Telangana News: ములుగు: మావోయిస్టు పార్టీ తెలంగాణలో కీలక మార్పు చోటుచేసుకుంది. యాప నారాయణ అలియాస్ హరిభూషణ్ కరోనాతో చనిపోవడంతో కొత్త కార్యదర్శిని నియమించారు. మావోయిస్టు పార్టీ తెలంగాణ (Maoist party Telangana) రాష్ట్ర కార్యదర్శిగా ములుగు జిల్లా తాడ్వాయి మండలం కాల్వపల్లికి చెందిన మిలటరీ చీఫ్ బడే చొక్కారావు అలియాస్ దామోదర్ అలియాస్ మల్లన్నను ఆ పార్టీ నియమించినట్లు సమాచారం. బడే చొక్కారావు (Bade Chokka Rao) ఇటీవల కేంద్ర కమిటీ సభ్యుల సమక్షంలో పూర్తి బాధ్యతలు స్వీకరించారు. మావోయిస్టు పార్టీ మళ్లీ తన ఉనికిని చాటు కోవడంతో పాటు రాష్ట్రంలో పాగా వేసేందుకు ప్రయత్నాలు చేస్తున్నట్లు తెలుస్తోంది.
ఇప్పటివరకు ఛత్తీస్ ఘ‌ఢ్ దండకారణ్యం కేంద్రంగా మావోయిస్టులు తమ ప్రాబల్యాన్ని చాటుకుంటూ.. అప్పుడప్పుడు అలజడులు సృష్టిస్తున్నారు. అయితే మావోయిస్టు పార్టీ తెలంగాణ రాష్ట్ర కార్యదర్శి గా వ్యవహరించిన యాప నారాయణ అలియాస్ హరిభూషణ్ ఛత్తీస్ గఢ్ రాష్ట్రంలో కోవిడ్ బారినపడి 21 జూన్ 2021లో మృతి చెందిన విషయం తెలిసిందే. అప్పటి నుంచి తెలంగాణ రాష్ట్ర కార్యదర్శి స్థానాన్ని భర్తీ చేయలేదు. పార్టీ కట్టుదిట్టమైన వ్యూహాలు రచించి ఆ కీలక పదవిని తాజాగా భర్తీ చేసింది. ఈ స్థానాన్ని దక్కించు కునేందుకు మావోయిస్టు నేత ఆజాద్ సైతం తన వంతు ప్రయత్నాలు చేయగా, చివరికి మావోయిస్టు పార్టీ తెలంగాణ రాష్ట్ర కార్య దర్శిగా మిలటరీ చీఫ్ బడే చొక్కారావు అలియాస్ దామోదర్ అలియాస్ మల్లన్నను నియమించింది.
ఇటీవల మావోయిస్టు పార్టీ కేంద్ర కమిటీ కార్యదర్శి నంబాల కేశవరావు అలియాస్ బసవరాజు, ఏఓబీ రాష్ట్ర జోనల్ కమిటీ సభ్యుడు గాజర్ల రవి అలియాస్ గణేశ్, ఒడిశా రాష్ట్ర కమిటీ సభ్యుడు మల్లా రాజిరెడ్డి అలియాస్ సాయన్న, కేంద్ర కమిటీ సభ్యుడు పుల్లూరి ప్రసాదరావు అలియాస్ చంద్రన్న, పీఎల్బీఏ బెటాలియన్ కమాండర్ మడివి హిడ్మా అలియాస్ హిద్మాతోపాటు మరికొందరు కీలక నేతలతో జరిగిన సమావేశంలో బడే చొక్కారావుని తెలంగాణ రాష్ట్ర కార్యదర్శిగా నియమించారు.