మార్చి మొదటి వారంలో హీట్ వేవ్..

మార్చి 2 నుండి 7వ తేదీ వరకు రాష్ట్రంలో హీట్ వేవ్ (వడగాల్పులు) వీచే అవకాశం ఉందని హెచ్చరికలు జారీ అయ్యాయి. ముఖ్యంగా తూర్పు,  ఉత్తర తెలంగాణ జిల్లాల్లో ఎండలు నిప్పులు చెరిగే అవకాశం ఉంది. కొన్ని ప్రాంతాలలో ఉష్ణోగ్రతలు ఏకంగా 40°C మార్కును తాకే ప్రమాదం ఉంది. ఇక హైదరాబాద్ విషయానికి వస్తే, నగర ఉష్ణోగ్రతలు 37°C దాటే అవకాశం ఉంది. ఎండల తీవ్రత ఒక్కసారిగా పెరగనుండటంతో వచ్చే వారం నుండి కూలర్లు, ఏసీల వినియోగం పెరుగుతుందని మార్కెట్ నిపుణులు అంచనా వేశారు. వచ్చే వారం నుంచి తెలంగాణ ప్రజలు అప్రమత్తంగా ఉండాలని, ఎండల నుంచి తగిన జాగ్రత్తలు తీసుకోవాలని తెలంగాణ వెదర్ మ్యాన్ సూచించారు.