CM Revanth Reddy Speech ABP Southern Rising Summit 2026: హైదరాబాద్ వేదికగా ఏబీపీ నెట్వర్క్ నిర్వహించిన ‘సదరన్ రైజింగ్ సమ్మిట్–2026’లో తెలంగాణ ముఖ్యమంత్రి ఎ. రేవంత్ రెడ్డి రాష్ట్ర విద్యారంగ అభివృద్ధికి తాము తీసుకుంటున్న విప్లవాత్మక చర్యలను వివరించారు. ప్రైవేట్ విద్యా సంస్థల్లో అందే నాణ్యమైన విద్యను ప్రభుత్వ పాఠశాలల్లోనూ అందించాలని తమ ప్రభుత్వం నిర్ణయించిందని ముఖ్యమంత్రి స్పష్టం చేశారు. ప్రభుత్వ పాఠశాలల్లోని విద్యార్థులకు నాణ్యమైన విద్యతో పాటు పౌష్టికాహారం అందించడం ద్వారా విద్యా వ్యవస్థను బలోపేతం చేస్తున్నామని ఆయన తెలిపారు.
విద్యార్థుల హాజరు శాతాన్ని పెంచేందుకు అమలు చేస్తున్న పథకాల గురించి ప్రస్తావిస్తూ.. రాష్ట్రంలోని ప్రభుత్వ పాఠశాలల్లో చదువుతున్న 27 లక్షల మంది విద్యార్థులకు అల్పాహారం , మధ్యాహ్న భోజనం అందిస్తున్నామని సీఎం రేవంత్ రెడ్డి వెల్లడించారు. ఈ కార్యక్రమం వల్ల ప్రభుత్వ పాఠశాలల్లో విద్యార్థుల హాజరు శాతం గణనీయంగా పెరిగిందని ఆయన పేర్కొన్నారు. అయితే, పదో తరగతి పూర్తయిన తర్వాత ఇంటర్మీడియట్ కళాశాలలు దూరంగా ఉండటం వంటి కారణాలతో డ్రాప్అవుట్స్ ఎక్కువగా నమోదవుతున్నాయని, ఈ సమస్యను అధిగమించి ప్రతి విద్యార్థి ఉన్నత చదువులు కొనసాగించేలా ప్రత్యేక చర్యలు తీసుకుంటున్నామని వివరించారు.
యువతకు ఉపాధి అవకాశాలు కల్పించేందుకు నైపుణ్యాభివృద్ధిపై ప్రత్యేక దృష్టి సారించామని ముఖ్యమంత్రి తెలిపారు. ఇందులో భాగంగానే అత్యంత ప్రతిష్టాత్మకంగా స్కిల్స్ యూనివర్సిటీని ఏర్పాటు చేశామని, దీనికి ప్రముఖ పారిశ్రామికవేత్త ఆనంద్ మహీంద్రా బోర్డు ఛైర్మన్గా వ్యవహరిస్తున్నారని చెప్పారు. ఈ స్కిల్స్ యూనివర్సిటీలో శిక్షణ పొందే విద్యార్థులకు వంద శాతం ఉద్యోగాలు లభిస్తున్నాయని ఆయన ధీమా వ్యక్తం చేశారు.
సాంకేతిక విద్యలోనూ సమూల మార్పులు తీసుకొస్తున్నామని పేర్కొన్న సీఎం రేవంత్ రెడ్డి.. ఇప్పటివరకు ఐటీఐలలో పాతకాలం నాటి చదువులే కొనసాగుతున్నాయని, అందుకే వాటిని ఆధునిక అడ్వాన్స్డ్ టెక్నాలజీ సెంటర్లు)** మారుస్తున్నామని తెలిపారు. ఈ ఐటీసీల ఆధునీకరణ కోసం రూ. 4 వేల కోట్లు ఖర్చు చేస్తున్నామని, ఇందులో టాటా సంస్థ ఏకంగా 86 శాతం నిధులను భరిస్తోందని వెల్లడించారు.
తెలంగాణ విద్యార్థులు కేవలం వివిధ సంస్థల్లో ఉద్యోగులుగా పనిచేయడానికే పరిమితం కాకుండా, వారే సొంతంగా కొత్త సంస్థలను స్థాపించే స్థాయికి ఎదగాలని తాము కోరుకుంటున్నామని ముఖ్యమంత్రి ఆకాంక్షించారు. అంతర్జాతీయ స్థాయి ప్రమాణాలతో కూడిన విద్యను స్థానికంగానే అందించే లక్ష్యంతో, ప్రపంచ ప్రఖ్యాత ఆక్స్ఫర్డ్, హార్వర్డ్ వంటి విద్యా సంస్థలు కూడా త్వరలోనే తెలంగాణలో తమ క్యాంపస్లను ఏర్పాటు చేయబోతున్నాయని ఆయన ప్రకటించారు.
