hyderabad

KTR: సబిత, సునీతా లక్ష్మారెడ్డిపై దాడి, కేసీఆర్ చావు కోరుకుంటున్నారు: ప్రభుత్వంపై గవర్నర్‌కు బీఆర్ఎస్ ఫిర్యాదు

Shankar Dukanam — Wed, 9 Sep 2026 14:42:07 +0530

హైదరాబాద్: శాసనసభ సమావేశాల మొదటి రోజున బీఆర్ఎస్ ప్రజాప్రతినిధులైన తమపై ప్రభుత్వం, పోలీసుల ద్వారా చేయించిన దాష్టీకాన్ని గవర్నర్‌కు వివరించామని పార్టీ వర్కింగ్ ప్రెసిడెంట్ కేటీఆర్ చెప్పారు. రాహుల్ గాంధీ పార్లమెంటులో నిరసన తెలిపిన తరహాలోనే, తాము కూడా టీ-షర్ట్స్ ద్వారా నిరసన తెలపాలని భావించామని తెలిపారు. చివరకు కేసీఆర్ చావును కోరుకునే స్థాయికి కాంగ్రెస్ పాలన దిగజారినట్లు తెలిపారు. తెలంగాణ గవర్నర్‌ను కలిసిన అనంతరం కేటీఆర్ మీడియాతో మాట్లాడారు. తమకు సమయం ఇచ్చినందుకు గవర్నర్‌కు ముందుగా ధన్యవాదాలు తెలిపిన కేటీఆర్, ఆయన ఇటీవల అనారోగ్యానికి గురైన నేపథ్యంలో ఆరోగ్యం గురించి వాకబు చేశామన్నారు. పార్టీ అధినేత కేసీఆర్ ఆదేశాల మేరకే ఈరోజు గవర్నర్‌ను కలిసినట్లు వెల్లడించారు. 1000 హామీలతో అధికారంలోకి వచ్చిన కాంగ్రెస్ పార్టీ, గత 1000 రోజుల పాలనలో అన్ని హామీల అమలులోనూ, పరిపాలనలోనూ పూర్తిగా విఫలమైందని తెలిపారు.

తమ హక్కులను కాలరాస్తూ శాసనసభ్యులను సభలోకి రానివ్వకుండా రోడ్డుపైనే అడ్డుకున్న తీరును వివరించారు. తమపై జరిగిన దాడిని, ముఖ్యంగా మహిళా ప్రజాప్రతినిధులపై జరిగిన అరాచకాన్ని ఫోటోలు, సాక్ష్యాలతో సహా గవర్నర్ ముందుంచామన్నారు. బీఆర్‌ఎస్ మహిళా నాయకురాలు సునీతా లక్ష్మారెడ్డి చీరను లాగి దుశ్శాసన పర్వానికి తెరలేపిన తీరును తెలియజేశామన్నారు. ప్రతిపక్షంపై దాడులు చేసి, తిరిగి తమపైనే బద్నాం చేసేందుకు కాంగ్రెస్ కుట్రలు పన్నుతోందని, పోలీసుల దాష్టీకంపై ఫిర్యాదు చేసినా ఎలాంటి చర్యలూ తీసుకోలేదని ఆరోపించారు. ఈ పాలనలో ప్రజలు అనుభవిస్తున్న బాధలు, రైతన్నలు ఎదుర్కొంటున్న కష్టాలు, అలాగే నిరుద్యోగ విద్యార్థులను, యువతను రాహుల్ గాంధీ ఏ విధంగా మోసం చేశారో విజ్ఞప్తి ద్వారా గవర్నర్‌కు వివరించారు. పాలిటెక్నిక్ విద్యార్థులు చేస్తున్న ఆందోళనలు, వారి డిమాండ్లను కూడా ఆయన దృష్టికి తీసుకెళ్లినట్లు పేర్కొన్నారు.

కేసీఆర్ ఇంటిపై దాడికి వెళ్లారు

చివరకు కేసీఆర్ చావును కోరుకునే స్థాయికి కాంగ్రెస్ దిగజారిందని, ఎర్రవెల్లిలోని ఆయన ఇంటిపైకి కాంగ్రెస్ ఎమ్మెల్యేలు గుండాల మాదిరిగా దాడికి వెళ్లారని గవర్నర్‌కు విచారకరంగా వివరించారు. హైకోర్టు ఉత్తర్వులు ఇచ్చినప్పటికీ తమను శాసనసభ, శాసనమండలిలోకి రాకుండా ప్రభుత్వం అడ్డుకుందన్నారు. ఈ ప్రభుత్వానికి రాజ్యాంగం, న్యాయస్థానాలపై ఎలాంటి గౌరవం లేదని స్పష్టం చేశారు. సభలో లేని విషయాలను, మండలి సభ్యులు అనని మాటలను ఆపాదిస్తూ, దళిత స్పీకర్ పేరిట కాంగ్రెస్ నీచ రాజకీయాలు చేస్తోందని మండిపడ్డారు. తమకు స్పీకర్ గారిపై అపారమైన గౌరవం ఉందని, కానీ కాంగ్రెస్ పార్టీయే ఆయనను దళిత స్పీకర్ అంటూ పదేపదే ప్రస్తావిస్తూ అవమానిస్తోందని విమర్శించారు. అందుకే ప్రస్తుత శాసనసభ కౌరవ సభగా, దుశ్శాసన సభగా మారిపోయిందని ధ్వజమెత్తారు.

కేసీఆర్ నివాసం వద్ద చావు డప్పు కొడుతూ, ఆయన హత్యాయత్నానికి ప్రభుత్వం ప్రయత్నించిందని, స్వయంగా సీఎం రేవంత్ రెడ్డి ఈ మొత్తం వ్యవహారం వెనుక ఉన్నారని కేటీఆర్ ఆరోపించారు. తెలంగాణ ప్రజల తరఫున న్యాయం అడిగినందుకే తమపై ఈ రీతిలో కక్షసాధింపు దాడులు చేస్తున్నారని వివరించారు. తాము అందించిన ఆధారాలు, వినతులపై స్పందించిన గవర్నర్, శాసనసభ వ్యవహారాలు, బయట జరిగిన ప్రతి సంఘటనపై నిష్పాక్షిక విచారణ జరిపిస్తామని హామీ ఇచ్చారని, ప్రస్తుతం జరుగుతున్న దౌర్జన్యకాండలో ఆయన జోక్యం చేసుకుంటారని భావిస్తున్నామని కేటీఆర్ తెలిపారు. ప్రభుత్వం విడుదల చేసిన ఏఐ (AI) ఫోటోలు, వీడియోలపై ఇప్పటికే ఫిర్యాదు చేశామని, తప్పుడు చిత్రాలు, ఫిర్యాదులు ఉపయోగించే వారిపై చట్టపరంగా ముందుకెళ్తామని స్పష్టం చేశారు. ఒకవేళ రాష్ట్రంలో న్యాయం జరగకపోతే జాతీయ స్థాయిలోని జాతీయ మహిళా కమిషన్‌ను ఆశ్రయించి ఫిర్యాదు చేస్తామని కేటీఆర్ స్పష్టం చేశారు.

చలో గవర్నర్ సెల్ఫ్ డ్రైవ్ లో KTR

ABP Desam — Wed, 9 Sep 2026 13:36:29 +0530

తెలంగాణ రాజకీయాల్లో మరోసారి ఉద్రిక్త వాతావరణం నెలకొంది. స్వయంగా తానే కార్ డ్రైవింగ్ చేసుకుంటూ కేటీఆర్ చేపట్టిన "చలో గవర్నర్" కార్యక్రమం రాష్ట్ర రాజకీయాల్లో హాట్ టాపిక్‌గా మారింది.

BRS MLAs: మగ పోలీసులు మాపై ఇష్టం వచ్చినట్లు ప్రవర్తించారు.. ప్రభుత్వానికి బాధ్యత లేదా? బీఆర్ఎస్ మహిళా ఎమ్మెల్యేలు

Shankar Dukanam — Wed, 9 Sep 2026 12:20:34 +0530

Telangana Assembly Sessions | హైదరాబాద్: అసెంబ్లీ ప్రాంగణంలో సోమవారం నాడు తమకు జరిగిన తీవ్ర అవమానం, పోలీసుల దురుసు ప్రవర్తనపై ప్రభుత్వం కనీసం స్పందించకపోవడం దారుణమని బీఆర్ఎస్ మహిళా ఎమ్మెల్యేలు ఆవేదన వ్యక్తం చేశారు. తెలంగాణ శాసనసభ లాబీలో మాజీ మంత్రులు సబితా ఇంద్రారెడ్డి, సునీతా లక్ష్మారెడ్డి, ఎమ్మెల్యే కోవా లక్ష్మి మీడియాతో చిట్‌చాట్‌లో మాట్లాడుతూ.. మహిళపై ప్రభుత్వం అహంకారపూరితంగా ప్రవర్తిస్తుందని, తమకు న్యాయం చేయడం లేదన్నారు. తమపై ప్రత్యక్షంగా దాడి జరిగి దెబ్బలు తగిలినా, సభలో పాలకపక్ష సభ్యులు ఆ విషయాన్ని వదిలేసి ఇతర అంశాలపైనే మాట్లాడుతున్నారని విమర్శించారు. ఈ ఘటనపై బీఆర్‌ఎస్ అధినేత కేసీఆర్ తక్షణమే స్పందించి విచారం వ్యక్తం చేశారని, కానీ సభలో అధికార పక్ష మహిళా సభ్యులు కనీసం తమ వైపు చూడటానికి కూడా సిద్ధపడలేదని ఆరోపించారు.

పోలీసుల తీరును ఎండగడుతూ, తమపై మగ పోలీసులు కావాలనే విరుచుకుపడి లాగిపడేశారని ధ్వజమెత్తారు. బిఆర్‌ఎస్ ముఖ్య నేతలైన హరీష్ రావు, కేటీఆర్ చుట్టూ మహిళా పోలీసులను బందోబస్తుగా ఉంచి, తమలాంటి మహిళా ప్రజాప్రతినిధుల చుట్టూ మగ పోలీసులను మోహరించడం కాంగ్రెస్ రాజకీయం అని ఆరోపించారు. అసెంబ్లీ వద్ద ఏర్పాటు చేసిన కంచెలపై పడిపోయే పరిస్థితి ఎదురైనప్పుడు ఎమ్మెల్యేలు సుధీర్ రెడ్డి, నవీన్ రెడ్డి అడ్డుపడి కాపాడారని సబిత, సునీతా లక్ష్మారెడ్డి గుర్తుచేసుకున్నారు. ఒకవైపు విదేశాలు, ఇతర రాష్ట్రాల ప్రతినిధులు సైతం తమకు జరిగిన అవమానంపై పరామర్శిస్తుంటే, ఇక్కడ కాంగ్రెస్ ప్రభుత్వం మాత్రం మహిళా కానిస్టేబుల్‌కు ఇబ్బంది కలిగిందంటూ తప్పుడు కేసులు పెడుతోందని మండిపడ్డారు.

దళితుల ఆత్మగౌరవం తెలంగాణ ఆత్మగౌరవమని చెబుతున్న డిప్యూటీ సీఎం భట్టి విక్రమార్క, మహిళల ఆత్మగౌరవం తెలంగాణ ఆత్మగౌరవంలో భాగం కాదా అని ఈ సందర్భంగా ప్రశ్నించారు. ఈ తీవ్రమైన అంశంపై సభలో మాట్లాడేందుకు అవకాశం ఇవ్వకుండా కాంగ్రెస్ ప్రభుత్వం సభలో నాటకాలు చేస్తుందన్నారు. రాష్ట్రంలో ఎక్కడ చిన్న ఘటన జరిగినా క్షణాల్లో సమాచారం అందుకునే ప్రభుత్వానికి, మహిళా ఎమ్మెల్యేలపై జరిగిన దాడి సమాచారం ఎందుకు చేరలేదని మహిళా ఎమ్మెల్యేలు నిలదీశారు. శాంతిభద్రతలను పరిరక్షించాల్సిన సీఎం రేవంత్ రెడ్డి మహిళల మనోభావాలు దెబ్బతినేలా వ్యవహరిస్తున్నారని, తమకు జరిగిన అవమానానికి సీఎం తక్షణమే సభలో బేషరతుగా క్షమాపణ చెప్పాలని డిమాండ్ చేశారు.

BRS MLAs Suspension: బీఆర్ఎస్ ఎమ్మెల్యేలకు షాక్.. సెషన్ ముగిసేవరకు సస్పెన్షన్ వేటు!

Shankar Dukanam — Wed, 9 Sep 2026 11:24:25 +0530

హైదరాబాద్: తెలంగాణ శాసనసభ సమావేశాల్లో కీలక పరిణామం చోటుచేసుకుంది. ఈ సెషన్ ముగిసే వరకు బీఆర్‌ఎస్‌కు చెందిన సభ్యులను సస్పెండ్ చేస్తున్నట్లు స్పీకర్ గడ్డం ప్రసాద్ కుమార్ ప్రకటించారు. బుధవారం ఉదయం సభ ప్రారంభమైన వెంటనే మూడో రోజున బీఆర్‌ఎస్ సభ్యులు వియ్ వాంట్ జస్టిస్ అంటూ నినాదాలు చేస్తూ సభా కార్యకలాపాలను పదే పదే అడ్డుకునే ప్రయత్నం చేశారు. వెనక్కి తగ్గాలని, ఇది దొరల పాలన కాదని కేటీఆర్ సహా బీఆర్ఎస్ సభ్యులను స్పీకర్ ఘాటుగా హెచ్చరించారు. ఈ క్రమంలో ప్రతిపక్ష సభ్యులు వెల్ లోకి దూసుకెళ్లి తీవ్రమవ్వడంతో శాసనసభ వ్యవహారాల మంత్రి శ్రీధర్‌బాబు ఇచ్చిన సిఫారసు మేరకే స్పీకర్ ఈ నిర్ణయం తీసుకున్నారు. దాదాపు 17 మంది బీఆర్ఎస్ ఎమ్మెల్యేలను సెషన్ ముగిసేవరకు సస్పెండ్ చేశారని తెలుస్తోంది. సభలో లేని వారిని ఎందుకు సస్పెండ్ చేశారని బీఆర్ఎస్ ఎమ్మెల్యేలు ప్రశ్నిస్తున్నారు.

ఈ సస్పెన్షన్‌కు గురైన వారిలో బీఆర్‌ఎస్ ముఖ్య నేతలు కేటీఆర్, హరీశ్‌ రావు, కొత్త ప్రభాకర్‌ రెడ్డి, సబితా ఇంద్రారెడ్డి, కౌశిక్‌ రెడ్డి, ప్రశాంత్‌ రెడ్డి, సునీతా లక్ష్మారెడ్డి, కోవా లక్ష్మితో పాటు మాధవరం కృష్ణారావు, మాణిక్‌రావు, చింతా ప్రభాకర్‌, మర్రి రాజశేఖర్‌రెడ్డి, పల్లా రాజేశ్వర్‌రెడ్డి, కాలేరు వెంకటేశ్‌, విజయుడు, జగదీశ్‌ రెడ్డి, అనిల్‌ జాదవ్‌, సుధీర్‌రెడ్డి ఉన్నారు. సభ సజావుగా సాగేందుకు సహకరించకుండా అడ్డంకులు కలిగిస్తున్నందుకే వారిని సస్పెండ్ చేయాలని మంత్రి శ్రీధర్‌ బాబు ప్రతిపాదించగా, స్పీకర్ దానికి ఆమోదం తెలిపారు.

మహిళా ఎమ్మెల్యేలపై పోలీసుల దురుసు ప్రవర్తన, కేసీఆర్ నివాసం వెలుపల పోలీసుల సమక్షంలో జరిగిన ర్యాలీ, కెసిఆర్ చనిపోవాలంటూ కాంగ్రెస్ ఎమ్మెల్యేలు చేసిన బెదిరింపులు, రాష్ట్రంలో క్షీణిస్తున్న శాంతిభద్రతల పరిస్థితిపై చర్చించాలని కోరుతూ బిఆర్‌ఎస్ వర్కింగ్ ప్రెసిడెంట్ కేటీఆర్ వాయిదా తీర్మానాన్ని ప్రవేశపెట్టారు. మహిళా ఎమ్మెల్యేల పట్ల జరిగిన ఘటనపై ముఖ్యమంత్రి రేవంత్‌రెడ్డి క్షమాపణ చెప్పాలని శాసనసభలో డిమాండ్‌ చేశారు.

తెలంగాణ శాసనసభలో బీఆర్‌ఎస్ నాయకుల తీరుపై డిప్యూటీ సీఎం భట్టి విక్రమార్క తీవ్రస్థాయిలో విరుచుకుపడ్డారు. దళిత స్పీకర్‌ను గౌరవించకుండా అవమానపరిచే ధోరణిని ప్రతిపక్షం తక్షణమే మానుకోవాలని ఆయన హితవు పలికారు. సభను నడిపే స్పీకర్ సూచనలను పాటించకుండా, వెల్‌లోకి వచ్చి ఛాలెంజ్ చేయడం, సభ సాఫీగా సాగకుండా అడ్డంకులు సృష్టించడం సరికాదని మండిపడ్డారు. స్పీకర్ పదవిని, వారి కుటుంబ సభ్యులను లక్ష్యంగా చేసుకుని చేసిన వ్యాఖ్యలు ప్రజాస్వామ్య వ్యవస్థకే అవమానకరమని డిప్యూటీ సీఎం భట్టి వ్యాఖ్యానించారు.

దళితులు, గిరిజనులు, బలహీనవర్గాల ఆత్మగౌరవాన్ని దెబ్బతీసేలా ప్రతిపక్ష నేతల వైఖరి ఉందంటూ ఆయన తీవ్ర ఆగ్రహం వ్యక్తం చేశారు. గతంలో దళిత నాయకులు నిరసన తెలపగా పసుపు నీళ్లతో శుద్ధి చేసి అవమానించిన సంఘటనలు గుర్తులేదా అని ప్రశ్నించారు. అలాంటి వారే ఇప్పుడు న్యాయం కావాలనడం విడ్డూరంగా ఉందన్నారు. రాష్ట్రంలో ప్రతిపక్షాల వరుస ఆందోళనలు, సభను అడ్డుకునే చర్యలను కాంగ్రెస్ ప్రభుత్వం ఎంతో సంయమనంతో భరిస్తోందన్నారు. కానీ గతంలో సాగిన దొరతనం పోకడలను మళ్లీ సహించడానికి తెలంగాణ రాష్ట్రం ఏమాత్రం సిద్ధంగా లేదని భట్టి విక్రమార్క స్పష్టం చేశారు.

చంద్రబాబు అరెస్టుకు మూడేళ్లు: 'నిజం గెలిచింది' అంటూ నారా లోకేష్ భావోద్వేగ పోస్ట్

Shankar Dukanam — Wed, 9 Sep 2026 10:52:19 +0530

అమరావతి: వైసీపీ హయాంలో టీడీపీ అధినేత చంద్రబాబు అక్రమ అరెస్టుకు గురై మూడేళ్లు పూర్తయిన సందర్భంగా రాష్ట్ర ఐటీ, విద్యాశాఖ మంత్రి నారా లోకేష్ సోషల్ మీడియా వేదికగా తీవ్రస్థాయిలో స్పందించారు. నిజం గెలిచింది అంటూ చేసిన పోస్ట్ వైరల్ అవుతోంది. రాజకీయ కక్షసాధింపు చర్యల్లో భాగంగానే అప్పటి అధికార పక్షమైన గొడ్డలి పార్టీ సరిగ్గా 3 ఏళ్ల క్రితం చంద్రబాబుపై అక్రమ కేసులు బనాయించి జైలుకు పంపిందని ఆయన తీవ్ర ఆగ్రహం వ్యక్తం చేశారు.

చంద్రబాబు జైలులో ఉన్న ఆ 53 రోజుల పాటు ఆయనకు అండగా ప్రపంచవ్యాప్తంగా ఉన్న తెలుగు ప్రజలందరూ "నిజం గెలవాలి" అనే నినాదంతో మద్దతుగా నిలిచారని లోకేష్ గుర్తుచేసుకున్నారు. చివరకు ఆ అక్రమ కేసులన్నింటినీ న్యాయస్థానాలు కొట్టివేశాయని, న్యాయమే గెలిచి చంద్రబాబు నిర్బంధం నుంచి స్వేచ్ఛగా బయటకు వచ్చారని తెలిపారు. నాటి చీకటి రోజులను తలుచుకుంటూ, చంద్రబాబుకు మరియు పార్టీకి అండగా నిలిచిన తెలుగుజాతి మొత్తానికి ఆయన ధన్యవాదాలు తెలిపారు.

టీడీపీ అధినేత చంద్రబాబు నాయుడిని సిల్క్ డెవలప్‌మెంట్ స్కాం కేసులో 2023, సెప్టెంబర్ 9వ తేదీ తెల్లవారుజామున ఆంధ్రప్రదేశ్ సీఐడీ (CID) పోలీసులు అరెస్టు చేశారు. నంద్యాలలో ఆయన బస చేసిన చోటే సీఐడీ పోలీసులు భారీ బందోబస్తు మధ్య అదుపులోకి తీసుకున్నారు. ఏపీ స్కిల్ డెవలప్‌మెంట్ కార్పొరేషన్ (APSSDC) నిధుల మళ్లింపు ఆరోపణలకు సంబంధించిన కేసులో చంద్రబాబును అరెస్టు చేసినట్లు సీఐడీ అధికారులు ప్రకటించారు. ఈ అరెస్టుతో రాష్ట్రవ్యాప్తంగా ఉద్రిక్త పరిస్థితులు నెలకొనడమే కాకుండా, TDP శ్రేణులు రాజకీయ కక్షసాధింపుగా పేర్కొంటూ ఆందోళనలు చేపట్టాయి.

విచారణ, రిమాండ్
అరెస్టు అనంతరం చంద్రబాబును నంద్యాల నుంచి రోడ్డు మార్గాన విజయవాడకు తరలించారు. అనంతరం విజయవాడలోని ఏసీబీ (ACB) ప్రత్యేక కోర్టులో హాజరుపరిచారు. ఇరుపక్షాల వాదనలు విన్న అనంతరం, కోర్టు చంద్రబాబు నాయుడికి 14 రోజుల జ్యుడీషియల్ రిమాండ్ విధించింది. దీంతో సెప్టెంబర్ 10 రాత్రి ఆయనను రాజమండ్రి సెంట్రల్ జైలుకు తరలించారు.

దాదాపు 52 రోజుల పాటు రాజమండ్రి సెంట్రల్ జైలులో రిమాండ్‌లో ఉన్న చంద్రబాబుకి, కంటి శస్త్రచికిత్స, వైద్య కారణాల రీత్యా ఆంధ్రప్రదేశ్ హైకోర్టు 2023, అక్టోబర్ 31న నాలుగు వారాల తాత్కాలిక (మధ్యంతర) బెయిల్ మంజూరు చేసింది. దీంతో అదే రోజు సాయంత్రం ఆయన రాజమండ్రి జైలు నుంచి బయటకు వచ్చారు. జైలు వెలుపల వేలాది మంది అభిమానులు, తెదేపా నాయకులు ఆయనకు ఘన స్వాగతం పలికారు. ఆ తర్వాత 2023, నవంబర్ 20న ఏపీ హైకోర్టు ఈ కేసులో ఆయనకు పూర్తిస్థాయి (రెగ్యులర్) బెయిల్ మంజూరు చేసింది.

Hyderabad Common Travel Pass: త్వరలో హైదరాబాద్‌లో ఆర్టీసీ, మెట్రోకు కలిపి ఒకటే పాస్.. ఛార్జీల పూర్తి వివరాలు

Shankar Dukanam — Wed, 9 Sep 2026 08:01:34 +0530

Common Travel Pass for Hyderabad Metro and RTC Buses | హైదరాబాద్‌: నగరంలో ప్రయాణించాలంటే కేవలం బస్సులే కాదు, మెట్రో రైలులోనూ వెళ్లాల్సి వస్తుంది. అందుకే ప్రయాణికులకు త్వరలోనే ఒకే పాస్‌తో మెట్రో రైలు, ఆర్టీసీ బస్సుల్లో ప్రయాణించే వెసులుబాటు కల్పించనున్నారు. ఈ ఉమ్మడి ట్రావెల్ పాస్ ను త్వరలోనే ప్రారంభించేందుకు అధికారులు ఏర్పాట్లు చేస్తున్నారు. అసెంబ్లీ సమావేశాలు పూర్తయిన తర్వాత ఉమ్మడి పాస్ లాంచ్ చేసే అవకాశం ఉందని తెలుస్తోంది. దాంతో ప్రయాణికుల అవసరాలకు అనుగుణంగా ఒక రోజు, ఒక వారం పాస్, ఒక నెలకు చెల్లుబాటు అయ్యేలా 3 వేర్వేరు రకాల పాస్‌లను అందుబాటులోకి తీసుకురావాలని ప్రభుత్వం గత కొన్ని నెలలుగా భావిస్తోంది.

నెలవారీ ట్రావెల్ పాస్ ఛార్జీ ధర

ఈ ఉమ్మడి కార్డు (Common Travel Card)కు సంబంధించిన ఛార్జీల ప్రతిపాదనలను ఆర్టీసీ యాజమాన్యం ఇప్పటికే ప్రభుత్వానికి సమర్పించింది. ఈ ప్రతిపాదన ప్రకారం నెలవారీ ఉమ్మడి పాస్‌ ధరను రూ.7,500 గా నిర్ణయించారు. ఈ పాస్‌ ద్వారా మెట్రో రైలుతో పాటు సిటీ ఆర్డినరీ నుంచి ఏసీ బస్సుల వరకు అన్ని రకాల ఆర్టీసీ బస్సుల్లో ఔటర్‌ రింగ్‌ రోడ్డు (Hyderabad) పరిధి వరకు ప్రయాణించవచ్చు. అయితే, ప్రస్తుతానికి ఎంఎంటీఎస్‌ (MMTS) రైళ్లు, సెట్‌విన్‌ (Setwin) బస్సులను ఈ ఉమ్మడి కార్డు పరిధిలోకి తీసుకురావడానికి మాత్రం ఏ ప్లాన్స్ లేవని అధికారులు తెలిపారు.

Also Read: Telangana Assembly Session 2026: ఆవేశం స్టార్లతో బీఆర్ఎస్‌కు గండం - పక్కా ప్లాన్‌తో వచ్చి కాంగ్రెస్ పొలిటికల్ ట్రాప్‌లో చిక్కుకుందా?

ఆర్టీసీలో ఒకరోజు పాస్ రూ.100 కాగా, మెట్రో రైలు కు రూ. 250.. వీటి మొత్తం రూ.350 అవుతుంది.

అదే ఒక వారం రోజులకు అయితే ఆర్టీసీ పాస్ రూ.400, మెట్రోకు రూ.1800.. ఓవరాల్‌గా రూ.2200 అవుతుంది.

నెల రోజులకు ఆర్టీసీ పాస్ రూ.1500 కాగా, మెట్రో అయితే రూ.6000.. మొత్తం 7500 అవుతుందని ప్రతిపాదించారు. త్వరలోనే ఈ ఉమ్మడి పాస్ అందుబాటులోకి తేవడానికి అధికారులు ప్రయత్నాలు చేశారు.

BRS MLCs: ఎమ్మెల్సీలు తాతా మధు, నవీన్‌కుమార్ రెడ్డిలకు కోర్టులో ఊరట.. అంతలోనే సస్పెన్షన్ వేటు

Shankar Dukanam — Tue, 8 Sep 2026 17:50:53 +0530

BRS MLCs Tata Madhu and Naveen Kumar Reddy | హైదరాబాద్: అసెంబ్లీ స్పీకర్‌ గడ్డం ప్రసాద్‌కుమార్‌పై అనుచిత వ్యాఖ్యలు చేశారనే కేసులో అరెస్టయిన బీఆర్‌ఎస్‌ ఎమ్మెల్సీలకు నాంపల్లి కోర్టులో ఊరట లభించింది. ఎమ్మెల్సీలు తాతా మధు, నవీన్‌ కుమార్‌ రెడ్డిల రిమాండ్‌ను నాంపల్లి కోర్టు మంగళవారం నాడు తిరస్కరించింది. అంతలోనే ఎమ్మెల్సీలు తాతా మధు, నవీన్ కుమార్ రెడ్డిలపై చర్యలు తీసుకోవాలని శాసనసభ తీర్మానం చేసింది. అనంతరం బీఆర్‌ఎస్‌ ఎమ్మెల్సీలపై మండలి ఛైర్మన్‌ గుత్తా సుఖేందర్‌రెడ్డి సస్పెన్షన్‌ వేటు వేశారు.

స్పీకర్ గడ్డం ప్రసాద్ కుమార్ తల్లిపై అనుచిత వ్యాఖ్యల నేపథ్యంలో వీరిద్దరిపై చర్యలు తీసుకోవాలన్న తీర్మానాన్ని మంత్రి దామోదర రాజనర్సింహ సభలో ప్రవేశపెట్టగా ఏకగ్రీవంగా ఆమోదించింది. మరోవైపు ఈ తీర్మానం కాపీని శాసనసభ నుంచి శాసనమండలి చైర్మన్ గుత్తా సుఖేందర్ రెడ్డికి పంపారు. ఇద్దరినీ సస్పెండ్‌ చేయాలని మండలిలో మంత్రి శ్రీధర్‌బాబు తీర్మానం ప్రవేశపెట్టారు. మూజువాణి పద్ధతిలో ఓటింగ్‌ నిర్వహించిన అనంతరం ఈ సెషన్‌ మొత్తానికి ఇద్దరు ఎమ్మెల్సీలను సస్పెండ్‌ చేసినట్లు మండలి చైర్మన్ గుత్తా ప్రకటించారు. అనంతరం శాసనమండలి వాయిదా పడింది.

రిమాండ్ కు ఇవ్వాలన్న పోలీసుల విన్నపాన్ని తోసిపుచ్చిన కోర్టు.. ఎమ్మెల్సీలు ఇద్దరినీ విడుదల చేయాలని ఆదేశించింది. రూ. 10 వేల పూచికత్తు, రెండు షూరిటీలు సమర్పించాలని ఆదేశాలలో పేర్కొంది. అవసరమైన పూచీకత్తులు సమర్పించిన తరువాత వారిద్దరినీ విడుదల చేయాలని నాంపల్లి కోర్టు పోలీసులను ఆదేశించింది.

ఈ కేసులో భాగంగా మంగళవారం ఉదయం తాతా మధు, నవీన్ కుమార్ రెడ్డిలను పోలీసులు అరెస్టు చేయడం తెలిసిందే. స్పీకర్‌ గడ్డం ప్రసాద్‌కుమార్‌ను ఉద్దేశించి కులం పేరుతో దూషించడంతో పాటు, అసభ్యకర పదజాలం ఉపయోగించారని స్పీకర్‌ ఓఎస్డీ సోమవారం నాడు సైఫాబాద్‌ పోలీస్‌స్టేషన్‌లో ఫిర్యాదు చేశారు. ఆ ఫిర్యాదు ఆధారంగా ఇద్దరు ఎమ్మెల్సీలపై కేసులు నమోదు చేశారు. ప్రాథమిక విచారణ అనంతరం వారిని న్యాయమూర్తి ఎదుట ప్రవేశపెట్టగా, కోర్టు వారి రిమాండ్‌ను నిరాకరించింది. రెండూ షూరిటీలు, పదివేల పూచీకత్తుతో విడుదల చేయాలని పోలీసులను ఆదేశించింది.

Also Read: KTR And Harish Rao Arrest: ఎర్రవల్లికి వెళ్తున్న కేటీఆర్, హరీష్ రావు అరెస్ట్! మా ఇంటికి మేం వెళ్లకూడదా అంటూ ఆగ్రహం

Ganesh Chaturthi 2026: ఆన్‌లైన్‌లో గణేశ్‌ మండపాల నమోదు తప్పనిసరి.. ఎలా చేయాలో తెలిపిన సజ్జనార్‌

Shankar Dukanam — Tue, 8 Sep 2026 17:00:45 +0530

Online Registration for Ganesh Pandals | హైదరాబాద్: వినాయక చవితి దగ్గరకి వచ్చిందంటే మొదట వచ్చే ఆలోచన ఈసారి గతేడాది కంటే మరింత గ్రాండ్‌గా నిర్వహించడం. అయితే అందుకోసం చేయాల్సిన ఏర్పాట్లలో భాగంగా అన్ని అనుమతులు తీసుకోవడం ముఖ్యమే. గణేశ్‌ మండపాలకు ఆన్‌లైన్‌లో రిజిస్టర్ చేసుకుని పర్మిషన్ తీసుకోవాలి. గణేశ్‌ మండపాల వివరాలను ఉత్సవ నిర్వాహకులు తప్పనిసరిగా ముందస్తుగానే ఆన్‌లైన్‌ ద్వారా నమోదు చేసుకోవాలని హైదరాబాద్ సీపీ సజ్జనార్ సూచించారు.

గణేష్ నిర్వాహకులు వెంటనే http://policeportal.tspolice.gov.in/index.htm వెబ్‌సైట్ సందర్శించి తమ వివరాలను నమోదు చేసుకోవాల్సి ఉంటుంది. చివరి నిమిషం దాకా వేచిచూడకుండా అధికారిక పోర్టల్‌ ద్వారా సమాచారం ఇచ్చి, హైదరాబాద్ సిటీ పోలీస్ కు సహకరించాలని కోరారు. వినాయక మండపాల ఏర్పాటు, నిమజ్జన వివరాలు ముందుగానే తెలిస్తే ఆయా ప్రాంతాల్లో పటిష్టమైన బందోబస్తు, ట్రాఫిక్‌ క్రమబద్ధీకరణ, తగిన భద్రతా ఏర్పాట్లు చేసేందుకు వీలవుతుందని పేర్కొన్నారు.

ఆన్‌లైన్ అప్లికేషన్ కోసం ఇక్కడ క్లిక్ చేయండి https://policeportal.tspolice.gov.in/index.htm

తరువాత మొబైల్ నెంబర్ వెరిఫికేషన్ కోసం వివరాలు అందించాలి https://policeportal.tspolice.gov.in/userverifcn.htm?

పోలీసులకు సీపీ సజ్జనార్ కీలక సూచనలు

హైదరాబాద్‌లో వినాయక చవితి ఉత్సవాలు, నిమజ్జన వేడుకలను శాంతియుత వాతావరణంలో వైభవంగా నిర్వహించేందుకు పోలీసులు సన్నద్ధంగా ఉండాలని హైదరాబాద్ సీపీ వీసీ సజ్జనార్ ఆదేశించారు. బంజారాహిల్స్‌లోని టీజీఐసీసీసీ ఆడిటోరియంలో ఎస్ఐ, ఆపై స్థాయి అధికారులతో ఇటీవల సన్నాహక సమావేశం నిర్వహించారు. బోనాల ఉత్సవాల తరహాలోనే 11 రోజుల గణేశ్ వేడుకలను పకడ్బందీ బందోబస్తుతో ప్రశాంతంగా పూర్తి చేయాలని సూచించారు.

అధికారులు ఎస్‌హెచ్‌వోలు, శాంతి కమిటీలు, మండప నిర్వాహకులతో నిరంతరం సమన్వయం పాటిస్తూ విధులు నిర్వర్తించాలని సజ్జనార్ స్పష్టం చేశారు. నగరంలో సాధారణ రాకపోకలకు అంతరాయం కలగకుండా చూడాలన్నారు. గణేశ్ మండపాల నిర్వాహకులు తప్పనిసరిగా హైదరాబాద్ సిటీ పోలీస్ యాప్‌ https://policeportal.tspolice.gov.in/index.htm లో దరఖాస్తు చేసుకుని, వివరాలను జియో-ట్యాగింగ్ చేయాలని సూచించారు. రద్దీ మండపాల వద్ద సీసీటీవీలు, క్యూలైన్లు ఏర్పాటు చేసేలా చూడాలన్నారు.

శంషాబాద్, రాజేంద్రనగర్ జోన్లు కలవడంతో బాలాపూర్ నుంచి ఖైరతాబాద్ వరకు ఉత్సవాలు సిటీ పోలీస్ పరిధిలోకి వచ్చాయని సజ్జనార్ తెలిపారు. బాలాపూర్ నుంచి ప్రధాన నిమజ్జన మార్గాలు, ట్యాంక్‌బండ్, ఇతర జలాశయాల వైపు వెళ్లే రూట్లపై ప్రత్యేక దృష్టి సారించాలని సీపీ అధికారులను ఆదేశించారు.

Telangana Speaker Gaddam Prasad: వెనక్కి తగ్గని హరీష్ రావు.. సభ నుంచి తప్పుకున్న స్పీకర్ గడ్డం ప్రసాద్ కుమార్

Shankar Dukanam — Tue, 8 Sep 2026 15:29:16 +0530

Telangana Assembly Proceedings | హైదరాబాద్: అసెంబ్లీ సమావేశాల సందర్భంగా తనపై జరిగిన వరుస పరిణామాలు, అనుచిత సంఘటనలతో స్పీకర్ గడ్డం ప్రసాద్ కుమార్ కీలక నిర్ణయం తీసుకున్నారు. ప్రస్తుత పరిస్థితుల్లో తాను సభను నడిపించలేనని ఆయన స్పష్టం చేశారు. నిన్న బీఆర్ఎస్ సభ్యులు తనపై, తన తల్లిపై చేసిన అనుచిత వ్యాఖ్యలకు క్షమాపణ చెప్పకుండా నేటి సభలో బీఆర్ఎస్ సభ్యులు అదే తీరుగా వ్యవహరించారంటూ ఆవేదన వ్యక్తం చేశారు. ఈ క్రమంలో తాను ఈరోజు మిగతా సెషన్ నడిపించలేనంటూ తప్పుకున్నారు.

శాసనసభను నిర్వహించేందుకు వీలుగా ప్యానెల్ స్పీకర్లలో ఒకరిని అధ్యక్ష స్థానంలో కూర్చోబెట్టి అసెంబ్లీ కార్యకలాపాలను కొనసాగించాలని స్పీకర్ కోరారు. సభాధిపతి అభ్యర్థన మేరకు, ప్యానెల్ స్పీకర్ ఆధ్వర్యంలోనే శాసనసభ సమావేశాలను నడిపించాలని ప్రభుత్వం నిర్ణయించింది. లంచ్ తరువాత నుంచి ప్యానెల్ స్పీకర్ కడియం శ్రీహరి సమావేశాలను నడిపిస్తున్నారు. ఇంత జరిగినా బీఆర్ఎస్ సభ్యులు చేసిన తప్పును ఒప్పుకోవడం లేదని, ఇది వారిప్రవర్తనను తెలుపుతుందని మంత్రి శ్రీధర్ బాబు, మంత్రి సీతక్క, తదితరులు అన్నారు.

పోలీసులు మహిళా ఎమ్మెల్యేలపై రివర్స్ కేసులు పెట్టారు

శాసనసభ వర్షాకాల సమావేశాల్లో భాగంగా మంగళవారం నాటి సభలో బీఆర్ఎస్ నేత, మాజీ మంత్రి హరీష్ రావు, స్పీకర్ గడ్డం ప్రసాద్ కుమార్ మధ్య మాటల యుద్ధం జరిగింది. సభ ప్రారంభం కాగానే హరీష్ రావు మాట్లాడుతూ, సోమవారం అసెంబ్లీ ఆవరణలో బీఆర్ఎస్ మహిళా ప్రజాప్రతినిధులైన సబితా ఇంద్రా రెడ్డి, సునీతా లక్ష్మారెడ్డిలను పోలీసులు తీవ్రంగా అవమానించారని చెప్పారు. మాజీ హోం మంత్రి సబితక్క గొంతు నొక్కి సునీతమ్మ చీర లాగి భౌతిక దాడికి దిగారని ఆరోపించారు. రక్షణ కల్పించాల్సిన పోలీసులే రివర్స్ కేసులు పెట్టారని ఆవేదన వ్యక్తం చేస్తూ, గౌరవ సభగా ఉండాల్సిన చట్టసభ కౌరవ సభగా మారిందన్నారు. న్యాయం చేయాల్సిన ప్రభుత్వం వేధింపులకు గురిచేస్తోందని హరీష్ రావు మండిపడ్డారు.

నీ తల్లిని కాదు.. నా తల్లిని మాటలు అన్నారు

దీనిపై స్పీకర్ గడ్డం ప్రసాద్ కుమార్ తీవ్రంగా స్పందించారు. మహిళా ప్రజాప్రతినిధులు సబితమ్మ, సునీతమ్మ, కోవా లక్ష్మిలు తనకు తోబుట్టువుల లాంటి వారని, మహిళా ఎమ్మెల్యేలపై జరిగిన ఘటనపై ఇప్పటికే సమగ్ర నివేదిక కోరినట్లు తెలిపారు. రిపోర్టు రాగానే కఠిన చర్యలు తీసుకుంటానని హామీ ఇచ్చారు. అయితే, బిఆర్ఎస్ ఎమ్మెల్సీ తాతా మధు తనపై చేసిన ఆరోపణలను ప్రస్తావిస్తూ స్పీకర్ గడ్డం ప్రసాద్ కుమార్ భావోద్వేగానికి లోనయ్యారు. "హరీష్ రావు.. నీకు కాదు, ఆవేశం ఉండాల్సింది నాకు. వాళ్లు ఎన్నో మాటలు అన్నది నీ తల్లిని కాదు, నా కన్న తల్లిని అన్నారు. ముందు దాని సంగతేంటో తేల్చు, దానికి ఏం సమాధానం చెబుతావు?" అంటూ నిలదీశారు. దేనికి భయపడేది లేదని, స్పీకర్ స్థానానికి జరిగిన అవమానానికి బీఆర్ఎస్ నుంచి సమాధానం కావాలని గట్టిగా డిమాండ్ చేయడంతో సభలో గందరగోళం నెలకొంది.

ఎమ్మెల్యేనే ఎవర్రా అంటావా.. ఎవర్రా నువ్వు

ABP Desam — Tue, 8 Sep 2026 15:04:17 +0530

రాజకీయ నాయకులు, అధికారుల మధ్య మాటల యుద్ధం తారాస్థాయికి చేరింది."ఎమ్మెల్యేనే ఎవర్రా అంటావా.. ఎవర్రా నువ్వు!"