Telangana DGP CV Anand: తెలంగాణలో కొత్త డీజీపీపై నెలకొన్న సస్పెన్స్కు తెరపడింది. కొత్త పోలీస్ బాస్గా సీవీ ఆనంద్ను నియమితులయ్యారు. 1991 బ్యాచ్కు చెందిన సీవీ ఆనంద్ చాలా కాలం సైబరాబాద్, హైదరాబాద్, విజయవాడ సీపీగా పని చేసి సంచలనమైన కేసులు ఛేదించారు. ప్రస్తుతం హోంశాఖ ప్రత్యేక ప్రధాన కార్యదర్శిగా బాధ్యతలు నిర్వహిస్తున్న ఆనంద్, ఏప్రిల్ 30న పదవీ విరమణ చేయనున్న బి. శివధర్ రెడ్డి స్థానంలో బాధ్యతలు స్వీకరిస్తారు.
సుప్రీంకోర్టు ఆదేశాల మేరకు యూపీఎస్సీ ప్యానెల్ ఎంపిక చేసి ముగ్గురు అధికారుల జాబితాలో సీనియారిటీ ప్రాతిపదికన ఆనంద్ను ప్రభుత్వం ఎంపిక చేసింది.
క్రికెట్ బ్యాట్ నుంచి లాఠీ వరకు...
సీవి ఆనంద్ ప్రస్థానం అత్యంత ఆసక్తికరంగా ఉంటుంది. 1968 జూన్ 5న రంగారెడ్డి జిల్లాలో జన్మించిన ఆయన, హైదరాబాద్ పబ్లిక్ స్కూల్లో ప్రాథమిక విద్య పూర్తి చేశారు. నిజాం కాలేజీలో డిగ్రీ పట్టా పుచ్చుకున్నారు. తర్వాత ఉస్మానియా యూనివర్శిటీ నుంచి ఎకనామిక్స్లో గోల్డ్ మెడల్ సాధించారు. చదువులోనే కాకుండా క్రీడల్లోనూ రాణించారు. యువకుడిగా ఉన్నప్పుడు క్రికెట్లో అద్భుతమైన ప్రదర్శన ఇచ్చారు. భారత్ అండర్ -19 జట్టు తరఫున ఇంగ్లాండ్ పర్యటనకు ఎంపికయ్యారు. కేవలం 22 ఏళ్ల వయసులోనే తన మొదటి ప్రయత్నంలో ఐపీఎస్కు ఎంపికై, క్రీడా రంగాన్ని వదిలి సమాజ సేవకు వచ్చారు. ఒకవేళ ఆ రోజుల్లో ఐపీఎల్ ఉండి ఉంటే, తాను ఐపీఎస్ అయ్యేవాడిని కాదేమోనని ఆయన స్వయంగా చాలా సార్లు కామెంట్ చేశారు.
ఐపీఎస్ అయిన తర్వాత వరంగల్ , ఆదిలాబాద్, నిజామాబాద్ వంటి నక్సలైట్ల ప్రభావిత ప్రాంతాల్లో అదనపు ఎస్పీగా, ఎస్పీగా పని చేసి చాలా కాలం శాంతి భద్రతలను అదుపులో ఉంచి ప్రశంసలు అందుకున్నారు. నక్సలైట్లను ప్రధాన స్రవంతిలోకి తీసుకురావడంలో కీలక పాత్ర పోషించారు.
హైదరాబాద్ ట్రాఫిక్ అదనపు కమిషనర్గా ఉన్న టైంలో ఆయన ప్రవేశ పెట్టిన ఈ-చలాన్ వ్యవస్థ రాష్ట్రవ్యాప్తంగా విప్లవాత్మక మార్పులు తెచ్చింది. హుస్సేన్ సాగ్ వద్ద ఆత్మహత్యలను నిరోధించడానికి లేక్ పోలీస్ విభాగం ఏర్పాటు చేయడం ఆయన ఆలోచనల నుంచి వచ్చిందే. హైదరాబాద్ సిటీ పోలీస్ కమిషర్గా రెండుసార్లు పని చేసిన అనుభవం ఆయనకు ఉంది. సైబరాబాద్ కమిషనర్గా పని చేసిన కాలంలో మహిళా భద్రత కోసం షీ టీమ్స్ బలోపేతం చేయడం, ఐటీ కారిడార్ భద్రత పెంచేందుకు చర్యలు తీసుకున్నారు.
ఆధునిక పోలీసింగ్ో సాంకేతికత వాడకంపై ఆనంద్ ఎప్పుడూ ముందు ఉంటారు. హైదరాబాద్లో ట్రాఫిక్ నిర్వహణ కోసం గూగుల్ మ్యాప్స్, డ్రోన్ల వినియోగాన్ని ఆయన ప్రోత్సహించారు. ఆపరేషన్ రోప్ ద్వారా నగరంలో ఆక్రమణల తొలగింపు, ట్రాఫిక్ నియంత్రణలో సత్ఫలితాలు సాధించారు. నేర పరిశోధనలో సీసీటీవీ కెమెరాలు, ఫేషియల్ రికగ్నిషన్ సాఫ్ట్వేర్ వినియోగం ద్వారా పాత నేరస్థులను పట్టుకోవడంలో ఆయన చొరవ చూపించారు.
మత్తు పదార్థాల నియంత్రణలో సీవీ ఆనంద్ చేసిన కృషికి అంతర్జాతీయ గుర్తింపు లభించింది. ఆయన నేతృత్వంలోని హైదరాబాద్ నార్కోటిక్స్ ఎన్ఫ్రోస్మెంట్ వింగ్ దుబాయ్ వరల్డ్ పోలీస్ సమ్మిట్-2025లో ప్రతిష్టాత్మకమైన ఎక్స్లెన్స్ అవార్డును గెలుచుకుంది. 138 దేశాల ప్రతినిధులు పాల్గొన్న ఈ సదస్సులో భారత్ తరఫున ఈ అవార్డు అందుకోవడం తెలంగాణ పోలీసులకే కాక దేశానికే గర్వకారణమని ఆయన పేర్కొన్నారు.
సీవీ ఆనంద్ విధుల్లో ఎంత టఫ్ ఉంటారో ఫుడ్ , హెల్త్ విషయంలో అంతే కఠినంగా ఉంటారు. సర్వీస్లో చేరినప్పుడు వేసుకున్న టీ షర్ట్ రిటైర్మెంట్ వరకు సరిపోయేలా ఉండాలని ఆయన జూనియర్లకు చెబుతుంటారు. చిరుధాన్యాలకు, శాకాహార భోజనానికి ఆయన ప్రాధాన్యత ఇస్తారు. ప్రతి రోజూ టెన్నిస్, క్రికెట్ గోల్ఫ్ ఏదో ఒకటి ఆడటం ద్వారా ఒత్తిడి తగ్గించుకోవడమే కాకుండా ఫిట్నెస్ కాపాడుకుంటూ వస్తున్నారు.