hyderabad

Indian Railways Special Trains: పండుగల సీజన్‌లో ప్రయాణికులకు గుడ్‌న్యూస్.. విశాఖపట్నం - సికింద్రాబాద్ మధ్య ప్రత్యేక రైళ్లు

Shankar Dukanam — Wed, 21 Oct 2026 15:03:08 +0530

Trains Between Vizag and Secunderabad | హైదరాబాద్ / విశాఖపట్నం: దసరా పండుగ సీజన్‌లో ప్రయాణించే ప్రయాణికులకు ఇబ్బందిలేని ప్రయాణాన్ని అందించడానికి, అదనపు రద్దీని నివారించడానికి, భారత రైల్వే ప్రకారం డిమాండ్‌పై ప్రత్యేక రైళ్లను నడపాలని నిర్ణయించింది. విశాఖపట్నం, సికింద్రాబాద్ మధ్య ప్రయాణికుల కోసం ప్రత్యేక రైలు సర్వీసులు నడపనున్నారు. అందుకు సంబంధించిన వివరాలు ఇలా ఉన్నాయి.

విశాఖపట్నం - సికింద్రాబాద్ స్పెషల్ ఎక్స్‌ప్రెస్ రైలు నంబర్ 08517 గురువారం, ఆదివారం తేదీలు 22.10.2026, అక్టోబర్ 25.10.2026 న విశాఖపట్నం నుంచి 15:50 గంటలకు బయలుదేరుతుంది. ఈ రైలు దువ్వాడకు 16:18 గంటలకు చేరుకుని 16:20 గంటలకు బయలుదేరి, మరుసటి రోజు ఉదయం 8 గంటలకు సికింద్రాబాద్ చేరుకుంటుంది. అదే రైలు శుక్రవారం, సోమవారం (02 సర్వీసులు) సేవలు అందించనున్నాయి.

తిరుగు ప్రయాణంలో రైలు నంబర్ 08518 సికింద్రాబాద్ - విశాఖపట్నం స్పెషల్ ఎక్స్‌ప్రెస్ శుక్రవారం 23.10.2026, సోమవారం 26.10.2026 న సికింద్రాబాద్ నుండి రాత్రి 8 గంటలకు బయలుదేరుతుంది. ఈ రైలు మరుసటి రోజు ఉదయం 11:18 గంటలకు దువ్వాడ చేరుకుని 11:20 గంటలకు బయలుదేరి, 12:05 గంటలకు విశాఖకు చేరుకుంటుంది. శనివారం, మంగళవారం (02 సర్వీసులు) ఉంటాయి.

మీ రైలు ప్రయాణ అవసరాలన్నింటికీ ఒకే యాప్ – RailOne! టికెట్ బుకింగ్ నుంచి లైవ్ ట్రాకింగ్ వరకు అంతా మీ చేతిలోనే. ఇప్పుడే డౌన్‌లోడ్ చేసుకోండి #RailOne #IndianRailways #SouthCentralRailway #TrainJourney @RailMinIndia https://t.co/QCNmqCPdLH
— South Central Railway (@SCRailwayIndia) October 21, 2026

స్టాప్స్: విశాఖపట్నం నుంచి సికింద్రాబాద్ మధ్య ఇరువైపులా మార్గాల్లో దువ్వాడ, అనకాపల్లి, సామర్లకోట, రాజమండ్రి, భీమవరం టౌన్, గుడివాడ జంక్షన్, విజయవాడ, కృష్ణాకెనాల్, గుంటూరు, మిర్యాలగూడ, నల్గొండ, చర్లపల్లి స్టేషన్లలో రైలు ఆగుతుందని అధికారులు తెలిపారు.

కోచ్ వివరాలు: ఈ రెండు రైళ్లలో మొత్తం 19 కోచ్‌లు ఉంటాయి. ఇందులో 2వ ఎసి - 02, 3వ ఎసి - 04, స్లీపర్ - 07, జనరల్ సెకండ్ క్లాస్ - 04, సెకండ్ క్లాస్ కమ్ లగేజ్, దివ్యాంగుల కోచ్ - 01, జనరేటర్ / బ్రేక్ వ్యాన్ - 01 కోచ్ ఉంటాయి.

Also Read: Jio Platforms Ipo: కేవలం 2 గంటల్లోనే పూర్తి సబ్‌స్క్రైబ్, మెగా ఐపీఓల్లో సరికొత్త రికార్డు

Graduate MLC Elections: గ్రాడ్యుయేట్ ఎమ్మెల్సీ ఎన్నికలు.. మిత్రపక్షాల అసంతృప్తిని చల్లార్చే పనిలో పీసీసీ చీఫ్

ABP Desam — Wed, 21 Oct 2026 13:29:41 +0530

గ్రాడ్యుయేట్ ఎమ్మెల్సీ ఎన్నికల్లో గెలుపే లక్ష్యంగా ముందుకు సాగుతున్న కాంగ్రెస్ పార్టీ.. మిత్రపక్షాల మద్దతు కూడగట్టే ప్రయత్నాలు ముమ్మరం చేసింది. అభ్యర్థుల ప్రకటన సమయంలో తమను సంప్రదించలేదంటూ అసంతృప్తిగా ఉన్న పార్టీలను బుజ్జగించే పనిలో పీసీసీ అధ్యక్షుడు మహేష్ కుమార్ గౌడ్ నిమగ్నమయ్యారు. భవిష్యత్తులో ఎన్నికల సమయంలో ముందస్తు చర్చలు జరుపుతామని, మిత్రపక్షాల డిమాండ్లపై కూడా సానుకూలంగా చర్చిస్తామని చెబుతూ మద్దతు కోరుతున్నట్లు సమాచారం.

ముందుగానే అభ్యర్థుల ప్రకటన

గ్రాడ్యుయేట్ ఎమ్మెల్సీ ఎన్నికలను కాంగ్రెస్ పార్టీ ప్రతిష్ఠాత్మకంగా తీసుకుంది. గెలుపే లక్ష్యంగా ముందస్తు వ్యూహాలతో అడుగులు వేస్తోంది. ఇందులో భాగంగా ఉమ్మడి ఖమ్మం–వరంగల్–నల్గొండ గ్రాడ్యుయేట్ ఎమ్మెల్సీ స్థానానికి రాంరెడ్డి సర్వోత్తమ్ రెడ్డిని, ఉమ్మడి హైదరాబాద్–రంగారెడ్డి–మహబూబ్‌నగర్ స్థానానికి సామ రామ్మోహన్ రెడ్డిని అభ్యర్థులుగా ప్రకటించింది. అభ్యర్థులు ఇప్పటికే క్షేత్రస్థాయిలో ప్రచారానికి అవసరమైన గ్రౌండ్‌వర్క్ ప్రారంభించారు. ఉమ్మడి జిల్లాల్లో కీలక నేతలను కలుస్తూ, సన్నాహక సమావేశాల్లో పాల్గొంటున్నారు.

మిత్రపక్షాల్లో అసంతృప్తి

అయితే అభ్యర్థుల ప్రకటన కాంగ్రెస్‌కు కొత్త సవాలుగా మారింది. మిత్రపక్షాలైన తెలంగాణ జన సమితి, వామపక్ష పార్టీలను సంప్రదించకుండానే అభ్యర్థులను ప్రకటించారనే అసంతృప్తి వ్యక్తమైంది. ఉమ్మడి ఖమ్మం–వరంగల్–నల్గొండ గ్రాడ్యుయేట్ ఎమ్మెల్సీ స్థానంపై తెలంగాణ జన సమితి ఆశలు పెట్టుకోగా.. ఖమ్మం, నల్గొండ జిల్లాల్లో వామపక్ష పార్టీలకు ఉన్న రాజకీయ ప్రాధాన్యం కూడా కీలకంగా మారింది. తమతో చర్చించకుండా నిర్ణయం తీసుకోవడంపై మిత్రపక్షాలు అసంతృప్తిగా ఉన్నట్లు రాజకీయ వర్గాల్లో చర్చ జరుగుతోంది. మరోవైపు, సీపీఎం, సీపీఐ కలిసి ఉమ్మడి అభ్యర్థిని బరిలోకి దించే ఆలోచన చేసినట్లు కూడా ప్రచారం జరిగింది.

Also Read: Congress Politics: గ్రాడ్యుయేట్ ఎమ్మెల్సీ ఎన్నికలపై కాంగ్రెస్ స్పెషల్ ఫోకస్.. 77 మంది ఇంఛార్జిల నియామకం!

మిత్రపక్షాల మద్దతు కోసం పీసీసీ చీఫ్ ప్రయత్నాలు

గ్రాడ్యుయేట్ ఎమ్మెల్సీ ఎన్నికల్లో మిత్రపక్షాల మద్దతు కీలకమని భావిస్తున్న కాంగ్రెస్ నాయకత్వం.. అసంతృప్తి మరింత పెరగకుండా దిద్దుబాటు చర్యలకు దిగింది. ఇందులో భాగంగా పీసీసీ అధ్యక్షుడు మహేష్ కుమార్ గౌడ్ స్వయంగా తెలంగాణ జన సమితి, సీపీఎం నేతలను కలిసి కాంగ్రెస్ అభ్యర్థులకు మద్దతు ఇవ్వాలని కోరినట్లు సమాచారం. రాజకీయంగా మిత్రపక్షాలు ప్రస్తావించిన డిమాండ్లపై కూడా చర్చించి సానుకూల నిర్ణయం తీసుకునే అంశాన్ని పరిశీలిస్తున్నట్లు తెలుస్తోంది. ఇదే క్రమంలో సీపీఐతోనూ చర్చలు జరిపి మిత్రపక్షాల మద్దతును కూడగట్టేందుకు కాంగ్రెస్ సిద్ధమైంది.

సమన్వయమే కీలకం!

గ్రాడ్యుయేట్ ఎమ్మెల్సీ ఎన్నికల్లో గెలుపు కోసం కాంగ్రెస్ పార్టీ అభ్యర్థుల ప్రకటనతో పాటు మిత్రపక్షాల మద్దతుపైనా దృష్టి సారించింది. అయితే అభ్యర్థుల ఎంపికతో ఏర్పడిన అసంతృప్తిని కాంగ్రెస్ నాయకత్వం ఎంతవరకు పరిష్కరిస్తుంది? మిత్రపక్షాలు కాంగ్రెస్ అభ్యర్థులకు మద్దతు ఇస్తాయా? ఎన్నికల నాటికి పార్టీల మధ్య సమన్వయం ఏ స్థాయికి చేరుతుంది? అన్నది ఆసక్తికరంగా మారింది. మిత్రపక్షాల మద్దతు, ఓట్ల సమీకరణ ఈ ఎన్నికల్లో కీలకంగా మారనున్నాయి.

కరెస్పాండెంట్ - హేమ

CM Revanth Reddy: 5 వేల పోలీస్ పోస్టులు భర్తీ, హోంగార్డులకు ఎక్స్‌గ్రేషియా రెట్టింపు: సీఎం రేవంత్ రెడ్డి

Shankar Dukanam — Wed, 21 Oct 2026 11:34:52 +0530

హైదరాబాద్: పోలీస్ శాఖలో కొత్తగా 5 వేల పోస్టుల భర్తీకి చర్యలు తీసుకున్నామని, హోంగార్డులకు ఎక్స్‌గ్రేషియా పెంచుతున్నట్లు తెలంగాణ సీఎం రేవంత్ రెడ్డి ప్రకటించారు. తెలంగాణ రాజధాని హైదరాబాద్‌లోని గోషామహల్ స్టేడియంలో నిర్వహించిన 'పోలీస్ అమరవీరుల సంస్మరణ దినం' కార్యక్రమంలోసీఎం రేవంత్ రెడ్డి పాల్గొని ప్రసంగించారు. ఈ రోజు మనందరికీ ఎంతో భావోద్వేగమైన రోజు, సమాజ రక్షణ కోసం ప్రాణ త్యాగం చేసిన దేవ్ సింగ్, ప్రమోద్ కుమార్, గాజుల సౌమ్య వంటి పోలీసు అమరులను స్మరించుకుంటూ నివాళులు అర్పించారు. శాంతిభద్రతల పరిరక్షణలో వారి త్యాగాలను సమాజం ఎప్పటికీ మరచిపోదని, అమరుల కుటుంబాలు ఒంటరి కావు అని, ప్రభుత్వం వారికి సంపూర్ణ అండగా ఉంటుందన్నారు. రాష్ట్ర అభివృద్ధికి శాంతిభద్రతల పరిరక్షణ ఎంతో ముఖ్యం కాబట్టి, తమ ప్రభుత్వం పోలీస్ శాఖకు అత్యున్నత ప్రాధాన్యత ఇస్తుందని స్పష్టం చేశారు.

కొత్తగా పోస్టుల భర్తీ, అమరులకు పరిహారం పెంపు

పోలీస్ శాఖలో కొత్తగా మరో 5 వేల ఉద్యోగాల భర్తీకి చర్యలు తీసుకున్నామని, 2028 నాటికి అన్ని ఖాళీలను భర్తీ చేస్తామని సీఎం రేవంత్ రెడ్డి ప్రకటించారు. గతంలో ఎన్నడూ లేని విధంగా 112 మంది డీఎస్పీలను నియమించామని, ట్రాన్స్‌జెండర్లను ట్రాఫిక్ అసిస్టెంట్లుగా నియమించి వారి ఆత్మగౌరవాన్ని పెంచామన్నారు. విధి నిర్వహణలో ప్రాణాలు అర్పించిన పోలీసు కుటుంబాలకు ఇచ్చే ఎక్స్‌గ్రేషియాను భారీగా పెంచినట్లు వివరించారు. కానిస్టేబుళ్ల ఎక్స్‌గ్రేషియాను రూ.40 లక్షల నుండి రూ.1 కోటికి, హెడ్ కానిస్టేబుళ్లు/ఏఎస్‌ఐలకు రూ.45 లక్షల నుండి రూ.1 కోటికి, ఎస్‌ఐలకు రూ.45 లక్షలు, ఇన్‌స్పెక్టర్లకు రూ.50 లక్షల నుండి రూ.1.25 కోట్లకు, డీఎస్పీ/అడిషనల్ ఎస్పీలకు రూ.50 లక్షల నుండి రూ.1.50 కోట్లకు, ఎస్పీ/ఐపీఎస్ అధికారులకు రూ.1 కోటి నుండి రూ.2 కోట్లకు పెంచామని తెలిపారు.

విధి నిర్వహణలో ప్రాణాలు కోల్పోయే హోంగార్డుల కుటుంబాలకు ప్రస్తుతం అందిస్తున్న రూ.5 లక్షల ఎక్స్‌గ్రేషియాను రూ.10 లక్షలకు పెంచాలని డీజీపీని సీఎం రేవంత్ రెడ్డి ఆదేశించారు. ఇది కేవలం ఆర్థిక సాయం మాత్రమే కాదని, అమరవీరుల కుటుంబాలకు ప్రభుత్వం ఇచ్చే గౌరవమని వ్యాఖ్యానించారు. అలాగే, హోంగార్డు నుంచి డీజీపీ స్థాయి అధికారుల పిల్లల చదువు కోసం 'యంగ్ ఇండియా పోలీస్ స్కూల్'ను ప్రారంభించామని తెలిపారు.

FCRI Admissions 2026: ములుగు ఎఫ్‌సీఆర్ఐ ఎంఎస్సీ, పీహెచ్‌డీ ఫారెస్ట్రీ కోర్సుల్లో ప్రవేశాలు.. అర్హతలు, సీట్లు వివరాలు ఇలా!

Satyaprasad Bandaru — Wed, 21 Oct 2026 10:52:11 +0530

FCRI Admissions 2026: సిద్దిపేట జిల్లా ములుగులోని ఫారెస్ట్ కాలేజీ అండ్ రీసెర్చ్ ఇన్‌స్టిట్యూట్‌లో 2026–2027 విద్యా సంవత్సరానికి ఎంఎస్సీ ఫారెస్ట్రీ, పీహెచ్‌డీ ఫారెస్ట్రీ కోర్సులలో ప్రవేశాలకు నోటిఫికేషన్ విడుదలైంది.

1. ఎంఎస్సీ ఫారెస్ట్రీ (2 ఇయర్స్ ప్రోగ్రామ్ - 4 సెమిస్టర్లు)

మొత్తం సీట్లు: 16

అర్హతలు:

B.Sc. (Hons.) ఫారెస్ట్రీ డిగ్రీలో కనీసం 7.0 OGPA ఉండాలి (SC/ST/PH అభ్యర్థులకు 6.5 OGPA ఉంటే చాలు).
ICAR-AIEEA-PG 2026 లో అర్హత సాధించి ఉండాలి.

ఎంపిక విధానం:

ఎంట్రన్స్ ఎగ్జామ్‌లో 50% స్కోరు + 50% డిగ్రీ అకడమిక్ రికార్డు ఆధారంగా సెలక్షన్ ఉంటుంది.

సీట్ల కేటాయింపు:

ఫారెస్ట్ బయాలజీ అండ్ ట్రీ ఇంప్రూవ్‌మెంట్: 4 సీట్లు
ఫారెస్ట్ ప్రొడక్ట్స్ అండ్ యుటిలైజేషన్: 2 సీట్లు
ఫారెస్ట్ రీసోర్స్ మేనేజ్‌మెంట్: 7 సీట్లు
సిల్వికల్చర్ అండ్ అగ్రోఫారెస్ట్రీ: 3 సీట్లు

2. Ph.D. ఫారెస్ట్రీ (3 సంవత్సరాల ప్రోగ్రామ్ - 6 సెమిస్టర్లు)

మొత్తం సీట్లు: 10 (7 రెగ్యులర్ + 3 ఇన్-సర్వీస్)

అర్హతలు (రెగ్యులర్ అభ్యర్థులకు):

ICAR/UGC గుర్తింపు పొందిన యూనివర్సిటీ నుండి ఫారెస్ట్రీ లేదా తత్సమాన మాస్టర్స్ డిగ్రీలో కనీసం 7.0 OGPA ఉండాలి (SC/ST/PH అభ్యర్థులకు 6.0 OGPA చాలు).
ICAR-AICE-JRF/SRF ఫారెస్ట్రీ 2026 పరీక్షలకు హాజరై ఉండాలి.
UGC-JRF / CSIR-JRF / DBT-JRF / DST INSPIRE-JRF / GATE అర్హత ఉన్న వారికి ప్రాధాన్యత ఇస్తారు.

ఎంపిక విధానం:

ఎంట్రన్స్ ఎగ్జామ్‌లో 60% స్కోరు + 40% మాస్టర్స్ డిగ్రీ స్కోరు ఆధారంగా సెలక్షన్ ఉంటుంది.

విభాగాల వారీగా సీట్ల కేటాయింపు:

సిల్వికల్చర్ అండ్ అగ్రోఫారెస్ట్రీ: 2 సీట్లు
ఫారెస్ట్ బయాలజీ అండ్ ట్రీ ఇంప్రూవ్‌మెంట్: 2 సీట్లు
ఫారెస్ట్ ప్రొడక్ట్స్ అండ్ యుటిలైజేషన్: 1 సీటు
ఫారెస్ట్ రీసోర్స్ మేనేజ్‌మెంట్: 2 సీట్లు
ఇన్-సర్వీస్ కేటగిరీ: 3 సీట్లు

రిజర్వేషన్లు: 85% సీట్లు స్థానికులకు, 15% సీట్లు అన్‌రిజర్వ్‌డ్‌కు కేటాయిస్తారు.

ముఖ్యమైన తేదీలు, అప్లికేషన్ ఫీజు

ఆన్‌లైన్ దరఖాస్తులు ప్రారంభం: అక్టోబర్ 20 నుంచి
లేటు ఫీజు లేకుండా చివరి తేదీ: నవంబర్ 4
ఆలస్య రుసుముతో (రూ.500) చివరి తేదీ: నవంబర్ 10 (సాయంత్రం 5:00 గంటల వరకు)
అప్లికేషన్ ఫీజు :SC/ST/PH అభ్యర్థులకు: రూ.1,000
ఇతరులకు: రూ.2,000
Also Read: పైలట్ కావాలంటే 10 తర్వాత ఏం చదవాలి? కోర్సు, ట్రైనింగ్, జీతం పూర్తి వివరాలు ఇవే

దరఖాస్తు చేయడం ఎలా?

అధికారిక వెబ్‌సైట్ www.fcrihyd.in ను విజిట్ చేయండి. అడ్మిషన్ నోటిఫికేషన్, అర్హతలు, సీట్ల వివరాలు, ఫీజుల సమాచారాన్ని పూర్తిగా చదవండి. అర్హతను సరిచూసుకుని, అవసరమైన పత్రాలతో ఆన్‌లైన్ లో సబ్మిట్ చేయండి.

Also Read: సీబీఎస్ఈ 10వ తరగతి విద్యార్థులకు బిగ్ రిలీఫ్.. ఉత్తీర్ణత రూల్స్‌లో మార్పుల్లేవ్!

Graduate MLC Election: తొలిసారి ఎన్నికల బరిలోకి కవిత పార్టీ.. తొలి ఎమ్మెల్సీ అభ్యర్థి పేరు ప్రకటన

Shankar Dukanam — Tue, 20 Oct 2026 14:49:22 +0530

Telangana Rakshana Sena MLC Candidate | హైదరాబాద్: తెలంగాణ రక్షణ సేన పార్టీ రాజకీయాల్లో కీలక పరిణామం చోటుచేసుకుంది. కొత్తగా ఏర్పాటైన టీఆర్ఎస్ (Telangana Rakshana Sena) పార్టీ తొలిసారి ప్రత్యక్ష ఎన్నికల బరిలోకి దిగుతుంది. ఈ క్రమంలో వరంగల్- ఖమ్మం- నల్గొండ పట్టభద్రుల (గ్రాడ్యుయేట్) ఎమ్మెల్సీ స్థానానికి తమ అభ్యర్థిని తెలంగాణ రక్షణ సేన ప్రకటించింది. తెలంగాణ ఉద్యమంలో చురుగ్గా పాల్గొన్న డాక్టర్ నలమాస శ్రీకాంత్‌గౌడ్‌ను ఈ ఎన్నికల బరిలో తమ అభ్యర్థిగా ఎంపిక చేసినట్లు పార్టీ అధ్యక్షురాలు కల్వకుంట్ల కవిత వెల్లడించారు.

దసరా పండుగ శుభసందర్భంగా శ్రీకాంగ్ గౌడ్‌ను తమ పార్టీ గ్రాడ్యుయేట్ ఎమ్మెల్సీ అభ్యర్థిగా కవిత ప్రకటించారు. ఈ ఎమ్మెల్సీ స్థానంలో ఎన్నికల సమన్వయం, పర్యవేక్షణ కోసం స్టేట్ పార్టీ అబ్జర్వర్‌గా సయ్యద్ ఇస్మాయిల్‌ను నియమించినట్లు కవిత తెలిపారు. ఈ ప్రకటనతో గ్రాడ్యుయేట్ ఎమ్మెల్సీ ఎన్నికల్లో కవిత పార్టీ పోటీకి సిద్ధమైనట్లు స్పష్టం చేసింది. అభ్యర్థి ప్రకటనతో పట్టభద్రుల ఎన్నికల ప్రచారాన్ని మరింత వేగవంతం చేయాలని పార్టీ నిర్ణయించింది.

మహబూబాబాద్ జిల్లా నర్సింహుల పేట మండలంలోని కౌసల్యాదేవిపల్లికి చెందిన శ్రీకాంత్ గౌడ్ ను టీఆర్ఎస్ అభ్యర్థిగా ప్రకటించింది. కాకతీయ యూనిర్సిటీ నుంచి పీహెచ్‌డీ చేసిన ఆయన తెలంగాణ సాధన ఉద్యమంలో క్రియాశీలకంగా వ్యవహరించారు. తెలంగాణ జాగృతిలో కవిత వెంట నడిచారు. తెలంగాణ రక్షణ సేన పార్టీ ప్రతినిధిగా ప్రజా సంఘాల సమావేశాల్లో, టీవీ డిబేట్లలో పాల్గొని టీఆర్ఎస్ గొంతుకగా నిలిచారు. బహుజనుల కోసం పోరాటం చేస్తానని ప్రకటించిన కవిత తన పార్టీ నుంచి తొలి అభ్యర్థిగా బీసీ బిడ్డ శ్రీకాంత్ గౌడ్‌ వైపు మొగ్గు చూపారు. గ్రాడ్యుయేట్ ఎమ్మెల్సీ ఎన్నికల్లో ఆయనను గెలిపించాలని కవిత పట్టభద్రులను కోరారు.

తెలంగాణ రక్షణ సేన కరీంనగర్ జిల్లా కమిటీని ప్రకటించిన పార్టీ అధ్యక్షురాలు శ్రీమతి కల్వకుంట్ల కవిత గారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను నియమించారు. https://t.co/iXqovrM955
— Telangana Rakshana Sena (@TRSparty_HQ) October 20, 2026

తెలంగాణ రక్షణ సేన కరీంనగర్ జిల్లా కమిటీని పార్టీ అధ్యక్షురాలు కల్వకుంట్ల కవిత తాజాగా ప్రకటించారు. కరీంనగర్ జిల్లా పార్టీ అధ్యక్షుడిగా గుంజపడుగు హరి ప్రసాద్, ప్రధాన కార్యదర్శిగా బోడ రాకేష్ రెడ్డి, ఇతర ముఖ్య పదవుల్లో జిల్లా కమిటీ సభ్యులను ఆమె నియమించారు.

VC Sajjanar: పాలపిట్టలను బంధిస్తే కఠిన చర్యలు.. ఈ నెంబర్లకు కాల్ చేయండి: హైదరాబాద్ సీపీ సజ్జనార్

Shankar Dukanam — Tue, 20 Oct 2026 12:55:00 +0530

Palapitta During Dasara | హైదరాబాద్: దసరా పండుగ సందర్భంగా తెలంగాణ రాష్ట్ర పక్షి అయిన పాలపిట్టను బంధించి వ్యాపారం చేయడంపై Hyderabad CP వి.సి. సజ్జనార్ తీవ్ర ఆందోళన వ్యక్తం చేశారు. పండుగ అంటే ఆనందం, స్వేచ్ఛ, తోటి ప్రాణుల పట్ల కరుణ చూపించడమని ఆయన గుర్తుచేశారు. కానీ శుభప్రదమనే పేరుతో కొందరు వ్యాపారులు పాలపిట్టల రెక్కలు కత్తిరించి, బోనుల్లో బంధించి హింసిస్తున్నారని, నీరు, ఆహారం లేకుండా అలమటించేలా చేయడం తీవ్రమైన అన్యాయమని ఆయన పేర్కొన్నారు.

మూగజీవి వేదన అనుభవించేలా చేస్తే ఎవరికీ మేలు జరగదని, పాలపిట్ట మన పర్యావరణానికి రక్షకుడిగా, రైతులకు మేలు చేసే నిజమైన నేస్తంగా తోడ్పడుతుందని ఆయన వివరించారు. వన్యప్రాణి సంరక్షణ చట్టం-1972 ప్రకారం పాలపిట్టలను బంధించడం, విక్రయించడం లేదా ప్రదర్శించడం శిక్షార్హమైన నేరమని IPS సజ్జనార్ హెచ్చరించారు. ఈ దసరా పండుగ వేళ మూగజీవాలకు స్వేచ్ఛను ప్రసాదించాలని, బంధించిన పక్షుల ప్రదర్శనలను ఎట్టిపరిస్థితుల్లోనూ ప్రోత్సహించకూడదని ప్రజలకు ఆయన విజ్ఞప్తి చేశారు.

ఎక్కడైనా పాలపిట్టలను బంధించినట్లు కనిపిస్తే వెంటనే టోల్‌ఫ్రీ నంబర్లు 18004255364, 9803338666 లేదా డయల్ 112 కు సమాచారం ఇచ్చి బాధ్యతాయుతమైన పౌరులుగా వ్యవహరించాలని Sajjanar కోరారు.

TG High Court Verdict: చిన్నపాటి గొడవలతో విడాకులు ఇవ్వలేం.. తెలంగాణ హైకోర్టు సంచలన తీర్పు

Satyaprasad Bandaru — Tue, 20 Oct 2026 10:30:38 +0530

TG High Court Verdict: దాంపత్య జీవితంలో సాధారణంగా వచ్చే చిన్నపాటి గొడవలు, అభిప్రాయ భేదాలను 'క్రూరత్వం' కింద పరిగణించి విడాకులు ఇవ్వలేమని తెలంగాణ హైకోర్టు స్పష్టం చేసింది. వివాహ బంధంలో ఎదురయ్యే ప్రతి చిన్న సమస్యను క్రూరత్వంగా చూడలేమని, ఆ వ్యక్తితో ఇకపై కలిసి జీవించలేమనే స్థాయికి పరిస్థితి దిగజారితేనే విడాకులకు ప్రాతిపదిక అవుతుందని కోర్టు తేల్చిచెప్పింది.

కేసు వివరాలు

ఒక వ్యక్తికి 2009లో వివాహం కాగా, పాప పుట్టిన తర్వాత భార్య తనను వేధిస్తోందంటూ అతడు విడాకుల కోసం కోర్టుకెక్కాడు. అయితే, ఈ పిటిషన్‌ను కింది కోర్టు కొట్టివేసింది. తమ దాంపత్య హక్కులను పునరుద్ధరించాలంటూ భార్య దాఖలు చేసిన పిటిషన్‌ను దిగువ కోర్టు అనుమతించింది. దీనిని సవాల్ చేస్తూ భర్త హైకోర్టులో అప్పీల్ దాఖలు చేశారు. ఈ పిటిషన్‌పై జస్టిస్‌ కె.లక్ష్మణ్, జస్టిస్‌ కె.సుజనలతో కూడిన ధర్మాసనం విచారణ చేసి తాజాగా తీర్పు ఇచ్చింది.

భార్య మానసిక సమస్యతో బాధపడుతోందన్న ఆరోపణలకు, ఇల్లరికం రావాలంటూ భార్య, అత్తమామలు వేధిస్తున్నారంటూ భర్త చేసి ఆరోపణలకు ఎలాంటి ఆధారాలు చూపలేదని ధర్మాసనం పేర్కొంది. భార్య తనపై గృహహింస కింద కేసు పెట్టి వేధించిందని భర్త వాదించినప్పటికీ, ఆ కేసును కోర్టు ఇప్పటికే కొట్టివేసిందని గుర్తుచేసింది. అయితే, కేవలం గృహహింస కేసు దాఖలు చేసినంత మాత్రాన దాన్ని భర్త పట్ల క్రూరత్వంగా పరిగణించలేమని హైకోర్టు తేల్చిచెప్పింది.

కేసు దాఖలు చేసిన సమయంలో భర్త వయసు 36 ఏళ్లు, భార్య వయసు 30 ఏళ్లు ఉండగా.. ప్రస్తుతం భర్తకు 50, భార్యకు 44 ఏళ్లు, కూతురికి 16 ఏళ్లు ఉన్నాయి. వీరు గత 14 ఏళ్లుగా వేర్వేరుగా ఉంటున్నారు. పెద్దగా విభేదాలు లేని దంపతులు, అనవసరంగా సమస్యలను ఎక్కువ చేసుకొని చిన్న చిన్న కారణాలతో విడాకుల కోసం ప్రయత్నించారని హైకోర్టు అభిప్రాయపడింది. చిన్న కారణాలతో విడాకులను అనుమతించలేమని హైకోర్టు స్పష్టం చేస్తూ, దిగువ కోర్టు ఇచ్చిన తీర్పును సమర్థించింది.

Also Read: నాగోల్‌‌లో పైప్‌లైన్‌ను ఢీకొట్టిన కారు, వ్యక్తి మృతి- వరద బీభత్సంతో నీటి సరఫరా బంద్

చట్టాలు ఏం చెబుతున్నాయి

హిందూ వివాహ చట్టం ప్రకారం విడాకులు కోసం 'క్రూరత్వం' ఒక ప్రాతిపదిక. అయితే సుప్రీంకోర్టు, వివిధ హైకోర్టుల తీర్పుల ప్రకారం.. సాధారణ వైవాహిక జీవితంలో జరిగే చిన్నచిన్న ఘర్షణలు, మనస్తాపాలు, మాటలను క్రూరత్వంగా పరిగణించలేమని కోర్టులు చెబుతున్నాయి. అది మానసికంగా లేదా శారీరకంగా భరించలేనంత తీవ్రంగా ఉంటేనే క్రూరత్వంగా పరిగణిస్తామని చెబుతున్నాయి. 14 ఏళ్లుగా విడిగా ఉంటున్నప్పటికీ, చట్టపరమైన కారణాలు లేకపోతే కేవలం కాలయాపన కారణంగా కోర్టులు ఆటోమేటిక్‌గా విడాకులు మంజూరు చేయవు. వివాహ బంధాన్ని నిలబెట్టడానికి ప్రాధాన్యత ఇస్తూ కోర్టులు ఇలాంటి సందర్భాల్లో కౌన్సెలింగ్ లేదా దాంపత్య హక్కుల పునరుద్ధరణకు మొగ్గు చూపుతుంటాయి.

Also Read: చిన్నపాటి గొడవలతో విడాకులు ఇవ్వలేం.. తెలంగాణ హైకోర్టు సంచలన తీర్పు

Nagole Road Accident: నాగోల్‌‌లో పైప్‌లైన్‌ను ఢీకొట్టిన కారు, వ్యక్తి మృతి- వరద బీభత్సంతో నీటి సరఫరా బంద్

Shankar Dukanam — Tue, 20 Oct 2026 10:03:39 +0530

Car Accident Near Nagole Metro Station | హైదరాబాద్‌లోని నాగోల్‌ మెట్రోస్టేషన్‌ సమీపంలో రోడ్డు ప్రమాదం చోటుచేసుకుంది. వేగంగా వెళ్తున్న ఒక కారు అదుపుతప్పి సమీపంలోని మంచినీటి పైప్‌లైన్‌ను బలంగా ఢీకొట్టింది. ఈ ప్రమాదంలో హయత్‌నగర్‌ ప్రాంతానికి చెందిన వినీత్‌ (24) అనే యువకుడు అక్కడికక్కడే దుర్మరణం చెందాడు. కారు బలంగా ఢీకొట్టడంతో మంచినీటి పైప్‌లైన్ దెబ్బతిని పగిలిపోయింది. దీనివల్ల రాత్రి భారీ ఎత్తున తాగే నీరు రోడ్డుపైకి చేరి వృథాగా పోయింది.

ప్రమాద విషయం తెలిసిన వెంటనే హైదరాబాద్ జలమండలి అధికారులు, సిబ్బంది ఘటనా స్థలానికి చేరుకుని నీటి సరఫరాను నిలిపివేసి, పైప్‌లైన్ పునరుద్ధరణకు మరమ్మతు పనులను చేపట్టారు. పైప్‌లైన్‌ పగిలిపోవడంతో ఆ పరిసర ప్రాంతాల్లో మంచినీటి సరఫరాకు తాత్కాలికంగా అంతరాయం ఏర్పడిందని అధికారులు తెలిపారు. మరోవైపు నాగోల్ పోలీసులు ఈ ప్రమాదంపై కేసు నమోదు చేసి విచారణ చేపట్టారు.

@TeluguScribe https://t.co/Etcj8vsOFI
— MahaTalks (@MahaTalks24) October 20, 2026

నాగోల్ మెట్రో స్టేషన్ పిల్లర్ నంబర్ 813 వద్ద కృష్ణా వాటర్ పైప్‌లైన్ ధ్వంసం కావడంతో నీరు భారీగా ఎగసిపడుతోంది. ఆ పైపులైన్ ధ్వంసం కారణంగా ఉప్పల్, వనస్థలిపురం, రామంతపూర్, బీఎన్ రెడ్డి నగర్, బీరప్పగడ్డ, ఆటోనగర్, ప్రకాష్ నగర్, బేగంపేట, పద్మారావునగర్, మెట్టుగూడ, వైశాలినగర్, మీర్‌పేట్, బడంగ్‌పేట్, బాలాపూర్, మారేడ్‌పల్లి, సౌత్ సెంట్రల్ రైల్వే, సికింద్రాబాద్, కంటోన్మెంట్, లాలాగూడ, అడ్డగుట్ట, నల్లగుట్ట వంటి ప్రాంతాల్లో నీటి సరఫరా బంద్ అయినట్లు తెలుస్తోంది. ఆ ప్రాంతాల్లో ట్యాంకర్ల ద్వారా నీటిని సరఫరా చేయాలని, ప్రజలు నీటిని పొదుపుగా వాడుకోవాలని ఉన్నతాధికారులు సూచించారు.

Telangana on El Nino Conditions: ఎల్‌నినో పరిస్థితులపై తెలంగాణ అప్రమత్తం.. కేబినెట్ సబ్ కమిటీ ఏర్పాటు

Shankar Dukanam — Mon, 19 Oct 2026 17:45:18 +0530

Telangana Cabinet Sub Committee on El Nino | హైదరాబాద్: తెలంగాణలో ఎల్‌నినో కారణంగా ఏర్పడుతున్న పరిస్థితులపై సమీక్షించేందుకు రాష్ట్ర ప్రభుత్వం కీలక నిర్ణయం తీసుకుంది. ఎల్‌నినో ప్రభావాన్ని నిరంతరం పర్యవేక్షించేందుకు, రాష్ట్రంలో తగిన చర్యలు చేపట్టేందుకు ప్రత్యేకంగా ఒక మంత్రివర్గ ఉపసంఘాన్ని (Cabinet Sub-Committee) ఏర్పాటు చేసింది. ఈ ఉపసంఘానికి ఛైర్మన్‌గా రాష్ట్ర ఉప ముఖ్యమంత్రి భట్టి విక్రమార్క వ్యవహరించనున్నారు.

ఈ కేబినెట్ సబ్ కమిటీలో మంత్రులు ఉత్తమ్‌ కుమార్‌ రెడ్డి, పొంగులేటి శ్రీనివాస్‌ రెడ్డి, తుమ్మల నాగేశ్వరరావు, సీతక్క, వాకిటి శ్రీహరిలను సభ్యులుగా నియమించారు. అదేవిధంగా సీఎం సలహాదారు రామకృష్ణారావును ఈ కమిటీకి ప్రత్యేక ఆహ్వానితుడిగా నియమించగా, ప్రణాళికా శాఖ కార్యదర్శి కన్వీనర్‌గా ఉంటారు. ఈ సబ్‌కమిటీ రాష్ట్రంలో ఎల్‌నినో పరిస్థితులపై ఎప్పటికప్పుడు సమీక్షలు నిర్వహిస్తూ, సంబంధిత శాఖలకు అవసరమైన ఆదేశాలు, సూచనలు జారీ చేయనుంది.

విద్యుత్, నీళ్లు పొదుపుగా వాడాలన్న డిప్యూటీ సీఎం భట్టి

ఎల్‌నినో పరిస్థితుల దృష్ట్యా ప్రజలందరూ నీటిని, విద్యుత్‌ను ఎంతో పొదుపుగా వాడుకోవాలని తెలంగాణ ఉపముఖ్యమంత్రి భట్టి విక్రమార్క పిలుపునిచ్చారు. హైదరాబాద్‌లో ఇటీవల జరిగిన బతుకమ్మ యంగ్‌ ఫిల్మ్‌మేకర్స్‌ అవార్డుల వేడుకలో పాల్గొన్న ఆయన, విజేతలకు పురస్కారాలు అందజేశారు. గతంలో అక్టోబర్‌, నవంబర్‌లలో చలి ఎక్కువగా ఉండేదని, కానీ ఇప్పుడు భిన్నంగా తీవ్రమైన వేడి వాతావరణం ఉంటుందన్నారు. చలికి బదులు వేడిమి నుంచి రక్షించుకునే పరిస్థితి వచ్చిందని, రాష్ట్రంలో విద్యుత్ డిమాండ్ ఏకంగా 20,000 మెగావాట్లకు చేరిందని వివరించారు.

Also Read: Telangana Graduate MLC Elections: పట్టభద్రుల ఎమ్మెల్సీ పోరు - కేసీఆర్ సోషల్ ఇంజనీరింగ్ స్కెచ్ - అభ్యర్థులపై కొత్త ప్లాన్?

ఎల్ నినో ముప్పుపై ప్రజలను అప్రమత్తం చేసిన సీఎం రేవంత్ రెడ్డి

ప్రపంచవ్యాప్తంగా ముంచుకొస్తున్న ఎల్ నినో (El Nino) ప్రభావం పట్ల తెలంగాణ ప్రజలు, ముఖ్యంగా రైతులు తీవ్ర అప్రమత్తంగా ఉండాలని సీఎం రేవంత్ రెడ్డి ఇటీవల సూచించారు. దాదాపు 100 దేశాలపై ఎల్ నినో ప్రభావం ఉంటుందని ఐక్యరాజ్యసమితి, శాస్త్రవేత్తలు హెచ్చరించారని, ఎండల తీవ్రత పెరిగి నీటి ఎద్దడి తలెత్తే ప్రమాదం ఉందన్నారు. ప్రకృతి విపత్తుల వల్ల మొదట దెబ్బతినేది రైతులేనని, రాష్ట్రంలో నీటి అవసరం ఎక్కువగా ఉండే వరి సాగు కంటే తక్కువ నీటితో పండే ప్రత్యామ్నాయ, వర్షాధారిత పంటలు వేయడం మంచిదన్నారు. మారిన పరిస్థితులకు అనుగుణంగా పంటల మార్పిడి అలవాటు చేసుకోవాలని కోరారు.

Telangana Congress: గాంధీ, నెహ్రూ చరిత్రను చెరిపివేసే కుట్ర.. దేశం కోసం బీజేపీ చుక్క రక్తం చిందించిందా?: కాంగ్రెస్

Shankar Dukanam — Mon, 19 Oct 2026 14:56:14 +0530

హైదరాబాద్‌లో చార్మినార్ వద్ద నిర్వహించిన రాజీవ్ గాంధీ సద్భావనా యాత్ర సంస్కరణ కార్యక్రమంలో రాష్ట్ర మంత్రి ఉత్తమ్ కుమార్ రెడ్డి, పీసీసీ అధ్యక్షుడు మహేష్ కుమార్ గౌడ్, వీహెచ్ సహా పలువురు కాంగ్రెస్ నేతలు పాల్గొని ప్రతిపక్షాలపై తీవ్ర వ్యాఖ్యలు చేశారు. బీజేపీ, ఆర్ఎస్ఎస్ లు స్వాతంత్య్రోద్యమంలో ఏమైనా పాల్గొన్నాయా.. దేశం కోసం ఒక్క రక్తపు బొట్టు అయినా చిందించాయా.. అలాంటి పార్టీలకు కాంగ్రెస్ గురించి మాట్లాడే నైతిక హక్కు లేదని విమర్శించారు.

మంత్రి ఉత్తమ్ కుమార్ రెడ్డి మాట్లాడుతూ.. ‘1990లో ప్రారంభమైన సద్భావనా యాత్రలో ప్రతి ఏటా క్రమం తప్పకుండా పాల్గొంటున్నాను. గత పదేళ్ల బీఆర్‌ఎస్, అంతకుముందు తెలుగుదేశం పాలనలో వేలాది మంది కాంగ్రెస్ కార్యకర్తలు అనేక ఇబ్బందులు ఎదుర్కొన్నారు. గతంలో కష్టపడిన కార్యకర్తలకు గుర్తింపు, మర్యాద, గౌరవం అందించాల్సిన సమయం ఆసన్నమైంది. తెలంగాణలో కాంగ్రెస్ ప్రభుత్వం అధికారంలోకి వచ్చింది అంటే దాని వెనుక కార్యకర్తల త్యాగం దాగి ఉంది. రాహుల్ గాంధీ నాయకత్వంలో ప్రజల్లో కనువిప్పు కలిగిందని, దేశంలో నిశ్శబ్ద విప్లవం మొదలైంది. కేంద్రంలో బీజేపీకి స్వస్తి పలికే సమయం ఆసన్నమైంది. దేశానికి రాహుల్ గాంధీ ప్రధాని కావాలని’ ఆకాంక్షించారు. తెలంగాణలో మరోసారి కాంగ్రెస్ ప్రభుత్వం రావడానికి ప్రతి ఒక్కరూ కష్టపడి పనిచేయాలన్నారు.

దేశం కోసం ప్రాణాలు త్యాగం చేసిన కుటుంబంపై విమర్వలా.. పీసీసీ చీఫ్ మహేష్ కుమార్ గౌడ్

రాజీవ్ గాంధీ దేశ అభివృద్ధికి అహర్నిశలు కృషి చేశారని, దేశం కోసం తన జీవితాన్ని అంకితం చేసిన మహనీయుడని టీపీసీసీ చీఫ్ మహేష్ కుమార్ గౌడ్ కొనియాడారు. చార్మినార్‌తో రాజీవ్ గాంధీకి విడదీయలేని అనుబంధం ఉందన్నారు. 18 ఏళ్లకే యువతకు ఓటు హక్కు కల్పించిన ఘనత ఆయనదే అన్నారు. దేశంలో సాంకేతిక విప్లవానికి ఆయన దూరదృష్టియే పునాది అని గుర్తుచేశారు. ప్రజలకు వైద్య సేవలందిస్తూ డాక్టర్ మల్లికార్జున అందరి మనసులు గెలుచుకున్నారని, కాంగ్రెస్ పార్టీ చరిత్ర త్యాగాలతో ముడిపడి ఉందన్నారు. దేశం కోసం ప్రతి రక్తపు బొట్టు ధారపోస్తానన్న ఇందిరా గాంధీ స్ఫూర్తి ఆదర్శనీయమని అన్నారు. ప్రధానమంత్రి పదవినే త్యాగం చేసిన సోనియా గాంధీ కాంగ్రెస్‌కు ఆదర్శంగా నిలిచారన్నారు.

హైదరాబాద్: రాజీవ్ గాంధీ సద్భావనా యాత్ర స్మారక సమితి ఆధ్వర్యంలో, రాష్ట్ర మంత్రి ఉత్తమ్ కుమార్ రెడ్డి అధ్యక్షతన హైదరాబాద్‌లోని చార్మినార్ వద్ద రాజీవ్ గాంధీ సద్భావనా యాత్ర స్మారక సమావేశం నిర్వహించారు. ఈ సమావేశానికి టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్, ఏఐసీసీ కార్యదర్శి సచిన్ సావంత్, ఏఐసీసీ నాయకులు గిడుగు రుద్రరాజు ముఖ్య అతిథులుగా హాజరయ్యారు. టీపీసీసీ ఉపాధ్యక్షులు, డీసీసీ అధ్యక్షులు, పార్టీ ప్రధాన కార్యదర్శులు, కాంగ్రెస్ నాయకులు, పార్టీ ప్రతినిధులు పాల్గొన్నారు.
— Telangana Congress (@INCTelangana) October 19, 2026

స్వాతంత్ర్య పోరాటంలో ఎలాంటి భాగస్వామ్యం లేని బీజేపీ నేతలు నేడు దేశభక్తి గురించి మాట్లాడటం విడ్డూరంగా ఉందన్నారు. గాంధీ, నెహ్రూ చరిత్రను చెరిపివేసే ప్రయత్నాలు జరుగుతున్నాయని, దేశ స్వాతంత్ర్య ఉద్యమంలో కాంగ్రెస్ పాత్రను యువత తెలుసుకోవాలన్నారు. దేశంలో శాశ్వతంగా అధికారంలో ఉండేందుకు కొన్ని శక్తులు కుట్రలు చేస్తున్నాయని, రాజ్యాంగబద్ధ సంస్థలను నిర్వీర్యం చేసే ప్రయత్నాలు జరుగుతున్నాయని ఆరోపించారు. కులం, మతం పేరుతో ఓటర్ల జాబితాల నుంచి ఓట్ల తొలగింపునకు ప్రయత్నాలు జరుగుతున్నాయని ఆరోపించారు. బీజేపీ, ఆర్‌ఎస్‌ఎస్ నాయకులు దేశం కోసం ఒక్క చుక్క రక్తమైనా ధారపోశారా అని మహేష్ గౌడ్ ప్రశ్నించారు. కాంగ్రెస్ కార్యకర్తలకు తగిన గుర్తింపు, గౌరవం కల్పిస్తానని, రాజీవ్, ఇందిరా గాంధీల ఆశయాలను ముందుకు తీసుకెళ్తామని స్పష్టం చేశారు. దేశ ఐక్యత, సమగ్రత, ప్రజాస్వామ్య పరిరక్షణకు కాంగ్రెస్ కట్టుబడి ఉందని, రాజీవ్ సద్భావనా యాత్ర స్ఫూర్తితో మతసామరస్యం, సామాజిక ఐక్యతను కాపాడాలని పిలుపునిచ్చారు.

SIR ద్వారా ఓట్లు తొలగించారు: ఎంపీ మల్లు రవి

ప్రజలందరూ సంతోషంగా దసరా పండుగను జరుపుకోవాలని కాంగ్రెస్ ఎంపీ మల్లు రవి కోరారు. ఎల్ నినో పరిస్థితిని ప్రజలు, ప్రభుత్వం కలిసి ఎదుర్కోవాలని, ఇది ప్రభుత్వం సృష్టించింది కాదన్నారు. ఇప్పటి వరకు 18 సార్లు ఎల్ నినో వచ్చిందని, 150 ఏళ్ల కిందట ఇలాంటి సూపర్ ఎల్ నినో వచ్చిందని వివరిస్తూ, ప్రస్తుత పరిస్థితుల్లో రైతులు పంటలను ఆచి తూచి వేయాలని సూచించారు. సర్ (SIR) ద్వారా 13 కోట్ల మంది పేర్లను తొలగించారని, దీనికోసం పెద్ద ఎత్తున అధికారులను ఏర్పాటు చేశారని ఆరోపించారు. నిజానికి SIR అసలు ఉద్దేశ్యం ప్రజలకు ఓటు హక్కు కలిగించడమే అయినప్పటికీ, ఆ ప్రక్రియలో బీజేపీ వ్యతిరేక ఓట్లను మాత్రమే కావాలని తొలగిస్తున్నారని ఆరోపించారు. గ్రాడ్యుయేట్ ఎన్నికల్లో అందరూ తమ ఓటును నమోదు చేసుకోవాలని, వచ్చే ఎన్నికల్లో కాంగ్రెస్ పార్టీ అభ్యర్థులను గెలిపించాలని కోరారు.