Bharat Summit 2026: ప్రపంచ రాజకీయాలకు వేదికగా హైదరాబాద్ ! దావోస్ తరహాలో భాగ్యనగరం అభివృద్ధి: భట్టి విక్రమార్క

Hyderabad Bharat Summit : హైదరాబాద్‌లో భారత్ సమ్మిట్.. 70 దేశాల ప్రతినిధుల రాక, రాహుల్ గాంధీ పర్యటనపై ఉత్కంఠ!

Hema Nidadhana — Thu, 12 Nov 2026 17:29:51 +0530

Revanth Reddy Congress Govt Bharat Summit: తెలంగాణ రాజధాని హైదరాబాద్ మరోసారి అంతర్జాతీయ స్థాయి మేధోమథనానికి, దౌత్య చర్చలకు ప్రధాన వేదిక కానుంది. నవంబర్ 13, 14 తేదీల్లో అత్యంత ప్రతిష్టాత్మకంగా నిర్వహించనున్న రెండో విడత భారత్ సమ్మిట్ కు ప్రపంచవ్యాప్తంగా సుమారు 70 దేశాలకు చెందిన ప్రముఖులు, విధాన నిర్ణేతలు, ప్రతినిధులు హాజరుకానుండటంతో జాతీయ స్థాయిలో రాజకీయ ఆసక్తి నెలకొంది. ప్రజాస్వామ్య పరిరక్షణ, సామాజిక న్యాయం, అంతర్జాతీయ అభివృద్ధి మరియు సమకాలీన భౌగోళిక రాజకీయ అంశాలపై లోతైన చర్చలు జరిపేందుకు ఈ సదస్సు ఒక కీలక వేదికగా నిలవనుంది.

ఈ అంతర్జాతీయ సదస్సు విషయంలో అందరి దృష్టి కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ హైదరాబాద్ పర్యటనపైనే కేంద్రీకృతమైంది. ఈ సమ్మిట్‌కు రాహుల్ గాంధీ హాజరవుతారా? ఒకవేళ ఆయన పర్యటన ఖరారైతే సదస్సులో ఎలాంటి అంశాలపై ప్రసంగిస్తారు? అలాగే రాష్ట్ర నేతలతో ఏమైనా ప్రత్యేక భేటీలు నిర్వహిస్తారా? అనే అంశాలపై రాజకీయ వర్గాల్లో తీవ్ర ఉత్కంఠ కొనసాగుతోంది. రాహుల్ రాకపై అధికారిక షెడ్యూల్‌పై స్పష్టత రావాల్సి ఉన్నప్పటికీ, ఆయన పర్యటన ఖరారైతే తెలంగాణ కాంగ్రెస్ శ్రేణుల్లో నూతన ఉత్సాహం వెల్లివిరియడం ఖాయంగా కనిపిస్తోంది.

మరోవైపు, భారత్ సమ్మిట్ వేదికను కాంగ్రెస్ పార్టీ అంతర్జాతీయ స్థాయిలో తన సిద్ధాంతాలను, ప్రగతిశీల విధానాలను ప్రపంచానికి చాటిచెప్పేందుకు వినియోగించుకుంటుందన్న చర్చ జరుగుతోంది. వివిధ దేశాల నుంచి వచ్చే ప్రతినిధులు, మేధావులతో జరిగే ముఖాముఖి సమావేశాలు, చర్చాగోష్ఠుల ద్వారా అంతర్జాతీయ స్థాయిలో ప్రజాస్వామ్య విలువలు, భారత విదేశాంగ దృక్పథంపై కాంగ్రెస్ తన గళాన్ని బలంగా వినిపించే అవకాశం ఉంది.

అదే సమయంలో, తెలంగాణలో అధికారంలో ఉన్న రేవంత్ రెడ్డి నేతృత్వంలోని కాంగ్రెస్ ప్రభుత్వం ఈ సదస్సును అత్యంత ప్రతిష్టాత్మకంగా తీసుకుని భారీ ఏర్పాట్లు చేస్తోంది. హైదరాబాద్ నగరానికి అంతర్జాతీయ స్థాయిలో మరింత గుర్తింపు తీసుకురావడంతో పాటు, తెలంగాణను ప్రపంచ స్థాయి మేధో చర్చలకు, పెట్టుబడుల ఆకర్షణకు కేంద్రబిందువుగా నిలబెట్టాలన్న లక్ష్యంతో ప్రభుత్వ యంత్రాంగం పనిచేస్తోంది.

నవంబర్ 13, 14 జరగబోయే ఈ రెండు రోజుల 'భారత్ సమ్మిట్'పై దేశ రాజకీయ, దౌత్య వర్గాల దృష్టి నిలిచింది. రాహుల్ గాంధీ రాకపై వీడనున్న ఉత్కంఠ, 70 దేశాల ప్రతినిధుల సమక్షంలో ఈ అంతర్జాతీయ వేదికపై కాంగ్రెస్ నాయకత్వం ఇవ్వబోయే సందేశం రాబోయే రోజుల్లో జాతీయ రాజకీయ సమీకరణాలపై ఎలాంటి ప్రభావం చూపుతుందో వేచి చూడాలి.

Telangana IPS Transfers 2026: తెలంగాణలో భారీగా ఐపీఎస్‌ల బదిలీలు.. హైదరాబాద్ సీపీగా మహేష్ భగవత్, ఫైర్ సర్వీసెస్ డీజీగా సజ్జనార్!

Raja Sekhar Allu — Thu, 12 Nov 2026 17:15:21 +0530

Mahesh Bhagwat New Hyderabad Police Commissioner: తెలంగాణ రాష్ట్ర పోలీసు శాఖలో భారీ ప్రక్షాళన జరిగింది. ముఖ్యమంత్రి రేవంత్ రెడ్డి నేతృత్వంలోని రాష్ట్ర ప్రభుత్వం పరిపాలనా సౌలభ్యం, శాంతిభద్రతల పర్యవేక్షణలో వేగం పెంచే దిశగా ఒకేసారి 21 మంది ఐపీఎస్ అధికారులను బదిలీ చేస్తూ గురువారం కీలక ఉత్తర్వులు జారీ చేసింది. ప్రభుత్వ ప్రధాన కార్యదర్శి సంజయ్ జాజు జారీ చేసిన ఈ ఉత్తర్వుల్లో అత్యంత కీలకమైన హైదరాబాద్ నగర పోలీస్ కమిషనర్ మార్పుతో పాటు, అవినీతి నిరోధక శాఖ , శాంతిభద్రతలు , ఆర్టీసీ , సివిల్ సప్లైస్ వంటి ప్రధాన విభాగాలకు కొత్త అధిపతులను నియమించారు.

హైదరాబాద్ సీపీ సజ్జనార్ బదిలీ

ఈ బదిలీల ప్రక్రియలో అత్యంత చర్చనీయాంశంగా మారిన అంశం సీనియర్ ఐపీఎస్ అధికారి వి.సి. సజ్జనార్ బదిలీ. ఇప్పటివరకు హైదరాబాద్ నగర పోలీస్ కమిషనర్‌గా వ్యవహరించిన సజ్జనార్‌ను ఆ కీలక బాధ్యతల నుంచి తప్పించి, తెలంగాణ ఫైర్, డిజాస్టర్ రెస్పాన్స్, ఎమర్జెన్సీ అండ్ సివిల్ డిఫెన్స్ డైరెక్టర్ జనరల్ గా బదిలీ చేశారు. దీనితో పాటు తదుపరి ఉత్తర్వులు వెలువడే వరకు డీజీ, స్పెషల్ ప్రొటెక్షన్ ఫోర్స్ పూర్తి అదనపు బాధ్యతలను కూడా ఆయనకు అప్పగించారు. హైదరాబాద్ సీపీ వంటి అత్యంత ప్రభావవంతమైన పోస్టు నుంచి సజ్జనార్‌ను అగ్నిమాపక, విపత్తు నిర్వహణ విభాగానికి మార్చడం పోలీసు, రాజకీయ వర్గాల్లో చర్చకు దారితీసింది.

మహేష్ భగవత్‌కు సీపీ పోస్టింగ్

సజ్జనార్ స్థానంలో నూతన హైదరాబాద్ పోలీస్ కమిషనర్‌గా 1995 బ్యాచ్‌కు చెందిన సీనియర్ ఐపీఎస్ అధికారి మహేష్ మురళీధర్ భగవత్ నియమితులయ్యారు. ఇప్పటివరకు రాష్ట్ర శాంతిభద్రతల విభాగం డీజీపీ గా పనిచేసిన మహేష్ భగవత్‌కు రాజధాని శాంతిభద్రతల పర్యవేక్షణ బాధ్యతలను ప్రభుత్వం అప్పగించింది. గతంలో రాచకొండ కమిషనర్‌గా సుదీర్ఘకాలం పనిచేసిన అనుభవం ఉన్న భగవత్ నియామకం, రాజధాని పోలీసింగ్‌లో కీలక మార్పులకు సంకేతంగా భావిస్తున్నారు. మరోవైపు, పోస్టింగ్ కోసం ఎదురుచూస్తున్న 2001 బ్యాచ్ అధికారి అకున్ సబర్వాల్ *‌ను అదనపు డీజీపీ గా నియమించడంతో పాటు, కోఆర్డినేషన్, టెక్నికల్ సర్వీసెస్ విభాగాల అదనపు బాధ్యతలను అప్పగించారు.

ఏసీబీ డైరక్టర్ జనరల్‌గా చారు సిన్హా

సీనియర్ మహిళా ఐపీఎస్ అధికారిణి చారు సిన్హా పూర్తిస్థాయి ఏసీబీ డైరెక్టర్ జనరల్‌గా బదిలీ అయ్యారు. అంతేకాకుండా ఆమెకు సీఐడీ డీజీపీగా పూర్తి అదనపు బాధ్యతలు కొనసాగించారు. జైళ్ల శాఖ డీజీగా ఉన్న డాక్టర్ సౌమ్య మిశ్రా ను మహిళా భద్రత, షీ టీమ్స్ , భరోసా విభాగం డీజీపీగా నియమించగా, స్వాతి లక్రా జైళ్ల శాఖ డీజీగా బదిలీ అయ్యారు. గ్రేహౌండ్స్, ఆక్టోపస్ ఆపరేషన్స్ డీజీపీగా ఉన్న డాక్టర్ అనిల్ కుమార్ ను టీజీఎస్‌ఆర్టీసీ వీసీ అండ్ ఎండీగా నియమించారు.

అలాగే, ఇప్పటివరకు ఆర్టీసీ ఎండీగా ఉన్న వై. నాగిరెడ్డి ని పౌరసరఫరాల శాఖ కమిషనర్, ఎక్స్-అఫీషియో ప్రిన్సిపల్ సెక్రటరీగా బదిలీ చేశారు. ప్రస్తుతం ఆ స్థానంలో ఉన్న ఎం. స్టీఫెన్ రవీంద్ర ను కొత్తగా ఏర్పాటైన తెలంగాణ ట్రాఫిక్ మేనేజ్‌మెంట్, రోడ్ అండ్ రైల్ సేఫ్టీ బ్యూరో డైరెక్టర్‌గా నియమించారు. ఫైర్ సర్వీసెస్ డీజీగా ఉన్న విక్రమ్ సింగ్ మాన్ గ్రేహౌండ్స్ అండ్ ఆక్టోపస్ ఆపరేషన్స్ డీజీపీగా, మల్టీజోన్-1 ఐజీగా ఉన్న ఎస్. చంద్రశేఖర్ రెడ్డి ఏసీబీ డైరెక్టర్‌గా బదిలీ అయ్యారు. ఇంటెలిజెన్స్ ఐజీగా ఉన్న కార్తికేయ ను మల్టీజోన్-1 ఐజీగా, ఐసీసీసీ డైరెక్టర్ అదనపు బాధ్యతలతో నియమించారు.

Major IPS reshuffle in #Telangana, key police officers transferred. Mahesh Muralidhar Bhagwat - #Hyderabad Police Commissioner V.C. Sajjanar - Director General, Telangana Fire, Disaster Response, Emergency and Civil Defence https://t.co/KWcUDqFQdQ
— సందీప్ ఎరుకల Sandeep Erukala (@ESandeep97) November 12, 2026

సజ్జనార్ వంటి కీలక అధికారిని లూప్ లైన్ తరహా విభాగానికి పంపడం, మహేష్ భగవత్, అకున్ సబర్వాల్, చారు సిన్హా, కార్తికేయ వంటి అధికారులకు శాంతిభద్రతలు, ఏసీబీ, ఇంటెలిజెన్స్ విభాగాల్లో కీలక బాధ్యతలు అప్పగించడం ద్వారా రేవంత్ సర్కార్ పోలీసు వ్యవస్థపై తన పట్టును మరింత బిగించినట్లయింది. త్వరలో జరగబోయే పాలనాపరమైన కార్యక్రమాలు, క్షేత్రస్థాయి పర్యటనల నేపథ్యంలోనే ఈ భారీ బదిలీలకు శ్రీకారం చుట్టినట్లు స్పష్టమవుతోంది.

Sekhar Master : శేఖర్ మాస్టర్ కారుకు ప్రమాదం - అసలేం జరిగిందంటే?

Ganesh Guptha — Thu, 12 Nov 2026 12:08:29 +0530

Tollywood Choregrapher Sekhar Master Car Accident : టాలీవుడ్ ఫేమస్ కొరియోగ్రాఫర్ శేఖర్ మాస్టర్ ప్రయాణిస్తున్న కారు ప్రమాదానికి గురైంది. బుధవారం రాత్రి చిరంజీవి 'కాకా' మూవీ సాంగ్ షూటింగ్ కంప్లీట్ చేసుకుని హైదరాబాద్ తిరిగి వస్తుండగా... ముచ్చింతల్ వద్ద ఈ ఘటన జరిగింది.

పండ్ల లోడ్‌తో వస్తున్న లారీ నాలుగు రోడ్ల కూడలి వద్ద శేఖర్ మాస్టర్ కారును ఢీకొట్టింది. ప్రమాదంలో కారు దెబ్బతినగా ఆయనకు స్వల్ప గాయాలైనట్లు తెలుస్తోంది. ఆయనతో పాటు ఉన్న వారికి కూడా స్వల్ప గాయాలతో ప్రమాదం నుంచి బయటపడ్డారు. మహేశ్వరం పరిధిలోని గొల్లూరులో షూటింగ్ పూర్తి చేసుకొని తిరిగివస్తుండగా ప్రమాదం జరిగినట్లు సమాచారం. ఘటనలో కారు నుజ్జు నుజ్జు కాగా... ప్రమాదం తర్వాత శేఖర్ మాస్టర్ వేరే కారులో హైదరాబాద్ వెళ్లిపోయారు. ఈ ప్రమాదంపై పోలీసులు కేసు నమోదు చేసి దర్యాప్తు చేస్తున్నారు.

Also Read : Romantic Drama Series OTT : ఓటీటీలోకి వచ్చేస్తోన్న రొమాంటిక్ డ్రామా - అదితి రావ్ హైదరీ 'ఓ సాథీ రే' స్ట్రీమింగ్ ఎప్పుడు, ఎక్కడంటే?

NOTE : మరిన్ని సినిమా వార్తలు, గాసిప్స్, ఓటీటీ అప్డేట్స్, వెబ్ సిరీస్‌లు, టాలీవుడ్, బాలీవుడ్ హీరోయిన్స్ లేటెస్ట్ సోషల్ మీడియా అప్డేట్స్, టీవీ సీరియల్స్ లేటెస్ట్ ఎపిసోడ్స్ కోసం ఇక్కడ క్లిక్ చేయండి.

Telangana Volunteer System : తెలంగాణలో వలంటీర్ల వ్యవస్థపై కసరత్తు - రేవంత్ మాస్టర్ ప్లాన్.. సంక్షేమానికి తోడ్పాటా, పొలిటికల్ రిస్కా?

Raja Sekhar Allu — Thu, 12 Nov 2026 10:57:56 +0530

Revanth Government 1 Lakh Volunteers Recruitment Proposal: తెలంగాణ రాష్ట్ర రాజకీయాల్లో సంక్షేమ పథకాల అమలు, పరిపాలనా వికేంద్రీకరణ చుట్టూ మళ్లీ చర్చ మొదలైంది. ప్రభుత్వం తరఫున ఆరు గ్యారెంటీలతో పాటు పంపిణీ చేసే వివిధ సంక్షేమ ఫలాలను నేరుగా లబ్ధిదారుల గడప ముందరికే చేర్చేందుకు, క్షేత్రస్థాయి ఫిర్యాదులను తక్షణమే పరిష్కరించేందుకు ముఖ్యమంత్రి ఎనుముల రేవంత్ రెడ్డి సర్కార్ సుమారు లక్ష మందితో నూతన వలంటీర్ల వ్యవస్థ ను ఏర్పాటు చేయడానికి కసరత్తు చేస్తోందన్న ప్రచారం ఊపందుకుంది. అధికారంలోకి వచ్చిన నాటి నుంచే వార్డు, బూత్ స్థాయి పర్యవేక్షణ యూనిట్ల ద్వారా స్థానిక సమస్యలు పరిష్కరించాలని భావిస్తున్న సీఎం ఆలోచనలకు ఈ ప్రతిపాదిత యంత్రాంగం ఒక రూపమిచ్చేలా కనిపిస్తోంది.

ప్రజాబలం పేరుతో పల్లెబాట

త్వరలోనే ప్రజాబలం పేరుతో పల్లెబాట పట్టి ప్రతి గ్రామాన్ని స్వయంగా సందర్శించాలని సీఎం రేవంత్ రెడ్డి భావిస్తున్నారు. ప్రభుత్వం ప్రకటించిన హామీలు, పింఛన్లు, ఇందిరమ్మ ఇళ్లు, రేషన్ కార్డుల కేటాయింపుల్లో దళారీల ప్రమేయం లేకుండా చూసేందుకు ఒక పటిష్టమైన డెలివరీ నెట్‌వర్క్ అత్యంత అవసరమని కాంగ్రెస్ హైకమాండ్ భావిస్తోంది. సచివాలయ స్థాయి ఉత్తర్వుల నుంచి క్షేత్రస్థాయి అమలు మధ్య ఉన్న కమ్యూనికేషన్ గ్యాప్ ను భర్తీ చేయడానికి గ్రామ స్థాయిలో జవాబుదారీతనం ఉన్న పౌర సేవకులను సిద్ధం చేయడం ద్వారా పాలనకు కొత్త వేగం అందించవచ్చనేది ఈ అడుగుల వెనుక ఉన్న ప్రధాన ఉద్దేశంగా చెబుతున్నారు.

100 కుటుంబాలకు ఒక ప్రతినిధిని ఉంచితే రాజకీయంగా లాభం

గ్రామీణ ప్రాంతాల్లో చదువుకున్న వేలాది మంది నిరుద్యోగ యువతకు గౌరవ వేతనంతో కూడిన ఒక నియామక వేదికను అందుబాటులోకి తెచ్చి, వారి ద్వారా ప్రభుత్వ కార్యక్రమాల డేటాను ఎప్పటికప్పుడు సేకరించడం మరొక ప్లస్ పాయింట్. ప్రతి 50 లేదా 100 కుటుంబాలకు ఒక ప్రతినిధిని జవాబుదారీగా ఉంచితే, ప్రజల నుంచి వచ్చే ఆర్జీలు, సమస్యలు వేగంగా అధికారుల వద్దకు చేరుతాయి. ప్రభుత్వం నేరుగా ప్రజల ఇళ్ల వద్దకే సేవలు అందిస్తోందనే నమ్మకాన్ని కల్పించడానికి ఈ నెట్‌వర్క్ ఒక శక్తివంతమైన సాధనంగా ఉపయోగపడుతుందని వ్యూహకర్తలు అంచనా వేస్తున్నారు.

అనేక సవాళ్లు

అయితే, ఈ వలంటీర్ల ఆలోచనకు పొలిటికల్ సర్కిళ్లలో పొగబెడుతున్న సవాళ్లు, ప్రతికూలతలు తక్కువేమీ కావు. సరిహద్దు పొరుగు రాష్ట్రమైన ఆంధ్రప్రదేశ్‌లో వైఎస్సార్‌సీపీ హయాంలో సుమారు 2.5 లక్షల మందితో నడిచిన వలంటీర్ల వ్యవస్థ ప్రజాదరణ పొందినప్పటికీ, రాజకీయంగా తీవ్ర విమర్శల పాలైంది. అధికార పార్టీ తమ సొంత కేడర్‌కు ఉద్యోగాలు ఇచ్చుకోవడానికి, ప్రజల వ్యక్తిగత డేటాను సేకరించి ఓటు బ్యాంకును శాసించడానికి, చివరకు ప్రైవేటు సైన్యం గా వాడుకోవడానికి ఆ వ్యవస్థను దుర్వినియోగం చేశారన్న ఆరోపణలు వ్యక్తమయ్యాయి. ఏపీలో అధికార మార్పిడికి ఆ వ్యవస్థ దుర్వినియోగం కూడా ఒక కారణంగా మారిన చరిత్రను రాజకీయ వర్గాలు గుర్తుచేస్తున్నాయి. ఇదే విధానాన్ని తెలంగాణలో ప్రవేశపెడితే ప్రతిపక్షాలైన బీఆర్ఎస్, బీజేపీలకు ప్రభుత్వానికి వ్యతిరేకంగా పెద్ద రాజకీయ అస్త్రాన్ని అందించినట్లవుతుందనే హెచ్చరికలు ఉన్నాయి.

రివర్స్ అయ్యే ప్రమాదం కూడా ఉంది!

ప్రభుత్వ నిధులతో కాంగ్రెస్ పార్టీ కార్యకర్తలకు జీతాలు ఇస్తున్నారు , శాశ్వత ఉద్యోగాల నోటిఫికేషన్లు ఇవ్వకుండా కాంట్రాక్టు గౌరవ వేతన వ్యవస్థను తీసుకొస్తున్నారు అనే ప్రచారాన్ని నిరుద్యోగుల్లోకి పంపడానికి ప్రతిపక్షాలు సిద్ధంగా ఉన్నాయి. దానికితోడు డేటా ప్రైవసీ, ఓటర్ల డేటా దుర్వినియోగం వంటి న్యాయపరమైన అంశాలు కూడా సవాలుగా మారే ప్రమాదం ఉంది. ప్రభుత్వ పథకాల డెలివరీలో పారదర్శకత పెంచేందుకు లక్ష మంది వలంటీర్ల ఆలోచన అడ్మినిస్ట్రేటివ్‌గా ఒక మంచి ప్రతిపాదనే కావచ్చు. కానీ, దానిని ఏ రాజకీయ రంగు పడకుండా పూర్తిగా నిష్పాక్షికమైన ప్రభుత్వ సేవక వ్యవస్థగా మాత్రమే నడపడం రేవంత్ రెడ్డి సర్కార్‌కి అతిపెద్ద పరీక్ష కానుంది. ఏపీ చేదు అనుభవాలు పునరావృతం కాకుండా పక్కా పారదర్శక నిబంధనలతో ముందడుగు వేస్తేనే ఈ ‘వలంటీర్ వ్యవస్థ’ కాంగ్రెస్‌కు రాజకీయ రక్షణ కవచంగా మారుతుంది తప్ప లేకపోతే ఎదురుదెబ్బగా మారే ప్రమాదమూ ఉంది.

Bharat Summit Congress vs BJP: భారత్ సమ్మిట్ ఇన్వెస్ట్‌మెంట్ సదస్సా ? కాంగ్రెస్ ఐడియాలజీ ప్రచారమా?

Raja Sekhar Allu — Thu, 12 Nov 2026 08:43:46 +0530

Bharat Summit Hyderabad November 2026: తెలంగాణ రాజధాని హైదరాబాద్ వేదికగా నవంబర్ 13, 14 తేదీల్లో జరగనున్న ప్రతిష్టాత్మక అంతర్జాతీయ భారత్ సమ్మిట్ చుట్టూ ఇప్పుడు జాతీయ స్థాయిలో రాజకీయ చర్చ ప్రారంభమైంది. ఒకవైపు రాష్ట్రానికి అంతర్జాతీయ పారిశ్రామిక ప్రగతిని, సాంకేతిక పెట్టుబడులను తీసుకురావడమే లక్ష్యంగా ముఖ్యమంత్రి ఎనుముల రేవంత్ రెడ్డి నేతృత్వంలోని ప్రభుత్వ యంత్రాంగం కార్యక్రమ ఏర్పాట్లను ముమ్మరం చేస్తోంది. అయితే, ఈ వేదికపై సీనియర్ కాంగ్రెస్ నేతలు చేసిన సంచలన వ్యాఖ్యలు, ఏఐసీసీ అగ్రనేతల భాగస్వామ్యం చూస్తుంటే.. ఇది కేవలం పారిశ్రామిక సదస్సా లేక కాంగ్రెస్ పార్టీ సిద్ధాంత ప్రచార వేదికనా అనే ప్రశ్నలు దౌత్య, రాజకీయ వర్గాల్లో వ్యక్తమవుతున్నాయి.

రాహుల్ గాంధీ హాజరుపై వివాదం

వివాదానికి ప్రధాన బీజం ఏఐసీసీ వేదికగా సీనియర్ నేత, మాజీ విదేశాంగ మంత్రి సల్మాన్ ఖుర్షిద్ చేసిన తాజా వ్యాఖ్యలే కారణం. స్విట్జర్లాండ్‌లోని దావోస్ సదస్సు తరహాలో హైదరాబాద్‌ను ఒక శాశ్వత అంతర్జాతీయ మేధో కేంద్రంగా తీర్చిదిద్దుతామని చెబుతూనే.. ప్రస్తుత కేంద్ర ప్రభుత్వ విదేశాంగ ధోరణులను ఆయన పరోక్షంగా ప్రశ్నించారు. నెహ్రూ అలీన విధానం, ఇందిరా గాంధీ, రాజీవ్ గాంధీలు రూపకల్పన చేసిన రాజనీతి సిద్ధాంతాలతో పాటు భవిష్యత్ ప్రపంచానికి రాహుల్ గాంధీ అందించే నూతన అంతర్జాతీయ దృక్పథాన్ని ప్రపంచ ప్రతినిధుల ముందుంచే వేదికగా దీనిని నిర్వహిస్తున్నామని ప్రకటించడం ద్వారా ఈ సదస్సు చుట్టూ రాజకీయ సమీకరణాలు వేడెక్కాయి.

కాంగ్రెస్ భావజాలాన్ని వ్యాప్తి చేసే ప్రయత్నమని విమర్శలు

లోక్‌సభ ప్రతిపక్ష నేత రాహుల్ గాంధీ స్వయంగా విచ్చేస్తుండటంతో పాటు శామ్ పిట్రోడా, శశి థరూర్, గుర్దీప్ సప్పల్ వంటి కాంగ్రెస్ రంగాధిపతులు ఈ కార్యక్రమ రూపకల్పనలో ప్రధాన భూమిక పోషించడం విశేషం. ప్రపంచవ్యాప్తంగా 70కి పైగా దేశాల నుంచి విచ్చేస్తున్న దాదాపు 1,000 మంది ప్రతినిధులతో భౌగోళిక రాజకీయాలు, ప్రగతిశీల భావజాలం, ప్రజాస్వామ్య సూత్రాలపై చర్చలు జరపనున్నట్లు ప్రకటించారు. ఒక ప్రభుత్వ అధికారిక యంత్రాంగం, నిధులతో నడిచే సదస్సులో పార్టీ సిద్ధాంతాలకు, భావి రాజకీయ వ్యూహాలకు ప్రాధాన్యత ఇవ్వడం ఎంతవరకు సమంజసమనే డిబేట్ ప్రారంభమైంది.

రాహుల్ రీ లాంఛ్ ప్రోగ్రాం అని బీజేపీ ఆగ్రహం

ఈ పరిణామాలపై విపక్ష బీజేపీ అత్యంత తీవ్రస్థాయిలో ధ్వజమెత్తుతోంది. తెలంగాణ ప్రజల పన్నుల సొమ్మును, ప్రభుత్వ యంత్రాంగాన్ని రాహుల్ గాంధీ అంతర్జాతీయ ఇమేజ్ బిల్డింగ్ కోసం కాంగ్రెస్ ప్రభుత్వం దుర్వినియోగం చేస్తోందని ఎన్డీయే నేతలు ఆరోపిస్తున్నారు. నిజమైన పెట్టుబడుల సదస్సు అయితే ప్రపంచ పారిశ్రామిక దిగ్గజాలు, పరిశ్రమల ఒప్పందాలు కేంద్రంగా చర్చలు జరగాలని, అలాకాకుండా నెహ్రూ విదేశాంగ విధానం గురించి ప్రభుత్వ ఖర్చుతో సమావేశాలు పెట్టడమేంటని విపక్షాలు నిలదీస్తున్నాయి. రాష్ట్ర నిరుద్యోగులు, రైతుల ప్రయోజనాలను పక్కనబెట్టి పార్టీ ప్రచారానికి వేదికగా మార్చడాన్ని తాము అంగీకరించబోమని హెచ్చరిస్తున్నాయి.

ఇన్వెస్ట్ తెలంగాణ గ్లోబల్ సమ్మిట్ కు సన్నాహకం అన్న ప్రభుత్వం

మరోవైపు కాంగ్రెస్ ప్రభుత్వం ఈ విమర్శలను ఏమాత్రం ఒప్పుకోవడం లేదు. ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు ఈ వివాదంపై స్పందిస్తూ.. రాబోయే డిసెంబర్‌లో జరగబోయే ఇన్వెస్ట్ తెలంగాణ గ్లోబల్ సమ్మిట్ కు ఈ భారత్ సమ్మిట్ ఒక బలమైన వైజ్ఞానిక, విజ్ఞాన భూమికగా ఉపయోగపడుతుందని స్పష్టం చేశారు. కేవలం ఫ్యాక్టరీలు, పారిశ్రామిక నిధులే కాకుండా ప్రపంచ స్థాయి విధాన నిర్ణేతలు, సాంకేతిక నిపుణులు హైదరాబాద్ వేదికగా ఆలోచనలు పంచుకోవడం వల్ల తెలంగాణ బ్రాండ్ ఇమేజ్ ప్రపంచపటంలో మరింత పెరుగుతుందని, దీనిని రాజకీయ కోణంలో చూడకూడదని ప్రభుత్వం వాదిస్తోంది.

వివాదాలు మంచివేనా?

ఈ పరిణామాన్ని పక్క రాష్ట్రమైన ఆంధ్రప్రదేశ్‌తో పోల్చి చూస్తే ఆసక్తికరమైన తేడాలు కనిపిస్తాయి. విశాఖపట్నంలో నవంబర్ 12-13 తేదీల్లో జరిగే సీఐఐ భాగస్వామ్య సదస్సు సంపూర్ణంగా పారిశ్రామిక రంగాలు, ఒప్పందాల చుట్టూనే సాగుతుండగా.. హైదరాబాద్‌లో జరుగుతున్న భారత్ సమ్మిట్ మాత్రం ఆర్థిక అంశాలతో పాటు రాజకీయ, సామాజిక-రాజనీతి చర్చలకు వేదికగా మారుతోంది. అంతర్జాతీయ వేదికలపై నూతన ఆలోచనలు, పాలసీలపై చర్చలు జరగడం ఏ నగరానికైనా మైలేజ్ ఇచ్చే అంశమే. అయితే, పారిశ్రామిక ప్రగతి, ఉద్యోగ కల్పన అనే ప్రాథమిక లక్ష్యాలు నెరవేరినప్పుడే ప్రభుత్వ నిధులతో నిర్వహించే ఇటువంటి గ్లోబల్ సదస్సులకు నిజమైన సార్థకత చేకూరుతుందని అంటున్నారు.

Telangana AP CII Summit: పారిశ్రామిక సమరంలో ఏపీ vs తెలంగాణ - విశాఖ సీఐఐ, హైదరాబాద్ భారత్ సమ్మిట్ల పోరు.. గ్లోబల్ పెట్టుబడులు ఎవరికి?

Raja Sekhar Allu — Thu, 12 Nov 2026 08:14:13 +0530

AP vs Telangana Investments Competition 2026: తెలుగు రాష్ట్రాలైన ఆంధ్రప్రదేశ్, తెలంగాణల మధ్య పారిశ్రామిక పురోగతి, గ్లోబల్ పెట్టుబడుల సాధనలో సరికొత్త ఆరోగ్యకరమైన పోటీ వాతావరణం నెలకొంది. రెండు రాష్ట్రాల ప్రభుత్వాలు దాదాపు ఒకే సమయంలో మెగా పెట్టుబడుల సదస్సులను నిర్వహిస్తుండటం కార్పొరేట్ రంగాన్ని ఆకర్షిస్తోంది. తెలంగాణలోని ఎనుముల రేవంత్ రెడ్డి సర్కార్ హైదరాబాద్‌లోని హైటెక్స్ వేదికగా నవంబర్ 13-14 తేదీల్లో ప్రసిద్ధ భారత్ సమ్మిట్ 2026 ను నిర్వహిస్తుండగా.. అటు ఆంధ్రప్రదేశ్‌లో నారా చంద్రబాబు నాయుడు నేతృత్వంలోని కూటమి ప్రభుత్వం నవంబర్ 12, 13 తేదీల్లో విశాఖపట్నం వేదికగా ప్రతిష్టాత్మక 31వ సీఐఐ భాగస్వామ్య సదస్సు ను ఎంతో వైభవంగా నిపుణులతో నిర్వహిస్తోంది. రెండు సదస్సుల లక్ష్యం ఒక్కటే—అంతర్జాతీయ పారిశ్రామిక దిగ్గజాలను ఆకట్టుకుని వేల కోట్ల రూపాయల పెట్టుబడులను తమ వైపు తిప్పుకోవడమే.

పోలికలు సహజమే!

ఒకే సమయంలో ఇరు రాష్ట్రాల్లో సమ్మిట్‌లు జరగనుండటంతో సహజంగానే మీడియా, కార్పొరేట్ వర్గాల్లో పోలికలు తీవ్రమయ్యాయి. ఆంధ్రప్రదేశ్ నిర్వహించే సీఐఐ భాగస్వామ్య సదస్సుకు కేంద్ర హోంమంత్రి పీయూష్ గోయల్‌తో పాటు ప్రపంచవ్యాప్తంగా ఉన్న అంతర్జాతీయ బహుళజాతి కంపెనీల సీఈఓలు, దౌత్యవేత్తలు హాజరవుతున్నారు. సముద్ర తీర ప్రాంతం, డెస్టనీ సిటీ ఆధారంగా విశాఖను గ్లోబల్ ఇన్వెస్ట్‌మెంట్ హబ్‌గా ప్రతిపాదించి దాదాపు రూ. 11 లక్షల కోట్ల విలువైన అవగాహన ఒప్పందాలు కుదుర్చుకోవడమే లక్ష్యంగా చంద్రబాబు సర్కార్ వ్యూహాలు రచిస్తోంది. మరోవైపు, తెలంగాణ నిర్వహించే భారత్ సమ్మిట్‌లో 70కి పైగా దేశాల నుంచి 1,000 మందికి పైగా ప్రతినిధులు, పారిశ్రామికవేత్తలు, గ్లోబల్ పాలసీ మేకర్స్ పాల్గొంటున్నారు. రేవంత్ రెడ్డి నాయకత్వంలో గ్లోబల్ ఈక్విటీ, సాంకేతికత, ఫ్యూచర్ సిటీ కాన్సెప్ట్‌లతో గ్లోబల్ బ్రాండ్‌లను ఆకర్షించేందుకు పటిష్టమైన చర్యలు తీసుకుంటున్నారు. హైదరాబాద్ ఇప్పటికే పొందిన ఐటీ అండ్ ఫార్మా గ్లోబల్ అడ్వాంటేజ్‌ను మరింత ముందుకు తీసుకెళ్తూ గ్రీన్ ఎనర్జీ, ఏఐ, స్పేస్ టెక్నాలజీ విభాగాలలో వేల కోట్ల పెట్టుబడులను సాధించడమే తెలంగాణ వ్యూహంగా ఉంది.

తెలంగాణకు హైదరాబాద్.. ఏపీకి పోర్టులు

ఈ రెండు సమ్మిట్‌ల పోలికలో మౌలిక సదుపాయాలు, ఎకోసిస్టమ్స్ ప్రధాన వ్యూహాత్మక భిన్నత్వాలుగా నిలుస్తున్నాయి. తెలంగాణ తన ప్రపంచ శ్రేణి హైదరాబాద్ నగర మౌలిక వసతులు, గ్లోబల్ కేపబిలిటీ సెంటర్లు , వేగవంతమైన అనుమతుల వ్యవస్థలను ప్రధాన ఆయుధాలుగా ఉపయోగిస్తుంటే.. ఆంధ్రప్రదేశ్ తన విస్తారమైన సముద్ర తీరం, పోర్టు ఆధారిత రవాణా, గ్రీన్ హైడ్రోజన్, స్పేస్ టెక్నాలజీ హబ్‌లను చూపుతూ మల్టీనేషనల్స్ కంపెనీలకు ఆకర్షణీయమైన ప్రాధాన్యతలను అందిస్తోంది. కార్పొరేట్ సంస్థల కోణంలో చూస్తే, ఈ రేసు ద్వారా రెండు రాష్ట్రాలకు పెట్టుబడులు రావడం దేశానికే ప్రయోజనకరంగా మారుతోంది.

పోటీ వల్ల రెండు రాష్ట్రాలకూ ప్రయోజనమే!

అయితే ఏ రాష్ట్రం ఎంత సులభతర వాణిజ్యం , సింగిల్ విండో విధానం , స్థిరమైన నిధులు అందిస్తుందనే అంశంపైనే ఒప్పందాల కార్యరూపం ఆధారపడి ఉంటుంది. పెట్టుబడుల సమ్మిట్ వేదికపై ఎవరి ఒప్పందాల సంఖ్య ఎంత, ఏ రాష్ట్రం అధిక గ్లోబల్ జెయింట్స్‌ను తమ భూభాగంలోకి ఆహ్వానిస్తుందో రాబోయే రోజుల్లో తేలాల్సి ఉంది. తెలుగు రాష్ట్రాల మధ్య నెలకొన్న ఈ పెట్టుబడుల పోటీ రాజకీయ రంగానికి అతీతంగా అభివృద్ధికి కొత్త గమనకాలాన్ని ఇస్తోంది. విశాఖపట్నం పోర్టు లొకేషన్ బలం కాగా, హైదరాబాద్ ఆవిష్కరణల నెట్‌వర్క్ తెలంగాణకు అడ్వాంటేజ్. నవంబర్ రెండో వారంలో వెలువడే పెట్టుబడుల ఒప్పందాలు రాబోయే రోజుల్లో ఏపీ, తెలంగాణ రాజకీయ శ్రేణుల మైలేజ్‌ను శాసించే ప్రధాన కారకాలుగా నిలవబోతున్నాయని అనుకోవచ్చు.

CM Revanth Reddy: టెక్నాలజీ ఎంత పెరిగినా బ్లూకాలర్ ఉద్యోగాలకు ఢోకా లేదు - సీఎం రేవంత్ రెడ్డి

Satyaprasad Bandaru — Wed, 11 Nov 2026 19:18:41 +0530

CM Revanth Reddy: కాంగ్రెస్ ప్రభుత్వం మైనార్టీలకు అన్ని రకాలుగా అండగా నిలుస్తోందని సీఎం రేవంత్‌రెడ్డి స్పష్టం చేశారు. ఈ ప్రభుత్వం మైనార్టీలకు విద్య, ఉద్యోగాల్లో 4 శాతం రిజర్వేషన్లు కల్పించిందని ఆయన గుర్తుచేశారు. హైదరాబాద్‌లోని సేవాలాల్ బంజారా భవన్‌లో నిర్వహించిన జాతీయ విద్య, మైనార్టీల సంక్షేమ దినోత్సవ కార్యక్రమంలో సీఎం ముఖ్యఅతిథిగా పాల్గొని ప్రసంగించారు.

నెహ్రూ వేసిన పునాదులతోనే అభివృద్ధి

దేశ తొలి ప్రధాని జవహర్‌లాల్‌ నెహ్రూ నాడు విద్య, నీటిపారుదల రంగాలకు అధిక ప్రాధాన్యత ఇచ్చారని, ఆయన వేసిన బలమైన పునాదుల వల్లే నేడు ఆయా రంగాల్లో వృద్ధి సాధించగలిగామని రేవంత్‌రెడ్డి పేర్కొన్నారు. దేశవ్యాప్తంగా ప్రసిద్ధిగాంచిన విశ్వవిద్యాలయాలు, ఐఐటీలను కాంగ్రెస్‌ ప్రభుత్వమే ఏర్పాటు చేసిందని యువత గుర్తుచేసుకోవాలని పిలుపునిచ్చారు. నాటి దూరదృష్టి వల్లే నేడు భారతీయులు ప్రపంచ ప్రఖ్యాత సంస్థలకు సీఈవోలుగా ఎదిగారని కొనియాడారు.

నైపుణ్యాభివృద్ధికి ప్రత్యేక చర్యలు

పరిశ్రమల అవసరాలకు అనుగుణంగా యువతలో నైపుణ్యాలు పెంచడమే లక్ష్యంగా ఐటీఐలను ఏటీసీలుగా మార్చామని సీఎం తెలిపారు. అలాగే మరిన్ని వసతులతో ప్రత్యేక స్కిల్‌ యూనివర్సిటీని నిర్మిస్తున్నట్లు చెప్పారు. ఆర్టిఫిషియల్ ఇంటెలిజెన్స్ పెరుగుదల వల్ల వైట్‌ కాలర్‌ ఉద్యోగాలకు సవాళ్లు ఎదురైనప్పటికీ, టెక్నాలజీ ఎంత పెరిగినా బ్లూ కాలర్‌ జాబ్‌లకు ఎలాంటి ముప్పు ఉండదని ఆయన అభిప్రాయపడ్డారు.

మాట నిలబెట్టుకున్నాం

విద్యార్థులను కాంగ్రెస్‌ ప్రభుత్వం అన్ని విధాలుగా ప్రోత్సహిస్తోందని, మైనార్టీలకు ఇచ్చే స్కాలర్‌షిప్‌లపై కూడా భాజపా రాజకీయం చేస్తోందని విమర్శించారు. క్రికెట్‌లో రాణిస్తున్న సిరాజ్‌కు డీఎస్పీ ఉద్యోగం కల్పించామని గుర్తుచేశారు. షబ్బీర్‌ అలీ, అజారుద్దీన్‌, ఫిరోజ్‌ఖాన్‌లకు ఎన్నికల్లో పార్టీ టికెట్లు ఇచ్చామని, ఎన్నికల్లో విజయం సాధించలేకపోయినప్పటికీ ఇచ్చిన మాట ప్రకారం అజారుద్దీన్‌కు మంత్రి పదవి కల్పించామని వివరించారు.

Also Read: తెలంగాణలో విద్యా సంస్కరణలు.. వచ్చే ఏడాది నుంచి 10+2 విధానం అమలు: సీఎం రేవంత్ రెడ్డి

నైట్ ఎకానమీ పెంచేలా మూసీ, మీరాలం ప్రాజెక్టులు

పాతబస్తీ అభివృద్ధిపై ప్రత్యేక దృష్టి సారించామని సీఎం రేవంత్ రెడ్డి తెలిపారు. మీరాలం చెరువుపై రూ.600 కోట్లతో కేబుల్‌ బ్రిడ్జిని నిర్మిస్తూ అద్భుతమైన పర్యాటక ప్రాంతంగా తీర్చిదిద్దుతున్నామని చెప్పారు. మూసీ నదిలోని ఆక్రమణలను తొలగించి సుందరీకరణ పనులు వేగవంతం చేస్తున్నామని, ఈ ప్రాజెక్టు పూర్తయితే హైదరాబాద్ నగరంలో 'నైట్‌ ఎకానమీ' గణనీయంగా పెరుగుతుందని పేర్కొన్నారు.

Also Read: సీఐఐ భాగస్వామ్య సదస్సుకు ముస్తాబైన విశాఖ.. రాష్ట్ర సంస్కృతి ఉట్టిపడేలా ప్రభుత్వ ఏర్పాట్లు

Telangana Education System: తెలంగాణలో విద్యా సంస్కరణలు.. వచ్చే ఏడాది నుంచి 10+2 విధానం అమలు: సీఎం రేవంత్ రెడ్డి

Shankar Dukanam — Wed, 11 Nov 2026 18:26:02 +0530

హైదరాబాద్: తెలంగాణ విద్యా వ్యవస్థలో సంస్కరణలకు రాష్ట్ర ప్రభుత్వం చర్యలు చేపట్టింది. వచ్చే విద్యా సంవత్సరం (2027-28) నుంచి రాష్ట్రంలో 10+2 విధానాన్ని అమలు చేయాలని ప్రభుత్వం కీలక నిర్ణయం తీసుకుంది. విద్యాశాఖపై బుధవారం నిర్వహించిన ఉన్నత స్థాయి సమీక్షా సమావేశంలో సీఎం రేవంత్ రెడ్డి (Revanth Reddy) ఇందుకు అవసరమైన చర్యలు వేగవంతం చేయాలని అధికారులను ఆదేశించారు. ప్రస్తుత రోజుల్లో అవసరాలకు తగినట్లుగా రాష్ట్రంలో విద్యా విధానాన్ని మార్చాల్సిన అవసరం ఉందని, నాణ్యమైన విద్యను అందించడమే ప్రభుత్వ ప్రాథమిక ప్రాధాన్యత అని సీఎం రేవంత్ రెడ్డి స్పష్టం చేశారు. ఏ ఒక్క విద్యార్థికి నష్టం జరగకుండా నర్సరీ నుంచి టెన్ ప్లస్ టూ విధానం అమలు చేసేందుకు చర్యలు తీసుకోవాలని అధికారులను ఆదేశించారు.

నూతన విద్యా విధానం.. క్లాసుల వర్గీకరణ

తెలంగాణలో నూతన విద్యా విధానంలో విద్యార్థులకు బోధన అందించేందుకు తరగతుల వర్గీకరణను సూచించారు. నర్సరీ నుంచి 4వ తరగతి వరకు ప్రాథమిక విద్యగా నిర్ణయించారు. 5వ తరగతి నుండి 8వ తరగతి వరకు సెకండరీ విద్యగా సీఎం రేవంత్ రెడ్డి పేర్కొన్నారు. ఆపై 9వ తరగతి నుంచి ఇంటర్మీడియట్ (+2) వరకు ఉన్నత విద్యగా పరిగణించాలని అధికారులను సీఎం రేవంత్ రెడ్డి ఆదేశించారు. ముఖ్యంగా +2 స్థాయిలో విద్యార్థులలో నైపుణ్య అభివృద్ధి (Skill Development) పై ఫోకస్ చేస్తామని తెలిపారు.

ప్రభుత్వ పాఠశాలల ఆధునికీకరణ, మౌలిక వసతుల కల్పణ

ప్రైవేటు విద్యా సంస్థలకు ధీటుగా ప్రభుత్వ పాఠశాలలను తీర్చిదిద్దడమే కాంగ్రెస్ ప్రభుత్వ సంకల్పమని సీఎం రేవంత్ రెడ్డి స్పష్టం చేశారు. నియోజకవర్గానికో యంగ్ ఇండియా ఇంటిగ్రేటెడ్ స్కూల్స్ ద్వారా పేద విద్యార్థులకు అత్యుత్తమ విద్య అందించాలన్నారు. అలాగే యంగ్ ఇండియా స్కూల్స్ నిర్మాణ పనుల్లో వేగం పెంచాలని, నిర్మాణ నాణ్యత విషయంలో ఎక్కడా రాజీ పడకూడదని అధికారులకు సీఎం రేవంత్ రెడ్డి సూచించారు. వీటితో పాటు పాలిటెక్నిక్ కోర్సుల ఆధునికీకరణ ప్రక్రియకు నిధుల మంజూరును వేగవంతం చేయాలని ఆదేశించారు. సంక్షేమ హాస్టళ్లను ఇకపై అద్దె భవనాల్లో నిర్వహించకూడదని, తక్షణమే సొంత భవనాల నిర్మాణానికి చర్యలు తీసుకోవాలని స్పష్టం చేశారు. ఈ సమీక్షా సమావేశంలో తెలంగాణ ప్రభుత్వ ప్రధాన కార్యదర్శి సంజయ్ జాజు, ప్రభుత్వ సలహాదారులు కే.కేశవరావు, సుదర్శన్ రెడ్డి, ఎంపీ వేం నరేందర్ రెడ్డి, రాష్ట్ర విద్యాశాఖ ఉన్నతాధికారులు పాల్గొన్నారు.

పేద పిల్లల కలలకు చిరునామాగా యంగ్ ఇండియా ఇంటిగ్రేటెడ్ స్కూల్స్

భవనాలు నిర్మించడం సులభమే.. కానీ కలలకు పునాదులు వేయాలంటే మాత్రం ప్రభుత్వాలకు సంకల్పం ఉండాలని రేవంత్ రెడ్డి గతంలో వ్యాఖ్యానించారు. ఆ సంకల్పంతోనే రాష్ట్రంలో యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ వేగంగా నిర్మిస్తున్నామని... కులం, మతం, ప్రాంతం అనే గీతలను చెరిపేస్తూ ప్రతి చిన్నారికీ ప్రపంచ స్థాయి విద్యను అందించడమే తమ ప్రభుత్వ లక్ష్యం అన్నారు. ఈ స్కూళ్లలో చదువుకునే పేదల పిల్లలను రేపటి శాస్త్రవేత్తలుగా, పరిపాలకులుగా, పారిశ్రామికవేత్తలుగా, డాక్టర్లుగా తీర్చిదిద్దే జ్ఞాన మందిరాలుగా ఇవి నిలవబోతున్నాయన్నారు. పేద పిల్లల కలలకు చిరునామాగా తెలంగాణ మోడల్‌కు ప్రతీకగా... ఈ ఇంటిగ్రేటెడ్ రెసిడెన్షియల్ స్కూల్స్ తరతరాల భవిష్యత్తును మార్చబోతున్నాయని రేవంత్ రెడ్డి అన్నారు.

Adilabad IT Tower: ఆదిలాబాద్‌లో ఐటీ టవర్ ప్రారంభం.. 3000 ఎకరాల్లో ఇండస్ట్రియల్ కారిడార్: మంత్రి శ్రీధర్ బాబు

Shankar Dukanam — Wed, 11 Nov 2026 17:51:12 +0530

ఆదిలాబాద్ జిల్లాను ఐటీ, పారిశ్రామిక రంగాల్లో అగ్రగామిగా తీర్చిదిద్ది, స్థానిక యువతకు ఉపాధి అవకాశాలు కల్పించడమే ప్రభుత్వ ప్రధాన లక్ష్యమని తెలంగాణ ఐటీ, పరిశ్రమల శాఖల మంత్రి దుద్దిళ్ల శ్రీధర్ బాబు తెలిపారు. ఆదిలాబాద్ జిల్లా కేంద్రంలో రూ.58.85 కోట్ల వ్యయంతో పూర్తి చేసిన నూతన ఐటీ టవర్‌ను బుధవారం నాడు ఆయన ప్రారంభించారు. నిధుల కొరతతో గతంలో నిలిచిపోయిన ఈ నిర్మాణాత్మక ప్రాజెక్టును సీఎం రేవంత్ రెడ్డి సహకారంతో వేగవంతం చేసి అందుబాటులోకి తెచ్చినట్లు పేర్కొన్నారు. స్థానిక యువత ఉద్యోగాల కోసం హైదరాబాద్ వంటి మహానగరాలకు వలస వెళ్లకుండా, స్వగ్రామాల్లోనే అవకాశాలు కల్పించడమే తమ ఉద్దేశమని స్పష్టం చేశారు.

మౌలిక వసతులు, ఉపాధి అవకాశాలు

నూతన ఐటీ టవర్‌లో తెలంగాణ అకాడమీ ఫర్ స్కిల్ అండ్ నాలెడ్జ్ (TASK) శిక్షణ కేంద్రంతో పాటు ఇంక్యుబేషన్ హబ్‌ను ఏర్పాటు చేసినట్లు మంత్రి శ్రీధర్ బాబు తెలిపారు. ఇప్పటికే ఎన్టీటీ డేటా (300 మంది), ఎన్ ల్యాబ్స్ (250 మంది), వైడర్ సాఫ్ట్‌వేర్ (20 సీట్లు), పోస్ట్రిట్ ఏఐ (50 మంది) వంటి సంస్థలు కార్యకలాపాలు ప్రారంభించాయని వెల్లడించారు. వీటితో పాటు ఆదిలాబాద్‌లో 3 వేల ఎకరాల్లో ఇండస్ట్రియల్ కారిడార్ ఏర్పాటు చేయనున్నట్లు ఆయన ప్రకటించారు (తొలి విడతలో 2,000 ఎకరాలు, రెండో విడతలో 1,000 ఎకరాల భూసేకరణ). హైదరాబాద్‌కే పరిమితమైన ఐటీ సేవలను టైర్ 2, టైర్ 3 నగరాలకు విస్తరించడం ప్రభుత్వ సంకల్పమని మంత్రి పేర్కొన్నారు.

విమానాశ్రయ శంకుస్థాపన, సీసీఐ పునరుద్ధరణ

ఆదిలాబాద్‌లో విమానాశ్రయం ఏర్పాటుకు సీఎం రేవంత్ రెడ్డి ప్రత్యేక చొరవ చూపుతున్నారని, భూసేకరణ, అనుమతుల ప్రక్రియను వేగవంతం చేసి త్వరలోనే శంకుస్థాపన చేస్తామని శ్రీధర్ బాబు చెప్పారు. విమానాశ్రయం అందుబాటులోకి వస్తే ప్రాంతీయ పారిశ్రామికాభివృద్ధి మరింత వేగవంతమవుతుందని తెలిపారు. అలాగే, గతంలో మూతపడిన సిమెంట్ కార్పొరేషన్ ఆఫ్ ఇండియా (CCI) పరిశ్రమను సాంకేతిక, విధానపరమైన చిక్కులు తొలగించి పునరుద్ధరించేందుకు చర్యలు తీసుకుంటున్నామని ఆయన వెల్లడించారు.

ఈ కార్యక్రమంలో ఎంపీ గోడం నగేష్ మాట్లాడుతూ.. కేంద్ర, రాష్ట్ర ప్రభుత్వాల సమన్వయంతో విమానాశ్రయం, రైల్వే, సీసీఐ పునరుద్ధరణ ప్రాజెక్టులు పూర్తి కావాలని ఆకాంక్షించారు. ఐటీ టవర్ మంజూరు చేసినందుకు ఎమ్మెల్యే పాయల్ శంకర్ కృతజ్ఞతలు తెలిపారు. మరో ఐటీ టవర్, స్థానిక పరిశ్రమలకు ప్రత్యేక రాయితీలు ఇవ్వాలని కోరారు.

వెనుకబడిన ప్రాంతాల అభివృద్ధికి ప్రాధాన్యం ఇస్తున్నందుకు ఖానాపూర్ ఎమ్మెల్యే వెడ్మ బొజ్జు పటేల్ అభినందిస్తూ, ఆదివాసీ యువతకు ఉద్యోగ ప్రాధాన్యం, వర్సిటీ ఏర్పాటు చేయాలని విజ్ఞప్తి చేశారు. ఈ కార్యక్రమంలో ఐటీ కార్యదర్శులు అనుదీప్, శశాంక్, అడిషనల్ కలెక్టర్లు, ఎస్పీ అఖిల్ మహాజన్, ఇతర ప్రజాప్రతినిధులు, అధికారులు పాల్గొన్నారు.

Bharat Summit 2026: ప్రపంచ రాజకీయాలకు వేదికగా హైదరాబాద్ ! దావోస్ తరహాలో భాగ్యనగరం అభివృద్ధి: భట్టి విక్రమార్క

Shankar Dukanam — Wed, 11 Nov 2026 15:32:27 +0530

Bharat Summit In Hyderabad | హైదరాబాద్‌ నగరాన్ని ప్రపంచ రాజకీయ, సామాజిక, ఆర్థిక చర్చలకు మరో అంతర్జాతీయ వేదికగా తీర్చిదిద్దుతున్నామని తెలంగాణ డిప్యూటీ సీఎం భట్టి విక్రమార్క అన్నారు. కాంగ్రెస్ ప్రభుత్వం ప్రజాస్వామ్య, అహింస, ప్రగతిశీల భావజాలాన్ని విశ్వసించి ముందుకు సాగుతుందన్నారు. గత ఏడాది నిర్వహించిన భారత్ సమ్మిట్‌కు అంతర్జాతీయ స్థాయిలో స్పందన, గుర్తింపు వచ్చిందని తెలిపారు. పీసీసీ చీఫ్ మహేశ్‌ కుమార్‌ గౌడ్‌ ఆధ్వర్యంలో కాంగ్రెస్ నేతలు సన్నద్ధ సమావేశం బుధవారం ఉదయం నిర్వహించారు.

70 దేశాల నుంచి వెయ్యి మంది ప్రతినిధులు హాజరు

ఈనెల 12 నుంచి 14 వరకు నిర్వహిస్తున్న ఈ ప్రతిష్టాత్మక భారత్ సమ్మిట్‌లో సుమారు 70 దేశాల నుంచి 1000 మంది ప్రతినిధులు పాల్గొనేందుకు ఆసక్తి చూపుతున్నారని భట్టి విక్రమార్క తెలిపారు. ఆర్థిక రంగానికి స్విట్జర్లాండ్‌లోని దావోస్ నగరం ఎలాగో.. ప్రపంచ రాజకీయ, సామాజిక, ఆర్థిక చర్చలకు హైదరాబాద్ మరో కేంద్రంగా ఎదగాలని, అందుకు కృషి చేస్తామన్నారు. కాంగ్రెస్ అగ్రనేతలు రాహుల్ గాంధీ, మల్లికార్జున ఖర్గే, శ్యామ్ పిట్రోడా సహా పలువురు ప్రముఖులు ఈ సమ్మిట్‌లో పాల్గొననున్నారని తెలిపారు. ప్రజాస్వామ్య, ఉదారవాద, ప్రగతిశీల శక్తులను ఒకే వేదికపైకి తీసుకురావడమే లక్ష్యంగా భారత్ సమ్మిట్ లక్ష్యమని భట్టి విక్రమార్క పేర్కొన్నారు.

దావోస్‌ను మించేలా హైదరాబాద్.. సల్మాన్ ఖుర్షిద్

హైదరాబాద్: రాజధాని హైదరాబాద్‌లో రెండోసారి అంతర్జాతీయ స్థాయి భారత్ సమ్మిట్ నిర్వహించడం వెనుక కాంగ్రెస్ అగ్రనేతల కృషి ఎంతో ఉందని విదేశాంగశాఖ మాజీ మంత్రి సల్మాన్ ఖుర్షిద్ అన్నారు. గతేడాది హైదరాబాద్‌లో నిర్వహించిన సమ్మిట్‌కు అంతర్జాతీయ స్థాయిలో ఆదరణ లభించిందన్నారు. రాబోయే రోజుల్లో దీన్ని స్విట్జర్లాండ్‌లోని దావోస్ తరహాలో ఒక శాశ్వత గ్లోబల్ వేదికగా తీర్చిదిద్దడమే లక్ష్యమని పేర్కొన్నారు.

అదే సమయంలో ప్రస్తుత కేంద్ర ప్రభుత్వ విదేశాంగ విధానాన్ని సల్మాన్ ఖుర్షీద్ తప్పుపట్టారు. దివంగత మాజీ ప్రధానులు జవహర్ లాల్ నెహ్రూ, ఇందిరా గాంధీ, రాజీవ్ గాంధీలు నిర్మించిన విలువలతో కూడిన విదేశాంగ విధానమే దేశానికి సరైన దిక్సూచి అని పేర్కొన్నారు. తెలంగాణ ప్రభుత్వం నిర్వహిస్తున్న భారత్ సమ్మిట్ ద్వారా కాంగ్రెస్ ఆ అంతర్జాతీయ దృక్పథాన్ని మరోసారి ప్రపంచం ముందు ఉంచుతోందన్నారు.

Also Read: KRMB Letter: శ్రీశైలం, సాగర్‌ ప్రాజెక్టుల అసలు అనుమతుల వివరాలివ్వండి.. తెలంగాణ, ఏపీలకు కేఆర్‌ఎంబీ లేఖ

బీజేపీ విమర్శలకు మంత్రి శ్రీధర్ బాబు కౌంటర్

హైదరాబాద్‌లో నిర్వహిస్తున్న 'భారత్ సమ్మిట్' నేపథ్యంలో తెలంగాణ మంత్రి దుద్దిళ్ల శ్రీధర్ బాబు మాట్లాడారు. కాంగ్రెస్ అగ్రనేత, లోక్‌సభలో ప్రతిపక్షనేత రాహుల్ గాంధీపై బీజేపీ చేస్తున్న విమర్శలను ఆయన తీవ్రంగా ఖండించారు. రాహుల్ గాంధీ ఇప్పటికే అంతర్జాతీయ స్థాయి లీడర్ అని, ఆయనను కొత్తగా ప్రమోట్ చేయాల్సిన అవసరం లేదన్నారు. కాంగ్రెస్ పార్టీ ప్రగతిశీల భావజాలంతో ముందుకు సాగుతోందని, బీజేపీ విధానాలు పూర్తిగా భిన్నంగా ఉంటాయన్నారు. హైదరాబాద్ వేదికగా జరగనున్న ఈ సమ్మిట్‌లో ప్రపంచవ్యాప్తంగా ప్రజలు లేవనెత్తిన పలు సమస్యలతో పాటు, SIR అంశంపై కేంద్ర ప్రభుత్వ వైఖరి, వాటికి సంబంధించిన సరైన పరిష్కార మార్గాలపై చర్చలు జరగనున్నాయని మంత్రి శ్రీధర్ బాబు తెలిపారు.