KCR Students Plan: విద్యార్థులతోనే బీఆర్ఎస్ పునర్‌నిర్మాణం - కేసీఆర్ మాస్టర్ ప్లాన్ వర్కవుట్ అవుతుందా?

నేను బీఆరెస్ లోనే వున్నా బీజేపీలో చేరిక పై ఎందుకు ఖండించాలి

ABP Desam — Wed, 29 Apr 2026 21:16:25 +0530

నేను బీఆరెస్ లోనే వున్నా బీజేపీలో చేరిక పై ఎందుకు ఖండించాలి

Congress vs BRS: కాంగ్రెస్ వర్సెస్ బీఆర్ఎస్ మధ్యలో యాంకర్లు - ఈ రాజకీయం గీత దాటిపోతోంది !

Raja Sekhar Allu — Wed, 29 Apr 2026 16:55:46 +0530

Anchors in the middle of Congress vs BRS Politics: తెలంగాణ రాజకీయాల్లో కాంగ్రెస్ , బీఆర్ఎస్ పార్టీల మధ్య సాగుతున్న పోరు ఇప్పుడు వ్యక్తిగత దూషణలు, సోషల్ మీడియా వార్ల స్థాయికి చేరుకుంది. ముఖ్యంగా ముఖ్యమంత్రి రేవంత్ రెడ్డి , బీఆర్ఎస్ వర్కింగ్ ప్రెసిడెంట్ కేటీఆర్ మధ్య సాగుతున్న ఈ డిజిటల్ దండయాత్ర లో తాజాగా సినీ తారల పేర్లు తెరపైకి రావడం రాజకీయ వర్గాల్లో తీవ్ర చర్చనీయాంశమైంది.

ఈ వివాదానికి కేటీఆర్ చేసిన వ్యాఖ్యలు ఆజ్యం పోశాయి. ముఖ్యమంత్రి రేవంత్ రెడ్డి పేరు యాంకర్లకు కూడా గుర్తుండటం లేదని, రాష్ట్రంలో ఆయన ప్రభావం అంతంత మాత్రమేనని ఎద్దేవా చేస్తూ కేటీఆర్ మాట్లాడారు. దీనిపై కాంగ్రెస్ శ్రేణులు తీవ్రంగా స్పందించాయి. కేవలం రాజకీయ విమర్శలకే పరిమితం కాకుండా ఎంపీ చామల కిరణ్ కుమార్ రెడ్డి నటీమణులు రకుల్ ప్రీత్ సింగ్, అషురెడ్డి పేర్లను ప్రస్తావిస్తూ కేటీఆర్‌కు కౌంటర్ ఇచ్చారు. ఈ వ్యక్తిగత విమర్శలు ఒక్కసారిగా రాజకీయ సెగను పెంచేశాయి.

రేవంత్ రెడ్డి గారిని యాంకర్లు గుర్తించట్లేదు, యాక్టర్లు గుర్తించట్లేదు… అది ఆయన ఐడెంటిటీ ప్రాబ్లమ్. మేమేం చేస్తాం - @KTRBRS

ఔను కేటీఆర్… రేవంత్ రెడ్డి గారిని అషు రెడ్డి లాంటి యాంకర్లు, రకుల్ ప్రీత్ లాంటి యాక్ట్రెస్ లు మిమ్మల్ని గుర్తించినట్టు రేవంత్ రెడ్డి గారిని గుర్తించ… pic.twitter.com/SB2eMjwssM
— Kiran Kumar Chamala (@kiran_chamala) April 28, 2026

ఈ స్పందనపై బీఆర్ఎస్ నేతలు తీవ్ర ఆగ్రహం వ్యక్తం చేస్తున్నారు. రాజకీయాల్లోకి సంబంధం లేని మహిళలను లాగడం, వారిని కించపరిచేలా పోస్టులు పెట్టడం కాంగ్రెస్ సంస్కృతికి నిదర్శనమని మండిపడుతున్నారు. ఈ క్రమంలోనే బీఆర్ఎస్ సోషల్ మీడియా విభాగం నేరుగా కాంగ్రెస్ అగ్రనేత రాహుల్ గాంధీకి ఈ వ్యవహారాన్ని ట్యాగ్ చేస్తూ ఫిర్యాదు చేసింది.

To @RahulGandhi, @priyankagandhi, @MNatarajanINC

Congress leaders in Telangana are repeatedly dragging women, who have nothing to do with political life, into cheap and baseless political attacks.

It has unfortunately become a routine for your party leaders to resort to vile… pic.twitter.com/yGrygfhS2J
— BRS Party (@BRSparty) April 29, 2026

ముఖ్యమంత్రి పదవిలో ఉన్న వ్యక్తిని పదేపదే అవమానిస్తున్న బీఆర్ఎస్ నేతలకు తాము తగిన భాషలోనే సమాధానం చెబుతున్నామని కాంగ్రె్స సమర్థించుకుంటోంది. ప్రస్తుతం ఈ సోషల్ మీడియా పంచాయతీ ఎటు దారితీస్తుందో అన్నది ఆసక్తికరంగా మారింది. ముఖ్యమంత్రి రేవంత్ రెడ్డిని తక్కువ చేసి చూపే ప్రయత్నంలో బీఆర్ఎస్, కేటీఆర్ వ్యక్తిగత ఇమేజ్‌ను దెబ్బతీసే ప్రయత్నంలో కాంగ్రెస్ పోటాపోటీగా వ్యవహరిస్తుండటంతో తెలంగాణ రాజకీయం మరింత వేడెక్కింది.

TS SSC Results 2026 District wise Results: తెలంగాణ టెన్త్ ఫలితాల్లో ములుగు జిల్లాటాప్, చివరి స్థానంలో హైదరాబాద్.. జిల్లాలవారీగా ఫలితాలు

Shankar Dukanam — Wed, 29 Apr 2026 16:08:46 +0530

Telangana 10th Class results 2026 | తెలంగాణ పదో తరగతి ఫలితాల్లో 95.15 శాతం ఉత్తీర్ణత సాధించగా.. అమ్మాయిలే పైచేయి సాధించారు. గత ఏడాదితో పోల్చితే రెండు శాతానికి ఈ ఏడాది ఫలితాల్లో రాష్ట్రంలోని గ్రామీణ జిల్లాలు అద్భుత ప్రదర్శన కనబరచగా, పట్టణ ప్రాంతాలు ముఖ్యంగా రాజధాని జిల్లా వెనుకబడి పోయింది. ములుగు జిల్లా 99.30 శాతం ఉత్తీర్ణతతో రాష్ట్రంలోనే ప్రథమ స్థానంలో నిలిచి సత్తా చాటింది. ఆ తర్వాతి స్థానాల్లో నాగర్ కర్నూల్ (99.03 శాతం), నిర్మల్ (98.96 శాతం), జగిత్యాల (98.87 శాతం) జిల్లాలు నిలిచి టాప్-4లో నిలిచాయి. అధికారిక వెబ్‌సైట్ https://results.bse.telangana.gov.in/ , https://results.bsetelangana.org/ లో విద్యార్థులు తమ రోల్ నెంబర్ ఎంటర్ చేసి రిజల్ట్స్ చెక్ చేసుకోవచ్చు.

ప్రభుత్వం విడుదల చేసిన అనుబంధ నివేదిక ప్రకారం.. మెజారిటీ జిల్లాలు 95 శాతానికి పైగా ఉత్తీర్ణతను సాధించాయి. మహబూబాబాద్ (98.81%), సంగారెడ్డి (98.69%), సూర్యాపేట (98.60%), కరీంనగర్ (98.57%), హన్మకొండ (98.56%), మరియు నల్గొండ (98.47%) జిల్లాలు టాప్-10 జాబితాలో నిలిచాయి. విద్యార్థుల సంఖ్య అత్యధికంగా ఉన్న రంగారెడ్డి జిల్లా 91.25% ఉత్తీర్ణత సాధించగా, వికారాబాద్ (90.58%), భద్రాద్రి కొత్తగూడెం (89.23%) జిల్లాలు జాబితాలో కింది వరుసలో ఉన్నాయి.

తెలంగాణ పదో తరగతి ఫలితాలు - మార్చి 2026 (జిల్లాల వారీగా ఉత్తీర్ణత వివరాలు)

	జిల్లా పేరు	హాజరైన విద్యార్థులు	ఉత్తీర్ణులైన వారు	పాస్ శాతం
1	ములుగు	3287	3264	99.30
2	నాగర్ కర్నూల్	10641	10538	99.03
3	నిర్మల్	9743	9642	98.96
4	జగిత్యాల	12687	12544	98.87
5	మహబూబాబాద్	8152	8055	98.81
6	సంగారెడ్డి	24573	24252	98.69
7	సూర్యాపేట	12351	12178	98.60
8	కరీంనగర్	13137	12949	98.57
9	హన్మకొండ	12065	11891	98.56
10	నల్గొండ	19667	19366	98.47
11	జయశంకర్ భూపాలపల్లి	3541	3483	98.36
12	యాదాద్రి భువనగిరి	8918	8766	98.30
13	సిద్దిపేట	15325	14995	97.85
14	నారాయణపేట	8306	8125	97.82
15	రాజన్న సిరిసిల్ల	7310	7145	97.74
16	పెద్దపల్లి	7488	7316	97.70
17	జనగామ	6443	6292	97.66
18	కామారెడ్డి	13119	12787	97.47
19	వనపర్తి	7210	7027	97.46
20	మంచిర్యాల	9684	9413	97.20
21	ఆదిలాబాద్	10875	10538	96.90
22	మెదక్	11232	10853	96.63
23	వరంగల్	9485	9034	95.25
24	మేడ్చల్	48855	46531	95.24
25	ఖమ్మం	16958	16131	95.12
26	మహబూబ్ నగర్	13199	12482	94.57
27	నిజామాబాద్	24365	22961	94.24
28	కొమురం భీమ్ ఆసిఫాబాద్	6932	6527	94.16
29	జోగులాంబ గద్వాల	8037	7549	93.93
30	రంగారెడ్డి	52946	49217	92.96
31	వికారాబాద్	13482	12302	91.25
32	భద్రాద్రి కొత్తగూడెం	12703	11506	90.58
33	హైదరాబాద్	74099	66115	89.23
	మొత్తం విద్యార్థులు	516815	491774	95.15

వెనుకబడిన హైదరాబాద్:
రాష్ట్ర రాజధాని హైదరాబాద్ జిల్లా ఈ ఏడాది ఫలితాల్లో చివరి స్థానంలో (33వ స్థానం) నిలిచింది. ఇక్కడ మొత్తం 74,099 మంది విద్యార్థులు పరీక్ష రాయగా, 89.23% మంది మాత్రమే ఉత్తీర్ణత సాధించారు. అన్ని జిల్లాల్లోనూ బాలుర కంటే బాలికలే అత్యుత్తమ ఫలితాలు సాధించడం విశేషం. మొత్తం మీద రాష్ట్ర సగటు ఉత్తీర్ణత 95.15% గా నమోదైంది. ఈ గణాంకాలు ప్రభుత్వ పాఠశాలలు, గ్రామీణ ప్రాంతాల్లో పెరుగుతున్న విద్యా ప్రమాణాలకు నిదర్శనంగా నిలుస్తున్నాయి.

అత్యల్ప ఉత్తీర్ణత శాతం నమోదైన చివరి 5 జిల్లాలు

హైదరాబాద్ జిల్లా: 89.23% ఉత్తీర్ణతతో రాష్ట్రంలోనే చివరి స్థానంలో (33వ స్థానం) నిలిచింది. ఇక్కడ మొత్తం 74,099 మంది విద్యార్థులు పరీక్ష రాయగా 66,115 మంది పాస్ అయ్యారు.

భద్రాద్రి కొత్తగూడెం జిల్లా: 90.58% ఉత్తీర్ణతతో రాష్ట్రంలో 32వ స్థానంలో ఉంది. ఇక్కడ 12,703 మందికి గాను 11,506 మంది ఉత్తీర్ణత సాధించారు.

వికారాబాద్ జిల్లా: 91.25% ఉత్తీర్ణతతో ఈ జిల్లా 31వ స్థానంలో నిలిచింది. మొత్తం 13,482 మంది విద్యార్థుల్లో 12,302 మంది ఉత్తీర్ణులు కావడంలో విజయం సాధించారు.

రంగారెడ్డి జిల్లా: 92.96% ఉత్తీర్ణతతో 30వ స్థానంలో నిలిచింది. ఇక్కడ రాష్ట్రంలోనే రెండో అత్యధిక సంఖ్యలో (52,946 మంది) విద్యార్థులు పరీక్షలకు హాజరయ్యారు.

జోగులాంబ గద్వాల జిల్లా: 93.93% ఉత్తీర్ణతతో జాబితాలో కింద నుండి ఐదవ స్థానంలో అంటే 29వ స్థానంలో నిలిచింది. ఇక్కడ 8,037 మంది విద్యార్థులు పరీక్ష రాయగా 7,549 మంది పాస్ అయ్యారు.

Husky Dogs: ఖరీదైన హస్కీ కుక్కల్ని పెంచి రోడ్డున వదిలేశారు - కాపాడిన స్వచ్చంద సంస్థలు - ఎవరి పని?

Raja Sekhar Allu — Wed, 29 Apr 2026 15:51:24 +0530

Expensive husky dogs abandoned: నగర శివార్లలోని శంకర్ పల్లి-పటాన్‌చెరు రహదారిపై అత్యంత దారుణమైన జంతు హింస వెలుగుచూసింది. మంచు ప్రదేశాల్లో పెరిగే అత్యంత ఖరీదైన సైబీరియన్ హస్కీ జాతికి చెందిన సుమారు 40 కుక్కలను గుర్తుతెలియని వ్యక్తులు ఒక ట్రక్కులో తీసుకువచ్చి నిర్మానుష్య ప్రాంతంలో వదిలేశారు. తీవ్రమైన ఎండలు, ఆహారం, నీరు లేక ఆ మూగజీవాలు అల్లాడిపోయాయి. ఈ విషయం తెలిసిన స్వచ్చంద సంస్థల సభ్యులు తక్షణమే రంగంలోకి దిగి రెస్క్యూ ఆపరేషన్ చేపట్టారు. అయితే రెస్క్యూ టీమ్ అక్కడికి చేరుకునే సమయానికే పరిస్థితి హృదయ విదారకంగా మారింది. అప్పటికే ఒక కుక్క ప్రాణాలు కోల్పోగా, మరికొన్ని కుక్కలు ఎండ వేడిని తట్టుకోలేక సమీపంలోని అటవీ ప్రాంతంలోకి పరుగులు తీశాయి. కొంతమంది దారి వెంట వెళ్లేవారు మరికొన్ని కుక్కలను వెంట తీసుకెళ్లినట్లు సమాచారం.

నిజానికి హస్కీలు చల్లని వాతావరణంలో మాత్రమే జీవించగలవు. వాటిని పెంచుకునేవారు ఏసీ రూముల్లో ఉంచి చూసుకుంటారు. అయితే వీటిని ఇలా రోడ్డుపై వదిలేయడంతో మండుతున్న ఎండలు వాటి ప్రాణాలకు ముప్పుగా మారాయి. రెస్క్యూ టీమ్ పట్టుకోగలిగిన ఆరు కుక్కలను సురక్షితంగా రక్షించి, తమ షెల్టర్ హోమ్ కు తరలించి వైద్యం అందిస్తున్నారు. అడవిలోకి వెళ్లిన మిగిలిన కుక్కల కోసం గాలింపు చర్యలు కొనసాగుతున్నాయి. అసలు ఇన్ని కుక్కలను ఒకేసారి ఎవరు, ఎందుకు వదిలేశారనే కోణంలో విచారణ జరుగుతోంది.

నిజానికి సైబీరియన్ హస్కీలు అంటే మార్కెట్‌లో వేల రూపాయల ఖరీదు చేసే జాతి. ఇంత భారీ సంఖ్యలో, సుమారు 40 కుక్కలను రోడ్డుపై వదిలేశారంటే దీని వెనుక ఏదైనా ఇల్లీగల్ బ్రీడింగ్ సెంటర్ ఉండే అవకాశం ఎక్కువగా కనిపిస్తోంది. లాభాల కోసం కుక్కలను మిషన్లలా వాడేసి, అవి వయసు పైబడటమో లేదా అనారోగ్యానికి గురికావడమో జరిగితే, వాటి పోషణ భారం అనిపించి ఇలా నిర్దాక్షిణ్యంగా రోడ్డు పాలు చేసి ఉండవచ్చునని అనుమానిస్తున్నారు. ఏదైనా బ్రీడింగ్ యూనిట్ ప్రభుత్వం పట్టుకుంటుందనే భయంతో రాత్రికి రాత్రే ఇలా ట్రక్కులో తెచ్చి పారేసి ఉంటారని జంతు ప్రేమికులు అనుమానిస్తున్నారు.

ఈ కుక్కల మెయింటెనెన్స్ చాలా ఖరీదైన వ్యవహారం. వీటికి ఏసీ వాతావరణం, ఖరీదైన ఆహారం అవసరం. ప్రస్తుత వేసవిలో ఏసీ ఖర్చులు, పెరుగుతున్న నిర్వహణ భారమై భరించలేక యజమానులు చేతులెత్తేసి ఉండవచ్చు. అయితే, విక్రయించడానికి ప్రయత్నిస్తే దొరికిపోతామనే భయంతోనో, లేక చట్టపరమైన చిక్కులు వస్తాయనో ఇలా గాలికి వదిలేసి ఉంటారని భావిస్తున్నారు.

Komatireddy Rajagopal Reddy: తండ్రికి విలువ ఇవ్వని కవిత ప్రజలకేం మేలు చేస్తారు - కొత్తపార్టీపై రాజగోపాల్ రెడ్డి విమర్శలు

Raja Sekhar Allu — Wed, 29 Apr 2026 15:06:46 +0530

rajagopal Reddy criticized Kavitha Party: మునుగోడు ఎమ్మెల్యే కోమటిరెడ్డి రాజగోపాల్ రెడ్డి బుధవారం మీడియా సమావేశంలో మాజీ ఎమ్మెల్సీ కల్వకుంట్ల కవితపై తీవ్ర విమర్శలు చేశారు. డబ్బులు ఉన్నాయని పార్టీ పెట్టడం అంటే పాన్ షాప్ పెట్టినంత సులువు అయిపోయింది అంటూ ఆయన ఎద్దేవా చేశారు. కవిత నూతనంగా ప్రారంభించిన పార్టీ వల్ల ఎటువంటి ఉపయోగం ఉండదని, ఆమెతో ఊదు కాలదు.. పీరు లేవదు అంటూ ఘాటు వ్యాఖ్యలు చేశారు. రాజకీయాల్లో రాణించాలంటే ప్రజాబలం ఉండాలి కానీ, కేవలం ఆర్థిక బలం సరిపోదని ఆయన హితవు పలికారు.

కేసీఆర్ ను విమర్శించడాన్ని తప్పు పట్టిన కోమటిరెడ్డి

కవిత తన మొదటి సమావేశంలోనే సొంత తండ్రి, మాజీ సీఎం కేసీఆర్‌ను విమర్శించడాన్ని రాజగోపాల్ రెడ్డి తీవ్రంగా తప్పుపట్టారు. ఉద్యమకారుడిగా పేరున్న కేసీఆర్‌ను ఆయన బిడ్డ విమర్శించడం తనను బాధించిందని, తండ్రికి విలువ ఇవ్వని వ్యక్తి ప్రజలకు ఏ విధంగా సేవ చేస్తుందని ఆయన ప్రశ్నించారు. తన అన్న కేటీఆర్ మీద ఉన్న వ్యక్తిగత కోపాన్ని తండ్రి మీద చూపించడం సరైన పద్ధతి కాదని, టీఆర్ఎస్ పేరుతో పార్టీ పెట్టి కేసీఆర్‌ను విమర్శించడం హాస్యాస్పదమని పేర్కొన్నారు.

ఉద్యమకారుడి బిడ్డగానే కవితకు గుర్తింపు

కవితకు కేవలం ఉద్యమకారుడి బిడ్డగానే గుర్తింపు ఉందని, అంతకు మించి ఆమెకు వ్యక్తిగత ఛరిష్మా లేదని రాజగోపాల్ రెడ్డి విమర్శించారు. ఆమె పార్టీ పెట్టడం పక్కన పెడితే, రాబోయే ఎన్నికల్లో పోటీ చేస్తే కనీసం డిపాజిట్ కూడా రాదని జోస్యం చెప్పారు. అలాగే ఢిల్లీ మద్యం కుంభకోణం కేసును ప్రస్తావిస్తూ.. ఆ కేసులో ఆమెకు ఇంకా క్లీన్ చిట్ రాలేదని, చట్టం తన పని తాను చేసుకుపోతుందని ఆయన గుర్తు చేశారు.

ఎమ్మెల్యే కోమటిరెడ్డి రాజగోపాల్ రెడ్డి, కవిత పై తీవ్ర వ్యాఖ్యలు చేశారు. పార్టీ స్థాపనను ఎగతాళి చేస్తూ,కేసీఆర్ లేకపోతే కవిత ఎక్కడ ఉంటుందని ప్రశ్నించారు. తండ్రిని గౌరవించలేనివారు ప్రజలను ఎలా నడిపిస్తారని విమర్శించారు.#Kavitha #KCR #KomatireddyRajGopalReddy #TelanganaPolitics pic.twitter.com/h3Kok1JeLq
— Telangana Nestham (@TNestham) April 29, 2026

మంత్రి పదవి ఇస్తే న్యాయం చేస్తా !

మంత్రి పదవి పై పార్టీ అధిష్టానం తనకు ముందే హామీ ఇచ్చిందని వెల్లడించారు. ఒకవేళ తనకు మంత్రి పదవి దక్కితే, ఆ బాధ్యతకు పూర్తి స్థాయిలో న్యాయం చేస్తానని ఆశాభావం వ్యక్తం చేశారు. నియోజకవర్గ అభివృద్ధికి, పార్టీ బలోపేతానికి నిరంతరం శ్రమిస్తానని, పదవులు ఉన్నా లేకున్నా తాను ప్రజల మనిషినేనని రాజగోపాల్ రెడ్డి ఈ సందర్భంగా స్పష్టం చేశారు.

Telangana SSC Results 2026: తెలంగాణ టెన్త్ క్లాస్ రిజల్ట్స్ విడుదల.. 95.15 శాతం విద్యార్థులు పాస్.. ఫలితాల కోసం డైరెక్ట్ లింక్

Shankar Dukanam — Wed, 29 Apr 2026 14:02:54 +0530

Telangana SSC Results 2026 | హైదరాబాద్: తెలంగాణ పదో తరగతి విద్యార్థుల సుదీర్ఘ నిరీక్షణకు నేటితో తెరపడింది. రాష్ట్ర విద్యాశాఖ బుధవారం మధ్యాహ్నం 2 గంటలకు ఎస్సీఈఆర్టీ (SCERT) కార్యాలయంలో ఫలితాలను విడుదల చేసింది. పరీక్షలకు హాజరైన వారిలో 95.15 శాతం మంది విద్యార్థులు పాసయ్యారు. తెలంగాణ ప్రభుత్వ సలహాదారు కే. కేశవరావు, విద్యాశాఖ సెక్రటరీ యోగితారాణా టెన్త్ బోర్డ్ ఎగ్జామ్ ఫలితాలను వెల్లడిస్తారు. విద్యార్థులు ఫలితాలను అధికారిక వెబ్‌సైట్ https://results.bse.telangana.gov.in/ , https://results.bsetelangana.org/ లో డైరెక్ట్ లింక్ ద్వారా చెక్ చేసుకోవచ్చు.

రాష్ట్రవ్యాప్తంగా మొత్తం 5,26,166 మంది అభ్యర్థులు పరీక్షలకు హాజరు కాగా, అందులో 4,97,312 మంది ఉత్తీర్ణత సాధించారు. మొత్తం 95.15 శాతం మంది టెన్త్ విద్యార్థులు పాసయ్యారు. గత ఏడాదితో (92.78%) పోలిస్తే ఈసారి ఫలితాలు మెరుగయ్యాయి.

వాట్సాప్‌లో Hi లని మెస్సేజ్ చేస్తే ఫలితాలు..
విద్యార్థులు తమ ఫలితాలను అధికారిక వెబ్‌సైట్ https://bse.telangana.gov.in/ ద్వారా చూసుకోవచ్చు. అంతేకాకుండా, ఈసారి సాంకేతికతను జోడిస్తూ వాట్సాప్‌లో కూడా ఫలితాలను పొందే వెసులుబాటు కల్పించారు. దీనికోసం అభ్యర్థులు 8096958096 నంబర్‌ను సేవ్ చేసుకుని, వాట్సాప్‌లో Hi అని మెసేజ్ చేయాలి. అనంతరం SSC Results లేక టెన్త్ క్లాస్ రిజల్ట్స్ అని కనిపిస్తే.. క్లిక్ చేసి, హాల్‌టికెట్ నంబర్ ఎంటర్ చేస్తే వెంటనే ఫలితాలు స్క్రీన్‌పై కనిపిస్తాయి. ఆ రిజల్ట్స్ పీడీఎఫ్ రూపంలో డౌన్‌లోడ్ చేసుకోవాలి. విద్యార్థుల సౌకర్యార్థం ఈ నూతన విధానాన్ని ప్రవేశపెట్టినట్లు విద్యాశాఖ అధికారులు తెలిపారు.

మరోసారి సత్తా చాటిన అమ్మాయిలు
ఈ ఏడాది కూడా ఉత్తీర్ణతలో బాలుర కంటే బాలికలే పైచేయి సాధించారు. బాలికల ఉత్తీర్ణత శాతం 96.26% గా నమోదు కాగా, బాలుర ఉత్తీర్ణత శాతం 94.07% గా ఉంది. బాలుర కంటే బాలికలు 2.19 శాతం అధిక ఉత్తీర్ణత సాధించి తమ ఆధిపత్యాన్ని చాటుకున్నారు. రెగ్యులర్ అభ్యర్థుల పరంగా చూస్తే మొత్తం 5,16,815 మంది పరీక్ష రాయగా, అందులో 4,91,774 మంది పాస్ అయ్యారు.

ములుగు టాప్.. హైదరాబాద్ లాస్ట్
రాష్ట్రవ్యాప్తంగా జిల్లాల వారీగా చూస్తే, ములుగు జిల్లా 99.30% ఉత్తీర్ణతతో రాష్ట్రంలోనే ప్రథమ స్థానంలో నిలిచింది. దురదృష్టవశాత్తూ, రాష్ట్ర రాజధాని హైదరాబాద్ జిల్లా 89.23% ఉత్తీర్ణతతో చివరి స్థానంలో నిలిచింది. విద్యాసంస్థల వారీగా చూస్తే, సోషల్ వెల్ఫేర్ రెసిడెన్షియల్ పాఠశాలలు 99.1% ఉత్తీర్ణతతో అత్యుత్తమ ప్రదర్శన కనబరిచాయి. రాష్ట్రవ్యాప్తంగా 5,731 పాఠశాలలు 100% ఫలితాలను సాధించగా, 6 పాఠశాలలు మాత్రమే 0% ఫలితాలను నమోదు చేశాయి.

వాట్సాప్‌లోనే ఫలితాలు చెక్ చేసుకోండి.
- మీ ఫోన్లో 8096958096 సేవ్ చేసుకోండి.
- ఆపై మీ వాట్సాప్‌లో 8096958096కి Hi అని పంపాలి
- తర్వాత SSC Results అని టైప్ చేసి హాల్‌టికెట్ నంబర్ ఎంటర్, వివరాలు చేయాలి.
- హాల్ టికెట్ నెండర్, మీ వివరాలు సరిగ్గా ఉన్నట్లయితే స్క్రీన్‌పై రిజల్ట్ కనిపిస్తుంది.
- మీ రిజల్ట్స్ పీడీఎఫ్ రూపంలో సేవ్ చేసుకుని, ప్రింటౌట్ తీసుకోవాలి.

ఈ ఏడాది మార్చి 14 నుంచి ఏప్రిల్ 16 వరకు జరిగిన పరీక్షలకు రాష్ట్రవ్యాప్తంగా సుమారు 5.28 లక్షల మంది విద్యార్థులు హాజరయ్యారు. మే మొదటి వారంలో ఫలితాలు విడుదల చేయాలని భావించినప్పటికీ, విద్యార్థుల భవిష్యత్ దృష్టిలో ఉంచుకుని విద్యాశాఖ యుద్ధ ప్రాతిపదికన ఆన్సర్ షీట్ల వాల్యుయేషన్ పూర్తి చేసి ముందుగానే ఫలితాలను సిద్ధం చేసింది.

Kaleshwaram issue: కాళేశ్వరంలోకి సీబీఐ దింపడం ఎలా ? - సీఎం రేవంత్ ముందున్న పెద్ద టాస్క్ ఇదే !

Raja Sekhar Allu — Wed, 29 Apr 2026 08:22:46 +0530

How to bring CBI to Kaleshwaram: తెలంగాణ రాజకీయాల్లో అత్యంత ప్రతిష్టాత్మకమైన , వివాదాస్పదమైన కాళేశ్వరం ప్రాజెక్టు అక్రమాలపై ముఖ్యమంత్రి రేవంత్ రెడ్డి సరికొత్త యుద్ధ తంత్రాన్ని సిద్ధం చేశారు. ప్రాజెక్టు వైఫల్యాలపై కేవలం విమర్శలకే పరిమితం కాకుండా, ఈ వ్యవహారాన్ని కేంద్ర దర్యాప్తు సంస్థ ముంగిటకు చేర్చడం ద్వారా అటు బీఆర్ఎస్‌ను, ఇటు బీజేపీని ఏకకాలంలో ఇరకాటంలో పెట్టే వ్యూహానికి రేవంత్ పదును పెట్టారు. ఇప్పటికే సీబీఐకి సిఫారసు చేశారు. కానీ సీబీఐ మాత్రం అడుగులు వేయడం లేదు. రాజకీయ కక్షసాధింపు అనే ముద్ర పడకుండా, వ్యవస్థాగతమైన దర్యాప్తు ద్వారా బాధ్యులను బోనులో నిలబెట్టడమే లక్ష్యంగా రాష్ట్ర ప్రభుత్వం అడుగులు వేస్తోంది.

విజిలెన్స్ ఆధారంగానే సీబీఐ దర్యాప్తునకు సిఫారసు

న్యాయపరమైన చిక్కులను అధిగమించే క్రమంలో రేవంత్ సర్కార్ అత్యంత చాకచక్యంగా వ్యవహరిస్తోంది. జస్టిస్ పీసీ ఘోష్ కమిషన్ నివేదిక ఆధారంగా కఠిన చర్యలు తీసుకోవద్దన్న హైకోర్టు మధ్యంతర ఆదేశాలు ఇప్పుడు వచ్చాయి కానీ ముందుగానే 9 నెలల కిందట సీబీఐ విచారణ కోరుతూ పంపిన సిఫారసులో ఆ కమిషన్ ప్రస్తావన లేకుండా జాగ్రత్త పడ్డారు. దీనికి బదులుగా, గతంలో విజిలెన్స్ అండ్ ఎన్‌ఫోర్స్‌మెంట్ ఇచ్చిన ప్రాథమిక నివేదికలను, ప్రాజెక్టులో జరిగిన నిధుల మళ్లింపు ఆరోపణలను ప్రధాన ప్రాతిపదికగా చూపారు. తద్వారా సీబీఐ రంగప్రవేశానికి ఉన్న సాంకేతిక అడ్డంకులను తొలగించారు.

స్వయంగా చర్యలు తీసుకుంటే రాజకీయంగా బ్యాక్ ఫైర్

రాష్ట్ర ప్రభుత్వమే నేరుగా బీఆర్ఎస్ అగ్రనేతలపై చర్యలకు ఉపక్రమిస్తే, అది రాజకీయంగా సానుభూతిని తెచ్చిపెట్టే అవకాశం ఉందని రేవంత్ భావిస్తున్నారు. అందుకే ఈ బంతిని కేంద్రం కోర్టులోకి విసిరారు. వేల కోట్ల ప్రజాధనం వృథా అయిన ఈ భారీ కుంభకోణంపై కేంద్రమే విచారణ జరిపించాలని కోరడం ద్వారా, బీజేపీ చిత్తశుద్ధిని రేవంత్ పరీక్షకు పెట్టారు. ఒకవేళ కేంద్రం సీబీఐ విచారణకు వెనుకాడుతే, మోదీ-కేసీఆర్ ఒక్కటే అనే ప్రచారాన్ని ప్రజల్లోకి బలంగా తీసుకెళ్లి, బీజేపీని డిఫెన్స్‌లో పడేయాలన్నది కాంగ్రెస్ వ్యూహంగా కనిపిస్తోంది. రాష్ట్ర బీజేపీ నేతలకు కూడా ఒక సవాల్‌గా మారింది. సీబీఐ దర్యాప్తునకు పచ్చజెండా ఊపితే ఆ క్రెడిట్ రేవంత్ రెడ్డి ఖాతాలోకి వెళ్తుందన్న ఆందోళన వారిలో ఉంది. ఒకవేళ మౌనంగా ఉంటే బీఆర్ఎస్‌ను కాపాడుతున్నారన్న విమర్శలు మూటగట్టుకోవాల్సి వస్తుంది. ఒకవేళ విచారణ ప్రారంభమై కేసీఆర్ కుటుంబం చుట్టూ ఉచ్చు బిగుస్తే, బీఆర్ఎస్ బలహీనపడి ఆ ఓటు బ్యాంకు తమ వైపు వస్తుందని కొందరు బీజేపీ నేతలు అంచనా వేస్తున్నారు. అయితే, కేంద్రంలోని అగ్రనేతల నిర్ణయంపైనే ఈ విచారణ భవిష్యత్తు ఆధారపడి ఉంది.

సీబీఐ డైరక్టర్ ను కలవాలనుకుంటున్న రేవంత్

కేవలం లేఖలతోనే సరిపెట్టకుండా, స్వయంగా సీబీఐ డైరెక్టర్‌ను కలవడం లేదా మంత్రుల బృందాన్ని ఢిల్లీకి పంపడం ద్వారా వ్యక్తిగత ఒత్తిడి తేవాలని రేవంత్ భావిస్తున్నారు. రాష్ట్ర ప్రభుత్వం సేకరించిన ప్రాథమిక ఆధారాలను సీబీఐకి అందజేయడం ద్వారా దర్యాప్తు అనివార్యం చేయాలన్నది వారి ప్లాన్. విచారణ జరిగినా, జరగకపోయినా.. ఈ అంశాన్ని కేంద్రంపైకి నెట్టడం ద్వారా రాజకీయంగా లబ్ధి పొందవచ్చని, ప్రజాధనం విషయంలో తమ చిత్తశుద్ధిని నిరూపించుకోవచ్చని రేవంత్ సర్కార్ బలంగా నమ్ముతోంది. ఈ వ్యూహం పలిస్తే, తెలంగాణ రాజకీయాల్లో మునుపెన్నడూ లేని విధంగా పెను మార్పులు సంభవించే అవకాశం ఉంది.

CM Revanth Reddy: గేట్స్, మస్క్ కూడా పెట్టుబడులు పెట్టకపోతే బాధపడతారు - ఫ్యూచర్ సిటీపై రేవంత్ నమ్మకం

Raja Sekhar Allu — Tue, 28 Apr 2026 21:24:25 +0530

Future City is for future generations: తెలంగాణ రాష్ట్ర భవిష్యత్తును మార్చేలా ఇబ్రహీంపట్నం ప్రాంతంలో భారత్ ఫ్యూచర్ సిటీ ని అద్భుత నగరంగా తీర్చిదిద్దుతామని ముఖ్యమంత్రి రేవంత్ రెడ్డి ధీమా వ్యక్తం చేశారు. ఫ్యూచర్ సిటీ కమిషనరేట్ కార్యాలయ శంకుస్థాపన సందర్భంగా ఆయన మాట్లాడారు. ఈ నగరం కేవలం భవనాల సముదాయం కాదని, భవిష్యత్ తరాలకు తాము అందించే గొప్ప కానుక అని అభివర్ణించారు. ఏ నగరాలనైతే మనం ఆదర్శంగా తీసుకుంటున్నామో, ఆ న్యూయార్క్, టోక్యో వంటి ప్రపంచస్థాయి నగరాలతోనే పోటీ పడేలా ఈ ఫ్యూచర్ సిటీని నిర్మిస్తామని ఆయన స్పష్టం చేశారు.

ముఖ్యంగా రవాణా రంగంలో విప్లవాత్మక మార్పులు రాబోతున్నాయని సీఎం వెల్లడించారు. శంషాబాద్ నుండి ముంబై, బెంగళూరు, అమరావతి నగరాలకు బులేట్ రైలు కనెక్టివిటీ రాబోతోందని, ఇది ఈ ప్రాంత అభివృద్ధిని పరుగులు పెట్టిస్తుందని తెలిపారు. బిల్‌గేట్స్ అయినా, ట్రంప్ అయినా, ఎలాన్ మస్క్ అయినా ఈ నగరంలో పెట్టుబడులు పెట్టకపోతే ఏదో కోల్పోయామనే భావన కలిగేలా ఫ్యూచర్ సిటీని అభివృద్ధి చేసే బాధ్యత మా ప్రభుత్వానిది అని ఆయన పేర్కొన్నారు. పెట్టుబడిదారులకు స్వర్గధామంగా ఈ నగరాన్ని తీర్చిదిద్దడమే తమ లక్ష్యమని వివరించారు.

విపక్షాల విమర్శలపై రేవంత్ రెడ్డి తనదైన శైలిలో విరుచుకుపడ్డారు. ఫ్యూచర్ లేని వాడు ఫ్యూచర్ సిటీ కడుతున్నాడు అని కొందరు ఏడుస్తున్నారని, వారి ఏడుపే తనకు సంగీతంలా వినిపిస్తుందని ఎద్దేవా చేశారు. తన ఎదుగుదలకు ఆ విమర్శలే ఊతమిస్తాయని, అభివృద్ధి దిశగా తన పంథాను ఎట్టి పరిస్థితుల్లోనూ మార్చుకోబోనని ఆయన స్పష్టం చేశారు. రాజకీయ కుతంత్రాలకు తావులేకుండా కేవలం ప్రజా సంక్షేమం, రాష్ట్రాభివృద్ధే ధ్యేయంగా ముందుకు సాగుతామని తేల్చి చెప్పారు.

ఫ్యూచర్ సిటీ నిర్మాణం అనేది ఒక సవాలుతో కూడుకున్న పని అని, అందరూ కలిసి పనిచేస్తేనే ఇది సాధ్యమవుతుందని ముఖ్యమంత్రి పిలుపునిచ్చారు. ప్రణాళికాబద్ధంగా నగరాన్ని నిర్మించే క్రమంలో చిన్న చిన్న తప్పులు దొర్లినా, అవి ప్రభుత్వం ఉద్దేశపూర్వకంగా చేసినవి కావని రేవంత్ రెడ్డి స్పష్టం చేశారు. అనుకోకుండా ఏదైనా పొరపాటు జరిగినా సరిదిద్దడానికి నేను సిద్ధంగా ఉన్నాను.. మీరు నమ్మకం పెట్టుకుని ముందుకు నడవండి అని ఆయన ప్రజలకు, అధికారులకు హామీ ఇచ్చారు.

ఈ ఫ్యూచర్ సిటీ కేవలం ఐటీ లేదా పరిశ్రమలకే పరిమితం కాకుండా, హెల్త్ సిటీ, స్పోర్ట్స్ సిటీ, నైపుణ్య విశ్వవిద్యాలయాల మేళవింపుగా ఉండబోతోంది. భవిష్యత్తులో ఈ ప్రాంతం అంతర్జాతీయ వేదికపై తెలంగాణ ఖ్యాతిని చాటుతుందని ముఖ్యమంత్రి ఆశాభావం వ్యక్తం చేశారు. ప్రభుత్వ సంకల్పం గొప్పగా ఉన్నందున, ఎన్ని అడ్డంకులు ఎదురైనా ఈ స్వప్నాన్ని సాకారం చేసి తీరుతామని ఆయన స్పష్టం చేశారు.

హైదరాబాద్ ను ప్రపంచానికి గేట్ వే గా మార్చే నగరం ప్రజా ప్రభుత్వం నిర్మించబోయే ఫ్యూచర్ సిటీ.
రంగారెడ్డి జిల్లా మీర్ఖాన్ పేట్ లో ఈ రోజు “ఫ్యూచర్ సిటీ పోలీస్ కమిషనరేట్” నూతన భవన నిర్మాణానికి శంకుస్థాపన చేశాను. ప్రజల సహకారం, రైతుల త్యాగాలతో అద్భుతమైన నగరాన్ని నిర్మిస్తాం. నూతన నగర… pic.twitter.com/hvG8ss2ZvE
— Revanth Reddy (@revanth_anumula) April 28, 2026

ఫ్యూచర్ సిటీ భూసేకరణ విషయంలో రైతులకు ముఖ్యమంత్రి రేవంత్ రెడ్డి భరోసా ఇచ్చారు. వారు గర్వంగా, ఆనందంగా పరిహారం తీసుకునేలా చర్యలు చేపడతామ.. భూసేకరణ ప్రక్రియలో రైతుల మనసుల్లో ఎలాంటి అభద్రతా భావం తలెత్తకుండా చూడాలని అధికారులను ఆదేశించారు. అభివృద్ధి కోసం తమ సొంత భూములను త్యాగం చేసే రైతులను అధికారులు గౌరవించాలని.. ముఖ్యంగా పేద రైతుల విషయంలో మానవత్వంతో వ్యవహరించాలని ఆయన ఆదేశిచారు. రైతులు మరోచోట మెరుగైన భూమిని కొనుగోలు చేసేలా పారదర్శకమైన ఆర్థిక సహాయం అందజేస్తామని హామీ ఇచ్చారు.

సోఫా ఫ్యాక్టరీలో అగ్ని ప్రమాదం..

ABP Desam — Tue, 28 Apr 2026 18:23:23 +0530

సోఫా ఫ్యాక్టరీలో అగ్ని ప్రమాదం..

KCR Students Plan: విద్యార్థులతోనే బీఆర్ఎస్ పునర్‌నిర్మాణం - కేసీఆర్ మాస్టర్ ప్లాన్ వర్కవుట్ అవుతుందా?

Raja Sekhar Allu — Tue, 28 Apr 2026 17:49:11 +0530

BRS Reconstruction with Students : తెలంగాణ రాజకీయాల్లో మరోసారి విద్యార్థి శంఖారావం వినిపించాలని గులాబీ అధినేత కేసీఆర్ భావిస్తున్నారు. ఉద్యమ కాలంలో కేసీఆర్ పిలుపుతో ఉస్మానియా, కాకతీయ విశ్వవిద్యాలయాలు ఎలాగైతే కదిలాయో.. అదే తరహా ఇంటెన్సిటీని ప్రస్తుత రాజకీయ పోరాటాల్లోకి తీసుకురావడమే లక్ష్యంగా బీఆర్ఎస్ అడుగులు వేస్తోంది.

యువశక్తే ఆయుధంగా కేసీఆర్ రీ-లోడింగ్

తెలంగాణ ఉద్యమ సమయంలో కేసీఆర్ ప్రత్యక్షంగా రంగంలోకి రాకముందే విద్యార్థి లోకం రహదారులపైకి వచ్చింది. విద్యార్థుల పోరాటమే ఆనాడు రాజకీయ పార్టీలను ఉక్కిరిబిక్కిరి చేసింది. ఇప్పుడు అదే వ్యూహాన్ని కేసీఆర్ మళ్ళీ నమ్ముకున్నారు. ప్రతి కాలేజీలో బీఆర్ఎస్ విద్యార్థి విభాగ కమిటీలను బలోపేతం చేయాలని, యువతను ఫుల్ టైమ్ పొలిటికల్ వారియర్స్ 'గా మార్చాలని ఆయన ఆదేశించడం వెనుక ఒక బలమైన కారణం ఉంది. అధికారంలో ఉన్నప్పుడు పార్టీ యంత్రాంగం కొంత స్తబ్దుగా మారినా, ప్రతిపక్షంలో ఉన్నప్పుడు ప్రభుత్వంపై రాజీలేని పోరాటం చేయాలంటే విద్యార్థుల తెగువ అవసరమని ఆయన గుర్తించారు.

ఉద్యమ ఇంటెన్సిటీ రాజకీయాలకు సాధ్యమేనా?

అయితే, ఉద్యమ కాలం నాటి సెంటిమెంట్ వేరు, ఇప్పటి రాజకీయ అవసరాలు వేరు. ఆనాడు ప్రత్యేక రాష్ట్రం అనే ఏకైక లక్ష్యం విద్యార్థులను భావోద్వేగంతో ఏకం చేసింది. కానీ నేడు ఉపాధి కల్పన, ఫీజు రీయింబర్స్‌మెంట్, జాబ్ క్యాలెండర్ వంటి అంశాలే విద్యార్థి రాజకీయాలను శాసిస్తున్నాయి. ఇప్పటికే బీఆర్ఎస్ విద్యార్థి విభాగం నాయకులు గెల్లు శ్రీనివాస్ యాదవ్ వంటి వారి నేతృత్వంలో అసెంబ్లీ ముట్టడి, ఫీజుల బకాయిలపై నిరసనలు చేపడుతూ యాక్టివ్ అవుతున్నారు. కానీ, రాజకీయ ప్రయోజనాల కోసం చేసే పోరాటాలకు విద్యార్థులు ఏ మేరకు స్వచ్ఛందంగా కదులుతారనేది ప్రశ్నార్థకమే.

కేసీఆర్ మార్క్ వ్యూహం.. ఆకర్షణే ప్రధానం

కేసీఆర్ కేవలం నిరసనలకే పరిమితం కాకుండా, యువతకు రాజకీయ ప్రాధాన్యత కల్పించే దిశగా అడుగులు వేస్తున్నారు. కాలేజీ స్థాయిలోనే నాయకత్వ లక్షణాలు పెంచి, వారిని భవిష్యత్ ఎన్నికల ముఖచిత్రంగా చూపడం ద్వారా కొత్త రక్తాన్ని పార్టీలోకి ఎక్కించాలనుకుంటున్నారు. ప్రభుత్వంపై పోరాడే క్రమంలో విద్యార్థులు ఎదుర్కొనే కేసులను, సమస్యలను పార్టీ అండగా నిలబడి చూసుకుంటుందని భరోసా ఇవ్వడం ద్వారా వారిని యాక్టివ్ మోడ్ లోకి తీసుకురావాలని చూస్తున్నారు. ప్రస్తుత కాంగ్రెస్ ప్రభుత్వంపై విద్యార్థుల్లో ఉన్న చిన్నపాటి అసంతృప్తిని కూడా వదులుకోకూడదని బీఆర్ఎస్ భావిస్తోంది. ప్రత్యేకించి విద్యా రంగానికి కేటాయింపులు, నిరుద్యోగ భృతి వంటి హామీలపై ఉన్న వ్యతిరేకతను విద్యార్థి కమిటీల ద్వారా క్షేత్రస్థాయికి తీసుకెళ్లడం కేసీఆర్ మాస్టర్ ప్లాన్. విద్యార్థులు రోడ్లెక్కితే అది సృష్టించే ఇంపాక్ట్ మీడియాలోనూ, ప్రజల్లోనూ బలంగా ఉంటుంది. ఇది రాజకీయంగా బీఆర్ఎస్‌కు మళ్లీ పూర్వవైభవం తీసుకువస్తుందని ఆశిస్తున్నారు.

కేసీఆర్ ప్లాన్ ఫలిస్తుందా?

విద్యార్థులను రాజకీయాల కోసం రోడ్లపైకి తీసుకురావడం కేసీఆర్ లాంటి చతురత కలిగిన నేతకు పెద్ద కష్టమేమీ కాకపోవచ్చు. కానీ, కేవలం ప్రభుత్వంపై విమర్శలకే పరిమితం కాకుండా, విద్యార్థుల కెరీర్‌కు బీఆర్ఎస్ ఏ రకమైన భరోసా ఇస్తుందనే స్పష్టత ఇవ్వాల్సి ఉంటుంది. రాజకీయ సమీకరణలు మారుతున్న తరుణంలో, ఈ విద్యార్థి కమిటీలు బీఆర్ఎస్‌కు ఏ మేరకు బూస్టర్ డోస్ గా మారుతాయో చూడాలి. ఏది ఏమైనా, కేసీఆర్ తీసుకున్న ఈ నిర్ణయం తెలంగాణ రాజకీయాల్లో మరోసారి సెగ పుట్టించడం ఖాయం అనుకోవచ్చు.