Road in Hyderabad named after Donald Trump | హైదరాబాద్: తెలంగాణలో జరుగుతున్న గ్లోబల్ సమ్మిట్ సందర్భంగా సీఎం ఏ. రేవంత్ రెడ్డి హైదరాబాద్కు మరింత అంతర్జాతీయ గుర్తింపు తెచ్చేలా వినూత్న ప్రతిపాదనతో ముందుకొచ్చారు. ప్రపంచంలో ప్రముఖ వ్యక్తులు, అంతర్జాతీయ కంపెనీల పేర్లను హైదరాబాద్లోని ప్రధాన రహదారులకు పెట్టాలని రేవంత్ రెడ్డి నిర్ణయించారు.
ఈ నిర్ణయాలలో భాగంగా, నెహ్రూ ఔటర్ రింగ్ రోడ్ (ORR) వద్ద రావిర్యాల నుంచి ప్రారంభమై, ప్రతిపాదిత ఫ్యూచర్ సిటీని కలుపుతూ వెళ్లే 100 మీటర్ల గ్రీన్ఫీల్డ్ రేడియల్ రోడ్డుకు ప్రముఖ వ్యాపారవేత్త, పద్మభూషణ్ గ్రహీత రతన్ టాటా పేరు పెట్టాలని తెలంగాణ ప్రభుత్వం నిర్ణయించింది. ఇదివరకే రావిర్యాల ఇంటర్చేంజ్కు ఇప్పటికే "టాటా ఇంటర్చేంజ్" అని నామకరణం చేయడం తెలిసిందే.
డొనాల్డ్ ట్రంప్ అవెన్యూగా యూఎస్ కాన్సులేట్ రోడ్డుహైదరాబాద్కు ప్రపంచవ్యాప్తంగా గుర్తింపు తీసుకురావడానికి సీఎం రేవంత్ రెడ్డి మరో కీలక ప్రతిపాదనను సిద్ధం చేశారు. ప్రపంచంలోనే తొలిసారిగా, హైదరాబాద్లోని అమెరికా కాన్సులేట్ జనరల్ కార్యాలయం ముందు నుంచి వెళ్లే ప్రధాన రహదారికి అమెరికా మాజీ అధ్యక్షుడు డొనాల్డ్ ట్రంప్ పేరుతో “డొనాల్డ్ ట్రంప్ అవెన్యూ” అని నామకరణం చేయాలని ప్రభుత్వం ప్రతిపాదించింది. ఈ ప్రతిపాదనపై కేంద్ర విదేశాంగ మంత్రిత్వ శాఖకు, అలాగే అమెరికా రాయబార కార్యాలయానికి తెలంగాణ ప్రభుత్వం త్వరలో లేఖ రాయనుంది.
మరిన్ని అంతర్జాతీయ కంపెనీల పేర్లుఇటీవల ఢిల్లీలో జరిగిన యూఎస్-ఇండియా స్ట్రాటజిక్ పార్టనర్షిప్ ఫోరమ్ (USISPF) వార్షిక సదస్సులో సీఎం రేవంత్ రెడ్డి చేసిన ప్రకటనకు అనుగుణంగా, హైదరాబాద్లోని మరికొన్ని ముఖ్య రహదారులకు అంతర్జాతీయ దిగ్గజ కంపెనీల పేర్లు పెట్టాలని యోచిస్తున్నారు. ఈ జాబితాలో గ్లోబల్ టెక్ దిగ్గజం గూగుల్ సేవలను గుర్తిస్తూ ఒక ముఖ్య రహదారిని “గూగుల్ స్ట్రీట్” అని ప్రకటించేందుకు ప్రణాళికలు రూపొందించారు. అంతేకాక, మైక్రోసాఫ్ట్ రోడ్ మరియు విప్రో జంక్షన్ వంటి పేర్లను కూడా పరిశీలిస్తున్నట్లు సమాచారం.
ప్రపంచవ్యాప్తంగా ప్రభావం చూపిన ప్రముఖ వ్యక్తులు, ప్రముఖ కంపెనీల పేర్లను రహదారులకు పెట్టడం ద్వారా వారికి తగిన గౌరవం ఇవ్వడంతో పాటు, హైదరాబాద్కు అంతర్జాతీయ గుర్తింపు లభిస్తుందని తెలంగాణ ప్రభుత్వం భావిస్తోంది. అలాగే, ఆ రోడ్లపై ప్రయాణించే వారికి ఇది స్ఫూర్తిమంతంగా ఉంటుందనే ఉద్దేశ్యంతో ఈ వినూత్న ప్రతిపాదనను ముఖ్యమంత్రి తీసుకొచ్చారు. రోడ్లకు అంతర్జాతీయ దిగ్గజాల పేర్లు పెట్టడం ద్వారా హైదరాబాద్ను గ్లోబల్ బిజినెస్ హబ్గా మరింత బలోపేతం చేయాలనేది ప్రభుత్వ లక్ష్యంగా కనిపిస్తోంది.