NEET PG Exam 2026: మద్యం మత్తులో నీట్ ఎగ్జామ్ రాసేందుకు వెళ్లిన విద్యార్థి.. వెనక్కి పంపిన సిబ్బంది

నీట్ పీజీ 2026 పరీక్ష ప్రారంభం కాగా, రంగారెడ్డి జిల్లా శేరిగూడ కేంద్రంలో మద్యం తాగి వచ్చిన విద్యార్థిని ఎగ్జామ్ సెంటర్ లోపలికి అనుమతించలేదు. ఈ పరీక్ష కారణంగా నగరంలో పలుచోట్ల ట్రాఫిక్ సమస్య తలెత్తింది.

మద్యం మత్తులో నీట్ ఎగ్జామ్ రాసేందుకు వెళ్లిన విద్యార్థి.. వెనక్కి పంపిన సిబ్బంది

Source : PTI

Show Quick Read

Key points generated by AI, verified by newsroom

• దేశవ్యాప్తంగా నీట్ పీజీ పరీక్షలు ప్రారంభం; తాగివచ్చిన అభ్యర్థికి నిరాకరణ.
• పరీక్ష పారదర్శకత, భద్రతకు అధిక ప్రాధాన్యతనిచ్చినట్లు నడ్డా వెల్లడి.
• సీసీటీవీ, బయోమెట్రిక్, జామర్లతో పటిష్ట భద్రతా చర్యలు అమలుచేసారు.
• అభ్యర్థుల సౌలభ్యం కోసం పరీక్ష సమయం పెంచారు; ఆధార్ తప్పనిసరి.

హైదరాబాద్: దేశవ్యాప్తంగా ప్రతిష్టాత్మక నీట్ పీజీ 2026 ఎంట్రన్స్ టెస్ట్ ఆదివారం ఉదయం ప్రశాంతంగా ప్రారంభమైంది. అయితే, రంగారెడ్డి జిల్లా శేరిగూడలోని ఒక పరీక్షా కేంద్రం వద్ద ఓ విచిత్ర సంఘటన చోటుచేసుకుంది. ఒక అభ్యర్థి మద్యం సేవించి నీట్ పీజీ పరీక్ష రాసేందుకు ఎగ్జామ్ సెంటర్‌కు వచ్చాడు. అతని ప్రవర్తన గమనించిన పరీక్షా కేంద్ర సిబ్బంది, మద్యం మత్తులో ఉన్నట్లు గుర్తించి ఆ విద్యార్థిని లోపలికి అనుమతించకుండా వెనక్కి పంపించివేశారు.

ఈ ఏడాది నీట్ పీజీ పరీక్షను దేశవ్యాప్తంగా మొత్తం 1,300 కేంద్రాల్లో నిర్వహిస్తున్నారు. ఇందులో భాగంగా తెలంగాణ రాష్ట్రవ్యాప్తంగా 56  కేంద్రాలను ఏర్పాటు చేసి ఎగ్జామ్ నిర్వహిస్తున్నారు. ఉదయం 9 గంటల నుంచి మధ్యాహ్నం 12:30 గంటల వరకు కంప్యూటర్ బేస్డ్ టెస్ట్ (CBT) పద్ధతిలో ఈ పరీక్ష జరుగుతుంది. ఇక పరీక్షా సమయానికి అభ్యర్థులు సకాలంలో చేరుకోవడానికి ప్రయత్నించడంతో పలు ప్రధాన మార్గాల్లో తీవ్ర ట్రాఫిక్ జామ్ ఏర్పడి వాహనదారులు, విద్యార్థులు కొంత అసౌకర్యానికి గురయ్యారు.

నీట్ పీజీ ఎగ్జామ్.. అక్రమాలకు తావులేకుండా పటిష్ట భద్రత, సంస్కరణలు

పరీక్షల నిర్వహణలో పారదర్శకత, భద్రతకు అత్యధిక ప్రాధాన్యత ఇస్తున్నట్లు కేంద్ర మంత్రి జేపీ నడ్డా స్పష్టం చేశారు. ఎన్‌బీఈఎంఎస్, టెక్నాలజీ భాగస్వాముల సంసిద్ధతను సమీక్షించిన ఆయన, ఎలాంటి అవాంఛనీయ ఘటనలు జరగకుండా చూడాలని అధికారులను ఆదేశించారు. సోషల్ మీడియాలో వచ్చే పేపర్ లీక్ వదంతులను నమ్మవద్దని, పరీక్షకు కొద్ది సమయం ముందు మాత్రమే అత్యంత సురక్షితమైన, ఎన్‌క్రిప్టెడ్ విధానంలో ఫైనల్ ఎగ్జామ్ పేపర్ ఎంపిక చేస్తామని తెలిపారు. కేవలం అధికారిక ప్రకటనలనే విశ్వసించాలని అభ్యర్థులకు విజ్ఞప్తి చేశారు.

ఈసారి పరీక్షల సమగ్రతను కాపాడేందుకు పటిష్ఠమైన భద్రతా ఫ్రేమ్‌వర్క్‌ను అధికారులు అమలు చేస్తున్నారు. దేశవ్యాప్తంగా సీసీటీవీ నిఘా, బయోమెట్రిక్ వెరిఫికేషన్, సిగ్నల్ జ్యామర్లు, డైనమిక్ కంప్యూటర్ కేటాయింపు వంటి చర్యలు చేపట్టారు. పరీక్షల ప్రత్యక్ష పర్యవేక్షణకు సెంట్రల్, రీజనల్ కమాండ్ సెంటర్లను ఏర్పాటు చేసి, 60,000 మందికి పైగా సిబ్బందిని నియమించారు. వేలిముద్రలు సరిపోలని పక్షంలో ఐరిస్ ఆధారిత బయోమెట్రిక్ వెరిఫికేషన్‌ను ప్రత్యామ్నాయంగా తీసుకుంటూ విద్యార్థులకు ఇబ్బంది కలగకుండా చర్యలు చేపట్టారు.

టైమ్ పెంచి నీట్ పీజీ నిర్వహణ

విద్యార్థుల సౌలభ్యం కోసం సొంత రాష్ట్రంతో పాటు మరో రెండు రాష్ట్రాలను పరీక్షా కేంద్రాలుగా ఎంచుకునే వెసులుబాటు కల్పించారు. పరీక్ష జరిగే నగరం వివరాలను 3 వారాల ముందే తెలియజేయడంతో ప్రయాణ ఏర్పాట్లకు తగినంత సమయం లభించింది. పరీక్షా విధానంలో మార్పులు చేసి 210 నిమిషాల్లో 180 ప్రశ్నలకు సమాధానమిచ్చేలా సమయాన్ని పెంచారు. రిజిస్ట్రేషన్, పరీక్ష నిర్వహణలో ఆధార్ ఆధారిత గుర్తింపును నిర్వాహకులు తప్పనిసరి చేశారు.

మరిన్ని చదవండి

నీట్ పీజీ ఎగ్జామ్, మారథాన్ నిర్వహణ.. నేడు హైదరాబాద్‌లో ట్రాఫిక్ ఆంక్షలు

కొన్ని గంటల్లో నీట్ పీజీ ఎగ్జామ్.. హైదరాబాద్‌లో మెడికల్ స్టూడెంట్ ఆత్మహత్య