Hyderabad CURE Housing Scheme: హైదరాబాద్ పేదలకు బిగ్ ఆఫర్ - CURE పరిధిలో పేదలకు లక్షణ ఇళ్లు - ఇవిగో అర్హతలు

Revanth Reddy Indiramma Houses: హైదరాబాద్ CURE పరిధిలోని 26 నియోజకవర్గాల్లో లక్ష ఇళ్ల నిర్మాణానికి ప్రభుత్వం ప్రణాళిక సిద్ధం చేసింది. తొలిదశలో 10 అంతస్తుల టవర్లు నిర్మించనున్నారు.

హైదరాబాద్ పేదలకు బిగ్ ఆఫర్ - CURE పరిధిలో లక్ష ఇళ్ల నిర్మాణం.. అర్హతలు ఇవే!

Source : x

Telangana 10 Storey Towers Poor Housing: హైదరాబాద్ మహానగరంలో సొంతింటి కల కంటున్న అల్పాదాయ వర్గాలకు తెలంగాణ ప్రభుత్వం తీపి కబురు అందించింది. ఔటర్ రింగ్ రోడ్, రీజినల్ రింగ్ రోడ్  మధ్య ఉన్న కోర్ అర్బన్ రీజియన్ లోని 26 శాసనసభ నియోజకవర్గాల పరిధిలో పేదల కోసం ఏకంగా ఒక లక్ష నూతన గృహాల నిర్మాణానికి రాష్ట్ర ప్రభుత్వం శ్రీకారం చుట్టింది. పెరుగుతున్న పట్టణీకరణ, పేదల ఆవాస అవసరాలను దృష్టిలో ఉంచుకుని అత్యంత ప్రతిష్టాత్మకంగా ప్రారంభించిన ఈ సమగ్ర గృహ నిర్మాణ బృహత్ ప్రణాళిక శంకుస్థాపనకు జూలై 20న అడుగులు పడ్డాయి.

మొదటి విడతలో ప్రతి నియోజకవర్గానికి 500 ఇళ్లు 

ఈ మెగా ప్రాజెక్టును దశలవారీగా వేగవంతంగా పూర్తి చేసేందుకు ప్రభుత్వం ప్రణాళిక సిద్ధం చేసింది. ఇందులో భాగంగా మొదటి విడత కింద ప్రతి నియోజకవర్గానికి 500 ఇళ్ల చొప్పున నిర్మాణ పనులను ప్రారంభించనున్నారు. భూముల కొరతను అధిగమించడంతో పాటు అత్యాధునిక మౌలిక వసతులు కల్పించేందుకు గాను, సాంప్రదాయ ఇళ్లకు భిన్నంగా వర్టికల్ గ్రోత్ మోడల్‌లో 10 అంతస్తుల   మోడర్న్ రెసిడెన్షియల్ టవర్లను నిర్మించనున్నారు. ప్రణాళికాబద్ధంగా రూపొందించిన ఈ కమ్యూనిటీల్లో విశాలమైన రోడ్లు, తాగునీరు, డ్రైనేజీ, లిఫ్ట్ సదుపాయాలతో పాటు విద్యుత్ సేవలు అందుబాటులో ఉండేలా చర్యలు తీసుకుంటున్నారు.

ఏడాదికి రూ.6 లక్షల కన్నా తక్కువ సంపాదించే అందరూ అర్హులే

ఈ పథకానికి సంబంధించి లబ్ధిదారుల ఎంపిక ప్రక్రియలో ప్రభుత్వం పారదర్శకమైన, కఠినమైన నిబంధనలను ఖరారు చేసింది. వార్షికాదాయం రూ. 6 లక్షల లోపు ఉన్న కుటుంబాలు మాత్రమే ఈ గృహాల కేటాయింపునకు అర్హులు . దీంతో పాటు తెలంగాణ పరిధిలో ఇప్పటివరకు ఏ ప్రాంతంలోనూ సొంతంగా పక్కా ఇల్లు లేదా ప్లాట్ లేని నిరుపేద కుటుంబాలకు మాత్రమే ప్రాధాన్యత ఇస్తారు. దరఖాస్తుదారుల వివరాలను క్షేత్రస్థాయిలో డిజిటల్ సర్వేల ద్వారా సమగ్రంగా పరిశీలించిన తర్వాతే తుది జాబితాను ఖరారు చేయనున్నారు. 

క్యూర్ ప‌రిధిలో కొత్త ఇందిర‌మ్మ ఇళ్ల నుంచే వ‌చ్చే ఏడాది బోనాలు ఎత్తిస్తాం

తొలివిడ‌త‌లో 16 నియోజ‌క‌వ‌ర్గాల్లో 8వేల ఇళ్లు

జూలై 21 నుంచి ఆగ‌స్టు 10 వ‌ర‌కు ద‌ర‌ఖాస్తుల స్వీక‌ర‌ణ‌

త్వ‌ర‌లో మ‌రో 8 నియోజ‌క‌వ‌ర్గాల్లో స్ధ‌లాల గుర్తింపు

ఎస్సీ, ఎస్టీ, బీసీల‌కు ఇళ్ల మంజూరులో రిజ‌ర్వేష… pic.twitter.com/MuOxAZzyZH

— IPRDepartment (@IPRTelangana) July 20, 2026

ఇప్పటికే స్థల పరిశీలనలు పూర్తి 

పట్టణాల్లో గుడిసెలు, అద్దె ఇళ్లలో నివసిస్తున్న కార్మికులు, దిగువ మధ్యతరగతి కుటుంబాలకు శాశ్వత నివాస యోగ్యమైన ఇళ్లను అందించడమే లక్ష్యంగా గృహ నిర్మాణ శాఖ రంగంలోకి దిగింది. నియోజకవర్గానికి తొలిదశలో కేటాయించిన 500 ఇళ్లకు సంబంధించిన స్థల సేకరణ, ల్యాండ్ బ్యాంక్ ఐడెంటిఫికేషన్ ప్రక్రియలను కూడా అధికారులు ఇప్పటికే పూర్తి చేశారు. హెచ్‌ఎండీఏ , హౌసింగ్ బోర్డు , స్థానిక పురపాలక వర్గాలు సమన్వయంతో పనులను పర్యవేక్షిస్తున్నాయి.

గతంలో ఇళ్ల కేటాయింపుల్లో ఎదురైన ఆలస్యాలకు తావులేకుండా నిరంతర పర్యవేక్షణతో నిర్ణీత గడువులోగా టవర్ల నిర్మాణాన్ని పూర్తి చేసి, లబ్ధిదారులకు తాళాలు అందించాలని ముఖ్యమంత్రి రేవంత్ రెడ్డి అధికారులను ఆదేశించారు. ఆర్‌ఆర్‌ఆర్‌ నిర్మాణంతో రాబోయే రోజుల్లో CURE ప్రాంతం ఆర్థికంగా వేగంగా అభివృద్ధి చెందుతుందని, అక్కడ పేదలకు పక్కా ఇల్లు కల్పించడం వల్ల వారి జీవన ప్రమాణాలు గణనీయంగా పెరుగుతాయని  ప్రభుత్వం భావిస్తోంది. 

మరిన్ని చదవండి

పోలీస్ అకాడమీలో ట్రైనీ మహిళా ఐపీఎస్‌‌కు లైంగిక వేధింపులు.. గదిలో బంధించి, కత్తితో బెదిరించి దారుణం

డీలిమిటేషన్ పజిల్ - యూనిఫాం 50% ఫార్ములా కు దక్షిణాది సై.. నియోజకవర్గాల పునర్విభజనపై మారిన పొలిటికల్ మైండ్‌సెట్!