hyderabad

Sekhar Master : శేఖర్ మాస్టర్ కారుకు ప్రమాదం - అసలేం జరిగిందంటే?

Ganesh Guptha — Thu, 12 Nov 2026 12:08:29 +0530

Tollywood Choregrapher Sekhar Master Car Accident : టాలీవుడ్ ఫేమస్ కొరియోగ్రాఫర్ శేఖర్ మాస్టర్ ప్రయాణిస్తున్న కారు ప్రమాదానికి గురైంది. బుధవారం రాత్రి చిరంజీవి 'కాకా' మూవీ సాంగ్ షూటింగ్ కంప్లీట్ చేసుకుని హైదరాబాద్ తిరిగి వస్తుండగా... ముచ్చింతల్ వద్ద ఈ ఘటన జరిగింది.

పండ్ల లోడ్‌తో వస్తున్న లారీ నాలుగు రోడ్ల కూడలి వద్ద శేఖర్ మాస్టర్ కారును ఢీకొట్టింది. ప్రమాదంలో కారు దెబ్బతినగా ఆయనకు స్వల్ప గాయాలైనట్లు తెలుస్తోంది. ఆయనతో పాటు ఉన్న వారికి కూడా స్వల్ప గాయాలతో ప్రమాదం నుంచి బయటపడ్డారు. మహేశ్వరం పరిధిలోని గొల్లూరులో షూటింగ్ పూర్తి చేసుకొని తిరిగివస్తుండగా ప్రమాదం జరిగినట్లు సమాచారం. ఘటనలో కారు నుజ్జు నుజ్జు కాగా... ప్రమాదం తర్వాత శేఖర్ మాస్టర్ వేరే కారులో హైదరాబాద్ వెళ్లిపోయారు. ఈ ప్రమాదంపై పోలీసులు కేసు నమోదు చేసి దర్యాప్తు చేస్తున్నారు.

Also Read : Romantic Drama Series OTT : ఓటీటీలోకి వచ్చేస్తోన్న రొమాంటిక్ డ్రామా - అదితి రావ్ హైదరీ 'ఓ సాథీ రే' స్ట్రీమింగ్ ఎప్పుడు, ఎక్కడంటే?

NOTE : మరిన్ని సినిమా వార్తలు, గాసిప్స్, ఓటీటీ అప్డేట్స్, వెబ్ సిరీస్‌లు, టాలీవుడ్, బాలీవుడ్ హీరోయిన్స్ లేటెస్ట్ సోషల్ మీడియా అప్డేట్స్, టీవీ సీరియల్స్ లేటెస్ట్ ఎపిసోడ్స్ కోసం ఇక్కడ క్లిక్ చేయండి.

CM Revanth Reddy: టెక్నాలజీ ఎంత పెరిగినా బ్లూకాలర్ ఉద్యోగాలకు ఢోకా లేదు - సీఎం రేవంత్ రెడ్డి

Satyaprasad Bandaru — Wed, 11 Nov 2026 19:18:41 +0530

CM Revanth Reddy: కాంగ్రెస్ ప్రభుత్వం మైనార్టీలకు అన్ని రకాలుగా అండగా నిలుస్తోందని సీఎం రేవంత్‌రెడ్డి స్పష్టం చేశారు. ఈ ప్రభుత్వం మైనార్టీలకు విద్య, ఉద్యోగాల్లో 4 శాతం రిజర్వేషన్లు కల్పించిందని ఆయన గుర్తుచేశారు. హైదరాబాద్‌లోని సేవాలాల్ బంజారా భవన్‌లో నిర్వహించిన జాతీయ విద్య, మైనార్టీల సంక్షేమ దినోత్సవ కార్యక్రమంలో సీఎం ముఖ్యఅతిథిగా పాల్గొని ప్రసంగించారు.

నెహ్రూ వేసిన పునాదులతోనే అభివృద్ధి

దేశ తొలి ప్రధాని జవహర్‌లాల్‌ నెహ్రూ నాడు విద్య, నీటిపారుదల రంగాలకు అధిక ప్రాధాన్యత ఇచ్చారని, ఆయన వేసిన బలమైన పునాదుల వల్లే నేడు ఆయా రంగాల్లో వృద్ధి సాధించగలిగామని రేవంత్‌రెడ్డి పేర్కొన్నారు. దేశవ్యాప్తంగా ప్రసిద్ధిగాంచిన విశ్వవిద్యాలయాలు, ఐఐటీలను కాంగ్రెస్‌ ప్రభుత్వమే ఏర్పాటు చేసిందని యువత గుర్తుచేసుకోవాలని పిలుపునిచ్చారు. నాటి దూరదృష్టి వల్లే నేడు భారతీయులు ప్రపంచ ప్రఖ్యాత సంస్థలకు సీఈవోలుగా ఎదిగారని కొనియాడారు.

నైపుణ్యాభివృద్ధికి ప్రత్యేక చర్యలు

పరిశ్రమల అవసరాలకు అనుగుణంగా యువతలో నైపుణ్యాలు పెంచడమే లక్ష్యంగా ఐటీఐలను ఏటీసీలుగా మార్చామని సీఎం తెలిపారు. అలాగే మరిన్ని వసతులతో ప్రత్యేక స్కిల్‌ యూనివర్సిటీని నిర్మిస్తున్నట్లు చెప్పారు. ఆర్టిఫిషియల్ ఇంటెలిజెన్స్ పెరుగుదల వల్ల వైట్‌ కాలర్‌ ఉద్యోగాలకు సవాళ్లు ఎదురైనప్పటికీ, టెక్నాలజీ ఎంత పెరిగినా బ్లూ కాలర్‌ జాబ్‌లకు ఎలాంటి ముప్పు ఉండదని ఆయన అభిప్రాయపడ్డారు.

మాట నిలబెట్టుకున్నాం

విద్యార్థులను కాంగ్రెస్‌ ప్రభుత్వం అన్ని విధాలుగా ప్రోత్సహిస్తోందని, మైనార్టీలకు ఇచ్చే స్కాలర్‌షిప్‌లపై కూడా భాజపా రాజకీయం చేస్తోందని విమర్శించారు. క్రికెట్‌లో రాణిస్తున్న సిరాజ్‌కు డీఎస్పీ ఉద్యోగం కల్పించామని గుర్తుచేశారు. షబ్బీర్‌ అలీ, అజారుద్దీన్‌, ఫిరోజ్‌ఖాన్‌లకు ఎన్నికల్లో పార్టీ టికెట్లు ఇచ్చామని, ఎన్నికల్లో విజయం సాధించలేకపోయినప్పటికీ ఇచ్చిన మాట ప్రకారం అజారుద్దీన్‌కు మంత్రి పదవి కల్పించామని వివరించారు.

Also Read: తెలంగాణలో విద్యా సంస్కరణలు.. వచ్చే ఏడాది నుంచి 10+2 విధానం అమలు: సీఎం రేవంత్ రెడ్డి

నైట్ ఎకానమీ పెంచేలా మూసీ, మీరాలం ప్రాజెక్టులు

పాతబస్తీ అభివృద్ధిపై ప్రత్యేక దృష్టి సారించామని సీఎం రేవంత్ రెడ్డి తెలిపారు. మీరాలం చెరువుపై రూ.600 కోట్లతో కేబుల్‌ బ్రిడ్జిని నిర్మిస్తూ అద్భుతమైన పర్యాటక ప్రాంతంగా తీర్చిదిద్దుతున్నామని చెప్పారు. మూసీ నదిలోని ఆక్రమణలను తొలగించి సుందరీకరణ పనులు వేగవంతం చేస్తున్నామని, ఈ ప్రాజెక్టు పూర్తయితే హైదరాబాద్ నగరంలో 'నైట్‌ ఎకానమీ' గణనీయంగా పెరుగుతుందని పేర్కొన్నారు.

Also Read: సీఐఐ భాగస్వామ్య సదస్సుకు ముస్తాబైన విశాఖ.. రాష్ట్ర సంస్కృతి ఉట్టిపడేలా ప్రభుత్వ ఏర్పాట్లు

Telangana Education System: తెలంగాణలో విద్యా సంస్కరణలు.. వచ్చే ఏడాది నుంచి 10+2 విధానం అమలు: సీఎం రేవంత్ రెడ్డి

Shankar Dukanam — Wed, 11 Nov 2026 18:26:02 +0530

హైదరాబాద్: తెలంగాణ విద్యా వ్యవస్థలో సంస్కరణలకు రాష్ట్ర ప్రభుత్వం చర్యలు చేపట్టింది. వచ్చే విద్యా సంవత్సరం (2027-28) నుంచి రాష్ట్రంలో 10+2 విధానాన్ని అమలు చేయాలని ప్రభుత్వం కీలక నిర్ణయం తీసుకుంది. విద్యాశాఖపై బుధవారం నిర్వహించిన ఉన్నత స్థాయి సమీక్షా సమావేశంలో సీఎం రేవంత్ రెడ్డి (Revanth Reddy) ఇందుకు అవసరమైన చర్యలు వేగవంతం చేయాలని అధికారులను ఆదేశించారు. ప్రస్తుత రోజుల్లో అవసరాలకు తగినట్లుగా రాష్ట్రంలో విద్యా విధానాన్ని మార్చాల్సిన అవసరం ఉందని, నాణ్యమైన విద్యను అందించడమే ప్రభుత్వ ప్రాథమిక ప్రాధాన్యత అని సీఎం రేవంత్ రెడ్డి స్పష్టం చేశారు. ఏ ఒక్క విద్యార్థికి నష్టం జరగకుండా నర్సరీ నుంచి టెన్ ప్లస్ టూ విధానం అమలు చేసేందుకు చర్యలు తీసుకోవాలని అధికారులను ఆదేశించారు.

నూతన విద్యా విధానం.. క్లాసుల వర్గీకరణ

తెలంగాణలో నూతన విద్యా విధానంలో విద్యార్థులకు బోధన అందించేందుకు తరగతుల వర్గీకరణను సూచించారు. నర్సరీ నుంచి 4వ తరగతి వరకు ప్రాథమిక విద్యగా నిర్ణయించారు. 5వ తరగతి నుండి 8వ తరగతి వరకు సెకండరీ విద్యగా సీఎం రేవంత్ రెడ్డి పేర్కొన్నారు. ఆపై 9వ తరగతి నుంచి ఇంటర్మీడియట్ (+2) వరకు ఉన్నత విద్యగా పరిగణించాలని అధికారులను సీఎం రేవంత్ రెడ్డి ఆదేశించారు. ముఖ్యంగా +2 స్థాయిలో విద్యార్థులలో నైపుణ్య అభివృద్ధి (Skill Development) పై ఫోకస్ చేస్తామని తెలిపారు.

ప్రభుత్వ పాఠశాలల ఆధునికీకరణ, మౌలిక వసతుల కల్పణ

ప్రైవేటు విద్యా సంస్థలకు ధీటుగా ప్రభుత్వ పాఠశాలలను తీర్చిదిద్దడమే కాంగ్రెస్ ప్రభుత్వ సంకల్పమని సీఎం రేవంత్ రెడ్డి స్పష్టం చేశారు. నియోజకవర్గానికో యంగ్ ఇండియా ఇంటిగ్రేటెడ్ స్కూల్స్ ద్వారా పేద విద్యార్థులకు అత్యుత్తమ విద్య అందించాలన్నారు. అలాగే యంగ్ ఇండియా స్కూల్స్ నిర్మాణ పనుల్లో వేగం పెంచాలని, నిర్మాణ నాణ్యత విషయంలో ఎక్కడా రాజీ పడకూడదని అధికారులకు సీఎం రేవంత్ రెడ్డి సూచించారు. వీటితో పాటు పాలిటెక్నిక్ కోర్సుల ఆధునికీకరణ ప్రక్రియకు నిధుల మంజూరును వేగవంతం చేయాలని ఆదేశించారు. సంక్షేమ హాస్టళ్లను ఇకపై అద్దె భవనాల్లో నిర్వహించకూడదని, తక్షణమే సొంత భవనాల నిర్మాణానికి చర్యలు తీసుకోవాలని స్పష్టం చేశారు. ఈ సమీక్షా సమావేశంలో తెలంగాణ ప్రభుత్వ ప్రధాన కార్యదర్శి సంజయ్ జాజు, ప్రభుత్వ సలహాదారులు కే.కేశవరావు, సుదర్శన్ రెడ్డి, ఎంపీ వేం నరేందర్ రెడ్డి, రాష్ట్ర విద్యాశాఖ ఉన్నతాధికారులు పాల్గొన్నారు.

పేద పిల్లల కలలకు చిరునామాగా యంగ్ ఇండియా ఇంటిగ్రేటెడ్ స్కూల్స్

భవనాలు నిర్మించడం సులభమే.. కానీ కలలకు పునాదులు వేయాలంటే మాత్రం ప్రభుత్వాలకు సంకల్పం ఉండాలని రేవంత్ రెడ్డి గతంలో వ్యాఖ్యానించారు. ఆ సంకల్పంతోనే రాష్ట్రంలో యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ వేగంగా నిర్మిస్తున్నామని... కులం, మతం, ప్రాంతం అనే గీతలను చెరిపేస్తూ ప్రతి చిన్నారికీ ప్రపంచ స్థాయి విద్యను అందించడమే తమ ప్రభుత్వ లక్ష్యం అన్నారు. ఈ స్కూళ్లలో చదువుకునే పేదల పిల్లలను రేపటి శాస్త్రవేత్తలుగా, పరిపాలకులుగా, పారిశ్రామికవేత్తలుగా, డాక్టర్లుగా తీర్చిదిద్దే జ్ఞాన మందిరాలుగా ఇవి నిలవబోతున్నాయన్నారు. పేద పిల్లల కలలకు చిరునామాగా తెలంగాణ మోడల్‌కు ప్రతీకగా... ఈ ఇంటిగ్రేటెడ్ రెసిడెన్షియల్ స్కూల్స్ తరతరాల భవిష్యత్తును మార్చబోతున్నాయని రేవంత్ రెడ్డి అన్నారు.

Bharat Summit 2026: ప్రపంచ రాజకీయాలకు వేదికగా హైదరాబాద్ ! దావోస్ తరహాలో భాగ్యనగరం అభివృద్ధి: భట్టి విక్రమార్క

Shankar Dukanam — Wed, 11 Nov 2026 15:32:27 +0530

Bharat Summit In Hyderabad | హైదరాబాద్‌ నగరాన్ని ప్రపంచ రాజకీయ, సామాజిక, ఆర్థిక చర్చలకు మరో అంతర్జాతీయ వేదికగా తీర్చిదిద్దుతున్నామని తెలంగాణ డిప్యూటీ సీఎం భట్టి విక్రమార్క అన్నారు. కాంగ్రెస్ ప్రభుత్వం ప్రజాస్వామ్య, అహింస, ప్రగతిశీల భావజాలాన్ని విశ్వసించి ముందుకు సాగుతుందన్నారు. గత ఏడాది నిర్వహించిన భారత్ సమ్మిట్‌కు అంతర్జాతీయ స్థాయిలో స్పందన, గుర్తింపు వచ్చిందని తెలిపారు. పీసీసీ చీఫ్ మహేశ్‌ కుమార్‌ గౌడ్‌ ఆధ్వర్యంలో కాంగ్రెస్ నేతలు సన్నద్ధ సమావేశం బుధవారం ఉదయం నిర్వహించారు.

70 దేశాల నుంచి వెయ్యి మంది ప్రతినిధులు హాజరు

ఈనెల 12 నుంచి 14 వరకు నిర్వహిస్తున్న ఈ ప్రతిష్టాత్మక భారత్ సమ్మిట్‌లో సుమారు 70 దేశాల నుంచి 1000 మంది ప్రతినిధులు పాల్గొనేందుకు ఆసక్తి చూపుతున్నారని భట్టి విక్రమార్క తెలిపారు. ఆర్థిక రంగానికి స్విట్జర్లాండ్‌లోని దావోస్ నగరం ఎలాగో.. ప్రపంచ రాజకీయ, సామాజిక, ఆర్థిక చర్చలకు హైదరాబాద్ మరో కేంద్రంగా ఎదగాలని, అందుకు కృషి చేస్తామన్నారు. కాంగ్రెస్ అగ్రనేతలు రాహుల్ గాంధీ, మల్లికార్జున ఖర్గే, శ్యామ్ పిట్రోడా సహా పలువురు ప్రముఖులు ఈ సమ్మిట్‌లో పాల్గొననున్నారని తెలిపారు. ప్రజాస్వామ్య, ఉదారవాద, ప్రగతిశీల శక్తులను ఒకే వేదికపైకి తీసుకురావడమే లక్ష్యంగా భారత్ సమ్మిట్ లక్ష్యమని భట్టి విక్రమార్క పేర్కొన్నారు.

దావోస్‌ను మించేలా హైదరాబాద్.. సల్మాన్ ఖుర్షిద్

హైదరాబాద్: రాజధాని హైదరాబాద్‌లో రెండోసారి అంతర్జాతీయ స్థాయి భారత్ సమ్మిట్ నిర్వహించడం వెనుక కాంగ్రెస్ అగ్రనేతల కృషి ఎంతో ఉందని విదేశాంగశాఖ మాజీ మంత్రి సల్మాన్ ఖుర్షిద్ అన్నారు. గతేడాది హైదరాబాద్‌లో నిర్వహించిన సమ్మిట్‌కు అంతర్జాతీయ స్థాయిలో ఆదరణ లభించిందన్నారు. రాబోయే రోజుల్లో దీన్ని స్విట్జర్లాండ్‌లోని దావోస్ తరహాలో ఒక శాశ్వత గ్లోబల్ వేదికగా తీర్చిదిద్దడమే లక్ష్యమని పేర్కొన్నారు.

అదే సమయంలో ప్రస్తుత కేంద్ర ప్రభుత్వ విదేశాంగ విధానాన్ని సల్మాన్ ఖుర్షీద్ తప్పుపట్టారు. దివంగత మాజీ ప్రధానులు జవహర్ లాల్ నెహ్రూ, ఇందిరా గాంధీ, రాజీవ్ గాంధీలు నిర్మించిన విలువలతో కూడిన విదేశాంగ విధానమే దేశానికి సరైన దిక్సూచి అని పేర్కొన్నారు. తెలంగాణ ప్రభుత్వం నిర్వహిస్తున్న భారత్ సమ్మిట్ ద్వారా కాంగ్రెస్ ఆ అంతర్జాతీయ దృక్పథాన్ని మరోసారి ప్రపంచం ముందు ఉంచుతోందన్నారు.

Also Read: KRMB Letter: శ్రీశైలం, సాగర్‌ ప్రాజెక్టుల అసలు అనుమతుల వివరాలివ్వండి.. తెలంగాణ, ఏపీలకు కేఆర్‌ఎంబీ లేఖ

బీజేపీ విమర్శలకు మంత్రి శ్రీధర్ బాబు కౌంటర్

హైదరాబాద్‌లో నిర్వహిస్తున్న 'భారత్ సమ్మిట్' నేపథ్యంలో తెలంగాణ మంత్రి దుద్దిళ్ల శ్రీధర్ బాబు మాట్లాడారు. కాంగ్రెస్ అగ్రనేత, లోక్‌సభలో ప్రతిపక్షనేత రాహుల్ గాంధీపై బీజేపీ చేస్తున్న విమర్శలను ఆయన తీవ్రంగా ఖండించారు. రాహుల్ గాంధీ ఇప్పటికే అంతర్జాతీయ స్థాయి లీడర్ అని, ఆయనను కొత్తగా ప్రమోట్ చేయాల్సిన అవసరం లేదన్నారు. కాంగ్రెస్ పార్టీ ప్రగతిశీల భావజాలంతో ముందుకు సాగుతోందని, బీజేపీ విధానాలు పూర్తిగా భిన్నంగా ఉంటాయన్నారు. హైదరాబాద్ వేదికగా జరగనున్న ఈ సమ్మిట్‌లో ప్రపంచవ్యాప్తంగా ప్రజలు లేవనెత్తిన పలు సమస్యలతో పాటు, SIR అంశంపై కేంద్ర ప్రభుత్వ వైఖరి, వాటికి సంబంధించిన సరైన పరిష్కార మార్గాలపై చర్చలు జరగనున్నాయని మంత్రి శ్రీధర్ బాబు తెలిపారు.

Mahesh Kumar Goud: భారత్ సమ్మిట్‌కు హాజరుకావాలని రాహుల్ గాంధీకి టీపీసీసీ చీఫ్ ఆహ్వానం.. ఓబీసీలకు ప్రాధాన్యంపై చర్చ

Shankar Dukanam — Tue, 10 Nov 2026 17:44:51 +0530

Mahesh Kumar Meets Rahul Gandhi | న్యూఢిల్లీ: తెలంగాణ సహా దేశవ్యాప్తంగా వెనుకబడిన తరగతులకు (OBC) రాజకీయాల్లో మరింత ప్రాధాన్యం కల్పించడంపై కాంగ్రెస్ అగ్రనేత, లోక్‌సభ ప్రతిపక్షనేత రాహుల్ గాంధీతో చర్చించినట్లు తెలంగాణ పీసీసీ చీఫ్ మహేష్ కుమార్ గౌడ్ వెల్లడించారు. ఢిల్లీలోని 10 జన్ పత్ లో రాహుల్ గాంధీతో సమావేశమైన ఆయన అనంతరం మీడియాతో మాట్లాడారు. హైదరాబాద్‌లో నిర్వహించనున్న భారత్ సమ్మిట్‌తో పాటు సర్‌ (SIR) వ్యతిరేక సభ, మెగా బీసీ ర్యాలీలో పాల్గొనాల్సిందిగా రాహుల్‌ను వ్యక్తిగతంగా ఆహ్వానించామని మహేష్ గౌడ్ తెలిపారు. ఇటీవల తెలంగాణ మంత్రులు, ఎంపీల మధ్య తలెత్తిన అంతర్గత విభేదాలు లేదా ఢిల్లీ వేదికగా జరిగిన పరిణామాలపై రాహుల్‌తో ఎలాంటి చర్చలు జరగలేదన్నారు.

తెలంగాణలో కాంగ్రెస్ చేపడుతున్న సంస్థాగత నిర్మాణం, బూత్ స్థాయి నుంచి రాష్ట్ర స్థాయి వరకు పార్టీ నిర్వహిస్తున్న విభిన్న కార్యక్రమాల పురోగతిపై కూడా రాహుల్ గాంధీతో సమగ్రంగా చర్చించినట్లు మహేష్ కుమార్ గౌడ్ వెల్లడించారు. నవంబర్ 13, 14 తేదీల్లో హైదరాబాద్‌లో నిర్వహించనున్న 'భారత్ సమ్మిట్'కు రాహుల్ హాజరవుతున్నారని, ఈ సందర్భంగా గిగ్ వర్కర్లతో (Gig Workers) ప్రత్యేక సమావేశం ఏర్పాటు చేయాల్సిందిగా ఆయన సూచించారని టీపీసీసీ చీఫ్ తెలిపారు.

నెలాఖరులోగా నామినేటెడ్ పోస్టుల భర్తీ

తెలంగాణలో పెండింగ్‌లో ఉన్న నామినేటెడ్ పోస్టుల భర్తీ ప్రక్రియ నవంబర్ నెలాఖరు నాటికి పూర్తవుతుందని మహేష్ గౌడ్ క్లారిటీ ఇచ్చారు. సోనియా గాంధీ జీవిత విశేషాలతో వెలువడిన ఆత్మకథ పుస్తకం ‘బిలాంగింగ్: ఎ జర్నీ ఆఫ్ లవ్’ను స్వాగతిస్తున్నామని, ఈ పుస్తకంపై తెలంగాణలో ప్రత్యేక కార్యక్రమాలను నిర్వహిస్తామని తెలిపారు. పార్టీని మరింత బలోపేతం చేసేందుకు కొత్త వర్కింగ్ ప్రెసిడెంట్ల నియామకంపై ఈ భేటీలోనే చర్చించారని ప్రచారం జరుగుతోంది. దాంతో టీపీసీసీ చీఫ్ ఈ ఢిల్లీ పర్యటనతో కొందరు నేతలకు ప్రమోషన్లు దక్కడం, అసంతృప్తులను బుజ్జగించడం ఖాయమని వినిపిస్తోంది.

Mahesh Kumar Goud, Rahul Gandhi, New Delhi News, Telangana Congress, OBC,Bharat Summit

PRC ఆలస్యం..ఉద్యోగుల్లో అసంతృప్తి.. కాంగ్రెస్‌కు కొత్త తలనొప్పి!

Hema Nidadhana — Tue, 10 Nov 2026 14:38:22 +0530

తెలంగాణలో రెండో వేతన సవరణ సంఘం (PRC) నివేదిక అమలు ఆలస్యం అధికార కాంగ్రెస్ పార్టీకి రాజకీయంగా మరో సవాల్‌గా మారుతోంది. ఇప్పటికే పీఆర్సీ కోసం ఎదురుచూస్తున్న ప్రభుత్వ ఉద్యోగులు, ఉపాధ్యాయులు, పెన్షనర్లు.. ప్రభుత్వ తీరుపై అసంతృప్తి వ్యక్తం చేస్తున్నారు. ఈ ప్రభావం రాబోయే గ్రాడ్యుయేట్ ఎమ్మెల్సీ ఎన్నికలపై పడే అవకాశాలున్నాయనే చర్చ రాజకీయ వర్గాల్లో మొదలైంది.

మూడేళ్లుగా ఎదురుచూపులే!

తెలంగాణలో రెండో పీఆర్సీ ప్రక్రియ ప్రారంభమై మూడేళ్లు దాటుతున్నా.. ఇప్పటివరకు నివేదికపై స్పష్టత రాకపోవడం ఉద్యోగుల్లో ఆందోళనకు కారణమవుతోంది. 2023 అక్టోబర్‌లో రెండో పీఆర్సీని ఏర్పాటు చేయగా.. ఆరు నెలల్లో సిఫార్సులు అందించాల్సి ఉంది. అయితే గడువు దాటినా నివేదిక పెండింగ్‌లోనే ఉండటంతో ఉద్యోగ సంఘాలు పలుమార్లు ప్రభుత్వాన్ని ప్రశ్నించాయి.

ఈ ఏడాది మే 2న ఉద్యోగ సంఘాల ప్రతినిధులతో సమావేశమైన సీఎం రేవంత్ రెడ్డి.. పీఆర్సీ నివేదికను త్వరగా అందించాలని అధికారుల కమిటీని ఆదేశించినట్లు ప్రకటించారు. నివేదిక ఆధారంగా ప్రభుత్వం నిర్ణయం తీసుకుంటుందని తెలిపారు. అనంతరం సెప్టెంబర్ 18లోగా నివేదిక సమర్పించాలని ప్రభుత్వం గడువు విధించగా.. నవంబర్ నాటికీ ఉద్యోగుల ప్రధాన డిమాండ్ పరిష్కారం కాలేదనే అసంతృప్తి కొనసాగుతోంది.

ఉద్యోగ సంఘాల డిమాండ్లు ఇవే..

పీఆర్సీ నివేదికను వెంటనే విడుదల చేసి అమలు చేయాలని తెలంగాణ ప్రభుత్వ ఉద్యోగులు, గెజిటెడ్ అధికారులు, ఉపాధ్యాయులు, కార్మికులు, పెన్షనర్ల జాయింట్ యాక్షన్ కమిటీ (TGE-JAC) డిమాండ్ చేస్తోంది. 51 శాతం ఫిట్‌మెంట్‌తో 2023 జులై 1 నుంచి కొత్త వేతనాలను అమలు చేయాలని కోరుతోంది.

దీంతో పాటు పెండింగ్ బిల్లుల చెల్లింపుల కోసం ప్రస్తుతం నెలకు కేటాయిస్తున్న రూ.1,000 కోట్లను రూ.2,000 కోట్లకు పెంచాలని, పాత పెన్షన్ విధానం (OPS) పునరుద్ధరణపై కమిటీ ఏర్పాటు చేయాలని డిమాండ్ చేస్తోంది. ఉద్యోగుల పెండింగ్ బిల్లుల విలువ రూ.10 వేల కోట్లకు పైగా ఉందని జేఏసీ నేతలు చెబుతున్నారు.

నవంబర్ 6న హైదరాబాద్‌లోని టీజీవో భవన్‌లో జరిగిన విస్తృత స్థాయి సమావేశంలో ఉద్యోగుల సమస్యలపై చర్చించారు. దీపావళి తర్వాత ఆందోళన కార్యాచరణ ప్రకటించాలని నిర్ణయించినట్లు సమాచారం.

ఎమ్మెల్సీ ఎన్నికలపై ప్రభావం ఉంటుందా?

ప్రస్తుతం ఈ ఉద్యోగుల అసంతృప్తి కాంగ్రెస్ పార్టీకి రాజకీయంగా కీలకంగా మారుతోంది. మహబూబ్‌నగర్-రంగారెడ్డి-హైదరాబాద్, వరంగల్-ఖమ్మం-నల్గొండ గ్రాడ్యుయేట్ ఎమ్మెల్సీ నియోజకవర్గాల్లో ఉద్యోగులు, ఉపాధ్యాయులు, పెన్షనర్లు ఓటర్లుగా ఉండటం ప్రాధాన్యత సంతరించుకుంది.

ఈ రెండు నియోజకవర్గాల పరిధిలో నాలుగు లక్షలకు పైగా ఉద్యోగులు, పెన్షనర్లు, కాంట్రాక్ట్, ఔట్‌సోర్సింగ్ సిబ్బంది గ్రాడ్యుయేట్లుగా ఉన్నారని జేఏసీ నేతలు పేర్కొంటున్నారు. వీరిలో గణనీయమైన సంఖ్యలో ఇప్పటికే ఓటర్లుగా నమోదు చేసుకునేందుకు దరఖాస్తు చేసుకున్నారని చెబుతున్నారు.

పీఆర్సీ అమలు సహా తమ డిమాండ్లను ప్రభుత్వం పరిష్కరించకపోతే కాంగ్రెస్ అభ్యర్థులకు వ్యతిరేకంగా ఓటు వేయడమే కాకుండా.. వ్యక్తిగత స్థాయిలో ప్రభుత్వానికి వ్యతిరేకంగా ప్రచారం చేస్తామని కొందరు ఉద్యోగులు హెచ్చరిస్తున్నట్లు సమాచారం.

కాంగ్రెస్‌కు పరీక్షగా ఉద్యోగుల అసంతృప్తి!

అధికారంలోకి వచ్చిన తర్వాత ఉద్యోగుల సమస్యలను పరిష్కరిస్తామని కాంగ్రెస్ ప్రభుత్వం హామీ ఇచ్చింది. అయితే పీఆర్సీ, పెండింగ్ డీఏలు, బిల్లుల చెల్లింపులు, పెన్షన్ విధానం వంటి అంశాలు ఇంకా చర్చల్లోనే ఉండటంతో ఉద్యోగ వర్గాల్లో అసంతృప్తి వ్యక్తమవుతోంది.

మరోవైపు రాష్ట్ర ఆర్థిక పరిస్థితులు, పీఆర్సీ నివేదిక అందిన తర్వాత తీసుకోవాల్సిన నిర్ణయాలు ప్రభుత్వానికి కీలకంగా మారాయి. ఉద్యోగ సంఘాలతో చర్చలు జరిపి సమస్యలకు పరిష్కారం చూపుతుందా? లేక ఉద్యోగుల ఆందోళన మరింత తీవ్రమవుతుందా? అన్నది ఆసక్తికరంగా మారింది.

గ్రాడ్యుయేట్ ఎమ్మెల్సీ ఎన్నికల నేపథ్యంలో ఉద్యోగుల డిమాండ్ల పరిష్కారం కాంగ్రెస్ ప్రభుత్వానికి రాజకీయంగానూ ప్రాధాన్యత సంతరించుకుంది. ఉద్యోగుల అసంతృప్తిని ప్రభుత్వం ఎలా చల్లారుస్తుందన్నది రాబోయే రోజుల్లో చూడాలి.

Hyderabad Crime: వనస్థలిపురంలో విషాదం.. ప్రేమ నిరాకరించిందని, యువతి ఇంట్లోనే బ్యాంక్ ఉద్యోగి ఆత్మహత్య!

Satyaprasad Bandaru — Tue, 10 Nov 2026 12:37:27 +0530

Hyderabad Crime: ఇష్టపడిన యువతి ప్రేమను నిరాకరించిందన్న మనస్తాపంతో ఓ యువకుడు బలవన్మరణానికి పాల్పడిన విషాద సంఘటన వనస్థలిపురం పోలీస్ స్టేషన్ పరిధిలో చోటుచేసుకుంది. పోలీసులు తెలిపిన వివరాల ప్రకారం... ఏపీలోని పశ్చిమగోదావరి జిల్లా ఆచంట మండలం శేషమ్మచెరువుకు చెందిన శివకుమార్ (25) ఓ ప్రైవేట్ బ్యాంకులో పనిచేస్తున్నాడు. గత కొన్నేళ్లుగా అతడు తన కుటుంబంతో కలసి హైదరాబాద్‌లోని కొత్తపేటలో ఉంటున్నాడు. ఈ క్రమంలోనే వనస్థలిపురానికి చెందిన ఓ 22 ఏళ్ల సాఫ్ట్‌వేర్ ఉద్యోగినితో శివకుమార్‌కు పరిచయం ఏర్పడి, స్నేహంగా మారింది.

ప్రేమను అంగీకరించలేదని

ఆదివారం రాత్రి మద్యం సేవించిన శివకుమార్, ఆ యువతి ఇంటికి వెళ్లాడు. తన ప్రేమను అంగీకరించాలని ఆమెను కోరగా, అందుకు ఆమె నిరాకరించింది. ఎన్నిసార్లు అడిగినా ఆమె ఒప్పుకోకపోవడంతో శివకుమార్ తీవ్ర మనస్తాపానికి గురయ్యాడు. శివకుమార్ తన ఇంటికి వచ్చిన విషయాన్ని యువతి శివకుమార్ స్నేహితుడికి ఫోన్ చేసి చెప్పింది. అతడిని ఆటో బుక్ చేసి ఇంటికి పంపించివేయాలని సూచించాడు.

Also Read: 9 సార్లు ఛాన్స్ ఇచ్చిన కాంగ్రెస్.. పార్టీ కార్యక్రమాలకు దూరంగా చిన్నారెడ్డి! అసలేం జరుగుతోంది?

యువతి ఇంట్లోనే

స్నేహితుడు చెప్పడంతో.. ఆ యువతి ఆటో బుక్ చేసింది. ఆటో ఇంటి ముందుకు వచ్చే సమయానికి తీవ్ర ఉద్వేగానికి లోనైన శివకుమార్, యువతి ఇంట్లోనే ఫ్యానుకు ఉరివేసుకున్నాడు. భయాందోళనకు గురైన యువతి వెంటనే ఆటో డ్రైవర్, స్థానికుల సాయంతో తలుపులు తెరిచి చూడగా, అప్పటికే శివకుమార్ ప్రాణాలు కోల్పోయాడు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకున్నారు. ఈ ఘటనపై కేసు నమోదు చేసి దర్యాప్తు జరుపుతున్నారు.

Also Read: కేసీఆర్ సైలెన్స్ - కేటీఆర్‌నే ఇక ప్రత్యర్థిగా రేవంత్ పరిగణిస్తున్నారా?

KA Paul: నేను ఆ పని చేస్తే వారం రోజుల్లోగా రేవంత్ రెడ్డి సీఎం పదవి పోతుంది: కేఏ పాల్ సంచలనం

Shankar Dukanam — Tue, 10 Nov 2026 12:25:58 +0530

హైదరాబాద్: తెలంగాణ ముఖ్యమంత్రి రేవంత్ కుటుంబ అవినీతిపై కేసుల మీద కేసులు వేస్తానని, ఇప్పటికే నేను సుప్రీంకోర్టు సహా వివిధ ఏజెన్సీలు, కేంద్ర మంత్రులు సహా పలువురికి లేఖలు రాశానని ప్రజాశాంతి పార్టీ అధ్యక్షుడు కె.ఎ. పాల్ తెలిపారు. ఆ లేఖను తాను పబ్లిష్ చేస్తే వారం రోజుల్లోగా రేవంత్ రెడ్డి సీఎం పదవిని కోల్పోతారని సంచలన వ్యాఖ్యలు చేశారు.

తెలంగాణ సీఎం రేవంత్ రెడ్డి నేతృత్వంలో నవంబర్ 12, 13, 14 తేదీల్లో జరగనున్న సదస్సుపై కేఏ పాల్ ఘాటుగా స్పందించారు. గత సంవత్సరం జరిగిన సమ్మిట్ ద్వారా రాష్ట్రానికి గానీ, ప్రజలకు గానీ ఏ ప్రయోజనం చేకూరలేదని పేర్కొన్నారు. ఈ సదస్సులను నల్లధనాన్ని తెల్లధనంగా మార్చుకోవడానికే ఉపయోగిస్తున్నారని బిఆర్ఎస్, బిజెపి, ఇతర నాయకులు కూడా ఆరోపిస్తున్నారని తెలిపారు. అందువల్ల బిజెపి, బిఆర్ఎస్, ప్రజాశాంతి పార్టీ, సిపిఐ, సిపిఎంలతో పాటు అన్ని రాజకీయ పార్టీల నాయకులు ఈ సమ్మిట్‌ను బాయ్‌కాట్ చేయాలని కేఏ పాల్ పిలుపునిచ్చారు.

కాంట్రాక్టుల రద్దు చేయాలని వార్నింగ్, కాంగ్రెస్ అధిష్టానానికి విజ్ఞప్తి

ఈ సమిట్‌లో ముఖ్యమంత్రి రేవంత్ రెడ్డితో కాంట్రాక్టులు కుదుర్చుకునేవారు అదానీ, అంబానీలు లేదా స్థానిక వ్యాపారవేత్తలు ఎంత పెద్దవారైనా, ఆ కాంట్రాక్టులను భవిష్యత్తులో ఖచ్చితంగా రద్దు చేస్తామని కె.ఎ. పాల్ హెచ్చరించారు. తనకు బిజెపి, బిఆర్ఎస్ లేదా కాంగ్రెస్ పార్టీ శత్రువులు కాదని, రేవంత్ రెడ్డి అవినీతి ఆకాశాన్ని అంటుకుందని విమర్శించారు. నవంబర్ 14 లోగా రేవంత్ రెడ్డి సంపూర్ణంగా మారి రాష్ట్రం కోసం పనిచేయాలని, లేకపోతే రాహుల్ గాంధీ, గాంధీ కుటుంబం, కాంగ్రెస్ నాయకులు ఆయనను ఎట్టి పరిస్థితుల్లోనూ ముఖ్యమంత్రి పదవి నుంచి తొలగించాలని డిమాండ్ చేశారు.

అవినీతి కేసులు, భవిష్యత్ కార్యాచరణ

సీఎం రేవంత్ రెడ్డి, ఆయన సోదరులు, కుటుంబ అవినీతి వ్యవహారాలపై తెలంగాణ హైకోర్టులో కేసు వేయడంతో పాటు సుప్రీంకోర్టు ప్రధాన న్యాయమూర్తి జస్టిస్ సూర్యకాంత్, ప్రధాని నరేంద్ర మోదీ, కేంద్ర హోం మంత్రి అమిత్ షా, సీబీఐ, అలాగే రాహుల్ గాంధీ, సల్మాన్ ఖుర్షీద్, మల్లు రవి, కె.సి. వేణుగోపాల్ వంటి కాంగ్రెస్ నాయకులకు లేఖలు పంపినట్లు తెలిపారు. ఈ వివరాలను బహిర్గతం చేస్తే వారం రోజుల్లో రేవంత్ రెడ్డి సీఎం పదవిలో ఉండరని ఆయన వ్యాఖ్యానించారు. ధరల పెరుగుదలకు కారణమవుతున్న ఇరాన్ యుద్ధాన్ని ఆపడానికి తానే స్వయంగా కృషి చేస్తున్నానని, త్వరలోనే భారత్‌కు తిరిగి వచ్చి రాష్ట్రం, ప్రజల సంక్షేమం కోసం పోరాడుతానని కె.ఎ. పాల్ స్పష్టం చేశారు.

Congress Politics: 9 సార్లు ఛాన్స్ ఇచ్చిన కాంగ్రెస్.. పార్టీ కార్యక్రమాలకు దూరంగా చిన్నారెడ్డి! అసలేం జరుగుతోంది?

Hema Nidadhana — Tue, 10 Nov 2026 09:08:21 +0530

Chinna Reddy Wanaparthy Politics | తెలంగాణ కాంగ్రెస్‌లో మరో సీనియర్ నేత వ్యవహారం చర్చనీయాంశంగా మారింది. సుదీర్ఘ రాజకీయ అనుభవం ఉన్న మాజీ మంత్రి, సీనియర్ నాయకుడు డాక్టర్ జీ. చిన్నారెడ్డి ప్రస్తుతం పార్టీ కార్యక్రమాలకు దూరంగా ఉండటం రాజకీయ వర్గాల్లో ఆసక్తిని రేకెత్తిస్తోంది. గతంలో కాంగ్రెస్ పార్టీలో కీలక పదవులు నిర్వహించిన ఆయన.. ఇటీవల చోటుచేసుకున్న పరిణామాల తర్వాత మౌనం పాటిస్తుండటంతో అసలు ఏం జరుగుతోందనే చర్చ మొదలైంది. మాజీ మంత్రి జీవన్‌రెడ్డి తరహాలో చిన్నారెడ్డి కూడా పార్టీకి దూరమయ్యే ఆలోచనలో ఉన్నారా? అనే ప్రశ్నలు వినిపిస్తున్నాయి.

9 సార్లు అవకాశం.. కీలక పదవుల్లో బాధ్యతలు!

డాక్టర్ జీ. చిన్నారెడ్డికి కాంగ్రెస్ పార్టీలో సుదీర్ఘ రాజకీయ ప్రస్థానం ఉంది. 1985 నుంచి ఎన్నికల రాజకీయాల్లో కొనసాగుతున్న ఆయనకు పార్టీ పలుమార్లు అవకాశాలు కల్పించింది. మొత్తం ఎనిమిదిసార్లు ఎమ్మెల్యేగా, ఒకసారి గ్రాడ్యుయేట్ ఎమ్మెల్సీగా పోటీ చేసే అవకాశం ఇచ్చింది. దివంగత ముఖ్యమంత్రి వైఎస్ రాజశేఖర్ రెడ్డి హయాంలో మంత్రిగా కూడా పనిచేశారు. ఉమ్మడి రాష్ట్రంలో యువజన కాంగ్రెస్ ప్రధాన కార్యదర్శిగా, తెలంగాణ ఏర్పడిన తర్వాత పీసీసీ క్రమశిక్షణ కమిటీ చైర్మన్‌గా బాధ్యతలు నిర్వహించారు. రాష్ట్ర ప్రణాళిక సంఘం ఉపాధ్యక్షుడిగానూ పనిచేశారు.

వనపర్తి వివాదంతో మారిన సమీకరణాలు!

పార్టీ అధిష్ఠానానికి సన్నిహితుడిగా గుర్తింపు పొందిన చిన్నారెడ్డి.. ఇటీవల వనపర్తి రాజకీయ పరిణామాల నేపథ్యంలో వార్తల్లో నిలిచారు. ప్రస్తుత ఎమ్మెల్యే తూడి మేఘారెడ్డి, పార్టీ వ్యవహారాలపై ఆయన చేసిన వ్యాఖ్యలు కాంగ్రెస్‌లో చర్చకు దారితీశాయి. ఈ పరిణామాల నేపథ్యంలో ఆయన పార్టీ క్రమశిక్షణ కమిటీ ముందు వివరణ ఇచ్చుకోవాల్సి వచ్చింది. అనంతరం రాష్ట్ర ప్రణాళిక సంఘం ఉపాధ్యక్ష పదవి నుంచి ప్రభుత్వం తొలగించింది. దీంతో చిన్నారెడ్డి రాజకీయ ప్రస్థానంలో కొత్త పరిణామాలు చోటుచేసుకున్నాయి.

పార్టీ కార్యక్రమాలకు దూరం.. జీవన్‌రెడ్డి బాటలోనేనా?

ప్రణాళిక సంఘం ఉపాధ్యక్ష పదవి నుంచి తొలగించిన తర్వాత చిన్నారెడ్డి రాజకీయంగా మౌనం పాటిస్తున్నారనే చర్చ పార్టీ వర్గాల్లో జరుగుతోంది. హైదరాబాద్‌లోనూ, ఢిల్లీలోనూ పార్టీ నిర్వహిస్తున్న పలు కార్యక్రమాల్లో ఆయన కనిపించడం లేదని నేతలు చర్చించుకుంటున్నారు. ముఖ్యంగా పార్టీ కార్యక్రమాలకు దూరంగా ఉండటం ఇప్పుడు రాజకీయ ప్రాధాన్యత సంతరించుకుంది.

ఇదే సమయంలో కాంగ్రెస్ సీనియర్ నేత, మాజీ మంత్రి జీవన్‌రెడ్డి పార్టీతో విభేదాల నేపథ్యంలో తీసుకున్న రాజకీయ నిర్ణయాలు కూడా చర్చకు వస్తున్నాయి. చిన్నారెడ్డి కూడా అదే దారిలో పయనిస్తారా? పార్టీపై అసంతృప్తితోనే మౌనం వహిస్తున్నారా? లేక ప్రస్తుత పరిణామాలు సద్దుమణిగే వరకు వేచి చూస్తున్నారా? అనే ప్రశ్నలు రాజకీయ వర్గాల్లో వినిపిస్తున్నాయి.

చిన్నారెడ్డి తదుపరి అడుగు ఏమిటి?

దశాబ్దాల రాజకీయ అనుభవం ఉన్న చిన్నారెడ్డి భవిష్యత్ కార్యాచరణపై ఇప్పుడు ఆసక్తి నెలకొంది. పార్టీ నాయకత్వంతో మళ్లీ సఖ్యత కుదుర్చుకుంటారా? తిరిగి పార్టీ కార్యక్రమాల్లో చురుగ్గా పాల్గొంటారా? లేక తన రాజకీయ భవిష్యత్తుపై మరో నిర్ణయం తీసుకుంటారా? అన్నది చూడాలి. ప్రస్తుతానికి ఆయన మౌనం వెనుక ఉన్న కారణాలపై స్పష్టత లేదు. రానున్న రోజుల్లో చిన్నారెడ్డి వేసే రాజకీయ అడుగులే ఈ ప్రశ్నలకు సమాధానం చెప్పనున్నాయి.

CM Revanth Reddy: 2028 డిసెంబరు నాటికి కొడంగల్‌కు కృష్ణాజలాలు: లగచర్ల సభలో సీఎం రేవంత్ రెడ్డి

Shankar Dukanam — Tue, 10 Nov 2026 08:16:20 +0530

లగచర్ల: వికారాబాద్ జిల్లా లగచర్ల గ్రామంలో నిర్వహించిన బహిరంగ సభలో తెలంగాణ ముఖ్యమంత్రి రేవంత్ రెడ్డి ప్రతిపక్ష బీఆర్‌ఎస్ పార్టీపై తీవ్ర స్థాయిలో విరుచుకుపడ్డారు. బూర్గుల రామకృష్ణారావు కాలం నుంచి ఎంతో మంది నాయకులు పాలమూరు జిల్లా నుంచి ప్రాతినిధ్యం వహించినా, ఇప్పటికీ వలసలు ఆగలేదని, నీటి ప్రాజెక్టులు పూర్తి కాలేదని ఆవేదన వ్యక్తం చేశారు. 2028 డిసెంబరు నాటికి కొడంగల్‌కు కృష్ణాజలాలు తీసుకొస్తా.. పోలేపల్లి ఎల్లమ్మ మీద ఆన అన్నారు రేవంత్ రెడ్డి.

తెలంగాణ వస్తే కష్టాలు తీరుతాయని ఆనాడు కేసీఆర్‌ను గెలిపిస్తే, సీఎంగా బాధ్యతలు చేపట్టాక గజ్వేల్‌కే ప్రాధాన్యం ఇచ్చారని విమర్శించారు. పదేళ్ల పాలనలో కేసీఆర్ రూ. 8.11 లక్షల కోట్ల అప్పులు చేసి ఫామ్‌హౌస్‌కే పరిమితమయ్యారని, ఆయన చేసిన అప్పులకు రాష్ట్ర ప్రభుత్వం ఏటా రూ. 80 వేల కోట్లను చెల్లిస్తోందని, గత 34 నెలల్లో రూ. 2 లక్షల కోట్లకు పైగా అసలు, వడ్డీలు చెల్లించాల్సి వచ్చిందని స్పష్టం చేశారు.

పరిపాలనలో తమ ప్రభుత్వం విప్లవాత్మక మార్పులు తీసుకొచ్చిందని, నిరుపేద ఉద్యోగుల కష్టాలను గుర్తించి 11 లక్షల మంది ప్రభుత్వ ఉద్యోగులకు ప్రతి నెల 1వ తేదీనే జీతాలు అందిస్తున్నామని రేవంత్ రెడ్డి తెలిపారు. మక్తల్-నారాయణపేట-కొడంగల్ ఎత్తిపోతల పథకం ద్వారా సాగునీరు అందించే పనులు తాము చేపడుతుంటే, బీఆర్‌ఎస్ నేతలు అడ్డుకోవాలని చూడడంపై మండిపడ్డారు. బీఆర్‌ఎస్ కార్యనిర్వాహక అధ్యక్షుడు కేటీఆర్‌ను ఉద్దేశించి మాట్లాడుతూ, గడ్డం ఎంత పెంచినా రేవంత్ రెడ్డి కాలేరని, ప్రజల కోసం నిలబడే గుండె ధైర్యం, తెగువ ఉండాలని వ్యాఖ్యానించారు. పోలేపల్లి ఎల్లమ్మ తల్లి సాక్షిగా చెబుతున్నానని, ఎవరు అడ్డం వచ్చినా తొక్కుకుంటూ ఈ ఏడాది డిసెంబర్ నాటికి కృష్ణా జలాలను కొడంగల్ బీడు భూములకు తరలించి పచ్చని పంటలు పండిస్తామని స్పష్టం చేశారు.

ఒకప్పుడు ఉన్నత చదువుల కోసం పక్క జిల్లాలకు వెళ్లాల్సిన కొడంగల్‌ను నేడు 'ఎడ్యుకేషన్ హబ్'గా మారుస్తున్నామని సీఎం తెలిపారు. దీనిలో భాగంగానే కొడంగల్‌లో రూ. 9,000 కోట్లతో అభివృద్ధి పనులను ప్రారంభించామని, రాబోయే రోజుల్లో వేల కోట్ల పెట్టుబడులు రప్పించి ఈ ప్రాంతాన్ని మరింత ముందుకు తీసుకెళ్తామన్నారు. కొడంగల్ ప్రజల ఆశీస్సులు ఉంటే ఢిల్లీలో మోదీనైనా, ఇక్కడ కేడీనైనా ఎదిరిస్తానని ధీమా వ్యక్తం చేశారు. సంక్రాంతి తర్వాత 'ప్రజాబలం' పేరుతో ప్రజల్లోకి వచ్చి ఎల్నినో వంటి సవాళ్లను కలిసికట్టుగా ఎదుర్కొంటామన్నారు. అలాగే విలేకరులు ఎవరూ అధైర్యపడాల్సిన అవసరం లేదని, జర్నలిస్టుల సమస్యలన్నింటినీ పరిష్కరించే బాధ్యత ప్రభుత్వం తీసుకుంటుందని సీఎం హామీ ఇచ్చారు.

రూ.9,053 కోట్లతో 13 అభివృద్ధి పనులకు శంకుస్థాపనలు

తెలంగాణ సీఎం రేవంత్ రెడ్డి పర్యటన సందర్భంగా వివిధ ప్రాంతాలలో రూ.9,053.48 కోట్ల భారీ అంచనా వ్యయంతో చేపట్టనున్న మొత్తం 13 కీలక అభివృద్ధి పనులకు శంకుస్థాపనలు, శిలాఫలకాల ఆవిష్కరణలు జరిగాయి. ఇందులో రవాణా రంగం విస్తరణకు అత్యధిక ప్రాధాన్యత ఇస్తూ, కొత్తవాల్‌గూడ నుంచి నాచారం వరకు రూ.5,060 కోట్లతో రేడియల్ రోడ్డు–2 పనులను ప్రారంభించారు. అంతేకాకుండా, ప్రత్యేక అభివృద్ధి నిధుల కింద రూ.1,410 కోట్లతో 223 కొత్త, అసంపూర్తిగా ఉన్న బీటీ రహదారుల పనులకు, అలాగే రూ.2,100 కోట్ల అంచనా వ్యయంతో MNKLIS రెండో దశ పనులకు శ్రీకారం చుట్టారు.

విద్యా, రవాణా, మౌలిక వసతుల కల్పనలో భాగంగా రూ.118.80 కోట్లతో 10 తెలంగాణ పబ్లిక్ స్కూళ్లు, రూ.123 కోట్లతో కొడంగల్‌లో వ్యవసాయ కళాశాల నిర్మాణ పనులకు శంకుస్థాపన చేశారు. ప్రజల ప్రయాణ సౌకర్యార్థం రూ.41.83 కోట్లతో కొడంగల్, కోస్గి, మద్దూరులలో ఆధునిక బస్ స్టాండ్ల నిర్మాణం చేపడుతున్నారు. యువతకు ఉపాధి నైపుణ్యాలు పెంచేందుకు రూ.20 కోట్లతో మద్దూరులో నేషనల్ అకాడమీ ఆఫ్ కన్‌స్ట్రక్షన్ (NAC) స్కిల్ డెవలప్‌మెంట్ సెంటర్, పాలనాసౌలభ్యం కోసం రూ.20 కోట్లతో సమీకృత డివిజనల్ కార్యాలయ సముదాయం, ఇతర బీటీ రహదారుల కోసం రూ.59.30 కోట్ల పనులను ప్రారంభించారు.

ధార్మిక, పర్యాటక, పారిశ్రామిక రంగాలు సైతం ఈ పనుల ద్వారా మరింత వేగం పుంజుకోనున్నాయి. తిమ్మారెడ్డిపల్లిలో గురులోక మసంద్ ప్రభు మందిరం అభివృద్ధికి రూ.4.45 కోట్లు, కొడంగల్‌లోని నిరంజన్ మఠం అభివృద్ధికి రూ.5.10 కోట్లతో పనులు చేపట్టారు. పరిశ్రమలు, పర్యాటకాన్ని ప్రోత్సహిస్తూ హకీంపేట ఇండస్ట్రియల్ కారిడార్‌లో రూ.10 కోట్లతో పర్యాటక హోటల్ నిర్మాణం, రూ.81 కోట్లతో ఎకోపామ్‌ పామాయిల్ ఫ్యాక్టరీ ఏర్పాటుకు సంబంధించిన పనులకు సీఎం రేవంత్ రెడ్డి శిలాఫలకాలు ఆవిష్కరించారు.