Erravelli Farmhouse Water: కేసీఆర్ ఫామ్‌హౌస్‌కు నీటి రగడ - కాంగ్రెస్ నేతలకు బీఆర్ఎస్ లీగల్ నోటీసుల షాక్!

Vijayashanti : రాములమ్మ వ్యూహాత్మక మౌనం - ఎమ్మెల్సీ పదవి వచ్చినా కాంగ్రెస్‌లో విజయశాంతి ఎందుకు సైలెంట్?

Hema Nidadhana — Thu, 22 Oct 2026 13:45:54 +0530

Revanth Reddy Govt Vijayashanti MLC: తెలంగాణ రాజకీయాల్లో 'రాములమ్మ' విజయశాంతి పేరు వినపడితేనే ఒక రకమైన పవర్‌ఫుల్ పొలిటికల్ ఇమేజ్, పదునైన వ్యాఖ్యలు గుర్తుకొస్తాయి. వెండితెరపై లేడీ అమితాబ్‌గా ప్రసిద్ధి చెందిన ఆమె, తెలంగాణ ఉద్యమ కాలం నుంచి ప్రత్యర్థులపై తనదైన శైలిలో సింహగర్జన చేస్తూ వార్తల్లో నిలిచేవారు. బిఆర్ఎస్, బిజెపిలను దాటుకుని 2023 అసెంబ్లీ ఎన్నికలకు ముందు కాంగ్రెస్ గూటికి చేరిన విజయశాంతికి.. రేవంత్ రెడ్డి ప్రభుత్వం ఎమ్మెల్సీ గా అవకాశం కల్పించి గౌరవించింది. అయితే పదవి దక్కిన తర్వాత కూడా గతంలో కనిపించిన ఆ రాజకీయ దూకుడు, నిరంతర క్షేత్రస్థాయి చురుకుదనం ఇప్పుడు లోపించాయనే చర్చ తెలంగాణ కాంగ్రెస్ వర్గాల్లో తీవ్రంగా నడుస్తోంది.

సడెన్‌గా ఎమ్మెల్సీ పదవి సాధించిన విజయశాంతి

2023 ఎన్నికల సమయానికి ముందు బీజేపి వీడి హస్తం గూటికి వచ్చిన విజయశాంతికి ఎమ్మెల్సీ సీటు దక్కడంపై అప్పట్లో పార్టీలోని కొందరు సీనియర్లు, ఏళ్ల తరబడి పనిచేసిన నేతలు అంతర్గతంగా అసంతృప్తి వ్యక్తం చేశారనే ప్రచారం ఉంది. అయినప్పటికీ అధిష్టానం ఆమెకు ప్రాధాన్యత ఇచ్చి శాసనమండలికి పంపింది. అయితే పదవి లభించిన తర్వాత పార్టీ అధిష్టానం, పీసీసీ సమాయత్తం చేసే కీలక కార్యక్రమాలలో, నిరసనల్లో లేదా ప్రభుత్వ మైలేజ్ ప్రచారాల్లో విజయశాంతి పెద్దగా కనిపించకపోవడం గమనార్హం. పార్టీ రాష్ట్ర నాయకత్వం పిలుపునిచ్చే ప్రధాన సభలకు కూడా ఆమె గైర్హాజరవ్వడం వెనుక అంతర్గత అసంతృప్తి ఉందా అనే అనుమానాలు వ్యక్తమవుతున్నాయి.

పార్టీ కార్యక్రమాల్లో కనిపించని రాములమ్మ

అయితే విజయశాంతి మౌనం అంటే ఆమె పూర్తిగా రాజకీయాలకు దూరమైనట్లు భావించడానికి వీల్లేదు. పార్టీ వేదికలపై నేరుగా మాట్లాడకపోయినప్పటికీ.. సోషల్ మీడియా ద్వారా ఆమె నిరంతరం క్రియాశీలకంగానే ఉంటున్నారు. ముఖ్యంగా తెలంగాణ ఉద్యమకారుల సంక్షేమం, ఫీజు రీయింబర్స్‌మెంట్ బకాయిలు, పోలీసు వ్యవస్థలో సవాళ్లు వంటి సున్నితమైన ప్రజా సమస్యలపై ఆమె స్పందిస్తున్నారు. కొన్ని సందర్భాల్లో ఈ వ్యాఖ్యలు పరోక్షంగా సొంత కాంగ్రెస్ ప్రభుత్వ పరిపాలనకే సూచనలు లేదా ప్రశ్నించే ధోరణిలో ఉండటం కాంగ్రెస్ శ్రేణుల్లో విభిన్న చర్చలకు దారితీస్తోంది.

సరైన హోదా దక్కలేదని విజయశాంతి భావన

విజయశాంతి కేవలం ఒక సాధారణ ఎమ్మెల్సీ పాత్రకే పరిమితం కాకుండా, పార్టీలో తనకు తగినంత కార్యనిర్వాహక ప్రాధాన్యత లేదా నిర్ణయాత్మక హోదా దక్కలేదనే భావనలో ఉన్నట్లు ప్రచారం సాగుతోంది. రేవంత్ రెడ్డి నేతృత్వంలోని రాష్ట్ర కాంగ్రెస్ యంత్రాంగంతో ఆమెకు స్పష్టమైన సమన్వయ లోపం ఉందా, లేక తనకు తానుగా ఒక డిస్టెన్స్ మెయింటెన్ చేస్తున్నారా అనే ప్రశ్నలకు ఇప్పటివరకు అధికారికంగా ఆమె నుంచి సమాధానం రాలేదు. దీంతో ఆమె హాజరు కాకపోవడం వెనుక పెద్ద రాజకీయ వ్యూహమే ఉందనే వాదనలు బలంగా వినిపిస్తున్నాయి. ముగింపుగా చెప్పాలంటే.. విజయశాంతి పాటిస్తున్న ఈ నిశ్శబ్దం కేవలం తాత్కాలిక వ్యూహాత్మక విరామమా లేక కాంగ్రెస్ పార్టీ తీరుపై నిశ్శబ్ద నిరసనా అనేది త్వరలోనే తేలనుంది. తెలంగాణలో కాంగ్రెస్ ప్రభుత్వం పదిహేను నెలల పాలన పూర్తి చేసుకుని స్థానిక పోరుకు సిద్ధమవుతున్న తరుణంలో.. రాములమ్మ మళ్లీ ఎప్పుడు తన గళాన్ని విప్పుతారు, ఎలాంటి రాజకీయ నిర్ణయం తీసుకోబోతున్నారు అనేది రానున్న రోజుల్లో స్పష్టత రానుంది.

AP Odisha Cyclone Alert: తీవ్ర తుఫాను హెచ్చరిక - అక్టోబర్ 27-30 మధ్య కోస్తాంధ్ర-ఒడిశాపై ప్రతాపం - తెలంగాణలోనూ వర్షాలుంటాయా?

Raja Sekhar Allu — Thu, 22 Oct 2026 13:11:09 +0530

Bay of Bengal Cyclone Alert AP: మధ్య బంగాళాఖాతంలో ఏర్పడిన వాతావరణ అల్పపీడన పరిణామాలు రానున్న రోజుల్లో బలపడి తీవ్రమైన తుఫానుగా మారే అవకాశాలు కనిపిస్తున్నాయని భారత వాతావరణ శాఖ ప్రకటించింది. అక్టోబర్ 27 నుంచి 30వ తేదీల మధ్య ఈ తుఫాను తీవ్ర రూపం దాల్చి కోస్తాంధ్ర , ఒడిశా తీరాల వైపు దూసుకొచ్చే సూచనలు స్పష్టమవుతున్నాయి. ముఖ్యంగా ఉత్తర కోస్తాంధ్రలోని విశాఖపట్నం, విజయనగరం, శ్రీకాకుళం, కాకినాడ, ఉమ్మడి గోదావరి జిల్లాలతో పాటు ఒడిశా దక్షిణ తీరప్రాంతాలు ఈ తుఫాను తీవ్ర ప్రభావానికి గురయ్యే అవకాశం ఉండటంతో తీరప్రాంత యంత్రాంగాన్ని ముందస్తుగా అప్రమత్తం చేశారు.

ఈ ముప్పు దృష్ట్యా అక్టోబర్ 27 నుంచి 30 మధ్య కోస్తాంధ్ర ప్రజలు, ముఖ్యంగా మత్స్యకారులు అత్యంత జాగ్రత్తగా ఉండాలని వాతావరణ నిపుణులు సూచిస్తున్నారు. తీరం దాటే సమయంలో గంటకు 60 నుంచి 90 కిలోమీటర్ల వేగంతో, పీక్ సమయంలో అంతకంటే ఎక్కువ వేగంతో ఈదురు గాలులు వీచే వీలుంది. తీరప్రాంతాల్లో భారీ నుంచి అత్యంత భారీ వర్షాలు కురిసే అవకాశం ఉన్నందున, లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు డిజాస్టర్ మేనేజ్‌మెంట్ టీమ్స్ సమాయత్తమవుతున్నాయి. వేటకు వెళ్లిన మత్స్యకారులను వెంటనే తీరానికి తిరిగి రావాలని అధికారులు విజ్ఞప్తి చేస్తున్నారు.

ఈ తుఫాను ప్రభావం పొరుగున ఉన్న తెలంగాణపై ఎంతవరకు ఉంటుంది? అనే దానిపై వాతావరణ శాఖ స్పష్టతనిచ్చింది. తెలంగాణకు నేరుగా తుఫాను ముప్పు లేనప్పటికీ, తీరప్రాంతానికి సమీపంలో ఉండే ఉమ్మడి ఖమ్మం , నల్గొండ, సూర్యాపేట , మహబూబాబాద్ జిల్లాల్లో దీని ప్రభావం పడే అవకాశం ఉంది. అక్టోబర్ 27 రాత్రి నుంచి 30వ తేదీల మధ్య తెలంగాణలోని తూర్పు, దక్షిణ జిల్లాల్లో మోస్తరు నుంచి ఈదురు గాలులతో కూడిన వర్షాలు లేదా ఉరుములతో కూడిన జల్లులు కురిసే అవకాశముంది.

SEVERE CYCLONE ALERT - UPDATE 2 🌀🌪️ A LPA/Depression is expected to form in Central BoB on October 24, subsequently intensify into a Cyclone on October 26 It is expected to become a MAJOR CYCLONE with Category 3 storm and winds around 160-200kmph and cross between Central AP and South Odisha on October 28 as a DANGEROUS CYCLONE ⚠️⚠️🌀 After almost 3 years, Bay of Bengal is hosting a SEVERE CYCLONE and move towards East India coast East Telangana to come under its impact with MODERATE RAINS likely during October 29-31 (Bhadradri - Kothagudem will get HEAVY RAINS) Other parts of Telangana will have LIGHT RAINS during this period Any changes in the forecast will be communicated accordingly ⚠️🌀
— Telangana Weatherman (@balaji25_t) October 22, 2026

అయితే హైదరాబాద్ సహా పశ్చిమ, ఉత్తర తెలంగాణ జిల్లాల్లో తుఫాను ప్రభావం సాపేక్షంగా తక్కువగానే ఉండనుంది. అక్కడ వాతావరణం పొడిగా ఉన్నప్పటికీ, ఆకాశం మేఘావృతమై అక్కడక్కడా తేలికపాటి జల్లులు పడే వీలుంది. కానీ, తూర్పు తెలంగాణ జిల్లాల్లో హఠాత్తుగా వీచే ఈదురుగాలులు, ఉరుములతో కూడిన వర్షాల వల్ల చేతికొచ్చిన ఖరీఫ్ పంటలకు కొంతమేర నష్టం వాటిల్లే ప్రమాదం ఉందని, ఆయా జిల్లాల రైతులు ధాన్యం తడవకుండా జాగ్రత్తలు తీసుకోవాలని వ్యవసాయ అధికారులు సూచిస్తున్నారు.

అక్టోబర్ చివరి వారంలో రానున్న ఈ తుఫాను తీవ్రత ప్రధానంగా కోస్తాంధ్ర-ఒడిశా తీరాలపైనే కేంద్రీకృతమై ఉంటుంది. ఆంధ్రప్రదేశ్ ప్రభుత్వం యంత్రాంగాన్ని హై అలర్ట్‌లో ఉంచగా, తెలంగాణ సైతం సరిహద్దు జిల్లాల్లో వాతావరణ మార్పులను నిశితంగా పరిశీలిస్తోంది. రాబోయే 48 గంటల్లో ఈ తుఫాను కచ్చితమైన గమనం , దాటే తీరంపై IMD పూర్తి స్థాయి బులెటిన్లను విడుదల చేయనుంది.

Kalvakuntla Kavitha : తెలంగాణ రక్షణ సేన తొలి శంఖారావం - ఎమ్మెల్సీ బరిలో కవిత పార్టీ.. బిఆర్ఎస్‌ను దాటేస్తారా?

Raja Sekhar Allu — Thu, 22 Oct 2026 10:07:04 +0530

Nalamasa Srikanth Goud Graduate MLC Candidate : తెలంగాణ రాజకీయ యవనికపై కొత్తగా ఆవిర్భవించిన తెలంగాణ రక్షణ సేన ప్రత్యక్ష ఎన్నికల ప్రస్థానానికి అత్యంత వ్యూహాత్మకంగా శ్రీకారం చుట్టింది. ఉమ్మడి వరంగల్-ఖమ్మం-నల్గొండ పట్టభద్రుల ఎమ్మెల్సీ నియోజకవర్గ అభ్యర్థిగా తెలంగాణ ఉద్యమకారుడు, కాకతీయ యూనివర్సిటీ పీహెచ్‌డీ గ్రహీత డాక్టర్ నలమాస శ్రీకాంత్ గౌడ్‌ను పార్టీ అధినేత్రి కల్వకుంట్ల కవిత అధికారికంగా ఖరారు చేశారు. దసరా పర్వదినం శుభ ముహూర్తాన్ని పురస్కరించుకుని తమ పార్టీ తరఫున ప్రత్యక్ష ఎన్నికల బరిలోకి దిగుతున్న తొలి అభ్యర్థిని ప్రకటించడం ద్వారా కవిత తన రాజకీయ ముద్రను స్పష్టంగా చాటుకున్నారు. ప్రధాన పార్టీలైన కాంగ్రెస్, బిఆర్ఎస్, బీజేపీలు ఇంకా సమీక్షలు, ఓటర్ల నమోదు కసరత్తుల్లోనే నిమగ్నమై ఉండగా.. అందరికంటే ముందే బహుజన సామాజికవర్గానికి చెందిన విద్యావంతుడిని బరిలో నిలిపి కవిత రాజకీయంలో తీవ్రమైన వేగాన్ని, దూకుడును ప్రదర్శిస్తున్నారు.

చురుకుగా క్షేత్ర స్థాయి రాజకీయాలు

గులాబీ పార్టీ తో తన రాజకీయ బంధం తెగిపోయిన తర్వాత ఆవిర్భవించిన తెలంగాణ రక్షణ సేనను కేవలం ఒక ప్రాంతీయ వేదికగా కాకుండా, క్షేత్రస్థాయిలో ప్రత్యామ్నాయ శక్తిగా నిలబెట్టేందుకు కవిత అత్యంత ప్రతిష్టాత్మకంగా వ్యవహరిస్తున్నారు. బిఆర్ఎస్ ప్రస్తుతం ఎదుర్కొంటుంది కేవలం నాయకత్వ లేమి మాత్రమే కాదని, క్షేత్రస్థాయి పోరాట పటిమ లోపించిందనే భావన ప్రజల్లో ఉందనేది పొలిటికల్ సర్కిళ్ల టాక్. సరిగ్గా ఈ అవకాశాన్ని పసిగట్టిన కవిత.. బిఆర్ఎస్ వదిలేసిన తెలంగాణ ఆత్మగౌరవం , బహుజన నాయకత్వం, ఉద్యమకారుల సంక్షేమం అనే ప్రధాన అజెండాలను తన భుజస్కంధాలపైకి ఎత్తుకున్నారు. బిఆర్ఎస్ కంటే మరింత దూకుడుగా రేవంత్ రెడ్డి సర్కార్‌ను ప్రశ్నిస్తూ, ప్రజా సమస్యలపై ప్రెస్ మీట్లు, క్షేత్రస్థాయి పర్యటనలతో మీడియా అటెన్షన్‌ను సునాయాసంగా రాబట్టుకుంటున్నారు.

ఉద్యమకారునికి సీటు

తొలి అభ్యర్థిగా బీసీ సామాజిక వర్గానికి చెందిన, తెలంగాణ జాగృతి ఆవిర్భావం నుంచి తనతో కలసి నడిచిన ఉద్యమకారుడు శ్రీకాంత్ గౌడ్‌ను ఎంచుకోవడం వెనుక సుదీర్ఘ పొలిటికల్ క్యాలిక్యులేషన్ ఉంది. వరంగల్-ఖమ్మం-నల్గొండ పట్టభద్రుల స్థానం అనేది విద్యావంతులు, యువత, ఉద్యోగుల ఓట్లతో ముడిపడి ఉన్న అత్యంత చైతన్యవంతమైన నియోజకవర్గం. ఇక్కడ బహుజన ఓటు బ్యాంకుతో పాటు విద్యావంతుల మద్దతు సాధించగలిగితే.. అది కొత్త పార్టీకి ఊహించని నైతిక విజయాన్ని అందిస్తుంది. గతం నుంచి బహుజనుల గొంతుకగా నిలిచిన కవిత, తన మాటలకు కట్టుబడి మొదటి అవకాశం వెనుకబడిన తరగతుల బిడ్డకే కట్టబెట్టారనే సందేశాన్ని క్యాడర్‌లోకి బలంగా తీసుకెళ్లగలిగారు.

బీఆర్ఎస్ కంటే ముందే

బిఆర్ఎస్ కంటే ముందే అభ్యర్థిని ప్రకటించి ప్రచారంలోకి దూకడం ద్వారా కవిత తన సొంత అన్న కేటీఆర్, హరీష్ రావుల నేతృత్వంలోని బిఆర్ఎస్ యంత్రాంగాన్ని ఒత్తిడిలోకి నెట్టారు. బిఆర్ఎస్ డిఫెన్సివ్ మోడ్‌లో ఉండి లీగల్ పోరాటాలు, అంతర్గత సమీక్షలకే పరిమితమైన వేళ.. కవిత మాత్రం కరీంనగర్ జిల్లా కమిటీల ఏర్పాటు, జిల్లాల పర్యటనలు , ఎమ్మెల్సీ ఎన్నికల కో-ఆర్డినేటర్‌గా సయ్యద్ ఇస్మాయిల్‌ను నియమించడం వంటి వరుస చర్యలతో పార్టీ యంత్రాంగాన్ని పరుగెత్తిస్తున్నారు. ఇది బిఆర్ఎస్ శ్రేణుల్లో అసలైన పోరాట పటిమ కవిత వద్దే ఉందా అనే ఆసక్తికర చర్చకు తెరలేపింది. ఈ గ్రాడ్యుయేట్ స్థానంలో పోటీ చేయడం కవిత పార్టీకి పూలబాట ఏమీ కాదు. అధికారంలో ఉన్న కాంగ్రెస్ యంత్రాంగం , బలమైన నెట్‌వర్క్ ఉన్న బీజేపీ ఈ స్థానంపై కన్నేసి విస్తృతంగా ఓటర్ల నమోదు ప్రక్రియను సాగిస్తున్నాయి. గ్రాడ్యుయేట్ ఎన్నికల్లో గెలవాలంటే కేవలం నాయకుడి క్రేజ్ మాత్రమే సరిపోదు; బూత్ స్థాయిలో పట్టభద్రులను ఓటర్లుగా నమోదు చేయించి, పోలింగ్ కేంద్రం వరకు తీసుకెళ్లే బలమైన క్యాడర్ నిర్మాణం అత్యవసరం. నిధులు, నెట్‌వర్క్ విషయంలో జాతీయ , ప్రాంతీయ దిగ్గజాలతో పోలిస్తే కొత్తగా ఏర్పాటైన తెలంగాణ రక్షణ సేన ఎంతవరకు తట్టుకోగలదనేది ప్రధాన సవాలు.

వరంగల్-ఖమ్మం-నల్గొండ పట్టభద్రుల స్థానంలో అభ్యర్థి ప్రకటన అనేది కవిత వేసిన మొదటి పొలిటికల్ మాస్టర్ స్ట్రోక్ . ఈ ఎన్నికల ఫలితం ఎలా ఉన్నప్పటికీ.. తాను సీరియస్ పాలిటిక్స్ చేస్తున్నానని, వెనకడుగు వేసే ప్రసక్తే లేదని విపక్ష కాంగ్రెస్, బీజేపీలతో పాటు సొంత కుటుంబ మూలాలున్న బిఆర్ఎస్‌కు కూడా కవిత చాలా స్పష్టమైన సంకేతాన్ని పంపారు. రాబోయే రోజుల్లో తెలంగాణ రక్షణ సేన సాధించే ఓట్ల శాతమే, రాష్ట్రీయ రాజకీయాల్లో కవిత భవిష్యత్ పాత్రను నిర్ణయించనుంది.

AICC Maha Garjana Delhi: నవంబర్ 1న హస్తినలో ఏఐసీసీ మహా గర్జన - హైదరాబాద్ సభ రద్దు వెనుక రాజకీయం ఇదేనా?

Raja Sekhar Allu — Thu, 22 Oct 2026 08:39:45 +0530

Hyderabad Congress Rally Cancelled: ఆల్ ఇండియా కాంగ్రెస్ కమిటీ ప్రతిష్టాత్మకంగా తలపెట్టిన మహా గర్జన భారీ బహిరంగ సభ వేదిక ఆకస్మికంగా హైదరాబాద్ నుంచి నవంబర్ 1న ఢిల్లీలోని చారిత్రాత్మక రామ్‌లీలా మైదానానికి మారింది. తొలత ఈ జాతీయ స్థాయి శక్తి ప్రదర్శనను తెలంగాణ రాజధాని హైదరాబాద్ వేదికగా నిర్వహించాలని భావించినప్పటికీ, అనూహ్యంగా వ్యూహాన్ని మార్చుకుని జాతీయ రాజధాని వైపు కాంగ్రెస్ అగ్రనాయకత్వం అడుగులు వేసింది. దీంతో తెలంగాణలోని గ్రామస్థాయి సర్పంచ్‌ల నుంచి శాసనసభ్యులు, ఎంపీలు , మంత్రుల దాకా అధికార యంత్రాంగం, పార్టీ కేడర్ అంతా హస్తిన బాట పట్టాల్సిన పరిస్థితి ఏర్పడింది. ఈ భారీ తరలింపు బాధ్యతను ఏఐసీసీ నేరుగా తెలంగాణ ప్రదేశ్ కాంగ్రెస్ కమిటీ అధ్యక్షుడు బి. మహేష్ కుమార్ గౌడ్ భుజస్కంధాలపై మోపడం రాజకీయ వర్గాల్లో హాట్ టాపిక్‌గా మారింది.

హైదరాబాద్ సభను ఎందుకు వాయిదా వేసుకున్నట్లు?

ముందుగా అనుకున్నట్లుగా హైదరాబాద్‌లో ఈ సభను నిర్వహించకుండా చివరి నిమిషంలో వెనక్కి తగ్గడం వెనుక బలమైన రాజకీయ, ఆత్మరక్షణ కారణాలు ఉన్నాయనే ప్రచారం జోరందుకుంది. తెలంగాణలో కాంగ్రెస్ పార్టీ పూర్తి మెజారిటీతో అధికారంలో ఉన్న తరుణంలో.. స్వయంగా తమ సొంత పాలన సాగుతున్న రాజధానిలోనే జాతీయ స్థాయి నిరసన లేదా ఆందోళన సభను నిర్వహిస్తే, అది విపక్షాలకు బలమైన రాజకీయ అస్త్రంగా మారే ప్రమాదం ఉందనే అభిప్రాయం వ్యక్తమైంది. "అధికారంలో ఉండి కూడా హైదరాబాద్‌లో సభ పెడుతున్నారంటే మీ ప్రభుత్వ గెలుపుపై మీకే నమ్మకం లేదా?" అని బీఆర్ఎస్, బీజేపీలు ప్రశ్నించే అవకాశం ఉందనే ఉద్దేశంతోనే కాంగ్రెస్ అధిష్టానం ఈ వెనకడుగు వేసినట్లు విశ్లేషకులు భావిస్తున్నారు.

సొంత పార్టీ గెలుపుపై అపనమ్మకం వ్యక్తమయినట్లేనా?

మరోవైపు, తెలంగాణ ప్రభుత్వం ఏర్పాటై మూడేళ్లు గడుస్తున్న సమయంలో క్షేత్రస్థాయిలో రైతుల ఎల్ నినో నష్టపరిహారం, పవర్ ట్రూ-అప్ ఛార్జీల వడ్డన , మూసీ ప్రక్షాళన వంటి అంశాలపై ప్రజల నుంచి వ్యక్తమవుతున్న అసంతృప్తి కూడా ఈ నిర్ణయంపై ప్రభావం చూపినట్లు తెలుస్తోంది. హైదరాబాద్‌లో సభ పెడితే జనసమీకరణలో ఏమాత్రం లోటుపాట్లు జరిగినా, లేదా ప్రభుత్వంపై ప్రజా వ్యతిరేకత ఉందని విపక్షాలు ట్రోల్ చేసినా అది పీసీసీ విజయంపైనే పెను సందేహాలను రేకెత్తిస్తుంది. అందుకే, అధికారంలో ఉన్న సొంత గడ్డపై ఎలాంటి రిస్క్ తీసుకోకుండా సభను నేరుగా కేంద్రంపై ఒత్తిడి పెంచేందుకు ఢిల్లీకి తరలించడమే సురక్షితమైన మార్గమని భావించారు.

సీఈసీ రాజీనామాకు ఒత్తిడి

ఢిల్లీ రామ్‌లీలా మైదాన్‌లో జరగనున్న ఈ మహా గర్జన కు ఇండియా కూటమి భాగస్వామ్య పక్షాలను సైతం సమీకరిస్తుండటంతో, దీని ప్రాధాన్యత జాతీయ స్థాయికి చేరింది. కేంద్రంలోని మోదీ ప్రభుత్వ విధానాలు, దర్యాప్తు సంస్థల దుర్వినియోగం , నిరుద్యోగం వంటి అంశాలపై ఏఐసీసీ సమరశంఖం పూరిస్తోంది. ఈ క్రమంలోనే దక్షణాది నుంచి ముఖ్యంగా కాంగ్రెస్ అధికారంలో ఉన్న తెలంగాణ నుంచి భారీ ఎత్తున జనసమీకరణ చేసి ఢిల్లీ పీఠాన్ని కదిలించాలని రేవంత్ రెడ్డి సర్కార్‌పై ఏఐసీసీ భారం మోపింది. తెలంగాణ కాంగ్రెస్ కేడర్‌ను హస్తినకు తరలించే బాధ్యతను పీసీసీ అధ్యక్షుడు మహేష్ కుమార్ గౌడ్ స్వయంగా పర్యవేక్షిస్తున్నారు. రాష్ట్రం నుంచి ప్రతి నియోజకవర్గం నుంచి ప్రత్యేక రైళ్లు, బస్సులు ఏర్పాటు చేసి పదివేల మందికి పైగా ద్వితీయ శ్రేణి నేతలు, సర్పంచ్‌లు, కౌన్సిలర్లను ఢిల్లీకి తరలించేందుకు రూట్ మ్యాప్ సిద్ధం చేశారు. మంత్రులు, సీనియర్ ఎమ్మెల్యేలు కచ్చితంగా తమ అనుచరగణంతో ఢిల్లీలో హాజరవ్వాలని ఇప్పటికే అంతర్గత ఆదేశాలు జారీ అయ్యాయి. దీనివల్ల హైదరాబాద్‌లో నిర్వహించాల్సిన భారాన్ని ఢిల్లీ తరలింపు ద్వారా భుజాన వేసుకున్నట్లయింది.

హైదరాబాద్ సభ రద్దు వెనుక సొంత ప్రభుత్వ ప్రతిష్టను కాపాడుకునే డిఫెన్సివ్ వ్యూహం ఉన్నప్పటికీ, ఢిల్లీలో జాతీయ స్థాయి పవర్ షో ద్వారా రేవంత్ రెడ్డి సర్కార్ తన పట్టును అధిష్టానానికి నిరూపించుకోవడానికి ఇది ఒక అవకాశంగా మారింది. సొంత రాజధానిలో సభ పెట్టి ఉంటే వచ్చే విమర్శల నుంచి తప్పించుకున్న కాంగ్రెస్, ఇప్పుడు హస్తినలో ఏ స్థాయిలో జన సమీకరణ చేసి తన శక్త్యనుయుక్తులను నిరూపించుకుంటుందో నవంబర్ 1 నాటి మహా గర్జన స్పష్టం చేయనుంది.

Mancherial Politics: మంచిర్యాలలో మంత్రి వివేక్, ఎమ్మెల్యే ప్రేమ్‌సాగర్ రావు వర్గపోరు- పోలీసులు అలర్ట్

Shankar Dukanam — Wed, 21 Oct 2026 15:52:00 +0530

Mancherial Congress Politics | తెలంగాణలోని మంచిర్యాల నియోజకవర్గంలో కాంగ్రెస్ పార్టీలోని అంతర్గత వర్గపోరు ముదిరి, తీవ్ర ఉద్రిక్తతలకు దారితీసింది. పండుగ రోజుల్లో చోటుచేసుకున్న వరుస దాడులతో నియోజకవర్గంలో రాజకీయ వాతావరణం ఒక్కసారిగా వేడెక్కింది. సద్దుల బతుకమ్మ రోజున మంచిర్యాల జిల్లా దండేపల్లి మండలం తాళ్లపేటలో జరిగిన వివాదం సదుమణగక ముందే, దసరా రోజున మరోసారి 2 వర్గాల మధ్య గొడవలు జరిగాయి. ఈ ఘర్షణలకు సంబంధించి రాష్ట్ర మంత్రి వివేక్ వెంకటస్వామి వర్గానికి చెందిన పలువురు కాంగ్రెస్ కార్యకర్తలపై పోలీసులు కేసులు నమోదు చేశారు.

మరోవైపు కాంగ్రెస్ నేత జగన్ మోహన్ రావు నివాసంపై మంచిర్యాల ఎమ్మెల్యే ప్రేమ్‌సాగర్ రావు వర్గీయులు దాడికి పాల్పడే అవకాశం ఉందన్న సమాచారంతో పోలీసులు అప్రమత్తమయ్యారు. ముందస్తు జాగ్రత్త చర్యగా జగన్ మోహన్ రావు ఇంటి వద్ద భారీగా పోలీసు బలగాలను మోహరించారు. నేతల మధ్య ఉన్న పాత కక్షలు దాడుల వరకు వెళ్లడంతో స్థానికంగా తీవ్ర రాజకీయ ఉత్కంఠ నెలకొంది. మంచిర్యాల నియోజకవర్గంలో శాంతిభద్రతల సమస్య తలెత్తకుండా జిల్లా పోలీస్ యంత్రాంగం నిరంతరం పరిస్థితిని సమీక్షిస్తోంది.

భద్రత కట్టుదిట్టం చేసిన పోలీసులు

పరిస్థితి చేయిదాటిపోకుండా పోలీసులు భద్రతను కట్టుదిట్టం చేశారు. దండేపల్లి మండలం తాళ్లపేట గ్రామంలో పోలీసుల పహారా కొనసాగుతోంది. ముందస్తు చర్యల్లో భాగంగా మంత్రి వివేక్ వర్గానికి చెందిన మాజీ వైస్ ఎంపీపీ ఆకుల రాజేందర్ నివాసంలో ఉన్న కుటుంబ సభ్యులతో పాటు, గిరిజన మహిళా సర్పంచ్ కుర్సింగ కళావతి, ఉప సర్పంచ్ పుట్టపాక తిరుపతి, మాలమహానాడు నాయకుడు మాడ దయాకర్‌లను పోలీసులు హౌస్ అరెస్ట్ చేశారు.

అధికారంలో ఉన్న కాంగ్రెస్ పార్టీ నేతలే ఇలా బలాబలాలు ప్రదర్శిస్తూ దాడులు చేసుకోవడంతో మంచిర్యాల ప్రజలు, వ్యాపారులు భయాందోళన వ్యక్తం చేస్తున్నారు. మరి ఈ వర్గపోరుకు కాంగ్రెస్ అధిష్టానం ఎలా ముగింపు పలుకుతుందోనని ఉత్కంఠ నెలకొంది.

Also Read: Graduate MLC Elections: గ్రాడ్యుయేట్ ఎమ్మెల్సీ ఎన్నికలు.. మిత్రపక్షాల అసంతృప్తిని చల్లార్చే పనిలో పీసీసీ చీఫ్

Indian Railways Special Trains: పండుగల సీజన్‌లో ప్రయాణికులకు గుడ్‌న్యూస్.. విశాఖపట్నం - సికింద్రాబాద్ మధ్య ప్రత్యేక రైళ్లు

Shankar Dukanam — Wed, 21 Oct 2026 15:03:08 +0530

Trains Between Vizag and Secunderabad | హైదరాబాద్ / విశాఖపట్నం: దసరా పండుగ సీజన్‌లో ప్రయాణించే ప్రయాణికులకు ఇబ్బందిలేని ప్రయాణాన్ని అందించడానికి, అదనపు రద్దీని నివారించడానికి, భారత రైల్వే ప్రకారం డిమాండ్‌పై ప్రత్యేక రైళ్లను నడపాలని నిర్ణయించింది. విశాఖపట్నం, సికింద్రాబాద్ మధ్య ప్రయాణికుల కోసం ప్రత్యేక రైలు సర్వీసులు నడపనున్నారు. అందుకు సంబంధించిన వివరాలు ఇలా ఉన్నాయి.

విశాఖపట్నం - సికింద్రాబాద్ స్పెషల్ ఎక్స్‌ప్రెస్ రైలు నంబర్ 08517 గురువారం, ఆదివారం తేదీలు 22.10.2026, అక్టోబర్ 25.10.2026 న విశాఖపట్నం నుంచి 15:50 గంటలకు బయలుదేరుతుంది. ఈ రైలు దువ్వాడకు 16:18 గంటలకు చేరుకుని 16:20 గంటలకు బయలుదేరి, మరుసటి రోజు ఉదయం 8 గంటలకు సికింద్రాబాద్ చేరుకుంటుంది. అదే రైలు శుక్రవారం, సోమవారం (02 సర్వీసులు) సేవలు అందించనున్నాయి.

తిరుగు ప్రయాణంలో రైలు నంబర్ 08518 సికింద్రాబాద్ - విశాఖపట్నం స్పెషల్ ఎక్స్‌ప్రెస్ శుక్రవారం 23.10.2026, సోమవారం 26.10.2026 న సికింద్రాబాద్ నుండి రాత్రి 8 గంటలకు బయలుదేరుతుంది. ఈ రైలు మరుసటి రోజు ఉదయం 11:18 గంటలకు దువ్వాడ చేరుకుని 11:20 గంటలకు బయలుదేరి, 12:05 గంటలకు విశాఖకు చేరుకుంటుంది. శనివారం, మంగళవారం (02 సర్వీసులు) ఉంటాయి.

మీ రైలు ప్రయాణ అవసరాలన్నింటికీ ఒకే యాప్ – RailOne! టికెట్ బుకింగ్ నుంచి లైవ్ ట్రాకింగ్ వరకు అంతా మీ చేతిలోనే. ఇప్పుడే డౌన్‌లోడ్ చేసుకోండి #RailOne #IndianRailways #SouthCentralRailway #TrainJourney @RailMinIndia https://t.co/QCNmqCPdLH
— South Central Railway (@SCRailwayIndia) October 21, 2026

స్టాప్స్: విశాఖపట్నం నుంచి సికింద్రాబాద్ మధ్య ఇరువైపులా మార్గాల్లో దువ్వాడ, అనకాపల్లి, సామర్లకోట, రాజమండ్రి, భీమవరం టౌన్, గుడివాడ జంక్షన్, విజయవాడ, కృష్ణాకెనాల్, గుంటూరు, మిర్యాలగూడ, నల్గొండ, చర్లపల్లి స్టేషన్లలో రైలు ఆగుతుందని అధికారులు తెలిపారు.

కోచ్ వివరాలు: ఈ రెండు రైళ్లలో మొత్తం 19 కోచ్‌లు ఉంటాయి. ఇందులో 2వ ఎసి - 02, 3వ ఎసి - 04, స్లీపర్ - 07, జనరల్ సెకండ్ క్లాస్ - 04, సెకండ్ క్లాస్ కమ్ లగేజ్, దివ్యాంగుల కోచ్ - 01, జనరేటర్ / బ్రేక్ వ్యాన్ - 01 కోచ్ ఉంటాయి.

Also Read: Jio Platforms Ipo: కేవలం 2 గంటల్లోనే పూర్తి సబ్‌స్క్రైబ్, మెగా ఐపీఓల్లో సరికొత్త రికార్డు

Graduate MLC Elections: గ్రాడ్యుయేట్ ఎమ్మెల్సీ ఎన్నికలు.. మిత్రపక్షాల అసంతృప్తిని చల్లార్చే పనిలో పీసీసీ చీఫ్

ABP Desam — Wed, 21 Oct 2026 13:29:41 +0530

గ్రాడ్యుయేట్ ఎమ్మెల్సీ ఎన్నికల్లో గెలుపే లక్ష్యంగా ముందుకు సాగుతున్న కాంగ్రెస్ పార్టీ.. మిత్రపక్షాల మద్దతు కూడగట్టే ప్రయత్నాలు ముమ్మరం చేసింది. అభ్యర్థుల ప్రకటన సమయంలో తమను సంప్రదించలేదంటూ అసంతృప్తిగా ఉన్న పార్టీలను బుజ్జగించే పనిలో పీసీసీ అధ్యక్షుడు మహేష్ కుమార్ గౌడ్ నిమగ్నమయ్యారు. భవిష్యత్తులో ఎన్నికల సమయంలో ముందస్తు చర్చలు జరుపుతామని, మిత్రపక్షాల డిమాండ్లపై కూడా సానుకూలంగా చర్చిస్తామని చెబుతూ మద్దతు కోరుతున్నట్లు సమాచారం.

ముందుగానే అభ్యర్థుల ప్రకటన

గ్రాడ్యుయేట్ ఎమ్మెల్సీ ఎన్నికలను కాంగ్రెస్ పార్టీ ప్రతిష్ఠాత్మకంగా తీసుకుంది. గెలుపే లక్ష్యంగా ముందస్తు వ్యూహాలతో అడుగులు వేస్తోంది. ఇందులో భాగంగా ఉమ్మడి ఖమ్మం–వరంగల్–నల్గొండ గ్రాడ్యుయేట్ ఎమ్మెల్సీ స్థానానికి రాంరెడ్డి సర్వోత్తమ్ రెడ్డిని, ఉమ్మడి హైదరాబాద్–రంగారెడ్డి–మహబూబ్‌నగర్ స్థానానికి సామ రామ్మోహన్ రెడ్డిని అభ్యర్థులుగా ప్రకటించింది. అభ్యర్థులు ఇప్పటికే క్షేత్రస్థాయిలో ప్రచారానికి అవసరమైన గ్రౌండ్‌వర్క్ ప్రారంభించారు. ఉమ్మడి జిల్లాల్లో కీలక నేతలను కలుస్తూ, సన్నాహక సమావేశాల్లో పాల్గొంటున్నారు.

మిత్రపక్షాల్లో అసంతృప్తి

అయితే అభ్యర్థుల ప్రకటన కాంగ్రెస్‌కు కొత్త సవాలుగా మారింది. మిత్రపక్షాలైన తెలంగాణ జన సమితి, వామపక్ష పార్టీలను సంప్రదించకుండానే అభ్యర్థులను ప్రకటించారనే అసంతృప్తి వ్యక్తమైంది. ఉమ్మడి ఖమ్మం–వరంగల్–నల్గొండ గ్రాడ్యుయేట్ ఎమ్మెల్సీ స్థానంపై తెలంగాణ జన సమితి ఆశలు పెట్టుకోగా.. ఖమ్మం, నల్గొండ జిల్లాల్లో వామపక్ష పార్టీలకు ఉన్న రాజకీయ ప్రాధాన్యం కూడా కీలకంగా మారింది. తమతో చర్చించకుండా నిర్ణయం తీసుకోవడంపై మిత్రపక్షాలు అసంతృప్తిగా ఉన్నట్లు రాజకీయ వర్గాల్లో చర్చ జరుగుతోంది. మరోవైపు, సీపీఎం, సీపీఐ కలిసి ఉమ్మడి అభ్యర్థిని బరిలోకి దించే ఆలోచన చేసినట్లు కూడా ప్రచారం జరిగింది.

Also Read: Congress Politics: గ్రాడ్యుయేట్ ఎమ్మెల్సీ ఎన్నికలపై కాంగ్రెస్ స్పెషల్ ఫోకస్.. 77 మంది ఇంఛార్జిల నియామకం!

మిత్రపక్షాల మద్దతు కోసం పీసీసీ చీఫ్ ప్రయత్నాలు

గ్రాడ్యుయేట్ ఎమ్మెల్సీ ఎన్నికల్లో మిత్రపక్షాల మద్దతు కీలకమని భావిస్తున్న కాంగ్రెస్ నాయకత్వం.. అసంతృప్తి మరింత పెరగకుండా దిద్దుబాటు చర్యలకు దిగింది. ఇందులో భాగంగా పీసీసీ అధ్యక్షుడు మహేష్ కుమార్ గౌడ్ స్వయంగా తెలంగాణ జన సమితి, సీపీఎం నేతలను కలిసి కాంగ్రెస్ అభ్యర్థులకు మద్దతు ఇవ్వాలని కోరినట్లు సమాచారం. రాజకీయంగా మిత్రపక్షాలు ప్రస్తావించిన డిమాండ్లపై కూడా చర్చించి సానుకూల నిర్ణయం తీసుకునే అంశాన్ని పరిశీలిస్తున్నట్లు తెలుస్తోంది. ఇదే క్రమంలో సీపీఐతోనూ చర్చలు జరిపి మిత్రపక్షాల మద్దతును కూడగట్టేందుకు కాంగ్రెస్ సిద్ధమైంది.

సమన్వయమే కీలకం!

గ్రాడ్యుయేట్ ఎమ్మెల్సీ ఎన్నికల్లో గెలుపు కోసం కాంగ్రెస్ పార్టీ అభ్యర్థుల ప్రకటనతో పాటు మిత్రపక్షాల మద్దతుపైనా దృష్టి సారించింది. అయితే అభ్యర్థుల ఎంపికతో ఏర్పడిన అసంతృప్తిని కాంగ్రెస్ నాయకత్వం ఎంతవరకు పరిష్కరిస్తుంది? మిత్రపక్షాలు కాంగ్రెస్ అభ్యర్థులకు మద్దతు ఇస్తాయా? ఎన్నికల నాటికి పార్టీల మధ్య సమన్వయం ఏ స్థాయికి చేరుతుంది? అన్నది ఆసక్తికరంగా మారింది. మిత్రపక్షాల మద్దతు, ఓట్ల సమీకరణ ఈ ఎన్నికల్లో కీలకంగా మారనున్నాయి.

కరెస్పాండెంట్ - హేమ

CM Revanth Reddy: 5 వేల పోలీస్ పోస్టులు భర్తీ, హోంగార్డులకు ఎక్స్‌గ్రేషియా రెట్టింపు: సీఎం రేవంత్ రెడ్డి

Shankar Dukanam — Wed, 21 Oct 2026 11:34:52 +0530

హైదరాబాద్: పోలీస్ శాఖలో కొత్తగా 5 వేల పోస్టుల భర్తీకి చర్యలు తీసుకున్నామని, హోంగార్డులకు ఎక్స్‌గ్రేషియా పెంచుతున్నట్లు తెలంగాణ సీఎం రేవంత్ రెడ్డి ప్రకటించారు. తెలంగాణ రాజధాని హైదరాబాద్‌లోని గోషామహల్ స్టేడియంలో నిర్వహించిన 'పోలీస్ అమరవీరుల సంస్మరణ దినం' కార్యక్రమంలోసీఎం రేవంత్ రెడ్డి పాల్గొని ప్రసంగించారు. ఈ రోజు మనందరికీ ఎంతో భావోద్వేగమైన రోజు, సమాజ రక్షణ కోసం ప్రాణ త్యాగం చేసిన దేవ్ సింగ్, ప్రమోద్ కుమార్, గాజుల సౌమ్య వంటి పోలీసు అమరులను స్మరించుకుంటూ నివాళులు అర్పించారు. శాంతిభద్రతల పరిరక్షణలో వారి త్యాగాలను సమాజం ఎప్పటికీ మరచిపోదని, అమరుల కుటుంబాలు ఒంటరి కావు అని, ప్రభుత్వం వారికి సంపూర్ణ అండగా ఉంటుందన్నారు. రాష్ట్ర అభివృద్ధికి శాంతిభద్రతల పరిరక్షణ ఎంతో ముఖ్యం కాబట్టి, తమ ప్రభుత్వం పోలీస్ శాఖకు అత్యున్నత ప్రాధాన్యత ఇస్తుందని స్పష్టం చేశారు.

కొత్తగా పోస్టుల భర్తీ, అమరులకు పరిహారం పెంపు

పోలీస్ శాఖలో కొత్తగా మరో 5 వేల ఉద్యోగాల భర్తీకి చర్యలు తీసుకున్నామని, 2028 నాటికి అన్ని ఖాళీలను భర్తీ చేస్తామని సీఎం రేవంత్ రెడ్డి ప్రకటించారు. గతంలో ఎన్నడూ లేని విధంగా 112 మంది డీఎస్పీలను నియమించామని, ట్రాన్స్‌జెండర్లను ట్రాఫిక్ అసిస్టెంట్లుగా నియమించి వారి ఆత్మగౌరవాన్ని పెంచామన్నారు. విధి నిర్వహణలో ప్రాణాలు అర్పించిన పోలీసు కుటుంబాలకు ఇచ్చే ఎక్స్‌గ్రేషియాను భారీగా పెంచినట్లు వివరించారు. కానిస్టేబుళ్ల ఎక్స్‌గ్రేషియాను రూ.40 లక్షల నుండి రూ.1 కోటికి, హెడ్ కానిస్టేబుళ్లు/ఏఎస్‌ఐలకు రూ.45 లక్షల నుండి రూ.1 కోటికి, ఎస్‌ఐలకు రూ.45 లక్షలు, ఇన్‌స్పెక్టర్లకు రూ.50 లక్షల నుండి రూ.1.25 కోట్లకు, డీఎస్పీ/అడిషనల్ ఎస్పీలకు రూ.50 లక్షల నుండి రూ.1.50 కోట్లకు, ఎస్పీ/ఐపీఎస్ అధికారులకు రూ.1 కోటి నుండి రూ.2 కోట్లకు పెంచామని తెలిపారు.

విధి నిర్వహణలో ప్రాణాలు కోల్పోయే హోంగార్డుల కుటుంబాలకు ప్రస్తుతం అందిస్తున్న రూ.5 లక్షల ఎక్స్‌గ్రేషియాను రూ.10 లక్షలకు పెంచాలని డీజీపీని సీఎం రేవంత్ రెడ్డి ఆదేశించారు. ఇది కేవలం ఆర్థిక సాయం మాత్రమే కాదని, అమరవీరుల కుటుంబాలకు ప్రభుత్వం ఇచ్చే గౌరవమని వ్యాఖ్యానించారు. అలాగే, హోంగార్డు నుంచి డీజీపీ స్థాయి అధికారుల పిల్లల చదువు కోసం 'యంగ్ ఇండియా పోలీస్ స్కూల్'ను ప్రారంభించామని తెలిపారు.

FCRI Admissions 2026: ములుగు ఎఫ్‌సీఆర్ఐ ఎంఎస్సీ, పీహెచ్‌డీ ఫారెస్ట్రీ కోర్సుల్లో ప్రవేశాలు.. అర్హతలు, సీట్లు వివరాలు ఇలా!

Satyaprasad Bandaru — Wed, 21 Oct 2026 10:52:11 +0530

FCRI Admissions 2026: సిద్దిపేట జిల్లా ములుగులోని ఫారెస్ట్ కాలేజీ అండ్ రీసెర్చ్ ఇన్‌స్టిట్యూట్‌లో 2026–2027 విద్యా సంవత్సరానికి ఎంఎస్సీ ఫారెస్ట్రీ, పీహెచ్‌డీ ఫారెస్ట్రీ కోర్సులలో ప్రవేశాలకు నోటిఫికేషన్ విడుదలైంది.

1. ఎంఎస్సీ ఫారెస్ట్రీ (2 ఇయర్స్ ప్రోగ్రామ్ - 4 సెమిస్టర్లు)

మొత్తం సీట్లు: 16

అర్హతలు:

B.Sc. (Hons.) ఫారెస్ట్రీ డిగ్రీలో కనీసం 7.0 OGPA ఉండాలి (SC/ST/PH అభ్యర్థులకు 6.5 OGPA ఉంటే చాలు).
ICAR-AIEEA-PG 2026 లో అర్హత సాధించి ఉండాలి.

ఎంపిక విధానం:

ఎంట్రన్స్ ఎగ్జామ్‌లో 50% స్కోరు + 50% డిగ్రీ అకడమిక్ రికార్డు ఆధారంగా సెలక్షన్ ఉంటుంది.

సీట్ల కేటాయింపు:

ఫారెస్ట్ బయాలజీ అండ్ ట్రీ ఇంప్రూవ్‌మెంట్: 4 సీట్లు
ఫారెస్ట్ ప్రొడక్ట్స్ అండ్ యుటిలైజేషన్: 2 సీట్లు
ఫారెస్ట్ రీసోర్స్ మేనేజ్‌మెంట్: 7 సీట్లు
సిల్వికల్చర్ అండ్ అగ్రోఫారెస్ట్రీ: 3 సీట్లు

2. Ph.D. ఫారెస్ట్రీ (3 సంవత్సరాల ప్రోగ్రామ్ - 6 సెమిస్టర్లు)

మొత్తం సీట్లు: 10 (7 రెగ్యులర్ + 3 ఇన్-సర్వీస్)

అర్హతలు (రెగ్యులర్ అభ్యర్థులకు):

ICAR/UGC గుర్తింపు పొందిన యూనివర్సిటీ నుండి ఫారెస్ట్రీ లేదా తత్సమాన మాస్టర్స్ డిగ్రీలో కనీసం 7.0 OGPA ఉండాలి (SC/ST/PH అభ్యర్థులకు 6.0 OGPA చాలు).
ICAR-AICE-JRF/SRF ఫారెస్ట్రీ 2026 పరీక్షలకు హాజరై ఉండాలి.
UGC-JRF / CSIR-JRF / DBT-JRF / DST INSPIRE-JRF / GATE అర్హత ఉన్న వారికి ప్రాధాన్యత ఇస్తారు.

ఎంపిక విధానం:

ఎంట్రన్స్ ఎగ్జామ్‌లో 60% స్కోరు + 40% మాస్టర్స్ డిగ్రీ స్కోరు ఆధారంగా సెలక్షన్ ఉంటుంది.

విభాగాల వారీగా సీట్ల కేటాయింపు:

సిల్వికల్చర్ అండ్ అగ్రోఫారెస్ట్రీ: 2 సీట్లు
ఫారెస్ట్ బయాలజీ అండ్ ట్రీ ఇంప్రూవ్‌మెంట్: 2 సీట్లు
ఫారెస్ట్ ప్రొడక్ట్స్ అండ్ యుటిలైజేషన్: 1 సీటు
ఫారెస్ట్ రీసోర్స్ మేనేజ్‌మెంట్: 2 సీట్లు
ఇన్-సర్వీస్ కేటగిరీ: 3 సీట్లు

రిజర్వేషన్లు: 85% సీట్లు స్థానికులకు, 15% సీట్లు అన్‌రిజర్వ్‌డ్‌కు కేటాయిస్తారు.

ముఖ్యమైన తేదీలు, అప్లికేషన్ ఫీజు

ఆన్‌లైన్ దరఖాస్తులు ప్రారంభం: అక్టోబర్ 20 నుంచి
లేటు ఫీజు లేకుండా చివరి తేదీ: నవంబర్ 4
ఆలస్య రుసుముతో (రూ.500) చివరి తేదీ: నవంబర్ 10 (సాయంత్రం 5:00 గంటల వరకు)
అప్లికేషన్ ఫీజు :SC/ST/PH అభ్యర్థులకు: రూ.1,000
ఇతరులకు: రూ.2,000
Also Read: పైలట్ కావాలంటే 10 తర్వాత ఏం చదవాలి? కోర్సు, ట్రైనింగ్, జీతం పూర్తి వివరాలు ఇవే

దరఖాస్తు చేయడం ఎలా?

అధికారిక వెబ్‌సైట్ www.fcrihyd.in ను విజిట్ చేయండి. అడ్మిషన్ నోటిఫికేషన్, అర్హతలు, సీట్ల వివరాలు, ఫీజుల సమాచారాన్ని పూర్తిగా చదవండి. అర్హతను సరిచూసుకుని, అవసరమైన పత్రాలతో ఆన్‌లైన్ లో సబ్మిట్ చేయండి.

Also Read: సీబీఎస్ఈ 10వ తరగతి విద్యార్థులకు బిగ్ రిలీఫ్.. ఉత్తీర్ణత రూల్స్‌లో మార్పుల్లేవ్!

Erravelli Farmhouse Water: కేసీఆర్ ఫామ్‌హౌస్‌కు నీటి రగడ - కాంగ్రెస్ నేతలకు బీఆర్ఎస్ లీగల్ నోటీసుల షాక్!

Raja Sekhar Allu — Wed, 21 Oct 2026 09:40:18 +0530

Kondapochamma Sagar KCR Farmhouse: తెలంగాణ రాజకీయం ఎర్రవల్లిలోని మాజీ ముఖ్యమంత్రి, బీఆర్ఎస్ అధినేత కేసీఆర్ ఫామ్‌హౌస్ చుట్టూ తీవ్ర ఉద్రిక్తతకు దారితీసింది. కాళేశ్వరం ప్రాజెక్టులోని కొండపోచమ్మ సాగర్ జలాశయం నుంచి కేసీఆర్ తన సొంత ఫామ్‌హౌస్‌లోని వ్యవసాయ క్షేత్రాలకు అక్రమంగా నీటిని తరలించుకుంటున్నారని అధికార కాంగ్రెస్ పార్టీ తీవ్ర ఆరోపణలు చేసింది. ఈ అంశంపై అధికార, ప్రతిపక్షాల మధ్య మాటల తూటాలు పేలుతుండగా.. కేసీఆర్ ప్రతిష్టకు భంగం కలిగించేలా అబద్ధపు ప్రచారాలు చేస్తున్నారంటూ బీఆర్ఎస్ లీగల్ సెల్ మంగళవారం రంగంలోకి దిగింది. టిపిసిసి అధ్యక్షుడు మహేష్ కుమార్ గౌడ్, రాష్ట్ర సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి, పెద్దపల్లి ఎంపీ గడ్డం వంశీకృష్ణలకు పరువు నష్టం చట్టం కింద బీఆర్ఎస్ లీగల్ నోటీసులు జారీ చేయడంతో ఈ వ్యవహారం న్యాయస్థానం మెట్లు ఎక్కింది.

ప్రజాధనంతో ఫామ్ హౌస్‌కు కాలువ

అసలు కాంగ్రెస్ వినిపిస్తున్న ప్రధాన ఆరోపణ ఏమిటంటే.. కొండపోచమ్మ సాగర్ కాలువల నిర్మాణం సమయంలో కేసీఆర్ తన ఫామ్‌హౌస్‌కు సమీపం గుండా ప్రత్యేకంగా అండర్‌గ్రౌండ్ పైప్‌లైన్ లేదా అదనపు డిస్ట్రిబ్యూటరీ కాలువలను డిజైన్ చేయించారని కాంగ్రెస్ నేతలు వాదిస్తున్నారు. ప్రజాధనంతో నిర్మించిన ప్రాజెక్టు నీటిని రైతులకు చేరవేయకుండా, కేసీఆర్ తన ఎర్రవల్లి తోటలకు, ఆర్గానిక్ పంటలకు ఉచితంగా వినియోగిస్తున్నారని టీపీసీసీ చీఫ్ మహేష్ కుమార్ గౌడ్, మంత్రి పొంగులేటి తీవ్ర విమర్శలు గుప్పించారు. అంతేకాకుండా, దీనిపై ప్రభుత్వం సమగ్ర విచారణ జరిపి అక్రమ కనెక్షన్లను తొలగిస్తుందని గడ్డం వంశీకృష్ణ హెచ్చరించడంతో రాజకీయ వేడి ఒక్కసారిగా రాజుకుంది.

కాంగ్రెస్ అబద్దపు ప్రచారం అని బీఆర్ఎస్ ఆగ్రహం

కాంగ్రెస్ నేతల వ్యాఖ్యలపై బీఆర్ఎస్ శ్రేణులు , లీగల్ సెల్ అత్యంత ఘాటుగా స్పందించాయి. కేసీఆర్ ఇమేజ్‌ను రాజకీయంగా దెబ్బతీయడానికే కాంగ్రెస్ మార్క్ మైండ్ గేమ్ అబద్ధాలను ప్రచారం చేస్తోందని బీఆర్ఎస్ మండిపడింది. ఎర్రవల్లి ఫామ్‌హౌస్‌లో దశాబ్దాలుగా ఉన్న స్థానిక బోరు బావులు, భూగర్భ జలాలు, చెరువుల ఆధారంగానే వ్యవసాయం జరుగుతోందని, కొండపోచమ్మ సాగర్ నుంచి ఎలాంటి అక్రమ నీటి తరలింపు లేదా పైప్‌లైన్ కనెక్షన్లు లేవని స్పష్టం చేసింది. 48 గంటల్లోగా తమ ఆరోపణలపై బేషరతుగా బహిరంగ క్షమాపణ చెప్పకపోతే రూ. 100 కోట్ల పరువు నష్టం దావా వేస్తామని హెచ్చరిస్తూ ముగ్గురు కాంగ్రెస్ ప్రముఖులకు లీగల్ నోటీసులు పంపింది.

ఈ వివాదం వెనుక కేవలం నీటి సమస్య మాత్రమే కాక, రాజకీయ పైచేయి పోరాటం స్పష్టంగా కనిపిస్తోంది. కాంగ్రెస్ ప్రభుత్వం అధికారంలోకి వచ్చిన నాటి నుంచి కాళేశ్వరం ప్రాజెక్టు డిజైన్, ఎన్డీఎస్‌ఏ విచారణ, మేడిగడ్డ బ్యారేజ్ వైఫల్యాలపై నిరంతరం కేసీఆర్‌ను టార్గెట్ చేస్తూ వస్తోంది. అందులో భాగంగానే ఇప్పుడు ఎర్రవల్లి ఫామ్‌హౌస్ నీటి వినియోగం అంశాన్ని తెరపైకి తెచ్చి, రైతులకు నీళ్లు అందడం లేదని, కేసీఆర్ మాత్రం తన భూములను తడుపుకుంటున్నారనే నరేటివ్‌ను ప్రజల్లోకి తీసుకెళ్లాలని కాంగ్రెస్ వ్యూహరచన చేసింది. , బిఆర్ఎస్ ఈ ఆరోపణలను తిప్పికొట్టడం ద్వారా ప్రభుత్వ వైఫల్యాల నుంచి ప్రజల దృష్టి మళ్లించడానికే కాంగ్రెస్ ఇలాంటి చిల్లర ఆరోపణలు చేస్తోందని ఎదురుదాడికి దిగింది. రాష్ట్రంలో ఎల్ నినో ఎఫెక్ట్, సాగునీటి కొరత రైతుల పంట నష్టపరిహారం వంటి అసలైన ప్రజా సమస్యల నుంచి తప్పించుకోవడానికే కేసీఆర్ ఫామ్‌హౌస్‌పై కాంగ్రెస్ రోజుకో డ్రామా ఆడుతోందని కేటీఆర్, సీనియర్ నేతలు ఆరోపిస్తున్నారు. న్యాయపరంగా గట్టి నోటీసులు ఇవ్వడం ద్వారా కాంగ్రెస్ నేతల నోళ్లకు తాళం వేయవచ్చని బీఆర్ఎస్ ఆశిస్తోంది.

రాజకీయ ఆరోపణలకు లీగల్ నోటీసులా?

కొండపోచమ్మ సాగర్ నుంచి ఎర్రవల్లి ఫామ్‌హౌస్‌కు నీళ్ల తరలింపు వివాదం ఇప్పుడు కేవలం ప్రకటనలకే పరిమితం కాకుండా చట్టపరమైన పోరాటానికి దారితీసింది. కాంగ్రెస్ నేతలు తమ వద్ద ఉన్న ఆధారాలను విచారణ కమిషన్ ముందో, కోర్టు ముందో ఉంచుతారా లేక బీఆర్ఎస్ నోటీసులకు న్యాయపరంగా కౌంటర్ ఇస్తారా అనేది వేచి చూడాల్సి ఉంది. ఈ నీటి వివాదం తెలంగాణ రాజకీయాల్లో ఇంకెన్ని మలుపులు తిరుగుతుందో రానున్న రోజుల్లో తేలనుంది.