Leopard In Medak: అకోలా- హైదరాబాద్ 161 నేషనల్ హైవే పక్కన చిరుత సంచారం.. జాగ్రత్తగా ఉండండి
ఇటీవల యాదాద్రి భువనగిరి జిల్లాలో పెద్దపులి సంచారం స్థానికులకు భయభ్రాంతులకు గురిచేయగా, తాజాగా మెదక్ జిల్లా అల్లాదుర్గం మండలం వాసులను ఓ చిరుత హడలెత్తిస్తోంది.
అల్లాదుర్గం: మెదక్ జిల్లా అల్లాదుర్గం మండలంలో చిరుతపులి సంచారం స్థానిక ప్రజలను భయాందోళనలకు గురిచేస్తోంది. అకోలా- హైదరాబాద్ 161వ జాతీయ రహదారి పక్కన, అల్లాదుర్గం ఐబీ చౌరస్తా సమీపంలోని సర్వీసు రోడ్డుపై చిరుత తిరుగుతుండటాన్ని పలువురు వాహనదారులు, స్థానికులు గమనించారు. ఈ సమాచారం అందిన వెంటనే పోలీసులు, రెవెన్యూ యంత్రాంగం అప్రమత్తమైంది.
చిరుత సంచారంపై సమాచారం అందుకున్న ఎమ్మార్వో మల్లయ్య, ఎస్ఐ శంకర్, ఇతర అధికారులు వెంటనే అటవీ శాఖకు సమాచారం అందించారు. అటవీ శాఖ అధికారులు రంగంలోకి దిగి పరిస్థితిని సమీక్షించారు. ముఖ్యంగా జాతీయ రహదారికి సమీపంలో ఉన్న గొల్లకుంట తండా, గాండ్లబాయి తండా, మాందాపూర్, చిల్వేర్ గ్రామాల ప్రజలు అప్రమత్తంగా ఉండాలని, ఒంటరిగా అటవీ ప్రాంతాల్లోకి వెళ్లవద్దని అధికారులు హెచ్చరికలు జారీ చేశారు. చిరుత జాడ కోసం ట్రాప్ కెమెరాలు ఏర్పాటు చేశారు.
హైదరాబాద్ సమీపంలో 50 ఏళ్ల తర్వాత తొలిసారి..
ఇటీవల హైదరాబాద్ సమీపంలో పులి కనిపించింది. నగరానికి కేవలం 60 కిలోమీటర్ల దూరంలో ఉన్న యాదాద్రి భువనగిరి జిల్లా దత్తాయిపల్లి అటవీ ప్రాంతంలో పెద్దపులి ఆనవాళ్లు లభ్యమయ్యాయి. యాదాద్రి పుణ్యక్షేత్రానికి కేవలం 5 కిలోమీటర్ల దూరంలోనే పులి అడుగుజాడలను అధికారులు గుర్తించారు. సుమారు అర్ధ శతాబ్దం తర్వాత హైదరాబాద్కు ఇంత సమీపంలో పులి జాడ కనిపించడం ఇదే తొలిసారి అని అటవీ శాఖ పేర్కొంది. ఈ పులి మహారాష్ట్రలోని తాడోబా రిజర్వ్ నుండి దారి తప్పి.. ఆసిఫాబాద్, సిద్దిపేట జిల్లాల మీదుగా ఇక్కడికి చేరుకున్నట్లు అధికారులు భావిస్తున్నారు. ఆ సయమంలో దత్తాయిపల్లి, గందమల్ల, కోనాపూర్ గ్రామస్థులను అధికారులు అప్రమత్తం చేశారు.
భద్రాద్రి జిల్లాలో పులి దాడి.. ఆవులు మృతి
ఇటీవల భద్రాద్రి కొత్తగూడెం జిల్లా అశ్వారావుపేట మండలంలోనూ పులి కలకలం రేపింది. కావడిగుండ్ల అటవీ ప్రాంతంలో పులి సంచరిస్తూ పశువులపై దాడులకు పాల్పడింది. సోడెం నాగేశ్వరరావు అనే రైతుకు చెందిన రెండు ఆవులను పులి చంపేయడంతో స్థానికులు భయాందోళన చెందుతున్నారు. ఈ పులి ఆంధ్రప్రదేశ్లోని పాపికొండల నేషనల్ పార్క్ నుండి తెలంగాణ సరిహద్దుల్లోకి ప్రవేశించినట్లు అటవీ అధికారులు గుర్తించారు. పులిని పట్టుకోవడానికి ట్రాప్ కెమెరా, బోన్లు ఏర్పాట్లు చేశారు. తరువాత పులి జాడ దొరకలేదు.
టాప్ హెడ్ లైన్స్
ట్రెండింగ్ వార్తలు
